ယုတ်မာပက်စက်သော အကြံ

"သတ်"

တစ်ခုတည်းသော စကားလုံးကြောင့် ဓားကျင့်ကြံသူ တစ်သိန်း၏ မျက်လုံးများ ချက်ချင်း အနီရောင် ပြောင်းသွားကာ

တစ်ခဏအတွင်း ဓားဝိညာဉ် တစ်သိန်း ရှေ့သို့ ထွက်ပေါ်လာသည်။ ဓားတွင် ပထမဆုံး သွေးတစ်စက် စွန်းထင်းသွားသည်နှင့် နောက်ပြန်လှည့်ရန် လမ်းမရှိတော့ပေ။ ဓားကျင့်ကြံသူများသည် ဒေါသဖြင့် မဟာကျောင်းတော်၏ လိမ်လည်လှည့်ဖြားပြီး သစ္စာမဲ့သော ကျောင်းသားများကို ရင်ဆိုင်ရန် ဓားကိုယ်စီဆွဲ၍ အနီးကပ် တိုက်ပွဲသို့ ပြေးဝင်တိုက်ခိုက်လိုက်ကြသည်။

အနီးကပ် အကွာအဝေးတွင် ဓားသမားများက အသာစီး ရရှိသောကြောင့် ခေါင်းများ ပြတ်ထွက်ကုန်ပြီး တစ်ခဏအတွင်းမှာပင် မရေမတွက်နိုင်သော ဓားမြှောင်များ လေထဲသို့ ပြေးထွက်လာသကဲ့သို့ သွေးချောင်းစီးသွားသည်။

"လူသတ်နေပါတယ်"

"ဒီဓားကျင့်ကြံသူတွေက သစ္စာဖောက်မှု ကျူးလွန်ခဲ့ပြီ"

မဟာကျောင်းတော်၏ တပည့်များစွာက အသက်ရှင်နေလျှင် ချက်ချင်းပြစ်တင် ရှုံ့ချမည်ဖြစ်သော်လည်း စိတ်ပျက်အားငယ်စွာ အော်ဟစ်၍ ထွက်ပြေးလိုက်ကြ၏။ ဓားကျင့်ကြံသူများဘက်မှ တိုက်ခိုက်သည်ဖြစ်စေ ခုခံသည်ဖြစ်စေ အစီအစဉ်၏ တစိတ်တပိုင်း ဖြစ်ကာ အချိန်တိုအတွင်း ကျောင်းတော်သားအများအပြား ဦးခေါင်းဖြတ်ခံခဲ့ရသော်လည်း သူတို့အနေဖြင့် လက်ခံနိုင်သည်။

"ဓားကျင့်ကြံသူတွေက တော်ဝင်အမိန့်တော်ကို ဆန့်ကျင်ပြီး ပြည်ထောင်ရဲ့အနာဂတ် ကျောင်းတော်သားတွေနဲ့ ပြည်သူတွေကို သတ်ဖြတ်နေတယ်။ ဒီပြစ်မှုကို ခွင့်လွှတ်ပေးလို့ မရဘူး။ ဘိုးဘေးကျောင်းတော်ရဲ့ အစောင့်တွေ သူတို့ကို ချေမှုန်းလိုက်စမ်း"

ဝန်ကြီးချုပ် ယိုဖုန်းက ဤ မြင်ကွင်းကို အစမှ အဆုံးအထိ အေးစက်စက် စောင့်ကြည့်နေခဲ့ပြီး ဓားကျင့်ကြံသူများဘက်မှ လှုပ်ရှားမှုတစ်ခု ပြုလုပ်သည်နှင့်တပြိုင်နက် အခွင့်ကောင်းယူ ကြေညာခဲ့သည်။ မဟာကျောင်းတော်သားများ ထွက်ပြေးနေကြပြီး ဤ လူငယ်များတွင် တိုက်ခိုက်ရန် စစ်မှန်သော ရည်ရွယ်ချက် မရှိခဲ့ပေ။ သူတို့ ထိတ်လန့်တကြား ထွက်ပြေးသွားကြသောအခါ ခဏအတွင်း လေးလံသော ချပ်ဝတ်တန်ဆာ ကိုယ်စီ ဝတ်ဆင်ထားသည့် ဘိုးဘေးကျောင်းတော် အစောင့်တပ်ဖွဲ့သည် ကြောက်မက်ဖွယ် အင်အားအရေအတွက် ငါးသိန်းဖြင့် သူတို့၏ မျက်လုံးများရှေ့တွင် ပေါ်ထွက်လာခဲ့သည်။ ၎င်းက ဘိုးဘေးကျောင်းတော်၏ ကိုယ်ပိုင် စစ်တပ် ဖြစ်ပြီး ကောင်းကင်နယ်မြေ၏ မျိုးနွယ်ကြီးများမှ လူငယ် အဖွဲ့ဝင်များဖြင့် ဖွဲ့စည်းထား၍ အများအားဖြင့် အသက် နှစ်ဆယ်ကျော် လူငယ်များ ဖြစ်ကာ တိုက်ခိုက်ရေး အတွေ့အကြုံ ကြွယ်ဝသကဲ့သို့ တစ်နှစ်ပတ်လုံး တိုက်ခိုက်ရေးရည်ရွယ်ချက်ဖြင့် စနစ်တကျ ဖွဲ့စည်းထားသည်။

ဘုန်း ဘုန်း ဘုန်း

ဘိုးဘေးကျောင်းတော်၏ အစောင့် ငါးသိန်းက အလံတလူလူဖြင့် တရားဝင် ပွဲထွက်လာကာ ဖိနှိပ်ချုပ်ချယ်၍ အာဏာရှင်ဆန်သော အရှိန်အဝါသည် ပတ်ဝန်းကျင်တစ်ခုလုံးကို လွှမ်းခြုံသွားသည်။

"သစ္စာဖောက်ကို ကွပ်မျက်ပြီး ဓားတာအိုကျောက်တိုင်ကို ဖြိုလှဲလိုက်စမ်း"

ယိုဖုန်း၏ အမိန့်အောက်တွင် သူတို့က အကြည့်တင်းမာစွာဖြင့် ဓားကျင့်ကြံသူ တစ်သိန်းအပေါ် စူးစိုက်၍ တပြိုင်နက်တည်း ဟိန်းဟောက်ပြီး ဖိနှိပ်ရန် ပြေးဝင်တိုက်ခိုက်လာကြသည်။

"ဘာတွေ ဖြစ်နေတာလဲ။ ဘယ်သူက သစ္စာဖောက်မှု ကျူးလွန်နေတာလဲ"

ကောင်းကင်နယ်မြေ၏ ပြည်သူများ မင်သက်ကုန်ပြီး အများစုမှာ လုံးဝ ရှုပ်ထွေးနေကြသည်။ မဟာကျောင်းတော် ကျောင်းသားများနှင့် ဘိုးဘေးကျောင်းတော် အစောင့်များ၊ အဇူရာသစ်ရွက် အဖွဲ့၏ အဖွဲ့ခွဲများက အရုဏ်တက်နတ် ဧကရီ၏ အလံကို အသုံးပြုနေသောကြောင့်ပင်။

"သူတို့က အရှင်မရဲ့ အမည်ကို အသုံးပြုပြီး ဓားတာအိုကျောက်တိုင်ကို ဖြိုလှဲချင်နေတယ်။ ငါတို့က ဒီအချက်ကြောင့် ဧကရီကို ဆန့်ကျင်လိမ့်မယ်လို့ ထင်နေသလား။ သူတို့က ငါတို့ကို အရူးလို့ သတ်မှတ်ထားတာလား"

"ဝန်ကြီးချုပ်ယိုက သေလမ်း ရှာနေတာပဲ"

ထိုအခိုက်အတန့်တွင် ပြည်သူများက အကြမ်းဖျင်း နားလည် သဘောပေါက်သွားခဲ့ကြသည်။ ထို့နောက် ဘိုးဘေးကျောင်းတော်မှ မျိုးနွယ်ခေါင်းဆောင် ဒါဇင်ပေါင်းများစွာကို ရဲချင်းထျန်က ဦးဆောင်၍ ပျော်ရွှင်စရာ တည်းခိုခန်းမှ ထွက်လာကြသည်။

"ဘာတွေ ဖြစ်နေတာလဲ၊ ဝန်ကြီးချုပ် ယို"

ရဲ ချင်းထျန်သည် အေးစက်စွာ မေးလိုက်ပြီး လက်ဝါးရိုက်ထားသည့်အတိုင်း ယိုဖုန်းက ရှင်းပြလိုက်သည်။

" အမိန့်တော်ကို ဆန့်ကျင်ခြင်း၊ အချုပ်အခြာအာဏာကို ဆန့်ကျင်၍ ပရမ်းပတာဖြစ်ရပ် ဖန်တီးခြင်း၊ ငါတို့ရဲ့ ဆွေမျိုးတွေကို သတ်ဖြတ်ခြင်း ဒီအပြစ်တွေကြောင့် သူတို့က သေဆုံးဖို့ ထိုက်တန်တယ်"

ရဲ ချင်းထျန်က ဓားသူတော်စင်စွန်းကို ဒေါသဖြင့် စိုက်ကြည့်၍ အော်ဟစ်လိုက်သည်။

"ဘိုးဘေးကျောင်းတော် အစောင့်တွေ ငါ့အမိန့်ကို လိုက်နာစမ်း။ ငါတို့ ပြည်ထောင်အတွက် မကောင်းဆိုးဝါးကို သုတ်သင်ကြ"

"ငါတို့ မဟာကျောင်းတော်ကလည်း မကောင်းဆိုးဝါးကို သုတ်သင်ဖို့ ကတိပြုတယ်"

"ငါတို့ အင်မော်တယ် ဌာနခွဲ ခြောက်ခုလည်း မကောင်းဆိုးဝါးကို သုတ်သင်မယ်"

"တာအိုအိမ်တော်က အပြစ်ပေးဖို့ ပူးပေါင်းပါတယ်"

မူတန်းရှီ နှင့် အခြားသူများက အရုဏ်တက်နတ်အင်မော်တယ်နတ်ပြည်ထောင်ကို ကိုယ်စားပြုဟန်ဖြင့် ဓားကျင့်ကြံသူများအပေါ် တရားစီရင်နေကြသည်။ အခြေအနေ ရှင်းလင်း၍ အဇူရာ သစ်ရွက်အဖွဲ့က ပေါ်ပေါ်တင်တင် ပုန်ကန်နေခြင်းပင်။ အရုဏ်တက်နတ် ဧကရီက ဓားကျင့်ကြံသူများကို ဆန့်ကျင်သော အမိန့်တော်တစ်ခု အမှန်တကယ် ထုတ်ပြန်ခဲ့ခြင်းမှာ မဖြစ်နိုင်ချေ။

"ကွပ်မျက်လိုက်စမ်း"

အဇူရာ သစ်ရွက် အဖွဲ့၏ အင်အား အများအပြား ကောင်းကင်မှ ဆင်းသက်လာကြသည်။ ရဲချင်းထျန်က လက်ပိုက်လျက် ရပ်နေပြီး အေးစက်စက် အပြုံးတစ်ခုဖြင့် ဓား သူတော်စင် စွန်းကို စောင့်ကြည့်နေခဲ့သည်။ မူတန်းရှီ၊ ယို ဖုန်း နှင့် ရဲ ချင်းလီက အရှိန်အဝါကိုယ်စီ ထုတ်ဖော်၍ နန်းကုန်းရှီ၊ ရောင် ယွဲ့ နှင့် စုလန်လန်အပေါ် ဖိနှိပ်လိုက်သည်။ ဘိုးဘေးကျောင်းတော် အစောင့် နှင့် မဟာကျောင်းတော်၏ ကျောင်းသား ငါးသိန်းကျော်အင်အားက ဓားကျင့်ကြံသူ တစ်သိန်းကို ပတ်ပတ်လည်မှ ဝိုင်းထားကြသည်။ ကျောင်းတော်သား သောင်းပေါင်းများစွာက ဘိုးဘေးကျောင်းတော် နောက်ခံဖြင့် ဓားတာအိုကျောက်တိုင်ကို ဖြိုလှဲရန် တိုက်ရိုက် အသင့်ပြင်ထားကြ၏။

"ဒီကျောက်တိုင်က အပြစ်သားတွေရဲ့ အထိမ်းအမှတ်ဖြစ်လို့ ကောင်းကင်နယ်မြေနဲ့ မထိုက်တန်ဘူး။ ဖျက်ဆီးလိုက်စမ်း"

လီရှီရှီက ဘီလီယံချီသော ဓားချက်များကို စိုက်ကြည့်ပြီး အောင်ပွဲခံ အပြုံးတစ်ခု ပြုံးလိုက်သည်။

ဘုန်း ဘုန်း ဘုန်း

ကျောင်းတော်သားများစွာက ချီစွမ်းအားထုတ်ဖော်၍ ဂါထာပေါင်းများစွာ ဖန်တီးကာ ဓားတာအိုကျောက်တိုင်ကို တရစပ်တိုက်ခိုက်ခဲ့သည်။ ၎င်းက ပြင်းထန်စွာ တုန်ခါသွား၍ မြေပြင်၌ ပင့်ကူအိမ်ပမာ ကွဲအက်သွားသကဲ့သို့ ရှေးဟောင်း ဓားချက်များသည် ခေတ်အဆက်ဆက် လေနှင့် မိုးဒဏ် ခံနိုင်ရည်ရှိခဲ့သော်လည်း မရေမတွက်နိုင်သော ဂါထာများ၏ မရပ်မနား တိုက်ခိုက်မှုအောက်တွင် ဖုန်မှုန့်အဖြစ် ပေါက်ကွဲစပြုလာသည်။

"အား အား အား"

ကျောက်တိုင်ပေါ်ရှိ ဝိညာဉ်များထံမှ ထိတ်လန့်တကြားဖြင့် စူးရှပြီး နားမလည်နိုင်သော ငိုသံများ ထွက်ပေါ်လာကာ ၎င်းကို ဖျက်ဆီးနေသည့် အင်မော်တယ်ပြည်ထောင်၏ လူငယ်မျိုးဆက်များကို မယုံကြည်နိုင်ဟန် ဝမ်းနည်းစွာ စိုက်ကြည့်နေကြသည်။ သွေးမျက်ရည်များ တတောက်တောက် ကျဆင်းသွားကာ တိုက်ခိုက်မှုများကြောင့် မြေပြင်ကို မထိမီ ပျောက်ကွယ်သွားခဲ့သည်။

"မုန်းတီးလိုက်စမ်း။ မကျေမနပ်ဖြစ်လိုက်စမ်း။ လောကမှာ အစွမ်းထက်ဆုံး နတ်ဆိုးက အမြဲတမ်း မကျေနပ်မှုမှ မွေးဖွားလာကြတယ်။ မင်းတို့ရဲ့ မကျေနပ်မှုက ထာဝရတည်မြဲပြီး လူသားမျိုးနွယ်ရဲ့ မတရားမှုနဲ့ သစ္စာဖောက်မှုကြောင့် ဒီလောကကြီးကို ကာကွယ်မယ့်အစား ဖျက်ဆီးရမယ်။ မင်းတို့က ကောင်းကင်နယ်မြေကို မျိုးဆက်ပေါင်းများစွာ ထောင်စုနှစ်ချီအောင် စောင့်ကြပ်ခဲ့ပေမယ့် မျိုးဆက်သစ်တွေက ဓားတာအိုကျောက်တိုင်ကို ဖျက်ဆီးနေပြီ။ သူတို့က ဒါကို ကျိန်စာတစ်ခုအဖြစ် ရွံရှာနေတာ ဝမ်းနည်းစရာ မဟုတ်ဘူးလား။ နာကျင်မှုလား။ ဒေါသလား။ မုန်းတီးမှုလား။ နတ်ဆိုးတစ်ကောင် ဖြစ်လာရင် မင်းတို့က မတရားပြုခဲ့သူတွေကို အပြင်းထန်ဆုံး တန်ဖိုး ပေးဆပ်စေနိုင်လိမ့်မယ်"

လီရှီရှီက တုန်ခါနေသော ဓားတာအိုကျောက်တိုင်အောက်တွင် ရပ်နေပြီး သူမ၏ လက်ချောင်းများဖြင့် ၎င်းကို ပွတ်သပ်ရင်း ထူးဆန်းစွာ ရယ်မောနေခဲ့သည်။

"အဆုံးမရှိတဲ့ မကျေနပ်မှုက နတ်ဆိုးတစ်ကောင်အဖြစ် ပြောင်းလဲသွားတယ်။ ဘာကြောင့် တရားမျှတမှုအတွက် ထောင်စုနှစ်များစွာ သည်းခံနေရာမှာလဲ။ ဒီလောကမှာ မင်းတို့အတွက် ဘာမှမမရှိတော့ဘူး။ ဒုက္ခခံရတဲ့အတွက် မုန်းတီးပစ်လိုက်စမ်း"

ဓားတာအိုကျောက်တိုင်ပေါ်တွင်၊ ဘီလီယံချီသော ဓားချက်များသည် ပြင်းထန်သော ဝေဒနာမျက်ရည်များ ကျဆင်း၍ တုန်ခါနေကာ ငိုသံများ ကောင်းကင်နယ်မြေတစ်ခွင် ပဲ့တင်ထပ်နေသည်။

"နတ်ဆိုးတစ်ကောင် ဖြစ်လာစမ်း။ မင်းတို့က လောကရဲ့ အစွမ်းထက်ဆုံး နတ်ဆိုး ဖြစ်လာရမယ်။ မင်းတို့အပေါ် ယုံကြည်မှုကို စွန့်ပစ်ခဲ့သူ အားလုံးကို ပေးဆပ်ခိုင်းလိုက်"

လီရှီရှီ၏ အေးစက်စက် စကားသံများက မဟာကျောင်းတော်သားများ၏ ရူးသွပ်သော ဟိန်းဟောက်သံများနှင့် ရောနှောကာ ယိမ်းထိုးနေသော ဓားတာအိုကျောက်တိုင်ကို ထပ်ခါထပ်ခါ သွေးထိုးလှုံ့ဆော်နေခဲ့၏။ ထည်ဝါမြင့်မားသော ကျောက်တိုင်သည် သက်ရှိ သတ္တဝါကဲ့သို့ တိုက်ခိုက်မှုတိုင်း၌ လူသား သွေးများ စီးကျလာသည်။

"အောင်း ဝေါင်း"

ဓားတာအိုကျောက်တိုင် တစ်ခုလုံး တဖြည်းဖြည်း သွေးများဖြင့် စွန်းထင်းလာနေပြီး ဘီလီယံချီသော ဝိညာဉ်များ နာကျင်မှုစွာ အော်ဟစ်လိုက်သောကြောင့် ကြားရသူတိုင်း၏ စိတ်နှလုံးကို ထိခိုက်စေသည်။ ဓား သူတော်စင် စွန်း၊ သခင်မ သုံးဦး နှင့် ဓားကျင့်ကြံသူ တစ်သိန်းသည် ဤအော်သံများကြောင့် သူတို့၏ နှလုံးသားများမှ သွေးထွက်လာသကဲ့သို့ ခံစားလိုက်ရသည်။ သူတို့က ရူးသွပ်စွာ ပြေးဝင်တိုက်ခိုက်ကြလိုက်ကြသော်လည်း ဘိုးဘေးကျောင်းတော် အစောင့် ငါးသိန်းဖြင့် တားဆီးခံနေရသည်။ ဓားဝိညာဉ်များ ဖြတ်သန်းသွားသည့်နေရာတိုင်း မရေမတွက်နိုင်သော အလောင်းများ ကျဆုံးကာ ဓားဝိညာဉ် တစ်သိန်း၏ ပူးပေါင်းမှုသည် ဘိုးဘေးကျောင်းတော် အစောင့် သောင်းပေါင်းများစွာကို ချက်ချင်း ဦးခေါင်းဖြတ်လိုက်နိုင်သည်။ ကြမ်းတမ်းသော ဓားကျင့်ကြံသူများကြောင့် ရန်သူများကို တုန်လှုပ်သွားစေပြီး အသာစီး ရသည်ဟု ထင်ခဲ့သော ထို ဘိုးဘေးကျောင်းတော် အစောင့်များကိုပင် ထိတ်လန့်တကြား ဖြစ်စေခဲ့သော်လည်း အရေအတွက်ချင်း အလွန် ကွာခြားနေဆဲဖြစ်သည်။

"သူတို့ကို တားဆီးထားစမ်း"

မှော်ပညာဖြင့် ဖန်တီးထားသော မုန်တိုင်း နဂါး ဒါဇင်ပေါင်းများစွာက ဓား သူတော်စင် စွန်း နှင့် အခြားသူများရှေ့သို့ ထိုးကျလာကာ ရှေ့တန်းမှ တိုက်ပွဲဝင်နေသည့် ဓားကျင့်ကြံသူများကို လွင့်စင်သွားစေသည်။ ရဲချင်းထျန် လှုပ်ရှားလိုက်ခြင်းဖြစ်ကာ ဓားသူတော်စင်စွန်းကို ရန်စလိုက်၏။

"အဘိုးကြီး နောက်ဘဝလိုက်သွားပြီး မင်းရဲ့မိသားစုနဲ့ သွားတွေ့ဖို့ အရှုံးပေးစမ်း"

"ရဲ ချင်းထျန်"

ဓား သူတော်စင် စွန်း၏ မျက်လုံးများ သွေးနီရောင် သန်းနေကာ သုံးရောင်ခြယ် ဓားဝိညာဉ်ကို ဆုပ်ကိုင်လျက် အရူးတစ်ယောက်ကဲ့သို့ ပြေးဝင်တိုက်ခိုက်ခဲ့သည်။

ရဲချင်းထျန်က တစ်ဖက်လူကို ဒေါသထွက်စေရန် အဆက်မပြတ်လှောင်ရယ်ရင်း နဂါးပုံသဏ္ဌာန် ရွှေရောင် တင်းပုတ်တစ်ခုကို ဆင့်ခေါ်ကာ ရင်ဆိုင်လိုက်၏။ သုံးရောင်ခြယ် ဓားနှင့် နဂါးပုံသဏ္ဌာန် ရွှေရောင် တင်းပုတ် ထိပ်တိုက်ရင်ဆိုင်မိသောအခါ မီးပွားများ စင်ထွက်လာသည့်အပြင် လည်ချောင်းကို ထိုးဖောက်လုနီးပါးဖြစ်သွားကာ သွေးစင်းကြောင်းတစ်ခု ဖြစ်ပေါ်လာ၏။

"ဒီအဘိုးကြီးက ဘာလို့ ဒီလောက် အားကောင်းနေရတာလဲ"

ရဲချင်းထျန်က ကြောက်စိတ်ကြောင့် ချွေးစို့သွားကာ မြင့်မြတ်ချီကို စုစည်း၍ ပြန်လည်တိုက်ခိုက်နေရသကဲ့သို့ သခင်မသုံးယောက်နှင့် ယိုဖုန်းတို့ လူစုလည်း တိုက်ပွဲဝင်နေကြသည်။

ဓားကျင့်ကြံသူ တစ်သိန်းက မျက်လုံးများ ဒေါသဖြင့် နီရဲနေပြီး ရှင်ခြင်း နှင့် သေခြင်းကို လုံးဝ လျစ်လျူရှုထားကြသည်။

"သတ်စမ်း"

အမြဲ ဖိနှိပ်ထားခဲ့သော ကြမ်းတမ်းမှုနှင့် ဒေါသစိတ်က ဤအခိုက်အတန့်တွင် ပေါက်ကွဲထွက်လာပြီး ထိုအခါမှသာ ဓားကျင့်ကြံသူများ၏ ကြမ်းတမ်းမှုနှင့် ပြင်းထန်မှုကို နတ်ဆိုးလက်ပါးစေ ပြန်လည် သတိရသွားကြ၏။ ဘိုးဘေးကျောင်းတော် အစောင့် ငါးသိန်းက နောက်ဆုတ်ပေးနေရပြီး အဘိုးအိုတစ်ဦး နှင့် အမျိုးသမီး သုံးဦးသည် ကောင်းကင်နယ်မြေ၏ မျိုးနွယ်ကြီးများ ရင်ဆိုင်၍ ဘိုးဘေးကျောင်းတော် တစ်ခုလုံးကို ဆန့်ကျင် ရပ်တည်နေကြသည်။ သူတို့၏ ဓားများ ဖြတ်သန်းသွားသည့်နေရာတိုင်း သွေးများ အဆက်မပြတ် စီးဆင်းနေသည်။ ဓားကျင့်ကြံသူများ၏ ပြတ်သားမှုကို လျှော့တွက်ခဲ့သော ရဲချင်းထျန် မျက်မှောင်ကြုတ်လိုက်ပြီး အနက်ရောင်စက်လုံးတစ်ခုကို လီရှီရှီထံ ပစ်ပေးလိုက်သည်။ ၎င်းက နတ်ဆိုးဧကရာဇ်များ ပေးအပ်ထားသော ငရဲ မိစ္ဆာဖြစ်ပြီး သူမသည် ဖမ်းယူ၍ ဓားတာအိုကျောက်တိုင်အနား ချဥ်းကပ်ခဲ့သည်။ မဟာကျောင်းတော်သား သောင်းပေါင်းများစွာ၏ တိုက်ခိုက်မှုအောက်တွင် ကောင်းကင်နယ်မြေတွင် ခေတ်အဆက်ဆက် ရပ်တည်၍ မရေမတွက်နိုင်သော မျိုးဆက်များကို စောင့်ကြည့်ခဲ့သော ဘီလီယံချီသော သူရဲကောင်း ဝိညာဉ်များ၏ အထိမ်းအမှတ် ကျောက်တိုင်သည် နောက်ဆုံးတွင် ဝုန်းခနဲ ပြိုလဲသွားခဲ့သည်။

" အခုကစပြီး မင်းက ဘီလီယံချီတဲ့ မကျေနပ်မှုတွေကို ဝါးမျိုလိုက်ရင် အသန်မာဆုံး နတ်ဆိုး ဖြစ်လာလိမ့်မယ်။ မင်းက ကောင်းကင်နယ်မြေမှာ ပရမ်းပတာ ဖြစ်အောင် လုပ်တဲ့အခါ၊ အပြစ် အားလုံးကို အရုဏ်တက်နတ်ဧကရီအပေါ် အပြစ်ပုံချဖို့ မမေ့နဲ့"

သူမက ငရဲမိစ္ဆာကို မှာကြား၍ ဓားတာအိုကျောက်တိုင်နှင့် တစ်သားတည်းဖြစ်သွားစေရန် ပေါင်းစည်းလိုက်သည်။ ထိုအချိန်၌ တစ်ကမ္ဘာလုံး တိတ်ဆိတ်သွားကာ တိုက်ပွဲများ၊ သွေးထွက်သံယိုဖြစ်ရပ်များ နှင့် အလောင်းများ အားလုံး ရပ်တန့်သွားပုံရပြီး ဓားကျင့်ကြံသူများ၏ နှလုံးသားများသာ ကြေမွခဲ့ရသည်။

"ဝေါင်း"

လဲကျနေသော ဓားတာအိုကျောက်တိုင်မှ သွေးများ စွန်းထင်းနေသည့် နတ်ဆိုးတစ်ကောင် စူးရှစွာ ဟိန်းဟောက်ရင်း တွားသွားထွက်ပေါ်လာခဲ့လေသည်။