ကောင်းကင်နတ်တံခါးဂိုဏ်း

Vol. 015 Ch. 1435

ရှားရှင်းယွန်သည် ရီဖူရှင်း၏ ခံစားချက် အပြောင်းအလဲကို ခံစားမိလိုက်သည်။ ရီဖူရှင်းသည် ဗြဟ္မာ့သန့်စင်ကောင်းကင်မှ လူများကို ထိုအကြောင်း နှစ်ကြိမ်တိုင်တိုင် မေးမြန်းပြီးနောက်၌ သူက ထိုအကြောင်း တွေးနေခြင်းအား ရပ်တန့်ရန် ကြိုးစားနေသည်ကို သူမ ကောင်းကောင်း နားလည်ပေသည်။

ဟွာဂျီယူ၏ သေဆုံးမှုက သူ့နှလုံးသားထဲမှ နာကျင်ခြင်း ဖြစ်သည်။

သူသည် ကိုယ့်ကိုယ်ကိုယ် မနှိပ်စက်ချင်သည့် အတွက်ကြောင့် ထိုအကြောင်းကို မစဉ်းစားခဲ့ပေ။ သူက မေ့ပစ်ရန် ကြိုးစားနေခဲ့သည်။

သူမက သူ့ဇနီးဖြစ်ကာ သူ၏ ဝိညာဉ်ဖက် ဖြစ်သည်။ ချင်းဟယ်က သူ့အား ထိုမေးခွန်း မေးခဲ့သည့်အခါ ရီဖူရှင်းသည် ဟွာဂျီယူကို အရင်ဆုံးတွေးမိခဲ့လေသည်။

“အဲဒါက ရှင်နဲ့ ဆိုင်လို့လား” ရှားရှင်းယွန်က ချင်းဟယ်ကို အေးစက်စွာ ကြည့်၍ ပြောလိုက်သည်။ သူမက ဗြဟ္မာ့သန့်စင်ကောင်းကင်မှ နံပါတ်တစ်နတ်မိမယ် ဖြစ်နေလျှင်ပင် ရှားရှင်းယွန်က ယဉ်ကျေးနေလိမ့်မည် မဟုတ်ပေ။

ချင်းဟယ်က ရှားရှင်းယွန်ကို တစ်ချက်ကြည့်လိုက်၏။ ရှားရှင်းယွန်၏ အေးစက်သော အကြည့်တို့ကို မြင်သည့်အခါ သူမက တစ်စုံတစ်ခုကို နားလည်သွားခဲ့သည်။

“သခင်လေးရီက ဗြဟ္မာ့သန့်စင်ကောင်းကင်က လူတွေဆီမှာ လူတစ်ယောက်အကြောင်းကို နှစ်ခါတောင် စုံစမ်းနေတာ ကြားမိလို့ပါ။ အဲဒါကြောင့် သခင်လေးရီရဲ့ ဝိညာဉ်ဖက်က ဟွာဂျီယူလို့ခေါ်တဲ့ အမျိုးသမီး ဖြစ်မယ်လို့ ခန့်မှန်းလိုက်မိတာ” ချင်းဟယ်က ရီဖူရှင်းကို ကြည့်ကာ ဆက်မေးလိုက်သည်။ “ဒါပေမဲ့ သူမနဲ့ ကျွန်မတို့ ဗြဟ္မာ့သန့်စင်ကောင်းကင်နဲ့ ဘယ်လိုပတ်သက်မှုရှိလို့ သခင်လေးရီက သူမအကြောင်း ကျွန်မတို့ကို မေးရတာလဲ။ ဘယ်လိုအကြောင်းများ ရှိလို့လဲ”

“ရှင် ပြောလို့ ဝပြီလား” ရှားရှင်းယွန်က အေးစက်စက်ကြည့်ကာ ကြားဖြတ် ပြောလိုက်သည်။ ချင်းဟယ်သည် ရည်ရွယ်ချက်ရှိရှိနှင့် ရီဖူရှင်း၏ နာကျင်မှုကို ရန်စနေသည်လား။

“ရှင်းယွန် ... အဆင်ပြေပါတယ်” ရီဖူရှင်းက ပြောလိုက်သည်။ သူက သူမအား ထိုသို့ပြောလိုက်သည်ကို ကြားသည့်အခါ ရှားရှင်းယွန်သည် ခေတ္တရပ်တန့်သွားပြီး သူ့ကို ကြည့်လိုက်ပြီးနောက် သူမ၏ ခေါင်းကို ငုံ့သွားခဲ့သည်။ သူမ၏ နှလုံးသားထဲတွင် ခံစားချက် မျိုးစုံ ရောပြွမ်းနေသည်။

“နတ်မိမယ်က ဗြဟ္မာ့သန့်စင်ကောင်းကင်ရဲ့ နံပါတ်တစ် နတ်မိမယ်ပဲ။ ဗြဟ္မာ့သန့်စင်ကောင်းကင်မှာ အဆင့်အတန်းလည်း မြင့်မားတယ်။ ဖြစ်နိုင်မယ်ဆိုရင် ဗြဟ္မာ့သန့်စင်ကောင်းကင်ရဲ့ အရှင်မကို အောက်ဘုံက လူသားတန်ခိုးရှင်တစ်ယောက်ဆီ အတွေးစစေလွှတ်ပေးခဲ့ဖူးတာ မှတ်မိသေးလားလို့ မေးပေးနိုင်မလား” ရီဖူရှင်းက ပြောလိုက်သည်။

“ဟွာဂျီယူလား” ချင်းဟယ်က မေးလိုက်၏။

“ဟုတ်ပါတယ်” ရီဖူရှင်းက ခေါင်းညိတ်လိုက်သည်။ “သူမက ကျွန်တော့်ဇနီးပါ။ သူမက အရှင်မရဲ့ စိတ်စွမ်းအား အတွေးစကို တစ်ခါ လက်ခံရရှိခဲ့ပြီး အကူအညီလိုအပ်နေတဲ့ အခြေအနေမှာ အရှင်မရဲ့ စိတ်စွမ်းအားကို ငှားယူအသုံးပြုခဲ့ပေမဲ့ သူမရဲ့ ဝိညာဉ်က အဝေးကို လွင့်သွားခဲ့တာကြောင့် ကျွန်တော့်ဇနီးက ဗြဟ္မာ့သန့်စင်ကောင်းကင်ရဲ့ တစ်နေရာရာမှာများ ရှိမလားလို့ မေးချင်မိတာပါ”

“ကျွန်မ နားလည်ပြီ” ချင်းဟယ်က ညင်သာစွာ ခေါင်းညိတ်ကာ ပြောလိုက်သည်။ “သူမအကြောင်း မေးမိတာ တောင်းပန်ပါတယ်။ ကျွန်မ ဗြဟ္မာ့သန့်စင်ကောင်းကင်ကို ပြန်ရောက်ပြီးတဲ့အခါ အခွင့်အရေးရတာနဲ့ သခင်လေးရီအတွက် သေချာပေါက် မေးပေးပါ့မယ်။ ဒါပေမဲ့ သခင်လေးရီက နှစ်ခါတောင် မေးဖူးတယ်ဆိုတော့ မျှော်လင့်ချက် အများကြီး မထားဖို့တော့ ပြောချင်မိတယ်။ သခင်လေးရီ ပြောတဲ့အကြောင်းကလည်း အတော်လေး မရေမရာ ဖြစ်နေတယ်လေ”

“ကျွန်တော် နားလည်ပါတယ်။ ကျေးဇူး အများကြီး တင်ပါတယ် နတ်မိမယ်” ရီဖူရှင်းက ခေါင်းညိတ်ကာ ပြောလိုက်သည်။

“သခင်လေးရီရော ကောင်းကင်နတ်တံခါးဂိုဏ်းကို သွားမှာလား” ချင်းဟယ်က ဆက်၍ မေးလိုက်သည်။

“သွားမှာပါ” ရီဖူရှင်းက ခေါင်းညိတ်ကာ ပြောလိုက်၏။

“ဒါက ခရီးရှည်ကြီး ဖြစ်မှာ။ လူစုပြီး သွားကြတာက ပိုကောင်းလိမ့်မယ်။ ဒီလို ခရီးရှည်မှာ ကျင့်ကြံခြင်းအကြောင်း ဆွေးနွေးပြောဆိုဖို့ အခွင့်အရေးကောင်းလည်း ဖြစ်လိမ့်မယ်” ချင်းဟယ်က အပြုံးနှင့်အတူ ပြောလိုက်သည်။ သူမ၏ အပြုံးက အလွန် ကျက်သရေရှိလှ၏။ မည်သူမဆို သူမအား ငြင်းပယ်ရန် ခက်ခဲပေလိမ့်မည်။

ရှားရှင်းယွန်ထံ၌ ထူးဆန်းသော အကြည့်တို့ ပေါ်ပေါက်လာသည်။ ချင်းဟယ်က မည်သည်ကို ဆိုလိုချင်နေသနည်း။

ယခင်က သူတို့ ဗြဟ္မာ့သန့်စင်ကောင်းကင်နှင့် ဆက်သွယ်ခဲ့သည့်အခါ ဤမြင့်မြတ်သည့် အမျိုးသမီးများက သူတို့အား အဖက်ပင် မလုပ်ခဲ့သော်လည်း ယခုတွင်တော့ နံပါတ်တစ် နတ်မိမယ် ချင်းဟယ် ကိုယ်တိုင်က ရီဖူရှင်းအား သူတို့နှင့်အတူ လိုက်ပါရန် ဖိတ်ခေါ်နေသည်။

ထိုသည်က ခရမ်းရင့်ကောင်းကင်နန်းတော်နှင့် တိုက်ပွဲကြောင့်ပေလား။

ရီဖူရှင်းသည်လည်း အနည်းငယ် ထူးဆန်းနေသလို ခံစားနေရကာ ချင်းဟယ်၏ ရည်ရွယ်ချက်ကို နားလည်ခြင်း မရှိခဲ့ပေ။

ချင်းဟယ်သည် ဗြဟ္မာ့သန့်စင်ကောင်းကင်၏ နံပါတ်တစ် နတ်မိမယ် ဖြစ်သည်။ သူမတွင် ထူးခြားသာလွန်သည့် ပါရမီ ရှိသည်။ ကောင်းကင်အာဏာစက် ပြည်ထောင်သည်ပင် သူတို့၏ အိမ်ရှေ့စံကို သူမနှင့် လက်ဆက်စေချင်သော်လည်း ဗြဟ္မာ့သန့်စင်ကောင်းကင်က မည်သည့် တုံ့ပြန်မှုမှ မရှိခဲ့ပေ။ ထို့ပြင် ချင်းဟယ်သည် မည်သည့်အခါတွင် ဖြစ်စေ မည်သူ့အပေါ်ကိုမှ ရင်းနှီးမှုမပြုခဲ့ပေ။

ယခု သူက တိုက်ပွဲတွင် ထူးချွန်ထက်မြက်သော ပါရမီကို ပြသခဲ့ပြီး နတ်ဆင်ကလန်နှင့် ကောင်းမွန်သော ဆက်ဆံရေးရှိခဲ့သော်လည်း ထိုသည်က သူ၏ ခွန်အားနှင့် အဆင့်အတန်းက ကောင်းကင်အာဏာစက် ပြည်ထောင်၏ အိမ်ရှေ့စံထက် သာလွန်နိုင်သည်ဟု အဓိပ္ပာယ်ဖြစ်ခဲ့သည်လား။

သူက ထိုသို့ တွေးနေပင်လျှင် ကောင်းကင်အာဏာစက် ပြည်ထောင်မှ လူများကတော့ ထိုသို့ တွေးလိမ့်မည် မဟုတ်ပေ။

ချင်းဟယ်က သူ့ကို တမင်သက်သက် ချဉ်းကပ်လာရန်မှာ မလိုအပ်လှပေ။

သို့ဆိုလျှင် သူမ၏ ရည်ရွယ်ချက်က မည်သည်နည်း။

“နတ်မိမယ်နဲ့ အတူသွားခွင့်ရတာ ဂုဏ်ယူစရာပါပ” ရီဖူရှင်းက အပြုံးနှင့်အတူ ပြောလိုက်သည်။ သူက ချင်းဟယ် မည်သည်ကို လုပ်ရန် ရည်ရွယ်နေသည်အား စူးစမ်းချင်နေသည်။

“အရှက်မရှိလိုက်တာ” ရှားရှင်းယွန်က ရေရွတ်ကာ ချင်းဟယ်၏ ညှို့ဓာတ်ပြင်းသော မျက်နှာကို ကြည့်လိုက်၏။

ဤအကောင်က အမှန်တကယ်ပင် ထိုသို့ ကတိပေးခဲ့သည်လား။

သို့သော် ချင်းဟယ်ကဲ့သို့ လှပသော အမျိုးသမီး၏ ဖိတ်ခေါ်မှုကို အရူးသာလျှင် ငြင်းပယ်ပေလိမ့်မည်။

“တကယ် ... တကယ် ... တကယ်ကို ရှုပ်ထွေးလိုက်တဲ့ မင်းသမီးပဲ” သူက ရှားရှင်းယွန်၏ တိုးညင်းသော စကားသံကို ကြားသည့်အခါ သိမ်းငှက်နက်လေးသည် ခပ်တိုးတိုး ရေရွတ်လိုက်သည်။ ရှားရှင်းယွန်သည် သူ့ကို သတ်ဖြတ်တော့မတတ် အေးစက်သည့် မျက်လုံးတစ်စုံနှင့် စူးစိုက်ကြည့်လိုက်သည်။ သူမ၏ မျက်လုံးထဲတွင် သတ်ဖြတ်လိုစိတ်များ ထင်ဟပ်နေကာ သိမ်းငှက်လေးသည် တုန်ယင်စွာနှင့် ဇက်ပုသွားခဲ့၏။

အရမ်း ကြောက်စရာကောင်းတာပဲ။

သူမက နောက်ဆုံး၌ အခွင့်အရေးရပြီဟု တွေးနေသည် ဖြစ်နိုင်သော်လည်း သူ့သခင်၏ ဆွဲဆောင်အားက အလွန်ပင် ပြင်းထန်ပေသည်။

ရီဖူရှင်းနှင့် ချင်းဟယ်တို့ စကားပြောကာ အတူတကွ လျှောက်သွားသည်ကို မြင်လျှင် ခရမ်းရင့်ကောင်းကင်နန်းတော်မှ လူများသည် ပို၍ပင် မနာလိုစွာနှင့် ကြည့်နေကြပေတော့သည်။

ဒါက ...

သူတို့က အချင်းချင်း ချစ်မြတ်နိုးနေကြသည်လား။

'ဗြဟ္မာ့သန့်စင်ကောင်းကင်က နံပါတ်တစ် နတ်မိမယ်က ရီဖူရှင်းနဲ့ ချစ်ကျွမ်းဝင်နေတယ်လို့ ကျုပ်တို့ကို မပြောနဲ့နော်' ဟု သူတို့က တွေးလိုက်ကြသည်။

ထိုသည်က မဖြစ်သင့်ပေ။ သူမသည် ကောင်းကင်အာဏာစက် ပြည်ထောင်၏ အိမ်ရှေ့စံကိုပင် မည်သည့် စိတ်ကူးမှ မရှိခဲ့ပေ။ ရီဖူရှင်းက ထူးချွန်သည်ဟု ဆိုလျှင်ပင် ချင်းဟယ်က သူ့ကို သဘောကျသွားရလောက်အောင် ပြုလုပ်နိုင်သည်ထိ ထူးချွန်မှုက မလုံလောက်သေးပေ။

များပြားလှသည့် လူများသည် ကောင်းကင်အာဏာစက် ပြည်ထောင်၏ တန်ခိုးရှင်များ လေထဲဖြတ်ကာ ခရီးသွားနေသည့် နေရာသို့ ကြည့်ကာ လူအများက ကြည့်လိုက်ကြသည်။

ကောင်းကင်အာဏာစက် ပြည်ထောင်၏ အိမ်ရှေ့စံသည်လည်း လူအုပ်ထဲတွင် ရှိနေသည်။ သူက ချင်းဟယ်ကို ကြည့်လိုက်ပြီး မျက်လုံးများက ကျဉ်းမြောင်းသွားသည်။ သို့သော် ထိုသည်က ဗြဟ္မာ့သန့်စင်ကောင်းကင်၏ အရေးကိစ္စပင် သူက မည်သို့မှ လုပ်နိုင်ခြင်း မရှိပေ။

သူက ရှေ့သို့ ကောင်းကင်အာဏာစက် ပြည်ထောင်၏ တန်ခိုးရှင်များကို ဦးဆောင်ကာ ထွက်ခွာသွားသည်။

ကြီးမားသော လူအုပ်ကြီးက လူစုခွဲသွားခဲ့သည်။ လူအားလုံးက ပြန်သွားကြပြီး ခရမ်းရင့်ကောင်းကင်နန်းတော်တွင် ဖြစ်ခဲ့သည့် သတင်းများကလည်း ပျံ့နှံ့သွားခဲ့၏။

လူအများအနေနှင့် ခန့်မှန်းနေကြသည်မှာ ရီဖူရှင်းသည် တိုက်ပွဲတစ်ခုတွင် ခရမ်းရင့်ကောင်းကင်နန်းတော်၏ မဟာလမ်းစဉ် အထွတ်အထိပ် ခန္ဓာပိုင်ရှင်ကို ရှုံးနိမ့်စေခဲ့သူ တစ်ဦးအဖြစ် ချက်ချင်းပင် လူအများ၏ စိတ်ဝင်စားမှုကို ဖြစ်ပေါ်စေခဲ့သည်။

မကြာခင်၌ သူ၏ အမည်က ကောင်းကင်အာဏာစက်ဘုံ၏ အနောက်ဘက်အပိုင်းတွင် ကျော်ကြားလာကာ အခြားဘုံများဆီသို့ပင် ပျံ့နှံ့သွားသည်။

အထူးသဖြင့် တောင်ပိုင်းဒေသတွင် သတင်းက အလွန် လျင်မြန်စွာ ပျံ့နှံ့သွားခဲ့သည်။ အကြောင်းမှာ ခရမ်းရင့်ကောင်းကင်နန်းတော်မှ ထွက်ခွာလာကြသည့် တန်ခိုးရှင်များသည် ကောင်းကင်နတ်တံခါးဂိုဏ်းဆီသို့ ဦးတည်နေသောကြောင့် ဖြစ်လေသည်။

ကောင်းကင်နတ်တံခါးဂိုဏ်းသည် ကောင်းကင်အာဏာစက်ဘုံ၏ တောင်ဘက်ပိုင်းတွင် တည်ရှိပြီး Vast Heaven of South ဟု ကျော်ကြားသည်။

ကောင်းကင်နတ်တံခါးဂိုဏ်း၏ လက်အောက်တွင် ဟောက်ထျန်းမြို့ ရှိသည်။ ကောင်းကင်နတ်တံခါးဂိုဏ်း၏ အစွမ်းထက်ဆုံး ဂိုဏ်းခွဲလေးများ မိသားစုများမှာ ကောင်းကင်အာဏာစက်ဘုံ တောင်ဘက်ပိုင်းရှိ ဤကြီးမားလှသော အဓိကမြို့တွင် စုရုံးနေထိုင်ကြသည်။ ထို့ပြင် အစွမ်းထက်ဆုံး ကျင့်စဉ်နည်းလမ်းများနှင့် ရှေးဟောင်းတေးသွား တို့ကို ဤနေရာ၌ ထိန်းသိမ်းထားလေသည်။

ကောင်းကင်နတ်တံခါးဂိုဏ်းသည် မျိုးဆက်ပေါင်းများစွာ တည်တံ့ခဲ့ခြင်း ဖြစ်သည်။ အခြားသော အင်အားစုများနှင့်မတူဘဲ သူတို့သည် ကောင်းကင်နတ်တံခါးဂိုဏ်းကို အစွမ်းထက်ဆုံး အရည်အချင်းအရှိဆုံး လူများကသာ အုပ်စိုးသင့်သည်ဟု ယုံကြည်ကြသည်။

ကောင်းကင်နတ်တံခါးဂိုဏ်းသည် ဟောက်ထျန်းမြို့တစ်မြို့လုံးပင် ဖြစ်သည်။ သူတို့တွင် ထူးထူးခြားခြား ညွှန်းဆိုစရာ သီးခြားကလန်များ မရှိပေ။

ဥပမာဆိုရလျှင် အခြားသော မိသားစုအင်အားစုများမှ အထွတ်အထိပ် အဆင့်သို့ ရောက်သည့်အခါ သူတို့သည် ကောင်းကင်နတ်တံခါးသို့ ဝင်ရောက်ရန် အခွင့်အရေး ရလိမ့်မည် ဖြစ်ကာ ကောင်းကင်နတ်တံခါးစာမေးပွဲကို ဖြေဆိုခွင့်ရှိသည်။ သူတို့သာ ကျော်ဖြတ်နိုင်ပါက သူတို့က ကောင်းကင်နတ်တံခါးဂိုဏ်းသို့ ဝင်ရောက်ကာ ဂိုဏ်း၏ အကြီးအကဲများထဲမှ တစ်ယောက် ဖြစ်လာပေလိမ့်မည်။

တူညီစွာပင် ကောင်းကင်နတ်တံခါးဂိုဏ်းမှ ကလန်တစ်ခုသည် အားနည်း ဆုတ်ယုတ်လာလျှင် ကောင်းကင်နတ်တံခါးဂိုဏ်း၌ နေထိုင်ရန် အရည်အချင်း ပြည့်မီတော့မည် မဟုတ်ပေ။

ထိုသို့သော ပတ်ဝန်းကျင် အခြေအနေမျိုးသည် ကောင်းကင်နတ်တံခါးဂိုဏ်းကို နှစ်ပေါင်းများစွာ အောင်မြင်ကျော်ကြားအောင် လုပ်ဆောင်ပေးပေသည်။

ဟောက်ထျန်းမြို့တွင်လည်း မရေတွက်နိုင်သည့် အစွမ်းထက် မိသားစုအင်အားစုများစွာ ရှိပေသည်။ အားလုံးသော ကလန်တို့သည် တိုးတက်လာစေရန် အဆက်မပြတ် ကြိုးစားနေကြပြီး တစ်နေ့တွင် ကောင်းကင်နတ်တံခါးသို့ ခြေချနိုင်၍ ကောင်းကင်နတ်တံခါး၏ အကြီးအကဲများထဲမှ တစ်ဦးဖြစ်လာရန် မျှော်လင့်နေကြပေသည်။

ထို့ကြောင့် ဟောက်ထျန်းမြို့တွင် နေရာတစ်နေရာ ရရှိရန်မှာ အလွန် ခက်ခဲသော ကိစ္စဖြစ်သည်။

ထိုသို့သော ပတ်ဝန်းကျင်တွင် ဟောက်ထျန်းမြို့နှင့် ကောင်းကင်အာဏာစက် ပြည်ထောင်၏ နေပြည်တော်သည် ကောင်းကင်အာဏာစက်ဘုံတွင် အားအကောင်းဆုံးမြို့နှစ်မြို့ ဖြစ်ပြီး ခရမ်းရင့်ကောင်းကင်နန်းတော်၏ မိုးကြိုးပြစ်ဒဏ်မြို့၊ ဗြဟ္မာ့သန့်စင်ကောင်းကင်၏ အဓိကမြို့များနှင့် ထောင်ချီနတ်တောင်တို့က ယင်းမြို့နှစ်မြို့ထက် အားနည်းသည်ဟု ယူဆကြပေသည်။

ရီဖူရှင်းသည် ဟောက်ထျန်းမြို့သို့ ရောက်သည့်တိုင်အောင် ကောင်းကင်နတ်တံခါး ဂိုဏ်းအကြောင်း အများအပြားမသိသေးပေ။ သူက ဤ ကောင်းကင်နတ်တံခါးဂိုဏ်းတွင် ထိုသို့ ယှဉ်ပြိုင်မှု ပြင်းထန်သော စနစ်တစ်ခုကို ကျင့်သုံးလိမ့်မည်ဟု မမျှော်လင့်ခဲ့ပေ။ ဂူကလန်သည် ထိုအချိန်များကို ဖြတ်သန်း၍ အထွတ်အထိပ်သို့ ရောက်ရှိခဲ့ခြင်း ဖြစ်ပေမည်။.

သို့ဆိုလျှင်ပင် ဂူထျန်းရှင်းနှင့် ကောင်းကင်နတ်တံခါးက ပူးပေါင်း၍ ဂူကလန်ကို စွန့်ပစ်ရန် ပူးပေါင်းခဲ့သည်မှာ ဂူထျန်းရှင်းက လိပ်ပြာမသန့်သလို ခံစားရသောကြောင့် ဖြစ်နိုင်သလား။

အဆုံးမှာတော့ ဂူကလန်သည် ကောင်းကင်နတ်တံခါးဂိုဏ်းကို အပြည့်အဝ ကိုယ်စားပြုရန် မထိုက်တန်ခဲ့သည့်အပြင် သူသည် ကောင်းကင်နတ်တံခါးဂိုဏ်းကို အခက်အခဲအတွင်းသို့ တွန်းပို့လုနီးပါး ဖြစ်ခဲ့ပေသည်။

ယခု ခရမ်းရင့်ကောင်းကင်နန်းတော်နှင့် ကောင်းကင်အာဏာစက် ပြည်ထောင်သည် ကောင်းကင်နတ်တံခါးဂိုဏ်းသို့ ရောက်လာမည့် သတင်းကို ဖြန့်ဝေခဲ့သည်။ ထိုသတင်း ပျံ့နှံ့သွားပြီးနောက်၌ ဟောက်ထျန်းမြို့သည် များစွာ ထိတ်လန့် တုန်လှုပ်သွားခဲ့ပေသည်။

ကောင်းကင်နတ်တံခါးဂိုဏ်းမှ လူများသည် ဂူတုံးလျှို ပြန်လာခြင်းအပေါ်၌ မတူညီသည့် သဘောထား အမျိုးမျိုး ရှိနေခဲ့သည်။ အချို့သော လူများကတော့ ဂူထျန်းရှင်းသည် သူ့ကို ပြိုင်ဘက်ကင်း တန်ခိုးရှင်တစ်ဦးအဖြစ် ဖန်တီးခဲ့သည်ဟု မျှော်လင့်နေကြသော်လည်း အချို့သော သူများကတော့ သူသည် ကောင်းကင်နတ်တံခါးဂိုဏ်းကို မုန်တိုင်းအလယ်သို့ တစ်ဖန်တွန်းပို့လိမ့်မည်ဟု တွေးနေကြပေသည်။

ထိုအချိန်၌ ဟောက်ထျန်းမြို့၏ နန်းတော်အတွင်းတွင် သာယာငြိမ့်ညောင်းသည့် တေးသွားက ချိုမြိန်ပြီး ရှင်းလင်းစွာဖြင့် ထွက်ပေါ်လာနေသည်။ တေးသွားပြောင်းလဲမှု အတက်အကျသည် လေထုအတွင်း နတ်ဘုရားအရှိန်အဝါများ ဖုံးလွှမ်းနေကာ မယုံကြည်နိုင်ဖွယ်ပင် ဖြစ်သည်။

နန်းတော်အတွင်းတွင် ရီဖူရှင်းသည် မျက်လုံးမှိတ်ကာ တိတ်ဆိတ်စွာ နားထောင်နေသည်။ သူနှင့် မနီးမဝေးတွင် ပြစ်မျိုးမှဲ့မထင်လှပသည့် အမျိုးသမီးတစ်ဦးက ရှေးဟောင်းကု့ချင်းကို တီးခတ်နေ၏။ သူမ၏ လက်ချောင်းများက သေးသွယ်ကာ အပြစ်အနာအဆာကင်းသည့် လက်ကလေးများက ကောင်းကင်ဘုံမှ ပေးသော လက်ဆောင်သဖွယ် သူမကဲ့သို့ ပြီးပြည့်စုံနေသည်။

သူမ၏ ပျော့ပျောင်း သေးသွယ်သော လက်ချောင်းများအောက်တွင် ဂီတသင်္ကေတများဖြင့် သံစဉ်လှိုင်းတို့က စီးမျောနေကာ စွမ်းအားအပြည့်နှင့် တေးသံသာက သူ့ကို ကျေနပ်စေသော ခံစားမှုကို ပေးစွမ်း၏။

ကု့ချင်းတေးသံသည် ဖြည်းညင်းစွာ ရပ်တန့်သွားသည်။ ချင်းဟယ်သည် သူမ၏ သေးသွယ်သော လက်များကို ပြန်ရုပ်ကာ ရီဖူရှင်းအား ပြုံးကာ ကြည့်လိုက်သည်။ “ဘယ်လိုထင်လဲ သခင်လေးရီ”

“တကယ့်ကို ပြီးပြည့်စုံတဲ့ တေးသွားပါပဲ” ရီဖူရှင်းက ပြုံး၍ ပြန်ဖြေလိုက်သည်။ သူတို့သည် ခရီးအတူသွားပြီးနောက် ရင်းနှီးလာပေသည်။

သို့သော်လည်း သူသည် ချင်းဟယ်၏ ရည်ရွယ်ချက်ကို ဖော်ထုတ်ရန်မှာ အလှမ်းကွာနေသေးကာ သူမကလည်း မည်သည့်အရာကိုမှ ဖော်ပြခဲ့ခြင်းမရှိပေ။

ထိုသည်က ရီဖူရှင်းကို ပဟေဠိဖြစ်နေစေသည်။

သူတို့က ရင်းနှီးလာသော်လည်း သူမသည် ထူးဆန်းသည့် လူတစ်ယောက်ကဲ့သို့ ဖြစ်နေဆဲပင် ဖြစ်သည်။ ချင်းဟယ်သည် အလွန်ပြီးပြည့်စုံကာ စင်းလုံးချော ဖြစ်နေသည်။ သူက သူမအား ဖြတ်ကာ မမြင်နိုင်ပေ။

“အခုလို မှတ်ချက်ပေးတဲ့အတွက် ကျေးဇူးတင်ပါတယ် သခင်လေးရီ။ ကျွန်မက ကု့ချင်းတီးတာ သိပ်မကောင်းပါဘူး။ ကျွန်မအတွက်တော့ တူရိယာတီးခတ်တယ် ဆိုတာက ကျွန်မရဲ့ စိတ်ဝိညာဉ်ကို ငြိမ်းအေးစေပြီး ခန္ဓာကိုယ်ကို အနားယူဖို့ပါ။ အဲဒါက ကျင့်ကြံခြင်းအတွက် အကျိုးကျေးဇူးရှိစေတာမို့ နှစ်အနည်းငယ်လောက် လေ့ကျင့်ထားရုံပါ” ချင်းဟယ်က ပြုံးကာ ပြောလိုက်သည်။

“နတ်မိမယ်က နှိမ့်ချနေတာပဲ” ရီဖူရှင်းက ပြောလိုက်သည်။

“သခင်လေးရီ .... ဒီတိုင်း ကျွန်မနာမည်ကိုပဲ ခေါ်ပါ။ နတ်မိမယ်ဆိုတာကြီးက နည်းနည်း ထူးဆန်းနေတယ်” ချင်းဟယ်က အပြုံးတစ်ပွင့်နှင့် ပြောလိုက်သည်။

“နတ်မိမယ်ချင်း” ရီဖူရှင်းက ရယ်မောကာ ပြောလိုက်သည်။ ချင်းဟယ်က ခါးသက်စွာ ပြုံးရင်း သူမ၏ ခေါင်းကိုသာ ယမ်းလိုက်လေသည်။

ထိုအချိန်တွင် ဗြဟ္မာ့သန့်စင်ကောင်းကင်မှ တန်ခိုးရှင်တစ်ဦး ဝင်ရောက်လာကာ ပြောလိုက်သည်။ “ဟောက်ထျန်းမြို့ ဝမ်ကလန်က ခွင့်ပြုချက် တောင်းခိုင်းလိုက်ပါတယ်။ ဝမ်ယန်ပင်းက လာလည်ပါမယ်တဲ့”

“ဝမ်ယန်ပင်း” ချင်းဟယ်က ရေရွတ်လိုက်သည်။ သိသာစွာပင် သူမသည် ထိုနာမည်အား ကြားဖူးပေသည်။

ဝမ်ကလန်သည် ဟောက်ထျန်းမြို့တွင် အတော်လေး ကျော်ကြားမှုရှိသည်။ လွန်ခဲ့သည့် နှစ်ပေါင်းများစွာကပင် သူတို့သည် ကောင်းကင်နတ်တံခါးဂိုဏ်းတွင် နေထိုင်ခဲ့ပြီး ကောင်းကင်နတ်တံခါး၏ ပင်မထောက်တိုင် မိသားစုများထဲမှ တစ်ခု ဖြစ်သည်။ ထို့နောက် သူတို့က ကောင်းကင်နတ်တံခါးမှ ထွက်ခွာသွားကြ၏။ ထို အလွန်ရှေးကျသည့် အစွမ်းထက် ကလန်တစ်ခုသည် နက်ရှိုင်းသည့် အခြေခံအုတ်မြစ်နှင့် နှစ်ပေါင်းများစွာ ကျဆင်းသွားခဲ့သည်ဟု ပြောနိုင်သည်။

ထိုသည်ကို ပြောရလျှင် ယခုနှစ်များအတွင်း ဝမ်ကလန်က စတင် ရှင်သန်လာခဲ့သည်။ ကလန်အတွင်းမှ များပြားလှသည့် တန်ခိုးရှင်များသည် ကောင်းကင်နတ်တံခါးသို့ ပြန်လည် ဝင်ရောက်လိုသည်ဟု ထင်မှတ်ရသည်။

ထို့ပြင် ဟောက်ထျန်းမြို့၏ ရန်ဟောင်အဆင့်အောက် နံပါတ်တစ်ပုဂ္ဂိုလ်မှာ ဝမ်ကလန်၏ မျိုးဆက် ဝမ်ယန်ပင်း ဖြစ်သည်။ ကောလာဟလများက ပြောကြသည်မှာ သူက အလွန် အရည်အချင်းရှိပြီး ကောင်းကင်နတ်တံခါးမှ ပုဂ္ဂိုလ်ကြီးများပင်လျှင် သူ့ကို မရိုက်နိုင်ဟူ၍ ဖြစ်သည်။ မကြာခင်တွင် သူသည် ဝမ်ကလန်ကို အထွတ်အထိပ်သို့ ရောက်အောင် လုပ်ဆောင်ပေးနိုင်သည့် နောက်ထပ် ပုဂ္ဂိုလ်တစ်ဦး ဖြစ်လာပေလိမ့်မည်။

သူတို့ ဟောက်ထျန်းမြို့သို့ ရောက်ရှိလာသည်မှာ လျှို့ဝှက်ချက် မဟုတ်သည့်အတွက် သူက လာလည်ရန် ခွင့်တောင်းခဲ့ခြင်း ဖြစ်သည်။

***