မဟာမိတ်
Vol. 8 Ch. 143
ဟွမ်လင်းအယ်နှင့်အတူပါလာသူများမှာ ကျန်းချန်ရွှမ်တို့နှင့် တွေ့ဆုံခဲ့ဖူးသော အဘိုးကြီးဝူဖြစ်ပြီး ကျန်တစ်ဦးမှာ လမင်းကြည့်ဂိုဏ်း၏ အကြီးအကဲဖြစ်သူ တျန့်ချင်ဖြစ်သည်။ တျန့်ချင်သည် ဟွမ်ဝမ်ယု၏ အရင်းနှီးဆုံးမိတ်ဆွေလည်းဖြစ်သည်။ ကျန်းချန်ရွှမ်တို့မှာ ဟွမ် လင်းအယ် ယူဆောင်လာသော ပစ္စည်းများကိုကြည့်ပြီး မျက်လုံးပြူးသွားကြသည်။ ထိုအရာများမှာ ဝိညာဉ်အနှစ်သာရသစ်သီးများဖြစ်ပြီး ကျင့်ကြံသူ၏ဝိညာဉ်ကို အားဖြည့်ပေးနိုင်သည့်အတွက် ကျန်းချန်ရွှမ်တို့လည်း ဝမ်းမြောက်သွားကြသည်။ ထို့ကြောင့် ဟွမ်လင်းအယ်နှင့် သူ့အဖေကို ကျေးဇူးတင်စကားဆိုလိုက်သည်။
ထိုစဉ် ဟွမ်လင်းအယ်ဘေးရှိ တျန့်ချင်သည် ကျန်းချန်ရွှမ်နှင့် ရှန်းရူယန်တိုအား ပြုံးပြပြီး စကားစလိုက်သည်။
“ကျုပ်က လမင်းကြည့်ဂိုဏ်းက တျန့်ချင်ပါ၊ ခင်ဗျားတို့ပွဲကို မဖိတ်ဘဲ လာမိတဲ့အတွက် စိတ်မရှိဖို့ မျှော်လင့်ပါတယ်”
“မဟုတ်တာ တာအိုရောင်းရင်းတျန့်ချင် “
ကျန်းချန်ရွှမ်တို့လည်း ပြုံးလျက် ခွန်းတုံ့ပြန်လိုက်သည်။
“ခင်ဗျားဒီကိုကြွရောက်ပေးတဲ့အတွက် ကျုပ်တို့ကကျေးဇူးတင်ရမှာပါ”
အမှန်တွင် တျန့်ချင်လိုက်ပါလာရသည့် အကြောင်းအရင်းကို ကျန်းချန်ရွှမ်တို့ ရိပ်မိပြီးဖြစ်သည်။ ရွက်ကြွေတောင်တန်းတွင် ဖြစ်ပွားခဲ့သည့် ဖြစ်စဉ်မျိုး နောက်တစ်ကြိမ် မဖြစ်စေရန် သမီးဖြစ်သူ၏လုံခြုံရေးအတွက် ဟွမ်ဝမ်ယုက တမင်တကာ ထည့်ပေးလိုက်ခြင်းဖြစ်လိမ့်မည်။
“စကားမစပ်၊ ဒါက ကျုပ်ရဲ့ဂုဏ်ပြုလက်ဆောင်ပါ”
တျန့်ချင်က နောက်ထပ်လက်ဆောင်များကို ကမ်းလိုက်ပြန်သည်။ အစောပိုင်းက ဝိညာဉ်သစ်သီးများမှာ ဟွမ်ဝမ်ယုက မိတ်ဆွေတစ်ဦးက ဂုဏ်ပြုသည့်အနေနှင့် ပေးအပ်လိုက်သည့် ပစ္စည်းဖြစ်ပြီး သည်တစ်ခါက ဟွမ်ဝမ်ယုနှင့် လမင်းကြည့်ဂိုဏ်းကိုယ်စားဖြစ်သည်။ ထိုအချက်ကို ကျန်းချန်ရွှမ်လည်း ကောင်းစွာနားလည်သည့်အတွက် ကျေးဇူးတင်စကားဆိုပြီးနောက် ဟွမ်လင်းအယ်တို့သုံးဦးအား လောကဝတ်ပြုပြီး နေရာချပေးလိုက်သည်။ ထိုမြင်ကွင်းကို ပရိသတ်များ သတိထားမိပြီး အံ့အားသင့်သွားကြသည်။ အထူးသဖြင့် ဟွမ်လင်းအယ်နှင့် တျန့်ချင်တို့ကို သိရှိထားသည့် ကျင့်ကြံသူများဖြစ်သည်။
လမင်းကြည့်ဂိုဏ်းသည် ရွှေအမြုတေအဆင့် ဂိုဏ်းတစ်ခုဖြစ်ရန် အလားအလာကောင်းနေသော အဖွဲ့အစည်းတစ်ခုဖြစ်သည်။ အစောပိုင်းက ကျန်းချန်ရွှမ်တို့စုံတွဲနှင့် လမင်းကြည့်ဂိုဏ်းမှ ဟွမ်လင်းအယ်၊ တျန့်ချင် တို့အကြား ပြောဆိုဆက်ဆံပုံကိုကြည့်၍ ရှန်းမိသားစုနှင့် လမင်းကြည့်ဂိုဏ်းအကြားတွင် ခိုင်မာသော ဆက်ဆံရေးတစ်ခု တည်ဆောက်ထားနိုင်သည်ဟု ယူဆပြီး ကျင့်ကြံသူပရိသတ်များမှာ ရှန်းမိသားစုကို ပို၍ပင် အထင်ကြီးသွားကြတော့သည်။ ဤသို့နှင့် ဂုဏ်ပြုပွဲကို ရက်အနည်းငယ်အထိ ဆက်လက်ကျင်းပကြသည်။ ဂုဏ်ပြုပွဲပြီးဆုံးသောအခါ ဧည့်သည်များမှာ တစ်ယောက်ပြီး တစ်ယောက် ထွက်ခွာသွားကြသည်။ ထိုသူများထဲတွင် ဟွမ်လင်းအယ်တို့လည်း ပါဝင်သည်။ မူလတွင် ဟွမ်လင်းအယ်တစ်ယောက် ရက်အနည်းငယ် ဆက်လက်နေထိုင်ရန် ကြံစည်ထားသော်လည်း တျန့်ချင်မှာ ဂိုဏ်းကိစ္စတစ်ခုကြောင့် လမင်းကြည့်ဂိုဏ်းကို ချက်ချင်းပြန်ရတော့မည်ဖြစ်၍ အစီအစဉ်ပြောင်းသွားသည်။
သို့သော် လုအော်ရင်ယွဲ့က အလျင်စလို မပြန်သေးဘဲ ရှန်းမိသားစုတွင် ဆက်လက်နေထိုင်လျက်ရှိသည်။ ထိုအခြင်းအရာကြောင့် ကျန်းချန်ရွှမ်၊ ရှန်းရူယန်နှင့် ရှန်းတောက်မင်တို့မှာ ဇဝေဇဝါဖြစ်နေကြသည်။ မကြာမီမှာပင် ရှန်းယွမ်လုံက သူတို့သုံးဦးအား အခေါ်လွှတ်လိုက်သည်။ ရှန်းယွမ်လုံရှိနေသော ဟွားဝူတောင်ထွတ်သို့ ရောက်လျှင် ရှန်းယွမ်လုံနှင့်အတူ လုအော်ရင်ယွဲ့လည်း ထူးဆန်းစွာ ရောက်ရှိနေသည်ကို မြင်လိုက်ရသည်။ ရှန်းယွမ်လုံက သူတို့သုံးဦးကို မြင်လျှင် ပြုံးရယ်လျက်
“ချန်ရွှမ်၊ ရူယန်နဲ့ တောက်မင် မင်းတို့ရောက်လာကြပြီကိုး”
လုအော်ရင်ယွဲ့ကလည်းသူတို့နှစ်ဦးအား ပြုံးလျက် ခေါင်းညိတ်ပြလိုက်သည်။ ရှန်းယွမ်လုံက
“မင်းတို့သုံးယောက်ကို ခေါ်လိုက်ရတာ အရေးကြီးကိစ္စ ဆွေးနွေးစရာရှိလို့ပဲ”
“ဟုတ်ကဲ့ ပြောပါ”
ကျန်းချန်ရွှမ်တို့လည်း ရှန်းယွမ်လုံပြောမည့်စကားကို နားစွင့်လိုက်ကြသည်။
“ငါတို့ရှန်းမိသားစုနဲ့ ချန်ထျန်းဂိုဏ်း အင်အားချင်းပေါင်းဖို့ စီစဉ်ထားတယ်”
“အင်အားပေါင်းမယ် ဟုတ်လား”
.ရှန်းယွမ်လုံက ခေါင်းညိတ်လျက်
“ဟုတ်တယ် အတိုပြောရရင် မဟာမိတ်ဖွဲ့ဖို့ပေါ့၊ မင်းတို့သိတဲ့အတိုင်း ငါတို့ရှန်းမိသားစုနဲ့ ဟုန်မိသားစုက အဆင်မပြေကြသလို ချန်ထျန်းဂိုဏ်းနဲ့ ဟုန်မိသားစုအကြားမှာလည်း အခြေအနေတင်းမာနေတယ်”
ထိုအချိန်တွင် လုအော်ရင်ယွဲ့က ကြားဝင်ပြီး
“ဟုတ်တယ်၊ နတ်ဆိုးသားရဲကပ်တုန်းက ဟုန်မိသားစုရဲ့ဘိုးဘေး တျန့်ချီရဲ့ မျက်နှာလွှဲခဲပစ်လုပ်မှုကြောင့် ငါ့ရဲ့ တာအိုညီမ တျန့်ချင်းသေခဲ့ရတယ်၊ တျန့်ချီလို အဆင့်မြင့်ကျင့်ကြံသူတစ်ယောက်အနေနဲ့ ငါတို့အသက်တွေထက် သူတို့အစီအစဉ် အောင်မြင်ရေးကို ပိုဦးစားပေးမယ်ဆိုတာ ငါတို့သိပါတယ်။ ဒါပေမဲ့ သူသာ အဲဒီအစီအစဉ်ကို ငါတို့ကို ကြိုပြောပြခဲ့ရင် လူ့အသက်တွေ အများကြီးဆုံးခဲ့မှာမဟုတ်ဘူး”
ထို့နောက် လုအော်ရင်ယွဲ့က စကားကိုခေတ္တရပ်လိုက်သည်။ အချိန်အနည်းငယ်ကြာမှ ပြန်ဆက်သည်။
“အဲဒီနေ့ကစပြီး ငါတို့နဲ့ ဟုန်မိသားစုကြားမှာ ပွတ်တိုက်မှုတွေ ရှိလာခဲ့တယ်။ အခုဆိုရင် ငါတို့နှစ်ဖွဲ့ကြားက ဆက်ဆံရေးက ဘယ်လိုမှ အဖတ်ဆယ်လို့မရတော့ဘူး”
သူမ၏စကားကိုကြားသောအခါ ကျန်းချန်ရွှမ်တို့လည်း ကောင်းစွာနားလည်လိုက်ကြသည်။
“ဒါကြောင့် ဟုန်မိသားစုကို ရင်ဆိုင်တဲ့နေရာမှာ ငါတို့နှစ်ဖွဲ့ အတူလက်တွဲနိုင်ဖို့ မျှော်လင့်တာပါ။ ငါတို့ဘက်က ရိုးသားမှုကိုပြတဲ့အနေနဲ့ အဆင့်၃ သစ်သားသွေးကြောရှိတဲ့ တည်နေရာကို မဟာမိတ်ဖွဲ့တဲ့ လက်ဆောင်အဖြစ်နဲ့ ပေးဖို့ စဉ်းစားထားပါတယ်”
ထိုစကားကြောင့် သူတို့အားလုံး မှင်သက်သွားကြသည်။ အဆင့်၃ သစ်သားဓာတ် အခြေခံဝိညာဉ်သွေးကြောတစ်ခု၏ တန်ဖိုးသည် သာမန် အဆင့်၃ ဝိညာဉ်သွေးကြောထက် အဆများစွာ သာလွန်ကြောင်း သူတို့အားလုံး သိရှိပြီးဖြစ်သည်။ အကြောင်းရင်းမှာ အဆင့်၃ သစ်သားဓာတ် သွေးကြောကဲ့သို့ ဂုဏ်သတ္တိတစ်ခုရှိသည့် ဝိညာဉ်သွေးကြောများသည် အချိန်တစ်ခုအတွင်း၌ သစ်သားဓာတ် အခြေခံဝိညာဉ်ရတနာများကို ပုံမှန်ထုတ်လုပ်ပေးလေ့ ရှိသောကြောင့်ဖြစ်သည်။ ထိုရတနာအားလုံးအနက် အဇူရာနဂါး သစ်သားသလင်းကျောက်သည် တန်ဖိုးအကြီးဆုံးဖြစ်သည်။
ထိုစဉ် ရှန်းတောက်မင်က
“ဂိုဏ်းသခင်ကြီးလုအော်ရဲ့ ရည်ရွယ်ချက်ကို တည့်တည့်ပဲပြောပါလား၊ ခင်ဗျားစိတ်ထဲမှာ ဆောင်ရွက်ချင်တာကိုပြောပြလို့ရပါတယ်”
ကျန်းချန်ရွှမ်တို့သုံးဦး၏ တည်ငြိမ်စွာ ကိုယ်ရှိန်သတ်ထားနိုင်မှုကို အကဲခတ်ရင်းလုအော်ရင်ယွဲ့က ခေါင်းညိတ်လိုက်သည်။ အကယ်၍ ကျန်ချန်းရွှမ်တို့ သုံးဦးသာ သစ်သားသွေးကြောကို အငမ်းမရဖြစ်နေပါက ရှန်းမိသားစုနှင့် မဟာမိတ်ဖွဲ့ရန်ကိစ္စကို တဖန်ပြန်စဉ်းစားရတော့မည်ဖြစ်သည်။ ထို့နောက် လုအော်ရင်ယွဲ့က ပြုံးရင်း
“ငါတို့အတူ သစ်သားသွေးကြောကို ရှာဖွေကြမယ်”
***