ယွမ်ရှောင်အတွက် သေရဲသူ

ထူထပ်သော ပုပ်သိုးသိုး အနံ့အသက်က လေထဲတွင် ပျံ့နှံ့နေပြီး အသွေးအသား တောင်ကြီး သို့မဟုတ် ကြောက်မက်ဖွယ် အလောင်းကောင်ကြီးသည် သွေးစွန်းနေသော နတ်ဆိုးတိုက်ကြီးတွင် တရွေ့ရွေ့ ချီတက်နေသည်။ ၎င်း ဖြတ်သန်းသွားသည့် နေရာတိုင်း ကျိုးပဲ့နေသော အလောင်းကောင်အသစ်များ ပြန်လည် ဆက်သွယ်၍ စုတ်ပြတ်နေသော အသားစများ အသစ် ပေါင်းစပ်သွားသည်။ မရေမတွက်နိုင်သော နတ်ဆိုးများ၏ ကြေမွနေသော ရုပ်ခန္ဓာ အကြွင်းအကျန်များ၊ မျက်လုံးများ၊ နားများ၊ ပါးစပ်များနှင့် နှာခေါင်းများ အုံလိုက်ကျင်းလိုက် တက်လာပြီး မိစ္ဆာကောင်ကြီးတီင် နားရွက် ထောင်ပေါင်းများစွာ၊ နှာခေါင်းပေါက်များနှင့် မရေမတွက်နိုင်လောက်အောင် များပြား၍ ချွန်ထက်သော သွားများဖြင့် တန်ဆာဆင်ထားသော ပါးစပ်တစ်ခု ရှိသည့် ကြောက်မက်ဖွယ် မြင်ကွင်းတစ်ခုအဖြစ် ပြောင်းလဲနေကာ ၎င်း၏ သွေးစွန်းသော လျှာပင် လျှာပေါင်းများစွာ ပေါင်းစပ်ထားခြင်း ဖြစ်သည်။ မရေမတွက်နိုင်သော နတ်ဆိုးများနှင့် နာကျင်မှုကြောင့် ငိုကြွေးသော ဝိညာဉ်များ၏ အော်ဟစ်သံ၊ ဟိန်းဟောက်သံနှင့် စိတ်ပျက်အားငယ်စရာ ငရဲဆန်ဆန် အရှိန်အဝါတစ်ခုသည် ၎င်းကို လွှမ်းခြုံပြီး ရှေ့သို့ တွန်းပို့ပေးနေ၏။ ဧရာမ ခြေထောက်များ၏ ခြေလှမ်းတိုင်း၌ မြေကြီးက ကမ္ဘာပျက် ငလျင်တစ်ခုကဲ့သို့ တုန်ခါနေသည်။

"တားမြစ်ကံကြမ္မာ နတ်ဆိုးဧကရာဇ်"

အနက်ရောင် မြွေတစ်ကောင်က အဝေးမှ လျှောတိုက်၍ ကြောက်မက်ဖွယ် တောင်ကြီးအနီးသို့ ချဉ်းကပ်လာကာ ၎င်း၏ အသံတွင် ဝမ်းနည်းမှုဖြင့် ပြည့်နှက်နေသည်။

"ဘေးအန္တရာယ်က ငါတို့ရဲ့ နတ်ဆိုးတိုက်ကြီးအပေါ် ကျရောက်ခဲ့ပြီ။ မရေမတွက်နိုင်တဲ့ ဝိညာဉ်တွေ ဤ ဘေးအန္တရာယ်တွင် ဆုံးရှုံးခဲ့ရတယ်။ အခြား နတ်ဆိုးဧကရာဇ် သုံးပါး နှင့် နတ်ဆိုးသူတော်စင် ၁၀၈ ပါးက နတ်ဘုရားတိုက်ကြီး၏ ကောင်းကင်နယ်မြေတွင် ရှိနေဆဲဖြစ်ပါတယ်။ သူတို့ကို ချက်ချင်း ဆင့်ခေါ်သင့်လား"

ဘုန်း။

အလောင်းကောင်ကြီးက ခြေလှမ်းများ ရပ်တန့်လိုက်ပြီး ကြောက်မက်ဖွယ် ဦးခေါင်းကို ငုံ့၍ ၎င်း၏ အမြင်အာရုံအတွင်း ရောက်လာသော မြွေကို စိုက်ကြည့်လိုက်သည်။ မရေမတွက်နိုင်သော နတ်ဆိုး အသံများ၏ ပေါင်းစပ်မှုက ၎င်း၏ ဟောက်ပက် ပါးစပ်ပေါက်ကြီးမှ ထွက်ပေါ်လာသည်။

"ဘေးအန္တရာယ်က ငါတို့အပေါ် ကျရောက်ပြီးဖြစ်တယ်။ သူတို့ ပြန်လာရင်လည်း အဓိပ္ပာယ်မရှိဘူး။ သူတို့ကို သတင်းစကားတစ်ခု ပို့လိုက်"

"အမိန့်အတိုင်းပါ။ ငါတို့ ရည်ရွယ်ထားတဲ့အတိုင်း အစီအစဉ်ကို ဆက်လက် လုပ်ဆောင်ရမှာလား"

အနက်ရောင် မြွေက နာခံစွာ ခေါင်းညိတ်သည်။

"ဟီး ဟီး ဟီး… အစီအစဥ်မှာ ပြောင်းလဲမှုတစ်ခု ရှိတယ်"

အသားတောင်ကြီးထံမှ ဆိုးညစ်သော တခစ်ခစ် ရယ်သံတစ်ခု ထွက်ပေါ်လာ၏။

"ဘယ်လိုလဲ။ ဒီကပ်ဘေးကြောင့် အရုဏ်တက် နတ်ဧကရီအကြောင်း စုံစမ်းတာကို ရပ်လိုက်ရမှာလား"

အနက်ရောင် မြွေက စိုးရိမ်တကြီး မေးသည်။

"မဟုတ်ဘူး"

မရေမတွက်နိုင်သော မျက်လုံးများက မြွေအပေါ်တွင် စူးစိုက်ကြည့်ကာ အသံပေါင်းစုံ ရောယှက်၍ အမိန့်ပေးခဲ့သည်။

"ဓားတာအိုကျောက်တိုင်အတွက် အစီအစဉ်ကို ဆက်လုပ်ရမယ်။ ကျန်တဲ့အကြံအစည်တွေအတွက် ပိုပြီး ပြင်းထန်စေဖို့ လိုအပ်တယ်။ အခု ကောင်းကင်ရဲ့ ကပ်ဘေးက ဆင်းသက်လာခဲ့ပြီ၊ ကံကြမ္မာက နတ်ဆိုးတိုက်ကြီးကို ဆန့်ကျင်နေလို့ ဆုံးရှုံးမှုကြီးကြီးမားမားကို ခံစားခဲ့ပြီးဖြစ်လို့ ငါတို့က နောက်ထပ် ပျက်စီးမှုကို ဘာလို့ ကြောက်ရွံ့နေမှာလဲ။ နတ်ဆိုးတိုက်ကြီးရဲ့ နယ်ခံတွေအတွက် နေထိုင်မှု နည်းလမ်းကို ပြောင်းလဲရန် အချိန်တန်ပြီ…"

"နတ်ဆိုးဧကရာဇ် ပြောချင်တာက လူသားမျိုးနွယ်အပြင် နတ်ဆိုးတွေကိုရော အကုန်လုံးချေမှုန်းပစ်ရမှာလား။ နတ်ဧကရီရော ကျုပ်တို့ရဲ့ လက်ပါးစေခွေးတွေရောလား"

အနက်ရောင် မြွေက ပြားပြားဝပ် ဦးချ၍ မျက်လုံးများ အမှောင် မီးလျှံဖြင့် တောက်လောင်နေကာ စိတ်လှုပ်ရှားမှုကြောင့် တုန်ရီနေသည်။

"မဟုတ်ဘူး။ နည်းနည်းလောက်တော့ အသက်ရှင်ခွင့်ပေးထားလိုက်မယ်။ လူသားမျိုးနွယ်ရဲ့ လူမှုအဖွဲ့အစည်းက စိတ်ဝင်စားစရာ ကောင်းတယ်။ သူတို့ရဲ့ နေထိုင်ပုံနဲ့ နည်းလမ်းတွေက သင်ယူဖို့ ထိုက်တန်တယ်။ ဒါကြောင့် လူသားနည်းနည်းလောက်ကို ချန်ထားပြီး နတ်ဘုရားတိုက်ကြီးမှာ နတ်ဆိုးအဖွဲ့အစည်းကို တည်ထောင်ရမယ်"

"ဟုတ်ကဲ့။ နတ်ဆိုးတိုက်ကြီးရဲ့ စစ်သည်တွေ နတ်ဆိုး မျိုးနွယ်အတွက် သေဆုံးပြီးရင် ကမ္ဘာသစ်တစ်ခု ဖန်တီးပြီး ငါတို့ရဲ့ သွေးနဲ့ မျိုးဆက်သစ်အတွက် ထာဝရ ရွှေခေတ်တစ်ခုကို ဖန်တီးရမယ်"

အနက်ရောင် မြွေက စိတ်အားထက်သန်စွာ ကြေညာလိုက်သည်။ နတ်ဆိုးတိုက်ကြီးက ကျက်တီးမြေဖြစ်ပြီး နတ်ဘုရားတိုက်ကြီး၏ ကျယ်ပြန့်ကာ မြေဩဇာကောင်းမွန်သော မြေနှင့် ဆန့်ကျင်ဘက် ဖြစ်သည်။ မကြာသေးမီ နှစ်များအတွင်း အရုဏ်တက်နတ် ဧကရီက နတ်ဘုရားတိုက်ကြီးတွင် ပေါ်ထွက်လာခဲ့သကဲ့သို့ နတ်ဆိုးတိုက်ကြီးသည်လည်း ကြီးမြတ်သော နတ်ဆိုးဧကရာဇ် ငါးပါးကို ပိုင်ဆိုင်ထားသည် မဟုတ်ပါလော။

"အခု နတ်ဆိုးတိုက်ကြီးက ဆုံးရှုံးမှုတွေ ခံစားခဲ့ရလို့ ကြီးမြတ်တဲ့ အစီအစဉ်တစ်ခုကို စတင်ခြင်းဖို့ အားနည်းလွန်းနေတယ် မဟုတ်ဘူးလား။ နတ်ဘုရားတိုက်ကြီးရဲ့ အင်မော်တယ်နတ်ပြည်ထောင်တွေမှာ အားနည်းတဲ့ ဘုရင်တွေ အုပ်ချုပ်နေပေမယ့် သူတို့မှာ အစွမ်းထက် ပုဂ္ဂိုလ်တွေနဲ့ ကောက်ကျစ်ပြီး ဖမ်းရခက်သူတွေ ပြည့်နှက်နေပါတယ်"

နတ်ဆိုးမြွေက စိုးရိမ်မှုဖြင့် အကြံပြုလိုက်၏။

"ရွှေခေတ်တစ်ခုကို စတင်ဖို့ စတေးမှုတွေ လိုအပ်တယ်။ ယခင်က၊ ငါတို့ တိုက်ကြီးအတွက် လွတ်လမ်းတစ်ခု ရှိခဲ့လို့ မပြတ်သားမှု၊ သက်တောင့်သက်သာဖြစ်မှုနဲ့ မစွန့်စားရဲတဲ့အတွက် ကြန့်ကြာခဲ့တယ်။ ဒါပေမယ့် အခုလို မဟာကပ်ဘေးခေတ်မှာ နတ်ဘုရားတိုက်ကြီးရဲ့ မြင့်တက်မှုနဲ့ ချီ စွမ်းအင် တိုးတက်လာမှုကြောင့် တကယ်လို့ ငါတို့သာ မတိုက်ခိုက်ရင် နောက်ထပ် အခွင့်အရေး ဘယ်တော့မှ ရရှိမှာ မဟုတ်ဘူး။ ပြီးတော့ မြွေအိုကြီး မင်းက ငါ ဘယ်လို နတ်ဆိုးမျိုး ဖြစ်တာကို မေ့သွားပြီလား။ ယနေ့ ဘေးအန္တရာယ်မှာ သေဆုံးခဲ့သူများရဲ့ ဝိညာဉ်တွေက ထွက်ခွာသွားခြင်း မရှိဘဲ ငါနဲ့အတူ တိုက်ခိုက်ကြလိမ့်မယ်၊ လာမယ့် မျိုးဆက်သစ်များအတွက် ကမ္ဘာသစ်တစ်ခု ဆောင်ယူပေးမယ်။ မြွေအိုကြီး မှတ်ထား၊ ထွက်ပေါက် မရှိတာက မကောင်းတဲ့ အရာ မဟုတ်ဘူး၊ ၎င်းသည် ထောင်စုနှစ်များအတွင်း အခွင့်အရေးတစ်ခု ဖြစ််တယ်"

အသားတောင်ကြီး၏ ထိပ်ဖျားတွင် မရေမတွက်နိုင်သော မကောင်းဆိုးဝါး ဝိညာဉ်များက ကောက်ကျစ်စွာ ရယ်မောနေကြသည်။

ကောင်းကင်နယ်မြေရှိ ပတ်လည်တိုက်ပွဲတွင် ယွမ်ရှောင်သည် ခြေချိတ် ထိုင်နေပြီး ပတ်ပတ်လည်၌ ချီစွမ်းအင်ဖြင့် ရေမြူ ဒိုင်းကာ အလွှာများ ဖွဲ့စည်းထားသည်။

ဘုန်း။

အမည်မသိ နတ်ဆိုးစွမ်းရည်များက အရပ်လေးမျက်နှာမှ ရေမြူ ဒိုင်းကာကို ဆန့်ကျင်၍ တိုက်ခိုက်နေသော်လည်း သူ၏ ကာကွယ်ရေးစည်းကို မဖောက်ဖျက်နိုင်ခဲ့ပေ။ ပိုမို အားကောင်းသော နတ်ဆိုးစွမ်းရည်များကိုမူ ချန်ကျင်း နှင့် အခြား လေးဦးက ကြားဖြတ် တားဆီးထားပြီးဖြစ်သည်။ ယွမ်ရှောင်သည် သူ၏ ကျင့်ကြံမှုတွင် အောင်မြင်မှုရရန် နီးကပ်နေစဥ် ချန်ကျင်း နှင့် အခြားသူများက သေရေးရှင်ရေး တိုက်ပွဲတစ်ခု ရင်ဆိုင်နေရ၏။ ကံကောင်းသည်မှာ ယွမ်ရှောင်၌ ရေမြူ ဒိုင်းကာ ရှိနေပြီး ၎င်းသာ မရှိလျှင် သူ၏ အသင်းဖော် လေးဦးသည် ရန်သူ ငါးဦးကို တိုက်ခိုက်ရင်း သူ့ကို ကာကွယ်ရမည်မှာ ခက်ခဲသော စိန်ခေါ်မှုတစ်ခုကို ရင်ဆိုင်ရပေလိမ့်မည်။ သူက တိုက်ပွဲအလယ်တွင် တည်ငြိမ်စွာ ကျင့်ကြံနေပြီး နဂါးကိုးကောင် ဒန်တန် နှင့် သူ၏ ခန္ဓာကိုယ်တစ်လျှောက်ရှိ ကြယ်သွေးကြောများ အပြန်အလှန် ဆက်သွယ်၍ ချီစွမ်းအင်မှာ ဒေါသထွက်နေသော နဂါးကဲ့သို့ ရွေ့လျားနေသည်။

လေမီးတောက် ကပ်ဘေးက အသားနှင့် အရိုးကို ဖျက်ဆီးနေစဉ် ရှေးဦး ဟင်းလင်းပြင်ကျင့်စဥ်သည် အသက်၏ စွမ်းအား၏ အထွတ်အထိပ်ဖြင့် သူ၏ ခန္ဓာကိုယ်ကို ပြန်လည် အသက်ဝင်စေသည်။ လေ နဂါးများနှင့် မီးလျှံ ဆင်ရိုင်းများသည် သူ၏ ချီစွမ်းအင်ဖြင့် ပေါင်းစည်းသွားကာ တိုက်ခိုက်ရေးစွမ်းအားကို မြှင့်တင်ပေးနိုင်သော စွမ်းအားသစ်တစ်ရပ်အဖြစ် စတင်ဖွဲ့စည်းလာ၏။သူ၏ ထိုးနှက်ချက်တိုင်းသည် လေမီးတောက် ကပ်ဘေးများ၏ စွမ်းအားဖြင့် ငါးဆ မြင့်တက်လာကာ ရှေးဟောင်းဟင်းလင်းပြင်ကျင့်စဥ်သည် ယွမ်ရှောင်၏ ဖြစ်တည်မှုသို့ ပေါင်းစပ်ဖွဲ့စည်းပေးနေသည်။

"ပြီးပြီ"

အစောပိုင်းအဆင့် လေမီး ကပ်ဘေး နယ်ပယ်တွင်ပင် ယွမ်ရှောင်၏စွမ်းအားက ပြည့်စုံခြင်းအဆင့် လေမီး ကပ်ဘေး နယ်ပယ်နှင့် နှိုင်းယှဉ်နိုင်သော အဆင့်တစ်ခုသို့ ရောက်ရှိခဲ့သည်။ သာလွန်သော တာအိုပညာ၊ ဓားပညာ၊ ဓားအော်ရာ နှင့် ဓားစက်ကွင်းများနှင့် ပေါင်းစပ်၍ တိုက်ခိုက်ရေး စွမ်းအား၏ အခြေခံအုတ်မြစ်များ တဟုန်ထိုး တိုးတက်လာသည်။

"အခု၊ အခြေတည်အဆင့် လေမီးတောက် ကပ်ဘေး နယ်ပယ်တွင် ရှိနေသူကို သတ်ရတာ ကြက်သတ်သလို လွယ်ကူလိမ့်မယ်"

"မင်းတို့…"

ယွမ်ရှောင်သည် လေနှင့် မီး ကပ်ဘေးကို အပြည့်အဝ ပေါင်းစပ်ပြီးဖြစ်သဖြင့် သူ၏ မျက်လုံးများကို ရုတ်တရက် ဖွင့်လိုက်သည်။

ဘုန်း။

ကြီးမားသော ရေမြူ ဒိုင်းကာ ငါးခု ပေါက်ကွဲထွက်သွားကာ မရေမတွက်နိုင်သော လှိုင်းလုံးများအဖြစ် ပြောင်းလဲပြီး အပြင်ဘက်သို့ ပြန့်ထွက်လာ၏။

"ယွမ်ရှောင်။"

ရှေ့တွင် တိုက်ပွဲဝင်နေသော လူငယ်စစ်သည် လေးဦး ပြန်လှည့်ကြည့်ကာ သူတို့၏ မျက်နှာများတွင် အံ့ဩခြင်းနှင့် ပျော်ရွှင်မှုဖြင့် တောက်ပနေကာ နောက်ဆုံးတွင် စိတ်သက်သာရာရစွာ သက်ပြင်းချလိုက်နိုင်သည်။ ချန်ကျင်း၊ ကျောက်ရှောင်ထန်၊ လန့်ကော်၊ နှင့် နန်းကုန်းရှု။ သူတို့ တစ်ဦးချင်းစီက ဖြူဖျော့နေပြီး တစ်ကိုယ်လုံး သွေးအလိမ်းလိမ်းဖြင့် လက်များပင်ကျိုးနေရာ မည်မျှပြင်းထန်ရက်စက်ကြောင်း သိနိုင်၏။ ယွမ်ရှောင်က သူ၏ ကပ်ဘေးကို အောင်မြင်သည့် အခိုက်အတန့်သည် တိုက်ပွဲ၏ ဆုံးဖြတ်ချက်ချသည့် အခိုက်အတန့်လည်း ဖြစ်သည်။ သူတို့၏ နောက်တွင် နတ်ဆိုး ပါရမီရှင် ငါးဦး၏ အလောင်းများ လဲလျောင်းနေသည်။ ခန္ဓာကိုယ်မှ ခေါင်း ပြတ်နေသော ဒေါင်းစိမ်း တစ်ကောင်၊ အပိုင်းပိုင်း ခုတ်ထစ်ခံထားရသော အလောင်း တိုင် တစ်ခု၊ နွယ်ပင်နက်၊ ဖားအလောင်း နှင့် ကြွက်နတ်ဆိုးတို့၏ ကြေမွနေသော အကြွင်းအကျန်များ ပြန့်ကြဲနေပြီး ပတ်လည်တိုက်ပွဲမှ နတ်ဆိုး ပါရမီရှင်များ၏ အစွမ်းထက်ဆုံး အဖွဲ့မှာ ချေမှုန်းခံလိုက်ရသည်။

အရုဏ်တက်နတ် အင်မော်တယ်နတ်ပြည်ထောင်၏ အဖွဲ့သည် ယွမ်ရှောင်ကို ကာကွယ်ရင်း တိုက်ပွဲအား အနိုင်ရခဲ့သည်။ စစ်မြေပြင်မှ မရေမတွက်နိုင်သော လူသားများထံမှ အားပေးသံများ ပေါက်ကွဲထွက်လာပြီး ယွမ်ရှောင်အတွက် မဟုတ်ဘဲ ချန်ကျင်း နှင့် အခြားသူများအတွက် ဖြစ်သည်။ သူတို့က ချန်ကောင်းကင်စံအိမ်၊ ဝိညာဉ်ရတနာနန်းတော်၊ ဓားကျင့်ကြံသူ တစ်သိန်း နှင့် နတ်ဘုရားတိုက်ကြီး၏ အောက်နယ်မြေကို ကိုယ်စားပြုသည်။

ယွမ်ရှောင်သည် သူ၏ ကပ်ဘေးကို ကြုံတွေ့နေသော်လည်း သူတို့ကို စောင့်ကြည့်ရန် စိတ်အာရုံ ခွဲထုတ်ထားခဲ့သည်။ သူတို့က ပြင်းထန်စွာ တိုက်ခိုက်နေခဲ့ပြီး အန္တရာယ်ရှိသော အခြေအနေများသို့ အကြိမ်များစွာ ရောက်ရှိခဲ့သော်လည်း အသက်အန္တရာယ်မရှိသောကြောင့် သူ၏ ကျင့်ကြံမှုကို ရပ်တန့်ရန် မလိုအပ်ခဲ့ပေ။ သူတို့က လူသားမျိုးနွယ်၏ ထက်သန်သော လေးစားမှုကို ရရှိခဲ့ကြပြီး သူတို့၏ ကိုယ်ပိုင် တန်ဖိုးကို သိရှိလာကာ သူတို့၏ ဘိုးဘေးများအတွက် ဂုဏ်ဆောင်နိုင်ခဲ့သည်။ ဒဏ်ရာများအကြားမှ တောက်ပသော အပြုံးများက သူတို့၏ မျက်နှာများပေါ်တွင် ပွင့်ထွက်လာပြီး သေခြင်းရှင်းတိုက်ပွဲ၌ ပခုံးချင်းယှဉ် တိုက်ခိုက်ခဲ့ပြီးဖြစ်သဖြင့် လေးယောက်သား အားရပါးရ ရယ်မောလျက် ပွေ့ဖက်လိုက်ကြသည်။

"ခေါင်းဆောင် ချန်ကျင်း"

"သခင်လေး ကျောက်"

"အစ်ကိုကြီး နန်းကုန်း"

"သိုင်းနယ်မြေရဲ့ ညီအစ်ကို လန့်ကော်"

ကိုးကောင်းကင် အင်မော်တယ်စစ်တပ်၊ ဝိညာဉ်ရတနာနန်းတော်၊ ဓားကျင့်ကြံသူ တစ်သိန်း နှင့် အောက်နယ်မြေများ၏ ကျင့်ကြံသူများ အားလုံး ဤ လေးဦးအတွက် အားပေးကြပြီး ကောင်းကင်နယ်မြေတွင် သူတို့၏ အမည်များ ပဲ့တင်ထပ်နေသည်။

ကွင်းတွင်း ချန်ပီယံ တိုက်ပွဲသည် နတ်ဆိုးများ၏ ကစားကွင်း ဖြစ်လာ၍

ပတ်လည်တိုက်ပွဲတွင် မဟာကျောင်းတော်၏ အင်အားစုများ ချေမှုန်းခံရပြီး အရုဏ်တက်နတ် အင်မော်တယ်နတ်ပြည်ထောင်အတွက် ယွမ်ရှောင် နှင့် ချန်ရီသာ ကျန်ရှိနေသော်လည်း ဤ လေးဦးက ခိုင်မာစွာ ရပ်တည်ခဲ့ကြသည်။ သူတို့က ပြည်သူများအတွက် မျှော်လင့်ချက်သစ်တစ်ခုကို ကိုယ်စားပြုပြီး သာမန်စစ်သည်တော်များလည်း မညံ့ကြောင်း ပြသနိုင်ခဲ့သည်။ ခရမ်းရောင်ကောင်းကင်မှလွဲ၍ အခြား အင်မော်တယ်နတ်ပြည်ထောင် လေးခုပင် သူတို့အတွက် အားပေးခဲ့ကြသည်။ ဤ မြင်ကွင်းကို မြင်တွေ့ရသောအခါ ယွမ်ရှောင် သူတို့အတွက် စိတ်ရင်းမှန်ဖြင့် ပျော်ရွှင်မိပြီး လျင်မြန်စွာ ရှေ့ထွက်ကာ သွေးစွန်းသောအဖွဲ့၏ ပွေ့ဖက်မှုတွင် ပူးပေါင်းလိုက်၏။

"ကြည့်စမ်း၊ ငါတို့အားလုံး အခု အဆင့်သတ်မှတ်ချက် ထိပ်ဆုံးကို ရောက်နေပြီ"

ကျောက်ရှောင်ထန်က စိတ်လှုပ်ရှားစွာ အော်ဟစ်သည်။ သူတို့က အနိုင်ယူခဲ့သော နတ်ဆိုး ငါးဦး၏ အင်မော်တယ်စစ်ပွဲ ကျောက်စိမ်း တံဆိပ်ပြားများကို ခွဲဝေခဲ့ကြပြီး ဤ နတ်ဆိုးများမှာ အောင်ပွဲ အတော်များများ ရထားပြီးဖြစ်သည်။ သူတို့အားလုံး ဦးဆောင်သူစာရင်းတွင် ထိပ်ဆုံး နှစ်ဆယ် ဝန်းကျင်သို့ ရောက်လာကာ တစ်ဦးချင်းစီ၌ အင်မော်တယ်စစ်ပွဲ ကျောက်စိမ်း တံဆိပ်ပြား တစ်ရာကျော် ပိုင်ဆိုင်နေကြ၏။

"မဆိုးဘူး၊ မင်းတို့ရဲ့ အဲ့ဒီ အရေအတွက်ကနောက်ထပ် မတိုးတက်နိုင်တော့တာ ဆိုးတယ်"

"မင်းကွာ"

သူတို့အားလုံး သူ၏ ဆိုလိုရင်းကို နားလည်ကြပြီး ကပ်ဘေးကို ကျော်လွှားပြီးနောက် ယွမ်ရှောင်က နောက်ထပ်အောင်ပွဲများ သိမ်းပိုက်ပေတော့မည်။

"ညီအစ်ကိုတို့၊ ဒီကောင်ကို ချေမှုန်းကြစို့။ လေးယောက် တစ်ယောက်ကို ယှဉ်နိုင်မှာလား"

ကျောက်ရှောင်ထန်က အော်လိုက်သော်လည်း လှုပ်ရှားမှုတိုင်းတွင် သူ၏ ဒဏ်ရာကို ပိုဆိုးစေကာ နာကျင်မှုကြောင့် မျက်နှာရှုံ့မဲ့နေသည်။

"ဟား ဟား"

ပုံမှန်အားဖြင့် တည်ငြိမ်သော နန်းကုန်းရှုပင် ဤအခိုက်အတန့်တွင် ရယ်မောလိုက်မိသည်။

"ငါ မင်းတို့ကို မလိမ်ဘူး။ ဓားကျင့်ကြံသူ ဘဝမှာ နတ်ဆိုးတွေကို ပေါ်တင် သတ်ဖြတ်ခဲ့တဲ့ ပထမဆုံး အကြိမ်ပဲ…"

နန်းကုန်းရှု၏ လက်က သူ၏ ဓားကို ဆုပ်ကိုင်နေဆဲဖြစ်သော်လည်း တုန်ရီနေပြီး သူ၏ မျက်လုံးများတွင် ဝမ်းသာမျက်ရည်များ ပြည့်လျှမ်းနေသည်။

"ဒါကို စတင်လိုက်တာနဲ့ နောက်ထပ် ပိုများလာလိမ့်မယ်"

ယွမ်ရှောင်က နန်းကုန်းရှု၏ ပခုံးကို ပုတ်လိုက်ပြီး ချီးကျူးခဲ့သည်။

"မင်း မှန်တယ်။ ဒါက စိတ်လှုပ်ရှားစရာပဲ။ ငါ မင်းကို တကယ် အားကျတယ်"

နန်းကုန်းရှုက ပြန်ဖြေသည်။

"ကောင်းပြီ၊ အခု မင်း ကိုယ်တိုင်လည်း အဲ့ဒီ ခံစားချက်ကို ကြုံတွေ့ခွင့် ရခဲ့ပြီလေ"

ယွမ်ရှောင်က ကွင်းတွင်း ချန်ပီယံ တိုက်ပွဲ၏ လားရာဘက်သို့ စိုက်ကြည့်ပြီး ပြောသည်။ နတ်ဆိုးများကို မသတ်ဖြတ်နိုင်သော ဓားကျင့်ကြံသူတစ်ဦး၏ဘဝတွင် စိတ်ပျက်အားငယ်မှုများ အသက်ရှူကျပ်လောက်အောင် ဖြစ်ပေလိမ့်မည်။ ဓားတစ်ချောင်းအတွက် ကွေးညွှတ်ခြင်းထက် ကျိုးပဲ့ပျက်စီးသွားခြင်းက ပို၍ကောင်းမွန်သည်။

စောင့်ကြည့်နေသော မျက်လုံးများအောက်တွင် နန်းကုန်းရှုသည် ယွမ်ရှောင်ကို နက်ရှိုင်းစွာ စိုက်ကြည့်နေသကဲ့သို့ ဓားကျင့်ကြံသူ တစ်သိန်းသည်လည်း သူ့ကို စောင့်ကြည့်နေကြသည်။ သူ၏ဓားဝိညာဥ်မှာ အလင်းစက်ကွင်းအဆင့်မြင့် မီးဖိုဓားဝိညာဉ် ဖြစ်ကာ ဓားအော်ရာ ၁၈၀ လွှာ ရှိသော်လည်း၊ ဓားစက်ကွင်းများ မရှိပေ။ ၎င်းက မီးဖိုကဲ့သို့ တောက်လောင်ပြီး ပြင်းထန်သော မီးလျှံများ ဆယ်ပေ အမြင့်သို့ ရောက်ရှိမြင့်တက်နေ၏။

"အခုကစပြီး ငါ နန်းကုန်းရှုက ကိုယ်ပိုင် လုပ်ဆောင်ချက်၊ အသက်နှင့် သေခြင်းအတွက် တာဝန်ယူတယ်"

ထို့နောက် သူက နတ်ဆိုး အလောင်းများထံ ချဉ်းကပ်ကာ သူ၏ ဓားဖြင့် အောက်သို့ ထိုးစိုက်လျက် ကျင့်ကြံသူ ထောင်ပေါင်းများစွာ၏ အကြည့်အောက်တွင် နတ်ဆိုး အရိုးများနှင့် ခြင်ဆီစွမ်းအင်ကို စုပ်ယူခဲ့သည်။ ဝိညာဉ် မီး အတတ်ပညာဖြင့် အလောင်း တိုင် နတ်ဆိုးသည် အရိုးများ မရှိသော်လည်း ၎င်း၏ နတ်ဆိုးခန္ဓာကိုယ်ကို ဓားစက်ကွင်းတစ်ခု ဖွဲ့စည်းရန် သန့်စင်နိုင်သည်။ နန်းကုန်းရှုက ဓားစက်ကွင်း ငါးခု ဖန်တီး၍ သူ၏ ဓားတွင် ချိတ်ဆွဲရန် သုံးခု ရွေးချယ်လိုက်၏။

"ငါလည်း ဓားဂူသုံးခုကနေ နုတ်ထွက်တယ်။ အခုကစပြီး ငါက ယွမ်ရှောင်ရဲ့ နောက်လိုက်ပဲ။ သူ့အတွက် သေပြီး သူ့အတွက် အသက်ရှင်မယ်"

နန်းကုန်းရှု၏ ကြုံးဝါးသံကြောင့် လူအုပ်က အုတ်အော်သောင်းတင်းဖြစ်သွားကာ အချိန်အတန်ကြာသည်အထိ တည်ငြိမ်မသွားခဲ့ပေ။