ကျီဖုအဆင့်ကို တက်လှမ်းခြင်း (၂)

Vol. 7 Ch. 134

ထိုတစ်ခဏတွင် အစိမ်းရောင်အလင်းပွင့်တစ်ခု ဖျတ်ခနဲလင်းလာသည်။ ထို့နောက်တွင် အစိမ်းရောင်ပွင့်ခက်ပွင့်နွယ်များနှင့် မြက်ပင်များသည် ကျင့်ကြံရာဂူအတွင်း နံရံကြမ်းပြင်များတွင် အလျှိုလျှို ပေါ်ပေါက်လာကြပြီး တစ်ခန်းလုံးကို စိမ်းစိုလတ်ဆတ်သော မွှေးရနံ့များ ပက်ဖြန်းလိုက်တော့သည်။ သို့သော် ဖြစ်စဉ်မှာ ကြာရှည်မခံလိုက်။ ကျန်းချန်ရွှမ်လက်ထဲရှိ အဇူရာဧကရာဇ် ကောင်းကင်ဘုံနှိမ်ဓား၏ ပုံရိပ်မှာ တဖြည်းဖြည်း ပျောက်ကွယ်သွားသည်နှင့် မြက်ပင်များနှင့်အတူ မွှေးပျံ့သောသင်းရနံ့များသည်လည်း အလားတူ မှိန်ဖျော့ပျောက်ကွယ်သွားတော့သည်။

ကျန်းချန်ရွှမ်သည် ဖြည်းဖြည်းချင်း ထွက်သက်ကို ရှိုက်ထုတ်လိုက်သည်။ သည်တစ်ခါကျင့်ကြံမှုသည် အတော်လေးခရီးရောက်သည်ဟု ဆိုရမည်။ ကျီဖုအဆင့်ကို အောင်မြင်စွာ တက်လှမ်းနိုင်ရုံမက သူ့ကိုယ်ပိုင်စွမ်းအားတစ်ရပ်ဖြစ်သည့် အဇူရာဧကရာဇ် ကောင်းကင်ဘုံနှိမ်ဓားလက်နက်ကိုလည်း အပိုဆုအနေနှင့် ရရှိလိုက်သေးသည်။ ထို့ပြင် အဆိုပါစွမ်းအားသည် ကျန်းချန်ရွှမ်၏ ရုပ်ပိုင်းဆိုင်ရာ နတ်ဘုရားစွမ်းအားဖြစ်သည့် နဂါးဆင်နတ်ဘုရား စွမ်းအားကဲ့သို့ပင် အဆင့်မြှင့်တင်နိုင်သော စွမ်းအားဖြစ်နေသည်ကလည်း ကျန်းချန်ရွှမ်အတွက် အတိုင်းထက်အလွန် ကျေနပ်စရာဖြစ်နေပြန်သည်။

ကျင့်ကြံခြင်းလောကတွင် နတ်ဘုရားစွမ်းအား အမျိုးအစားနှစ်ရပ်ရှိပြီး ပထမတစ်မျိုးမှာ အသေဖြစ်သည်။ အဆိုပါစွမ်းအားသည် မူလရရှိစဉ်ကအတိုင်း တစ်သမတ်တည်းဖြစ်ပြီး အဆင့်မြှင့်တင်နိုင်စွမ်းမရှိပါ။ ဥပမာ ပထမဆုံးရရှိစဉ်က အဆင့်၃ ဆိုပါက ကျင့်ကြံသူ၏ အဆင့်အတန်းမှာ မည်မျှထိ မြင့်တက်သွားပါစေ အဆိုပါစွမ်းအားသည် အဆင့်၃ တွင်သာ ကျန်ရစ်ခဲ့မည်ဖြစ်သည်။ ကျန်းချန်ရွှမ်၏ နဂါးဆင် နှင့် အဇူရာဧကရာဇ် စွမ်းအားနှစ်ရပ်လုံးသည် အဆင့်မြှင့်တင်နိုင်သော စွမ်းအားအရှင်များဖြစ်၍ ကျန်းချန်ရွှမ်၏ ကျင့်ကြံမှု အဆင့်မြင့်လာသည်နှင့်အမျှ တစ်ပါတည်း လိုက်ပါတိုးတက်လာမည်ဖြစ်သည်။ အတိုချုပ်ဆိုရလျှင် အဆင့်မြှင့်တင်နိုင်သော ဒုတိယအမျိုးအစားသည် နတ်ဘုရားစွမ်းအားအရှင်သည်သာ အမြင့်ဆုံးအဆင့်ဖြစ်သည့် အဓိပတိနတ်ဘုရားစွမ်းအားအဖြစ်သို့ ကျင့်ကြံယူနိုင်ခြင်းဖြစ်သည်။

အနှစ်သာရကိုးပါး မသေမျိုး ကျင့်ကြံရေးလောကတွင် နတ်ဘုရားစွမ်းအား အများစုမှာ အသေဖြစ်ပြီး ကျန်းချန်ရွှမ်ကဲ့သို့ စွမ်းအားအရှင်ကို ပိုင်ဆိုင်ထားသူမှာ လက်ချိုးရေလို့ရသည်ဟု ဆိုနိုင်မည်။ ထို့နောက် ကျန်းချန်ရွှမ်သည် ရရှိပြီး ကျီဖုနယ်ပယ် ပထမအဆင့်ကို အခြေတည်အောင် ဆက်လက်ကျင့်ကြံလိုက်သည်။ ထိုအချိန်တွင် စနစ်မှ အချက်ပေးသံ ဝင်လာတော့သည်။

[ဂုဏ်ပြုပါသည် စနစ်ပိုင်ရှင်၊ ကျီဖုအဆင့်ကို တက်လှမ်းနိုင်ခဲ့သည့်အတွက် ဆင်ခြင်တွက်ချက်ပုတီးစေ့ကို ရရှိပါမည်]

[ဆင်ခြင်တွက်ချက် ပုတီးစေ့သည် နည်းစနစ်အမျိုးမျိုး၊ မန္တန်အမျိုးမျိုး နှင့် နတ်ဘုရားစွမ်းအားအမျိုးမျိုးအပြင် ကောင်းကင်ဘုံလျှို့ဝှက်ချက်များကိုပင် ကျိုးကြောင်းဆင်ခြင်ပြီး တွက်ဆနားလည်နိုင်စွမ်းကို ပေးစွမ်းနိုင်သည်]

အလွယ်ကူဆုံးရှင်းပြရလျှင် အဆိုပါပုတီးစေ့သည် ဘက်စုံသုံး ရတနာတစ်ပါးဖြစ်ပြီး တစ်ကြိမ်သာ အသုံးပြုနိုင်မည်ဖြစ်သည်။ တစ်ကြိမ်အသုံးပြုပြီးလျှင် အလိုလို ပျောက်ကွယ်သွားမည်ဖြစ်သည်။ စနစ်မှချီးမြှင့်သော ပုတီးစေ့အကြောင်းကို ကျန်းချန်ရွှမ် အဖန်ဖန်လေ့လာပြီးနောက်တွင် ယခုချက်ချင်းပင် ထိုပုတီးစေ့ကို အသုံးပြုလျှင် သင့်မည်လားဟု တွေးမိသည်။ သူ့တွင် အပြီးမသတ်ရသေးသည့် ပြည့်စုံမှုမရှိသော နည်းစနစ်များရှိနေသည်လေ။ ဥပမာ အကန့်အသတ်မဲ့ဘီး ကျင့်စဉ်နှင့် ကောင်းကင်ဘုံ လျှို့ဝှက်တွက်ချက်ခြင်းနည်းစနစ်များကို အဆိုပါပုတီးစေ့ကို အသုံးပြု၍ တွက်ချက်လိုက်လျှင် ပြီးပြည့်စုံသည့် ကျင့် စဉ်များဖြစ်လာမှာသေချာသည်။ ထို့ပြင် မူလဓမ္မရတနာဖြစ်သည့် ရွှေဗလာနယ်ဓားအား သန့်စင်နည်းကိုလည်း သိရှိနိုင်မည်ဖြစ်သည်။

သို့သော် ပြဿနာက ကျန်းချန်ရွှမ်အနေနှင့် အဆိုပါ နည်းစနစ်များ အားလုံးကို ဖော်ထုတ်လိုပါသော်လည်း ပုတီးစေ့အနေနှင့် တစ်ခုတည်းကိုသာ တွက်ထုတ်နိုင်ခြင်းဖြစ်သည်။ ထို့ကြောင့် ကျန်းချန်ရွှမ်အနေနှင့် သူ့အတွက် အရေးကြီးဆုံးသော နည်းစနစ်ကိုသာ ရွေးချယ်ရန်လိုအပ်ပါမည်။ ထပ်တလဲလဲ စဉ်းစားအဖြေရှာပြီးနောက်တွင် ကောင်းကင်ဘုံ လျှို့ဝှက်တွက်ချက်ခြင်း နည်းစနစ်ကို ရွေးချယ်လိုက်တော့သည်။ အကြောင်းရင်းမှာ ခုနှစ်စင်ကြယ်အဘိုးကြီး၏ ရန်ကြောင့်ဖြစ်သည်။ ထိုအဘိုးကြီးသည် သူ့ကို ဝိညာဉ်ခွဲလောက်လန်းများဖြင့် ထောင်ချောက်ဆင်ပြီးပြီဖြစ်ရာ နောက်ထပ်လည်း မည်သို့သော လက်နက်ပုန်းများဖြင့် တိုက်ခိုက်ဦးမည် မသိသေးပေ။

ကံကောင်းသည့်တစ်ချက်က ရှန်းမန်ရွှယ်ပေးအပ်ထားသည့် နည်းစနစ်သည် တွက်ချက်ခြင်းနည်းစနစ်များအနက် ထိပ်တန်းအဆင့် အမျိုးအစားဖြစ်ရာ အဆိုပါနည်းစနစ်ကို ကျင့်ကြံပြီးပါက ကောင်းကင်ဘုံလျှို့ဝှက်ချက်များကို သိရှိနိုင်ရုံမက မိမိ၏ကိုယ်ပိုင်လျှို့ဝှက်ချက်များကိုလည်း သူတစ်ပါးမသိရှိစေရန် တစ်ချိန်တည်းတွင် ကာကွယ်ထားနိုင်သည်။ ထို့ပြင် ကျင့်ကြံသူကို ကျိန်စာအမျိုးမျိုးထံမှလည်း ကာကွယ်ပေးသည့်အတွက် ခုနှစ်စင်ကြယ်လို ဝါရင့်အံတိုနေသည့် အဆင့်မြင့်ကျင့်ကြံသူတစ်ဦး၏ ဉာဏ်နီဉာဏ်နက်များကို အလွယ်တကူသိရှိနိုင်ဦးမည်ဖြစ်သည်။

ထို့ကြောင့် ကျန်းချန်ရွှမ်လည်း တွေဝေမနေဘဲ ပုတီးစေ့၏စွမ်းအားကို ကောင်းကင်ဘုံတွက်ချက်နည်းစနစ်အပေါ် အသုံးပြုလိုက်တော့သည်။ တစ်ခဏချင်းတွင် ပြည့်စုံခြင်းမရှိသည့် တွက်ချက်ခြင်းနည်းစနစ်၏ ပထမအဆင့် ကျင့်စဉ်ကို အပြည့်အစုံရရှိလိုက်သည်။ ထို့နောက် ဒုတိယအဆင့်နှင့် တတိယအဆင့်ကို ရရှိလိုက်ပြန်သည်။ သို့သော် ပုတီးစေ့၏စွမ်းအားသည် တတိယအဆင့်တွင် ထူးဆန်းစွာ ရပ်တန့်သွားသည်။ ကျန်းချန်ရွှမ် တစ်ယောက် ပထမတွင် နားမလည်နိုင်ဖြစ်သွားသော်လည်း အနည်းငယ်စဉ်းစားပြီးနောက် အကြောင်းရင်းကိုရိပ်မိသွားသည်။ လက်ရှိပုတီးစေ့သည် ကောင်းကင်ဘုံ လျှို့ဝှက်တွက်ချက်ခြင်း နည်းစနစ်၏ တတိယအဆင့်ထိသာ ဖော်ထုတ်နိုင်စွမ်းရှိပြီး စတုတ္ထနှင့်အထက် အဆင့်ရှိ ကျင့်စဉ်များကို ဆက်လက်ဖော်ထုတ်လိုလျှင် နောက်ထပ်ပုတီးစေ့များ လိုအပ်ဦးမည်ဖြစ်သည်။ ဆိုလိုသည်မှာ ဤနည်းစနစ်သည် သူထင်ထားသည်ထက် များစွာသာလွန်အဆင့်မြင့်နေခြင်းပင် ဖြစ်တော့သည်။ ဤနည်းစနစ်နေရာတွင် အခြားသော တိုက်ခိုက်ရေးနည်းစနစ်များ၊ မန္တန်များဆိုပါက ပုတီးစေ့သည် စတုတ္ထ၊ ပဥ္စမ၊ ဆဌမအဆင့်များအထိ အလွယ်တကူဖော်ထုတ်နိုင်မည်ဖြစ်သည်။

ထို့ကြောင့် ကျန်းချန်ရွှမ်သည် တွက်ချက်ခြင်းနည်းစနစ်ကို မူလကထက် အလေးအနက်ထား ကျင့်ကြံရန်ဆုံးဖြတ်လိုက်သည်။ ကောင်းကင်ဘုံ လျှို့ဝှက်တွက်ချက်ခြင်း နည်းစနစ်၏ အခြေခံလုပ်ဆောင်ချက်များမှာ ကောင်းကင်ဘုံလျှို့ဝှက်ချက်များကို ကြားဖြတ်ဖမ်းယူခြင်း၊ အနာဂတ်ဖြစ်ရပ်များကို ကြည့်ရှုခြင်းတို့ဖြစ်သည်။ သို့သော် နည်းစနစ်၏ အမြင့်ဆုံးစွမ်းအားမှာ ကျရောက်လာမည့် ကြမ္မာဆိုးဘေးရန်များကို ကြမ္မာကောင်းအဖြစ် ပြောင်းလဲနိုင်စွမ်းရှိခြင်းဖြစ်သည်။ သို့သော် သူရရှိထားသော တတိယအဆင့်အထိ ကျင့်စဉ်များတွင် အဆိုပါစွမ်းအားကို ရရှိနိုင်မည်မဟုတ်ဘဲ စတုတ္ထနှင့်အထက်အဆင့်များကို ကျင့်ကြံပြီးမှသာ ရရှိနိုင်မည်ဟု ခန့်မှန်းရသည်။ ကျန်းချန်ရွှမ်အနေနှင့် ပထမနှင့် ဒုတိယအဆင့် ကျင့်စဉ်များကို အစအဆုံးဖော်ထုတ်နိုင်ပြီဖြစ်၍ ရှန်းမန်ရွှယ်ကဲ့သို့ မိမိ၏သက်တမ်းကို စတေးရန်မလိုတော့သည်က အားသာချက်တစ်ခုဖြစ်သည်။ သို့သော် ထိုနေရာတွင် ပြဿနာတစ်ခုရှိနေပြန်သည်။ ဤနည်းစနစ်ကို လူတစ်ဦးကသာ ကျင့်ကြံနိုင်ပြီး ထိုသူသေဆုံးသွားပါက ဒုတိယမြောက်လူက ကျင့်စဉ်ကို ဆက်လက်ကျင့်ကြံ၍ မဖြစ်နိုင်ခြင်းပင်ဖြစ်သည်။

***

ကျီဖုအဆင့်ကို တက်လှမ်းခြင်း (၂)

Vol. 7 Ch. 134

***

ကျီဖုအဆင့်ကို တက်​လှမ်း​ခြင်း​ (၂)

ကျီဖုအဆင့်ကို တက်​လှမ်း​ခြင်း​ (၂)

ကျီဖုအဆင့်ကို တက်လှမ်းခြင်း (၂)

ကျီဖုအဆင့်ကို တက်လှမ်းခြင်း (၂)