ဆူပူသောင်းကျန်းမှု

"အစ်မယွမ်။" စုချင်းယင်က ယွမ်ဖုန်းမှာ တစ်ခုခုပြောင်းလဲနေတာကို သတိထားမိသွားတယ်။ သူက လေးလေးနက်နက်နဲ့ ပြောလိုက်တယ်၊ "ဒီတစ်ခေါက် ကျွန်မအသက်ရှင်ခဲ့တာ အစ်မယွမ် ကူညီလို့ပါ။ အစ်မယွမ်သာ မရှိရင် ကျွန်မသေသွားနိုင်တယ်။"

"ဒီကျေးဇူးကို ကျွန်မတစ်သက်မမေ့ပါဘူး။"

"ညီမလေးချင်းယင်၊ အလေးအနက်ကြီး လုပ်မနေပါနဲ့။"

ယွမ်ဖုန်းက ပြောလိုက်တယ်၊ "ငါတို့က အတူတူကြီးပြင်းလာတဲ့ ညီအစ်မကောင်းတွေလေ။ ဒီလိုအခြေအနေမျိုးမှာ ငါက နင့်ကို ဘယ်လိုပစ်ထားနိုင်မှာလဲ။ နောင်အနာဂတ်မှာ နင်ဘာပဲလုပ်လုပ်၊ အနည်းဆုံးတော့ ငါတို့က သေအတူရှင်မခွဲ ညီအစ်မကောင်းတွေပဲ။"

"ဟုတ်ကဲ့။" စုချင်းယင်က လေးလေးနက်နက်ခေါင်းညိတ်တယ်။ "အစ်မပြောတာမှန်ပါတယ်။"

ပြီးတော့ သူတို့နှစ်ယောက် ဝိညာဉ်ဉာဏ်အလင်းဆန်းကြယ်ဘုံကနေ တာအိုဉာဏ်အလင်းဆန်းကြယ်ဘုံကို အတူတူထွက်သွားကြတယ်။

မကြာခင်မှာပဲ တခြားပါဝင်သူတွေ တစ်ယောက်ပြီးတစ်ယောက် ဝိညာဉ်ဉာဏ်အလင်းဆန်းကြယ်ဘုံကို ရောက်လာကြတယ်။ ဝင်ရောက်ပြီး စစ်ဆေးခံရသူအများစုက သာမန်ခန္ဓာကိုယ်တွေပဲဖြစ်တယ်။ တိုက်ရိုက်ထုတ်ပယ်ခံလိုက်ရတဲ့ အသုံးမဝင်တဲ့ ခန္ဓာကိုယ်တွေလည်း အများကြီးပဲရှိတယ်။

ဝိညာဉ်ခန္ဓာတစ်ထောင်ကျော်နဲ့ တာအိုခန္ဓာလက်တစ်ဆုပ်စာလောက်တော့ ရှိတယ်။

မသိလိုက်မသိဘာသာနဲ့ ညဥ့်နက်သွားတယ်။

"ဂျူနီယာမောင်လေး။" လုချင်းယန်က ပြောတယ်၊ "ဒီတစ်ခေါက် သူတို့ရဲ့အလားအလာကို နင်ဘယ်လိုမြင်လဲ။"

"အစ်မ။" ချီမင်က ပြောတယ်၊ "အရင်တစ်ခေါက်က ကျွန်တော်အရင်ပြောခဲ့တယ်။ ဒီတစ်ခေါက် အစ်မအရင်ပြောပါ။"

"ကောင်းပြီလေ။" လုချင်းယန်က ခပ်ဖွဖွရယ်ပြီး ယုရွှယ်လန်နဲ့ စုချင်းယင်ကို သေသေချာချာကြည့်လ်ိုက်တယ်။ ခဏလောက်တိတ်ဆိတ်နေပြီးမှ သူကပြောတယ်၊ "ငါ့‌ လေ့လာထားသလောက်အရတော့ ယုရွှယ်လန်က ဝိညာဉ်တိမ်တိုက်တွေကို စုပ်ယူတာ အရမ်းမြန်တယ်။ ပြီးတော့ သူ့ရဲ့ ဝိညာဉ်ဉာဏ်အလင်းပွင့်နှုန်းကလည်း သာမန်မဟုတ်ဘူး။"

"ဒါကြောင့် ယုရွှယ်လန်ရဲ့ နားလည်နိုင်စွမ်းက အဆင့်လေး 'ပြိုင်ဘက်ကင်း' ကို ရောက်သင့်တယ်လို့ ငါခန့်မှန်းတယ်၊ စုချင်းယင်လည်း ဒီအတိုင်းပဲ။ သူတို့နှစ်ယောက်လုံး အဆင့်လေး 'ပြိုင်ဘက်ကင်း' အဆင့်မှာ ရှိသင့်တယ်။"

" မောင်လေးရော ဘယ်လိုထင်လဲ။" လုချင်းယန်က မေးတယ်။

ချီမင်က ပြုံးပြီးပြောတယ်၊ "ကျွန်တော့်အထင်ကတော့ အစ်မနဲ့ နည်းနည်းကွာနေတုန်းပဲ။"

"ကျွန်တော့်အမြင်အရတော့ ယုရွှယ်လန်ရဲ့ နားလည်နိုင်စွမ်းက အဆင့်လေးမှန်နိုင်ပေမဲ့ စုချင်းယင်ရဲ့ နားလည်နိုင်စွမ်းက ယုရွှယ်လန်ထက်ကျော်လွန်ပြီး အမြင့်ဆုံးအဆင့်ငါး 'အံ့ဖွယ်' ကို ရောက်နေပြီ။"

"ဒါက… အံ့ဖွယ်…"

ထန်ချန်လင်းနဲ့ တခြားသူတွေ တကယ်ကို အံ့ဩသွားပြီး ပြောလိုက်တယ်၊ "အမွေခံတပည့်ချီ၊ မင်းက ဒီစုချင်းယင်ကို အရမ်းအထင်ကြီးနေတာပဲ မဟုတ်လား။ သူက ဘယ်လိုလုပ် အဆင့်ငါး 'အံ့ဖွယ်' အဆင့်နားလည်နိုင်စွမ်း ရှိနိုင်မှာလဲ!"

"ဂျူနီယာမောင်လေး၊ နင်သေချာလို့လား။" လုချင်းယန်က ထပ်မေးတယ်။

"ဟုတ်ကဲ့။" ချီမင်က ခေါင်းညိတ်တယ်။

"ဒါဆိုရင်တော့ စောင့်ကြည့်ကြတာပေါ့။" လုချင်းယန်က ပြောတယ်။

"ကောင်းပါပြီ။" ချီမင်က ပြန်ဖြေတယ်။

ဒါပေမဲ့ နာရီဝက်လောက်ကြာတော့ တာအိုဉာဏ်အလင်းဆန်းကြယ်ဘုံကို သွားတဲ့လမ်းမှာ ယုရွှယ်လန် အန္တရာယ်နဲ့ကြုံရတယ်။ သားရဲရိုင်းတွေနဲ့ ချီသန့်စင်ခြင်းပထမအဆင့်နဲ့တန်းတူ နတ်ဆိုးသားရဲတစ်ကောင်က သူ့ရှေ့မှာပေါ်လာပြီး လမ်းပိတ်လိုက်တယ်။

"နတ်ဆိုးသားရဲတွေ။" ယုရွှယ်လန်ကမျက်မှောင်ကြုတ်လိုက်တယ်။

ဝေါင်း! ဝေါင်း! ဝေါင်း!

ရုတ်တရက် အနီးအနားမှာ သားရဲဟိန်းသံတွေ အများကြီးထွက်ပေါ်လာတယ်။

"အား!!!"

"ကယ်ကြပါ! ကယ်ကြပါ!"

"နတ်ဆိုးသားရဲ! နတ်ဆိုးသားရဲ ရှိတယ်!"

"မဖြစ်ဘူး!!!"

"ပြေးကြ!"

...

ဖျောက်!!!

ချက်ချင်းပဲ နောက်ထပ် အလွန်နာကျင်စရာကောင်းတဲ့ အော်ဟစ်သံတစ်ခု ထွက်ပေါ်လာတယ်။

ဘယ်အချိန်ကမှန်းမသိ ကောင်းကင်ဘုံဉာဏ်အလင်းဂိုဏ်းစုဝေးပွဲနယ်‌မြေထဲမှာနတ်ဆိုးသားရဲတွေ တစ်ကောင်ပြီးတစ်ကောင် ရုတ်တရက်ပေါ်လာတယ်။ သူတို့က ညအမှောင်ကိုအကာအကွယ်ယူပြီး ပုန်းအောင်းနေရာကနေထွက်လာပြီး ကောင်းကင်ဘုံဉာဏ်အလင်းဂိုဏ်း ပါဝင်သူတွေကို တိုက်ခိုက်ကြတယ်။

အချိန်တိုအတွင်းမှာပဲ အများအပြား သေကြေဒဏ်ရာရကုန်တယ်။

"အာ မဟုတ်တော့ဘူး။"

ချီမင်က ကောင်းကင်ဘုံဉာဏ်အလင်းပြကြေးမုံကိုယ်ပွားကနေ အခြေအနေကိုတွေ့တော့ အော်ပြောလိုက်တယ်၊ "အစ်မ၊ အကြီးအကဲတို့၊ ကိစ္စတစ်ခုဖြစ်နေပြီ။ ကောင်းကင်ဘုံဉာဏ်အလင်းဂိုဏ်းစုဝေးပွဲတွင်းမှာနတ်ဆိုးသားရဲတွေနဲ့ သားရဲရိုင်းတွေအများကြီး ရုတ်တရက်ဝင်လာတယ်။"

"ပါဝင်သူအများကြီး အသတ်ခံနေရပြီ။"

"ဂျူနီယာမောင်လေး။" လုချင်းယန်က သတိဝင်လာပြီး လေသံတိုးတိုးနဲ့ပြောတယ်၊ "ကောင်းကင်ဘုံဉာဏ်အလင်းပြကြေးမုံကိုယ်ပွားကနေအပြင်စည်းဂိုဏ်းအကြီးအကဲအားလုံးကို ချက်ချင်းဆက်သွယ်ပြီး ဒီနတ်‌ဆိုးသားရဲတွေနဲ့ သားရဲရိုင်းတွေကို အမြန်ရှင်းလင်းခိုင်းလိုက်။"

"ဟုတ်ကဲ့။" ချီမင်က ခေါင်းညိတ်တယ်။

တွေးလိုက်ပြီးတာနဲ့ သူက ကောင်းကင်ဘုံဉာဏ်အလင်းပြကြေးမုံကိုယ်ပွားကိုသုံးပြီး တောင်ထွတ်ဆယ့်နှစ်ခုက အပြင်စည်းဂိုဏ်းအကြီးအကဲတွေကို ဆက်သွယ်ဖို့ကြိုးစားလိုက်တယ်။ ဒါပေမဲ့ ကောင်းကင်ဘုံဉာဏ်အလင်းပြကြေးမုံကိုယ်ပွားရဲ့စွမ်းရည်ကို မမြင်ရတဲ့စွမ်းအားတစ်ခုက ကန့်သတ်ထားတာကို သူတွေ့လိုက်ရတယ်။

ချီမင်က တောင်ထွတ်ဆယ့်နှစ်ခုက အပြင်စည်းဂိုဏ်းအကြီးအကဲတွေကို ဆက်သွယ်လို့မရဘူး။

ဒါတင်မကဘူး၊ ကောင်းကင်ဘုံဉာဏ်အလင်းပြကြေးမုံကိုယ်ပွားရဲ့အလင်းအောက်မှာ ချီမင်က တောင်ထွတ်ဆယ့်နှစ်ခုက အပြင်စည်းဂိုဏ်းအကြီးအကဲတွေအားလုံး စွမ်းအားကြီးတဲ့နတ်ဆိုးသားရဲတွေနဲ့ တိုက်ခိုက်နေကြတာကို တွေ့လိုက်ရတယ်။

"ဘာဖြစ်တာလဲ။"

"ဘာလို့ နတ်ဆိုးသားရဲတွေ ဒီလောက်အများကြီး ရုတ်တရက်ပေါ်လာရတာလဲ။"

"ရှင်းလင်းပြီးသား မဟုတ်ဘူးလား။"

"ဘာဖြစ်ကုန်တာလဲ။"

"အပြင်စည်းဂိုဏ်းအကြီးအကဲတွေ ဘယ်မှာလဲ။"

"မြန်မြန်တိုက်ခိုက်ကြလေ။ ဒီပါဝင်သူတွေကိုနတ်ဆိုးသားရဲတွေသတ်တာကို ကြည့်နေကြတော့မှာလား။"

"တောက်စ်!"

တောင်ထွတ်ဆယ့်နှစ်ခုက အတွင်းစည်းဂိုဏ်းအကြီးအကဲတွေရဲ့ မျက်နှာတွေ မည်းမှောင်သွားတယ်။

တစ်ခုခုဖြစ်ကုန်ပြီ။

ပြီးတော့ ဒါက ကိစ္စကြီးတစ်ခုဖြစ်တယ်။

"အစ်မ။" ချီမင်က အော်ပြောလ်ိုက်တယ်၊ "ကောင်းကင်ဘုံဉာဏ်အလင်းပြကြေးမုံကိုယ်ပွားရဲ့စွမ်းရည်ကို မမြင်ရတဲ့စွမ်းအားတစ်ခုကထိန်းချုပ်ထားတယ်။ ကျွန်တော် ဒီစွမ်းအားကို မဖျက်နိုင်ဘူး။ ကိစ္စကြီးတစ်ခုခု ဖြစ်နေပြီ။"

"အပြင်စည်းဂိုဏ်းအကြီးအကဲတွေအားလုံးကိုစွမ်းအားကြီးတဲ့နတ်ဆိုးသားရဲတွေက တားဆီးထားတယ်။ သူတို့ ခွဲထွက်လို့မရဘူး။"

လုချင်းယန်ရဲ့အကြည့်က ချက်ချင်း တင်းမာသွားတယ်။

"ကောင်းကင်ဘုံဉာဏ်အလင်းပြကြေးမုံကိုယ်ပွားရဲ့စွမ်းအား ကန့်သတ်ခံလိုက်ရပြီ။"

ထန်ချန်လင်းရဲ့မျက်နှာက လေးနက်သွားတယ်။

"အမွေခံတပည့်ချီ။" ချီချင်းက လေသံတိုးတိုးနဲ့ပြောလိုက်တယ်၊ "မင်းဘေးကင်းဖို့အတွက် ကျေးဇူးပြုပြီး လျှောက်မသွားဘဲ ငါတို့အနားမှာပဲနေပါ။ အခုကြည့်ရတာ ဒါက သေချာပေါက် ကြိုတင်ကြံစည်ထားတဲ့ တိုက်ခိုက်မှုပဲ။"

"ဟုတ်ကဲ့၊ ကျွန်တော်နားလည်ပါတယ်။" ချီမင်က ခေါင်းညိတ်တယ်။

"အား!!!"

"မဖြစ်ဘူး! ကယ်ကြပါ!"

"ဒီကောင်တွေ!"

"ကယ်ကြပါ! ကယ်ကြပါ!"

"ငါ့ကို မစားပါနဲ့!"

...

အော်ဟစ်သံတွေ၊ ဟိန်း ဟောက်သံတွေ၊ ကြောက်လန့်သံတွေ။

ချီမင်က ကောင်းကင်ဘုံဉာဏ်အလင်းပြကြေးမုံကိုယ်ပွားကနေ ပါဝင်သူတွေရဲ့ အော်ဟစ်သံတွေကို ကြားနေရတယ်။ ဒီပါဝင်သူအများစုက သာမန်လူတွေဖြစ်ပြီး နည်းနည်းလေးကပဲသိုင်းသမားတွေဖြစ်တယ်။

ဒါပေမဲ့ သူတို့ရဲ့ရန်သူတွေကနတ်ဆိုးသားရဲတွေနဲ့ သားရဲရိုင်းတွေဖြစ်တယ်။

သူတို့ လုံးဝမယှဉ်နိုင်ကြဘူး။

ပါဝင်သူအများကြီး နတ်ဆိုးသားရဲတွေရဲ့လက်ချက်နဲ့ သေကုန်တယ်။

သွေးတွေ၊ အလောင်းတွေ၊ ပြတ်နေတဲ့ကိုယ်အင်္ဂါအစိတ်အပိုင်းတွေ။

ငရဲရောက်နေသလိုဖြစ်တယ်။

"ဒီယုတ်မာတဲ့ကောင်တွေ။" ချီမင်ရဲ့မျက်နှာက မည်းမှောင်သွားပြီး သူ့မျက်လုံးတွေထဲမှာ သတ်ဖြတ်လိုစိတ်တွေ ပြည့်နေတယ်၊ "သူတို့ သေကိုသေသင့်တယ်။"

"တစ်ခုခုဖြစ်နေပြီနဲ့တူတယ်။"

"ဒီနတ်ဆိုးသားရဲတွေကို ဆက်သတ်ခွင့်ပြုလို့မဖြစ်ဘူး။"

"ငါသွားမယ်။"

မကြာခင်မှာပဲ ကောင်းကင်ဘုံချိတ်ဆက်တောင်ထွတ်၊‌‌ ကောင်းကင်ဘုံတောင်ထွတ် နဲ့ အာဏာရှင်ဆေဘာတောင်ထွတ်က အတွင်းစည်းဂိုဏ်းအကြီးအကဲတွေ ထရပ်လိုက်ကြတယ်။ သူတို့ကဟင်းလင်းပြင်လမ်းကြောင်းကနေ ဒီပါဝင်သူတွေကို ကယ်တင်ချင်ကြတယ်။

ဒါပေမဲ့…

ခြိမ်း!!!

ကောင်းကင်ကြီးတစ်ခုလုံး တုန်ခါသွားသလိုပဲ။

ဟိန်း! ဟိန်း! ဟိန်း!

မျက်စိတစ်မှိတ်အတွင်းမှာ ဧရာမနတ်ဆိုးသားရဲကြီးတွေ ပေါ်လာတယ်။ သူတို့က နေရာအနှံ့ကနေထွက်လာပြီး အချိန်အကြာကြီး ပုန်းအောင်းနေကြတာဖြစ်တယ်။

ဒီနတ်ဆိုးသားရဲတွေက မူလက ကောင်းကင်ဘုံဉာဏ်အလင်းဂိုဏ်းမှာနေထိုင်တဲ့စွမ်းအားကြီးတဲ့သက်ရှိတွေဖြစ်တယ်။ ဒီအချိန်မှာ သူတို့အားလုံးစုရုံးလာကြတယ်။

ပြီးတော့ သူတို့တစ်ကောင်ချင်းစီတိုင်းက အခြေတည်ဝိညာဉ်အဆင့်ကို ရောက်နေကြပြီ။

သူတို့က လူအသွင်မယူဘဲ သူတို့ရဲ့ နတ်ဆိုးသားရဲကိုယ်ထည်အစစ်ကို ထုတ်ပြကြတယ်။ တစ်ကောင်ချင်းစီက အလွန်ကြီးမားပြီး မီတာတစ်ထောင်ကျော်ရှည်တယ်။

"ကောင်းကင်ဘုံဉာဏ်အလင်းဂိုဏ်း၊ မင်းတို့ငါတို့မျိုးနွယ်အားလုံးအပေါ် နှစ်ပေါင်းများစွာ ခေါင်းပုံဖြတ်နှိပ်စက်ခဲ့တာတွေအတွက် ပေးဆပ်ရလိမ့်မယ်။"

"ဟားဟားဟား…"

"ငါတို့ ဒီကောင်းကင်ဘုံဉာဏ်အလင်းဂိုဏ်းစု‌ဝေးပွဲကို လုံးဝဖျက်ဆီးပစ်ရမယ်။"

"အဲဒီပါဝင်သူတွေကို ကယ်ဖို့တောင် စိတ်မကူးနဲ့။"

"သေစမ်း။"

"ကောင်းကင်ဘုံဉာဏ်အလင်းဂိုဏ်း၊ မင်းတို့က စွမ်းအားကြီးတယ်ဆိုပြီး၊ အရာရာကို ထိန်းချုပ်နိုင်တယ်ထင်ပြီး ငါတို့ကို တိရစ္ဆာန်တွေလို မွေးမြူထားတယ်။ ငါတို့ကို ကြိုက်သလိုသုံးလို့ရတဲ့ ပြန်ပြည့်‌နေတဲ့အရင်းအမြစ်တစ်ခုလို သဘောထားတယ်။ ဒီနေ့ မင်းတို့ပေးဆပ်ရလိမ့်မယ်။"

"နတ်ဆိုးတွေက ကျွန်မဟုတ်ဘူးကွ!"

...

ဘုန်း! ဘုန်း! ဘုန်း!!!

နတ်ဆိုးစွမ်းအင်တွေက ကောင်းကင်ကိုလွှမ်းခြုံသွားတယ်။

တိမ်မည်းတွေက ပတ်လည်ဝိုင်းရံပြီး ကောင်းကင်ကိုဖုံးလွှမ်းကာတောက်ပတဲ့ကြယ်တာရာတွေကို ဖုံးကွယ်ပစ်လိုက်တယ်။ နတ်ဆိုးသားရဲတစ်ကောင်ချင်းစီက အရမ်းစွမ်းအားကြီးပြီး တောင်ထွတ်အသီးသီးက အမွေခံအကြီးအကဲတွေထက်မနိမ့်ကျဘူး။

ဒီနတ်ဆိုးသားရဲတွေအားလုံးက ကောင်းကင်ဘုံဉာဏ်အလင်းဂိုဏ်းထဲက စွမ်းအားကြီးနတ်ဆိုးမျိုးနွယ်စုတွေရဲ့ ဘိုးဘေးတွေဖြစ်တယ်။

ပုံမှန်အားဖြင့်တော့ ဒီနတ်ဆိုးသားရဲဘိုးဘေးတွေက အလွယ်တကူပေါ်မလာဘူး။ သူတို့က ပုန်းအောင်းနေပြီး ကောင်းကင်ဘုံဉာဏ်အလင်းဂိုဏ်းက မတွေ့အောင်နေကြတယ်။ မဟုတ်ရင် ကောင်းကင်ဘုံဉာဏ်အလင်းဂိုဏ်းက အမွေခံအကြီးအကဲတွေက သူတို့အရေခွံကိုခွာ၊ ခွဲခြမ်းပြီး သူတို့ခန္ဓာကိုယ်အစိတ်အပိုင်းအားလုံးက ပစ္စည်းတွေဖြစ်သွားမှာဖြစ်တယ်။

ဒါပေမဲ့ အခုတော့ နတ်ဆိုးသားရဲဘိုးဘေးတွေအားလုံး ပေါ်လာကြတယ်။

"မင်းတို့ သေချင်နေကြတာပဲ။"

ဘုန်း!

ပိုင်ကျုံးဂျန်က ရှေ့တစ်လှမ်းတိုးလိုက်တယ်။ သူ့အကြည့်က အေးစက်နေပြီး ဒီနတ်ဆိုးသားရဲဘိုးဘေးတွေကို တည့်တည့်ကြည့်ကာ၊ "ကောင်းကင်ဘုံဉာဏ်အလင်းဂိုဏ်းက မင်းတို့မျိုးနွယ်တွေကို ရှင်သန်ခွင့်ပေးထားတာ။ မင်းတို့က ကျေးဇူးတရားကိုမသိဘဲ အထက်လူကြီးကို ပြန်ပြစ်မှားရဲတယ်။"

"တိရစ္ဆာန်တွေက တိရစ္ဆာန်တွေပဲကိုး။"

ကောင်းကင်ဘုံတောင်ထွတ်က အတွင်းစည်းဂိုဏ်းအကြီးအကဲဆွန်ကျဲက အသံနက်ကြီးနဲ့အော်လိုက်တယ်၊ "မင်းတို့မှာ ကောင်းကင်ဘုံဉာဏ်အလင်းဂိုဏ်းစုဝေးပွဲကို နှောင့်ယှက်ရဲတဲ့သတ္တိ တကယ်ရှိတာပဲ။ မင်းတို့နောက်ကွယ်မှာ တစ်ယောက်ယောက်ထောက်ပံ့ထားပုံရတယ်။ မဟုတ်ရင် ဘယ်လိုပေါ်လာရဲမှာလဲ။"

"မင်းတို့ မသိနားမလည်တဲ့ သားရဲတွေ။"

ဝှီး! ဝှီး! ဝှီး!!!

တောင်ထွတ်ဆယ့်နှစ်ခုက အတွင်းစည်းဂိုဏ်းအကြီးအကဲတွေထဲမှာ ချီမင်ကိုစောင့်ရှောက်နေတဲ့ လုချင်းယန်ကလွဲပြီး ကျန်တဲ့ အတွင်းစည်းဂိုဏ်းအကြီးအကဲ ၃၅ ယောက်လုံး ထွက်လာကြတယ်။ သူတို့က သူတို့ရဲ့ အခြေတည်ဝိညာဉ်အဆင့်စွမ်းအားတွေကို ထုတ်လွှတ်ပြီး နတ်ဆိုးသားရဲဘိုးဘေးတွေကို ရင်ဆိုင်လိုက်ကြတယ်။

"တိုက်ခိုက်ကြ!"

ဘုန်း!

ပိုင်ကျုံးဂျန်က အရင်ဆုံးတိုက်ခိုက်လိုက်တယ်။ သူက လက်ကွက်ဖွဲ့ပြီး‌ ကြောက်စရာကောင်းတဲ့မီးနဂါးတစ်‌ ကောင်ကိုပစ်လွှတ်ပြီးရွှေခြင်္သေ့နတ်ဆိုးသားရဲဘိုးဘေးတစ်ကောင်ကို တိုက်ခိုက်လိုက်တယ်။

ဝေါင်း!

ရွှေခြင်္သေ့နတ်ဆိုးသားရဲဘိုးဘေးက ဟိန်းဟောက်ပြီး ပိုင်ကျုံးဂျန်ရဲ့တိုက်ခိုက်မှုကို ပိတ်ဆို့လိုက်တယ်။

"တိုက်ကြ!"

"ဒီနတ်ဆိုးသားရဲတွေကို အပြတ်ရှင်းပစ်။"

"သူတို့ အသက်မရှင်ချင်မှတော့ သတ်ပစ်လိုက်ကြ။"

"တိုက်!"

"ညှာမနေနဲ့။"

...

ဘုန်း! ဘုန်း! ဘုန်း!!!

အတွင်းစည်းဂိုဏ်းအကြီးအကဲ ၃၅ ယောက်လုံး တိုက်ခိုက်လိုက်ကြတယ်။ သူတို့အားလုံးက အခြေတည်ဝိညာဉ်အဆင့်တွေဖြစ်ပြီး အရမ်းစွမ်းအားကြီးတယ်။ သူတို့က တောင်တွေကို အလွယ်တကူလှန်နိုင်ပြီး ပင်လယ်တွေကို ဖြတ်ကူးနိုင်တယ်။

ပြောရရင်တော့…

သူတို့က မြေပြင်နတ်ဘုရားတွေလိုပဲဖြစ်တယ်။

သူတို့သုံးတဲ့ နည်းလမ်းအမျိုးမျိုးက မိုးကြိုး၊ မီးနဂါး၊ဗာမီလီယန်ငှက်၊ ဓားအလင်းတန်းတွေအဖြစ် ပြောင်းလဲသွားတယ်။

ဒီနတ်ဆိုးသားရဲဘိုးဘေးတွေကလည်း အလွယ်တကူနိုင်မဲ့ရန်သူတွေမဟုတ်ဘူး။ သူတို့က အရမ်းစွမ်းအားကြီးပြီး သွေးမျိုးဆက်ကနေအမွေဆက်ခံတဲ့ နည်းစနစ်တွေတောင်ရှိတယ်။ သူတို့က အတွင်းစည်းဂိုဏ်းအကြီးအကဲတွေနဲ့ ကောင်းကင်မှာ တိုက်ခိုက်ကြတယ်။

တိုက်ပွဲက အလွန်ပြင်းထန်တယ်။

တိမ်တွေ စုတ်ပြဲသွားတယ်။

ဟင်းလင်းပြင်က ပြင်းထန်စွာတုန်ခါနေတယ်။

"ဂျူနီယာမောင်လေး။" လုချင်းယန်က သက်ပြင်းချပြီး ကောင်းကင်ပေါ်က စစ်မြေပြင်ကိုကြည့်ကာ လေသံတိုးတိုးနဲ့ပြောတယ်၊ "စိတ်မပူနဲ့။ ငါရှိနေသမျှ နင့်ကိုကာကွယ်ပေးမယ်။"

"ကျေးဇူးတင်ပါတယ် အစ်မ။" ချီမင်က ခေါင်းညိတ်ပြီးပြောလိုက်တယ်၊ "ဒါပေမဲ့ နတ်‌ဆိုးသားရဲဘိုးဘေး ၃၆ ကောင်ရှိတယ်။ သူတို့ ကြိုတင်ကြံစည်ထားတာ သိသာတယ်။ အစ်မသာ မပါဝင်ရင် တခြားအတွင်းစည်းဂိုဏ်းအကြီးအကဲတွေ အားနည်းသွားလိမ့်မယ်။"

"အဆင်ပြေပါတယ်။" လုချင်းယန်က ပြောတယ်၊ "ဒီနတ်ဆိုးသားရဲဘိုးဘေးတွေမှာ ကောင်းကင်ဘုံဉာဏ်အလင်းဂိုဏ်းကို ပြန်ခုခံရဲတဲ့သတ္တိမရှိဘူး။ သူတို့နောက်ကွယ်မှာ တစ်ယောက်ယောက်ရှိနေရမယ်။ အတွင်းအပြင်ပူးပေါင်းပြီး ဂိုဏ်းအကာအကွယ်အစီအရင်ကို လှုပ်ရှားစေပြီး ရန်သူက စိမ့်ဝင်လာတာ။"

"တကယ့်ကြိုးကိုင်သူမပေါ်မချင်း ငါမင်းအနားကနေ ခွာလို့မဖြစ်ဘူး။"

"အမွေခံအကြီးအကဲတွေကို ဒီအကြောင်း အကြောင်းကြားပြီးပြီလား။" ချီမင်က မေးတယ်။

"စိတ်မပူပါနဲ့။" လုချင်းယန်က ပြောတယ်၊ "ကောင်းကင်ဉာဏ်အလင်းဂိုဏ်းစုဝေးပွဲက ကောင်းကင်ဘုံဉာဏ်အလင်းဂိုဏ်းရဲ့ အရေးကြီးဆုံးကိစ္စတွေထဲက တစ်ခုပဲ။ 'သွေးသစ်' တွေကို စုဆောင်းဖို့ အကောင်းဆုံးနည်းလမ်းလည်းဖြစ်တယ်။ သူတို့သာ ကောင်းကင်ဘုံဉာဏ်အလင်းဂိုဏ်းစုဝေးပွဲမှာ ဒုက္ခပေးရဲရင် ကောင်းကောင်းမဆုံးသတ်ရဘူး။"

"ကျွန်တော်သိပါပြီ။" ချီမင်က ခေါင်းညိတ်လိုက်တယ်။

ဒီအချိန်မှာ ချီမင်က ကောင်းကင်ဘုံဉာဏ်အလင်းပြကြေးမုံကိုယ်ပွားကနေ နတ်ဆိုးကျင့်ကြံသူတွေရဲ့ခြေရာတွေကို တွေ့လိုက်ရတယ်။ လှည့်လည်ကျင့်ကြံသူတစ်ချို့လည်းပါတယ်။ သူတို့ရဲ့အစွမ်းက မနိမ့်ကျဘဲ အမြူတေဖွဲ့စည်းခြင်းအဆင့်ကို ရောက်နေကြပြီ။

"နတ်ဆိုးကျင့်ကြံသူတွေနဲ့ တစ်ကိုယ်တော်ကျင့်ကြံသူတွေ။"

ချီမင်ရဲ့မျက်နှာက မည်းမှောင်သွားပြီး လုချင်းယန်ကိုပြောတယ်၊ "အစ်မ၊ စိမ့်ဝင်လာတဲ့ နတ်ဆိုးကျင့်ကြံသူတွေနဲ့ တစ်ကိုယ်တော်ကျင့်ကြံသူတွေလည်း ရှိနေတယ်။ ပြီးတော့ သူတို့ လှုပ်ရှားနေပြီ။"

ဟိန်း!

ရုတ်တရက်၊ ဒီအချိန်မှာ ချီမင်နဲ့တခြားသူတွေ မြေကြီးတုန်ခါလောက်တဲ့ ဟိန်းသံကြီးတစ်ခုကို ကြားလိုက်ရတယ်။ လူတိုင်း မနေနိုင်ဘဲမော့ကြည့်လိုက်ကြတယ်။ ကောင်းကင်ပေါ်ကတိမ်တွေကြားထဲမှာ မီတာတစ်သောင်းလောက်ကြီးမားတဲ့ ကြောက်မက်ဖွယ်သားရဲကြီးတစ်ကောင် ပေါ်လာတယ်။