ရှန်းမန်ရွှယ်သေဆုံးခြင်း
Vol. 6 Ch. 118
ကျန်းချန်ရွှမ်နှင့် ရှန်းရူယန်တို့ ပိုင်ယွင်စျေးမြို့တွင် နေထိုင်လာသည်မှာ တစ်နှစ်ပင်ပြည့်သွားသည်။ ထိုကာလအတွင်း ကျန်းချန်ရွှမ်သည် အခြေခံဓာတ်ငါးပါး ဝိညာဉ်ရတနာကို အသုံးပြုပြီး အကန့်အသတ်မဲ့ဘီး ကျင့်စဉ်၏ကနဦးအဆင့်ကို အောင်မြင်စွာ ကျင့်ကြံခဲ့ပြီးဖြစ်သည့်အတွက် သူ၏ရုပ်ခန္ဓာသည် အဆင့်၂ အမြင့်ဆုံးအဆင့်ရှိ ဓမ္မလက်နက်၏ တိုက်ခိုက်မှုဒဏ်ကို ခံနိုင်စွမ်းရှိလာခဲ့သည်။ တိုက်ခိုက်မှုဒဏ်ကို အလုံးစုံချေဖျက်နိုင်ခြင်း မဟုတ်သော်လည်း အတိုင်းအတာတစ်ခုထိ ခံနိုင်ရည်ရှိလာခြင်းဖြစ်သည်။ ဓာတ်ငါးပါးအခြေခံ မန္တန်များကိုလည်း ထိုနည်းတူပင် ခုခံနိုင်စွမ်းရှိလာသည်။
အဆင့်၂ မန္တန်များအနက် ကျန်းချန်ရွှမ်ကို အပြည့်အဝ ခြိမ်းခြောက်နိုင်သည့် မန္တန်များမှာ မရှိသလောက်နည်းပါးလာပြီဖြစ်သည်။ ထို့နည်းတူ ကိုယ်ခန္ဓာမွမ်းမံခြင်း နည်းစနစ်တစ်ရပ်၏ ကနဦးအဆင့်ကို ပြီးမြောက်ခဲ့ပြီဖြစ်၍ စနစ်မှပေးအပ်ထားသော မစ်ရှင်သည်လည်း ၁၀၀% ပြီးစီးသွားပြီဖြစ်သည်။
[ ဂုဏ်ပြုပါသည် စနစ်ပိုင်ရှင်၊ ကိုယ်ခန္ဓာမွမ်းမံခြင်း နည်းစနစ်တစ်ရပ်ကို အကြိမ် ၁၀၀ အထိ ကျင့်ကြံပြီးမြောက်ပါသည်။ ဆုလာဘ်အနေနှင့် ရုပ်ပိုင်းနတ်ဘုရားစွမ်းအားဖြစ်သည့် နဂါးဆင် နတ်ဘုရားစွမ်းအားကို ရရှိပါမည်]
[ နဂါးဆင်နတ်ဘုရားစွမ်းအားကို ကောင်းကင်ဘုံနဂါးနှင့် နတ်ဆင်စွမ်းအား ဟုလည်း ခေါ်ဆိုကြပြီး စွမ်းအားအလွန်မြင့်မားသည့်အပြင် သင်၏ကျင့်ကြံမှုအဆင့်အလိုက် တိုးတက်သွားမည်ဖြစ်သည်။ အဆိုပါစွမ်းအားကို ကိုယ့်နည်းကိုယ့်ဟန်ဖြင့်လည်း ကျင့်ကြံနိုင်ပြီး သာလွန်လေးနက်သည့်အဆင့်ရောက်လျှင် လက်ညှိုးတစ်ချက်ဖြင့် ကမ္ဘာမြေကို တုန်လှုပ်နိုင်စေလိမ့်မည်]
ကျန်းချန်ရွှမ၏ လက်ရှိကျင့်ကြံမှုအဆင့်ဖြင့် အဆိုပါစွမ်းအားမျိုးကို ပိုင်ဆိုင်ရန် မဖြစ်နိုင်သော်လည်း နဂါးဆင်နတ်ဘုရားစွမ်းအားကို ရရှိပြီး အပြည့်အဝအသုံးချနိုင်ခဲ့လျှင် ကျီဖုအဆင့် ကျင့်ကြံသူများကိုပင် ခြိမ်းခြောက်နိုင်စွမ်းရှိလာမည်ဖြစ်သည်။ အရင်က မိမိထက် ကျင့်ကြံမှုအဆင့်သာလွန်သူကို ရင်ဆိုင်ရန် တစ်ခုတည်းသောနည်းလမ်းမှာ ဥက္ကာမီးလျှံဓားကို အသုံးပြုသည့်တစ်နည်းသာ ရှိခဲ့သော်လည်း ယခုအခါ ရွေးချယ်စရာ များပြားလာပြီဖြစ်သည်။ ထို့အပြင် စနစ်မှချီးမြှင့်ထားသော ပုတီးလုံးအကူအညီဖြင့် ကျီဖုအဆင့်ကို တက်လှမ်းနိုင်ရန်မှာလည်း မဝေးလှတော့ပါ။
ထိုပုတီးလုံး၏ နောက်ထပ်စွမ်းအားတစ်ရပ်မှာ ကျီဖုအဆင့်သို့ တက်လှမ်းစဉ်ကာလအတွင်း ကျန်းချန်ရွှမ်တစ်ဦးတည်းသာ ပိုင်ဆိုင်ခွင့်ရှိသော နတ်ဘုရားစွမ်းအားအချို့ကိုပါ တစ်ပါတည်း ကျင့်ကြံနိုင်ခြင်းဖြစ်သည်။ ထိုအတွေးနှင့်အတူ ကျီဖုနယ်ပယ်ကို ဝင်ရောက်ရန် လုပ်ငန်းစဉ်ကို ယခုပင် စတင်တော့မည်ဟု တွေးလိုက်သည့် တစ်ခဏတွင် ဆက်သွယ်ရေးအဆောင်က အချက်ပြလာသည်။
ကျန်းချန်ရွှမ်လည်း ကျောက်စိမ်းပြားကို အမြန်ထုတ်ယူဖတ်ရှုလိုက်ပြီးနောက် မျက်နှာအကြီးအကျယ်ပျက်သွားသည်။ ရှန်းမန်ရွှယ်တစ်ယောက် သူမနေထိုင်ရာ ဂူဗိမာန်တွင်ပင် ကွယ်လွန်သွားခဲ့ပြီဖြစ်သည်။ သည်သတင်းက ကျန်းချန်ရွှမ်၊ ရှန်းရူယန်နှင့် ရှန်းမိသားစုတစ်ခုလုံးကိုပါ ရိုက်ခတ်မှု အကြီးအကျယ်ရှိလာမှာ သေချာသည်။ ရှန်းမျိုးနွယ်စုကို နောက်ကွယ်မှ တောက်လျှောက်ထမ်းပိုးလာသူမှာ ကျီဖုနယ်ပယ် စတုတ္ထအဆင့်ရှိ ရှန်းယွမ်လုံမဟုတ်ဘဲ ကန်းယန်ဂိုဏ်း၏ ပထမဆုံး ကျီဖုအဆင့် အကြီးအကဲတစ်ဦး ဖြစ်လာခဲ့သည့် ရှန်းမန်ရွှယ်သာဖြစ်သည်။
ရှန်းယွမ်လုံမရှိသော်လည်း သူမ ရှိနေသေးလျှင် ရှန်းမိသားစုအနေနှင့် ကျင့်ကြံခြင်းလောကတွင် နေရာတစ်ခု ဆုပ်ကိုင်ထားနိုင်ဦးမည် ဖြစ်သော်လည်း ရှန်းမန်ရွှယ်မရှိတော့လျှင်တော့ အခြေအနေမတူတော့ပါ။ သူမ ရှိနေခြင်းကြောင့် ရှန်းမိသားစုနှင့် ကျန်းပိုင်လုံအကြားတွင် ဆက်ဆံမှုတစ်ခုကို ထိန်းသိမ်းထားနိုင်ခဲ့ပြီး ယခု ရှန်းမန်ရွှယ်ကွယ်လွန်ခြင်းကြောင့် အရေးကြီးသည့် ထောက်တိုင်တစ်ခုကို ဆုံးရှုံးလိုက်ရပြီဖြစ်သည်။
လက်ရှိမိသားစုအကြီးအကဲဖြစ်သူ ရှန်းတောက်မင်ကလည်း ဂူပိတ်ကျင့်ကြံမှု ထွက်မလာနိုင်သေးသလို ဘိုးဘေးဖြစ်သူ ရှန်းယွမ်လုံ၏ နောက်ဆုံးအချိန်သည်လည်း ရောက်ရှိလာတော့မည်ဖြစ်ရာ ရှန်းမျိုးနွယ်စုအတွက် သမိုင်းတလျှောက် အခက်ခဲဆုံးကာလကို ရင်ဆိုင်နေရသည်ဟု ဆိုနိုင်မည်။ ရန်သူများအနေနှင့် လက်ရှိအခြေအနေကို အခွင့်ကောင်းယူ၍ ထိုးနှက်ရန် ကြံစည်လာနိုင်သည်။
“ငါပြန်မှဖြစ်မယ်”
ကျန်းချန်ရွှမ်တစ်ယောက် ဆုံးဖြတ်ချက်ချပြီးနောက် အခန်းအပြင်ကို ခပ်သုတ်သုတ် ထွက်လာခဲ့သည်။ ရှန်းရူယန်သည်လည်း အခန်းအပြင် ရောက်ရှိနေပြီး မျက်နှာထားမှာ တည်ကြည်လေးနက်သည့် အသွင်ဆောင်နေသည်။
“ယောက်ျား ရှန်း မိသားစုက ပို့လိုက်တဲ့သတင်း ဖတ်ပြီးပြီလား။ ကျွန်မတို့ပြန်သင့်ပြီထင်တယ်”
ကျန်းချန် ရွှမ်က ခေါင်းညိတ်လိုက်ပြီး
“ဟုတ်တယ် အစ်ကိုတောက်မင်လည်း ထွက်မလာသေး၊ ဘိုးဘေးကလည်း မမာဘူးဆိုတော့ ကိုယ်တို့အမြန်ဆုံးပြန်ရမယ်”
ထို့နောက် ကျန်းချန်ရွှမ်က တစ်စုံတစ်ခုကို သတိရလိုက်ပြီး
“ဒါနဲ့ မင်းရဲ့ နတ်ဘုရားစွမ်းအား ကျင့်စဉ်က အခြေအနေဘယ်လိုလဲ၊ အောင်မြင်ခဲ့ပြီလား”
ရှန်းရူယန်က ခပ်ဖွဖွပြုံးလျက်
“လွန်ခဲ့တဲ့သုံးရက်လောက်ကတင် အောင်မြင်ခဲ့ပါပြီ။ ကျွန်မတို့နှစ်ယောက်ပေါင်းလိုက်ရင် ကျီဖုနယ်ပယ် အလယ်အဆင့် ကျင့်ကြံသူ တစ်ဦးကိုတောင် ရင်ဆိုင်အနိုင်ယူနိုင်စွမ်းရှိမယ်လို့ထင်တာပဲ”
ထိုအခါ ကျန်းချန်ရွှမ်က ဇနီးဖြစ်သူအတွက် ဝမ်းမြောက်ဝမ်းသာဖြစ်သွားပြီး ကျေနပ်အားရစွာ ချီးကျူးလိုက်သည်။ ထို့အပြင် သူ၏ နဂါးဆင်နတ်ဘုရားစွမ်းအား အကြောင်းကိုလည်း အစအဆုံး ရှင်းပြလိုက်သေးသည်။ ရှန်းရူယန်က အံ့အားသင့်သွားသလို တစ်ချိန်တည်းတွင် ပျော်ရွှင်သွားမိပြီး
“ရုပ်ပိုင်းဆိုင်ရာ နတ်ဘုရားစွမ်းအားကို အခြေခံတည်ဆောက်ခြင်း အဆင့်မှာ ပိုင်ဆိုင်ဖို့ဆိုတာ တကယ်မလွယ်တဲ့ကိစ္စပဲ။ ဒါဆိုရင် ကျွန်မတို့နောက်ဆံတင်းစရာမလိုဘဲ အိမ်ကို ချက်ချင်းပြန်လို့ရပြီပေါ့”
သည်တစ်ခေါက်ခရီးစဉ်အတွင်း ရန်သူအချို့ရရှိလာခဲ့သောကြောင့် ပိုင်ယွင်ဂိုဏ်းပိုင်နက်မှ ထွက်ခွာပြီး အိမ်သို့ပြန်မည့်အရေးမှာ ထင်ထားသလို လွယ်ကူမည်မဟုတ်မှန်း သူတို့နှစ်ဦးစလုံး ရိပ်မိထားပြီးဖြစ်သည်။ အထူးသဖြင့် ယောင်ကျန်းထျန်ဖြစ်သည်။ သူ၏ချစ်လှစွာသော မြစ်ဖြစ်သူကို ကျန်းချန်ရွှမ်တို့ သတ်ပစ်ခဲ့သည်ဖြစ်ရာ သူတို့နှစ်ဦးကို လွယ်လွယ်နှင့် ထွက်ခွာခွင့်မပေးမှာ သေချာပါသည်။
ထို့ပြင် ချူးပါ့ကျန့်လည်း ရှိသေးသည်။ ကျန်းချန်ရွှမ်တို့အနီးတွင် ဟွမ်ဝမ်ယုရှိစဉ်က တစ်စုံတစ်ရာ မကြံစည်ဝံ့သော်လည်း ယခုလို ဟွမ်ဝမ်ယုမရှိချိန်တွင် အချိန်မရွေး တိုက်ခိုက်လာနိုင်သည်ကိုလည်း ထည့်သွင်းစဉ်းစားရမည်ဖြစ်သည်။ သူ၏အကျင့်စရိုက်အရ ကျန်းချန်ရွှမ်တို့ ပိုင်ယွင်ဂိုဏ်းပိုင်နက်မှ အထွက် လမ်းခရီးတစ်နေရာတွင် ချုံခိုတိုက်ခိုက်နိုင်ချေရှိသည်။ ထို့အပြင် ကျန်းချန်ရွှမ်ထံတွင် သူအလိုရှိနေသော ဗလာကောင်းကင် ကျောက်တုံးအပြင် ပိုင်ဆိုင်မှုအတော်များများလည်း ရှိနေသည်ကို ချူးပါ့ကျန့် ရိပ်မိလောက်ပြီဖြစ်၍ တစ်ခုခုကြံစည်နေသည်မှာ သေချာသလောက်ရှိနေသည်။
များမကြာမီ ကျန်းချန်ရွှမ်နှင့် ရှန်းရူယန်တို့လည်း ပြင်ဆင်ထုပ်ပိုးပြီးပြီ ဖြစ်၍ တစ်နှစ်ကြာ နေထိုင်လာခဲ့သော ဂူဗိမာန်လေးကို နှုတ်ဆက်ထွက်ခွာလာကြတော့သည်။ ထိုစဉ် ကျန်းချန်ရွှမ်တို့နှင့် မနီးမဝေးရှိ စားသောက်ဆိုင်တစ်ခုတွင် ရှိနေသည့် ယောင်ကျန်းထျန်၏ မျက်လုံးအစုံမှာ ကျဉ်းမြောင်းသွားပြီး သူ့ရှေ့မှောက်တွင် ထိုင်ရင်း အရက်သောက်နေသည့် ချူးပါ့ကျန့်ကို မေးဆတ်ပြလိုက်သည်။
“တာအိုရောင်းရင်းချူး သောက်မနေနဲ့တော့၊ ဟိုနှစ်ယောက် ထွက်လာကြပြီ”
အရက်ကို ဇိမ်ခံ၍သောက်နေသော ချူးပါ့ကျန့်လည်း ယောင်ကျန်းထျန်စကားကိုကြားလျှင် မျက်လုံးများဝင်းလက်သွားတော့သည်။
“တာအိုရောင်းရင်းယောင် ဒီစုံတွဲကို သတ်ပြီးရင် ဗလာကောင်းကင် ကျောက်တုံးကို ကျုပ်လက်ထဲအပ်မယ်၊ ကျန်ပစ္စည်းတွေကို နှစ်ယောက်ခွဲယူမယ်လို့ ခင်ဗျားသဘောတူထားတယ်နော်”
“ကောင်းပါပြီ ကျုပ်က ကတိပျက်တဲ့ လူစားမျိုးမဟုတ်ဘူး”
ယောင်ကျန်းထျန်က အာမခံလိုက်သည်။ ထို့နောက် ကောက်ကျစ်စွာ ပြုံးလိုက်ပြီး
“မြန်မြန်လာ တာအိုရောင်းရင်းချူး၊ သူတို့နှစ်ယောက် စျေးထဲက ထွက်တော့မယ်”
***