တစ်ညအပြီး အဆင့်လေးဆင့် တက်ခြင်း

အနက်ရောင်ဝတ် လူငယ်က အမည်းရောင် စက်လုံးလေးတစ်ခုကို ရဲ ချင်းထျန်းထံ ပေးအပ်ပြီး သူ၏ နားသို့ တိုးတိုးလေး ကပ်ပြောကာ စကားပြောနေစဉ် သူ၏ မျက်လုံးသူငယ်အိမ်များ လခြမ်းပုံသို့ ထူးဆန်းစွာ ပြောင်းလဲသွားသည်။

"ဓားတာအိုကျောက်တိုင်လား"

ရဲ ချင်းထျန်၏ မျက်လုံးများက အနက်ရောင်ဝတ် လူငယ်ကို ကြောင်တောင်တောင် စိုက်ကြည့်လျက် အထိတ်တလန့် ပြူးကျယ်လာ၏။

" မလုပ်ရဲဘူးလား။ မင်းက ကောင်းကင်နယ်မြေရဲ့ အုပ်စိုးသူအဖြစ် ဆက်ရှိမနေချင်ဘူးလား။ အဇူရာ သစ်ရွက် အင်မော်တယ်နတ်ပြည်ထောင် ပြန်လာဖို့ မလိုချင်ဘူးလား"

အနက်ရောင်ဝတ် လူငယ်က နှာခေါင်းရှုံ့လိုက်သည်။

"ခင်ဗျား နောက်မနေပါနဲ့ လဧကရာဇ်။ သူက နန်းပလ္လင်ကို ပြန်ရဖို့ ညတိုင်း အိပ်မက်မက်နေတာ"

ခရမ်းရောင်ဧကရာဇ်က မဲ့ပြုံးဖြင့် ဝင်ပြောလိုက်ပြီး ရဲ ချင်းထျန်သည် ခဏတာ တုံ့ဆိုင်းနေသော်လည်း ပြတ်သားစွာ ခေါင်းညိတ်လိုက်သည်။

"ကောင်းပြီ၊ ကျုပ် လုပ်မယ်"

"မင်းတို့နဲ့ အလုပ်တွဲလုပ်ရသည့်အတွက် ဝမ်းမြောက်စရာပဲ၊ ဟား ဟား"

လဧကရာဇ်က ကောက်ကျစ်စွာ ရယ်လိုက်ပြီး ရိုင်းစိုင်းဆိုးသွမ်းသော နတ်ဆိုးလူငယ် သဘာဝ ထင်ဟပ်နေ၏။ ဆန့်ကျင်ဘက်တွင် ကြာနီဟု အမည်ရသည့် အမျိုးသမီးက သံသယဖြစ်ဖွယ်မရှိ ပို၍ ကြောက်စရာကောင်းသော်လည်း သွေးစွန်းသော နွေဦး၌ နွေးထွေးသကဲ့သို့ နူးညံ့သော အပြုံးမျိုး အမြဲတမ်း ရှိနေသည်။

"နတ်ဆိုးမင်းသားနဲ့ မင်းသမီးတွေ ဘယ်မှာ ရှိလဲ"

ခရမ်းရောင်ဧကရာဇ်က မျှော်လင့်တကြီး မေးမြန်းခဲ့သည်။

"သူတို့လည်း ဒီမှာ ရှိတယ်"

လဧကရာဇ်၏ စကားအဆုံးတွင် အရိပ်များ မှောင်မိုက်သော မိုးကုတ်စက်ဝိုင်းမှ ပေါ်ထွက်လာ၍ လူငယ် အမျိုးသား၊ အမျိုးသမီး တစ်ဒါဇင်ကျော် ကြည်လင်မြင်ကွင်းစင်မြင့်သို့ တက်လာကြသောကြောင့် ကောင်းကင်နယ်မြေ၏ တံခါး၌ မြူခိုးများ ပို၍ပင် ထူထပ်လာသည်။ ဤအရိပ်များသည် နတ်ဆိုးအရှိန်အဝါများ ဖုံးလွှမ်းနေပြီး လူသားပုံသဏ္ဌာန် ရှိသော်လည်း တိရိစ္ဆာန်အသွင်မျိုးစုံရောယှက်နေ၍ လောက၏ အညစ်အကြေးများနှင့် အငြိုးတရားများမှ ဖြစ်ပေါ်လာပုံရသည်။ သို့သော် သူတို့အားလုံးတွင် တူညီသည့် အချက်တစ်ချက် ရှိကာ သူတို့၏ ငယ်ရွယ်မှုပင် ဖြစ်ပြီး အနက်ရောင်ဝတ် လူငယ်အောက် ငယ်ကြသော်လည်း၊ ကုန်းမင်ထက်မူ အသက်ကြီးကြသည်။

"ခမည်းတော်"

နတ်ဆိုးအုပ်အတွင်းမှ လူသားမျိုးနွယ်ဝင်နှစ်ယောက် ရှေ့ထွက်လာ၍ ခရမ်းရောင်ဧကရာဇ်ထံ ချဉ်းကပ်လာခဲ့၏။ လူငယ် အမျိုးသားက အရပ်မြင့်ပြီး ခန့်ညားကာ ခရမ်းရောင်ဧကရာဇ်၏ ခရမ်းရောင် ဆံပင်နှင့် မျက်နှာသွင်ပြင်များကို အမွေဆက်ခံထားသည်။ မိန်းကလေးမှာမူ အံ့ဩစရာကောင်းပြီး အသက် ဆယ့်နှစ်နှစ်ထက် မကျော်သော်လည်း သူမ၏ နုနယ်သော မျက်နှာထက်တွင် မျက်ဝန်းများမှာ သူငယ်အိမ်များမရှိသည့် အဖြူသက်သက်ဖြစ်နေခြင်းဖြင့် အကျည်းတန်နေသည်။ ဤအရာက သူမကို ဝိညာဉ်မဲ့ အလောင်းကောင်ကဲ့သို့ ထင်မှတ်စေနိုင်သည်။

"ချီအာ"

"ကျုပ်ရဲ့ ကလေးနှစ်ယောက်ကို ပြုစုပျိုးထောင်ပေးတဲ့အတွက် နတ်ဆိုးတိုက်ကြီးကို အကြွေးတင်သွားပါပြီ"

ခရမ်းရောင်ဧကရာဇ်က အချိန်ကြာမြင့်စွာ ဝေးကွာနေခဲ့သော ရင်သွေးများကို စိုက်ကြည့်ပြီး နတ်ဆိုးဧကရာဇ်နှစ်ပါးဘက်လှည့်ကာ ဦးညွှတ်ခဲ့သည်။

"မလိုဘူး။ ကလေးနှစ်ယောက်စလုံးက ထူးချွန်လို့ အင်မော်တယ်စစ်ပွဲတွင်၊ သူတို့ လူသားမျိုးနွယ်အတွက် စံပြ ဖြစ်နိုင်တယ်"

ကြာနီက အက်ကွဲကွဲအသံဖြင့် တုံ့ပြန်သည်။

"အထူးသဖြင့် ဒီက ချီအာလေး။ နောက်ထပ် နှစ်အနည်းငယ် ကျင့်ကြံလိုက်ရင် သူမက နောက်ထပ် နတ်ဧကရီတစ်ပါး ဖြစ်လာနိုင်တယ်"

"အရုဏ်တက်နတ်ဧကရီက မျိုးနွယ်နှစ်ခုရဲ့ ငြိမ်းချမ်းရေးကို ဖျက်ဆီးခဲ့တယ်။ ချီအာက အစွမ်းထက်လာရင်တောင် သူမလို လူမျိုး မဖြစ်စေရပါဘူး"

လဧကရာဇ်၏ စကားကြောင့် ခရမ်းရောင်ဧကရာဇ် ဂုဏ်ယူစိတ်ကို ခံစားလိုက်ရသော်လည်း အလျင်အမြန် ပြန်ဖြေသည်။ ထို့နောက် သူက နတ်ဆိုးတိုက်ကြီးမှ ပါရမီရှင်များကို ကြည့်ပြီး သက်ပြင်းချလိုက်သည်။

"ဒီက ညီအစ်ကို မောင်နှမများ အားလုံးရဲ့ လမ်းညွှန်မှုကြောင့် ချီအာက အဆုံးမဲ့ငရဲပြည်မှာ အောင်မြင်မှုတစ်ခု ရရှိခဲ့ပါတယ်။ သူမကို မင်းတို့ အားလုံးက ဆက်လက် သင်ကြားပေးဖို့ ငါ မျှော်လင့်တယ်"

"အားနာစရာမလိုပါဘူး ခရမ်းရောင်ဧကရာဇ်"

နတ်ဆိုး ပါရမီရှင်များက တစ်ပြိုင်နက်တည်း အေးစက်စက် ပြန်ဖြေခဲ့ကြသည်။

" အဆုံးမဲ့ငရဲပြည်ရဲ့ အချိန်တွေက မင်းတို့ရဲ့ အရည်အချင်းတွေကို အမှန်တကယ် သွေးပေးနိုင်ခဲ့တယ်။ အရုဏ်တက်နတ်ရော အင်မော်တယ်နတ်ပြည်ထောင် လေးခုစလုံး ဒီတိုးတက်မှုအကြောင်း မသိကြဘူး။ အင်မော်တယ်စစ်ပွဲကို ကိုယ့်ကိုကိုယ် သက်သေပြဖို့ အသုံးချကြ"

လဧကရာဇ်က နတ်ဆိုးပါရမီရှင်များကို စစ်ဆေး၍ တစ်ချက်ပြုံးကာ မှာကြားလိုက်သောအခါ အားလုံး ခေါင်းညိတ်ဦးညွှတ်လိုက်ကြ၏။

"အားနာစရာကောင်းလိုက်တာ။ အင်မော်တယ်စစ်ပွဲမှာ သူတို့ရဲ့ ပြိုင်ဘက်များ ဖြစ်ဖို့ ထိုက်တန်သူ အလွန် နည်းပါးတယ်"

ခရမ်းရောင်ဧကရာဇ်က သူ၏ မုတ်ဆိတ်မွေးကို ပွတ်သပ်ရင်း ညည်းတွားပြနေသော်လည်း ရဲမျိုးနွယ်၏ ပါရမီရှင်နှစ်ယောက် ဆုံးရှုံးခဲ့ရသဖြင့် ရဲချင်းထျန်က မျက်နှာ မကောင်းလှပေ။

"ကူဧကရာဇ်က အရုဏ်တက်နတ်ဧကရီရဲ့ နောက်ခံကို ဖော်ထုတ်ဖို့ ကောင်းကင်နယ်မြေကို စောစော ရောက်လာတာလား"

"ကူဧကရာဇ် ဝင်ပါရင် သူမက လျှို့ဝှက်ဆန်းကြယ်ချင်ယောင်ဆောင်နေတာကို ထိန်းသိမ်းဖို့ ခက်ခဲလိမ့်မယ်"

လူသားမျိုးနွယ်၏ ဧကရာဇ်နှစ်ယောက်က နတ်ဆိုးများကို သခင်အားရကျွန်ပါးဝမြှောက်ပင့်နေကြသည်။

"ဘာဖြစ်ဖြစ် ထာဝရ ပျော်ရွှင်ခြင်းက နတ်ဆိုးဧကရာဇ် ဖြစ်ခဲ့လို့ ငါတို့က သူ့အတွက် လက်စားချေရမယ်။ ဒါတင်မကဘူး၊ ငါတို့ သူမကို နှစ်ကြိမ် တိုက်ခိုက်မယ်။ အင်မော်တယ်စစ်ပွဲရော ဓားတာအိုကျောက်တိုင်ရော ဖျက်ဆီးပြီး အတွင်းရောအပြင်ပါ တိုက်ခိုက်လို့ အရှက်ကွဲစေရမယ်"

လဧကရာဇ်သည် နတ်နန်းတော်ရှိရာသို့ တစ်ချက်ကြည့်ကာ အေးစက်စက် ကြုံးဝါးလိုက်သကဲ့သို့ ကြာနီကလည်း ဝင်ပြောလာခဲ့သည်။

"ပြီးတော့ အဆုံးမဲ့ငရဲပြည်မှာ တားမြစ်ကံကြမ္မာဧကရာဇ်က အပြီးသတ် ထိုးနှက်ချက်ကို ပြင်ဆင်နေတယ်။ ဒီတိုက်ခိုက်မှု သုံးချက်တည်းနဲ့ လူသားမျိုးနွယ်ရဲ့ အရှိန်အဟုန်ကို ရပ်တန့်ပစ်မယ်"

"လူသားမျိုးနွယ်က မစည်းလုံးဘူး။ သူတို့ရဲ့စိတ်ဓာတ်ကို ဖျက်ဆီးလိုက်ရင် ဝိညာဉ် ကြေမွသွားလိမ့်မယ်။ သူတို့က ငါတို့ လက်တစ်ဖက် မြှောက်စရာမလိုဘဲ အချင်းချင်း ဖျက်ဆီးကြလိမ့်မယ်"

နတ်ဆိုးဧကရာဇ်များက ပေါ်တင်ကဲ့ရဲ့နေကြသော်လည်း လူသားဧကရာဇ်နှစ်ယောက်မှာ ပြုံးပြနေရုံသာ တတ်နိုင်ကြ၏။

"သခင် ခရမ်းရောင် နှင့် သခင် ရဲ၊ ကျေးဇူးပြုပြီး ရှောင်ထျန်းရဲ့ ရိုင်းစိုင်းတဲ့ စကားကို စိတ်ထဲမထားပါနဲ့။ မင်းတို့ နှစ်ဦးစလုံး လူသားမျိုးနွယ်အတွက် ကောင်းကောင်းလုပ်ပေးခဲ့ကြပါတယ်"

ကြာနီက နူးညံ့သော အပြုံးဖြင့် ကြားဖြတ်ပြောသည်။

"ဒါပေါ့။ ငြိမ်းချမ်းရေး သံတမန်ကြီးတွေ မင်းတို့က စောက်ရမ်းကိုယ်ကျင့်တရားကောင်းတယ် ဟား ဟား"

လဧကရာဇ် ရှောင်ထျန်းက သူတို့ကို လက်မထောင်ပြရင်း ​လှောင်​ပြောင်သရော်နေခဲ့သည်။

အရုဏ်တက်ချိန်ရောက်လာပြီး ယနေ့သည် အင်မော်တယ်စစ်ပွဲ၏ ဖွင့်ပွဲနေ့ ဖြစ်သောကြောင့် နတ်ဆိုးတိုက်ကြီး၏ နတ်ဆိုးဧကရာဇ် လေးပါး၊ သူတော်စင် ၁၀၈ ပါး နှင့် အင်မော်တယ်နတ်ပြည်ထောင် ခြောက်ခုမှ ပါရမီရှင် အင်အားစုများ အားလုံး တက်ရောက်ကြလိမ့်မည်။နံနက်စောစောတွင် ယွမ်ရှောင်သည် အခန်းထဲတွင် ဖြည်းညှင်းစွာ နိုးထလာပြီး ရီဝေဝေဖြစ်နေကာ သေရည်ပုလင်း အလွတ်များမှ လွဲ၍ ဗလာကျင်းနေသောကြောင့် လက်လှမ်းလိုက်သောအခါ ချန်ရီက အရင် ထွက်သွားခဲ့ပုံပေါ်သည်။

"ယောက္ခမကြီးရဲ့ သေရည်က တကယ်ပြင်းတာပဲ"

ယွမ်ရှောင်၏ နှလုံးသားထဲတွင် ခံစားချက်များ ရှုပ်ထွေးနေသော်လည်း ခန္ဓာကိုယ်အတွင်း၌ အင်အားတစ်ခုသည် ဆဲလ်တိုင်းကို ဖြတ်သန်းစီးဆင်းနေသည်။ ၎င်းက ယင်ဟင်းလင်းပြင် စွမ်းအား သုံးပုံတစ်ပုံ ဖြစ်သောကြောင့် အလျင်အမြန် ပေါင်းစည်းစုပ်ယူရန် လိုအပ်၏။ သူက ရှေးဟောင်း ဟင်းလင်းပြင်ကျင့်စဥ်ကို အသက်သွင်းကာ ယင်စွမ်းအင်ကို သူ၏ နဂါးကိုးကောင် ဒန်တန် နှင့် ကိုးကောင်းကင် ကြယ်သွေးကြောများသို့ ပို့ဆောင်လိုက်ရာ ခဏအတွင်း ပေါက်ကွဲသံ လေးကြိမ် ဆက်တိုက် ထွက်ပေါ်လာ၍ တိုးတက်မှုသည် အံ့ဩစရာကောင်းလောက်အောင်ပင်။

"သူမရဲ့ စွမ်းအားက မယုံနိုင်စရာပဲ။ ငါ့ကို ဒီလောက် အမြင့်အထိ နှစ်ကြိမ်တိုင်တိုင် တွန်းပို့ပေးခဲ့တယ်"

အဆင့်လေးဆင့် ချက်ချင်း ခုန်တက်သွားခဲ့သောကြောင့် သူက တီးတိုးရေရွတ်လိုက်မိသည်။

"ညတစ်ညတည်းမှာ၊ ငါ အစောပိုင်း အင်မော်တယ်သွေးကြောနယ်ပယ်ကနေ အခြေ တည်အဆင့်ကို တချက်တည်း တက်သွားခဲ့တယ်။ ဒါဆိုရင် ငါ အခု လေမီးတောက် ကပ်ဘေးနယ်ပယ်ကိုတောင် စိန်ခေါ်နိုင်ပြီလား"

ထို့အပြင် ယင်စွမ်းအင်များက ကျန်ရစ်နေဆဲဖြစ်သောကြောင့် လေမီးတောက်ကပ်ဘေး ကျဆင်းလာလျှင် အသုံးချနိုင်ပေလိမ့်မည်။ ၎င်းနယ်ပယ်သည် အင်မော်တယ် လမ်းခရီးတွင် ပထမဆုံး အကြီးအကျယ် စိန်ခေါ်မှုဖြစ်ကာ လူတစ်ဦး၏ သတ္တိကို စမ်းသပ်သည်။ ချီစွမ်းအားကို မြင့်မြတ်သော စွမ်းအားအဖြစ် သန့်စင်ခြင်းဖြင့် သေမျိုးအဆင့်ထက် ကျော်လွန် မြှင့်တင်ပေးသဖြင့် ကောင်းကင်မှ ကပ်ဘေး အလိုအလျောက်ကျဆင်းလာရန် စိတ်ရှည်ရှည် စောင့်ဆိုင်းရသည်။ လူတိုင်း တွင် ကပ်ဘေး၏ ပြင်းထန်မှုအဆင့်က မတူညီ ကွဲပြားစွာ ရင်ဆိုင်ရသည်ဟု သူ ကြားဖူးသည်။ အရည်အချင်း ပိုများလေလေ၊ ကပ်ဘေး ပို၍ ကြောက်စရာကောင်းလေလေဖြစ်ကာ ထူးဆန်းသည်မှာ ထူးချွန်သော ပါရမီရှင်များအတွက်သေဆုံးနှုန်း ပို၍မြင့်မား၏။ ဤကပ်ဘေးကို ကောင်းကင်၏ မနာလိုခြင်း ကပ်ဘေးဟုလည်း ဆိုစမှတ်ပြုကြပြီး သမိုင်းတစ်လျှောက်လုံး ပါရမီရှင် အများအပြားသည် ၎င်းကို ရင်ဆိုင်ရင်း အဆုံးသတ်ကုန်သည်။

"ကြယ်ပြာ၊ ငါတို့ရဲ့ သုံးကြိမ်မြောက် ကျင့်ကြံမှုအတွက် သူမ ဘယ်အချိန် ကို ရွေးချယ်မယ်လို့ မင်း ထင်သလဲ"

ယွမ်ရှောင်သည် ရှုပ်ပွနေသော မြင်ကွင်းကို တစ်ချက်ကြည့်၍ မတ်တပ်ရပ်လိုက်ပြီး သားရဲလေးနှင့် စိတ်ချင်းဆက်သွယ်ကာ ခပ်ညစ်ညစ်ပြုံးနေခဲ့သည်။

"သူမက မင်းကို နန်းပလ္လင် အပ်နှင်းတော့မယ်။ သုံးကြိမ်ကျင့်ကြံပြီးရင် သူမက မင်းရဲ့ အာဏာ မြင့်တက်လာအောင် ကူညီပေးဖို့ ကြံစည်နေလောက်တယ်။ ဒါပေမယ့် မင်းကတော့ သူမရဲ့ ယင်စွမ်းအားကို ဒီလောက်ကြီး မျက်စိကျနေတာလားဟ"

"မင်းက ဂန္ထဝင် မဟာလူဆိုးပဲကွ"

ကြယ်ပြာရော လနီပါ အော်ဟစ်လိုက်ကြသည်။

"သူမ အစွမ်းထက်ပေမယ့် ဒီ တိုက်ပွဲကတော့ ငါ့အလှည့်ပဲ"

ယွမ်ရှောင်က လေးနက်စွာ ပြောလိုက်သည်။

"ဒါပေမယ့် မင်းရဲ့ လမ်းခရီးက သူမထက် အများကြီး ပို ချောမွေ့လိမ့်မယ်"

ကြယ်ပြာက မှတ်ချက်ချသည်။

"ဒါ မှန်ပေမယ့် ငါ့မှာလည်း ငါ့အကြောင်းပြချက်တွေ ရှိတယ်"

ယွမ်ရှောင်က တစ်ချက်ဟန့်၍ တိုက်ရိုက် မဖြေဘဲ ရှောင်လွှဲလိုက်သည်။

"ဘာကြောင့်လဲ"

"မင်း နားမလည်ဘူးလား။ သူမက သေဆုံးသွားတဲ့ ဝိညာဉ်တစ်သန်းအတွက် တာဝန်ကို ပခုံးပေါ် တင်ထားတယ်။ သူမက ဒီ စစ်ပွဲကို စတင်ခဲ့တယ်လို့ ယုံကြည်တဲ့အတွက် သေဆုံးမှုတိုင်းအတွက် တာဝန်ခံရလိမ့်မယ်။ ရှေးဆိုရိုးတစ်ခု ရှိတယ်။ စစ်သူကြီး၏ အောင်မြင်မှုသည် အရိုးတောင်ပေါ်တွင် တည်ဆောက်ထားသည်တဲ့။ တကယ်လို့ လူသားမျိုးနွယ် အောင်ပွဲခံပြီး သူမ အသက်ရှင်ကျန်ရစ်ခဲ့ရင် သူမကို ထာဝရ ချီးကျူးကြလိမ့်မယ်။ ဒါပေမယ့် သူမရဲ့ စိတ်မှာတော့ တိုက်ပွဲကျခဲ့သူတွေကို စော်ကားခြင်းလို့ ယုံကြည်နေတယ်။ သူမက သူတို့နှင့်အတူ နောက်ဘဝအထိ လိုက်သွားပြီး သူတို့ရဲ့ ဝိညာဉ်ကို ကာကွယ်ပေးချင်နေတယ်။ ဒါက သူမ ရင်ဆိုင်နေရတဲ့ အစစ်အမှန်ကပ်ဘေးပဲ"

ဤအချက်က သာမန်လူများ နားလည်နိုင်ခြင်း မရှိသကဲ့သို့ မြင့်မြတ်သည်ဟု မဆိုနိုင်သော်လည်း ချန်ရီကို ပို၍ လူသားဆန်သည်ဟု ခံစားရစေသည်။

"ဒါပေမယ့် မင်းသာ သူမရဲ့ နေရာကို ယူလိုက်ရင်၊ မင်းက ဘာအပြစ်မှမရှိဘဲ ဂုဏ်ကျက်သရေ အားလုံး ရရှိမှာ မဟုတ်ဘူးလား"

လနီက ခပ်တိုးတိုး ရေရွတ်သည်။

"မင်း နားမလည်ဘူး။ အစ်ကိုကြီးက သူမထက် ဉာဏ်ပိုကောင်းတယ်။ သူ့ရဲ့ အရင်းအမြစ်နဲ့ ပါရမီက သူမထက် သာလွန်တယ်။ သူက လူသားမျိုးနွယ်အတွက် ဆုံးရှုံးမှုနည်းပါးစေဖို့ ဘာမဆို လုပ်လိမ့်မယ်။ ဒါက ယောကျ်ားကောင်းတစ်ယောက် လက်ခံသင့်တဲ့ တာဝန်ပဲ"

ကြယ်ပြာက တစ်ချက်ရယ်မော၍ ပြောလိုက်၏။

ယွမ်ရှောင်က သားရဲလေးနှင့် စကားပြောနေစဉ် ချန်ရီ၏ ဒေါသထွက်နေသော အသံက အခန်းအပြင်ဘက်မှ ထွက်ပေါ်လာလေသည်။

"အင်မော်တယ်စစ်ပွဲ စတင်တော့မယ်။ နင်က အခုထိ အိပ်ရာထဲမှာ ရှိနေတုန်းလား။ ထစမ်း ငပျင်းကောင်”