လူမှုအသိုက်အဝန်းစစ်ပွဲ - ကျင့်ကြံသူများ၏ ကြောက်စရာကောင်းမှု

မိစ္ဆာကလေးငယ်က တိုက်ကွက်ကို အောင်အောင်မြင်မြင် တားဆီးနိုင်ခဲ့သော်လည်း သူ့ဒိုင်းကာက အရည်ပျော်တော့မည့် အရိပ်အယောင်များ ပြသခဲ့လေသည်။ ဒုခေါင်းဆောင်များက ထိုအခွင့်အရေးကို အရယူကာ တိုက်ခိုက်လိုက်ကြ၏။ တစ်ယောက်ချင်းစီက သူတို့၏ ထူးကဲမှုရှိကြသော်လည်း ယခုအခါ သူတို့၏ တိုက်ကွက်က ပျက်စီးမှုကြီးမားစေဖို့ရာသာ ဖြစ်သည်။

ဝုန်း

မိစ္ဆာကလေးငယ်၏ ခုခံမှုက တောင့်မခံနိုင်တော့ဘဲ မြေကြီးပေါ် လွင့်စင်သွားလေ၏။ သို့သော် အဖြူရောင်ဝံပုလွေက သူ့လက်သည်းဖြင့် စောင့်ဆိုင်းနေလေသည်။

 ထိုကလေးငယ်၏ ခန္ဓာကိုယ်က ချက်ချင်းဆိုသလို အလိုအလျောက် လှုပ်ရှားလိုက်သောကြောင့် အဖြူရောင်ဝံပုလွေက သူ့ကို နှစ်ပိုင်းပိုင်းပစ်မည့်အစား သူ့နောက်ကျောကိုသာ ခြစ်လိုက်မိသည်။ အဖြူရောင်ဝံပုလွေက ထိုနေရာမှ ချက်ချင်းဆိုသလို ပျောက်ကွယ်သွားလေသည်။ နောက်ထပ် ရောက်ရှိလာသည့်အရာက မီးဓာတ်တိုက်ကွက်မျှသာ ဖြစ်၏။

မိစ္ဆာကလေးငယ်က သူ့ကိုယ်သူ အလွှာနှစ်ခု ဒိုင်းကာဖြင့် ချက်ချင်းဆိုသလို ဝန်းရံလိုက်ပြီး ဒုတိယအလွှာထဲတွင် သတ္တုဒိုင်းကာကိုပါ ထည့်သွင်းလိုက်သည်။ ထိုလျင်မြန်လှသည့် တွေးခေါ်မှုက ကျင့်ကြံသူ၏ တိုက်ခိုက်ရေးအတွေ့အကြုံကို ပြသနေလေ၏။ သို့သော်လည်း သေမျိုးများကလည်း သိပ်မဆိုးလှပေ။ လေဟာနယ်ပုံရိပ်ယောင်နယ်မြေက သူတို့အား မျိုးစုံသော ပြိုင်ဘက်များဖြင့် တွေ့ကြုံခွင့်ပြုထားလေ၏။

ထိုဝိုင်းဝန်းတိုက်ခိုက်မှုက ဒိုင်းကာ၏ အလွှာကို ဖျက်ဆီးပစ်နိုင်ခဲ့ပြီး ဒုတိယအလွှာက အရည်ပျော်သည့် အနေအထားဖြင့် ချန်ထားခဲ့လေသည်။ သို့သော်လည်း ကလေးငယ်က အသက်မရှုနိုင်ခင် ဒုခေါင်းဆောင်လုကျန်းက မီးတောက်ဒိုင်းကာဖြင့် ထွက်ပေါ်လာပြီး ထောပတ်ကို ဖြတ်တောက်သည့် ဓားတစ်ချောင်းသဖွယ် ပိုင်းဖြတ်ပစ်လိုက်သည်။

အပြာရောင်ပန်းပွင့်ကလည်း သုံးမြှောင့်ခရင်းခွနှင့်အတူ လိုက်ပါလာကာ လျှပ်စီးမိုးကြိုးများဖြင့် ပစ်ခတ်လိုက်သည်။ သူမက စွမ်းအားအပြည့်ဖြင့် ပစ်ခတ်လိုက်ခြင်း ဖြစ်၏။ မိစ္ဆာကလေးငယ်က ဆိုးဆိုးရွားရွား အော်လိုက်ရသည်။ သို့သော် ဤသည်က လုံလောက်သည်နှင့် အလှမ်းဝေးနေသေး၏။ ခေါင်းဆောင်လီရှန်းက မိစ္ဆာကလေးငယ်၏ လက်နှင့်ခြေထောက်များဆီ သစ်မြစ်များကို ပို့လွှတ်လိုက်သည်။ ထိုအရာက သူ့ကို ဒဏ်ရာပေးရုံသာမကဘဲ ချုပ်နှောင်ထားခြင်းလည်း ဖြစ်၏။

“အခုပဲ” လီရှန်းက အော်ပြောလိုက်သည်။

ဂရင်းဒက်က သူ့ထူးကဲမှုကို အသုံးပြုဖို့ အဆင်သင့်ဖြစ်နေပြီးသားဖြစ်၏။ ဂရင်းဒက်က ဝိညာဉ်တိုက်ကွက် ကျွမ်းကျင်သူ ဖြစ်ပေသည်။ သူက သုတေသနအစား စစ်တပ် သို့မဟုတ် သိုင်းပညာလမ်းစဉ်ကို ရွေးချယ်ခဲ့သည့် ဉာဏ်အလင်းပွင့်လူသားထဲမှ တစ်ဦး ဖြစ်၏။ ထို့ကြောင့် သူ့ချပ်ဝတ်က ထူးကဲသည့်သင်္ကေတများဖြင့် ရေးဆွဲထားပြီး သူ့အား စိတ် သို့မဟုတ် ဝိညာဉ်တိုက်ကွက်များကို အသုံးပြုဖို့ ခွင့်ပြုပေးထားသည်။

ထိုမိစ္ဆာကလေးငယ်က အန္တရာယ်ကိုခံစားမိကာ သူ့နေရာကို ချက်ချင်း ပြောင်းရွှေ့ဖို့ ကြိုးစားလိုက်သည်။ သို့သော်လည်း အဖွဲ့က အာကာပြင်နည်းစနစ်ကို အသုံးပြုနိုင်သည့် ကျင့်ကြံရေးစနစ်များအတွက် အနည်းဆုံး လိုအပ်ချက်သည် အဆင့် ၄ ဖြစ်ကြောင်း သိထားသည့်အတွက် ထည့်သွင်းစဉ်းစားထားပြီးသား ဖြစ်၏။ ၃(ဂ)မောင်းနှင်သူများ၏ အစီအရင်က သူတို့၏ စိတ်ကို ဆက်နွယ်ပေးရုံသာမကဘဲ သူတို့ဝန်းရံထားသည့် အာကာပြင်ကိုပင် ပိတ်ဆို့ထားလိုက်လေသည်။

မိစ္ဆာကလေးငယ်က ဆိုးဆိုးရွားရွား အော်ဟစ်လိုက်သည်။ ထိုတိုက်ကွက်က အတော်လေး ကြီးမားလှ၏။ ဒုခေါင်းဆောင် ဂရင်းဒက်ကလည်း သိပ်အခြေအနေ မကောင်းလှပေ။ သေမျိုးတစ်ယောက်၏ ဝိညာဉ်က အဆင့်(၅) ကျင့်ကြံသူနှင့် မယှဉ်နိုင်ပေ။ ချပ်ဝတ်က သူ့ဝိညာဉ်စွမ်းအားကို အားဖြည့်ထားပြီး တန်ပြန်သက်ရောက်မှုမှ ကာကွယ်ပေးထားသော်လည်း စွမ်းအားက ကန့်သတ်ချက်ရှိနေဆဲသာ ဖြစ်၏။

မိစ္ဆာကလေးငယ်၏ အရှိန်အဝါက သိသိသာသာ လျော့ကျသွားစဉ် အဖြူရောင်ဝံပုလွေက လှုပ်ရှားလိုက်လေသည်။ သူက တရားခံဘေးတွင် ပေါ်ထွက်လာပြီး ထိုသူ၏ ရင်ဘတ်ကို ထိုးဖောက်ကာ အတွင်းအင်္ဂါများကို ဖျက်ဆီးပစ်လိုက်ပြီး နှလုံးသားကို ထုတ်ယူလိုက်သည်။

“တကယ်ကို ရွံဖို့ကောင်းတယ်” အဖြူရောင်ဝံပုလွေက ပြောလိုက်သည်။

“မင်းရဲ့ နှလုံးသားကတောင် မဲနက်နေတာ”

သူက သူ့လက်ထဲမှ ရွံရှာဖွယ်နှလုံးသားကို ကြည့်ရင်း လွှင့်ပစ်လိုက်သည်။ အဖွဲ့က မိစ္ဆာကလေးငယ် ဖြည်းဖြည်းချင်း လဲကျသွားသည်ကို ကြည့်နေလိုက်ကြ၏။

“ဒါက လွယ်မယ်လို့ ပြောသားပဲ” လုကျန်းက ပြောလိုက်စဉ် သူ့မျက်နှာဖုံးက အလိုအလျောက် ပျောက်ကွယ်သွားလေသည်။

“ငါတို့တွေရဲ့ အတူတကွတွဲလုပ်လို့ အနိုင်ရခဲ့တာ” အပြာရောင်ပန်းပွင့်က ပြောလိုက်သည်။

“ဒါပေမဲ့ ငါတို့တွေ အနိုင်ရတုန်းပဲလေ”

“ဒါပေမဲ့ အခု ပျော်ပွဲခံနေရမဲ့အချိန် မဟုတ်ဘူး” ဂရင်းဒက်က ထပ်ပြောလိုက်သည်။

“ဒါက ကျင့်ကြံသူအများကြီးထဲက တစ်ယောက်ပဲ။ ငါတို့ရဲ့ အလုပ်က အခုမှ စကာပဲ ရှိသေးတယ်”

“ဂရင်းဒက် ပြောတာ မှန်တယ်” အဖြူရောင်ဝံပုလွေက ခေါင်းညိတ်လိုက်သည်။

“ကဲ စကားစမြည်ပြောတာ တော်သင့်ပြီ။ ပြန်လည်ကယ်ဆယ်ရေး အစီအစဉ်ကို စလိုက်ရအောင်”

“ဟုတ်ကဲ့ပါ ခေါင်းဆောင်” လုကျန်းက ပြောလိုက်သည်။ ယခု သူတို့က လူများကို ကယ်တင်ဖို့ ဆွေးနွေးနိုင်ပြီ ဖြစ်၏။ ထိုတိုက်ပွဲက ပြင်းထန်ပြီး သူတို့၏ နှစ်များစွာ လေ့ကျင့်မှုရလဒ်ကို ပြသခဲ့သော်လည်း အမှန်တကယ် အရေးကြီးသည့်အရာက သူတို့၏ လူများကို ကယ်တင်ဖို့ရာသာ ဖြစ်၏။

“မင်းတို့ကို ကျေးဇူးတင်ရမှာပဲ” ထို့နောက် အသံ သုံးခု၊ လေးခု ပေါင်းစည်းထားသည့် အသံနှင့် တူသည့် ကြက်သီးထဖွယ် အသံတစ်သံ ရုတ်ချည်း ထွက်ပေါ်လာသည်။ မောင်းနှင်သူများက ကြောက်ကြောက်လန့်လန့် ကြည့်လိုက်သည့်အခါ မိစ္ဆာကလေးငယ်က ထရပ်ပြီး သူတို့ကို တည်ငြိမ်စွာ ကြည့်နေလေ၏။

“မင်းတို့တွေက ငါ့ကို သတ်လုနီးပါးဖြစ်သွားတာကြောင့်သာ မဟုတ်ရင် ငါ့အသိစိတ်ကို နိုးထလာနိုင်မှာမဟုတ်ဘူး။” မိစ္ဆာကလေးငယ်က သူ့သတ္တုတာအိုဖြင့် သတ္တုနှလုံးသားနှင့် တခြားသောအတွင်းအင်္ဂါများကို တည်ငြိမ်အောင် လုပ်ရင်း အချိန်ဆွဲကာ ပြောလိုက်သည်။

မိစ္ဆာကလေးငယ်က ဖြည်းဖြည်းချင်း မျောလွင့်နေရင်း အဖွဲ့ရှေ့ ရပ်နေလေသည်။

“သေမျိုးအုပ်စုလား။ မင်းတို့စွမ်းအားရဲ့ အရင်းအမြစ်က ဒီချပ်ဝတ်တွေလား။ စိတ်ဝင်စားစရာပဲ”

သူက လှောင်ပြုံးပြုံးပြီးသည့်နောက်တွင် သူ့အမူအရာက ရက်စက်မှုအဖြစ် ပြောင်းလဲသွားလေသည်။

“ဒါပေမဲ့ မင်းတို့ပုရွက်ဆိတ်တွေက ကျင့်ကြံသူတွေရဲ့ စွမ်းအားကို ခိုးယူရဲတယ်လား”

“ငါတို့က ဘာမှမခိုးယူခဲ့ဘူး။ ဒါက ငါတို့ရဲ့ ကိုယ်ပိုင်တည်ဆောက်ထားတဲ့ စွမ်းအားပဲ” လုကျန်းက ပြန်ပြောလိုက်သည်။

“သူနဲ့ ငြင်းခုန်မနေနဲ့” အဖြူရောင်ဝံပုလွေက အမိန့်ပေးလိုက်၏။

“တိုက်ပွဲအတွက် အဆင်သင့်ပြင်ထားကြ”

“အဲဒါဆိုတော့ မင်းက သူတို့ရဲ့ ခေါင်းဆောင်ပေါ့။ မင်းကြည့်ရတာ အဲ့လောက် အံ့ဩဖို့ကောင်းတဲ့ပုံလည်း မပေါ်ပါဘူး” မိစ္ဆာကလေးငယ်က သူ့ကို ကြည့်လာသည်။

“ငါတို့က မင်းတို့ တစ်ခါ သတ်နိုင်မှတော့ နောက်တစ်ကြိမ်လည်း သတ်နိုင်သေးတယ်” အဖြူရောင်ဝံပုလွေက တည်ငြိမ်စွာ ပြောလိုက်သည်။

“ပုရွက်ဆိတ်တွေ လုပ်တဲ့ အကြီးမားဆုံးအပြစ်က သူတို့ကိုယ်သူတို့ ပုရွက်ဆိတ်မှန်း မသိတာပဲ” မိစ္ဆာကလေးငယ်က လှောင်ပြောင်ကာ ပြုံးလိုက်သည်။ သူသည် အထွတ်အထိပ်အနေအထားအဖြစ် ပြန်လည်တိုက်ခိုက်နိုင်တော့မည်ဖြစ်သည့်အတွက် ထိုပုရွက်ဆိတ်များ၏ စကားကို စိုးရိမ်နေစရာ မလိုအပ်ပေ။

အထွပ်အထိပ် ဓားချက်

မိစ္ဆာကလေးငယ်များက လက်ကိုဝှေ့ယမ်းပြီး အဖွဲ့၏ခေါင်းအထက် ဧရာမအနက်ရောင် ဓားတစ်လက်ကို ဖန်တီးလိုက်သည်။

“ငါးမှတ် အစီအရင်ကို သုံးကြ”

အဖြူရောင်ဝံပုလွေက အမိန့်ပေးလိုက်လေသည်။ အဖွဲ့က ချက်ချင်းဆိုသလို နေရာယူပြီး သူတို့၏ စွမ်းအား၊ စိတ်၊ ဝိညာဉ်နှင့် သင်္ကေတများကို သဟဇာတဖြစ်စေလိုက်သည်။ သူတို့က ငါးရောင်သင်္ကေတဒိုင်းကာကို သူတို့ခေါင်းအထက် ထွက်ပေါ်လာစေလေ၏။ ထိုအရာက ကောင်းမွန်သည့် ခုခံရေးစွမ်းအားတချို့ ရှိနေဟန်ပေါ်သည်။

သို့သော်လည်း မိစ္ဆာကလေးငယ်က လှောင်ပြောင်လိုက်၏။ သူ့အကြည့်က ဘေးပတ်ဝန်းကျင်တွင်ရှိနေသည့် မောင်းနှင်သူများဆီ ကျရောက်လာလေသည်။ အဖြူရောင်အလင်းတန်းက ကောင်းကင်ယံဆီ လွှမ်းခြုံသွားပြီး စက်ဝိုင်းသဏ္ဌာန်ဖြစ်ပေါ်လာကာ ပေါက်ကွဲမှုများစွာ ဖြစ်ပေါ်လာလေသည်။ ထိုအရာက ပွဲတော်တစ်ခုသဖွယ် ပေါက်ကွဲမှုများက မီးရှူးမီးပန်းများသဖွယ် ဖြစ်နေလေ၏။ သို့သော်လည်း ထိုအရာက မီးရှူးမီးပန်း မဟုတ်ပေ။ မိစ္ဆာကလေးငယ်က ထိုယာဉ်မောင်းများအား ဓားချက်တစ်ချက်တည်းဖြင့် သုတ်သင်ပစ်လိုက်ခြင်း ဖြစ်၏။ ထိုဓားချက်ကို ပိတ်ဆို့ထားပြီးသည့်နောက်တွင် အဖွဲ့က ဘာဖြစ်ခဲ့မှန်း သဘောပေါက်သွားလေသည်။

“အခု မင်းတို့အလှည့်ပဲ”

မိစ္ဆာကလေးငယ်က အဖွဲ့ဘက် ပြေးဝင်လာသည်။

 ဒုခေါင်းဆောင် လီရှန်းက သူ့သစ်သားသင်္ကေတကို အသုံးပြုကာ အမြန်ဆန်ဆုံး လှုပ်ရှားလိုက်၏။ ထို့နောက် သစ်မြစ်များစွာက မိစ္ဆာကလေးငယ်ကို ဖမ်းဆီးဖို့ ကြိုးစားလာလေသည်။

သတ္တုတာအိုနဲ့ တစ်ဖက်သူကို ထိန်းချုပ်ချင်တာလား။ သူက အဖွဲ့ရဲ့ ကုစားသူ ဖြစ်နေနိုင်တယ်…

မိစ္ဆာကလေးငယ်က အမြစ်များကို ဖြတ်တောက်ပစ်လိုက်သည်။ သူ့သုံးသပ်ချက်အရ မိစ္ဆာကလေးငယ်သည် သူ့ပစ်မှတ်ကို အားအကောင်းဆုံး အဖြူရောင်ဝံပုလွေမှ အပြာရောင်ပန်းပွင့်ဆီ ပြောင်းလဲလိုက်လေ၏။ ထိုအမျိုးသမီးက စွမ်းအားကြီး လျှပ်စီးတိုက်ကွက်များကို အသုံးပြုလေ့ရှိသည်။

သူမအတွက် ကံဆိုးသွားသည်က မိစ္ဆာကလေးငယ်သည် ဓာတ်သဘာဝကြားမှ ဆက်ဆံရေးကို နားလည်မှုတချို့ရှိနေဟန်ပေါ်၏။ သူက ချက်ချင်းဆိုသလို ဓားကိုဖွဲ့စည်းကာ သူမ၏ လျှပ်စီးချက်ကို စုပ်ယူလိုက်သည်။ ထို့နောက် သူက လျှပ်စီးကို သိမ်းဆည်းပြီး အားဖြည့်ကာ တိုက်ကွက်ကို အပြာရောင်ပန်းပွင့်ဆီ ပြန်လည်ပို့ဆောင်လိုက်၏။

အားကောင်းလှသည့် လျှပ်စီးကြောင်းများက အပြာရောင်ပန်းပွင့်၏ ချပ်ဝတ်ကို လျှပ်စီး ပြတ်တောက်သွားစေကာ ကူကယ်ရာမဲ့သွားစေသည်။ အဖွဲ့က သူမ ပစ်မှတ်ထားခံရကြောင်း မြင်သည့်အခါ ထိတ်ထိတ်လန့်လန့်ဖြစ်သွားကြပြီး သူမကို ကာကွယ်ဖို့ အကောင်းဆုံး ကြိုးစားလာကြသည်။

ဝှစ်

မိစ္ဆာကလေးငယ်က ပျောက်ကွယ်သွားပြီး လီရှန်းနောက် ချက်ချင်းပေါ်ထွက်လာကာ သူ့ခေါင်းကို ချက်ချင်း ဖြတ်ချလိုက်သည်။ အားလုံးက အပြာရောင်ပန်းပွင့်ကို အာရုံစိုက်နေကြသည့်အတွက် ဖြစ်ပျက်လာသည့်အရာကို ချက်ချင်း မတုံ့ပြန်နိုင်ခဲ့ပေ။

သို့သော်လည်း မိစ္ဆာကလေးငယ်က မရပ်တန့်ခဲ့ပေ။ သူ့ပစ်မှတ်က ဂရင်းဒက် ဖြစ်၏။ ဝိညာဉ်တိုက်ကွက်အပြီးတွင် ထိုသူက တုံ့ဆိုင်းစွာ လှုပ်ရှားနေလေသည်။ မိစ္ဆာကလေးငယ်က ဤသို့သော အပြုအမူသည် ဝိညာဉ်ဒဏ်ရာများမှ တန်ပြန်သက်ရောက်မှုကြောင့် ဖြစ်မှန်း နားလည်ထားလေ၏။ ဂရင်းဒက်က သူ့ဝတ်စုံမှ စွမ်းအားများကို လှုံ့ဆော်ဖို့ အကောင်းဆုံး ကြိုးစားနေရလေ၏။ သူ့အတွက် နှမြောဖို့ကောင်းလှသည်က မိစ္ဆာကလေးငယ်၏ ဓားချက်သည် ရုပ်ပိုင်းဆိုင်ရာ တိုက်ကွက်မျှသာ မကပေ။ ထိုဓားချက်က သူ့အသိစိတ်ပင်လယ်ထဲ ကျူးကျော်လာပြီး ဝိညာဉ်ကို ချက်ချင်း ပျက်သုဉ်းသွားစေသည်။

“မဖြစ်ဘူး” လုကျန်းက အော်ပြောလိုက်သည်။ သူ့ချပ်ဝတ်က ပေါက်ကွဲထွက်လာပြီး သူက ကန့်သတ်ချက်အားလုံးကို ဖယ်ရှားကာ လူသားမီးတောက်အဖြစ် ပြောင်းလဲလိုက်သည်။ သူက မိစ္ဆာကလေးငယ်ဆီ သတ်ဖြတ်ပစ်ဖို့ရာ ရည်ရွယ်ချက်ဖြင့် ပြေးဝင်သွားလေ၏။ သို့သော်လည်း ထိုသူက တည်ငြိမ်စွာ တုံ့ပြန်ပြီး သူ့အား သတ္တုလုံးထဲ ထည့်ကာ အလွှာများစွာဖြင့် ပိတ်ဆို့ထားလိုက်သည်။

“အရူးပဲ” မိစ္ဆာကလေးငယ်က မှတ်ချက်ပေးလိုက်၏။ လုကျန်းအတွက် တစ်ခုတည်းသော ကျန်ရှိသည့်အရာက ထိုဘောလုံးအတွင်း သူ့ကိုယ်သူ လောင်ကျွမ်းစေဖို့ရာသာ ဖြစ်သည်။

“ထွက်ပြေးတော့”

“ဘယ်လို”

“အပြာရောင်ပန်းပွင့် … ဒါက တိုက်ရိုက်အမိန့်ပဲ။ အသက်ရှင်ပြီး ထွက်ပြေးတော့” အဖြူရောင်ဝံပုလွေက ပြောလိုက်သည်။

“ငါ မင်းအတွက် အချိန်ဆွဲပေးထားမယ်။ ထွက်ပြေးတော့”

အခြေစိုက်စခန်းက သူတို့၏ တာဝန် မပြီးဆုံးသရွေ့ သို့မဟုတ် သူတို့က မြင်ကွင်းထဲတွင် ရန်သူရှိမနေသည့် ပိုင်းခြားထားသည့် နေရာတစ်ခုအတွင်း ရှိမနေသရွေ့ ပြန်လည်ကူးသန်းသွားနိုင်သည့် အာကာသနည်းစနစ်မျိုးကို အသုံးမပြုနိုင်ပေ။ အဖြူရောင်ဝံပုလွေက ဘေးကင်းသည့်နေရာကို ရှာမှသာ အပြာရောင်ပန်းပွင့်အတွက် အသက်ရှင်နိုင်မည့် အခွင့်အရေးရမည်ဖြစ်ကြောင်း သိထားလေ၏။

ထွက်ပြေးချင်တာလား…

မိစ္ဆာကလေးငယ်က လှောင်ပြောင်လိုက်သည်။ သူက ထိုနှစ်ယောက်၏ ဆက်သွယ်မှုကို မကြားရသော်လည်း သူတို့၏ အငွေ့အသက်မှ ရည်ရွယ်ချက်ကို ဖော်ပြနေလေသည်။ သူတို့က ပါးစပ်ဟကာ သွေးတစ်ပွက် အန်ထုတ်လိုက်ပြီး နောက်ထပ် မိစ္ဆာကလေးငယ်ကို ဖွဲ့စည်းလိုက်သည်။

“သူ သိနေတယ်” အဖြူရောင်ဝံပုလွေက အမူအရာ ပျက်ယွင်းလျက် ပြောလိုက်သည်။ သူက အံကြိတ်လိုက်ပြီးသည့်နောက်တွင် တစ်ဖက်လူဆီ ပြေးဝင်သွားလေ၏။ သူက ထိုသက်ရှိနှစ်ယောက်လုံးဖြင့် တိုက်ခိုက်ပြီး သူ့အဖွဲ့သား ထွက်ပြေးလွတ်မြောက်ဖို့ အချိန်ဆွဲပေးလိုသည်။