ကြယ်နှစ်ပွင့်အကြားမှ တိုက်ပွဲ

"ကျေးဇူးပြုပြီး စိတ်ကိုထိန်းစမ်းပါ။ ဒါက နားလည်မှုလွဲသွားလို့ စိတ်မကောင်းပါဘူး။ ဒီလုပ်ရပ်က ယွမ်ရှောင်တစ်ယောက်တည်းနဲ့ သက်ဆိုင်ပြီး ပြင်းပြင်းထန်ထန် အပြစ်ပေးလိုက်ပါမယ်"

အရုဏ်တက်နတ် ဧကရီက အကူအညီမဲ့သော မျက်နှာထားဖြင့် တောင်းပန်လိုက်သော်လည်း အရေးစိုက်ပုံမရချေ။

"ဘယ်လို ပြင်းပြင်းထန်ထန် အပြစ်ပေးမှာလဲ"

ကူဧကရာဇ်က အေးစက်စွာ မေးလာသဖြင့်

စုဝေးနေသော လူအုပ်ရှေ့တွင် အရုဏ်တက်နတ် ဧကရီက ကြေညာခဲ့သည်။

"ယွမ်ရှောင်က မဆင်မခြင် ပြုမူခဲ့ပြီး အင်မော်တယ်နတ်ပြည်ထောင်ရဲ့ ဧည့်သည်ကို အကြောင်းမဲ့ သတ်ဖြတ်ခဲ့တယ်။ သူက ဒီလောကအတွက် ကူညီပေးခဲ့ရင်တောင် ရာဇဝတ်ဘေးမှ မလွတ်မြောက်စေရဘူး။ ဒါကြောင့် သူ့ကို နန်းတော်အတွင်း ချုပ်နှောင်ထားပြီး ကျင့်ကြံမှု ဖျက်ဆီးလို့ အပြစ်ဒဏ်ကို ကိုယ်တိုင် ကြီးကြပ် ဆုံးဖြတ်မယ်။ သူရဲ့ ဘဝတစ်လျှောက်လုံး အခြားလူတွေကို မြင်တွေ့ခွင့် ရရှိမှာ မဟုတ်ဘူး"

"ဒါဆိုရင် သူ့ကို အခု ကိုင်တွယ်လိုက်ပါ"

ကူဧကရာဇ် တောင်းဆိုလိုက်ပြီး ယွမ်ရှောင်၏ ကျင့်ကြံခြင်း ဖယ်ရှားခံရသည်ကို သူ၏ ကိုယ်ပိုင် မျက်လုံးများဖြင့် မြင်တွေ့လိုသည်။ တစ်ဖက်လူ အစွမ်းမဲ့သွားသည်နှင့် ခြိမ်းခြောက်မှု မဟုတ်တော့ဘဲ လက်စားချေခြင်းအတွက်မူ နတ်ဆိုးတိုက်ကြီး ကိုယ်တိုင် ကိုင်တွယ်နိုင်သည်။ ယွမ်ရှောင် ယခင်က ကုန်းမင်ကို သတ်ဖြတ်ခဲ့ခြင်းသည် အကြောင်းပြချက်ကောင်းသောကြောင့် နတ်ဆိုးတိုက်ကြီးအနေဖြင့် လက်စားချေရန် မသင့်တော်သော်လည်း ဤတစ်ကြိမ်တွင် သူတို့ဘက်မှ အသာစီး ရရှိခဲ့သည်။

"ကူဧကရာဇ်၊ အင်မော်တယ်စစ်ပွဲရဲ့ စစ်မြေပြင် ဖွင့်လှစ်ပြီးဖြစ်တယ်။ အချိန်တန်ရင် ပိတ်လိမ့်မယ်။ အဲ့အချိန်ကျမှ သူ့ရဲ့ ကျင့်ကြံမှုကို ဖယ်ရှားမယ်"

အရုဏ်တက်နတ် ဧကရီက တည်ငြိမ်စွာ ပြောလိုက်သဖြင့် စိတ်ရှည်သော ကူဧကရာဇ်ပင် ဤစကားကို ကြားသောအခါ ဒေါသကို ထိန်းချုပ်ရန် ရုန်းကန်နေရသည်။ နတ်ဆိုးမျိုးနွယ် ဒေါသထွက်နေသည့်တိုင်အောင် ယွမ်ရှောင်ကို အပြစ်ပေးရန် တစ်နာရီ စောင့်ဆိုင်းရဦးမည်ဖြစ်ရာ သည်းခံနိုင်မည် မဟုတ်သည့်အပြင် ခွေးခေါင်းပြတ်ကို ဆက်ကြည့်နေရပေလိမ့်မည်။

ဘုန်း

လနတ်ဆိုး ဧကရာဇ်က စစ်မြေပြင်၏ ဖွဲ့စည်းပုံကို ချိုးဖျက်ရန် နောက်တစ်ကြိမ် ကြိုးစားခဲ့သော်လည်း မအောင်မြင်ခဲ့ပေ။

အတွင်း၌ ယွမ်ရှောင်က လက်ထဲတွင် ခွေးခေါင်းတစ်လုံးကို ကိုင်ဆောင်ထားရင်း တစ်ဖက်လူကို နှာခေါင်းရှုံ့၍ လှောင်ပြောင်နေသည်။

"ဘာကိစ္စရှိလို့လဲ၊ လနတ်ဆိုး ဧကရာဇ်။ ခင်ဗျား အစာစားဖို့ မေ့သွားတာလား။ ဒီလောက်အားနည်းနေတာ အစီအရင်က အယားတောင် ပြေမှာ မဟုတ်ဘူး"

တက်ရောက်လာသူတိုင်း ဤစကားကို ကြားသည်နှင့်တပြိုင်နက် သူတို့၏ စိတ်များ ဗလောင်ဆူသွားပြီး အရုဏ်တက်နတ်ဧကရီက သူ့ကို စွန့်ပစ်ခဲ့ပြီးဖြစ်သော်လည်း နတ်ဆိုးဧကရာဇ်ကို လှောင်ပြောင်ရဲနေသည်။ အဆိုးဆုံး အပိုင်းမှာ သူက ထျန်းလု၏ ဦးခေါင်းပြတ်ကို ကိုင်ဆောင်ထားခြင်း ဖြစ်ကာ လနတ်ဆိုး ဧကရာဇ်၏ ဘဝတွင် ဤမျှ စော်ကားခံခဲ့ရဖူးခြင်း မရှိပေ။ အကယ်၍ တန်းတူ ပြိုင်ဘက်တစ်ဦး ဖြစ်ခဲ့လျှင် ဤမျှ ဒေါသထွက်စရာ ကောင်းမည် မဟုတ်သော်လည်း တရားခံမှာ လက်သည်းတစ်ချက်တည်းဖြင့် ချေမှုန်းနိုင်သော အားနည်းသူတစ်ယောက် ဖြစ်သည်။

ဘုန်း

စစ်မြေပြင် တစ်ခုလုံး အနက်ရောင် မီးခိုးများဖြင့် လွှမ်းခြုံနေ၍ ပေါက်ကွဲသံများ ပဲ့တင်ထပ်နေစဉ် အစီအရင်က ခိုင်မာစွာ ရပ်တည်နေပြီး ပတ်ဝန်းကျင်ရှိ မြေကြီးနှင့် အဆောက်အအုံများ ဖျက်ဆီးခံနေရသည်။ ကြည့်ရှုနေသော လူသားများနှင့် နတ်ဆိုးများသည် နောက်သို့ ဆုတ်ခွာရန်မှလွဲ၍ ရွေးချယ်စရာ မရှိခဲ့ပေ။ စစ်မြေပြင် တစ်ခုလုံး ထူထပ်သော မီးခိုးများဖြင့် ဖုံးလွှမ်းနေပြီး ကြမ်းတမ်းသော နတ်ဆိုးသားရဲများ ကောင်းကင်သို့ မော့၍ ဟိန်းဟောက်နေကြသည်။

"ဟား ဟား ဟား…"

ယွမ်ရှောင်၏ ရယ်သံက နတ်ဆိုးများအကြားတွင် စူးရှစွာ မြည်ဟီးနေပြီး အနက်ရောင် ကောင်းကင် ခွေးကို တစ်ကိုယ်တော် ရင်ဆိုင်နေသည်။

ဝှစ်

ထို့နောက် သူက သိုလှောင်အိတ်အတွင်းမှ ခွေးအလောင်းကို ဆွဲထုတ်လိုက်ပြီး လနတ်ဆိုးဧကရာဇ်၏ ညီမ မည်မျှ အရေးကြီးကြောင်း သိပြီးနောက် ကိုယ်တိုင် အလောင်းကောက်သွားခဲ့သည်။ သူက ခွေးအလောင်းကို မြေပြင်ပေါ်သို့ ပစ်ချပြီး ကိရိယာအချို့ကို စတင် ပြင်ဆင်ခဲ့သည်။ မီးဖိုတစ်ခု၊ ဂျင်း၊ ကြက်သွန်မြိတ်၊ ကြက်သွန်ဖြူ—အားလုံးကို သပ်ရပ်စွာ စီစဉ်ထားသည်။ ထိုမြင်ကွင်းကြောင့် ကျင့်ကြံသူတိုင်း ဆွံ့အနေစဥ် အဖြူရောင် ဝတ်ရုံဝတ် လူငယ်က သူ၏ အင်္ကျီလက်ကို လိပ်တင်ပြီး တစ်ချက် ပြုံးလိုက်သည်။

"တစ်နာရီက မွှေးကြိုင်တဲ့ ခွေးသား ဟင်းတစ်ခွက် ချက်ပြုတ်ဖို့ လုံလောက်တယ်။ အလျင်လိုနေရင်လည်း ခဏလောက်စောင့်ပါဦး။ မင်းကို အရင်ဆုံး ကျွေးမယ်။ တစ်ခုတော့ သိချင်မိတယ်။ ခွေးတွေက ခွေးသား စားသလား"

သူက လနတ်ဆိုး ဧကရာဇ်ကို ကြည့်ပြီး ကျေနပ်စွာ ဆက်ပြောလိုက်ပြီး ဤမေးခွန်းကြောင့် ဗုံးတစ်လုံးကဲ့သို့ ပေါက်ကွဲထွက်လာသော နတ်ဆိုး သန်းပေါင်းများစွာ၏ ဒေါသကြောင့် မီးခိုးများ သူတို့၏ နှာခေါင်းပေါက်များမှ ထွက်ပေါ်နေသည်။

လနတ်ဆိုး ဧကရာဇ် တိတ်ဆိတ်သွားပြီး လက်စားချေရန်အတွက် အစီအရင်ကို ချိုးဖျက်ရန် တစ်ခုတည်းသာ အာရုံစိုက်လိုက်၏။

"ယွမ်ရှောင်၊ ပါးစပ်ပိတ်ထား။ ကောင်းကင်နယ်မြေရဲ့ ဂုဏ်သရေရှိ ဧည့်သည်ကို မစော်ကားနဲ့"

အရုဏ်တက်နတ်ဧကရီက အမိန့်ပေး၍ နတ်ဆိုးမျိုးနွယ် ဒေါသ အားလုံးကို ယွမ်ရှောင်ထံ လမ်းကြောင်းလွှဲလိုက်သည်။

"မင်းလည်း တိတ်တိတ်နေစမ်း။ မင်းက ပြည်ထောင်ရဲ့ ဘုရင်မဖြစ်နေပြီး ဒီနတ်ဆိုးတွေကို ဧည့်သည်လို့ သတ်မှတ်ထားတာလား။ သိုင်းနယ်မြေက လူသားတစ်သန်းကျော်ရဲ့ အဖြစ်ဆိုးကို မေ့သွားပြီထင်တယ်"

ယွမ်ရှောင်က သူမကို စိုက်ကြည့်သည်။ လူအုပ်က ပို၍ နားမလည်နိုင် ဖြစ်သွားကြပြီး တစ်ဖက်လူသည် နတ်ဧကရီကို အမှန်တကယ် ပြန်ပြောနေခြင်းဖြစ်သည်။ ထိုအချိန်တွင် ငွေရောင် ပုံရိပ်တစ်ခုက စစ်မြေပြင်အတွင်း ရုတ်တရက် ဝင်ရောက်လာသည်။

"အဲ့ဒါ ဘယ်သူလဲ"

လူသားများနှင့် နတ်ဆိုးများ နှစ်ဖက်လုံး အားစိုက် ကြည့်လိုက်သောအခါ ငွေရောင်ပုံရိပ်မှာ အမြီးသုံးချောင်း မြေခွေး နတ်ဆိုးအဖြစ်သို့ ပြောင်းလဲသွားပြီဖြစ်သည်။

သန်းခေါင်ယံ မရောက်သေးသောကြောင့် အင်မော်တယ်စစ်ပွဲ၏ စည်းမျဉ်းများကို ထည့်သွင်းစဉ်းစားလျှင် အစစ်အမှန် တိုက်ပွဲအတွက် အရည်အချင်းပြည့်မီသူများ ဝင်ရောက်ရန် အခွင့်အရေး ရှိနေဆဲဖြစ်ကြောင်း အားလုံး သဘောပေါက်သွားခဲ့သည်။ နတ်ဆိုးမျိုးနွယ် တိုက်ပွဲမှ ဆုတ်ခွာကြောင်း ကြေညာခဲ့သော်လည်း အရုဏ်တက်နတ် ဧကရီက သူတို့၏ အမည်များကို စာရင်းမှ မဖယ်ရှားခဲ့ပေ။ လနတ်ဆိုး ဧကရာဇ်က အင်အားဖြင့် အတင်းအကျပ် ဝင်ရောက်နိုင်ခြင်း မရှိသော်လည်း လနတ်သားက အလွယ်တကူ ဝင်ရောက်နိုင်ခဲ့ပြီး စစ်မြေပြင် အစီအရင် မျှတမှု၊ သြဇာအာဏာ၊ နှင့် တိကျမှုကို ပြသ၍ ၎င်း၏ ကျော်ကြားသော ဂုဏ်သတင်းနှင့် ထိုက်တန်ပေသည်။

ဘုန်း

အတွင်းသို့ ဝင်ရောက်ပြီးနောက် အမြီးသုံးချောင်း မြေခွေး နတ်ဆိုး၏ မျက်လုံးများ သတ်ဖြတ်လိုစိတ်ကြောင့် သွေးနီရောင် သန်းလာသည်။ ယွမ်ရှောင်က ခွေးသား ဟင်းချက်ပြုတ်နေစဥ် သားရဲ အရိပ်တစ်ခု သူ့ထံ ပစ်ဝင်လာသည်။

ဘုန်း

တောင်တစ်လုံးဖြင့် ဝင်ဆောင့်ခံလိုက်ရသကဲ့သို့ ဖြစ်ပြီး သူက သွေးတစ်လုပ် အန်ထွက်၍ ပေ သုံးရာအကွာသို့ လွင့်ထွက်သွားကာ အစီအရင် နံရံကို ထိမှန်ခဲ့သည်။

"ဘယ်သူလဲကွ"

ယွမ်ရှောင်က ဒေါသထွက်နေသော အမြီးသုံးချောင်း မြေခွေး နတ်ဆိုးကို တားဆီးရန် ရေမြူ ဒိုင်းကာတစ်ခု ဆင့်ခေါ်လိုက်သည်။

ဘန်း

မြေခွေး နတ်ဆိုးက ငွေရောင် ဆံပင် လူငယ်တစ်ဦးအဖြစ် ပြန်လည် ပြောင်းလဲသွားကာ ခေါင်းပြတ် ခွေးအလောင်းကို ပွေ့ချီ၍ မြေပြင်တွင် ဒူးထောက်လိုက်ရင်း မျက်ရည်များ တသွင်သွင် စီးကျလာသည်။

"အား။ အချစ်လေး"

မြေခွေးတစ်ကောင်နှင့် အမဲလိုက်ခွေးတစ်ကောင်ကြားမှ ဝမ်းနည်းဖွယ် အချစ်ဇာတ်လမ်းတစ်ခုက ပရိသတ်၏ မျက်လုံးများရှေ့တွင် ပေါ်ထွက်လာပုံရသည်။

"မင်းပဲလား၊ ငါ့ကို ရှုံးနိမ့်ခဲ့တဲ့ အရှုံးသမားယ ဘာလို့ မျက်ရည်ကျနေရတာလဲ။ မြေခွေးတစ်ကောင်က ခွေးတစ်ကောင်အတွက် ကြေကွဲနေတာလား"

ယွမ်ရှောင်က အပြုံးဖြင့် ရန်စကား ပြောသည်။

လနတ်သား ခွေးအလောင်းကို ချထားခဲ့ပြိး ပျက်စီးအဆီအနှစ် မီးလျှံပေါင်းများစွာ သူ၏ ပတ်လည်တွင် ဝေ့ဝဲနေသည်။ ဤ စွမ်းအား ပြသမှုသည် နတ်ဆိုးသူတော်စင် တစ်ဦး၏ စွမ်းအားနှင့် နီးကပ်နေပြီး သွေးနီရောင် မျက်လုံးများနှင့် လွှမ်းမိုးနိုင်သော သတ်ဖြတ်လိုစိတ်က ကြည့်ရှုနေသော နတ်ဆိုးများ၏ သွေးဆာမှုကို လှုပ်နှိုးနိုင်ခဲ့၏။

"လနတ်သားက အရမ်း အားကောင်းတာပဲ"

"မြန်မြန်၊ ယွမ်ရှောင်ကို သတ်လိုက်"

ဘုန်း ဘုန်း ဘုန်း

လနတ်သားက ပြေးဝင်တိုက်ခိုက်ရန် အမြီးသုံးချောင်း မြေခွေး နတ်ဆိုးအဖြစ် ပြန်လည် ပြောင်းလဲကာ ရောင်စုံ မီးလျှံများကို ထွေးထုတ်၍ ယွမ်ရှောင်၏ ငါးလွှာ ရေမြူ ဒိုင်းကာကို ချက်ချင်း ငြိမ်းသတ်လိုက်သည်။

ထန်

ဓားသွားနှင့် လက်သည်း ထိပ်တိုက်ရင်ဆိုင်မိသောအခါ မီးပွား ထောင်ပေါင်းများစွာ ဖြစ်ပေါ်လာစဥ် ပုံရိပ်ယောင်စွမ်းရည်ကြောင့် အဖြူရောင် မြူခိုးတစ်ခု ယွမ်ရှောင်ကို ရုတ်တရက် လွှမ်းခြုံသွားသည်။ ထို့နောက် သူ၏ အမြှီးကို ပြင်းထန်စွာ ယမ်း၍ ယွမ်ရှောင်၏ တာအိုပညာ ဒိုင်းကာပေါ်သို့ ရိုက်ချပစ်လိုက်သည်။ ကြီးမားသော ပေါက်ကွဲသံ ထွက်ပေါ်လာကာ ယွမ်ရှောင်က နောက်တစ်ကြိမ် လွင့်ထွက်သွားပြီး မြေပြင်တွင် အကြိမ်ပေါင်းများစွာ လိမ့်ထွက်ခဲ့သဖြင့် တစ်ကိုယ်လုံး ဖုန်မှုန့်များနှင့် အညစ်အကြေးများ ဖုံးလွှမ်းနေရုံသာမက ခန္ဓာကိုယ်ပေါ်တွင် သွေးစွန်းသော ဒဏ်ရာအစင်းကြောင်းများ ချန်ရစ်ခဲ့သည်။ သူက သနားစရာ အခြေအနေတွင် ရှိနေရုံသာမက ပြင်းထန်စွာ ဒဏ်ရာရသွားပုံပေါ်၏။

"မင်းလို သားရဲတစ်ကောင်က ငါ့ကို ဆန့်ကျင်ပြီး လူသားမျိုးနွယ်ရဲ့ ထိပ်တန်း အင်မော်တယ် ဘွဲ့ထူးအတွက် ယှဉ်ပြိုင်နိုင်မယ်လို့ ထင်နေတာလား"

နောက်ဆုံး တွေ့ဆုံမှုတွင် ယွမ်ရှောင်က လနတ်သားကို ရက်စက်စွာ ရိုက်နှက်ခဲ့ပြီး ဤတစ်ကြိမ်၌ လနတ်သားက အသာစီးရနေကာ စိတ်ပျက်နေသော နတ်ဆိုးများ အတွက် နောက်ဆုံးတွင် ဖိနှိပ်ထားသည့် စိတ်ခံစားချက်များအတွက် ထွက်ပေါက်တစ်ခု ရှာတွေ့ခဲ့ကြသဖြင့် ရင်ဘတ်များကို ထုနှက်ပြီး ပျော်ရွှင်စွာ ဟိန်းဟောက်အားပေးနေကြ၏။

"ယွမ်ရှောင် အမှန်တကယ် အားကောင်းပေမယ့် လနတ်သားက ပိုအားကောင်းတယ်"

"ဒီလိုငပျော့လေးက လှည့်ဖြားမှု တစ်ခုတည်းနဲ့ ငါတို့ နတ်ဆိုးတိုက်ကြီးရဲ့ ပါရမီရှင် ထောင်ပေါင်းများစွာကို ကြောက်ရွံ့စေခဲ့တာလား"

သူတို့က အစပိုင်းတွင် ယွမ်ရှောင်၏ စွမ်းအားကို သံသယရှိခဲ့ကြသော်လည်း လနတ်သားသည် ယွမ်ရှောင်၏ ဟန်ဆောင်မှုကို ဖော်ထုတ်လိုက်သောအခါ ခွေးသား ဟင်းအိုးကြောင့် ဒေါသများ အသစ်တစ်ဖန် တိုးဝင်လာသည်။

"ပါရမီရှင်တွေက စစ်မြေပြင်သို့ ဝင်ရောက်ဖို့ အခုထိ သတ္တိ မရှိကြသေးဘူးလား"

"လနတ်သားကို ကူညီပြီး သူ့ကို ဆွဲဖြဲလိုက်စမ်း"

ယွမ်ရှောင် နှင့် လနတ်သားက ပြင်းထန်စွာ တိုက်ခိုက်နေသောကြောင့် နတ်ဆိုးများအနေဖြင့် လနတ်သားသည် နောက်ဆုံးတွင် အောင်ပွဲတစ်ခု လုံခြုံစွာ ရယူမည်လား ဆိုသည်ကို မသေချာကြပေ။

"အဲ့ဒီကို ဝင်လိုက်စမ်း။ သန်းခေါင်ယံ နီးကပ်နေပြီ။ အခု ဝင်လိုက်ရင် မင်းက လူသားမျိုးနွယ်ရဲ့ ထိပ်တန်း အင်မော်တယ် နဲ့ အရုဏ်တက်နတ်ဧကရီရဲ့ ခင်ပွန်း ဖြစ်လာနိုင်တယ်"

သာမန်နတ်ဆိုးများစွာ၏ ဖိအားပေး အော်ဟစ်သံက တက်လှမ်းခြင်း တံခါးကိုပင် တုန်ခါသွားစေသည်။

"အခွင့်အရေးကို ဆုပ်ကိုင်လိုက်စမ်းပါ"

နတ်ဆိုး အားလုံး သူတို့၏ အကြည့်လားရာကို ပါရမီရှင်များထံ လှည့်လိုက်ကြသည်။

ဘုန်း

ဒေါသအိုးကြီးက ဒေါသတကြီးဖြင့် ချက်ချင်း ပြေးထွက်ကာ စစ်မြေပြင်အတွင်း ခုန်ဝင်လိုက်သည်။

"ရပ်စမ်း"

ကူဧကရာဇ်က ချက်ချင်း မျက်နှာပျက်သွားပြီး တားဆီးရန် ကြိုးစားခဲ့၏။

"သေရင်လည်း သေပါစေ။ ငါက သူရဲဘော မကြောင်ဘူးကွ"

ဒေါသအိုးကြီးက ဟိန်းဟောက်၍ စစ်မြေပြင်သို့ ပြေးဝင်တိုက်ခိုက်လိုက်ရာ ကူဧကရာဇ်ကို ဆန့်ကျင်ရဲခြင်းသည် သူ့စိတ်၏ ကန့်သတ်ချက်များ ကျော်လွန်သွားခဲ့ကြောင်း ရှင်းလင်းသော လက္ခဏာတစ်ခုပင်။ ထို့နောက် အခြေအနေက ထိန်းချုပ်မှုအောက်မှ လွတ်ထွက်သွားကာ မင်္ဂလာပွဲသရဲ၊ အရိုးဖြူဝိညာဥ်နှင့် ကျန်ပါရမီရှင်များလည်း ပြေးဝင်သွားကြ၏။

"ခမည်းတော် ကျွန်မလည်း သွားမယ်"

ခရမ်းရောင်ကောင်းကင် အင်မော်တယ်နတ်ပြည်ထောင်၏ သတ္တမ မင်းသမီးက ကြေညာ၍ နတ်ဆိုးတိုက်ကြီး၏ ပါရမီရှင်များနောက်သို့ လိုက်ပါသွားခဲ့သည်။

ဘုန်း ဘုန်း ဘုန်း

အင်မော်တယ်စစ်ပွဲ ကျောက်စိမ်း တံဆိပ်ပြားများ ကိုင်ဆောင်ထားဆဲဖြစ်သော နတ်ဆိုး ထောင်ပေါင်းများစွာက တွန်းအားပေးခံခဲ့ရပြီး ဒေါသမထိန်းနိုင်ကြတော့ဘဲ စစ်မြေပြင်အတွင်း အုံလိုက်ကျင်းလိုက် ဝင်ရောက်လာကြသည်။ လက်ရှိအခြေအနေတွင် ကူဧကရာဇ်ပင် ဤ အင်အားစုများကို မတားဆီးနိုင်ခဲ့ပေ။ သူတို့က ယွမ်ရှောင်ကို သတ်ရန် အနီးသို့ မချဉ်းကပ်နိုင်လျှင်ပင် တိုက်ပွဲကို မြင်တွေ့ရန် ထိုနေရာတွင် ရှိနေရုံမျှဖြင့် စိတ်လှုပ်ရှားစရာတစ်ခု ဖြစ်ပေသည်။

လူသားမျိုးနွယ်ဘက်တွင် နတ်ဧကရီ၏ လှည့်ကွက်တစ်ခုကြောင့် အင်မော်တယ်စစ်ပွဲ ကျောက်စိမ်း တံဆိပ်ပြားများ ရှိသည့် ပါရမီရှင် အများအပြား တိုက်ပွဲအတွင်း ဝင်ရောက်ခွင့် မရှိတော့ပေ။

အချိန်က သန်းခေါင်ယံ နီးကပ်လာသောကြောင့် အနည်းဆုံး နတ်ဆိုး ပါရမီရှင် နှစ်ထောင် ပြေးဝင်တိုက်ခိုက်လာခဲ့သည်။

ဘုန်း

သန်းခေါင်ယံ အချိန် ရောက်သောအခါ စစ်မြေပြင်က ချိတ်ပိတ်ခံလိုက်ရပြီး တစ်နာရီအကြာမှ ပြန်လည်ဖွင့်လှစ်​ပေလိမ့်မည်။ နတ်ဆိုးပါရမီရှင် အများအပြား အပြင်ဘက်တွင် ကျန်ရစ်ခဲ့ကြပြီး သူတို့၏ မျက်နှာများ နောင်တဖြင့် ပြည့်နှက်နေသည်။

စစ်မြေပြင်အတွင်း၌ ယွမ်ရှောင်က ထရပ်ပြီး နတ်ဆိုးတိုက်ကြီး၏ မျက်လုံးနီနေသော ပါရမီရှင် နှစ်ထောင်ကို ရင်ဆိုင်လိုက်သောအခါ သူတို့က အထင်သေးစွာ လှောင်ပြောင်လိုက်ကြသည်။ ယွမ်ရှောင်က ကြမ်းတမ်းသော ကျားတစ်ကောင် ဖြစ်လျှင်ပင် သူတို့က ဆာလောင်နေသော ဝံပုလွေ နှစ်ထောင်အဖြစ် မှတ်ယူနိုင်သဖြင့် ကြောက်စရာ မရှိပေ။ သူတို့က နတ်ဆိုးတိုက်ကြီး၏ အနာဂတ်ထောက်တိုင်များ ဖြစ်ကြပြီး လနတ်သားသည် ရှေ့ဆုံးတွင် ခေါင်းဆောင်တစ်ဦးကဲ့သို့ မားမားမတ်မတ် ရပ်တည်နေသည်။

လူသားတစ်ယောက်နှင့် နတ်ဆိုးနှစ်ထောင်၏ တိုက်ပွဲမြင်ကွင်းကြောင့် မရေမတွက်နိုင်သော လူသားများ ကျောစိမ့်သွားကာ နှလုံးသားများ စိုးရိမ်တကြီး ဖြစ်လာကြ၏။

"ငါတို့ဘက်က လွန်လွန်ကျူးကျူး လုပ်မိသွားတာလား…"

ပြည်သူများ၏ စိတ်နှလုံးတွင် ယွမ်ရှောင်အတွက် စိုးရိမ်ပူပန်မှုဖြင့် တုန်လှုပ်နေသည်။

"အစစ်အမှန် တိုက်ပွဲ စတင်မယ်"

အသက်ရှူကျပ်လောက်သော အခိုက်အတန့်တွင် အရုဏ်တက်နတ် ဧကရီ၏ အေးစက်သော အသံက စစ်မြေပြင်တစ်ခွင် ပဲ့တင်ထပ်လာသည်။ သူမ၏ စကားအဆုံးတွင် အနက်ရောင် အလင်း ကန့်လန့်ကာတစ်ခုက စစ်မြေပြင်ကို ရုတ်တရက် လွှမ်းခြုံသွားပြီး မြင်တွေ့နိုင်သည်မှာ အမှောင်ထုတစ်ခုသာ ဖြစ်၏။ အတွင်း၌ ယွမ်ရှောင် နှင့် နတ်ဆိုး နှစ်ထောင်၏ မြင်ကွင်းက လုံးဝ ဖုံးကွယ်ခံလိုက်ရပြီး အသံတစ်ခုပင် မကြားနိုင်ပေ။

"အရုဏ်တက်နတ်ဧကရီ"

ကူဧကရာဇ်က သူမကို အေးစက်စွာ စိုက်ကြည့်သည်။

"ငါက ဒီတိုက်ပွဲကို အမှောင်ချိတ်ပိတ် တိုက်ပွဲအဖြစ် ကြေညာခဲ့တယ်လေ။ မကြားလိုက်ဘူးလား"

အမှောင်ချိတ်ပိတ် တိုက်ပွဲသည် တိုက်ပွဲဝင်ကျင့်ကြံသူများကို အပြင်ဘက်မှ မမြင်နိုင်သော နေရာတစ်ခုတွင် ချုပ်နှောင်ထားခြင်း ဖြစ်ကာ အချိန် ကုန်ဆုံးသည်အထိ စောင့်ဆိုင်းပြီးမှသာလျှင် ၎င်းကို နောက်တစ်ကြိမ် ဖွင့်လှစ်မည်ဟု ဆိုလိုသည်။

အမှောင်ချိတ်ပိတ် တိုက်ပွဲ စတင်သည်နှင့်တပြိုင်နက် တက်လှမ်းခြင်း တံခါးပင် ယာယီ ပိတ်သွားခဲ့သည်။

"အမှောင်ချိတ်ပိတ် တိုက်ပွဲလား"

ကူဧကရာဇ်က ထိုကြေညာချက်အကြောင်း စဥ်းစားလိုက်သော်လည်း အာရုံမစိုက်မိသောကြောင့် အမှတ်မရပေ။လွန်ခဲ့သော တစ်နာရီအတွင်း ဖြစ်ပျက်ခဲ့သမျှ အရာအားလုံးကို ပြန်လည် တွေးတောရင်း သူက အမှောင်စစ်မြေပြင်ကို စိုက်ကြည့်နေကာ နက်နက်ရှိုင်းရှိုင်း စိုးရိမ်ပူပန်နေသည်။ အရုဏ်တက်နတ် ဧကရီက ချန်ရီ ဖြစ်ကြောင်း သူ ဖော်ထုတ်နိုင်ခဲ့သော်လည်း စိတ်လေးနေသဖြင့် တစ်ခုခုကို သတိလွတ်သွားပုံရလေသည်။