နဂါးချောက်ကမ်းပါး

နတ်ဆိုးဘုံနယ်မြေသည် ကျယ်ပြောကာ အဆုံးအစမဲ့သည်။

ကျယ်ပြောသည့် နတ်ဆိုးဘုံတွင် မူလတောင်တန်းသည် နတ်ဆိုးဘုံကို မွေးဖွားရာနေရာ ဖြစ်သည်။ နတ်ဆိုးမြို့တော်အပြင် နတ်ဆိုးဘုံတွင် အခြားသော စည်ကားသိုက်မြိုက်သည့် နေရာများလည်း အများအပြားရှိသည်။

ဥပမာဆိုရလျှင် နတ်နဂါးရှစ်ကောင် နတ်ဆိုးမြို့များတွင် ခရမ်းရွှေနဂါးမြို့၊ မိုးပြာရောင်နဂါးမြို့၊ နဂါးနက်မြို့၊ မီးနဂါးမြို့ နှင့် အေးခဲနဂါးမြို့တို့ ပါဝင်ပြီး အခြားမြို့သုံးမြို့သည်လည်း နတ်ဆိုးဘုံတွင် အလွန် အောင်မြင်ကျော်ကြားပေသည်။ နတ်နဂါးမြို့ရှစ်မြို့ကို နဂါးဘုရင် ကိုးကောင်က အုပ်စိုးသည်။

သို့သော် နတ်ဆိုးဘုံ၏ အားလုံးသော တန်ခိုးရှင်များသည် နတ်နဂါးမြို့ရှစ်ကောင် နတ်ဆိုးမြို့သည် နတ်နဂါးကလန်တို့၏ ဘိုးဘေးနယ်မြေ မဟုတ်ဘဲ နဂါးချောက်ကမ်းပါးကသာ သူတို့၏ ပင်မနယ်မြေ ဖြစ်သည်။

နဂါးချောက်ကမ်းပါးသည် များပြားလှသော ကျွန်းများ လေထဲတွင် မျောလွင့်နေပြီး အလွန် ကျယ်ပြောလှသည့် နေရာတစ်ခု ဖြစ်သည်။ မျောလွင့်ကျွန်းများ အလယ်တွင် အဆုံးမဲ့ ချောက်ကမ်းပါးကြီးတစ်ခု ရှိသည်။ ဤနေရာတွင် ကြောက်မက်ဖွယ် နဂါးအစစ်အမှန်များကို မကြာခဏ တွေ့မြင်နိုင်သည်။

နဂါးချောက်ကမ်းပါး၏ အဆုံးမဲ့တောင်တန်းနှင့် ကျွန်းများကို နတ်နဂါးတောင်တန်းဟုလည်း ခေါ်သည်။

ဤနေရာသည် နဂါးမျိုးနွယ်၏ မြင့်မြတ်နယ်မြေဖြစ်ကာ ထိုတောင်တန်းများက နဂါးများကဲ့သို့ သဏ္ဌာန်ရှိသည်။

ကျယ်ပြောသည့် နဂါးချောက်နက်အတွင်းတွင် အရွယ်ရောက်ပြီး အစစ်အမှန် နဂါးများက နဂါးငယ်လေးများကို ကျင့်ကြံရန် သင်ကြားပေးနေပြီး တောင်တန်းများနှင့် ချောက်နက်တို့ကို ဖြတ်သန်းသွားလာနေသည်အား မြင်နိုင်ပေသည်။

ယခုတွင် ထိုနေရာအတွင်း ပုံရိပ်နှစ်ခုက လေထဲတွင် လမ်းလျှောက်လာနေသည်။ သူတို့ထဲက တစ်ယောက်၏ ခေါင်းပေါ်၌ ချိုများရှိနေပြီး သူ၏ ခန္ဓာကိုယ်ပေါ်တွင် နဂါးဝတ်စုံကို ဝတ်ဆင်ထားကာ အလွန် အားကောင်းသည့် နတ်ဆိုးအရှိန်အဝါများ ရှိနေသည်။ သူက နဂါးမှ အသွင်ပြောင်းထားသည်မှာ သိသာနေပေသည်။

သူ့ဘေးမှ လူကတော့ သန်မာထွားကျိုင်းသော သူ တစ်ယောက်ဖြစ်ကာ အနက်ရောင်ဝတ်စုံ ဝတ်ဆင်ထားပြီး သူ့တစ်ကိုယ်လုံးတွင် ခမ်းနားထည်ဝါ၍ အေးစက်သည့် အရှိန်အဝါတို့က ဖုံးလွှမ်းထားသည်။

“နဂါးအင်ပါယာဖိုးဖိုး၊ ဒီလူသားက ဘယ်သူလဲ” ထိုအချိန်၌ မီတာတစ်ရာလောက် ရှည်သော နဂါးတစ်ကောင်က ကောင်းကင်တွင် လှည့်ပတ်ကာ သူတို့၏ ရှေ့သို့ ရောက်လာနေသည်။ နဂါးမုတ်ဆိတ်မှာ အလွန်ရှည်လှသော်လည်း နဂါး၏ မျက်နှာမှာ အတော်လေး မရင့်ကျက်သေးဟန်ပေါ်နေသည်။ သိသာစွာပင် ဤနဂါးသည် နဂါးမိသားစုအတွင်းမှ ငယ်ရွယ်သော မျိုးဆက်လေး ဖြစ်ပေသည်။

သူက ယူချင်းကို ကြည့်နေပြီး ဤလူက မည်သူ ဖြစ်သည်ကို သိချင်နေပေသည်။

“သူက ယူချင်းလို့ခေါ်တယ်။ သူက ဒီကို ကျင့်ကြံဖို့လာတာ” နတ်နဂါးကလန်၏ အစွမ်းထက်ပုဂ္ဂိုလ်တစ်ဦးက ပြုံးကာ ပြောလိုက်သည်။ ရီဖူရှင်းက ယူချင်းအား နတ်နဂါးကလန်တွင် ကျင့်ကြံရန် ပို့ဆောင်မည်ဟု ပြောကာ သူက သဘောတူခဲ့သည်။ အကယ်၍ ထိုသူက ယူချင်းအား သင်ကြားပေးရန် စိတ်ကူးမရှိလျှင်ပင် သူက ယူချင်းကို သူကိုယ်တိုင် နတ်နဂါးစွမ်းအားများ သင်ကြားပေးမည် ဖြစ်သည်။

မှော်ဝိဇ္ဇာက ကောင်းကင်အာဏာစက်ဘုံတွင် အပြောင်းအလဲများ ဖြစ်လာမည်ဟု ဟောကိန်းထုတ်ခဲ့သည့်အတွက် သူက အကျိုးရှိစေမည့် တစ်စုံတစ်ရာကို ပြင်ဆင်ပြုလုပ်ထားရန် လိုပေသည်။

“နဂါးအင်ပါယာဖိုးဖိုးက သူ့ကို ကျင့်ကြံဖို့ ဘယ်နေရာခေါ်သွားမလို့လဲ။” နဂါးငယ်လေးက စူးစမ်းကာ မေးလိုက်သည်။

“ကလေးတွေက ဒီလိုကိစ္စတွေကို ဂရုစိုက်စရာမလိုဘူး။ သွား ကျင့်ကြံချေတော့” နဂါးအိုကြီးက အပြုံးနှင့် ပြောလိုက်သည်။ သူက ယူချင်းနှင့်အတူ ရှေ့သို့ ဆက်လက်ဦးတည် သွားနေသည်။ နဂါးငယ်လေးက စိတ်ပျက်လက်ပျက်နှင့် အောက်သို့ ယိမ်းတိယိမ်းတိုင် ဆင်းသက်သွားသည်။

ဤနေရာ၌ လူသားများမှာ အလွန် နည်းပါးလှသည်။

ထိုနှစ်ယောက်က ရှေ့သို့ ဆက်လျှောက်နေပြီး နေရာတစ်ခုသို့ ရောက်လာပြီးနောက် နတ်နဂါးတောင်တန်း၏ အောက်ခြေထိ ဆင်းသွားရာ လမ်းသို့ပင် သွားခဲ့ကြရသည်။

ဝူချင်းသည် အောက်သို့ ငုံ့ကြည့်လိုက်ပြီးနောက် ကြောက်မက်ဖွယ် အသက်ဓာတ်ကို ထောက်လှမ်းမိသည့်အတွက် အနည်းငယ် တွေဝေနေသည်။

“ဒီနေရာ ကျုပ်တို့ နဂါးကလန်ရဲ့ တားမြစ်နေရာပဲ။” နတ်နဂါးကလန်မှ အစွမ်းထက်ပုဂ္ဂိုလ်က ယူချင်းကို ပြောလိုက်သည်။ ယူချင်းက ပို၍ပင် ဇဝေဇဝါ ဖြစ်သွားရသည်။ ဤနေရာက တားမြစ်နယ်မြေဖြစ်မှာတော့ ထိုသူက သူ့အား မည်သည့်အတွက် ခေါ်ဆောင်လာရသနည်း။

နဂါးကလန်မှ ထိုသူက သူ့ကို ဤတားမြစ်နေရာ၌ နေခိုင်းကာ သင်ကြားပေးချင်နေသည်လား။

သံသယများစွာနှင့် ယူချင်းသည် ထိုသူနှင့်အတူ ချောက်နက်အတွင်း ဆင်းလာခဲ့သည်။ ယူချင်းက အောက်သို့ စူးစိုက်ကြည့်ရင်း သူ၏ မျက်လုံးများက အနည်းငယ် ကျဉ်းမြောင်းလာသည်။ ချောက်ကမ်းပါးအတွင်း သူက အလွန် ခြိမ်းခြောက်နိုင်သော နတ်ဆိုးစွမ်းအားများကို ခံစားရသည်။ ထိုစွမ်းအားများက ချောက်ကမ်းပါးအတွင်းရှိ ဤနယ်မြေ နေရာတိုင်း၌ ရှိနေပေသည်။

သူတို့က နတ်ဆိုးလမ်းစဉ်၏ ငရဲကဲ့သို့သော နေရာနှင့်တူသည့် နက်ရှိုင်းသော နေရာသို့ ဆင်းလာခဲ့ကြသည်။ ယင်းသည် နဂါးချောက်ကမ်းပါး၏ မြေအောက်တွင် ရှိနေသကဲ့သို့ပင် ဖြစ်ကာ များပြားလှသည့် တောင်များက ဤနယ်မြေကို ဇောက်ထိုးပုံစံ ဝန်းရံကာ တောင်အထက်ပိုင်းများက တစ်ခုနှင့်တစ်ခု ဆက်သွယ်ထားသလို ထင်မှတ်ရသည်။ ထိုမရေတွက်နိုင်သည့် တောင်များပေါ်တွင် အဆုံးမဲ့ သံကွင်းဆက်ကြိုးများ ရှိနေသည်။ သံကွင်းဆက်ကြိုး တစ်ခုချင်းစီသည် နတ်လက်နက်များဖြင့် ပြုလုပ်ထားပြီး အလွန် တောက်ပသည့် အလင်းများ ရောင်ပြန်ဟပ်နေသည်။

အဆုံးမဲ့ သံကွင်းဆက်ကြိုးများ အားလုံးက နေရာတစ်ခုတည်းသို့ ဦးတည်နေကြသည်။

သူတို့က လျှောက်နေရာမှ ရပ်တန့်သွားလျှင် နတ်နဂါးကလန်မှ ပုဂ္ဂိုလ်ကြီးက ခေါင်းကို မော့ကာ တစ်နေရာသို့ ကြည့်လိုက်ကြသည်။ ယူချင်းသည်လည်း ထိုနေရာသို့ ကြည့်လိုက်လျှင် ထို ဇောက်ထိုးတောင်ထိပ်များ၏ နောက်၌ ရစ်ခွေနေသော ကြီးမားသည့် ခန္ဓာကိုယ်ကြီးတစ်ခုကို မြင်လိုက်ရသည်။ ထိုရစ်ခွေနေသည့် ခန္ဓာကိုယ်မှာ အလွန် ကြီးမားသောကြောင့် ဆယ်ခုထက်ပိုသော တောင်ထိပ်များကိုပင် ရစ်ပတ်ထားနိုင်ပေသည်။ ထိုမြင်ကွင်းသည် အလွန် ထိတ်လန့်ဖွယ် ကောင်းလှသည်။

ယင်း၏ ဦးခေါင်းကြီးမှာလည်း အလွန်တရာ ကြီးမားလှသည်ဖြစ်ရာ မျက်လုံးများကလည်း လူသားတို့၏ ခန္ဓာကိုယ်များထက်ပင် ကြီးမားပေသည်။

နဂါးကြေးခွံများက ချောက်ချားဖွယ် နက်မှောင်ကာ တောက်ပြောင်နေ၏။

“နတ်ဆိုးနဂါးတစ်ကောင်” ယူချင်းက တီးတိုးရေရွတ်လိုက်ကာ သူ့ရှေ့သို့ စူးစိုက်ကြည့်နေသည်။ ထိုသည်က သေချာပေါက် အလွန်အဆင့်မြင့်သည့် နတ်ဆိုးနဂါးတစ်ကောင် ဖြစ်ရပေမည်။ ပို၍ ထိတ်လန့်ဖွယ် ကောင်းသည်က ထိုကြီးမားသည့် ခန္ဓာကိုယ်တွင် အဆုံးမဲ့ သံကွင်းဆက်ကြိုးများဖြင့် ချည်နှောင်ခံထားရခြင်း ဖြစ်သည်။ တောင်ထိပ်မှ အဆုံးမဲ့သံကွင်းဆက်ကြိုးများ အားလုံးက ယင်း၏ခန္ဓာကိုယ်ကို ချုပ်နှောင်ရန် အသုံးပြုထားသည်။

“ကျွန်တော် ခင်ဗျားကို လာမတွေ့ဖြစ်တာ အတော်ကြာသွားပြီနော်” ယူချင်းနှင့်အတူ လာသော နတ်နဂါးကလန်မှ အစွမ်းထက် ပုဂ္ဂိုလ်က ထိုချုပ်နှောင်ခံထားရသည့် နတ်ဆိုးနဂါးကြီးအား ကြည့်ကာ ပြောလိုက်သည်။

နတ်ဆိုးနဂါးကြီး၏ ကြီးမားသော မျက်လုံးများက သူ့ကို စူးစိုက်ကြည့်နေပြီး မည်သည့်စကားမှ မဆိုဘဲ သူ့ခန္ဓာကိုယ်ကြီးက ရွေ့လျား ရစ်ခွေလိုက်သည်။

သူက ဤနေရာ၌ ချုပ်နှောင်ခံထားရသည်မှာ နှစ်ပေါင်းသုံးရာကျော်ပြီ ဖြစ်သည်။ မည်သည့်ကိစ္စမှလည်း မရှိသလို မည်သူကမှလည်း သူ့ထံသို့ လာမလည်ခဲ့ကြပေ။

သို့ပေမဲ့ နှစ်ပေါင်းသုံးရာဆိုသည်မှာ သူ့အတွက်တော့ မကြာမြင့်လှပေ။

“ခင်ဗျားက ဒီနေရာမှာ နှစ်ရာပေါင်းများစွာ တစ်ယောက်တည်း ကျင့်ကြံရတာ ပျင်းနေလောက်ပြီ။ ကျွန်တော် အပြင်လောကကို သွားတုန်းက နတ်ဆိုးလမ်းစဉ် ကျင့်ကြံတဲ့ လူသားတန်ခိုးရှင်တစ်ယောက်နဲ့ တွေ့ခဲ့လို့ ခေါ်လာခဲ့တာ။ ခင်ဗျား သူ့ကို တပည့်အဖြစ် လက်ခံပြီး သင်ပေးနိုင်မလားလို့”

နတ်နဂါးကလန်၏ အစွမ်းထက်ပုဂ္ဂိုလ်က ဆက်ပြောလိုက်သော်လည်း ထိုနတ်ဆိုးနဂါးကြီးက စိတ်ဝင်စားဟန်မရှိပေ။ သူက ယူချင်းအား တစ်ချက်ကြည့်လိုက်ပြီးနောက် နတ်နဂါးကလန်၏ အစွမ်းထက် ပုဂ္ဂိုလ်ကို ကြည့်ကာ ပြောလိုက်သည်။ “တပည့်လက်ခံဖို့ စိတ်ကူးမရှိဘူး”

သူ၏ အသံက အလွန် နက်ရှိုင်းလှသည်။ အလွန် ချောက်ချားဖွယ် ကောင်းသော်လည်း အနည်းငယ် စိတ်ဓာတ်ကျနေသည့် အရိပ်အယောင်ရှိသည်။

ယူချင်းက ထိုနေရာ၌ ရပ်ရင်းနှင့်ပင် ချုပ်နှောင်ခံထားရမှု၏ မွန်းကျပ်ဖွယ် ခံစားချက်ကို ရှင်းလင်းစွာ ခံစားနိုင်ပေသည်။ သူက ထိုနတ်ဆိုးနဂါးကြီးက မည်သည့် ပြစ်မှု ကျူးလွန်ခဲ့မိ၍ ဤနေရာတွင် ချုပ်နှောင်ခံထားရသလဲ မသိရှိပေ။

“သိပါပြီ” နတ်နဂါးကလန်၏ အစွမ်းထက်ပုဂ္ဂိုလ်က ဆက်ပြောလိုက်သည်။ “ဒါပေမဲ့ သူက နည်းနည်း ကွဲပြားတယ်။ သူက ခင်ဗျားနဲ့ တွေ့ဆုံဖို့ ကံကြမ္မာရှိတယ်လို့ ထင်တယ်။ အရင်ဆုံး တစ်ချက်လောက် ကြည့်ကြည့်ပါလား”

“သူက ဘာလို့ ကွဲပြားရမှာလဲ” နတ်ဆိုးနဂါးကြီးက အေးစက်စွာ ပြောလိုက်သည်။ သူ၏ အသံက အေးစက်နေဆဲ ဖြစ်ကာ အတက်အကျမရှိပေ။

“ဒါက ပြောဖို့ခက်ပေမဲ့ ခင်ဗျား စိတ်ဝင်စားမှာပါ။ တစ်ချက်လောက် ကြည့်ကြည့်ပါ။ ခင်ဗျားသာ သူ့ကို တကယ်ပဲ စိတ်မဝင်စားဘူးဆိုရင် ကျွန်တော် သူ့ကို ချက်ချင်း ခေါ်ပြီး ထွက်သွားပေးမယ်” နတ်နဂါးကလန်၏ အစွမ်းထက်ပုဂ္ဂိုလ်က တစ်ဖန်ထပ်ကာ ပြောလိုက်သည်။

နတ်ဆိုးနဂါးကြီးက သူ၏ စကားကို လျစ်လျူရှုကာ သူ့ကိုသာ ကြည့်နေလေသည်။

“ကျွန်တော် အရင်ပြန်နှင့်မယ်။ တကယ်လို့ ခင်ဗျား သူ့ကို လုံးဝ စိတ်မဝင်စားဘူးဆိုရင် ယူချင်းကို သူ့ဘာသာ ပြန်ထွက်လာခိုင်းလိုက်ပါ။ ကျွန်တော် သူ့ကို ပြန်ခေါ်သွားလိုက်မယ်” နတ်နဂါးကလန်၏ အစွမ်းထက်ပုဂ္ဂိုလ်က ထပ်ပြောလိုက်သည်။ ထိုသို့ပြောပြီးနောက် သူက လေထဲသို့ တက်ကာ ထွက်ခွာသွားခဲ့သည်။

ယူချင်းထံ၌ ထူးဆန်းသော အကြည့်တို့ ပေါ်ပေါက်လာသည်။ ထိုသူက ဤနဂါးကြီး သူ့အား ထိခိုက်နာကျင်စေလိုက်မည်ကို မစိုးရိမ်သည်လား။

ဤနတ်ဆိုးနဂါးကြီးနှင့် နတ်နဂါးကလန်ကြား၌ မည်သည်တို့ ဖြစ်ခဲ့သနည်း။ သူတို့၏ ပြောစကားများအရ သူတို့ထံ၌ မည်သည့် ဒေါသမှ မတွေ့ရဘဲ နှစ်ဖက်လုံးက အလွန် တည်ငြိမ်နေကြသည်။

နဂါးကြီးက ထိုသူ ထွက်သွားသည်ကို မြင်သောအခါ သူ၏ ကြီးမားသော မျက်လုံးများနှင့် ယူချင်းကို လှမ်းကြည့်လိုက်သည်။ သူ၏ ယခင် ဆရာက လူသားတန်ခိုးရှင် ဖြစ်သည့်အတွက် သူ့ကို သင်ကြားပေးရန် လူသားတန်ခိုးရှင် ပို့ပေးခဲ့သည်လား။

သို့သော် သူက မည်သူ့ကိုမှ ကျင့်ကြံခြင်း သင်ကြားပေးရန် စိတ်မဝင်စားခဲ့ပေ။ သူက အားကောင်းသည့် စွမ်းအားကိုသာလျှင် လေးစားပေသည်။

“ထွက်သွား” နတ်နဂါးကြီးက ယူချင်းကို ပြောလိုက်သည်။ ဤလူသားက မည်မျှ အရည်အချင်းရှိသည်ဖြစ်စေ သူက စိတ်ဝင်စားလိမ့်မည် မဟုတ်ပေ။

ယူချင်းက ထိုနဂါးကြီး ပြောသည်ကို ကြားလိုက်သည့်အခါ မျက်မှောင်ကြုတ်လိုက်ကာ အနည်းငယ် မပျော်မရွှင် ဖြစ်သွားခဲ့သည်။ ဤနဂါးကြီး၏ စရိုက်က အနည်းငယ် ထူးဆန်းပေသည်။

“ဒါဆိုလည်း ကျွန်တော် သွားတော့မယ်” သူက အများကြီး မပြောဘဲ ချက်ချင်းပင် အပေါ်သို့ တက်ကာ ထွက်သွားရန် ပြင်လိုက်သည်။

သူ့က မည်သည့် စိတ်ဝင်စားမှုမှ မရှိသည့်အတွက် ယူချင်းကလည်း သူ့အပေါ် စိတ်ဝင်စားနေလိမ့်မည် မဟုတ်ပေ။

ကျင့်ကြံခြင်း၌ သူ့အား အခြားသူများက သင်ကြားပေးရန် မလိုအပ်ပေ။ သူက တစ်ယောက်တည်းလည်း လုပ်ဆောင်နိုင်ပေသည်။

နတ်ဆိုးနဂါးကြီးသည်လည်း ယူချင်း၏ စိတ်မကျေနပ်မှုကို သတိပြုမိခဲ့ပြီး သူ၏ ကြီးမားသော မျက်လုံးများထဲတွင် အထင်အမြင်သေးခြင်းတို့ ဖြတ်ပြေးသွားသည်။ သူက ရှန့်ထိုအဆင့်သာ ရှိသေးသော်လည်း မည်သည့်အတွက်ကြောင့် မကျေမနပ် ဖြစ်ပြရဲရသနည်း။

သူ၏ ထက်ရှသော လက်သည်းများက လေထဲကို ဖြတ်သန်းသွားကာ ရုတ်တရက် ဆူညံကျယ်လောင်သည့် အသံတစ်ခု ထွက်ပေါ်လာသည်။ ယူချင်းသည် ချက်ချင်းပင် အလွန် အားကောင်းသည့် ဖိအားကို ခံစားလိုက်ရပေသည်။ သူက လေဟာနယ်ကို ဖြတ်ကာ သူ့ထံကျဆင်းလာနေသည့် ကြီးမားသော နတ်ဆိုးလက်သည်းများကို မြင်လိုက်ရသည်။ နက်မှောင်သည့် လက်သည်းများ၏ စွမ်းအားက အလွန် ကြောက်မက်ဖွယ် ပြင်းထန်လှသည်။

“နတ်ဆိုးစွမ်းအားကို ကျင့်ကြံဖို့ဆိုတာမျိုးက လူတိုင်း အရည်အချင်းမီတာ မဟုတ်ဘူး” ပြင်းထန်၍ လွှမ်းမိုးနိုင်သော အသံတစ်ခုက နတ်ဆိုးနဂါးကြီး၏ ပါးစပ်မှ ထွက်ပေါ်လာသည်။

ယူချင်း၏ ခန္ဓာကိုယ်ပေါ်တွင် နတ်ဆိုးစွမ်းအားများက အော်မြည်ကာ တုန်ခါနေသည်။ ပြင်းထန်သည့် နတ်ဆိုးအသက်ဓာတ် အငွေ့အသက်တို့က လွှမ်းမိုးလာ၏။ သူက ကောင်းကင်သို့ ခြေချလိုက်ပြီး မဟူရာရွှေရောင် အလင်းများက သူ့ခန္ဓာကိုယ်အနီး ရစ်ပတ်နေသည်။ သူ့နောက်တွင် နတ်ဆိုးရုပ်တုများ ပေါ်ပေါက်လာပြီး အားလုံးသော နတ်ဆိုးများ တစ်ဟုန်ထိုး တိုးထွက်လာ၏။

ကြီးမားသည့် နတ်ဆိုးလက်ဝါးရိပ်က ထွက်ပေါ်လာပြီး ထိုနတ်ဆိုးလက်သည်းကြီးထံ တည့်မတ်စွာ ပြေးဝင်သွားသည်။ ကျယ်လောင်သည့် အသံထွက်ပေါ်လာပြီး လက်သည်းနှင့် လက်ဝါးတို့က တစ်ချိန်တည်း၌ ပျက်စီးသွားခဲ့လေသည်။

ထိုမြင်ကွင်းက နဂါးကြီး၏ မျက်လုံးများကို အရောင်ပြောင်းသွားစေသည်။ သူက ယူချင်းအား နတ်ဆိုးလမ်းစဉ်ကို တွေ့ကရာလူ ကျင့်ကြံ၍ မရနိုင်သည်အား သင်ခန်းစာပေး သတိပေးရန် ရည်ရွယ်ခဲ့ကာ ခွန်အားကို ထိန်းချုပ်၍ တိုက်ခိုက်ခဲ့သော်လည်း သူ၏ လက်ဝါးတစ်ချက်က ယူချင်းကဲ့သို့ အဆင့်လေးကို ဖျက်ဆီးနိုင်ရန် လုံလောက်မည်ဟု တွေးထင်ခဲ့သည်။ သို့သော် ယူချင်းက ထိုသည်အား တားဆီးခဲ့သည်။

နဂါးကြီး၏ ကြီးမားသော မျက်လုံးများက ယူချင်းကို စူးစိုက်ကြည့်နေပြီး သူသည် ယူချင်းအနီးမှ နတ်ဆိုးစွမ်းအင်လှိုင်းများကို ရင်းနှီးနေသလို ခံစားလာရ၏။

ဘုန်း...

ကြီးမားသည့် ခန္ဓာကိုယ်ကြီးက ရှေ့သို့ ရွေ့လျားလာကာ သံကွင်းဆက်ကြိုးများ၏ ထိခတ်သံက ဆူညံစွာ ထွက်ပေါ်လာသည်။ ကောင်းကင်လမ်းစဉ်စွမ်းအားများ ပါဝင်နေသကဲ့သို့ သူ၏ ကြီးမားသော လက်သည်းများက ယူချင်းထံသို့ တည့်မတ်စွာ ကျဆင်းလာသည်။ ယူချင်းသည် မွန်းကျပ်မှုကို ခံစားမိလိုက်ပြီး လေထဲမှ ချဉ်းကပ်လာနေသည့် လက်သည်းများအပေါ်တွင်သာ မမှိမသုန်စိုက်ကြည့်နေပေသည်။

ဤတစ်ကြိမ်၌ နတ်နဂါးကြီးက သူ၏ စွမ်းအားများကို ထိန်းချုပ်မထားခဲ့ပေ။ ထိုသည်က မည်သည့် ကြောက်မက်ဖွယ် ပြင်းထန်သည်ကို လူတိုင်း ခန့်မှန်းကြည့်နိုင်ပေသည်။

ယူချင်း ခန္ဓာကိုယ်ပေါ်မှ နတ်ဆိုးစွမ်းအားများက ဟိန်းဟောက်အော်မြည်လာကာ များပြားလှသည့် နတ်ဆိုးအရိပ်များ ထွက်ပေါ်လာသည်။ သို့သော် ကျဆင်းလာသည့် လက်သည်းများနှင့် သူတို့ကြားမှ အဆင့်က အလွန်ကွာခြားနေပေသည်။ ယူချင်းသည် ထွက်ပြေးရန်ပင် မလုပ်နိုင်ဘဲ တိုက်ရိုက်သာ ရင်ဆိုင်လိုက်ရသည်။ သူက သွေးရူးသွေးတန်း ညည်းညူလိုက်ရပြီး သူ၏ ကြီးမားသော မျက်လုံးများက အခြားတစ်ဖက်သို့ စူးစမ်းကြည့်နေပေသည်။

“ကလေးတစ်ယောက်က ဘယ်လိုလုပ် ခုခံရဲရတာလဲ” နတ်ဆိုးနဂါးကြီးက အေးစက်စွာ ပြောဆိုလိုက်သည်။ သူ၏ ကြီးမားသော ခန္ဓာကိုယ်ကြီးက ချဉ်းကပ်လာကာ မျက်လုံးများကတော့ ယူချင်းထံ၌ စူးစိုက်နေသည်။ သူ၏ လက်သည်းများတွင် ခွန်အားအနည်းငယ်သာ ထည့်ထားခြင်း ဖြစ်သည်။ ယူချင်းက အသည်းအသန် ရုန်းကန်နေသော်လည်း အသုံးမဝင်ပေ။

လက်သည်းများက ဖိအားရှိနေဆဲ ဖြစ်သည်။  သူက ယူချင်း၏ ခန္ဓာကိုယ်ကို ဖျက်ဆီးချေမွချင်နေပုံရသည်။ ယူချင်းက သူ့ကို အေးစက်စွာ စူးစိုက်ကြည့်လိုက်ပြီး သူ့ခန္ဓာကိုယ်မှ နတ်ဆိုးစွမ်းအားများက အထွတ်အထိပ်သို့ ရောက်ရှိသွားသည်။ သူက သေဆုံးခြင်းနှင့် လက်တစ်ကမ်းတွင် ရောက်ရှိနေသည့်အတွက် သူက ခွန်အားများကို အစွမ်းကုန် အသုံးပြုလိုက်သော်လည်း အသုံးမဝင်ပေ။

ဘုန်း.. ပြိုင်ဘက်ကင်း နတ်ဆိုးအရိပ်တစ်ခုက ပေါ်ပေါက်လာပြီး အေးစက်သည့် မျက်လုံးတစ်စုံကို သုံးကာ တစ်ဖက်ကို သိမ်းကျုံးကြည့်လိုက်သည်။ နတ်ဆိုးနဂါးကြီးသည် ထိုနတ်ဆိုးအရိပ်ကို မြင်သည့်အခါ သူက အရင်ဆုံး ကြက်သေသေသွားခဲ့ပြီးနောက် သူ၏ခန္ဓာကိုယ်ကြီးက အပြင်းအထန် တုန်ယင်လာသည်။

ဘုန်း.. နဂါးခန္ဓာကြီးက ပို၍ ပြင်းထန်စွာ တုန်ခါလာနေပြီး ချောက်နက်ကြီးတစ်ခုလုံးသည်ပင် တုန်ခါလာသည်ဟု ထင်မှတ်ရသည်။ သူက လက်သည်းများကို ဖြေလျှော့လိုက်ကာ ယူချင်း၏ အေးစက်သည့် အကြည့်တို့အား ကြည့်ကာ တုန်ယင်နေပြီးနောက် သူ၏ ဝင့်ဝါလှသော ဦးခေါင်းကို နှိမ့်ကာ လေးစားမှုအပြည့်နှင့် ဒူးထောက်လိုက်သည်။

ဘုန်း.. ချောက်နက်အတွင်း မရေတွက်နိုင်သည့် ကျောက်စက်ပန်းဆွဲသဏ္ဌာန် ကျောက်တုံးများက တုန်ခါနေသည်။ ချောက်ကမ်းပါး အြင်ရှိ နတ်နဂါးကလန်၏ အစွမ်းထက်ပုဂ္ဂိုလ်က မျက်မှောင်ကြုတ်လိုက်သည်။ သူက အနီးဝန်းကျင်သို့ ကြည့်လိုက်ပြီး နဂါးချောက်ကမ်းပါးမှ တောင်တန်းများက တုန်ခါနေသည်ကို မြင်ရပေသည်။ နဂါးကလန်ရှိ များပြားလှသော တန်ခိုးရှင်များက ထရပ်လိုက်ကာ ထိုမြင်ကွင်းကို ထိတ်လန့်တကြား ကြည့်နေကြသည်။

ဤသည်က မည်သည့်အတွက် ဖြစ်လာရသနည်း။

ဂါး…

နဂါးဟိန်းဟောင်သံက ကောင်းကင်နှင့် မြေကြီးကို ဖြတ်သန်းထွက်ပေါ်လာသည်။ နဂါးချောက်နက်အတွင်း ငယ်ရွယ်သည့် နဂါးလေးများမှာ အထိတ်တလန့်နှင့် မြေပေါ်သို့ ပြုတ်ကျလာကြသည်။ အရွယ်ရောက်ပြီး နဂါးကြီးများကလည်း တုန်ယင်ကာ ဝပ်တွားကုန်ကြသည်။ အဆုံးမဲ့ နဂါးချောက်ကမ်းပါးတစ်ခုလုံးက တုန်ခါနေသည်ဟု ထင်မှတ်ရပေသည်။

***