ရှောင်ချန် အမည်ရ သနားစဖွယ် မိန်းကလေး

Vol. 16 Ch. 206

အော်ဟစ်သံအပြီးတွင် စက္ကူရုပ်က မျက်ရည်များဖြင့် ရုတ်တရက် ပေါက်ကွဲထွက်သွားပြီး စိတ်ပျက်အားငယ်မှုကြောင့် သူမ၏ မျက်နှာကို ဆွဲဖြဲလိုက်သောအခါ အဖြူရောင် စက္ကူမှ မျက်ရည်စီးကြောင်းသည် ဝမ်းဗိုက်အထိ စီးဆင်းသွားရာ အနီရောင် အစင်းကြောင်းများကို မြင်နိုင်သည်။

ရွှစ်

စက္ကူ တစ်ချပ်လုံး စုတ်ပြဲသွားပြီး အနီရောင် မြူခိုးများအကြားတွင် မျက်ရည်တသွင်သွင် စီးကျနေသော မိန်းကလေး တစ်ဦး ပေါ်ထွက်လာသည်။ သူမကသတို့သမီးပမာ တောက်ပသော အနီရောင်ဝတ်ဆင်ထားကာ ယွမ်ရှောင်ကို ကြည့်နေရင်း နက်ရှိုင်းစွာ သက်ပြင်းချ၍ နာကျင်ဖွယ်ရာ ဝမ်းနည်းပူဆွေးမှု ခံစားချက်များ ပြည့်နှက်နေသည့် မျက်နှာကြောင့် မြင်ရသူတိုင်း၏ နှလုံးသားများကို ကြေမွသွားစေနိုင်သည်။

"အစ်မကျောက်"

ယွမ်ရှောင်၏ မျက်လုံးများ ချက်ချင်း အနီရောင် ပြောင်းလဲသွားသည်။

"ယုန်ကြီးကြီးနဲ့ မိန်းကလေးကျောက်လား။ ဒီနတ်ဆိုးမရဲ့ ခန္ဓာကိုယ်က သူမထက်ပိုပြီး ကြီးမားနေတယ်။ မင်းရဲ့ စိတ်ကူးခံစားချက်ကြောင့် ဖြစ်ပေါ်လာတာပဲ။ အစ်ကိုကြီး မင်းရဲ့ စိတ်ကူးနိုင်စွမ်းက တကယ် အံ့မခန်းပဲ"

ကြယ်ပြာက ထွက်ပေါ်လာပြီး နောက်ပြောင်လိုက်သည်။

"ဖြစ်နိုင်တာက သူလည်း မိခင်မေတ္တာ ချို့တဲ့နေလို့ နေမှာပေါ့"

လနီ၏ စကားကြောင့် ယွမ်ရှောင်က ခံရခက်သွားကာ ဤလူပြက်များကြောင့် ထူးဆန်းသော အခြေအနေမှာ လုံးဝ ပျက်စီးသွား၏။ သို့သော် ထိုစကားများက သူ့ကို ရီဝေနေရာမှ နိုးလာစေခဲ့ပြီး မျက်နှာထား တင်းမာသွားကာ သတ်ဖြတ်လိုစိတ် နောက်တစ်ကြိမ် မြင့်တက်လာ၍ အေးစက်စက် ပြောလိုက်သည်။

"မင်း ငါ့စိတ်ထဲကို ဝင်ကြည့်ရဲတယ်ပေါ့။ အသေဆိုးနဲ့ သေချင်နေတာလား"

ပြောရမည်ဆိုလျှင် လက်စားချေလိုသော ထိုဝိညာဉ်က လက်ရှိတွင် လူသားတစ်ဦးနှင့် ခွဲခြားမရနိုင်အောင် တူညီနေသော်လည်း မကျေနပ်မှုနှင့် နတ်ဆိုးအရှိန်အဝါက အလွန် ပြင်းထန်လှသည်။

ပြိုးပြက်တောက်ပသော အနီရောင်ကို ဝတ်ဆင်ထားသည့် သတို့သမီးက ခြေဗလာဖြင့် သွေးများ စွန်းထင်းနေသော လမ်းကြောင်းတစ်ခုကို နင်းလျှောက်လာသည်။ သူမ သွားသည့်နေရာတိုင်းရှိ နတ်ဆိုးဝိညာဉ်များက ဘဝကူးသွားခြင်း မရှိဘဲ သူမ၏ဝတ်ရုံအထက်သို့ တွယ်ကပ်လာခဲ့သည်။ နတ်ဆိုး ဝိညာဉ် နှစ်ထောင်က သူမ၏ ဝတ်ရုံကို ပို၍ပင် တောက်ပစေပြီး အသွင်အပြင်ကို ပို၍ပင် စွဲမက်ဖွယ်ကောင်းအောင် ပြုလုပ်ပေးကာ နီရဲသော နှုတ်ခမ်းများ၊ ကျော့ရှင်းသော လည်တိုင် နှင့် ကိုယ်ဟန်အနေအထားမှာ စွဲမက်ဖွယ်ကောင်းပေသည်။

သို့သော် သူမ၏ နတ်ဆိုး အရှိန်အဝါ တစ်ခုတည်းကပင် မည်သည့် နတ်ဆိုးမင်းသား မင်းသမီးထက်မဆို သာလွန်၍ သေဆုံးသွားသော နတ်ဆိုး နှစ်ထောင်၏ မကျေနပ်မှု ခံစားချက်သည် လက်ရှိ ပုံစံကို ဖန်တီးခဲ့သည်။ ဆိုးညစ်စွာ ပြုံးနေသော မျက်နှာများ သူမ၏ ဝတ်ရုံပေါ်တွင် အရိပ်ထင်ဟပ်လာကာ ယွမ်ရှောင်ကို စိုက်ကြည့်နေကြသည်။

"အမှန်တကယ်တော့ ငါက နတ်ဆိုးတိုက်ကြီးမှာ မွေးဖွားခဲ့တဲ့ နတ်ဆိုးတစ်ကောင်ဖြစ်ပေမယ့် နတ်ဘုရားတိုက်ကြီးနဲ့ ဆက်နွယ်နေတယ်"

သတို့သမီးနတ်ဆိုးက ကျောက်ရန်ရန်၏ အသံဖြင့် နူးညံ့သိမ်မွေ့စွာ စကားပြောလာသည်။

"ဘယ်လိုလဲ"

ယွမ်ရှောင်၏ အသံက အေးစက်နေသည်။

"အရင်ဘဝမှာ ငါက လူသားမိန်းကလေး တစ်ယောက် ဖြစ်ခဲ့ပါတယ်"

သူမက ဦးခေါင်းကို အနည်းငယ် ငုံ့လိုက်ပြီး သွေးမျက်ရည်များ မျက်ဝန်းတွင် ပြည့်လျှံနေကာ စစ်မှန်သော ဝမ်းနည်းပူဆွေးမှုတစ်ခု ဖြစ်သည်။ လူသားစင်စစ် ဖြစ်ခဲ့ဖူးပြီး သေဆုံးခဲ့သောအခါ မကျေနပ်မှု ခံစားချက်များသည် သူမကို နတ်ဆိုးတိုက်ကြီး၏ အစွမ်းထက်ဆုံး နတ်ဆိုး ပါရမီရှင်အဖြစ်သို့ ပြောင်းလဲပစ်ခဲ့သည်။

"."

ယွမ်ရှောင် တိတ်ဆိတ်သွားသည်။

"မင်း သရဲ မင်္ဂလာပွဲအကြောင်း ကြားဖူးလား"

သူမ၏ ဦးခေါင်း မော့လာပြီး ဝမ်းနည်းပူဆွေးဟန်ဖြင့် သူ့ကို စိုက်ကြည့်နေခဲ့သည်။

"ငါ သိတယ်"

ယွမ်ရှောင်က ဖြည်းညှင်းစွာ ခေါင်းညိတ်ပြသည်။

"မိဘတွေက ငွေယူပြီး ငါ့ကို သေဆုံးသွားသော ယောကျ်ားတစ်ယောက်နဲ့ အတင်းအကျပ် လက်ထပ်စေခဲ့တယ်။ ငါက အသက် ဆယ့်ငါးနှစ်သာ ရှိသေးပေမယ့် အလောင်းတစ်ခုနဲ့အတူ အရှင်လတ်လတ် မြှုပ်နှံခံခဲ့ရတယ်"

သူမက အမြဲတမ်း ကျောပိုးထားသော လူငယ်၏ ဆွေးမြေ့နေသည့် ခန္ဓာကိုယ်ကို လှည့်ကြည့်လိုက်သည်။ သူမ၏ မျက်လုံးများတွင် နောက်ဆုံး ထွက်သက်၌ ခံစားခဲ့ရသည့် စိတ်ပျက်အားငယ်မှုနှင့် ပြင်းပြသော ဝေဒနာ ထင်ဟပ်နေ၏။ အရှင်လတ်လတ် မြှုပ်နှံခံရခြင်း၊ အခေါင်းတစ်ခုတွင် ချောင်ပိတ်မိနေခြင်း၊ အလောင်းတစ်လောင်းနှင့်အတူ သေဆုံးရန် စောင့်ဆိုင်းနေခဲ့ရသော သူမ၏ အဖြစ်ဆိုးအတွက် မိဘများက ငွေ ယူခဲ့ကြသည်။

"ငါ သေဆုံးခဲ့ပေမယ့် အမုန်းတရားနဲ့ မကျေနပ်မှုက ခေါင်းတလားထဲမှာ နှစ်ထောင်ပေါင်းများစွာ ပိတ်မိနေခဲ့တယ်။ ဘယ်သူမှ ငါ့ကို မကယ်တင်ခဲ့ဘူး။ မလွတ်မြောက်စေခဲ့ဘူး။ တစ်နေ့မှာ တားမြစ်ကံကြမ္မာ နတ်ဆိုးဧကရာဇ် ငါ့ကို ခေါ်ဆောင်သွားတဲ့အထိပေါ့"

သူမ၏ သွေးရောင်မျက်ဝန်းများတွင် အလင်းရောင် တစ်ချက် လက်သွားသည်။

"ဆက်ပြော" ယွမ်ရှောင် နက်ရှိုင်းစွာ အသက်ရှူလိုက်သည်၊ သူ၏ အသံ ယုံကြည်ချက်ဖြင့် ပဲ့တင်ထပ်နေသည်။

"ငါက စိတ်နှလုံးသားထဲမှာ မင်းတို့လို လူသားတစ်ယောက်အဖြစ် ကိုယ့်ကိုကိုယ် မှတ်ယူတယ်။ ဒါပေမယ့် ငါက လူသားမျိုးနွယ်ကို မုန်းတီးတယ်။ စက်ဆုပ်ရွံရှာတယ်။ ကျယ်ဝန်းတဲ့ လူသားသေမျိုး လောကက လောကအားလုံးမှာ နတ်ဆိုးအဆန်ဆုံးပဲ။ မင်းက ဓားတစ်လက်နဲ့ လူသားမျိုးနွယ်ကို ကာကွယ်နေပေမယ့် သူတို့ရဲ့ကိုယ်တွင်းမှာ အမှောင်ထု၊ ရက်စက်ကြမ်းကြုတ်မှု နဲ့ လိမ်ညာလှည့်ဖြားမှု ဘယ်လောက်အထိ ရှိနေမယ်ဆိုတာ သိနိုင်ရဲ့လား။ မင်းအနေနဲ့ သေမျိုး လောကကိုရော မြင်ဖူးလား။ ငါ့လို ကံကြမ္မာဆိုးနဲ့ လူဘယ်လောက်များများ သေခဲ့ရပြီးပြီလဲ"

"အမြဲတမ်း လူသားတွေက နတ်ဆိုးတွေ ရက်စက်ကြမ်းကြုတ်တယ်လို့ ပြောနေကြပေမယ့် တောတွင်းဥပဒေအတိုင်း ရှင်သန်နေရုံသက်သက်ပါပဲ။ ကျားနတ်ဆိုးတွေတောင် ကိုယ့်ရင်သွေးကို မစားကြပေမယ့် လူသားတွေက ကိုယ်ကျင့်တရားအကြောင်း ပြောရင်း နတ်ဆိုးတွေထက် ရက်စက်ယုတ်မာတဲ့ လုပ်ရပ်မျိုးစုံ ကျူးလွန်နေကြတယ်"

သတို့သမီးအလောင်းက ယွမ်ရှောင်ထံ ချဉ်းကပ်လာရာ သွေးနီရောင် မြူခိုးများ သူ့ကို လွှမ်းခြုံသွားသည်။

"ဆက်ပြောပါ။ ငါနားထောင်ပေးနေပါတယ်"

ယွမ်ရှောင်က သူမကို တည်ငြိမ်စွာ စိုက်ကြည့်နေသည်။

"ဥပမာပြောရရင် သွေးကြာပန်း နတ်ဆိုးက လူသားတွေကို ဝါးမျိုဖို့ မွေးဖွားလာခဲ့ပြီး မရေမတွက်နိုင်အောင် စားသုံးခဲ့ပြီးဖြစ်တယ်။ ဒါပေမယ့် သေမျိုး လောကမှာ လူသားတွေကလည်း ကြာမြစ်ကို စားနေကြတာပဲ။ ဘာကြောင့် လူသားတွေကသာ ကြာကို စားသုံးခွင့်ရှိပြီး ကြာပန်းကတော့ လူသားစားခွင့် မရှိရတာလဲ။ သက်ရှိ အားလုံး ရှင်သန်မှုအတွက် ယှဉ်ပြိုင်တဲ့အခါ ကောင်းမှုနှင့် မကောင်းမှုကရော ခွဲခြားမှု ရှိသလား။ နတ်ဆိုးဧကရာဇ်တွေက လူသား ဝိညာဉ်ကို လှောင်ပိတ်ထားကြတယ်။ ဒါပေမယ့် လူ့ချမ်းသာတွေကလည်း သားရဲတွေကို ဖမ်းချုပ်ပြီး ကစားစရာအဖြစ် ဆက်ဆံကြတယ်။ သူတို့ရဲ့ ပြကွက်တွေကို အတင်းအကြပ်ခိုင်းစေပြီး ပျော်ရွှင်နေကြတာ မဟုတ်ဘူးလား"

ငိုရှိုက်ရင်း ရေရွတ်နေရာမှ သူမသည် ယွမ်ရှောင်၏ လက်ကို ညှင်သာစွာ ဆုပ်ကိုင်၍

မေးခွန်းထုတ်လိုက်ပြန်သည်။

"ယွမ်ရှောင်၊ ဒီလို သစ္စာမဲ့ပြီး ယုတ်မာရက်စက်တဲ့ လူသားမျိုးနွယ်ကို အသက်နဲ့ရင်းပြီး ကာကွယ်နေရတဲ့ အကြောင်းအရင်းက ဘာလဲ။ တိုက်ပွဲမှာ မင်းအနိုင်ရခဲ့ရင် သူတို့က ချီးကျူးကြပေမယ့် ရှုံးနိမ့်သွားရင်တော့ နင်းချေပြီး ဆဲဆိုကြမှာပဲ။ နတ်ဆိုးတိုက်ကြီးကတော့ စစ်သည်တော်တွေနဲ့ သူရဲကောင်းတွေကို တန်ဖိုးထားပြီး ငါတို့အားလုံး ရှုံးနိမ့်ခဲ့တာတောင်မှ ထာဝရဂုဏ်ပြုကြလိမ့်မယ်"

ဤစကားကို ကြားသောအခါ ယွမ်ရှောင် ရုတ်တရက် ပြုံးလိုက်ပြီး သတို့သမီးနတ်ဆိုး၏ စကားများကြောင့် ယိမ်းယိုင်သွားခြင်း မရှိပေ။

"နတ်ဆိုးတွေက ယုတ်မာပြီး လူသားမျိုးနွယ်က သူတော်ကောင်းပါလို့ ငါ သတ်မှတ်မထားဘူး။ နှစ်ဖက်လုံး အချင်းချင်း စားသောက်နေကြတာက မမှားပါဘူး။ ဒီနေ့တိုက်ပွဲမှာ မင်းတို့ရော ငါရော ကိုယ်ပိုင်ရပ်တည်ချက်တွေ ရှိကြတယ်။ ငါက လူသားတစ်ယောက်အဖြစ် မွေးဖွားလာလို့ နတ်ဘုရားတိုက်ကြီးအတွက် ရပ်တည်တယ်။ မင်းကို နတ်ဆိုးတိုက်ကြီးက ပြန်လည်ရှင်သန်စေလို့ နတ်ဆိုးမျိုးနွယ်အတွက် တိုက်ခိုက်ပေးတယ်။ လူသားတစ်ယောက်အနေနဲ့ မင်းကို ရန်သူ အဖြစ် သတ်မှတ်ထားတာကလည်း မမှားဘူး"

ယွမ်ရှောင်က သူမ၏ လက်ကို လွှတ်လိုက်ပြီး တည်ကြည်ခန့်ညားသော အသံဖြင့် ဆက်ပြောသည်။

" နတ်ဆိုးတိုက်ကြီးရဲ့ ကျင့်ကြံသူတွေက အစွမ်းထက်တယ်၊ စစ်တိုက်လိုစိတ် ရှိတယ်၊ ရဲရင့်တယ်။ ငါက မင်းတို့ကို မုန်းတီးပေမယ့် ပြိုင်ဘက်အဖြစ် လေးစားတယ်။ ဒါပေမယ့် ဘယ်လိုဖြစ်ဖြစ် ငါက နတ်ဆိုးမျိုးနွယ်ကို ချေမှုန်းပစ်ချင်တယ်"

သူ၏ စိတ်အတွင်းပိုင်း၌ တိမ်တိုင်းပြည်မှ ၁၆နှစ်တာ မှတ်ဉာဏ်များ ရှိနေပြီး ဘုရင်တစ်ယောက် ဖြစ်ခဲ့သောကြောင့် ပြည်သူများအပေါ် နတ်ဆိုးမျိုးနွယ် ကျူးလွန်ခဲ့သော ရက်စက်မှုများ မျက်မြင်ဖြစ်၍ ထိုအမုန်းတရားမှာ မနေ့တနေ့ကမှ ဖြစ်တည်လာခြင်း မဟုတ်ချေ။ လူသားများက ဆိုးရွားသော သတ္တဝါဖြစ်ကြောင်း သူ လက်ခံထားပြီး ယုတ်မာရက်စက်သူများစွာ ရှိသော်လည်း သာမန်လူအများစုမှာ ငြိမ်းချမ်းစွာ နေထိုင်လိုသူများပင်။

သတို့သမီးနတ်ဆိုး၏ မကျေနပ်မှု ခံစားချက်က ကြီးမားသောကြောင့် လူသားမျိုးနွယ် အားလုံးကို မုန်းတီးကာ နတ်ဆိုးများအတွက် တိုက်ခိုက်ရင်း နတ်ဆိုးတစ်ကောင် ကိုယ်တိုင် ဖြစ်လာခဲ့ခြင်းမှာ သူမအတွက် တရားမျှတခဲ့သည်။ ယွမ်ရှောင်က သူမကို ဆန့်ကျင်ခြင်းသည်လည်း မှန်ကန်ခဲ့ပြီး ယုံကြည်ချက်ချင်း ကွဲပြားနေရုံသာ ဖြစ်၏။

"မင်းရဲ့အမြင်အရ လူသားတွေကို စားသုံးခြင်း သဘာဝကျရင် လူသားတစ်ယောက်ရဲ့ ရှုထောင့်မှာလည်း နတ်ဆိုးတိုက်ကြီးကို ချေမှုန်းခြင်းက တရားမျှတယ်။ အမှန်တကယ် စက်ဆုပ်ဖို့ကောင်းတာက ကိုယ်ပိုင် မျိုးနွယ်ကို သစ္စာဖောက်တွေ ဖြစ်ကြတယ်။ ကြာပန်းနဲ့ လူသားက အချင်းချင်းစားသုံးရင် မမှားပေမယ့် လူသားစားဖို့ ကြာပန်းကို ကူညီတဲ့ လူသားတွေကတော့ မှားတယ်။ ဒါကြောင့် ရဲ ချင်းထျန် နဲ့ ခရမ်းရောင်ဧကရာဇ်လို လူတွေက အလွန် စက်ဆုပ်ဖွယ်ကောင်းတာပဲ"

ယွမ်ရှောင်က လူသားမျိုးနွယ်ဝင် ဖြစ်ပြီး ကံကြမ္မာသည် လူသားမျိုးနွယ်နှင့် ရစ်ပတ်နေသည်။ သူ၏ မိဘများနှင့် ဘိုးဘေးများလည်း လူသားများ ဖြစ်ခဲ့သောကြောင့် လူသားမျိုးနွယ်အတွက် တိုက်ခိုက်သည်။

"လူသားအဖြစ် မွေးဖွားခဲ့ပေမယ့် နတ်ဆိုးမျိုးနွယ်ဘက်မှာ ရပ်တည်နေတာက သေဒဏ်ထိုက်တဲ့ သစ္စာဖောက်မှုပဲ။ ဘိုးဘေးတွေကို စော်ကားလိုက်တာ ဖြစ်တယ်"

နောက်ဆုံးတွင် အချက်အလက်များက သက်သေပြနေသည်မှာ လူသားမျိုးနွယ်၌ သစ္စာဖောက်ထက် လူကောင်းအရေအတွက် ပိုများပြီး နတ်ဆိုးမျိုးနွယ်ဝင်တိုင်းမှာ ရက်စက်ကြမ်းကြုတ်သူများချည်း ဖြစ်ကြသည်။ ယွမ်ရှောင်၏ နှလုံးသားတွင် ယုံကြည်ချက် တစ်ခုတည်းသာ ရှိပြီး မည်သို့ပင်ဖြစ်စေ၊ နတ်ဆိုးများနှင့် ပေါင်းသင်းလျှင် လူသားဖြစ်စေကာမူ သုတ်သင်ရှင်းလင်းပေလိမ့်မည်။

တိမ်တိုင်းပြည်က သေးငယ်သော်လည်း ယွမ်မျိုးနွယ်၏ မျိုးရိုးစဥ်ဆက် ၎င်း၏ ပြည်သူများကို အမှုထမ်းခဲ့ကြပြီး မည်သည့်ကျင့်ကြံဆင့် ရောက်နေပါစေ၊ မိဘများ၏ ဆုံးမဩဝါဒများနှင့် ဘိုးဘေးများ၏ အမွေအနှစ်ကို မမေ့ခဲ့ပေ။ တိမ်တိုင်းပြည် တော်ဝင်မြို့တော်မှ အင်မော်တယ်စစ်ပွဲအထိ သူက သာမန်ပြည်သူများအတွက်သာ တိုက်ခိုက်နေခြင်းဖြစ်သည်။

ထို့နောက် ကျောက်ရန်ရန်၏ အသွင်ယူထားသော နတ်ဆိုးအပေါ် သူ၏ အကြည့်က အေးစက်တင်းမာသွားခဲ့သည်။

"မင်းပြောတာ မှန်ပါတယ်"

သူမက တပြိုင်နက် ရယ်မောရင်း ငိုကျွေးနေခဲ့ပြီး နတ်ဆိုးထောင်ချီ၏ မကျေနပ်မှုဖြင့် ယွမ်ရှောင်ထံ ပြေးဝင်တိုက်ခိုက်လာခဲ့၏။ ရှည်လျားသော သွေးနီရောင် လက်သည်းများက ဓားဖျားပမာ သေစေနိုင်လောက်ပြီး အနီးကပ်တိုက်ခိုက်ရာတွင် သူ၏ ဦးခေါင်းကို ပစ်မှတ်ထားနေသည်။ သို့သော် လနတ်သားက အဖြူရောင်မြူခိုးအဖြစ် မူရင်းကိုယ်ထံ ပေါင်းစည်းလိုက်သောအခါ သူ၏ ခွန်အား များစွာ မြင့်တက်လာခဲ့သောကြောင့် လက်သည်းကုတ်ချက်က မေးရိုးကို ထိမှန်သွားသော်လည်း မထိုးဖောက်နိုင်ဘဲ မီးပွားအချို့သာ စင်ထွက်ခဲ့သည်။

"လူသားတစ်ယောက်က ဒီလိုရုပ်ခန္ဓာကို ဘယ်လိုပိုင်ဆိုင်ထားတာလဲ"

သူမ၏ မျက်လုံးများ မယုံကြည်နိုင်မှုဖြင့် ပြူးကျယ်သွားကာ ရှေးဟောင်းဟင်းလင်းပြင် ကျင့်စဥ်နှင့် ပျက်စီးနတ်ခန္ဓာ၏ ပေါင်းစပ်စွမ်းအားကို မယှဥ်နိုင်တော့ပေ။ ယွမ်ရှောင်က ဓားဖြင့် အနီးကပ် ထိုးချလိုက်ပြီး သတို့သမီးနတ်ဆိုး၏ လည်ချောင်းကို ဖောက်ထွက်သွားကာ လက်တစ်ချက်အယမ်းတွင် ဓားအော်ရာ လေးရာကြောင့် တစ်ကိုယ်လုံး ပေါက်ကွဲသွားခဲ့သည်။

ဓားဖျားတွင် ဆယ့်ငါးနှစ်အရွယ် သေးသွယ်ပိန်လှီသော မိန်းကလေးတစ်ဦး၏ ဝိညာဥ်က နာကျင်စွာ ငိုကြွေးနေသည်။ ဤပုံရိပ်က အရှင်လတ်လတ် မြှုပ်နှံခံခဲ့ရသော မိန်းကလေး ဖြစ်ကာ သူမ၏ နာကျင်မှုနှင့် ဝမ်းနည်းပူဆွေးမှုများသည် မျက်ဝန်းတွင် ထင်ရှားနေ၏။

"မင်းရဲ့ နာမည်က ဘာလဲ"

ယွမ်ရှောင်က မေးသည်။

"ရှောင်ချန်"

ပိန်လှီသော မိန်းကလေးဝိညာဥ်၏ မျက်လုံးများမှာ ဗလာဖြစ်နေပြီး မျက်ရည်များအလွန်အကျွံ ကျဆင်းခဲ့ရသဖြင့် မျက်ဆံပျောက်ကွယ်သွားရခြင်းပင်။

"ပြန်လည်ဝင်စားလိုက်ပါ။ မင်း ကံကောင်းဖို့ ငါ ဆုတောင်းပေးပါတယ်။ နောက်ဘဝမှာ မင်းရဲ့ မိသားစုက မင်းကို ချစ်ခင်ပြီး ချမ်းသာကြွယ်ဝပါစေ"

ယွမ်ရှောင်က သက်ပြင်းတစ်ချက်ချ၍ ခပ်အက်အက်အသံဖြင့် သူမ၏ထွက်သက်ကို ပို့ဆောင်ပေးလိုက်သည်။

"တကယ်လို့ ငါသာ နတ်ဆိုးတိုက်ကြီးကို အောင်နိုင်ခဲ့ရင် သေမျိုး လောကကို ပြုပြင်ရန်၊ နတ်ဘုရားတိုက်ကြီးရဲ့ ဥပဒေကို အားကောင်းအောင် လုပ်ရန် နဲ့ မကောင်းမှု ကျူးလွန်သူများကို ပြင်းထန်စွာ အပြစ်ပေးရန် ကတိပြုပါတယ်"

ယွမ်ရှောင်က လေးနက်စွာ ကတိပေးလိုက်သည်။

"ကျေးဇူးတင်ပါတယ်နော်…"

ရှောင်ချန်၏ ငိုသံက ရပ်တန့်သွားကာ သူ့ကို လက်ဝှေ့ယမ်း နှုတ်ဆက်ရင်း သံသရာစက်ဝိုင်းသို့ ဝင်ရောက် ပျောက်ကွယ်သွားခဲ့သည်။

"လူသားတစ်ယောက်အနေနဲ့ ပြောရရင် မင်းက တကယ့်လူကောင်းတစ်ယောက်ပါ။ ယွမ်ရှောင်"

ယွမ်ရှောင်မှာ ဓားသွားကို လေထဲတွင် ဆန့်တန်းလျက်သား အချိန်ကြာမြင့်စွာ ငေးငိုင်နေခဲ့မိလေသည်။