အခန်း (၅၅)

သူမကို အချိန်အတော်ကြာအောင် ဘယ်သူမှ လာမကူညီသည်ကို မြင်လိုက်ရသောအခါ ရှောင်ချောင်က သူမဘာသာ မြေပေါ်မှ ထလိုက်သည်။

သူမသည် မုန်းတီးလွန်းသဖြင့် သွေးအန်လုမတတ်ပင်။

သူမထင်သည်မှာ မှန်သည်။ သာ့ချောင်သည် ကံကောင်းခြင်းများကို လုယူရန် စနစ်တစ်ခု ရရှိထားရမည်။

မဟုတ်လျှင် စကားထစ်သူတစ်ယောက်က ရုတ်တရက် ဘယ်လိုလုပ် ကုစားနိုင်ပြီး တစ်ချိန်တည်းမှာ သူမကို လူတွေအများကြီးက သဘောကျပ့ါမလဲ?

မှန်သည်။ ဤကာလအတွင်း ချောင်မိသားစုတွင် ကံမကောင်းသည့်အရာများ ဖြစ်ပျက်ခဲ့သည်။

ရှောင်ချောင်က ချောင်မိသားစုကို သတိပေးချင်သည်။ သို့သော် အဖွား၏ မျက်နှာကို မြင်သောအခါ မျိုချလိုက်သည်။

ဤစုန်းမကြီးက သူမကို မကြိုက်ပေ။ ထို့ကြောင့် သာ့ချောင်ကို သူတို့၏ ကံကောင်းခြင်းအား စုပ်ယူခွင့် ပြလိုက်မည်။

ချောင်မိသားစုက ကြီးစွာသော ကံဆိုးမှု ကြုံပြီးသည်နှင့် သူတို့ နောင်တရလိမ့်မည်။

သူမနှင့်သူမ၏မိခင်အတွက်မူ သူတို့သည် ပိုမိုကောင်းမွန်သော ဖြေရှင်းချက်မရှာမီ သာ့ချောင်ကိုသာ ရှောင်ရှားရမည်။ ဤနည်းအားဖြင့် သူမသည် သူတို့၏ ကံကြမ္မာကို လုယူနိုင်မည် မဟုတ်ပေ။

"နင်ဒဏ်ရာရနေရင်လည်း မြန်မြန်ပြန်သွားလိုက်။ ဒါပေမယ့်..." ချောင်ရှို့ကျီက ရှောင်ချောင်ကို ရုတ်တရက် ပြင်းထန်သည့် အမူအရာနှင့် ကြည့်လိုက်သည်။

"သာ့ချောင်က နင့်ကို တွန်းချလိုက်တာ ဒါမှမဟုတ် မွေးရာပါ ကျိန်စာတစ်ခုလို့ ပြောတာကို ငါမကြားချင်ဘူး။ နင်က အရမ်း ထက်မြက်တာမို့ ငါ့ကို နားလည်နိုင်မယ်လို့ ငါယုံကြည်တယ်!"

စကားပြောပြီးနောက် သူမသည် သာ့ချောင်၏ လက်ကို ဆွဲကာ ချောင်မိသားစုနှင့်အတူ ထွက်ခွာသွားခဲ့သည်။

ရှောင်ချောင် - "..."အရမ်း စိတ်ဆိုးတယ်။

...

နွေဦးထွန်ယက်ခြင်းမပြုခင် ဖန်ရှောင်ကျွမ်းသည် ဝမ်မိသားစုနှင့် လက်ထပ်ခဲ့သည်။

ဖန်မိသားစု၏ အမြီးများသည် ကောင်းကင်သို့ ပျံတက်လုမတတ်ပင်။

အထူးသဖြင့် အဘွားကြီးဖန် ဖြစ်သည်။ သူမစကားပြောသည့် အခါတိုင်း "ငါ့ခမည်းခမက်" ဟု ပြောသည်။ ဝမ်မိသားစုနှင့် ခမည်းခမက်များ ဖြစ်ကြောင်း အခြားသူများ မသိမည်ကို သူမ ကြောက်ရွံ့နေသကဲ့သို့ပင်။

သူမကို သည်းမခံနိုင်သည့် သူတစ်ယောက်က ပြောတော့သည်။ "အဲဒီအဘွားကြီးဖန်ကို ကြည့်ကြည့်။အဘွားကြီးဝမ်သာ အသက်မရှိတော့ရင် သူမလည်း ဝမ်မိသားစုနဲ့ လက်ထပ်ဖို့ တွေးလိမ့်မယ်!"

ဤစကားများက အနည်းငယ် အန္တရာယ်ရှိသည်။

သို့သော် ပိုဆိုးသည့်အကြောင်းအရာက လူများက သူတို့၏ လျှာသရမ်းရသည်ကို ပိုကြိုက်ခြင်းပင်။

မကြာခင်မှာပင် ဝမ်မိသားစုလည်း ၎င်းကို ကြားသည်။ အဘွားအိုဝမ်သည် ဒေါသကြောင့် မည်းသွားသည်။

အရှက်မရှိလိုက်တာ! ဒီအရွယ်ရောက်နေပြီ၊ သူမက လူတွေကို ဆွဲဆောင်ချင်နေတုန်းပဲ။

အဘွားအိုဝမ်သည် ထိုအကြောင်းကို ပိုတွေးပြီး ပိုဒေါသဖြစ်လာသည်။ ဆေးလိပ်သောက်နေသည့် အဘိုးအိုဝမ်ကို ဆဲဆိုကြိမ်းမောင်းလိုက်သည်။

"ရှင်က သူများပြောသလို အရှက်မဲ့တဲ့ အဘွားကြီးဖန်နဲ့ ပတ်သက်ဖို့ သတ္တိရှိရင် ကျွန်မ ရှင့်ကို သေတဲ့အထိ ကုတ်ဖဲ့ပစ်မလားဆိုတာ ကြည့်နေ!"

ထောင့်မှာထိုင်ကာ ဆေးလိပ်သောက်နေသည့် အဘိုးအိုဝမ် - "..."

သူက ထောင့်မှာ ပုန်းနေသည်။ ဤအိုးက သူ့ခေါင်းကို ဘယ်လိုလုပ် ပြင်းပြင်းထန်ထန် ထိတာလဲ?

ထို့အပြင် သူသည် အသက်ကြီးမှ မျက်စိမှုန်ခြင်းသာ ဖြစ်သည်။ သူ့စိတ်​က မနစ်​မြုပ်​သေးပေ။

အတွေးတွေ ဝေဝါးနေလျှင်တောင် အဲဒီအဘွားကြီးကို မကြည့်ဘူး။ ဟုတ်ပြီလား?

အဘွားကြီးဖန်၏ ပြုံးသည့်အခါတိုင်း ရှုံ့တွနေသော မျက်နှာကို တွေးရင်း အဘိုးအိုဝမ်သည် နေမကောင်း​သလို ရုတ်တရက် ခံစားလိုက်ရသည်။

ဖန်ရှောင်ကျွမ်းသည် ဝမ်မိသားစုထဲသို့ လက်ထပ်ပြီး နှစ်ရက်အကြာတွင် ဝမ်ရွှေရှန်းသည် စာပို့သမားဆီမှ စစ်တပ်မှ ပေးပို့သော စာတစ်စောင်ကို လက်ခံရရှိခဲ့သည်။

လက်မှတ်အချို့နှင့် ယွမ်ငါးဆယ်အပြင် ထူထဲသောစာတစ်စောင်လည်း ပါဝင်သည်။

စာကိုဖတ်ပြီးနောက် ဝမ်ရွှေရှန်သည် လေးနက်သောမျက်နှာဖြင့် သူ့မိဘအခန်းသို့ လျှောက်သွားပြီး တစ်နာရီကျော်ကြာအောင် ထိုနေရာတွင် နေခဲ့သည်။

နောက်နေ့တွင် လူတိုင်း နံနက်စာစားပြီးသောအခါ ဝမ်မိသားစုမှ သတင်းကြီးတစ်ခုကို ကြေငြာလိုက်သည်...

ဝမ်မိသားစု ခွဲတော့မည်!

မိသားစုကို ခွဲဖို့လား?

သူမ၏ အိမ်ထောင်သက်က သုံးရက်သာ ရှိသေးပြီး မိသားစု ခွဲသွားသည်။ ဝမ်မိသားစုက ဒါကို ရည်ရွယ်ပြီး လုပ်ခဲ့တာလား?

ချောင်မိသားစုနှင့် လက်ထပ်ပြီး သုံးရက်မြောက်သောနေ့တွင် ထိုစုန်းမ ချောင်ရှို့ကျီသည် သူမနှင့် ချောင်ကျန်းကျွင်းကို မိသားစုမှ ခွဲထုတ်လိုက်သည်။

ရွာရှိလူတိုင်းက သူမကို ရယ်မောပြီး ချောင်ရှို့ကျီက သူမကို ချွေးမအဖြစ် လက်ခံသည်ထက် သားတစ်ယောက် မရှိသည်က ပိုကောင်းသည်ဟု ပြောခဲ့ကြသည်။

သူစိမ်းများအတွက်မူ ချွေးမဖြစ်သည့် သူမက ကြောက်စရာကြီးဟု ထင်ကြလိမ့်မည်။ အိမ်ထောင်ကျပြီး သုံးရက်အကြာတွင် အိမ်ခွဲကြသည်။ ထိုအချိန်တွင် သူမသည် အလွန်ဒေါသထွက်နေခဲ့သည်။

မထင်မှတ်ဘဲ ဒုတိယအိမ်ထောင်ကလည်း စတင်သည်နှင့် ထိုကဲ့သို့ ထပ်ဖြစ်ပြန်သည်။

သူမသည် ထိုသို့သောကိစ္စမျိုးကို ဘယ်တော့မှ ခွင့်မပြုပေ။ မဟုတ်လျှင် သူမ ဖန်ရှောင်ကျွမ်းရဲ့ မျက်နှာက ဘယ်နားသွားထားရမလဲ?

သူမလက်ထဲရှိ ပေါင်မုန့်လုံးကို ကြွေပန်းကန်လုံးဟောင်းလေးဆီသို့ ပစ်ချလိုက်ပြီး အေးစက်သောအမူအရာဖြင့် ပြောလိုက်သည်။

"အဖေ၊ ဘာလို့ မိသားစုကို ခွဲထွက်ချင်နေတာလဲ? ကျွန်မ လက်မထပ်ခင်မှာ ဒီအကြောင်းကို ဘာလို့ မပြောခဲ့တာလဲ?"

ဘေးမှာထိုင်နေသည့် ဝမ်ရှင်းရှန်က သူမကို တွန်းလိုက်သည်။ "မင်းရဲ့ သဘောထားက ဘယ်လိုလဲ? ငါတို့တောင် မသိလိုက်ဘူး။ ဘာလို့ မင်းကို ပြောရမှာလဲ?"

ဖန်ရှောင်ကျွမ်းသည် ရူးသွပ်နေသော်လည်း ဝမ်ရှင်းရှန်ကို တိုက်ရိုက် မတိုက်ခိုက်ဝံ့ပေ။

ဝမ်ရှင်းရှန်အပြင် ဝမ်မိသားစု၏ သားနှစ်ယောက်လည်း အံသြသွားသည်။ "အဖေ၊ သားတို့ အမှားလုပ်မိလို့လား?"

ဝမ်ရှင်းရှန်နှင့် တတိယမြောက်ဝမ်က လွဲ၍ ကျန်သားသုံးယောက်သည် ရိုးသားပြီး မြေကြီးပေါ်ရှိလူများဖြစ်သည်။ သူတို့အမြင်အရဆိုလျှင် သူတို့၏ မိဘများ အသက်ရှင်နေသည့်အချိန်တွင် မိသားစုက ခွဲမသွားသင့်ပေ။

ယခုမူ အဘိုးအိုဝမ်သည် မိသားစုခွဲခွာကြောင်း ကြေငြာလိုက်သောအခါတွင် အမှားတစ်ခုခု ကျူးလွန်မိခြင်း ရှိမရှိ မသိစိတ်က ခံစားလိုက်ရသည်။

ချွေးမများက တစ်ယောက်ကို တစ်ယောက် ကြည့်နေသည်။ သူတို့အားလုံး၏ စိတ်ထဲတွင် ကိုယ်ပိုင် အတွေးများ ရှိသည်။

အထူးသဖြင့် လျိုချွေ့ဟွားပင်။ 'မိသားစုခွဲမည်' ဟူသော စကားလုံးကို အဘိုးအိုဝမ်က ပြောသောအခါ သူမက အော်လုမတတ်ပင်။

သူမက အိမ်ခွဲချင်နေတာ ကြာပြီ။

တစ်မိသားစုလုံး သဟဇာတဖြစ်အောင် နေထိုင်ကြသော်လည်း သွားများနှင့် လျှာများ ရန်ဖြစ်သောအခါတွင်မူ မိသားစုကြီးအတွင်း ခိုက်ရန်ဖြစ်ပွားခြင်းမှာ ရှောင်လွှဲ၍မရပေ။

အထူးသဖြင့် အိမ်တွင် အလကားစားနေသည့် မောင်လေးတစ်ယောက် ရှိသည်။ တစ်နေ့လုံး ပျင်းရိနေပြီး သူမ၏ ယောက္ခမများက သူ့ကို အလိုလိုက်သည်။

အကောင်းဆုံးအရာများကို သူ့အတွက် ချန်ထားသည်။ သူမ၏ သားအကြီးဆုံး သူတို့၏ မြေးလေးပင် မတ်တပ်ရပ်နေရသည်။ အချိန်အတော်ကြာပြီးနောက် ဘယ်သူက စိတ်ထဲမှာ အဖုအထစ်မရှိဘဲ နေမလဲ?

သူမသည် ယောက်ျားဖြစ်သူကို ကြည့်ကာ ကြိုပြီး မတိုင်ပင်သည်ကို ငြီးတွားလိုက်သည်။

အဘိုးအိုဝမ်က သူ့ဆေးလိပ်ကို သောက်ပြီး ကြေငြာလိုက်သည်။ "အပင်က ကြီးတယ်၊ အကိုင်းအခက် ခွဲဖို့ အချိန်တန်ပြီ။ အရွယ်ရောက်ပြီး ကြီးပြင်းလာလို့ မိသားစုခွဲဖို့ အချိန်တန်ပြီ။ အရင်တုန်းက မပြောတာက ပဉ္စမက အခြေမကျသေးလို့ပဲ။ အခု သူက လက်ထပ်ပြီးပြီဆိုတော့ အိမ်ခွဲကြတာပေ့ါ"

ဒုတိယသားနှင့် စတုတ္ထသားတို့သည် မကျေမနပ်ဖြစ်ကြသည်။ "အဖေ အမေ၊ အားလုံးအတူတကွ နေတာ အဆင်ပြေနေကြပြီ။ ဘာလို့ ခွဲချင်ရတာလဲ?"

ဖန်ရှောင်ကျွမ်းက ပို၍ပင် စိတ်လှုပ်ရှားသည်။ "မှန်တယ်။ အဖေ၊ မခွဲသင့်ဘူး!"

ဒါက ဘယ်လိုလုပ် မိသားစုခွဲတာ ဖြစ်မလဲ? သူမ မျက်နှာကို ခွဲသည်နှင့် ပိုတူသည်။

ဝမ်ရှင်းရှန်က သူမကို ထပ်ပြီး စိုက်ကြည့်သည်။ "မင်းပါးစပ်ပိတ်ထား။ မင်းဘယ်လိုလုပ် ဝင်ပြောရဲတာလဲ!"

ဖန်ရှောင်ကျွမ်း ဒေါသထွက်ပြီး ရင်ဘတ်အောင့်သွားသည်။

ထိုအချိန်က ချောင်မိသားစုတွင် သူမသည် ခွဲခွာခံရသည်။ သို့သော် သူမက ချောင်အိမ်ငယ်လေးကို အုပ်ထိန်းရသည်။ ချောင်ကျန်းကျွင်းက ဘယ်တော့မှ မပြောဝံ့ပေ။

သို့သော် ယခု ဝမ်အိမ်တွင် သူမက စကားပင် မပြောနိုင်တော့ပေ။ ၎င်းက သူမကို ရူးသွပ်စေသည်!

ဖန်ရှောင်ကျွမ်းက ဒေါသမထွက်ချင်သော်လည်း ရှောင်ချောင်က သူမအင်္ကျီကို ဆွဲလိုက်သည်။

သူမ လှည့်ကြည့်လိုက်သောအခါ ရှောင်ချောင်က သူမကို ခေါင်းယမ်းပြနေသည်ကို တွေ့လိုက်ရသည်။

အဘိုးအိုဝမ်က မိသားစုခွဲထွက်ရန် အဆိုပြုသည့်အတွက် အံ့သြသွားသည်။ ဝမ်မိသားစုသည် အရင်ဘဝက မိဘနှစ်ပါး သေဆုံးသည်အထိ မခွဲခွာခဲ့ကြပေ။ သို့သော် ဤကိစ္စက ကြီးကြီးမားမား မဟုတ်ခဲ့ပေ။

ဝမ်မိသားစုတစ်ခုလုံးတွင် ဝမ်ရှင်းရှန်သည် အမှန်တကယ် အလားအလာကောင်းသူဖြစ်သည်။ ထို့အပြင် စစ်တပ်ရှိ တတိယမြောက်ဝမ်လည်း ပါသည်။ ကျန်သုံးဦးမှာ အသက်မသေမချင်း တောင်သူလယ်သမားများ ဖြစ်ကြသည်။

ခွဲခွာပြီးနောက် သူတို့သည် တတိယဝမ်နှင့် ကောင်းမွန်သောဆက်ဆံရေးရှိရန်သာလိုသည်။

မိသားစုခွဲခွာခြင်းသည် သူမအမေ၏ မျက်နှာကို ကြမ်းပြင်ပေါ်မှာ သုတ်ရသော်လည်း ရေရှည်တွင် အကျိုးသာရှိပြီး ထိခိုက်မှုမရှိပေ။

ဝမ်ရွှေရှန်သည် အမေနှင့်သမီးကြားက လှုပ်ရှားမှုများကို သတိပြုမိပြီး အနည်းငယ် မျက်မှောင်ကြုတ်လိုက်သည်။

ဒုတိယဝမ်၊ စတုတ္ထဝမ်၊ ဖန်ရှောင်ကျွမ်းနှင့် အခြားသူများက ကန့်ကွက်ကြသော်လည်း အဘိုးအိုဝမ်သည် မိသားစုခေါင်းဆောင်ဖြစ်သည်။ သူ့ဆုံးဖြတ်ချက်ကို ဘယ်သူမှ မကန့်ကွက်နိုင်ပေ။ ထို့ကြောင့် ဝမ်မိသားစုသည် နောက်ဆုံးတွင် အိမ်ခွဲသွားကြသည်။

ဝမ်မိသားစု အိမ်ခွဲခြင်းသတင်း ပြန့်သွားသည်နှင့် ဆီပူအိုးထဲသို့ ရေများဝင်သွားသလိုပင်။ ချီလီရွာတစ်ခုလုံး ရုတ်တရက် ပေါက်ကွဲသွားသည်။

"အရှင်ဘုရား၊ ဒါက ဒုတိယအကြိမ်ပဲ မဟုတ်လား? နောက်ဆုံးအကြိမ် ဖန်ရှောင်ကျွမ်း အိမ်တံခါးကို ဝင်လိုက်တာနဲ့ သူမကို သုံးရက်မြောက်နေ့မှာ ခွဲထုတ်လိုက်တာပဲ။ ဒီတကြိမ်လည်း သုံးရက်မြောက်တဲ့နေ့ပဲ!"

"ဒါက ငါ့ကို ​ရူးသွားစေလောက်တယ်။ ဖန်မိသားစု သိသွားတဲ့အခါ အနာဂတ်မှာ သူတို့အမြီးက မိုးပေါ်ထောင်နိုင်ဦးမလား သိချင်သေးတယ်"

"ကျွတ်စ် ကျွတ်စ် ကျွတ်စ် ငါသာ ဖန်ရှောင်ကျွမ်းဆိုရင် အပြင်ထွက်ရဲမှာတောင် မဟုတ်ဘူး၊ ရှက်လွန်းလို့ သေနိုင်တယ်!"

"ကျွတ်စ်၊ နင်က ဖန်ရှောင်ကျွမ်းရဲ့မျက်နှာကို အရမ်းလျှော့တွက်လွန်းတယ်။ ရှက်စရာဆိုတာသိရင် သူဒီလိုလုပ်မှာမဟုတ်ဘူး!"

တစ်စုံတစ်ယောက်သည် အတင်းအဖျင်းကို အနံ့ခံပြီး မေးလာသည်။ "သူမ ဘာလုပ်တာလဲ? ငါ့ကို ပြောပြ"

"မပြောဘူး။ မပြောဘူး။ ငါ့ကို မမေးနဲ့။ မကြာခင် သိလိမ့်မယ်!"

ဖန်ရှောင်ကျွမ်းနှင့် ဝမ်ရှင်းရှန်တို့သည် လက်မထပ်ခင် အတူနေခဲ့ကြသည်။ လျှို့ဝှက်စွာ လုပ်ခဲ့ကြသော်လည်း အထူးဂရုစိုက်သူများဆီမှ ဖုံးကွယ်ထား၍မရပေ။

ဝမ်မိသားစု၏ အခြေအနေကြောင့် တွေ့ရှိသူများသည် မပြောဝံ့ပေ။ ရှင်းရှင်းလင်းလင်း မပြောနိုင်သော်လည်း အရိပ်၏အမြီးကို ဖော်ပြခြင်းသည် ကောင်းသည်။

ဖန်ရှောင်ကျွမ်းက အပြင်မှ ကောလာဟလများကို ကြားပြီး ဒေါသကြောင့် ကိုယ်ဝန်ပျက်လုနီးပါး ဖြစ်သွားသည်။

သူမက မီးကို ရှောင်ချောင်ဆီ ညွှန်ပြလိုက်သည်။ "မနက်က ဘာလို့ ငါ့ကို တားတာလဲ?"

"အမေ၊ အေးအေးဆေးဆေး စဉ်းစားကြည့်။ မိသားစုအိမ်ခွဲတာက တကယ်တော့ သမီးတို့အတွက် အကျိုးအရှိဆုံးပဲ!"

ရှောင်ချောင်သည် စိတ်ထဲတွင် မျက်လုံးလှိမ့်လိုက်သည်။ သူမကို မတားခဲ့လျှင်တောင် ဝမ်မိသားစုကို အိမ်မခွဲရအောင် တားနိုင်မှာမို့လို့လား?

နေ့ခင်းဘက်ကြီး အိပ်မက်မက်နေတာပင်။

ဖန်ရှောင်ကျွမ်းက ဒေါသမီးခိုးဝေနေသေးသည်။ "ဘာအကျိုးရှိလဲ? နင့်ဦးလေးဝမ်က ဘယ်လောက်ပျင်းလဲ နင်မသိဘူးလား? ပဲငံပြာရည်ပုလင်းက သူ့ရှေ့မှာ ပြုတ်ကျနေရင်တောင် သူက ကောက်ပေးမှာ မဟုတ်ဘူး။ ငါတို့က အိမ်ခွဲပြီးရင် အနောက်မြောက်လေကို သောက်ကြမလို့လား၊ ဟမ်?"

ရှောင်ချောင်က လုံးဝမစိုးရိမ်ခဲ့ပေ။ "အမေ၊ အမေက အရမ်းတွေးနေတာပဲ၊ အဘွားဝမ်က ဦးလေးဝမ်ကို အချစ်ဆုံးပဲ။ အနောက်မြောက်လေကိုပဲ သူသောက်နေရတာကို ဘယ်လိုလုပ် ကြည့်ရက်မှာလဲ?"

ထို့အပြင် ဝမ်ရွှေရှန်သည် နောင်တွင် ရွာတွင် ယွမ်ငွေ 10,000 ရရှိမည့် ပထမဆုံးလူ ဖြစ်လာမည်ဖြစ်သည်။ အခုက နည်းနည်းတော့ ခက်နေပေမယ့် အဲဒါက ဘယ်လောက်အထိ ဖြစ်မှာမို့လဲ?

သူမအမြင်အရဆိုလျှင် သူမအမေက ဝမ်ရှင်းရှန်နှင့် ပျော်ရွှင်မှု၊ ဝမ်းနည်းမှုတွေကို မျှဝေခံစားပြီး သူ့နှလုံးသားကို အနိုင်ယူသင့်သည်။ နောင်တွင် သူမသည် ဤအိမ်တွင် နောက်ဆုံးပြောရေး၊ ဆိုရေးရှိသူ ဖြစ်လိမ့်မည်မဟုတ်လော။

ရှောင်ချောင်က ဤစကားလုံးများကို သူမအမေအား သေချာစွာ ခွဲခြမ်းစိတ်ဖြာပေးသည်။

ဖန်ရှောင်ကျွမ်း စကားကို နားထောင်ပြီးနောက် ငှက်အရွယ်အစားရှိ သူမ၏ ဦးနှောက်နှင့် စဥ်းစားကြည့်လိုက်သည်။ ရုတ်တရက် သူမပေါင်ကို ပွတ်လိုက်သည်။

"အို အမေ့ရဲ့ အဖိုးတန်ကျောင်းကျောင်း၊ သမီးက ဘာလို့ ထက်မြက်ရတာလဲ? အမေက နောက်ဆိုရင် သမီးစကားကိုပဲ နားထောင်တော့မယ်!"

၎င်းကို သိပြီးနောက် ဖန်ရှောင်ကျွမ်းက ဝုန်းဒိုင်းကြဲနေသည်ကို ရပ်လိုက်သည်။

သူမက အလွန်လျင်မြန်စွာ တွေးတောမိသောကြောင့် ဝမ်မိသားစုသည် အံ့ဩသွားသည်။