ဝိညာဉ်တိမ်တိုက်ဆန်းကြယ်ဘုံနဲ့ ယုရွှယ်လန်

ကောင်းကင်ဘုံဉာဏ်အလင်းပြကြေးမုံကိုယ်ပွားကနေတစ်ဆင့် ချီမင်က ပါဝင်သူအားလုံးရဲ့ လှုပ်ရှားမှုတွေကို ရှင်းရှင်းလင်းလင်း မြင်နေရတယ်။ သက်ဆိုင်တဲ့အချက်အလက်တွေ ရပြီးတော့ သူတို့တွေက ထူထပ်တဲ့တောအုပ်ထဲကို အမြန်ဆုံး ပြေးဝင်သွားကြတယ်။

တစ်ခုသိထားရမှာက၊ ကောင်းကင်ဘုံဉာဏ်အလင်းဂိုဏ်းရဲ့ နယ်မြေထဲမှာ၊ တောင်တန်းတွေနဲ့ အမျိုးအစားမတူတဲ့သားရဲရိုင်းတွေရှိကြတယ်။ နတ်ဆိုးသားရဲတွေနဲ့လူပုံစံပြောင်းနိုင်တဲ့အထိ ကျင့်ကြံပြီးသား နတ်ဆိုးတွေတောင် ရှိသေးတယ်။

သေချာတာကကောင်းကင်ဘုံဉာဏ်အလင်းဂိုဏ်းစု ဝေးပွဲစတင်တော့၊ အင်အားကြီးတဲ့ နတ်ဆိုးသားရဲတွေကို ကောင်းကင်ဘုံဉာဏ်အလင်းဂိုဏ်းစုဝေးပွဲရဲ့ နယ်နိမိတ်အတွင်းမှာ ကန့်သတ်ထားပြီးသားဖြစ်တယ်။။ ဒီပါဝင်သူတွေက သူတို့မတွန်းလှန်နိုင်တဲ့ နတ်ဆိုးသားရဲတွေနဲ့ တွေ့မှာကိုတော့ စိတ်ပူစရာမလိုဘူး။

ဒါပေမဲ့၊ အင်အားနည်းတဲ့ နတ်ဆိုးသားရဲတချို့တောင် သာမန်လူတွေအတွက် ကိုင်တွယ်ရလွယ်တဲ့အရာတွေ မဟုတ်ဘူး။

အဲ့ဒီအချိန်မှာ ချီမင်က ပါဝင်သူအားလုံးကို အရာအားလုံးကိုမြင်နိုင်တဲ့အမြင်နဲ့ ကြည့်နေတယ်။

ဒါက သူ့ကိုခမ်းနားကြီးကျယ်တဲ့ တိုက်ပွဲကြီးတစ်ခုကို ကြည့်နေရသလိုဖြစ်တယ်။

ဝေါင်း!

သားရဲဟိန်း‌ဟောက်သံတွေ!

တောအုပ်တစ်ခုထဲမှာ၊ ခေါင်းနှစ်လုံးပါတဲ့ ကျားကြီးတစ်ကောင် ပေါ်လာတယ်။ ဒါက ကောင်းကင်ဘုံဉာဏ်အလင်းဂိုဏ်းမှာ အရမ်းတွေ့ရများတဲ့ သာမန်နတ်ဆိုးတစ်ပိုင်းသားရဲပဲဖြစ်တယ်။ ဒါက ချီသန့်စင်ခြင်းပထမအဆင့်ကိုတောင် မရောက်သေးဘဲ၊ မျိုးရိုးဗီဇပြောင်းလဲမှုတစ်ခုလို့ပဲ သတ်မှတ်နိုင်တယ်။

“ခေါင်းနှစ်လုံးကျား!”

“အမလေး...”

“ဒီလောက်ကြောက်စရာကောင်းတဲ့ သားရဲနဲ့ ဘယ်လိုများ ဒီလောက်မြန်မြန်တွေ့ရတာလဲ?”

“ဘယ်လိုလုပ်ကြမလဲ?”

“သတိထားကြ။”

လူတိုင်း အံ့ဩတကြီး အော်လိုက်ကြတယ်။

ချီမင်ရဲ့အမြင်မှာတော့၊ ဒီခေါင်းနှစ်လုံးကျားကို အသက်တစ်ချက်ရှူရုံနဲ့ သတ်ပစ်နိုင်ပေမယ့်၊ ဒီသေမျိုးလူသားတွေရဲ့မျက်စိထဲမှာတော့ ဒါက ကြောက်စရာကောင်းတဲ့ သားရဲရိုင်းကြီးတစ်ကောင်ပဲဖြစ်တယ်။

ဝေါင်း!

ခေါင်းနှစ်လုံးကျားက အနံ့ဆိုးတွေနဲ့အတူ သူတို့ဆီကို ခုန်အုပ်လိုက်တယ်။

“တိုက်!”

ချက်ချင်းပဲ၊ သွက်လက်တဲ့ပုံရိပ်တချို့ ပြေးထွက်လာတယ်။ သူတို့က ချွန်ထက်တဲ့လက်နက်တွေ ကိုင်ထားပြီး သိုင်းကွက်တွေသုံးပြီး တိုက်ခိုက်မှုတွေဆက်တိုက်ဖြစ်ပြီးတဲ့နောက်ဒီခေါင်းနှစ်လုံးကျားကို သတ်နိုင်လိုက်တယ်။

“ဒါတွေက သေမျိုးသိုင်းသမားတွေပဲ။”

ချီမင်က ဒါကိုမြင်တော့ နည်းနည်းစိတ်ဝင်စားသွားတယ်။ ဒါကြောင့် သူက သေသေချာချာလေ့လာဖို့ ကောင်းကင်ဘုံဉာဏ်အလင်းပြကြေးမုံကိုယ်ပွားကိုသုံးပြီး သိုင်းသမားတွေရဲ့ လျှို့ဝှက်ချက်အားလုံးကို စူးစမ်းကြည့်လိုက်တယ်။

“သာမန်သိုင်းသမားတွေက သူတို့ရဲ့သွေးနဲ့ ချီစွမ်းအင်ကို လေ့ကျင့်ဖို့ လျှို့ဝှက်ကျမ်းစာတွေကို ကျင့်ကြံကြတယ်။ သူတို့က ခန္ဓာကိုယ်ထဲမှာ အတွင်းအားကို စုစည်းပြီး သူတို့ရဲ့ မရီတျန်ရှစ်ခုကို ဆက်သွယ်ကြတယ်။”

ချီမင်က ပြောတယ်၊ “ဒါကို မွေးပြီးစအဆင့် နဲ့ မွေးရာပါအဆင့် ဆိုပြီး ခွဲထားတယ်။”

“မွေးရာပါအဆင့်သိုင်းသမားတွေက အမြင့်ဆုံးအဆင့်ကို ရောက်နေပြီ။ သူတို့က မရီတျန်ရှစ်ခုနဲ့ သွေးကြောလမ်းကြောင်းဆယ့်နှစ်ခုလုံးကို ဖွင့်ပြီးသွားပြီ။ သူတို့က ကောင်းကင်နဲ့မြေကြီးရဲ့ ဝိညာဉ်စွမ်းအင်နဲ့ အပြန်အလှန်ဆက်သွယ်နိုင်ပြီး သေမျိုးသိုင်းသမားတစ်ယောက်ရဲ့ အမြင့်ဆုံးအဆင့်ကို ရောက်နိုင်တယ်။”

“တကယ်တော့၊ မွေးရာပါအဆင့်သိုင်းသမားတွေက ချီသန့်စင်ခြင်းပထမအဆင့်နဲ့ပဲ ညီမျှတယ်။”

“မွေးပြီးစအဆင့်မှာတော့၊ ဖွင့်ထားတဲ့ မရီတျန်အရေအတွက်နဲ့ အတိုင်းအတာပေါ်မူတည်ပြီး ခွဲထားတယ် - အောင်မြင်မှုအသေးစားမွေးပြီးစအဆင့်၊ အောင်မြင်မှုအကြီးစားမွေးပြီးစအဆင့်၊ ပြီးတော့ ပြီးပြည့်စုံမှုမွေးပြီးစအဆင့် ဆိုပြီးရှိတယ်။”

“တခြားတစ်ဖက်မှာတော့၊ မွေးရာပါအဆင့်ကို ရောက်နေတဲ့ ပါဝင်သူတွေ အများကြီးရှိတယ်။ သူတို့အများစုက လှည့်လည်သွားလာတဲ့ ကျင့်ကြံသူတွေရဲ့ မျိုးဆက်တွေ၊ ကျင့်ကြံသူမိသားစုက တပည့်တွေ၊ ဒါမှမဟုတ် ဧကရာဇ်ရဲ့ ဆွေမျိုးတွေပဲ။”

အချိန်တွေ တဖြည်းဖြည်းကုန်လွန်သွားတယ်။

ကောင်းကင်ဘုံဉာဏ်အလင်းဂိုဏ်းစု‌ဝေးပွဲက တရားဝင်စတင်နေပြီ။ ပါဝင်သူအားလုံးက စမ်းသပ်မှုကို ခံယူနေကြတယ်။ ဝိညာဉ်တိမ်တိုက်ဆန်းကြယ်ဘုံဆီသွားတဲ့ခရီးကလည်း သူတို့အတွက် ပုံစံတစ်မျိုးနဲ့ စမ်းသပ်မှုတစ်ခုပဲဖြစ်တယ်။

“မင်းတို့သွားသင့်ပြီ။”

အဲ့ဒီအချိန်မှာ လုချင်းယန်က အပြင်စည်းဂိုဏ်းအကြီးအကဲဆယ့်နှစ်ယောက်ကို ညွှန်ကြားလိုက်တယ်။

“ဟုတ်ကဲ့။”

“…”

တိမ်စိမ်းတောင်ထွတ်ရဲ့ အပြင်စည်းဂိုဏ်းအကြီးအကဲဆယ့်နှစ်ယောက်က ခေါင်းညိတ်ပြီး ကောင်းကင်ပေါ်ကို ပျံတက်သွားကြတယ်။ သူတို့က သင်္ဘောပေါ်ကနေ ထွက်ခွာပြီးဟင်းလင်းပြင်လမ်းကြောင်းထဲ ဝင်ရောက်သွားကြတယ်။ သူတို့အားလုံး တခြားနေရာဆီ ပို့ဆောင်ခံလိုက်ရတယ်။

“သူတို့ ဘယ်သွားကြတာလဲ?” ချီမင်က မေးလိုက်တယ်။

“ကောင်းကင်ဘုံဉာဏ်အလင်းဂိုဏ်းစုဝေးပွဲက စီစဉ်မှုတွေအများကြီးလုပ်ထားပြီး မတော်တဆမှုတွေ ဘာမှဖြစ်မှာမဟုတ်ပေမယ့်၊ ကြိုတင်ကာကွယ်တဲ့အနေနဲ့၊ တောင်ထွတ်ဆယ့်နှစ်ခုက အပြင်စည်းဂိုဏ်းအကြီးအကဲတွေကဟင်းလင်းပြင်ဖြတ်လမ်းကြောင်းကိုသုံးပြီးဆန်းကြယ်ဘုံငါးခုရဲ့ နေရာအနှံ့ကိုသွားပြီး မမျှော်လင့်ထားတဲ့အခြေအနေတစ်ခုခုဖြစ်ခဲ့ရင် ကာကွယ်ပေးကြလိမ့်မယ်။” လုချင်းယန်က ရှင်းပြတယ်။

“နားလည်ပါပြီ။” ချီမင်က ခေါင်းညိတ်လိုက်တယ်။

တခြားတောင်ထွတ်ဆယ့်တစ်တောင်ရဲ့ သင်္ဘောတွေပေါ်မှာတော့၊ စုစုပေါင်း အပြင်စည်းဂိုဏ်းအကြီးအကဲ ၁၃၂ ယောက်က သင်္ဘောပေါ်ကနေ ထွက်ခွာပြီး ဟင်းလင်းပြင်ဖြတ်လမ်းကြောင်းကနေတစ်ဆင့် ဆန်းကြယ်ဘုံငါးခုရဲ့ နေရာအနှံ့ဆီ ပို့ဆောင်ခံလိုက်ရတယ်။

ဒီကောင်းကင်ဘုံဉာဏ်အလင်းဂိုဏ်းစု‌ဝေးပွဲရဲ့ဆန်းကြယ်ဘုံကြီးငါးခုက သဘာဝအတိုင်းဖြစ်ပေါ်လာတာမဟုတ်ဘူး။ အဲဒီအစား၊ ဒါတွေက ကောင်းကင်ဘုံဉာဏ်အလင်းဂိုဏ်းရဲ့ အကြီးအကဲတွေက ဒီကောင်းကင်ဘုံဉာဏ်အလင်းဂိုဏ်းစု‌ဝေးပွဲအတွက် အထူးဖွင့်လှစ်ထားတဲ့ ဆန်းကြယ်ဘုံတွေဖြစ်တယ်။

ချက်ချင်းပဲ၊ တောင်ထွတ်အသီးသီးက အမွေခံတပည့်တွေနဲ့ အတွင်းစည်းဂိုဏ်းအကြီးအကဲတွေကလည်း သင်္ဘောပေါ်ကနေ ထွက်ခွာသွားကြတယ်။ သူတို့က ကောင်းကင်ဘုံဉာဏ်အလင်းဂိုဏ်းမြို့ထဲက တောင်ထွတ်အသီးသီးရဲ့ ခံတပ်တွေထဲ ဝင်ရောက်ပြီး စမ်းသပ်မှုရဲ့အခြေအနေနဲ့ မြင်ကွင်းကို စောင့်ကြည့်ကြတယ်။

သူတို့ သဘောကျတဲ့သူတွေ့ရင်၊ ကောင်းကင်ဘုံဉာဏ်အလင်းဂိုဏ်းစုဝေးပွဲပြီးဆုံးသွားတဲ့အခါ တိုက်ရိုက်တပည့်အဖြစ် လက်ခံနိုင်တယ်။

တိမ်စိမ်းခံတပ်ထဲမှာတော့၊ ချီမင်၊ လုချင်းယန်၊ ထန်ချန်လင်း၊ နဲ့ ချီချင်းတို့ကတိမ်စိမ်းခံတပ်ရဲ့ ထိပ်ဆုံးမှာ ထိုင်နေကြတယ်။ သူတို့က ခေါင်းမော့ပြီး ကောင်းကင်ဘုံဉာဏ်အလင်းပြကြေးမုံကပြနေတဲ့ မြင်ကွင်းကို ကြည့်နေကြတယ်။

တခြားတောင်ထွတ်ဆယ့်တစ်တောင်မှာတော့၊ သူတို့ကလည်း စစ်ဆေးမှုမြင်ကွင်းကို တိတ်တဆိတ်စောင့်ကြည့်နေကြတယ်။

“ဒီကောင်းကင်ဘုံဉာဏ်အလင်းဂိုဏ်းစု‌ဝေးပွဲမှာ တိုက်ရိုက်အမွေခံတပည့်ဖြစ်လာနိုင်မယ့် ထူးချွန်ပြောင်မြောက်တဲ့ ပါရမီရှင်တစ်ယောက်ယောက်များ ပါလာမလား မသိဘူး။ တကယ်မျှော်လင့်နေတာ။”

“သေချာကြည့်နေလိုက်ပေါ့။”

“ပါလာရင်တောင်မှ၊တိမ်စိမ်းတောင်ထွတ်ကပဲ ခေါ်သွားလောက်တယ်။”

“အဲ့လိုချည်းတော့လည်း မဟုတ်လောက်ပါဘူး။”

“ကံတရားပေါ်လည်း မူတည်သေးတာကိုး။”

“…”

တောင်ထွတ်ဆယ့်တစ်တောင်က အတွင်းစည်းဂိုဏ်းအကြီးအကဲတွေက အသံလွှင့်ပြီး အပြန်အလှန်စကားပြောနေကြတယ်။

ချီမင်လည်း ဒါကို ကြားနိုင်တယ်။

အဲ့ဒီအချိန်မှာ၊ စစ်ဆေးမှုဧရိယာထဲမှာတော့၊ တိုက်ပွဲက စတင်နေပြီ။

ဒါ့အပြင်၊ တဖြည်းဖြည်းနဲ့ ပိုပြီးပြင်းထန်လာတယ်။

“အား!!!”

“ကယ်ကြပါ! ကျွန်တော့်ကိုမသတ်ကြပါနဲ့! ကျွန်တော့်ကိုမသတ်ကြပါနဲ့!”

“ငါက မြောက်ပိုင်းမြစ်က ချန်မိသားစုရဲ့ တိုက်ရိုက်မျိုးဆက်ကွ။ မင်းတို့ငါ့ကိုသတ်ရင်၊ ငါတို့ချန်မိသားစုက မင်းတို့ကို ဒီအတိုင်းထားမှာမဟုတ်ဘူး။ မင်းတို့ သေကိုသေရမယ်!”

“မဟုတ်ဘူး!”

“…”

အခြေအနေအမျိုးမျိုး ဖြစ်ပျက်နေတယ်။

တစ်ခုသိထားရမှာက၊ ကောင်းကင်ဘုံဉာဏ်အလင်းဂိုဏ်းစုဝေးပွဲကို သုံးနှစ်တစ်ကြိမ် ကျင်းပတယ်။

ဒါကဘာလို့လဲဆိုတော့ သုံးနှစ်တစ်ခါ၊ ကောင်းကင်ဘုံဉာဏ်အလင်းဂိုဏ်းရဲ့ တောင်ထွတ်ဆယ့်နှစ်ခုက အစေခံတပည့်အားလုံးက အပြင်စည်းဂိုဏ်းစစ်ဆေးမှုကို မအောင်မြင်နိုင်လို့ ဂိုဏ်းကနေ နှင်ထုတ်ခံရခြင်းဖြစ်တယ်။ သူတို့က အစေခံတပည့်အသစ်တွေ ထပ်ဖြည့်ဖို့လိုတယ်။

တောင်ထွတ်တစ်ခုချင်းစီမှာ အစေခံတပည့် ၅,၀၀၀ လောက်ရှိတာနဲ့ပေါင်းလိုက်ရင်၊ သူတို့က အစေခံတပည့် ၆၀,၀၀၀ ကို ကျိန်းသေလက်ခံမှာပဲ။

ဒါ့အပြင်၊ အရေအတွက်မသေချာတဲ့ အပြင်စည်းနဲ့ အတွင်းစည်းတပည့်တွေကိုလည်း ခေါ်ယူတယ်။

အမွေခံတပည့်တွေအတွက်ကတော့၊ ကောင်းကင်ဘုံဉာဏ်အလင်းဂိုဏ်းစုဝေးပွဲတိုင်းမှာ ပေါ်လာမယ်လို့ အာမမခံနိုင်ဘူး။

ဘယ်လိုပဲဖြစ်ဖြစ်၊ ပါဝင်သူ ၁,၈၀၉,၄၅၀ ယောက်ထဲမှာ၊ ၇၀,၀၀၀ ကနေ ၈၀,၀၀၀ လောက်ပဲ လက်ခံမှာ။ ကောင်းကင်ဘုံဉာဏ်အလင်းဂိုဏ်းစုဝေးပွဲမှာ လက်ခံခံရနိုင်ခြေက ၃၀% လောက်ပဲရှိတယ်။

ကောင်းကင်ဘုံဉာဏ်အလင်းပြကြေးမုံကိုယ်ပွားကနေတစ်ဆင့်၊ ချီမင်က စတင်ချိန်ကနေ နာရီဝက်ပဲကြာသေးပေမယ့်၊ လူ ၁၀,၀၀၀ သေဆုံးပြီး၊ ၃၀,၀၀၀ က တခြားပါဝင်သူတွေရဲ့လက်ချက်နဲ့ ကောင်းကင်ဘုံဉာဏ်အလင်းဂိုဏ်းတံဆိပ် အလုခံရပြီး ထုတ်ပယ်ခံလိုက်ရတာကို ရှင်းရှင်းလင်းလင်း သိနိုင်တယ်။

“ဘာလဲ?” ချီမင်က အံ့ဩမှုနဲ့ ရှုပ်ထွေးမှုအရိပ်အယောင်တွေ သူ့မျက်နှာပေါ်မှာပေါ်လာရင်း ညင်သာစွာရေရွတ်လိုက်တယ်၊ “နာရီဝက်ပဲရှိသေးတယ်၊ တစ်ယောက်ယောက်က ဝိညာဉ်တိမ်တိုက်ဆန်းကြယ်ဘုံထဲကို အောင်အောင်မြင်မြင် ဝင်သွားပြီတဲ့လား။”

“ဒီလောက်မြန်တာလား?” လုချင်းယန်လည်း နည်းနည်းအံ့ဩသွားတယ်။

“အမွေခံတပည့် ချီ၊ ကျွန်တော်တို့ကို အဲ့ဒီမြင်ကွင်းလေး ကြည့်ခွင့်ပေးနိုင်မလား?” အကြီးအကဲထန်က မေးလိုက်တယ်။

“ကောင်းပြီလေ။” ချီမင်က ခေါင်းညိတ်လိုက်တယ်။

ရှု!

သူက ညာလက်ကိုဝှေ့ယမ်းလိုက်ပြီး ကောင်းကင်ဘုံဉာဏ်အလင်းပြကြေးမုံကနေတစ်ဆင့် ပုံရိပ်ယောင်တစ်ခုအဖြစ် ပြောင်းလိုက်တယ်။ ဒါက အချင်းတစ်မီတာလောက်ရှိပြီး အပြင်ဘက်က ဗလာကြေးမုံကြီးနဲ့ယှဉ်ရင် အများကြီးသေးတယ်။

“ဒါက...”

မြင်ကွင်းထဲမှာ၊ သူ့မျက်စိရှေ့ရောက်လာတာက ဆွဲဆောင်မှုရှိတဲ့ကိုယ်လုံးကိုယ်ပေါက်၊ လှပတဲ့မျက်နှာနဲ့ အေးစက်တဲ့အငွေ့အသက်ရှိတဲ့ မိန်းကလေးချောချောလေးတစ်ယောက်ပဲ။ သူ့ခြေတံတွေက ရှည်လျားပြီးသွယ်လျတယ်ပြီး တော့ကျောက်စိမ်းလိုဖြူဖွေးနေတယ်။ သူ့ခါးက သွယ်လျပြီးနူးညံ့ပေမယ့် အားအင်တွေနဲ့ပြည့်နေတယ်။

သူ့အရှိန်က အရမ်းမြန်တယ်။ တောအုပ်ထဲမှာ ခုန်ပျံသွားနေတုန်း၊ သူက သေမျိုးလောကရဲ့ လှုပ်ရှားမှုသိုင်းကွက်ကိုသုံးတယ်ဆိုတာ သေချာတယ်။ သူ့အရှိန်က တခြားသူတွေထက်သာတယ်။

“မွေးရာပါအဆင့်သိုင်းသမားပဲ။”

ချီချင်းက ပြောတယ်၊ “သူမက ၁၆ နှစ်လောက်ရှိလောက်ပြီ။ ပြီးတော့ သူ့ရဲ့မွေးရာပါအတွင်းအားက တည်ငြိမ်ပြီး ခိုင်မာတယ်။ မတည်ငြိမ်တဲ့လက္ခဏာတွေ မရှိဘူး။ ဒါက သူက ဘာဝိညာဉ်ဆေးပင်မှမမှီဝဲဘဲ သူ့ရဲ့ပါရမီနဲ့ပဲ ၁၆ နှစ်အရွယ်မှာ မွေးရာပါအဆင့်သိုင်းသမားဖြစ်လာတယ်ဆိုတဲ့သဘောပဲ။”

“ဒီလိုပါရမီမျိုးနဲ့ဆိုရင်၊ သေမျိုးလောကမှာ၊ ထိပ်တန်းအဆင့်မှာ ပါဝင်ဖို့ လုံလောက်ပြီ။”

“အင်း။” ထန်ချန်လင်းက ခေါင်းညိတ်တယ်၊ “သူ့ရဲ့စွမ်းရည်ကို စစ်ဆေးမှုငါးခုနဲ့ မစမ်းသပ်ရသေးပေမယ့်၊ သူက အနည်းဆုံးတော့ အပြင်စည်းတပည့်၊ ဒါမှမဟုတ် အတွင်းစည်းတပည့်တောင် ဖြစ်နိုင်တယ်ဆိုတာ အတည်ပြုနိုင်တယ်။”

“သူက အမွေခံတပည့်ဖြစ်နိုင်မလားဆိုတာကတော့ မသေချာသေးဘူး။”

လုချင်းယန်က မေးတယ်၊ “ဂျူနီယာမောင်လေး၊ နင်ကောင်းကင်ဘုံဉာဏ်အလင်းပြကြေးမုံကိုသုံးပြီး ဒီကောင်မလေးရဲ့ နောက်ကြောင်းကို စုံစမ်းကြည့်လို့ရမလား?”

“ကျွန်တော် ကြိုးစားကြည့်မယ်။” ချီမင်က ပြောတယ်။

ဗြိန်း!

စိတ်ကူးလိုက်ရုံနဲ့၊ ချက်ချင်းပဲ၊ သူ့ရှေ့က ပုံရိပ်ယောင်ရဲ့ဘေးမှာ၊ သေးငယ်တဲ့ ပုံရိပ်ယောင်မျက်နှာပြင် တစ်ခုပေါ်လာတယ်။ ဒီ ပုံရိပ်ယောင်မျက်နှာပြင်ပေါ်မှာ၊ မိန်းကလေးအကြောင်းကို အသေးစိတ်အချက်ကျကျ ဖော်ပြထားတယ်။

“သူ့နာမည်က ယုရွှယ်လန် တဲ့။”

ချီမင်က ပြောတယ်၊ “၁၆ နှစ်။ တိမ်စိမ်းတောင်ထွတ်ရဲ့ အာဏာစက်အောက်က အန်းရှီတိုင်းပြည်ကလာတာ။ ပြီးတော့ သူက အန်းရှီတိုင်းပြည်မှာ တော်တော်နာမည်ကြီးတဲ့ ယုမြို့စားကြီးရဲ့သမီးပဲ။”

“အန်းရှီတိုင်းပြည်။”

လုချင်းယန်က ခဏစဉ်းစားပြီးတော့၊ “ယုမျိုးရိုးနာမည်နဲ့ မှူးမတ်မျိုးရှိလို့လား?”

“ဒါက...”

အကြီးအကဲထန်နဲ့ အကြီးအကဲချီတို့ တစ်ယောက်မျက်နှာတစ်ယောက်ကြည့်ပြီး ပြောကြတယ်၊ “ယုမျိုးရိုးနာမည်နဲ့ မြို့စားတွေတော့ ရှိပါတယ်။ ဒါပေမဲ့ လွန်ခဲ့တဲ့တစ်လက၊ ယုမြို့စားစံအိမ်က အစေခံတွေ၊ အလုပ်သမားတွေအပါအဝင် လူ ၃၅၈ ယောက်လုံး နတ်ဆိုးဂိုဏ်းရဲ့ တိုက်ခိုက်မှုကိုခံရပြီး တစ်ညတည်းနဲ့ အားလုံးအသတ်ခံလိုက်ရတယ်။”

“ရက်စက်လိုက်တာ။” ချီမင်က ပြောတယ်။

“ရက်စက်တယ်ဟုတ်လား?” လုချင်းယန်က ခေါင်းခါတယ်၊ “အဲ့ဒီရူး‌နေတဲ့နတ်ဆိုးဂိုဏ်းဝင်တွေက သေမျိုးတွေရဲ့အသက်ကို လုံးဝဂရုစိုက်မှာမဟုတ်ဘူး။ နတ်ဆိုးကျင့်ကြံ ရေးပစ္စည်းတွေ သန့်စင်ဖို့အတွက် လူအစုလိုက်အပြုံလိုက်သတ်ဖြတ်မှုတွေ အရင်ကလည်း ဖြစ်ခဲ့ဖူးတယ်။”

“ဒါကြောင့် ဒီယုရွှယ်လန်က မိဘမဲ့၊ မိသားစုပျက်စီးသွားတဲ့ ပါရမီရှင်တစ်ယောက်ပေါ့။ သူက နက်ရှိုင်းတဲ့အငြိုးအတေးကို သယ်ဆောင်ထားတဲ့ ပါရမီရှင်ပဲ။” ချီမင်က ပြောတယ်။

“ဖြစ်နိုင်တယ်။”

လုချင်းယန်နဲ့ တခြားသူတွေ ခေါင်းညိတ်ကြတယ်။

ချီမင်က နှုတ်ခမ်းသပ်လိုက်ပြီး၊ သူ့အကြည့်က ယုရွှယ်လန်ကို အကဲခတ်ရင်း စိတ်ထဲကနေ တိုးတိုးရေရွတ်နေတယ်၊ “ဒီလိုနောက်ခံနဲ့ ဒီလိုကြုံတွေ့မှုတွေက တကယ့်ဇာတ်လိုက်ကျော်တစ်ယောက်ရဲ့ ဇာတ်လမ်းလိုပဲ။”

အဲ့ဒီအချိန်မှာ၊ ယုရွှယ်လန်က ဝိညာဉ်တိမ်တိုက်ဆန်းကြယ်ဘုံရဲ့ဝင်ပေါက်ဆီ ရောက်နေပြီ။ ဒါက တောင်ထွတ်တစ်ခုပေါ်မှာရှိတဲ့ ဝဲဂယက်တံခါးတစ်ခုဖြစ်တယ်။

ရှု!

ယုရွှယ်လန်က ချီတုံချတုံမဖြစ်ဘဲ ဝိညာဉ်တိမ်တိုက်ဆန်းကြယ်ဘုံထဲ ဝင်ရောက်သွားတယ်။

နာရီအနည်းငယ်ကြာပြီးတဲ့နောက်မှာတော့၊ တစ်ယောက်ပြီးတစ်ယောက်၊ ပါဝင်သူတွေ ဝိညာဉ်တိမ်တိုက်ဆန်းကြယ်ဘုံထဲ ဝင်ရောက်လာကြတယ်။ ပထမအသုတ်ပါဝင်သူတွေက အများအားဖြင့် ကျင့်ကြံသူမိသားစုက တပည့်တွေ၊ လှည့်လည်သွားလာတဲ့ ကျင့်ကြံသူတွေရဲ့ မျိုးဆက်တွေ၊ ပြီးတော့ အင်ပါယာတွေနဲ့ တိုင်းနိုင်ငံတွေက ဧကရာဇ်တွေရဲ့ ဆွေမျိုးတွေပဲ။

ဒုတိယအသုတ်၊ တတိယအသုတ်...

ငါးနာရီကြာပြီးတဲ့နောက်မှာတော့၊ ဝိညာဉ်တိမ်တိုက်ဆန်းကြယ်ဘုံထဲ ဝင်နိုင်တဲ့ပါဝင်သူအားလုံး ဝင်ရောက်သွားကြပြီ။ မဝင်နိုင်တဲ့သူတွေကတော့ အသတ်ခံရတာ၊ ဒါမှမဟုတ် ကောင်းကင်ဘုံဉာဏ်အလင်းဂိုဏ်းတံဆိပ် ဆုံးရှုံးပြီးထုတ်ပယ်ခံရတာ၊ ဒါမှမဟုတ် အပြင်းအထန်ဒဏ်ရာရပြီး မလှုပ်ရှားနိုင်တော့တာတွေ ဖြစ်ကြတယ်။

ပုံမှန်အားဖြင့်တော့၊ ဒီထုတ်ပယ်ခံရတဲ့လူတွေကို ကောင်းကင်ဘုံဉာဏ်အလင်းဂိုဏ်းအပြင်ဘက်ကို တိုက်ရိုက်ပို့ဆောင်လိုက်မှာပဲ။ အဲ့ဒီအချိန်ကစပြီး၊ သူတို့က ဂိုဏ်းနဲ့ ဘာကံကြမ္မာမှ ဆက်စပ်မှုမရှိတော့ဘူး။ သူတို့က ကျင့်ကြံခြင်းလမ်းကြောင်းပေါ် ခြေချနိုင်ကောင်းချနိုင်ပေမယ့်၊ ကောင်းကင်ဘုံဉာဏ်အလင်းဂိုဏ်းကို ဝင်ဖို့ကတော့ လုံးဝမဖြစ်နိုင်တော့ဘူး။

ဝိညာဉ်တိမ်တိုက်ဆန်းကြယ်ဘုံထဲမှာတော့၊ နေရာက တော်တော်ကျယ်ဝန်းတယ်။ ဒီဆန်းကြယ်ဘုံနေရာထဲမှာ၊ အရောင်အမျိုးမျိုးရှိတဲ့ တိမ်တိုက်တွေ လွင့်မျောနေတယ်။ ဒါတွေက ဓာတ်ငါးပါးဝိညာဉ်စွမ်းအင်ကနေ စုစည်းထားတဲ့ ဝိညာဉ်တိမ်တိုက်တွေပဲဖြစ်တယ်။

တစ်ခုသိထားရမှာက၊ ဝိညာဉ်တိမ်တိုက်ဆန်းကြယ်ဘုံကို ‘ဝိညာဉ်အမြစ်’ ရဲ့ အရည်အချင်းကို စမ်းသပ်ဖို့ သုံးတယ်။

ပုံမှန်အားဖြင့်တော့၊ ဝိညာဉ်တိမ်တိုက်တစ်ခုကို စုပ်ယူနိုင်သရွေ့၊ သူတို့မှာ အနည်းဆုံးတော့ အနိမ့်ဆုံး ဓာတ်ငါးမျိုးဝိညာဉ်အမြစ်ရှိလိမ့်မယ်။ ဝိညာဉ်တိမ်တိုက်တစ်ခုတောင် မစုပ်ယူနိုင်ရင် သူတို့မှာ ဝိညာဉ်အမြစ်မရှိဘူး။

ဝိညာဉ်အမြစ်မရှိရင်၊ဒါမှမဟုတ် ကံကောင်းပြီးကြီးကြီးမားမားတစ်ခုခုရပြီး လူလုပ်ဝိညာဉ်အမြစ်ရတာမျိုးမဟုတ်ရင်ကျင့်ကြံခြင်းလမ်းကြောင်းပေါ် ခြေချဖို့မဖြစ်နိုင်ဘူး။

ဒါပေမဲ့၊ အဲ့လိုကံကောင်းမှုမျိုးက ဒီပါဝင်သူတွေ ကြုံတွေ့နိုင်တဲ့အရာမဟုတ်ဘူး။

အခြေခံအားဖြင့်တော့ မဖြစ်နိုင်ဘူး။

“ဒီလောက်မြန်တာ။”

လုချင်းယန်က ယုရွှယ်လန်ကို အံ့ဩတကြီးကြည့်ပြီး ပြောတယ်၊ “သူက ဒီလောက်တိုတောင်းတဲ့အချိန်အတွင်းမှာ ဝိညာဉ်တိမ်တိုက်သုံးခုကို စုပ်ယူနိုင်တယ်။ သူက အနည်းဆုံးတော့ တတိယအဆင့် ဓာတ်သုံးပါးဝိညာဉ်အမြစ် ရှိရမယ်!”