ကျူးကျော်တိုက်ခိုက်ခြင်း

Vol. 167 Ch. 2389

ထိုတိုက်ကွက်က ဗုဒ္ဓဘုံအရှင်သခင်အား ဒဏ်ရာရသွားစေသည်ဟု သတ်မှတ်နိုင်သော်လည်း အခြားကျင့်ကြံသူများထံမှ တိုက်ခိုက်မှုက ကျောက်တုံးတိုက်ပွဲဝင်္ကပါပေါ်သို့ ဆင်းသက်လာသည်။ မလွဲဧကန်ပင် ဝင်္ကပါက စတင်တုန်ခါလာပြီး အက်ကြောင်းများက စတင်ပေါ်ပေါက်လာ၏။

လက်ရှိတွင် ကျောက်တုံးတိုက်ပွဲဝင်္ကပါက ပေါင်းစည်းထားသည့် အစုအဖွဲ့တစ်ခု ဖြစ်သည်။ သို့သော် ကျင့်ကြံသူအားလုံးက တိုက်ခိုက်ရန်အတွက် သူတို့၏ စွမ်းအားများကို ဝင်္ကပါအတွင်း စုစည်းလိုက်သောအခါ သူတို့၏ စွမ်းအားအများစုက တိုက်ခိုက်ရာ၌သာ ပို၍ သာလွန်ပေသည်။ တိုက်ခိုက်ရေးစွမ်းအားက အလွန် ပြင်းထန်လှသော်လည်း သူတို့၏ ခုခံကာကွယ်မှု၌ တည်ငြိမ်မှုက အားနည်းနေခဲ့ပေသည်။

လောက၌ ပြီးပြည့်စုံသော တိုက်ပွဲဝင်္ကပါဟူ၍ မရှိဘဲ မည်သည့် ကျင့်ကြံရေးနည်းစနစ်မဆို အားနည်းချက် ရှိပေသည်။ သို့သော် ဗုဒ္ဓဘုံအရှင်သခင်ကဲ့သို့သော အဆင့်မြင့်ကျင့်ကြံသူမျိုးကိုပင် တစ်ချက်တည်းနှင့် ဒဏ်ရာရစေခဲ့သည်မှာ ၎င်းက ကြီးမားသော တိုက်ခိုက်ရေးစွမ်းအားကို ပိုင်ဆိုင်ထားသည်ဟု ဆိုလိုခြင်း ဖြစ်သည်။

တိုက်ခိုက်မှုပြီးနောက် နတ်အလင်းတို့က တိုက်ပွဲဝင်္ကပါထဲတွင် လှည့်ပတ်လင်းလက်လာကာ ထိုအက်ကြောင်းများက လျင်မြန်စွာ ပြန်လည် ပြုပြင်ပေးသွားခဲ့သည်။ တိုက်ပွဲအတွင်းမှ ကျင့်ကြံသူများ၏ အမူအရာတို့က တည်ငြိမ်စွာ ကျန်ရှိနေပြီး သူတို့၏ အသက်ရှုနှုန်းကလည်း တည်ငြိမ်နေသည်။ သူတို့က ထိုတိုက်ခိုက်မှုကြောင့် အနည်းငယ်မျှ သက်ရောက်မှုမခံရပုံပင်။

ဘုန်း...

ထိုအခိုက်တွင် နတ်အလင်းများက ဆက်လက်စီးဆင်းနေသည်။ ကောင်းကင်ထက်တွင် အကန့်အသတ်မဲ့ ကြီးမားသည့် နတ်ဘုရားတူက တစ်ဖန် ဖြစ်တည်လာသည်။ ရှေးဟောင်းနတ်ဘုရား၏ ပုံရိပ်က ကောင်းကင်နှင့် မြေကြီးကြား၌ မားမားမတ်မတ် ရပ်နေခဲ့သည်။ သူက လက်နှစ်ဖက်လုံးကို မြှောက်ကာ နတ်ဘုရားတူအား မြှောက်ကိုင်လိုက်သည်။ ကောင်းကင်မှ ကြောက်မက်ဖွယ် လွှမ်းမိုးနိုင်သည့် စွမ်းအားတို့က ကျဆင်းလာကာ လူအုပ်ကြီးအထက်မှ နတ်ဘုရားတူက တစ်ဖန် မြောက်တက်လာသည်။ ၎င်းသည် အချိန်မရွေး ကျရောက်လာတော့မလို ထင်မှတ်ရသည်။

သို့သော် ယခုတွင်လည်း ၎င်းက ဗုဒ္ဓဘုံ၏အရှင်သခင်ကို ရည်ရွယ်နေခဲ့သည်။

"လူတိုင်း ဆက်တိုက်ချင်သေးလား။" တိုက်ပွဲဝင်္ကပါအတွင်းမှ အသံတစ်ခုက ပြောလိုက်သည်။ ထိုနတ်ဘုရားတူက အောက်သို့ ချက်ချင်း ဆင်းသက်မလာသေးဘဲ ထို ရက်စက်သည့် ကျင့်ကြံသူများကို ခြိမ်းခြောက်နေသည်။

တိုက်ပွဲဝင်္ကပါအတွင်း ထိပ်သီးပုဂ္ဂိုလ်များအားလုံးကို နတ်အလင်းတို့ဖြင့် လွှမ်းခြုံထားပြီး သူတို့အရှိန်အဝါက ထိတ်လန့်အံ့အားသင့်ဖွယ် ဖြစ်နေခဲ့သည်။ သူတို့က နတ်ရတနာကိုပင် အသုံးပြုနေခဲ့သော်လည်း သူတို့၏ မျက်လုံးများက ညို့မှိုင်းကာ လေးလံနေသည်။ ကျောက်တုံးတိုက်ပွဲဝင်္ကပါက သူတို့ ထင်မှတ်ထားသည်ထက် ပိုမိုအစွမ်းထက်လှပေသည်။ စွန့်ပစ်ခံကလန်နှင့် တိုက်ပွဲဝင်္ကပါတိုက်ပွဲတွင် ၎င်းက အဓိကခံစစ်ကို အသုံးပြုခဲ့သော်လည်း ယခု တိုက်ပွဲဝင်္ကပါက နောက်တစ်ခေါက်တိုက်ခိုက်ရန်အတွက် ခွန်အားတို့ကို စုစည်းနိုင်ပေသည်။

ထို့ပြင် ၎င်းက အစွမ်းထက်တိုက်ခိုက်မှုဖြစ်သည့် စောင့်ရှောက်သူ နတ်ဘုရားတူကို အသုံးပြုခဲ့ပေသည်။ ဤနတ်ဘုရားနည်းစနစ်က လေးမျက်နှာကျေးရွာမှ လျှို့ဝှက်နည်းစနစ်တစ်ခု ဖြစ်သည်။ သံသယဖြစ်ဖွယ်မရှိ ရီဖူရှင်းက စွန့်ပစ်ခံကလန်ကို သင်ကြားပေးခဲ့ခြင်း ဖြစ်ပေသည်။

သူတို့က တိုက်ပွဲဝင်္ကပါအလယ်မှ ဆံပင်အဖြူရောင်နှင့် လူငယ်ကို အေးစက်မှုတို့ဖြင့် စိုက်ကြည့်နေခဲ့သည်။ ဤသည်က ရီဖူရှင်း၏ တန်ပြန်တိုက်စစ်ပေလား။ စွန့်ပစ်ခံကလန်မှ ကျောက်တုံးတိုက်ပွဲဝင်္ကပါ၏ ခွန်အားသည် ကောင်းကင်ဒေသမှ ကျင့်ကြံသူများကို စိတ်ကြိုက် မလှုပ်ရှားရဲအောင် ဟန့်တားထားနိုင်သည်။

"ဒီတိုက်ပွဲဝင်္ကပါက ဘယ်လောက်အားကောင်းပါစေ တဖြေးဖြေး ပြိုကျပျက်စီးလာလိမ့်မယ်။" ထိုပုံရိပ်က အေးစက်စွာနှင့် ပြောလိုက်သည်။

"ဒါပေမယ့် တိုက်ပွဲဝင်္ကပါက တစစီပြိုကွဲမသွားခင် အထွတ်အထိပ်ကျင့်ကြံသူ တစ်ယောက်နှစ်ယောက်လောက်လည်း တိုက်ပွဲဝင်္ကပါနဲ့အတူ ကျဆုံးသွားနိုင်တယ်။ အဲဒီလိုဆိုရင် ကောင်းကင်ဒေသရဲ့ အနာဂတ်မှာ အဓိကအင်အားစုအချို့ အပြောင်းအလဲတွေတောင် ဖြစ်သွားစေမှာ စိုးမိတယ်။" တိုက်ပွဲဝင်္ကပါအတွင်းမှ အသံတစ်ခု ထွက်ပေါ်လာပြီး လူတိုင်းကို တိတ်ဆိတ်သွားစေသည်။

ကျောက်တုံးတိုက်ပွဲဝင်္ကပါ၏ အစွမ်းထက် တိုက်ခိုက်ရေးစွမ်းအားက သိသာမြင်သာခြင်းမရှိဘဲ တစ်စုံတစ်ဦးကိုသာ အဆက်မပြတ် ဆက်လက်တိုက်ခိုက်နေပါက ထိပ်သီးအဆင့် ပုဂ္ဂိုလ်တစ်ဦး သုတ်သင်ခံရရန် ဖြစ်နိုင်ချေ ရှိပေသည်။ ထို့ပြင် ထိုသို့သော ပုဂ္ဂိုလ်တစ်ယောက် သုတ်သင်ခံရလျှင် သူတို့၏ ကလန်က အားနည်းသွားမည်မှာ မလွဲဧကန် ဖြစ်ပေလိမ့်မည်။ ကောင်းကင်ဒေသအတွင်း အင်အားစုများ အပြောင်းအလဲ ဖြစ်နိုင်ချေရှိသည်ဟု ဆိုခြင်းမှာ ချဲ့ကားပြောဆိုနေခြင်း မဟုတ်ပေ။

ဤအဆင့်၌ မည်သည့် တည်ရှိမှုမျိုးမဆို ကောင်းကင်ဒေသ၏ အနာဂတ်ကို လွှမ်းမိုးနိုင်စွမ်း ရှိပေသည်။

မည်သူကမှ ထိုကဲ့သို့ အလောင်းအစားမျိုး လုပ်ရဲလိမ့်ပါမည်နည်း။

အချိန်တစ်ခုအတွင်း တိုက်ပွဲဝင်္ကပါထဲ၌ အလွန် ကြောက်မက်ဖွယ် တိတ်ဆိတ်နေခဲ့သည်။ ကြောက်မက်ဖွယ် ချုပ်ကိုင်လွှမ်းမိုးနိုင်သည့် စွမ်းအားက ထိုနေရာတစ်ခွင်လုံးကို လွှမ်းခြုံထားသည်။ သို့သော် ထိုအချိန်၌ မည်သူကမှ နောက်တစ်ခါ မလှုပ်ရှားရဲကြပေ။ အထူးသဖြင့် ပြင်းပြင်းထန်ထန် ဒဏ်ရာရသွားခဲ့သော ဗုဒ္ဓဘုံအရှင်သခင်က ကြီးစွာသော ကြောက်ရွံ့မှုကို ခံစားလိုက်ရပေသည်။ ကောင်းကင်ထက်မှ နတ်ဘုရားတူက မည်သည်ကိုမှ ဂရုမစိုက်ဘဲ သူ့ကို အဆက်မပြတ် ဆက်လက်ထိုးနှက်လာလျှင် ၎င်းက သူ့အား ဆိုးဝါးလှသည့် အခြေအနေသို့ အမှန်တကယ် တွန်းပို့လိုက်နိုင်ပေသည်။ သူက အစွမ်းထက်ဆုံး အခြေအနေကို ထုတ်မသုံးရသေးသော်လည်း ကျောက်တုံးတိုက်ပွဲဝင်္ကပါကရော မည်သို့ အခြေအနေ ရှိနိုင်သနည်း။ လက်ရှိတိုက်ခိုက်ရေးစွမ်းအားက အစွမ်းထက်ဆုံး အခြေအနေ ဖြစ်ပြီး ဟုတ်မဟုတ် မည်သူမှ မသိကြပေ။

အဆုံးမှာတော့ စွန့်ပစ်ခံကလန်မှ ကျင့်ကြံသူများက တိုက်ပွဲဝင်္ကပါအတွင်း ရှိနေကာ တိုက်ပွဲဝင်္ကပါ၏ တိုက်ခိုက်နိုင်စွမ်းအလားအလာကို ပိုမို အားကောင်းလာစေနိုင်သည်။ ယခင်က စွန့်ပစ်ခံကလန်မှ ထိုတိုက်ပွဲတွင် စွန့်ပစ်ခံကလန်ကျင့်ကြံသူများက တိုက်ပွဲဝင်္ကပါစွမ်းအားကို တိုးမြင့်လာစေရန်အတွက် အစွမ်းကုန် အားထုတ်ကာ တိုက်ခိုက်ခဲ့ကြသည်။

ထိုတိုက်ပွဲ၌ အဖြစ်နိုင်ဆုံး တိုက်ပွဲရလဒ်မှာ နှစ်ဖက်လုံးအတွက် ဆုံးရှုံးမှုများစွာ ဖြစ်စေနိုင်ပေလိမ့်မည်။

နောက်ဆုံး၌ ကောင်းကင်ဒေသမှ ထိုထိပ်သီးပုဂ္ဂိုလ်များက တိတ်ဆိတ်သွားခဲ့သည်။ သူတို့၏ အရှိန်အဝါများက ပေါက်ကွဲထွက်လာနေဆဲ ဖြစ်သော်လည်း ထက်ရှမှုက အလွန်လျော့ပါးသွားပေသည်။ ကြည့်ရသည်မှာ သူတို့သည် ယခင်က အရှိန်အဟုန်ကို ဆုံးရှုံးသွားခဲ့ပုံရပေသည်။ သိသာစွာပင် သူတို့၏ ရီဖူရှင်းအား ဆွဲချရန် ဆုံးဖြတ်ချက်မှာ ယိမ်းယိုင်သွားပုံရပေသည်။

နောက်ဆုံးတွင် အခြားတစ်ဖက်မှ နတ်ဘုရားတူကျဆင်းလာသောအခါ မည်သို့ ဖြစ်လာလိမ့်မည်ကို မည်သူမှ အာမခံနိုင်ခြင်း မရှိပေ။

"ခင်ဗျားတို့ သေတဲ့အထိ ဆက်ပြီး တိုက်ခိုက်နေရင်တောင် ရလဒ်ကို ဘယ်သူမှ မခန့်မှန်းနိုင်မှာ စိုးမိတယ်။ အဲဒါကို ဂရုတစိုက်ဆုံးဖြတ်ပေးပါ။" တိုက်ပွဲဝင်္ကပါအတွင်းမှ အသံတစ်ခုက တစ်ဖန်ပြောလိုက်သည်။ "ရီဖူရှင်းက နတ်ရတနာတွေကို ပိုင်ဆိုင်ထားပေမယ့် ခင်ဗျားတို့အားလုံးကလည်း ရှေးဟောင်းနတ်ဘုရားကလန်က လူတွေပဲ မဟုတ်ဘူးလား။ ဘာလို့များ လုယက်မယ့် ခင်ဗျားတို့ ရည်ရွယ်ချက် အစစ်အမှန်ကို ဖုံးကွယ်ပြီး အလုပ်ရှုပ်ခံ ဆင်ခြေဖန်တီးနေရတာလဲ။"

ထိုအသံက လေဟာနယ်ကို ဖြတ်ကာ ကျယ်လောင်စွာ မြည်ဟီးလာပြီး တိုက်ပွဲဝင်္ကပါအတွင်း ပဲ့တင်ထပ်နေခဲ့သည်။ ထိုလူများထဲမှ တချို့က အရှိန်အဝါများကို တဖြေးဖြေး ပြန်ရုတ်သိမ်းလိုက်ကြပြီး နတ်အလင်းကလည်း ပျောက်ကွယ်သွားသည်။ ရှင်းလင်းစွာပင် အချို့က လက်လွှတ်ရန် ဆုံးဖြတ်ချက်ချလိုက်ပေသည်။

သူတို့ထံမှအချို့က လက်လွှတ်ရန် ဆုံးဖြတ်ချက်ချလိုက်သည်ကို မြင်သောအခါ အခြားကျင့်ကြံသူများက ရုတ်တရက် အမြင့်မှ တိုက်ပွဲဝင်္ကပါကို ကြည့်ကာ ပြန်လည်စဥ်းစားလိုက်ကြသည်။ သူတို့က ဤကဲ့သို့ လက်လွှတ်ပေးလိုက်ရန် အလိုမရှိသော်လည်း ယနေ့ ပြဿနာကို ဤနေရာ၌သာ ရပ်ရမည်ကို နားလည်ပေသည်။ ကောင်းကင်ဒေသမှ ထိုထိပ်သီးကျင့်ကြံသူများအနေနှင့် သူ့ကို ရင်ဆိုင်ရန်အတွက် စုပေါင်းလိုက်ခြင်းမှ မဟုတ်ခဲ့လျှင် ရီဖူရှင်းကို တိုက်ခိုက်ရန်မှာ စိန်ခေါ်မှုတစ်ရပ် ဖြစ်နေပေလိမ့်မည်။ သူတို့၏ ဆုံးဖြတ်ချက်ပြတ်သားမှုက မလုံလောက်ခဲ့လျှင် မည်သူကမှ ဆက်လက်တိုက်ခိုက်ရန် ဝံ့ရဲလိမ့်မည် မဟုတ်ပေ။

ဗုဒ္ဓဘုံအရှင်သခင်အပါအဝင် တဖြေးဖြေးနှင့် အခြားကျင့်ကြံသူများကလည်း သူတို့၏ အရှိန်အဝါတို့ကို ရုတ်သိမ်းလိုက်သည်။ ဤဖွံ့ဖြိုးတိုးတက်မှုကို မြင်သောအခါ လူတိုင်း၏ ခေါင်းအထက်တွင် ရစ်ဝဲနေသည့် နတ်ဘုရားတူက တဖြေးဖြေး ပျက်စီးပျောက်ကွယ်သွားခဲ့သည်။ တိုက်ပွဲဝင်္ကပါအတွင်း စွန့်ပစ်ခံကလန်မှ ကျင့်ကြံသူအားလုံးကလည်း ထိုနေရာမှ ထရပ်လိုက်ကြသည်။ ရီဖူရှင်းကလည်း ကု့ချင်းတီးခတ်နေခြင်းအား ရပ်တန့်လိုက်၏။ သူက အောက်ဘက်သို့ ငုံ့ကြည့်လိုက်ပေသည်။

အခြားတစ်နေရာ၌ နောက်ထပ် အဓိကတိုက်ပွဲတစ်ခု ဖြစ်နေခဲ့ပြီး ဖျက်ဆီးခြင်းစွမ်းအားတို့က အလွန် ကြောက်မက်ဖွယ် ကောင်းလှသည်။ မည်သို့ပင်ဖြစ်စေ လက်ရှိအခြေအနေက မတိုးသာမဆုတ်သာ ဖြစ်နေခဲ့ပြီး မည်သည့်ဘက်ကမှ အနိုင်ရနိုင်စွမ်းမရှိခဲ့ပေ။

သူက လွန်ခဲ့သော နှစ်ပေါင်းတစ်ထောင်ခန့်က နတ်ဆိုးအရှင်သခင် ဖြစ်ခဲ့သည်မှာ အံ့သြစရာ မရှိဟု ကောင်းကင်ဒေသမှ ကျင့်ကြံသူများက သူတို့၏ နှလုံးသားထဲမှ လျှို့ဝှက်စွာ ပြောလိုက်ကြသည်။ ထျန်းယန်မြို့သခင်၏ တိုက်ပွဲစွမ်းရည်က အကြွင်းမဲ့ အစွမ်းထက်လှသည်။ သူက လက်နက်ပြုလုပ်ရာ၌ အစွမ်းထက်သော တည်ရှိမှုတစ်ခု ဖြစ်သော်လည်း အားလုံးသော ကျင့်ကြံရေး အမျိုးအစားများက ဆက်စပ်နေပေသည်။ သူ၏ လက်နက်ပြုလုပ်ခြင်းက ထိပ်ဆုံးအဆင့်သို့ ရောက်ရှိခဲ့ပြီး သူ၏ တိုက်ပွဲစွမ်းရည်နှင့်လည်း တူညီပေသည်။ ထို့ပြင် သူ့ထံမှ ကြောက်မက်ဖွယ် အစွမ်းထက်လှသော နတ်ဘုရားလက်နက်ကိုလည်း ပိုင်ဆိုင်ထားသေးသည်။

သို့ဆိုလျှင်ပင် ၎င်းသည် ဤကဲ့သို့ ကြောက်မက်ဖွယ် သဘာဝကို ပိုင်ဆိုင်ထားသော ကောင်းကင်ဝါးမြိုနတ်ဆိုးအရှင်သခင်ကို ရင်ဆိုင်ရန် ရှုံးနိမ့်နေဆဲ ဖြစ်ပေသည်။

အထက်ရှိ တိုက်ပွဲက ငြိမ်သက်လာသည်။ ထျန်းယန်မြို့သခင်က ထိုကိစ္စကို ဆက်မလိုက်တော့ဘဲ တိုက်ခိုက်နေခြင်းကို ရပ်တန့်လိုက်သည်။ သူ၏ အကြည့်များက ကောင်းကင်ထက်သို့ ရွေ့လျားသွားပြီး ၎င်း၏ ထက်ရှမှုက ရှင်းလင်းထင်ရှားပေသည်။ ကောင်းကင်ဒေသမှ ကျင့်ကြံသူများအားလုံးက သူတို့၏ စွမ်းအားများကို စုပေါင်းတိုက်ခိုက်ခဲ့သော်လည်း သူတို့သည် အဆင့်ခုနစ်ရန်ဟောင်တစ်ပါးကိုပင် မတိုက်ခိုက်နိုင်ခဲ့ပေ။

သူ၏ ထက်ရှသော မျက်လုံးများက ကောင်းကင်ဒေသမှ အခြားကျင့်ကြံသူများကို ကြည့်ရင်း အေးစက်စွာ ပြောလိုက်သည်။ "ဒီကနေ သွားကြမယ်။"

ထျန်းယန်မြို့မှ ကျင့်ကြံသူများက သူ့အနီးတွင် စုဝေးလာပြီး အားလုံး ထွက်သွားရန် ပြင်ဆင်နေကြသည်။

"မူလဘုံက ကောင်းကင်ဒေသရဲ့ နယ်မြေတစ်ခု ဖြစ်ပေမယ့် ကောင်းကင်အာဏာစက်ကျောင်းတော်က နတ်ဆိုးလောကရဲ့ နတ်ဆိုးအရှင်သခင်နဲ့ ပူးပေါင်းကြံစည်နေတယ်။ သူတို့က ကောင်းကင်ဒေသရဲ့ နယ်မြေတစ်ခုအဖြစ် ကျန်ရစ်နေဖို့ မထိုက်တန်ဘူး။" သူက ပြောပြီးသွားသည်နှင့် လက်ကိုယမ်းလိုက်ပြီး အနန္တနတ်အလင်းတို့က အောက်ဘက်သို့ ကျဆင်းလာသည်။

တိုက်ခိုက်မှုများက လျင်မြန်ကာ ပြင်းထန်လှသည်။ ၎င်းတို့က ကောင်းကင်အာဏာစက်ကျောင်းတော်သို့ ချက်ချင်း ကျဆင်းလာပေသည်။

ဘုန်း... ဘုန်း... ဘုန်း...

ချက်ချင်းပင် ကောင်းကင်အာဏာစက်ကျောင်းတော်က ထိုကြောက်မက်ဖွယ် တိုက်ခိုက်မှုအောက်၌ အရူးအမူး ပြိုကျပျက်စီးသွားခဲ့ပေသည်။ ရီဖူရှင်းက အားနည်းသော ကျင့်ကြံသူများကို စီဝေ့ကြယ်ကမ္ဘာသို့ ပို့ထားခဲ့ပြီး ဖြစ်သော်လည်း အချို့သော ရန်ဟောင်များက ကျန်ရစ်နေခဲ့သေးသည်။ သူတို့က ကတိုက်ကရိုက် ပြန်ဆုတ်ခွာခဲ့သော်လည်း အချို့က အလွန် နှေးကွေးသည့်အတွက် ကောင်းကင်အာဏာစက်ကျောင်းတော်၏ အပျက်အစီးများနှင့်အတူ မြှုပ်နှံခံလိုက်ရပေသည်။

တစ်ချက်တွေးလိုက်သည်နှင့် ထိုခမ်းနားထည်ဝါသော ကျောင်းတော်က တစ်ဖန် ဖျက်ဆီးခံလိုက်ရသည်။