လက်အောက်ခံမိသားစု
Vol. 7 Ch. 139
“အစ်ကိုပိုင်ယန် ခင်ဗျား….”
ကျန်းပိုင်ရှန်တစ်ယောက် ကျန်းပိုင်ယန် သူ့ကိုသတ်မည်ဟု မျှော်လင့်ထားခြင်း မရှိခဲ့ပါ။ ကျန်းချန်ရွှမ်တို့သုံးဦး နှင့်တကွ ကျန်းမိသားစုဂိုဏ်းတပည့်များသည်လည်း အံ့အားသင့်လျက် ငေးကြည့်နေမိကြသည်။ ကျန်းပိုင်ယန်အနေနှင့် အဘယ်ကြောင့် ဘိုးဘေးပိုင်ရှန်ကို သတ်ဖြတ်ရသနည်း ဆိုသည်ကို နားမလည်နိုင်ကြပါ။ ကျန်းပိုင်ယန်က တည်ငြိမ်စွာဖြင့်
“ပိုင်ရှန် ငါမင်းကို မသတ်ချင်ပါဘူး၊ ဒါပေမဲ့ မင်းရှိနေရင် ကျန်းမိသားစု အနှေးနဲ့အမြန် ပျက်သုဉ်းလိမ့်မယ်၊ မင်းကို ရှန်းမိသားစုလက်ချက်နဲ့လည်း မသေစေချင်ဘူး။ သူတို့မင်းကိုသတ်လိုက်ရင်လည်း ငါတို့မိသားစုနှစ်ခုကြားက ဆက်ဆံရေးက အဖတ်ဆည်လို့ရမှာ မဟုတ်တော့ပြန်ဘူး၊ ဒါကြောင့် မင်းကို ငါကိုယ်တိုင်သတ်မှဖြစ်မယ်”
ကျန်းပိုင်ယန်၏စကားလုံးများက ကျန်းချန်ရွှမ်တို့သုံးဦးအား မှင်သက်သွားစေသည်။ သို့သော် သူ၏ဆုံးဖြတ်မှုသည် အကျိုးအကြောင်း ဆီလျော်မှုရှိသည်ဟု ဆိုရပေမည်။ ကျန်းပိုင်ရှန် အသက်ရှင်နေလျှင် ကျန်းပိုင်ယန်ကွယ်လွန်ပြီးနောက်တွင် ကျန်းမိသားစု၏နိဂုံးမှာ အနှေးနှင့်အမြန် ဆိုက်ရောက်လာမည်မှာ သေချာသည်။ ထိုနည်းတူ ကျန်းပိုင်ရှန်၏ လုပ်ရပ်မှာ မည်မျှအထိ ဆိုးရွားနေပါစေ၊ သူသည် ကျန်းမျိုးနွယ်စုဝင် ကျီဖုအဆင့် ကျင့်ကြံသူတစ်ဦး ဖြစ်နေသေးသည်။ ကျန်းချန်ရွှမ်တို့သုံးဦးအနေနှင့် ကျန်းပိုင်ရှန်ကို သတ်ဖြတ်ခဲ့လျှင် ကျန်းမိသားစု၏ ရန်ငြိုးသိုခြင်းကို ရှောင်ရှားနိုင်ရန်နှင့် ရန်စမပွားစေရန် ကျန်းမိသားစုတစ်ခုလုံးကို သုတ်သင်ပစ်ရမည်ဖြစ်သည်။ ထို့ကြောင့် ကျန်းပိုင်ယန်၏ လုပ်ရပ်မှာ သူ့နည်းသူဟန်နှင့် မှန်ကန်သည်ဟု ဆိုရမည်။
ထို့ကြောင့် ကျန်းချန်ရွှမ်တို့သည်လည်း ကျန်းပိုင်ယန်၏ အနာဂတ်ကိုမျှော်တွေးနိုင်မှုနှင့် ဆုံးဖြတ်ချက်ပြတ်သားမှုအတွက် လေးစားမိလာကြသည်။ ထို့နောက် ကျန်းပိုင်ရှန်သည် ဓားမြှောင်ကိုဆွဲထုတ်လိုက်ရာ ကျန်းပိုင်ရှန်၏ မျက်လုံးများတွင် အမုန်းတရားနှင့် အမှန်တရားကို လက်သင့်မခံလိုသော အရိပ်အယောင်များ ယှက်သန်းလာပြီးနောက် သူ၏မျက်လုံးများသည် အသက်မဲ့သွားကာ မြေပေါ်သို့လဲကျသေဆုံးသွားတော့သည်။ ကျန်းချန်ရွှမ်တို့သုံးဦးသည်လည်း နတ်ဘုရားအာရုံကို အသုံးပြု၍ အလျင်အမြန် စစ်ဆေးလိုက်ရာ ကျန်းပိုင်ရှန် အမှန်တကယ် သေဆုံးသွားကြောင်း သိလိုက်ရသည်။ ထိုအခါ ကျန်းပိုင်ယန်က သူတို့သုံးဦး ကို ကြည့်ပြီး
“ဘယ်လိုလဲ တာအိုရောင်းရင်းတို့ ကျုပ်ပေးတဲ့ ဖြေရှင်းချက်ကို ဘဝင်ကျရဲ့လား”
ကျန်းချန်ရွှမ်တို့ တစ်စုံတစ်ရာ မတုံ့ပြန်နိုင်ခင်မှာပင် ကျန်းပိုင်ယန်သည် ဓားမောက်ရှည်ကို အသက်သွင်းလိုက်သည်။ အဝါရောင်စူးစူး အလင်းတန်းတစ်ခုက လေထုထဲတွင် လက်ခနဲဖြစ်သွားသည်။ အဝေးတစ်နေရာရှိ ကျန်းမိသားစုဂိုဏ်းတပည့်များထဲမှ အချို့၏ခေါင်းများ ပြတ်ထွက်ကုန်ကြသည်။ ထိုလူများအထဲတွင် ရှန်းမိသားစုထံသို့ လာရောက်အကျပ်ကိုင်ခဲ့သော ကျန်းယောင်ဇူလည်းပါဝင်သည်။
ထိုမြင်ကွင်းကြောင့် ကျန်းမိသားစုဝင် ဂိုဏ်းတပည့်များအားလုံး တုန်လှုပ်ခြောက်ခြားသွားကြသည်။ အထူးသဖြင့် ကျန်းမျိုးနွယ်စု၏ လက်ရှိမိသားစုခေါင်းဆောင်ဖြစ်သူ ကျန်းယောင်ဟိုင်ဖြစ်သည်။ ဘိုးဘေးပိုင်ယန်တစ်ယောက် သူ့ဇီဝိန်ကို ခြွေတော့မည့်အချိန်ကို စောင့်ဆိုင်းနေခဲ့သော်လည်း အချိန်အတန်ကြာထိ သူ့အသက်နှင့်ခန္ဓာ တည်မြဲနေသည်ကို တွေ့လိုက်ပြီး သက်ပြင်းချမိလိုက်သည်။ တစ်ချိန်တည်းတွင် သူနားလည်လိုက်သည်က လွန်ခဲ့သည့်နှစ်ကာလများအတွင်း ကျန်းပိုင်ရှန်နှင့် ပူးပေါင်းရန် ငြင်းဆိုခဲ့သည့် သူ့လုပ်ရပ်က သည်နေ့တွင် သူ့အသက်ကို ကယ်ဆယ်လိုက်ခြင်း ဖြစ်သည်ဟု သဘောပေါက်လိုက်သည်။ ထို့နောက် ကျန်းပိုင်ယန်က
“တာအိုရောင်းရင်းတို့ မင်းတို့ရှန်းမိသားစုကို နှစ်အတန်ကြာ ဒုက္ခပေးဖို့ ကြိုးစားခဲ့တဲ့ လူတွေကိုရှင်းပေးလိုက်ပြီ၊ ပြီးတော့ နစ်နာကြေးအနေနဲ့ ရှန်းမိသားစုကို ဝိညာဉ်ကျောက်တုံး နှစ်သိန်း၊ ဒီပမာဏနဲ့ ညီမျှတဲ့ ရတနာပစ္စည်းတွေ၊ နောက်ပြီး အဖြူရောင်ဧကရာဇ် ရွှေအမြုတေကိုလည်း ပေးအပ်မယ်၊ ဒါတင်မကသေးဘူး၊ ဒီနေ့ကစပြီး ကျုပ်တို့ကျန်းမိသားစုအနေနဲ့ ရှန်းမိသားစုရဲ့ အမိန့်ကိုနာခံမယ်လို့ ကတိပေးတယ်။ ကျန်းမိသားစုဝင်အားလုံးကို ဒီကတိကို တာအိုနှလုံးသားနဲ့ ကျိန်ဆိုစောင့်ထိန်းပေးမယ်၊ မင်းတို့သုံးယောက် ဒီကမ်းလှမ်းချက်ကို ဘယ်လိုသဘောရလဲ”
“ဘိုးဘေး”
ကျန်းပိုင်ယန်၏စကားကိုကြားလျှင် မိသားစုဂိုဏ်းတပည့်များမှာ သဘောမတူဟန်နှင့် ကြားဝင်ရန် ကြိုးစားလိုက်ကြသည်။ ကျန်းပိုင်ယန် ပေးအပ်မည့် လျော်ကြေးပမာဏသည် ကျန်းမျိုးနွယ်စုတစ်ခုလုံး၏ ပိုင်ဆိုင်မှုထက်ဝက်ခန့်ရှိသည့်အပြင် အဖြူရောင်ဧကရာဇ် ရွှေအမြုတေကိုပါ ပေးအပ်လိုက်မည့်အရေးကို သူတို့အားလုံး လက်မခံနိုင်ကြပါ။ အဆိုပါအမြုတေသည် ကျင့်ကြံသူတစ်ဦးကို ကျီဖုအဆင့်သို့ တက်လှမ်းရန် အကူအညီပေးနိုင်သည့် တန်ဖိုးကြီး ဝိညာဉ်ရတနာတစ်ပါးဖြစ်ပြီး ငွေပေး၍ဝယ်ယူလျှင်ပင် မရနိုင်သည့် ရတနာပစ္စည်းမျိုးဖြစ်သည်။ ထို့အပြင် ကျန်းမိသားစုအနေနှင့် ရှန်းမိသားစု၏အမိန့်ကို နာခံမည်ဆိုသည့်သဘောမှာ ရှန်းမိသားစု၏ လက်အောက်ခံ မိသားစုခွဲတစ်ခုအဖြစ် ရပ်တည်သွားမည့် သဘောဖြစ်သည်။ ထို့ကြောင့် ကျန်းမိသားစုအနေနှင့် ပေးဆပ်ရမည့် တန်ဖိုးမှာ လိုသည်ထက် ကြီးလေးလွန်းသည်ဟု သူတို့ရှုမြင်မိကြသည်။
သို့သော် ကျန်းပိုင်ယန်အတွက်တော့ သည်လုပ်ရပ်သည်သာ မျိုးနွယ်စု၏ ရှေ့ရေးအတွက် အကောင်းဆုံးနည်းလမ်းကို ရွေးချယ်ခြင်းဖြစ်သည်။ သူနေရမည့်ကာလက သိပ်မကျန်တော့သလို ကျန်းမိသားစုတွင် နောက်ထပ် ကျီဖုအဆင့် ကျင့်ကြံသူများ ပေါ်ပေါက်လာခြင်း မရှိသည့်အတွက် သူမရှိတော့လျှင် အခြားသော မိသားစုများ၊ ဂိုဏ်းများ၏ အမြတ်ထုတ်ခြင်းကို ကျိန်းသေခံရပါလိမ့်မည်။ ထို့ကြောင့် ရှန်းမိသားစုလက်အောက်တွင် ခိုလှုံလိုက်ခြင်းအားဖြင့် အခြားမျိုးနွယ်စုများ၏ ဝါးမျိုခြင်းခံရမည့်ဘေးမှ ကာကွယ်ပြီးသား ဖြစ်ပေလိမ့်မည်။ လက်ဝေခံမိသားစုဆိုသည်မှာ အမည်အားဖြင့်သာ ဆိုးသော်လည်း မျိုးနွယ်စုတည်တံ့ရေးနှင့် ယှဉ်ထိုးစဉ်းစားလျှင်တော့ ပြောပလောက်သည့်အချက်မဟုတ်တော့ပါ။ ထိုအတွက်ကြောင့် ကျန်းပိုင်ယန်၏ ဉာဏ်ရည်ဉာဏ်သွေးကို ကျန်းချန်ရွှမ်အနေနှင့် မချီးကျုးဘဲမနေနိုင်တော့ပါ။
သို့သော် သည်နေရာတွင် မေးစရာရှိလာသည်က ကျန်းပိုင်ယန်အနေနှင့် ကျန်းမိသားစု တစ်နေ့တခြား ဆုတ်ယုတ်လာသည့်အရေးကို အစောကတည်းက မဖြေရှင်းဘဲ သည်နေ့အထိ စောင့်ဆိုင်းနေခဲ့သနည်း ဆိုသည့်မေးခွန်းပင်ဖြစ်သည်။ ဖြစ်နိုင်ချေရှိသည်က ကျန်းပိုင်ယန်အနေနှင့် ကျန်းမျိုးနွယ်စုကို ပြုပြင်ပြောင်းလဲရန် အခွင့်မသာသေး၍ လက်ရှိအခြေအနေအထိ ရောက်အောင် စိတ်ရှည်ရှည်နှင့် စောင့်မျှော်နေခဲ့ခြင်းဖြစ်နိုင်သည်။ ထိုအခွင့်အရေးကို ရလျှင်ရချင်း ကျန်းမိသားစု၏ ကျီဖုအဆင့် ဘိုးဘေးဖြစ်သူ ကျန်းပိုင်ရှန်နှင့် သူ့လူများကို အလျင်အမြန်ရှင်းထုတ်လိုက်ခြင်း ဖြစ်နိုင်သည်။ ထိုအတွေးနှင့်အတူ ကျန်းချန်ရွှမ်တို့သုံးဦးသည် ကျန်းပိုင်ယန်အား ငေးမောကြည့်ရှုနေမိကြသည်။ ကျန်းပိုင်ယန်သည်လည်း သူတို့ကို အဓိပ္ပာယ်ပါသည့် အကြည့်တစ်မျိုးဖြင့် တုံ့ပြန်စိုက်ကြည့်နေရင်း သူတို့လေးဦးကြားတွင် နားလည်မှုတစ်ခုရရှိလိုက်ကြသည်။ ထိုစဉ် ရှန်းတောက်မင်က ပြုံးလိုက်ပြီး
“ကျုပ်တို့အားလုံး ဆရာပိုင်ယန်ရဲ့ ရိုးသားမှုကို နားလည်ပါတယ်၊ ဒီအချိန်မှာ ကျုပ်တို့ရှေ့ဆက်တိုးလိုက်ရင် ကျုပ်တို့ရှန်းမိသားစုကို အနိုင်ကျင့်ဖို့ ကြိုးစားခဲ့တဲ့ လူစုရဲ့ လုပ်ရပ်နဲ့ ထုးမခြားနားဖြစ်သွားပါလိမ့်မယ်။ မိသားစုအကြီးအကဲတစ်ဦးအနေနဲ့ ခင်ဗျားရဲ့ ကမ်းလှမ်းချက်ကို ကျုပ်သဘောတူပါတယ်။ ဒါပေမယ့် ဒီကိစ္စကို ဆုံးဖြတ်ချက်ချဖို့ ကျုပ်တို့ဘိုးဘေးနဲ့ တိုင်ပင်ရပါဦးမယ်။ ဒီတော့ ဆရာပိုင်ယန်အနေနဲ့ ကျုပ်တို့ဆုံးဖြတ်ချက်ချပြီးတဲ့ အချိန်အထိ ခေတ္တစောင့်ဆိုင်းနေပေးနိုင်ဖို့ မျှော်လင့်ပါတယ်”
***