အထွတ်အထိပ် တိုက်ပွဲ၊ ဓားတစ်ချောင်းဖြင့် ရှင်းလင်းခြင်း

တက်လှမ်းခြင်း တံခါးတွင် စစ်သေနာပတိချုပ် ချန်ရှောင်က အဖြူရောင် ကျားရုပ် ချပ်ဝတ်တန်ဆာ ဝတ်ဆင်၍ လက်ရန်းကို မှီရပ်နေပြီး သူ၏ မျက်လုံးများသည် ဦးဆောင်သူစာရင်း၏ အမည် အနည်းငယ်ကို စိုက်ကြည့်ရင်း တောက်လောင်နေသည်။ ချန်ရီက ထိပ်ဆုံး ဆယ်ယောက်တွင် ရှိပြီး ယွမ်ရှောင်မှာ သူကိုယ်တိုင်လမ်းဖောက်၍ ထိပ်ဆုံး ဆယ်ယောက်ထဲသို့ ဝင်ရန် နီးကပ်နေသည်။ ပထမနေ့သည် ကနဦး အဆင့်သတ်မှတ်ချက် သက်သက်သာ ဖြစ်ပြီး ပါဝင်သူများ၏ အစွမ်းကို ထင်ဟပ်နိုင်သော်လည်း အလွန် အရေးပါခြင်း မရှိပေ။

"အဘိုးကြီး ချန်"

ကျောက်ရွှမ်ကျန်းက ရုတ်တရက် သူ၏ ဘေးတွင် ပေါ်လာပြီး အမျိုးသား နှစ်ဦးစလုံး ကျောချင်းကပ် ရပ်နေကြရင်း နတ်ဆိုးသူတော်စင်များနှင့် အမျိုးမျိုးသော အင်မော်တယ်နတ်ပြည်ထောင်များမှ အရာရှိများကို မျက်နှာမူထားသည်။

"ဘာကိစ္စလဲ"

စစ်သေနာပတိချုပ်က ပေါ့ပေါ့ပါးပါး မေးသည်။

"မင်း၏ သားမက်က သူ့ကိုယ်သူ ချန်ပီယံအဖြစ် အနိုင်ရဖို့ သူတော်စင် ကျောက်တုံး ၁၀၀,၀၀၀ လောင်းခဲ့တယ်"

ကျောက်ရွှမ်ကျန်းက မယုံနိုင်ဟန်ဖြင့် ပြောသည်။

စစ်သေနာပတိချုပ်၏ အကြည့်က အဖြူရောင် ဝတ်ရုံဝတ် လူငယ်အပေါ် ကျရောက်သွားသည်။

"ချန်ရီ ခေါ်လာခဲ့သူ တစ်ယောက်က ဒီလောက်တော့ရှိမှာပဲ။ သူရဲ့ အဆင့်တက်နှုန်းက အံ့ဩစရာကောင်းပြီး တစ်ဦးတည်းနဲ့ ယိုချင်းကျစ်ရဲ့ အဖွဲ့ကို ချေမှုန်းနိုင်ခဲ့တယ်။ အခု၊ လေမီးတောက် ကပ်ဘေးကို ကျော်ဖြတ်ပြီးပြီဆိုတော့ သူကို တားဆီးမရနိုင်တော့ဘူး"

"မင်းအတွက် သူနဲ့ ချန်ရီက ထိပ်ဆုံးနေရာ အတွက် အခွင့်အလမ်း ရှိတယ်လို့ ထင်သလား"

ကျောက်ရွှမ်ကျန်းက မေးသည်။

"မနက်ဖြန်ကျရင် အဖြေသိရမှာပဲ။ ဒီတစ်ခေါက် လောင်းကြေးက အရမ်းများပြီး တိုက်ကြီးနှစ်ခုအကြားက စစ်ပွဲအလောင်းအစားပဲ။ ဘာဖြစ်ဖြစ် မင်းက ဒိုင်အနေနဲ့ အကျိုးအမြတ်ရမှာပဲမလား"

ချန်ရှောင်က ကျောက်ရွှမ်ကျန်းကို စိုက်ကြည့်၍ တစ်လုံးချင်း ပြောလိုက်သည်။

"တကယ်လို့ နတ်ဆိုးတိုက်ကြီးသာ အနိုင်ရသွားရင် ဝိညာဉ်ရတနာနန်းတော်က အများကြီး အမြတ်ထွက်မှာ မဟုတ်ဘူး"

ကျောက်ရွှမ်ကျန်းက ခေါင်းခါသည်။

"စကားမစပ်၊ မင်း ငါ့သားမက်ရဲ့ လောင်းကြေးအကြောင်း မပေါက်ကြားစေခဲ့ဘူးမလား"

"ပေါက်ကြားမှု မရှိဘူး။ အားလုံး လျှို့ဝှက်ထားတယ်။ ဒီလိုမှမဟုတ်ရင်၊ ဒါက အခြားသူလောင်းကြေးတွေကို လွှမ်းမိုးပြီး ဈေးကွက်ကို ပျက်စီးစေလိမ့်မယ်။ ဖျက်မြင်းတစ်ကောင်က ရုတ်တရက် သူတော်စင် ကျောက်တုံး ၁၀၀,၀၀၀ လောင်းကြေးရထားရင် နောက်လိုက်အများကြီး သေချာပေါက် ဆွဲဆောင်ခံရလိမ့်မယ်"

"ကောင်းပြီ။ ယွမ်ရှောင်နဲ့ လနတ်သား၊ သူတို့က စစ်ပွဲ စတင်တာနဲ့ ပြောင်းလဲနိုင်တဲ့ ကိန်းရှင်တွေ ဖြစ်တယ်။မနက်ဖြန် လောင်းကြေး လက်ခံပြီးရင် ဆိုင်ပိတ်ပြီး မင်း၏ ဝိညာဉ်ရတနာနန်းတော်ကို ချိတ်ပိတ်လိုက်"

"ဘာတွေ ဖြစ်နေတာလဲ"

တစ်ဖက်၏ စကားကြောင့် ကျောက်ရွှမ်ကျန်း အနည်းငယ် ထိတ်လန့်သွားကာ ပြန် မေးလိုက်သည်။

"ဧကရီမှာ အစီအစဉ်တစ်ခု ရှိလို့ စစ်တပ်ကို စုစည်းနေတယ်။ မင်း ဘာထင်လို့လဲ"

စစ်သေနာပတိချုပ်၏ မျက်လုံးများ တောက်ပနေသည်။

"အစ်ကို၊ ငါလည်း မင်းဘက်မှာ ရှိတယ်"

အကောင်းဆုံးအချိန်ကို ကျော်လွန်လာသော သက်လတ်ပိုင်း အမျိုးသား နှစ်ဦးက လေထဲတွင် ရပ်နေရင်း အချိန်ကြာမြင့်စွာ အကြည့်ချင်းဆုံလိုက်ကြသည်။ သူတို့နှင့် မဝေးလှသော နေရာတွင် ရဲ ချင်းထျန် တိတ်ဆိတ်စွာ ထိုင်နေပြီး သူ၏မျက်လုံးများ ညှိုးငယ်နေသည်။ မဟာကျောင်းတော်၏ ထိပ်တန်း ကျောင်းသားများ ချေမှုန်းခံခဲ့ရပြီး နဂါးအဆင့်သတ်မှတ်ချက်မှ ထိပ်ဆုံး ဆယ်ဦးလုံး သေဆုံးခဲ့ကြသဖြင့် ဤ အင်မော်တယ်စစ်ပွဲသည် သူ၏ အဇူရာ သစ်ရွက် အဖွဲ့နှင့် ဘာမှ မပတ်သက်တော့ပေ။ သူ့အနေဖြင့် နတ်ဆိုးတိုက်ကြီး နှင့် ခရမ်းရောင်ကောင်းကင် အင်မော်တယ်နတ်ပြည်ထောင်၏ ဂုဏ်သိက္ခာအတွက်သာ ဆုတောင်းနေပြီး အရုဏ်တက်နတ်ပြည်ထောင် ကျရှုံးရန်နှင့် ချန်ရီ ရှုံးနိမ့်သွားစေရန် မျှော်လင့်နေစဥ် သူ၏ပခုံးပေါ်သို့ လက်တစ်ဖက် ကျရောက်လာသည်။

"ထိုင်ပါ"

သူက လှည့်မကြည့်ဘဲ ပြောလိုက်ပြီး

ခရမ်းရောင် ပုံရိပ်တစ်ခု သူ၏ ဘေးတွင် ပေါ်ထွက်လာသည်။ ၎င်းက အခြားသူမဟုတ်ဘဲ ကျောက်စိမ်းမျက်နှာ ဘုရင် ခေါ် ခရမ်းရောင်ဧကရာဇ်ပင်။

"အရုဏ်တက်နတ်ပြည်ထောင်က ပြင်ဆင်ထားတဲ့ မင်းရဲ့ နန်းစဉ်ထိုင်ခုံကို ဘာကြောင့် မယူတာလဲ။ မင်း အပေါ်ကို တက်မသွားဘူးလား"

ရဲ ချင်းထျန်က တက်လှမ်းခြင်း တံခါး၏ ထိပ်ပိုင်းသို့ မော့ကြည့်လိုက်ပြီး ထိုနေရာတွင် အမြင့်ဆုံး၌ နန်းစဉ်ထိုင်ခုံ ရှစ်ခု ရှိသော်လည်း ဝမ်းနည်းဖွယ် ဗလာဖြစ်နေသည်။

"အဲ့ဒီမှာ ငါ့အတွက် အပေါင်းအဖော် မရှိဘူး"

ခရမ်းရောင်ဧကရာဇ်က တစ်ချက်ပြုံးလိုက်သကဲ့သို့ ရဲချင်းထျန်လည်း ပြုံးလိုက်သည်။

"အဲ့ဒီ လေးယောက်နဲ့ မင်းရဲ့ လျှို့ဝှက် ဆွေးနွေးပွဲ ဘယ်လို ဖြစ်သွားလဲ"

သူက တိုးညှင်းသော အသံဖြင့် မေးသည်။

"ပြောရခက်တယ်ကွ"

ခရမ်းရောင်ဧကရာဇ်က ခေါင်းခါသည်။

"အင်မော်တယ်နတ်ပြည်ထောင် လေးခုရဲ့ အရေးပါတဲ့ မျိုးနွယ်ဝင်များစွာကို ဖမ်းဆီးခြင်းက သူတို့ကို အမိန့်လိုက်နာစေပြီး မဆင်မခြင် ကြားဖြတ်ခြင်း မပြုရန် အတွက်သာ အရေးပါတယ်။ သူတို့က ခေါင်းတလားကို မမြင်မချင်း ငိုကြွေးကြမှာမဟုတ်ဘူး"

ရဲ ချင်းထျန်၏ အကြည့်က ရေခဲကဲ့သို့ အေးစက်သွားသည်။

"သူတို့ ပျော့ပြောင်းလာခဲ့ပြီး ပူးပေါင်းဆောင်ရွက်ဖို့တောငိ သဘောတူခဲ့တယ်။ ဒါပေမယ့် သူတို့က အမိန့်ကို လေးစားလိုက်နာမှာလား ဆိုတာကို ဘယ်သူမှ မပြောနိုင်ဘူး"

"ငါတို့ လျင်လျင်မြန်မြန် ပြတ်ပြတ်သားသားနဲ့ ထိုးနှက်ပြီး၊ အရုဏ်တက်နတ်ပြည်ထောင်ကို ဖျက်ဆီးနိုင်သရွေ့ သူတို့ သစ္စာဖောက်ဖို့ အခွင့်အရေး ရှိမှာ မဟုတ်ဘူး။ အရုဏ်တက်နတ်ပြည်ထောင် ကျဆုံးတာနဲ့ သူတို့အတွက် ကျောထောက်နောက်ခံကို ဆုံးရှုံးသွားလိမ့်မယ်။ ဝိညာဉ်ရတနာ အင်မော်တယ်နတ်ပြည်ထောင်ရဲ့ အရူးအဘိုးကြီးက အိုလာပြီ။ သူရဲ့ နဝမမြောက် သားက မဆိုးပါဘူး၊ ပိုကြီးတဲ့ အရာကို နားလည်တတ်လို့ ဝိညာဉ်ရတနာ၏ ဧကရာဇ်အသစ်ဖြစ်လာဖို့ သင့်လျော်တယ်"

"ဒါကြောင့် ဒီည ဓားတာအိုကျောက်တိုင်အကြံအစည်က အရေးကြီးတာပဲ"

ခရမ်းရောင်ဧကရာဇ် အရုဏ်တက်နတ် နန်းတော်ဘက်သို့ လှမ်းကြည့်၍ နှာခေါင်းရှုံ့လိုက်သည်။

"တကယ်လို့ ကောင်းကောင်း လုပ်ဆောင်နိုင်ခဲ့ရင် ကောင်းကင်နယ်မြေမှာ အရုဏ်တက်နတ်ဧကရီရဲ့ ဂုဏ်သတင်းကို လုံးဝ ညစ်ညမ်းစေနိုင်တယ်။ သူမမှာ ကြောက်မက်ဖွယ် စွမ်းအား ရှိနေရင်တောင် ပြည်သူ့ နှလုံးသားကို ဆုံးရှုံးသွားရင် ထောက်ခံသူမရှိဘဲ ရိုးရိုးလေး ကျဆုံးသွားမှာပဲ"

"ဓားတာအိုကျောက်တိုင်"

ရဲချင်းထျန်က သူ၏ မျက်လုံးများကို ဖြည်းညှင်းစွာ မှိတ်၍ လေးလံစွာ ပြောလိုက်သည်။

"အရာအားလုံး စီစဉ်ပြီးပြီ"

သူ၏ ဘေးတွင် ရှိနေသော ယိုဖုန်းနှင့် မူ တန်းရှီက ခေါင်းညိတ်ပြလိုက်ကြ၏။

"အင်မော်တယ်စစ်ပွဲက လူတိုင်းကို အာရုံလွှဲပေးနိုင်လို့ ငါတို့ရဲ့ အစီအစဉ်အတွက် ပြီးပြည့်စုံတယ်"

မူတန်းရှီက အကြောင်းကြားလိုက်ခြင်းဖြစ်သည်။

"ဒါဆို အဆင်ပြေပြီ။ ညီအစ်ကို၊ အရုဏ်တက်နတ်ဧကရီ အရှက်ရသွားတာနဲ့တပြိုင်နက် မင်းက နန်းပလ္လင်ကို ပြန်လည် သိမ်းပိုက်ပြီး အဇူရာသစ်ရွက် အင်မော်တယ်နတ်ပြည်ထောင်ကို တရားဝင် ပြန်လည် ထူထောင်နိုင်ပြီ။ ငါ မင်းအတွက် ဂုဏ်ယူပါတယ်"

ခရမ်းရောင်ဧကရာဇ်က ခေါင်းတစ်ချက်ညိတ်၍ ချီးကျူးလိုက်သည်။

"မင်းရဲ့ချီးကျူး စကားတွေ အမှန်တကယ် ဖြစ်လာပါစေ"

ရည်မှန်းချက်ကြီးမားသော ရဲချင်းထျန်က ပြန်လည် ဦးညွှတ်လိုက်၏။ သူက ခရမ်းရောင်ဧကရာဇ်ကို အားကျပြီး ခရမ်းရောင်ကောင်းကင်နတ်ပြည်ထောင်၏ စည်းလုံးခြင်း၊ နတ်ဆိုးများနှင့် မဟာမိတ်ဖွဲ့ခြင်း၊ နန်းတော် မိသားစုနှင့် ကြီးမြတ်သော မျိုးနွယ်များကို အမြင့်သို့ ဦးဆောင်ခြင်းနှင့် နတ်ဘုရားတိုက်ကြီးအပေါ် အထွတ်အထိပ် အုပ်စိုးခြင်းကို လိုလားသည်။ နတ်ဆိုးများ၏ ထောက်ခံမှုဖြင့် ခရမ်းရောင်ဧကရာဇ်၏ မျိုးဆက်များပင် ပတ်လည်တိုက်ပွဲ နှင့် ကွင်းတွင်း ချန်ပီယံ တိုက်ပွဲကို လွှမ်းမိုးနိုင်စွမ်း ရှိနေကြ၏။ ပတ်လည်တိုက်ပွဲတွင် အအောင်မြင်ဆုံးမှာ ခရမ်းရောင်ဧကရာဇ်၏ သတ္တိရှိသော မျိုးဆက်များဖြစ်ပြီး သူတော်စင် နယ်ပယ် ကျင့်ကြံသူ ခရမ်းရောင်ကောင်းကင် အိမ်ရှေ့စံက ဒုတိယ၊ တတိယ၊ ပဉ္စမ၊ နှင့် ဆဋ္ဌမ မင်းသားများနှင့် မင်းသမီးများအား ဦးဆောင်နေသည်ကို မြင်တွေ့နိုင်သည်။ သူတို့ထဲတွင် ပဉ္စမ နှင့် ဆဋ္ဌမ မင်းသမီးများသည် ငယ်ရွယ်ပြီး အားနည်းသဖြင့် အရေအတွက် ပြည့်မီအောင် လုပ်ရုံသာ ဖြစ်ပြီး ရေလိုက်ငါးလိုက် အောင်ပွဲခံရုံပင်။

ဦးဆောင် တိုက်ခိုက်သူများမှာ အိမ်ရှေ့စံ နှင့် ဒုတိယ၊ တတိယ မင်းသားများ ဖြစ်ကာ အောင်ပွဲသို့ တရကြမ်း ချီတက်နေကြ၏။ ယွမ်ရှောင်၏ အဖွဲ့နှင့် မတူဘဲ ဤ အဖွဲ့သည် ကြောက်မက်ဖွယ် ပြိုင်ဘက်များနှင့် မရင်ဆိုင်ခဲ့ရဘဲ သူတို့၏ ကံက အထူးကောင်းမွန်ခဲ့သည်။

" အဲ့ဒီ အခြား အဖွဲ့…"

ရမ်းရောင်ဧကရာဇ်က ယွမ်ရှောင်၏အဖွဲ့ကို စိုက်ကြည့်ရင်း မျက်စိ သူငယ်အိမ်များ ကျဉ်းမြောင်းသွားသည်။

"သူတို့က တော်တော်လေး အားကောင်းပေမယ့် ယွမ်ရှောင်ကလွဲလို့ ကျန်လေးယောက်က ဒဏ်ရာပြင်းထန်ပြီး

တိုက်ပွဲမှ ထွက်ရလုနီးပါး ဖြစ်နေပြီ၊"

မုတန်းရှီက မှတ်ချက်ပေးလိုက်ပြီး သူ၏ မျက်လုံးများတွင် အမုန်းတရားဖြင့် တောက်လောင်နေသည်။

"ယွမ်ရှောင် တစ်ဦးတည်းသာ ကျန်ရှိပြီး တကယ်လို့ သူတို့က ခရမ်းရောင်ကောင်းကင် မင်းသား မင်းသမီး ငါးယောက်နဲ့ ကြုံမယ်ဆိုရင် သေချာပေါက် ရှုံးလိမ့်မယ်။ ခရမ်းရောင်ကောင်းကင် အင်မော်တယ်နတ်ပြည်ထောင်ရဲ့ ဂုဏ်သိက္ခာကို မြှင့်တင်ဖို့ ပြီးပြည့်စုံတဲ့ နည်းလမ်းပဲ"

ယိုဖုန်းက အေးစက်စွာ ဝင်ပြောလိုက်သကဲ့သို့ အဇူရာ သစ်ရွက် အဖွဲ့၏ အရာရှိ အများအပြားလည်း တက်ကြွစွာ ဆွေးနွေးနေကြသည်။

"ချန်ရှောင်က ဒီအဖွဲ့ကို လေ့ကျင့်ပေးဖို့ များစွာ ရင်းနှီးမြှုပ်နှံခဲ့ရမှာပဲ။ တကယ်လို့ သူတို့သာ ခရမ်းရောင်ကောင်းကင်နဲ့ တိုက်ခိုက်ရရင် သူရဲ့ ကြိုးပမ်းမှု အားလုံး သွားပြီပေါ့"

ဤစကားလုံးများသည် ခရမ်းရောင်ကောင်းကင် အင်မော်တယ်နတ်ပြည်ထောင်ကို ကျေနပ်စေရန် ဖားယားပြောဆိုခြင်း ဖြစ်သည်။ ထိုအချိန်၌ ပတ်လည်တိုက်ပွဲ၏ စစ်မြေပြင် ပြောင်းလဲသွားကာ

အဇူရာသစ်ရွက် အဖွဲ့၏ အရာရှိများ စိတ်လှုပ်ရှားကာ သူတို့၏မျှော်လင့်ချက် အမှန်တကယ် ဖြစ်ပျက်လာသည်။

"ပြပွဲ စပြီ"

ယိုဖုန်းက အာချောင်နေသောကြောင့် ရဲချင်းထျန်မှ တစ်ချက်စိုက်ကြည့်လိုက်ရာ ခေါင်းငုံ့၍ ပါးစပ်ပိတ်သွားခဲ့သည်။ သူ၏အမြင်အရ ခရမ်းရောင်ကောင်းကင်ကို မြှောက်ပင့်ခြင်းက ကောင်းမွန်သော်လည်း အကယ်၍ တစ်ခုခု မှားယွင်းသွားလျှင် ခရမ်းရောင်ဧကရာဇ်ကို စော်ကားအရှက်ခွဲသကဲ့သို့ ဖြစ်သွားနိုင်၏။ အသန်မာဆုံး အဖွဲ့ နှစ်ခု၏ တိုက်ပွဲသည် အင်မော်တယ်စစ်ပွဲ၏ အခြေအနေကို မကြုံစဖူး အမြင့်သို့ တဟုန်ထိုး တက်သွားစေသည်။

ကွင်းတွင်း ချန်ပီယံ တိုက်ပွဲတွင် လနတ်သား တစ်ဦးတည်းသာ စီ မုယိုကို အနိုင်ယူခဲ့ပြီး အခြား အင်မော်တယ်နတ်ပြည်ထောင် သုံးခု၏ အခြေတည်အဆင့် လေမီးတောက် ကပ်ဘေး နယ်ပယ် ပါရမီရှင်များက ပြင်းထန်သော တိုက်ပွဲတွင် စိန်ခေါ်သူများကို တစ်ဦးပြီးတစ်ဦး ရှုံးနိမ့်သွားသောစေသောကြောင့် ထိုနေရာတွင် စိတ်ဝင်စားမှု လျော့ပါးသွားသည်။ ထို့ကြောင့် အရုဏ်တက်နတ် အင်မော်တယ်နတ်ပြည်ထောင်၏ စစ်သည်တော်များ နှင့် ခရမ်းရောင်ကောင်းကင် အင်မော်တယ်နတ်ပြည်ထောင်၏ တော်ဝင်မျိုးနွယ်များအကြားမှ တိုက်ပွဲသည် အင်မော်တယ်စစ်ပွဲ ပထမနေ့၏ အထွတ်အထိပ် တိုက်ပွဲ ဖြစ်လာသည်။

စစ်မြေပြင်၏ နံရံများ ကျဆင်းပြီး စစ်သည် ဆယ်ဦး တွေ့ဆုံသည့်အခါ ကောင်းကင်နယ်မြေ၌ အားပေးသံများ နောက်တစ်ကြိမ် ပွက်ပွက်ဆူသွားပြန်သည်။ အင်အားအကြီးဆုံး လူသားမျိုးနွယ် အဖွဲ့ နှစ်ခု ထိပ်တိုက်ရင်ဆိုင်နေကြပြီး

ကောင်းကင်နယ်မြေ၏ မရေမတွက်နိုင်သော ကျင့်ကြံသူများက ယွမ်ရှောင်ကို ရူးသွပ်စွာ အားပေးနေကြသည်။ သူတို့က မဟာကျောင်းတော်၏ နဂါးအဆင့်သတ်မှတ်ချက် ကျောင်းသားများကို ဂုဏ်ယူကြသော်လည်း သာမန် ပြည်သူများအနေဖြင့် ယောက်ျားပီသသူ စစ်သည်များကို ပိုနှစ်သက်ကြပြီး အရုဏ်တက်နတ် အင်မော်တယ်နတ်ပြည်ထောင်အတွက် ဂုဏ်ယူစရာပင်။ ထို့ကြောင့် နှိုင်းယှဉ်ရလျှင်၊ ခရမ်းရောင်ကောင်းကင် အင်မော်တယ်နတ်ပြည်ထောင်အတွက် အားပေးသံများ အနည်းငယ် အားနည်းနေပြီး

နောက်ဆုံးတွင် အရုဏ်တက်နတ် အင်မော်တယ်နတ်ပြည်ထောင်သည်သာ အိမ်ရှင် ဖြစ်သည်။

"ခရမ်းရောင်ကောင်းကင်ကွ။ အိမ်ရှေ့စံ အောင်မြင်ပါစေ"

မျှော်လင့်မထားသည်မှာ နတ်ဆိုး သန်းပေါင်းများစွာသည် ခရမ်းရောင်ကောင်းကင်၏ ကျင့်ကြံသူများနှင့် ပူးပေါင်း၍ တပြိုင်နက်တည်း အော်ဟစ်အားပေးလာကြသဖြင့် တန်းတူဖြစ်လာ၏။ မြေပြင်ကို တုန်လှုပ်စေသော အားပေးသံများက ယွမ်ရှောင်ကိုပင် အနည်းငယ် ကြောင်သွားစေပြီး တစ်ဖက်ပြိုင်ဘက်၏ ကျော်ကြားမှုကို ခပ်ရေးရေး နားလည်သွားခဲ့သော်လည်း ခရမ်းရောင်ကောင်းကင်နတ်ပြည်ထောင်မှာ နတ်ဆိုးတိုက်ကြီးကို ကိုယ်စားပြုနေသယောင်ပင်။

မြူခိုးများ ပြန့်ကျဲသွားသည်နှင့်တပြိုင်နက် ယွမ်ရှောင် နှင့် တစ်ကိုယ်လုံး သွေးစွန်းနေသော အဖော်များက ရှေ့သို့ စိုက်ကြည့်လိုက်သောအခါ သူတို့၏ မျက်လုံးများကို ပထမဆုံး ဖမ်းစားခဲ့သည်မှာ ရုပ်ရည်သွင်ဖြင် တူညီသော မင်းသမီးငယ်လေး နှစ်ပါးဖြစ်ပြီး သူတို့သည် ရှည်လျားသော ခရမ်းရောင် ဆံပင်နှင့် ဆွဲဆောင်မှုရှိသော မျက်နှာများ ပိုင်ဆိုင်ထားကြသည်။

"အဲ့ဒီ နှစ်ယောက် ဒေါင်းမင်းသား၊ ကုန်းမင်နဲ့အတူ ရှိနေခဲ့တာ မဟုတ်ဘူးလား။ သူတို့လို အားနည်းသူတွေတောင် ဒီ တိုက်ပွဲမှာ ပါဝင်နေပြီလား"

ယွမ်ရှောင်က အတွေးနက်ရင်း အခြား လူငယ် သုံးဦးအပေါ် အကြည့်ရောက်သွားကာ နှစ်ဦးသည် အခြေတည်အဆင့် လေမီး ကပ်ဘေးနယ်ပယ်ဖြစ်၍ နောက်ဆုံးတစ်ယောက်မှာ သူတော်စင် နယ်ပယ်ဖြစ်ကြောင်း နားလည်လိုက်သည်။ ကျောက်ရှောင်ထန်က ယွမ်ရှောင်ကို သူတို့၏ သရုပ်မှန်များ အကြောင်း ချက်ချင်းရှင်းပြလာခဲ့သည်။

"အိမ်ရှေ့စံ ဟုတ်လား။ ပြီးတော့ ကျန်တာတွေက မင်းသားတွေနဲ့ မင်းသမီးတွေလား"

"မှန်တယ်။ သူတို့က အခြေခံအားဖြင့် ခရမ်းရောင်ကောင်းကင်ရဲ့ အနာဂတ်ပဲ"

"ခရမ်းရောင်ဧကရာဇ်က ပရဟိတ လုပ်နေတာလား၊ သူတို့အားလုံးကို ငါ့ဆီ တကယ်ပို့ရဲတယ်ပေါ့"

ယွမ်ရှောင်က လှောင်ရယ်လိုက်၏။

" အကဲဖြတ်ရရင် သူတို့က ငါတို့ကို သူတို့အောက် နိမ့်ကျတယ်လို့ ထင်နေပုံပဲ"

ချန်ကျင်းက အထင်သေးစွာ နှာခေါင်းရှုံ့လိုက်သည်။

"မင်းတို့ အနားယူနေလိုက်ကြ"

ယွမ်ရှောင်က ပြိုင်ဘက်ကို အကဲခတ်၍ စိတ်ပျက်စွာ ညွှန်ကြားလာသောကြောင့် သူတို့ ဆွံ့အသွားသော်လည်း သက်ပြင်းတစ်ချက်ချကာ နောက်ဆုတ်၍ တင်ပျဥ်ခွေထိုင်ပြီး ဆေးလုံးများဖြင့် ဒဏ်ရာကုသလိုက်ကြသည်။ ယွမ်ရှောင်က အဖြူရောင် ဝတ်ရုံတလွင့်လွင့်ဖြင့် ပြိုင်ဘက်ထံ တစ်ကိုယ်တော်ချဥ်းကပ်လာသဖြင့် ခရမ်းရောင်ကောင်းကင် အိမ်ရှေ့စံသည် သူ့ကို ပေါ့ပျက်ပျက်ကြည့်ကာ စူးစမ်းနေခဲ့သည်။

"အစ်ကိုကြီး၊ ကျွန်မ ပြောခဲ့သလို ဖြစ်ရမယ်။ ဦးဆောင်သူစာရင်းမှာ သူ့အဆင့် မင်းထက် မြင့်နေရတာက အဲ့ဒီ လေးယောက်လုံး သူ့ကို မြှင့်တင်ပေးဖို့ ကိုယ့်ကိုကိုယ် စတေးခဲ့တာ ဖြစ်ရမယ်"

ပဉ္စမ မင်းသမီးက အထင်သေးဟန်ဖြင့် မထီမဲ့မြင့် ပြောလိုက်သည်။ ပတ်လည်တိုက်ပွဲသည် ပိတ်ထားသော သေတ္တာတစ်ခုနှင့် ဆင်တူ၍ ပြိုင်ဘက်အကြောင်း သတင်းမရနိုင်သဖြင့် ယွမ်ရှောင်၏ စွမ်းဆောင်ရည်အကြောင်း မကြားခဲ့ပေ။

သူတို့၏အမြင်၌ ယွမ်ရှောင်၏ စွမ်းရည်မှာ ကုန်းမင်ကို တိုက်ခိုက်ခဲ့သည့် အဆင့်တွင်သာ ရှိနေဆဲဖြစ်သည်။

"သူတို့က အခုထိဟန်ဆောင်ကောင်းနေကြတယ်"

ဆဋ္ဌမ မင်းသမီးက ချန်ကျင်းတို့လူစုကို တစ်ချက်ကြည့်၍ နှာခေါင်းရှုံ့လိုက်သည်။

"အစ်ကိုကြီး ဒီ ဦးနှောက်မဲ့ လူကြမ်းကို သတ်ပစ်လိုက်"

"သူက နတ်ဆိုးဧကရာဇ်ရဲ့ သားကို စော်ကား သတ်ဖြတ်ရဲတဲ့ ရဲတင်းမှုအတွက် ဒီနေ့ မိုက်မဲမှုရဲ့ အကျိုးဆက်ကို ပေးဆပ်စေရမယ်"

မင်းသမီး နှစ်ယောက်သည် ကျေနပ်စွာပြုံး၍ တိုက်တွန်းနေကြပြီး အိမ်ရှေ့စံက တစ်ချက် ပြုံးကာ ကျန်မင်းသား နှစ်ပါးဘက်သို့ လှည့်၍ အမိန့်ပေးလိုက်၏။

"ငါက အဲ့ဒီ ခွေး လေးကောင်ကို ကိုင်တွယ်လိုက်မယ်။ မင်းတို့ထဲက ဘယ်သူ ယွမ်ရှောင်ရဲ့ ဦးခေါင်းကို လိုချင်လဲ"

"ငါ"

ဒုတိယ နှင့် တတိယ မင်းသား နှစ်ဦးစလုံး ပြိုင်တူ တောင်းဆို အော်ဟစ်လိုက်ကြသော်လည်း တစ်ချိန်တည်းမှာပင် အပြာရောင် ဓားအလင်းတစ်ခုက ဆန်းကြယ်စွာ ပေါ်ထွက်လာပြီး ကြယ်သတ်ဓားသိုင်း၏ ကြယ်မိုးအကွက်ဖြစ်နေသည်။ သို့သော် ပေါက်ကွဲသံများ ဆက်တိုက်ထွက်ပေါ်နေသောကြောင့် ထိုသိုင်းကွက်နှင့် ဆယ်ကြိမ်ဓားသိုင်းကို ပေါင်းစပ်ထားခြင်းပင်။

အလွန် ကွဲပြားသော ဓားကျင့်စဥ် နှစ်ခုက အံ့ဖွယ်နည်းဖြင့် ပေါင်းစည်းသွားကာ မထင်မှတ်ထားသော နည်းလမ်းဖြင့် ထိုးနှက် တိုက်ခိုက်လာသည်။ နတ်ဆိုးဧကရာဇ်၏ နတ်ဆိုး စွမ်းရည်၊ တစ္ဆေ တစ်ရာ ညချီတက်ပွဲသည်လည်း ခရမ်းရောင်ကောင်းကင် မင်းသား မင်းသမီးများ၏ မျက်လုံးများအတွင်း ချက်ချင်း ဝင်ရောက်လာသည်။

ဘုတ်

ကိုယ့်ကိုကိုယ်အထင်ကြီးစွာ ပြုံးနေသော မင်းသမီးနှစ်ယောက်နှင့် ယွမ်ရှောင်ကိုသတ်ရန် အချင်းများနေသော မင်းသားနှစ်ယောက်ထံမှ ခေါင်းပြတ်လေးလုံး မြေပြင်သို့ ရုတ်တရက် ပြုတ်ကျလာကာ သွေးချင်းချင်းနီသွားသည်။ ခရမ်းရောင်ကောင်းကင် အင်မော်တယ်နတ်ပြည်ထောင်၏ သူတော်စင် နယ်ပယ် အိမ်ရှေ့စံ တစ်ဦးတည်းသာ ကျန်ရစ်ခဲ့ပြီး ပြုံးနေသော မျက်နှာ ရုတ်တရက် အေးခဲသွားသကဲ့သို့ သူ၏ အသက်ရှုသံ ပို၍ လေးလံလာကာ မျက်လုံးများ သွေးနီရောင် သန်းနေသည်။

"ငါက တိုက်ပွဲကွင်းပြင်မှာ အမှိုက်တွေ ရှင်းလိုက်ရုံလေးပါ။ မင်းက ဘာလို့ အသက်ရှူသံတွေ ပြင်းနေရတာလဲ"

သူ၏ ရှေ့တည့်တည့်တွင် အဖြူရောင် ဝတ်ရုံဝတ် လူငယ်က သူ၏ ဓားဝိညာဉ်ကို ကိုင်ဆောင်ထားရင်း အိမ်ရှေ့စံကို ခပ်ပြုံးပြုံးဖြင့် စိုက်ကြည့်နေခဲ့လေသည်။