အခြေတည်ဝိညာဉ်နောက်ဆုံးအဆင့်ကို ထိုးဖောက်ခြင်း နှစ်ဦးသားမဟာကျင့်ကြံသူဖြစ်လာခြင်း (၂)

စုချင်းချန်က ကျန်းချန်ရွှမ်၏အစီအစဉ်ကို တင်ပြလိုက်သည်နှင့် သူမ၏ဆရာရုန်ဟန်ကျီရှန်း၏ တုံ့ပြန်မှုကို အံ့အားသင့်သွားသည်။

တုံ့ပြန်ချက်က လိုရင်းတိုရှင်းဖြစ်ကာ ရိုးရှင်းစွာပင် “ကောင်းပြီ။” ဟုပြောခဲ့သည်။

ထိုထောက်ခံချက်ကြောင့် သူမသည် သူမနှင့်အတူခုခံရေးတွင် တာဝန်ကျသော ဓားသခင် အဇူရာနှင့် စံသခင် ဖုန်းယွင်တို့အား စုစည်းလိုက်ကာ အစီအစဉ်၏အသေးစိတ်ကို ပြောပြလိုက်သည်။

မကြာခင်မှာပင်။

အထွတ်အထိပ်အဆင့်စံသခင်သုံးဦးသည် ချက်ခြင်းပင် ပြင်ဆင်မှုများစတင်၍ လုပ်တော့သည်။

နှစ်ဆယ်ရှစ်နှစ်က မြန်ဆန်စွာကျော်လွန်သွားခဲ့သည်။

ထိုအချိန်တွင်၊ မရေမတွက်နိုင်သော ကြီးမားသော သေးငယ်သော တိုက်ပွဲများက မြောက်ပိုင်းနယ်နိမိတ်တွင် နတ်ဆိုးကျင့်ကြံသူများနှင့် လူသားကျင့်ကြံသူများအကြား ဖြစ်ပွားခဲ့ပေသည်။

ထိုတိုက်ပွဲများတွင် ကျဆုံးသော ကျင့်ကြံသူများနှင့် နတ်ဆိုးကျင့်ကြံသူများအရေအတွက်က အံ့အားသင့်စရာကောင်းလောက်အောင် များပြားသည်။

အခြေတည်ဝိညာဉ်ကျင့်ကြံသူများကိုကြည့်လျှင်ပင်၊ သုံးဆယ်ကျော်ကျဆုံးသွားပြီး ပျောက်ဆုံး၍ စစ်သုံ့ပန်းဖြစ်သွားသူများပါ ထည့်တွက်လိုက်လျှင် ပို၍ များပြားမည်ဖြစ်သည်။

ထိုအချက်မှ အခြေတည်ဝိညာဉ်အဆင့်အောက်မှ ကျဆုံးသော ကျင့်ကြံသူနှင့် နတ်ဆိုးကျင့်ကြံသူအရေအတွက်က ပို၍ပင် များပြားဦးမည်ဖြစ်သည်။

ထိုအချိန်တွင်။

ကျန်းချန်ရွှမ်၏ ဂူပိတ်ကျင့်ကြံသည့်နေရာတွင် သူ၏အရောင်အဝါက ကြောက်မက်ဖွယ် ကောင်းလောက်အောင်ပင် အင်အားကြီးနေသည်။

ဒြပ်စင်ဝိညာဉ်ချီက ပြင်းထန်စွာ သူ့ထံသို့ လာစုစည်းနေကာ ထိုနေရာတွင် ထူးဆန်းသော စွမ်းအားများနှင့် ပြည့်နေစေသည်။

အပြင်လူများကိုမဆိုနှင့် သူတို့သည် ပေတစ်ထောင်ခန့်သို့ ချဉ်းကပ်လာလျှင်ပင် သူတို့သည် ထိုထုတ်လွတ်နေသောစွမ်းအင်မှ ဒဏ်ရာရသွားနိုင်သည်။

၎င်းသည် အခြေတည်ဝိညာဉ်ကျင့်ကြံသူ၏အခြေအနေဖြစ်သည်။

အကယ်၍ အခြေတည်ဝိညာဉ်အဆင့်အောက်မှ ကျင့်ကြံသူဖြစ်လျှင် ထိုစွမ်းအင်အားဖြင့် အမှုန့်အဖြစ်သို့ ချေမှုန်းခံလိုက်ရမည်ဖြစ်သည်။

ခွပ်…

နောက်ဆုံးတွင်။

နှစ်ဝက်အကြာတွင်၊ ကျန်းချန်ရွှမ်၏ဂူထဲမှ ချိန်းကြိုးများပြတ်သွားသည့်အသံက ပဲ့တင်ထွက်လာသည်။

၎င်းသည် သူ၏ခန္ဓာကိုယ်ထဲမှချက်ခြင်း မီးတောင်ကဲ့သို့ ပေါက်ကွဲလာခဲ့သည်။ မူလအခြေခံပေါ်တွင် အကြိမ်ပေါင်းများစွာ ရုတ်တရက် တိုးမြင့်လာခဲ့သည်။

သူ၏လက်သီးကျစ်ကျစ်ဆုပ်လိုက်ကာ ဂူတစ်ခုလုံးက ပြင်းထန်စွာတုန်လှုပ်သွားခဲ့သည်။

ထိုအချိန်တွင် သူသည် သူ၏စွမ်းအားက ခြေတစ်လှမ်းတိုးသွားခြင်းသာမဟုတ်ကြောင်း ခံစားလိုက်ရသည်။

၎င်းသည် ပြီးပြည့်စုံက ကမ္ဘာမြေကို တုန်လှုပ်သွားစေနိုင်သော ပြောင်းလဲမှုဖြစ်သည်။

အကယ်၍ ယခင်က သူသည် လွယ်ကူစွာနှင့် မဟာ ကျင့်ကြံသူများကိုလွှမ်းမိုးနိုင်လျှင်၊ ယခုမူ သူသည် အခြေတည်ဝိညာဉ်ကျင့်ကြံသူ အထွတ်အထိပ်အဆင့်များကို တူညီစွာလုပ်နိုင်သည်။

ဝိညာဉ်ဖွဲ့စည်းခြင်းကျင့်ကြံသူများသာ မပေါ်လာလျှင် သူသည် အခြေတည်ဝိညာဉ်ကျင့်ကြံသူများထဲတွင် နံပါတ် တစ် ဟုပြောလျှင်ပင် ချဲ့ကားရာမကျပါ။

၎င်းသည် အခြေတည်ဝိညာဉ်ကျင့်ကြံသူ နောက်ပိုင်းအဆင့်ကို ထိုးဖောက်နိုင်သွားသော ကျန်းချန်ရွှမ်၏ အစစ်အမှန်စွမ်းအားဖြစ်သည်။

သူသည် ဝိညာဉ်ဖွဲ့စည်းခြင်းအဆင့် သည်ပင် သူ့အား တစ်ချက်တည်းနှင့် သတ်ပစ်နိုင်စွမ်းမရှိနိုင်ကြောင်း သံသယဝင်နေသည်။

သူ၏ကျင့်ကြံရေးက တည်ငြိမ်သွားသည်နှင့်၊ ကျန်းချန်ရွှမ်က သူ၏ဂူထဲမှ ထွက်လာကာ ရှန်းရူယန်က သူထပ်အရင် ပြီးဆုံးကာ ဂူထဲမှ ထွက်ပြီးပြီဖြစ်ကြောင်းတွေ့လိုက်ရသည်။

အခြားတစ်ဖက်မှ စွမ်းအားကြီးသောအရောင်အဝါများကို အာရုံခံမိကာ ကျန်းချန်ရွှမ်၏မျက်နှာတွင် အပြုံးတစ်ခုက ချက်ခြင်းပေါ်လာခဲ့သည်။

“ဂုဏ်ပြုပါတယ်။ မိန်းမ။ မင်းအခြေတည်ဝိညာဉ်နောက်ဆုံးအဆင့်ကို ထိုးဖောက်နိုင်သွားပြီး မဟာကျင့်ကြံသူဖြစ်သွားပြီပဲ။”

ရှန်းရူယန်က သူ့အား မျက်လုံးလှည့်ပြလိုက်သည်။

မကြာမီ၊ သူတို့သည် အချင်းချင်း၏ ကျင့်ကြံရေးတိုးတက်မှုများကို ဖလှယ်လိုက်ကြသည်။

နှစ်ဦးစလုံးသည် ထိုဂူပိတ်ကျင့်ကြံခြင်းမှ အကျိုးကျေးဇူးများစွာရသွားသည်ဟု ပြောနိုင်ပေသည်။

သူတို့ကျင့်ကြံဆင့်များက အဆင့်အသစ်ကို တိုးမြင့်နိုင်သွားသည်သာမကဘဲ သူတို့၏ ကျင့်ကြံထားသော နတ်ဘုရားစွမ်းအားများသည်လည်း များစွာတိုးတက်လာခဲ့သည်။

အထူးသဖြင့် သူ၏အနာဂတ်အစီအရင်အတွက် ဖြစ်သည်။

သူတို့သည် အပြင်သို့ ခြေလှမ်းလိုက်သည်နှင့် တုကူးပိုင်ဖေး၊ စစ်ထူရှန်း၊ ကျယ်ပြောခြင်းမြစ်စံသခင်နှင့် အခြားသူများက သူတို့အား ဂုဏ်ပြုလိုက်ကြသည်။

စကားစမြည်ပြောလိုက်ကြပြီးနောက်၊ ကျန်းချန်ရွှမ်နှင့် ရှန်းရူယန်တို့က ထိုနှစ်များအတွင်းအခြေအနေကို မေးလိုက်ကြသည်။

အမှန်မှာ၊ အချို့အရာများသည် သူတို့မျှော်လင့်ထားသကဲ့သို့ မဟုတ်ခဲ့ပါ။

အရာအားလုံးကိုနားလည်သွားပြီးနောက်၊ ကျန်းချန်ရွှမ်က နောက်ဆုံးတွင် စုချင်းချန်က သူတို့အား ဆက်သွယ်ထားမှုရှိမရှိကို မေးလိုက်သည်။

ကျန်းချန်ရွှမ်၏ မေးခွန်းကိုကြားလျှင် တုကူးပိုင်ဖေးနှင့် အခြားသူများက ချက်ခြင်းခေါင်းညိတ်လိုက်ကြသည်။

ကျယ်ပြောခြင်းမြစ်စံသခင်က ပြောလိုက်သည်။ “မကြာသေးခင်က နတ်သမီးစုက ခင်ဗျားတို့အကြောင်းအခြေအနေလှမ်းမေးသေးတယ်။ သူက ခင်ဗျားတို့ ဂူပိတ်ကျင့်ကြံတာထွက်လာရင် သူ့ကို ချက်ခြင်း ဆက်သွယ်ပါတဲ့။”

ကျန်းချန်ရွှမ်က ခေါင်းညိတ်လိုက်သည်။

မကြာမီ၊ သူက စုချင်းချန် ပေးခဲ့သော အထူးကျောက်စိမ်းအဆောင်ကို ထုတ်လာခဲ့သည်။

ကျန်းချန်ရွှမ်က စုချင်းချန်အား သူနှင့် သူ့ဇနီးတို့ ဂူပိတ်ကျင့်ကြံရာမှ ထွက်လာပြီဖြစ်ကြောင်း သတင်းပို့လိုက်ရာ တုံ့ပြန်မှုကို လက်ခံလိုက်ရသည်။

“စုချင်းချန်၏ ပြန်စာကို ဖတ်ပြီးနောက်၊ ကျန်းချန်ရွှမ်နှင့် ရှန်းရူယန်တို့က အကြည့်ချင်းဖလှယ်လိုက်ကြသည်။

နှစ်ဦးစလုံးက ကျယ်ပြောခြင်းမြစ်စံသခင်နှင့် အခြားသူများအား လျို့ဝှက်မနေတော့ပါ။

ကျန်းချန်ရွှမ်ကပြောလိုက်သည်။ “တစ်လအတွင်း၊ နတ်သမီးစု၊ တာအိုရောင်းရင်း ဖုန်းယွင်၊ တာအိုရောင်းရင်းအဇူရာနဲ့ အခြားတာအိုရောင်းရင်းတို့က ကျယ်ပြောခြင်းမြစ်ရဲ့ဝိညာဉ်ကျွန်းပေါ်ကို တစ်ယောက်ပြီးတစ်ယောက်ရောက်လာလိမ့်မယ်။

အဲ့အချိန်မှာ ကျုပ်တို့ လွန်ခဲ့တဲ့နှစ်ပေါင်းသုံးဆယ်က အစီအစဉ်ကို အကောင်အထည်ဖော်ကြရတော့မယ်။”

“ဟမ်…?”

ထိုကြေငြာချက်သည် တုကူးပိုင်ဖေး၊ စစ်ထူရှန်းနှင့် အခြားသူများအား အံ့ဩသွားစေသည်။

သူတို့သည် စုချင်းချန်ကဲ့သို့ အခြေတည်ဝိညာဉ်အထွတ်အထိပ်ကျင့်ကြံသူက သူတို့၏နေရာသို့ လာမည်ဖြစ်ကြောင်းမမျှော်လင့်ထားခဲ့ကြပါ။

အကြောင်းအရင်းမရှိဘဲနှင့် သူတို့သည် မဖော်ပြနိုင်သည့် ဖိအားများကို ခံစားနေရသည်။

သူတို့စောင့်နေရင်း၊ ရက်ပေါင်းများစွာ ကုန်လွန်သွားသည်။

ဝှစ်….

နောက်ဆုံးတွင် ဆယ်ရက်အကြာတွင် စုချင်းချန်က ကျွန်းသို့ ပထမဦးစွာ ရောက်လာခဲ့သည်။

နောက်ပိုင်းရက်များတွင်။

စံသခင်ဖုန်းယွင်၊ ဓားသခင်အဇူရာ၊ ခုနစ်စင်ကြယ်အစီအရင်ထဲရှိ မိုထျန်းချန်နှင့်အခြားသူများက ကျယ်ပြောခြင်းမြစ်၏ ဝိညာဉ်ကျွန်းသို့ တစ်ဦးပြီး တစ်ဦး ရောက်လာခဲ့ကြသည်။

လကုန်တွင်၊ ထိုကျွန်း၌ စံသခင် ဒါဇင်ပေါင်းများစွာ စုဝေးနေကြကာ ၎င်းတို့ထဲမှ တစ်ဝက်ခန့်က အခြေတည်ဝိညာဉ် နောက်ပိုင်းအဆင့်များဖြစ်ကြသည်။

ထိုအချိန်တွင်။

လူတိုင်း၏အာရုံက ကျန်းချန်ရွှမ်ထံသို့ ရောက်နေကြသည်။

စုချင်းချန်က မေးသည်။ “တာအိုရောင်းရင်းကျန်း၊ လွန်ခဲ့တဲ့နှစ်ပေါင်းသုံးဆယ်က အစီအစဉ်အရ နတ်ဆိုးကျင့်ကြံသူတွေလာဖို့ ကျွန်မတို့ ဒီမှာစောင့်နေရမှာမလား?”

သို့ရာတွင် ကျန်းချန်ရွှမ်က ခေါင်းကိုခါလိုက်သည်။ “လွန်ခဲ့တဲ့နှစ်ပေါင်းသုံးဆယ်ကအစီအစဉ်ရဲ့ ယေဘုယျအစီအစဉ်က အရင်လိုပဲဖြစ်တယ်၊ ဒါပေမဲ့ အသေးစိတ်လုပ်ဆောင်ချက်နဲ့ အချက်အလက်တွေကတော့ လက်ရှိအခြေအနေနဲ့လိုက်ညှိနှိုင်းပြီး ပြောင်းလဲဖို့လိုအပ်တယ်။”

ထိုမှတ်ချက်က လူတိုင်းကို အနည်းငယ်အံ့ဩသွားစေသည်။

ကျန်းချန်ရွှမ်က မြေပုံကိုထုတ်လိုက်ကာ နေရာများစွာကိုညွှန်ပြကာရှင်းပြလိုက်သည်။

“နတ်သမီးစု၊ တာအိုရောင်းရင်းဖုန်းယွင်၊ တာအိုရောင်းရင်းအဇူရာ၊ သေချာကြည့်လိုက်ပါ၊ လက်ရှိမှာ ကျုပ်တို့ရဲ့ လက်ရှိအခြေအနေက ပြည့်စုံစွာခုခံနေတဲ့အနေထားမှာ ရှိတယ်။ အထူးသဖြင့် အနောက်တောင်နှင့် အရှေ့မြောက်နေရာတွေမှာ အခြေအနေက သေရေးရှင်ရေးအခြေအနေဖြစ်နေတယ်။

အကယ်၍ ကျုပ်တို့ လွန်ခဲ့တဲ့ နှစ်ပေါင်းသုံးဆယ်ကအစီအစဉ်အတိုင်း ရန်သူတွေကိုစောင့်နေရင် တိုက်ပွဲမှ အစပြုနိုင်မှာမဟုတ်ဘူး။”

“ဒါဆို တာအိုရောင်းရင်းကျန်း၊ ခင်ဗျားက ကျုပ်တို့အင်အားတွေကို စုစည်းပြီး အနောက်တောင်နဲ့ အရှေ့မြောက်ဒေသတွေကို သွားကယ်ဖို့ ပြောချင်တာလား?”

ကျန်းချန်ရွှမ်က ခေါင်းကိုခါလိုက်ပြန်သည်။

“တကယ်တော့မဟုတ်ဘူး။ အခုအချိန်မှာ အဲ့နေရာတွေကိုသွားရင် ဒီမှာစောင့်နေတာထပ်နည်းနည်း ပိုကောင်းနိုင်ပေမဲ့ ရန်သူတွေလက်ထဲရောက်သွားမှာပဲ။ ဒီတိုက်ပွဲအတွက် ကျုပ်တို့ကိုယ်ပိုင် စည်းချက်လိုတယ်။ ဒါမှ စားပွဲကို လှန်ဖို့ မျှော်လင့်လို့ရလိမ့်မယ်။”

ထိုသို့ပြောကာ မြေပုံပေါ်ရှိနေရာတစ်ခုအား လက်သီးဖြင့် ထုလိုက်ကာ ပြောလိုက်သည်။ “ကျုပ်တို့ရဲ့ပစ်မှတ်က ဒီမှာ။”

***