ကောင်းကင်နှင့်မြေကြီးချိတ်ဆက်မှု၊ မူလချီကိုရရှိခြင်း၊ ရန်သူကိုသတ်ဖြတ်ခြင်း(၂)

မသိစိတ်၏စေ့ဆော်‌မှုဖြင့် ကျင့်ကြံသူနှစ်ယောက်သည် ကျန်းချန်ရွှမ်ဆီသို့ အပြေးအလွှားလာချင်နေခဲ့သည်။

မည်သို့ပင်ဖြစ်စေ သူတို့၎င်းကိုပြုလုပ်လိုနေသည့်အချိန်တွင်ပင် သူတို့တစ်ယောက်စီသည် မျက်စိရှေ့သို့ ပုံရိပ်တစ်ခု ဖြတ်ပြေးလာသည်ကို ခံစားမိလိုက်သည်။

၎င်းမှာ ရှန်းရူယန်ဖြစ်သည်။

“တာအိုရောင်းရင်းတို့ ဒီလမ်းကြောင်းကပိတ်သွားပါပြီ။ ရှင်တို့နောက်ထပ်လမ်းကြောင်းတစ်ခုကို ရွေးချယ်လိုက်ရင်ပိုအဆင်ပြေပါမယ်”

ရှန်းရူယန်က အေးဆေးစွာပြောလိုက်သည်။

ရှန်းရူယန်၏ စကားများကိုကြားပြီးနောက် ပဏာမအခြေတည်ဝိညာဉ်အဆင့်ရှိ လေးထောင့်ကျကျမျက်နှာနှင့် ကျင့်ကြံသူက သရော်ပြုံးပြုံးလိုက်သည်။

“ပိတ်သွားတာလား? မင်းကမင်းအဲ့ဒီလိုဆုံးဖြတ်နိုင်တယ်လို့ ထင်နေတာလား? မင်းကိုယ်မင်း ဘယ်သူလို့ထင်နေတာလဲ? ကိုယ့်ကိုကိုယ် အလွန်အမင်း အထင်ကြီးထားတာပဲ”

သို့နှင့် တုံ့ဆိုင်းခြင်းမရှိဘဲ လေးထောင့်မျက်နှာနှင့် အမျိုးသားကျင့်ကြံသူသည် သူ၏လက်ကိုမြှောက်လိုက်ကာ ကြီးမားသောအလုံးတစ်ခုကိုဆင့်ခေါ်လိုက်ပြီး ချက်ချင်း ရှန်းရူယန်ကို ကာဆီးစေခဲ့သည်။

မူလချီသည် သူ၏ရှေ့တွင် ရှိနေသဖြင့် သူအားမည်သူတားဆီးနေသည်ကို ဂရုစိုက်မနေပေ။

သူ၏လမ်းကို ပိတ်ဆို့နေသည့်လူမှန်သမျှ ရက်စက်သောအသေဆိုးနှင့် ကြုံတွေ့ရမည်။

အခြား နဝမအဆင့်ရွှေအမြုတေကျင့်ကြံသူမှာလည်း တုံ့ဆိုင်းမနေခဲ့ပေ။

လေးထောင့်မျက်နှာနှင့် အမျိုးသားကျင့်ကြံသူက သူ၏ရတနာကို ထုတ်လွှတ်ပြီးနောက် သူလည်း အတူတူပင် ပြုလုပ်လိုက်သည်။

၎င်းမှာ ရေခဲပြာဓားပျံဖြစ်သည်။

ချက်ချင်းပင် ဘေးပတ်ဝန်းကျင်ရှိ အပူချိန်သည် ဒီဂရီရာနှင့်ချီ၍ ကျသွားကာ မြေပြင်ပေါ်တွင် ထူထပ်သည့် မြူအလွှာတစ်ခု ဖြစ်ပေါ်လာသည်။

၎င်းကိုမြင်ကာ ရှန်းရူယန်၏ လှပသောမျက်ဝန်းများထဲတွင် သတ်ဖြတ်လိုသော ရည်ရွယ်ချက်တစ်ခု ဖြတ်ပြေးသွားသည်။

သူတို့သည် ဤလမ်းကြောင်းကို ရွေးချယ်ခဲ့သည့်အတွက် ရန်သူများဖြစ်လာပေတော့မည်။

ရန်သူများကိုတော့ ရှန်းရူယန် အလိုလိုပင်နောက်ဆုတ်မပေးနိုင်ပေ။

ထိုအချိန်တွင် သူမသည် ကျန်းချန်ရွှမ်မှာ မည်သည့်နည်းနှင့်မှ သက်ရောက်မှုမခံရစေရန် သေချာအောင်လုပ်ရမည်။

ထိုကြောင့် သူမစတင်လှုပ်ရှားလိုက်သည်နှင့် အားအကုန်သုံးလိုက်သည်။

ရှန်းရူယန်က သူမရဲ့စွမ်းအားတွေအကုန်လုံးကို အသုံးပြုလိုက်တဲ့အခါ ဘယ်လောက်အစွမ်းထက်မှာလဲ?

ချဲ့ကားမှုမရှိဘဲပြောရလျှင် အဝါရောင်အခြေတည်ဝိညာဉ်အဆင့်တစ်ယောက်တောင် ဤနေရာတွင် ရှိနေပါက သူသည် ဝေဒနာခံစားရကာ ထိုနှစ်ယောက်ကို လွှတ်ပေးလိုက်မည် ဖြစ်သည်။

ချက်ချင်းဆိုသလိုပင် ရှန်းရူယန်က သူတို့၏တိုက်ခိုက်မှုများကို တားဆီးလိုက်သည်။

ထို့နောက် သူမ၏ လျှပ်စီးအမတသတ်ဖြတ်သူငါးခုသည် မည်သည့်ညှာတာမှုမှ မပြသခဲ့ပေ။

၎င်းသည် သူတို့၏ခန္ဓာကိုယ်များကို ခုတ်ပိုင်းလိုက်ကာ လေထဲတွင် ပွဲချင်းပြီး သတ်ပစ်လိုက်သည်။

“အား!”

စိတ်သောကရောက်ဖွယ်အော်ဟစ်သံများ လေထဲတွင် ပဲ့တင်ထပ်သွားသည်။

ဝိညာဉ်ချီကို အလစ်သုတ်ရန် စီစဉ်နေသည့် လေးထောင့်မျက်နှာ အမျိုးသားကျင့်ကြံသူနှင့် အစိမ်းရောင်ဝတ်ရုံဖြင့် အမျိုးသားကျင့်ကြံသူတို့သည် ရှန်းရူယန်၏ စွမ်းအားမှာ ဤမျှကြောက်စ‌ရာကောင်းလိမ့်မည်ဟု မမျှော်လင့်ခဲ့ကြပေ။

ပို၍‌မမျှော်လင့်ထားမိသည့်အရာမှာ သူမသည် သူတို့နှစ်ယောက်ကို တကယ်ပင်သတ်ပစ်လိုက်ပြီး သူတို့၏ဂိုဏ်းကို အမှားပြုလုပ်လိုက်ကာ စွန့်စားလိုက်ခြင်း ဖြစ်သည်။

ဤမြင်ကွင်းကို ဖြတ်လျှောက်သွားသည့် ကျင့်ကြံသူအချို့က မျက်မြင်တွေ့သွားခဲ့သည်။

၎င်းသည် သူတို့ကို နှလုံးခုန်ရပ်လုမတတ် ဖြစ်သွားစေခဲ့သည်။

သူတို့သည် ချုံရွှမ်ဂိုဏ်းမှ ဤကျင့်ကြံသူနှစ်ယောက်၏ စွမ်းအားကို ကောင်းကောင်းသိသည်။

အထူးသဖြင့် ပဏာမအခြေတည်ဝိညာဉ်အဆင့်ကိုရောက်ရှိနေသည့် လေးထောင့်မျက်နှာနှင့် အမျိုးသားကျင့်ကြံသူဖြစ်သည်။

ရှန်းရူယန်နှင့်ရင်ဆိုင်ရသည့်အခါ သူတို့သည် သူမ‌ဆီမှ သက်သောင့်သက်သာနှင့်ပင် အသတ်ခံလိုက်ရသည်။

သူမရဲ့စွမ်းအားက ဘယ်လောက်တောင်ကြောက်ဖို့ကောင်းတာလဲ?

တဝဲလည်လည်လုပ်မနေရဲတော့ဘဲ ဤကျင့်ကြံသူများသည် ထိုနယ်မြေအတွင်းမှ ပျောက်ကွယ်သွားသည်။

တစ်ချိန်တည်း၌ပင် ကျန်းချန်ရွှမ်သည် အရေးကြီးသောအချိန်သို့ ရောက်ရှိနေပြီဖြစ်သည်။

သူနောက်ဆုံးလက်အစီအရင်ကို ပြီးမြောက်သွားသည်နှင့် သေချာသည့်ကွက်လပ်အလွှာတွင် ဖုံးအုပ်ထားဟန်တူသည့် မူလချီသည် နောက်ဆုံးတွင် ၎င်း၏ ပုံစံအမှန်ကို ပြသခဲ့သည်။

အလင်းတန်းတစ်ခုဖြင့် မှိန်ပျပျ‌အာကာသ‌အော်ရာတစ်ခုကိုထုတ်လွှတ်နေသည့် မူလချီသည် ကျန်းချန်ရွှမ်၏ ဆွဲယူမှုကိုခံလိုက်ရကာ လျင်မြန်စွာပင် သိမ်းဆည်းပြီးသား ဖြစ်သွားသည်။

သူ၏မျက်နှာပေါ်တွင် အပြုံးတစ်ခု ပေါ်ပေါက်လာသည်။

ဤမိခင်ကောင်းကင်ချီတွင် မရေမတွက်နိုင်သောလူများ တပ်မက်တောင့်တနေကြသည့် ရတနာဖြစ်သည့် ကောင်းကင်တာအို၏ မူလလမ်းကြောင်းပါဝင်သည်။

အထက်ဆင့်ကျင့်စဉ်များနှင့် အမျိုးမျိုးသော နည်းစနစ်များရှိရုံဖြင့် ၎င်းကို လူတိုင်း ရရှိနိုင်သည်မဟုတ်ပေ။

လုံလောက်သောကံတရားမရှိဘဲ မူလချီကို သင်၏မျက်စိနှင့် ကိုယ်တိုင်တွေ့နေလျှင်တောင် လေးထောင့်မျက်နှာအမျိုးသားနှင့် အစိမ်းရောင်ဝတ်ရုံအမျိုးသားတို့ကဲ့သို့ပင် ၎င်းကိုရရှိနိုင်မည်မဟုတ်ပေ။

သူတို့သည် မူလချီကို မရရှိလိုက်ရုံတင် မကသေးဘဲ ဘေးဒုက္ခတစ်ခုကိုလည်း ဘာမှမဟုတ်ဘဲ ခံစားသွားရသေးသည်။

၎င်းသည် ကမ္ဘာပေါ်တွင် အခြေတည်ဝိညာဉ်စံသခင်များ မြောက်များစွာ ရှိနေသော်လည်း ကောင်းကင်အခြေတည်ဝိညာဉ်အဆင့်မှာ အနည်းငယ်မျှသာ ရှိရခြင်း ဖြစ်သည်။

လင်မယားနှစ်ယောက်သည် ဆက်လက်၍ တဝဲလည်လည်လုပ်မနေဘဲ နှစ်ယောက်အတူ ထွက်ခွာသွားလိုက်သည်။

ထို့နောက် ကျန်းချန်ရွှမ်နှင့် ရှန်းရူယန်တို့သည် မူလချီ၏ တည်နေရာဖြစ်နိုင်ချေများကို တွက်ချက်ရင်း ဆက်လက်ခရီးဆက်ခဲ့သည်။

မည်သို့ပင်ဖြစ်စေ နာရီအတော်အတန်ကုန်လွန်ပြီးနောက် ကျန်းချန်ရွှမ်သည် သူ၏စွမ်းအားအကုန်လုံးကိုအသုံးပြုထားသည့်တိုင် မူလချီ၏ဒုတိယအမျှင်တန်းတည်နေရာကို မတွက်ချက်နိုင်သေးပေ။

သူသည် ၎င်းမှာ အချို့သောအမျိုးအစားများ၏ ကန့်သတ်ချက်ဖြစ်မည်ဟု သိရှိခဲ့သည်။

မူလချီကိုရရှိပြီးနောက် နောက်ထပ်တစ်ခုထပ်မံရရှိရန် အလွန်အမင်းခက်ခဲလာသည်။

ကံကောင်းစွာပင် သူတို့၏ခရီးစဉ်အတွင်း အချို့သောစုဆောင်းမှုများရရှိခဲ့သည်။

ယခုလေးတင်ပင် သူတို့သည် အက်ကွဲနေသောမြေကြီး၏ကြီးမားသောအပိုင်းကြီးပေါ်တွင် ကမ္ဘာမြေချီအမျှင်တန်းတစ်ခုကို တွေ့ခဲ့ရသည့်အတွက် အလွန်ကံကောင်းသွားပေသည်။

ထို့ကြောင့် ကောင်းကင်နှင့် မြေကြီးကြား၏ ချိတ်ဆက်မှုဟုခေါ်ခြင်းမှာ မူလချီကိုသာပေးခြင်းမဟုတ်ဘဲ ကမ္ဘာမြေချီကိုလည်း ပေးစွမ်းခြင်း ဖြစ်သည်။

ဤကမ္ဘာမြေချီသည် ကောင်းကင်လွင်ပြင်သို့လာကြသည့် ကျင့်ကြံသူအများစု၏ ပန်းတိုင်လည်းဖြစ်သည်။

၎င်းကို ရရှိရန် အလွန်ခက်ခဲသော်လည်း မူလချီထက်စာလျှင်တော့ ပို၍လွယ်ကူသည်။

ထို့သို့ဖြင့် တစ်နေ့တာလျင်မြန်စွာပင် ကုန်ဆုံးသွားသည်။

မည်သို့ပင်ဖြစ်စေ သူတို့၏ကံကောင်းမှုမှာ အသုံးပြုပြီးသွားဟန်တူသည်။

မူလချီကိုမဆိုထားနှင့် ကမ္ဘာမြေချီပင်လျှင် ဘယ်သောအခါမှ ထပ်ရှာတွေ့နိုင်မည်မဟုတ်ပေ။

သူသည် သူ၏ကံကောင်းခြင်းကို ပြန်လည်မြှင့်တင်နိုင်ရန် နည်းလမ်းအချို့ကို အသုံးပြုရတော့မည့်ဟန်တူသည်။

မဟုတ်လျှင်တော့ တစ်စုံတစ်ခုကို ရရှိရန်မှာ အလွန်ခက်ခဲကောင်းခက်ခဲနိုင်လိမ့်မည်။

အရေးအကြီးဆုံးမှာ ကောင်းကင်နှင့်မြေကြီးကြားရှိ ချိတ်ဆက်မှုသည် ကြာကြာမခံပေ။

စုစုပေါင်း သုံးရက်မျှသာ ရှိသည်။

ယခုမူ တစ်နေ့ကုန်လွန်သွားပြီ ဖြစ်သည်။

ဒုတိယနေ့နှင့် တတိယနေ့များတွင် မူလချီ၏ မွေးဖွားနိုင်စွမ်းနှင့် ရှာဖွေတွေ့ရှိနိုင်စွမ်းတို့မှာ ကျဆင်းသွားမည်သာ ဖြစ်သည်။

***