အကြားအမြင်အာရုံရဲ့ ကောင်းကင်မျက်လုံးနဲ့ လမင်းယုံကြည်မှု နတ်ဆိုးဂိုဏ်း

ချီမင်သူ့လက်နဲ့ရေတွက်ရင်း အချိန်အတိအကျကို အတည်ပြုလိုက်တယ်။ဒီနေ့ကယွမ်ဖုန်းကပ်‌ဘေးကြုံရမယ့်‌ နေ့ဖြစ်တယ်။။ ဒါကြောင့် ချီမင်က မွေးရာပါ သန့်စင်တဲ့မဟာတာအို ရွှေအမြူတေကို လည်ပတ်လိုက်ပြီး သူ့ရဲ့ ဓမ္မစွမ်းအားတွေကလိမ့်တက်သွားစေတယ်။

ပြီးတော့ သူက လက်တွေကို နောက်တစ်ခေါက် ဝှေ့ယမ်းလိုက်တယ်။

ကောင်းကင်ဘုံကြယ်တာရာသုံးဆယ့်ခြောက်ပညာရပ်ထဲက လျှို့ဝှက်ဆန်းကြယ် နည်းစနစ်တစ်ခုကို သူအသုံးပြုလိုက်တယ်။

အဲ့ဒါကို “အကြားအမြင်အာရုံ” လို့ခေါ်တယ်။

ဒီနည်းစနစ်ကို အသုံးပြုလိုက်တာနဲ့ အရာအားလုံးကို ကြည်လင်ပြတ်သားစွာ မြင်နိုင်စွမ်းရှိသွားတယ်။ ကောင်းကင်နဲ့ မြေကြီးကြားမှာ ဘာအတားအဆီးမှ မရှိတော့ဘူး၊ လောကခြောက်ပါးရဲ့အတွင်းနဲ့အပြင်က အရာအားလုံးကို မျက်စိနဲ့ တပ်အပ်မြင်နိုင်တယ်။

သာမန်လူတွေ အခေါ်နဲ့ဆိုရင်ဒါကို ကောင်းကင်မျက်လုံးလို့လည်း ခေါ်ကြတယ်။

သေချာတာကတော့၊ လက်ရှိ ချီမင်ကောင်းကင်ဘုံကိုးထပ်ကို ကြည့်တာဖြစ်ဖြစ်ငရဲကိုးထပ်ကို ကြည့်တာဖြစ်ဖြစ် အဲ့ဒီအဆင့်အထိ မရောက်သေးဘူး။ ဒါပေမဲ့ လျှို့ဝှက်ဆန်းကြယ်တဲ့ အာရုံခံစားမှုတွေနဲ့ ကံကြမ္မာအဆက်အသွယ်တွေကနေတစ်ဆင့် ယွမ်ဖုန်းဘက်ကအခြေအနေကိုသူမြင်နိုင်တယ်။

ချီမင်က ကောင်းကင်ဘုံဉာဏ်အလင်းပြ ကြေးမုံကို ထပ်ပြီး ငှားရမ်းနိုင်ခဲ့မယ်ဆိုရင်တော့ သူက အကြားအမြင်အာရုံ လျှို့ဝှက်ဆန်းကြယ် နည်းစနစ်ရဲ့ စွမ်းအားအစစ်ကို အမှန်တကယ် ပြသနိုင်လိမ့်မယ်၊ ဒါပေမဲ့ အဲ့ဒါကို ထောက်ပံ့ဖို့အတွက် ကြီးမားတဲ့ ဓမ္မစွမ်းအား ပမာဏလည်း လိုအပ်တယ်။

ကျင့်ကြံသူတွေအတွက်တော့ သူတို့ရဲ့ ကျင့်ကြံမှုအဆင့်က အမြူတေဖွဲ့စည်းခြင်း နယ်ပယ်ကို ရောက်သွားပြီးရင် သူတို့ရဲ့ ရွှေအမြူတေက ခန္ဓာကိုယ်ထဲမှာ သိပ်သည်းလာပြီး သူတို့ရဲ့ အခြေခံတည်ဆောက်ခြင်း ဝိညာဉ်စွမ်းအင်က ပြောင်းလဲသွားတယ်။ သူတို့ ဆုပ်ကိုင်ထားတာက ဝိညာဉ်စွမ်းအင် မဟုတ်တော့ဘဲ ရွှေအမြူတေ ဓမ္မစွမ်းအားတွေ ဖြစ်သွားတယ်။

“အကြားအမြင်အာရုံ။”

ဘုန်း!

ချီမင်ရဲ့ ခန္ဓာကိုယ်ထဲက ဓမ္မစွမ်းအားတွေက လှုပ်ခါပြီး ထွက်ပေါ်လာတယ်။ သူ့ရှေ့မှာ ပုံရိပ်ယောင် ကြေးမုံတစ်ခုက လေထဲမှာ ရုတ်တရက် ပေါ်လာတယ်။ အစပိုင်းမှာတော့ ကြေးမုံထဲက မြင်ကွင်းက ဝေဝါးနေပြီး မြူခိုးတွေ ဖုံးလွှမ်းနေတယ်။

ချီမင်က သူ့ရဲ့ ညာလက်ကို ထပ်ပြီး ဝှေ့ယမ်းလိုက်တယ်။

မြူခိုးတွေကကြီးမားတဲ့ စွမ်းအားတစ်ခုကြောင့် ပျောက်ကွယ်သွားပုံရပြီး လုံးဝ ပျောက်ကွယ်သွားတယ်။ ကြေးမုံထဲက မြင်ကွင်းက ချီမင်ရဲ့ မျက်လုံးထဲမှာ အရမ်းကို ကြည်လင်ပြတ်သားသွားတယ်။

“အောင်မြင်ပြီ။”

ချီမင်က ဝမ်းသာအားရဖြစ်သွားတယ်။ သူက အစက သုံးလို့မရမှာကို နည်းနည်း စိုးရိမ်နေခဲ့တယ်။ ဝမ်းသာပြီးတော့ ချီမင်ရဲ့ အကြည့်က ကြေးမုံထဲက ယွမ်ဖုန်းဆီကို ရောက်သွားပြီး သူက စိတ်ခံစားမှုအပြည့်နဲ့ သက်ပြင်းချလိုက်တယ်၊ “ကောင်းကင်ဘုံကြယ်တာရာသုံးဆယ့်ခြောက်ပညာရပ်ဆိုတာ တကယ်ပဲ အံ့ဩစရာပဲ။ ယွမ်ရှန်းအင်ပါယာကတိမ်စိမ်းတောင်ထွတ်နဲ့ အရမ်းဝေးတယ်၊ ကောင်းကင်မူလမြို့က ပိုတောင်ဝေးသေးတယ်။ အနည်းဆုံးတော့ မိုင်တစ်သောင်းလောက် ဝေးတယ်။”

“ဒီလောက်ဝေးတဲ့ အကွာအဝေးမှာတောင် ဒီလောက်ထိကြည်လင်ပြတ်သားစွာနဲ့ မြင်နိုင်နေတုန်းပဲ။”

တကယ်တော့...

နောက်တစ်မျိုး စဉ်းစားကြည့်မယ်ဆိုရင် ကမ္ဘာမြေရဲ့ ခေတ်မီနည်းပညာကို သုံးရင်လည်း သူက ကောင်းကင်မျက်လုံး အစွမ်းကို ရနိုင်တယ်။

ဗီဒီယိုချတ်လုပ်တာ၊ တိုက်ရိုက်လွှင့်တာ၊ သတင်းထုတ်လွှင့်တာ စတာတွေရှိတယ်။

ဒါတွေအားလုံးက အတော်လေးကို သာမန်အရာတွေပဲဖြစ်တယ်။

နည်းပညာဂြိုလ်တုကို သုံးပြီး မိုင်ပေါင်းထောင်ချီဝေးတဲ့ နေရာက ပုံရိပ်တွေကို အချိန်နဲ့တပြေးညီ ပို့လွှတ်နိုင်တယ်။ အရမ်းကို အဆင်ပြေတယ်။

ကောင်းကင်ဘုံကြယ်တာရာသုံးဆယ့်ခြောက်ပညာရပ်ရဲ့ အကြားအမြင်အာရုံကတော့ နည်းပညာကို အသုံးမပြုဘဲ ကောင်းကင်မြေကြီး မဟာတာအိုရဲ့ လျှို့ဝှက်ဆန်းကြယ်မှုနက်နဲမှုနဲ့ ဓမ္မစွမ်းအားတွေကို သုံးပြီး အဲ့ဒီအစွမ်းကို ရရှိတယ်။

နှစ်ခုက မတူညီပေမယ့် တူညီတဲ့အချက်တချို့တော့ ရှိနေတယ်။

မြင်ကွင်းထဲမှာတော့ ကောင်းကင်ဘုံဉာဏ်အလင်းဂိုဏ်းနဲ့ မိုင်ပေါင်းထောင်ချီဝေးတဲ့ ကောင်းကင်မူလမြို့မှာ

လူစုက ဒုက္ခရောက်နေပြီ။

ပြီးတော့...

ယွမ်ဖုန်းကလည်း အရမ်းကို အန္တရာယ်များတဲ့ အခြေအနေမှာ ရောက်နေတယ်။

ဒီကိစ္စက လွန်ခဲ့တဲ့ တစ်လနီးပါးလောက်က စတယ်။

အဲ့ဒီအချိန်တုန်းက ယွမ်ဖုန်းက ကောင်းကင်မူလမြို့ကို ထိန်းသိမ်းဖို့ တာဝန်ကို လက်ခံပြီး ဂိုဏ်းရဲ့ သင်္ဘောနဲ့ အဲ့ဒီကို သွားတယ်။ သူရောက်ပြီးတော့ ဘာမှမဖြစ်ဘူး။

ပြီးတော့ သူ ကောင်းကင်မူလမြို့ကို ရောက်ပြီး ခုနစ်ရက်မြောက်နေ့မှာ ယွမ်ဖုန်းက နေရာရွှေ့ပြောင်းစနစ်ကိုသုံးပြီး ယွမ်ရှန်းတော်ဝင်မြို့တော်ကို ပြန်သွားပြီး သူ့ရဲ့ အဖေနဲ့ အမေကို သွားကြည့်သေးတယ်။

ယွမ်ရှန်းတော်ဝင်မြို့တော်မှာ သုံးရက်နေပြီးမှ သူက ကောင်းကင်မူလမြို့ကို ပြန်လာတယ်။

ကောင်းကင်မူလမြို့မှာ လူသားစားတဲ့ နတ်ဆိုးတစ်ကောင် ပေါ်လာပြီး အဲ့ဒါကို ဖြေရှင်းဖို့ သူကိုင်တွယ်ဖို့လိုအပ်တယ်။

ခြုံပြောရရင်တော့ နာရီဝက်ပဲ ကြာလိုက်တယ်။

ယွမ်ဖုန်းက လူသားစားတဲ့ နတ်ဆိုးကို ရှာတွေ့သွားတယ်။ အဲ့ဒါက နတ်ဆိုးစွမ်းအင်ရသွားတဲ့ နတ်ဆိုးဝံပုလွေတစ်ကောင်ပဲ။ သူက ကောင်းကင်မူလမြို့ထဲကို ခိုးဝင်လာပြီး ရာဇဝတ်မှုတွေ ကျူးလွန်နေခဲ့တာဖြစ်တယ်။

အဲ့ဒီနောက်ပိုင်းကိစ္စတွေအားလုံးက သာမန်အတိုင်းပဲ၊ လွန်ခဲ့တဲ့ သုံးရက်က ဘာလက္ခဏာမှ မပြဘဲ ကိစ္စတစ်ခုက အရမ်းမြန်မြန်ဆန်ဆန် ဖြစ်လာတယ်။

လွန်ခဲ့တဲ့ အနှစ်သုံးရာက ကောင်းကင်ဘုံဉာဏ်အလင်းဂိုဏ်းရဲ့ အမွေခံတပည့်တွေ ဖျက်ဆီးခဲ့တဲ့ လမင်းယုံကြည်မှု နတ်ဆိုးဂိုဏ်းက ပြာပုံထဲကနေ ပြန်ထလာတယ်။ လမင်းယုံကြည်မှု နတ်ဆိုးဂိုဏ်းရဲ့ ဂိုဏ်းချုပ်က လွန်ခဲ့တဲ့ အနှစ်သုံးရာက သေမင်းလက်ကနေ လွတ်မြောက်ပြီး သူ့ရဲ့ အခြေတည်ဝိညာဉ်က ခန္ဓာကိုယ်တစ်ခုကို ပိုင်ဆိုင်ပြီး အစကနေ ပြန်လည်ကျင့်ကြံတယ်။

သူ့ရဲ့ ကျင့်ကြံမှုအဆင့်က အခြေတည်ဝိညာဉ်အဆင့် အစောပိုင်းကိုပြန်ရောက်နေပြီ။

အဲ့ဒီနေ့မှာပဲ လမင်းယုံကြည်မှု နတ်ဆိုးဂိုဏ်းချုပ်က သူယာယီဖွဲ့စည်းထားတဲ့ နတ်ဆိုးဂိုဏ်းဝင်တွေကို ဦးဆောင်ပြီး ကောင်းကင်မူလမြို့ကို တိုက်ရိုက်တိုက်ခိုက်ပြီး မြို့ထဲကိုဝင်ရောက်ကာ ပြည်သူသောင်းပေါင်းများစွာကို သတ်ဖြတ်ဖမ်းဆီးတယ်။

ကောင်းကင်မူလမြို့ကို စောင့်ကြပ်နေတဲ့ ကောင်းကင်ဘုံဉာဏ်အလင်းဂိုဏ်း တပည့်တွေနဲ့ အကြီးအကဲတွေအားလုံးက သူ့ကို မယှဉ်နိုင်ကြဘူး။ အသေအပျောက်အများကြီးရှိပြီး သူတို့က မြို့ကိုစွန့်ခွာပြီး ထွက်ပြေးရုံပဲတတ်နိုင်တယ်။ မရေမတွက်နိုင်တဲ့ ဒုက္ခအခက်အခဲတွေကို ကြုံပြီးမှသူတို့က ကောင်းကင်မူလမြို့နဲ့ ငါးကီလိုမီတာအကွာမှာရှိတဲ့ ကောင်းကင်မူလတောင်တန်းထဲကို ထွက်ပြေးလွတ်မြောက်လာကြတယ်။

သူတို့က ယာယီလွတ်မြောက်လာတယ်။

“လမင်းယုံကြည်မှု နတ်ဆိုးဂိုဏ်း။”

ချီမင်က တစ်ခုခုကို စဉ်းစားမိပြီး ကြေးမုံထဲက မြင်ကွင်းကို ကြည့်လိုက်တယ်။ ယွမ်ဖုန်းနဲ့ တခြားသူတွေက ဒဏ်ရာအတော်လေး ပြင်းထန်ပြီး သူတို့ရဲ့ အဝတ်အစားတွေက နည်းနည်းစုတ်ပြဲနေတယ်။ သူတို့က အရမ်းကို သနားစရာကောင်းနေတယ်၊ “ဒီနာမည်က ငါ့ကို ရင်းနှီးတဲ့ ခံစားချက်တစ်ခု ပေးတယ်။”

ချီမင်က သူကမ္ဘာမြေပေါ်မှာ ကြည့်ခဲ့ဖူးတဲ့အင်‌မော်တယ်သူရဲကောင်းဇာတ်လမ်းတွဲကို အမှတ်ရသွားတယ်။ ဒီအင်မော်တယ်သူရဲကောင်းဇာတ်လမ်းတွဲထဲမှာလည်း လမင်းယုံကြည်မှု ဂိုဏ်းချုပ်ဆိုတဲ့မဟာဗီလိန်တစ်ယောက် ပါတယ်။

သူ့ကို စကားမပြောနိုင်ဖြစ်သွားစေတဲ့ တစ်ခုတည်းသောအရာက...

အဲ့ဒီဗီလိန်ဂိုဏ်းချုပ်လမင်းယုံကြည်မှုကအင်‌မော်တယ်သူရဲကောင်းတွေရဲ့ ကမ္ဘာမှာ သိပ္ပံပညာကို လေ့လာဖို့ အတင်းတောင်းဆိုလာဖြစ်တယ်။

သူက လုံးဝကို နေရာမှားနေတယ်။

ဒီအခြေအနေမှာ သူက ဘယ်လိုလုပ် မသေနိုင်မှာလဲ။

“ငါလမ်းလွဲသွားပြီ။”

ချီမင်က ခေါင်းခါပြီး အဲ့ဒါကို ဆက်မစဉ်းစားတော့ဘူး။ သူက ကြေးမုံထဲက ယွမ်ဖုန်းကို ကြည့်ပြီး ခဏလောက် စဉ်းစားပြီးမှ ပြောလိုက်တယ်၊ “ယွမ်ဖုန်း၊ မင်းအခု ဘာလုပ်ဖို့ စီစဉ်ထားလဲ။”

ကောင်းကင်မူလတောင်တန်း။

ကောင်းကင်မူလမြို့ကနေ ကောင်းကင်ဘုံဉာဏ်အလင်းဂိုဏ်းကယွမ်ဖုန်းအပါအဝင်တပည့်ငါးယောက်နဲ့ အကြီးအကဲတွေပဲ လွတ်မြောက်ခဲ့ကြတယ်။ တခြားသူတွေအားလုံးက မြို့ထဲမှာ သေဆုံးသွားကြတယ်။

လမင်းယုံကြည်မှု နတ်ဆိုးဂိုဏ်းကလည်း ဆုံးရှုံးမှုတွေ အများအပြား ကြုံတွေ့ထားရတယ်။

“အဟွတ် အဟွတ်...”

ယွမ်ဖုန်းရဲ့ ဆံပင်တွေက နည်းနည်း ရှုပ်ပွနေတယ်။ သူက ဓားတစ်လက်ကို ကိုင်ထားပြီး သွေးမျောက်ကလည်း ခြေထောက်တစ်ဖက် ဆုံးရှုံးထားတယ်။ သူ့ရဲ့ ဒဏ်ရာတွေက မသေးဘူး၊ သူတို့ရဲ့ အခြေအနေတွေက အရမ်းကို ဆိုးရွားနေတယ်။

“အကြီးအကဲ။”

အဲ့ဒီအချိန်မှာ ပိန်ပါးတဲ့ မျက်နှာနဲ့ လူငယ်တပည့်တစ်ယောက်က သူ့ဘေးနားက လေးထောင့်မျက်နှာနဲ့ လူလတ်ပိုင်းအရွယ် အမျိုးသားကို ကြည့်ပြီး ပြောလိုက်တယ်၊ “အခု ကျွန်တော်တို့ ဘာလုပ်သင့်လဲ။ ဂိုဏ်းကို အကူအညီတောင်းသင့်လား။”

လေးထောင့်မျက်နှာနဲ့လူလတ်ပိုင်းအရွယ် အမျိုးသားရဲ့နာမည်အပြည့်အစုံကလဲ့ချီဟိုင်ဖြစ်တယ်။ သူက အပြင်စည်းဂိုဏ်း အကြီးအကဲတစ်ယောက်ဖြစ်ပြီး အမြူတေဖွဲ့စည်းခြင်းနှောင်းပိုင်းအဆင့်မှာရှိပြီးအဆင့်ငါး စစ်မှန်တဲ့အမြူတေကိုသိပ်သည်းထားနိုင်တယ်။

လဲ့ချီဟိုင်က လွန်ခဲ့တဲ့ အနှစ်တစ်ရာက ဂိုဏ်းရဲ့ တာဝန်ကို လက်ခံပြီး ကောင်းကင်မူလမြို့ကို စောင့်ကြပ်ကာ နတ်ဆိုးဂိုဏ်းရဲ့ နတ်ဆိုးမျိုးဆက်တွေ ကြီးထွားလာမှာကို ကာကွယ်ဖို့ ပတ်ဝန်းကျင်ငြိမ်းချမ်းရေးကို ထိန်းသိမ်းခဲ့တယ်။

တာဝန်ပြီးဆုံးသွားရင် သူက ကောင်းကင်ဘုံဉာဏ်အလင်းဂိုဏ်းကို ပြန်သွားပြီး သက်ဆိုင်ရာ ဆုလာဘ်တွေ ရရှိနိုင်တယ်။ ဒီဆုလာဘ်တွေနဲ့ သူက နောက်တစ်ဆင့်တက်ပြီး အခြေတည်ဝိညာဉ်အဆင့်ကို ချိုးဖျက်ဖို့ အခွင့်အရေးရှိတယ်။

အဲ့ဒီအချိန်မှာ သူက အတွင်းစည်းဂိုဏ်း အကြီးအကဲတစ်ယောက် ဖြစ်လာနိုင်တယ်။

ဒါပေမဲ့ သူက လွန်ခဲ့တဲ့ အနှစ် ၃၀၀ က ကောင်းကင်ဘုံဉာဏ်အလင်းဂိုဏ်းရဲ့ အမွေခံတပည့်တွေ ဖျက်ဆီးခဲ့တဲ့ လမင်းယုံကြည်မှု နတ်ဆိုးဂိုဏ်းက တကယ်ပဲ ပြန်ထလာပြီး ကောင်းကင်မူလမြို့ကို တိုက်ရိုက်တိုက်ခိုက်လိမ့်မယ်လို့ မမျှော်လင့်ထားခဲ့ဘူး။

လဲ့ချီဟိုင်က အခု ဂိုဏ်းကို အကူအညီတောင်းမယ်ဆိုရင် သူ့ရဲ့ တာဝန်က တိုက်ရိုက် ကျရှုံးသွားလိမ့်မယ်။ သူ့ရဲ့ အနှစ်တစ်ရာကြာ ကြိုးစားအားထုတ်မှုတွေက အလဟဿဖြစ်သွားပြီး ဘာအကျိုးအမြတ်မှ ရမှာ မဟုတ်ဘူး။

ပြီးတော့ လဲ့ချီဟိုင်က ဂိုဏ်းကနေ စစ်ကူတောင်းဆိုရင်တောင် စစ်ကူတွေက ဒီလောက်မြန်မြန် ရောက်လာမှာ မဟုတ်ဘူး။ သူတို့က အချိန်လိုတယ်။ ဂိုဏ်းကနေ စစ်ကူတွေကို စောင့်နေတုန်းမှာ လမင်းယုံကြည်မှု နတ်ဆိုးဂိုဏ်းချုပ်က တိုက်ခိုက်ပြီး သူတို့ကို တစ်ချက်တည်းနဲ့ ဖမ်းဆီးသွားနိုင်တယ်။

“ဒါက မဖြစ်နိုင်ဘူး။” လဲ့ချီဟိုင်က မအောင့်နိုင်ဘဲ ကျိန်ဆဲလိုက်တယ်၊ “လမင်းယုံကြည်မှု နတ်ဆိုးဂိုဏ်းက အနှစ် ၃၀၀ လောက် ပျောက်ကွယ်နေခဲ့တာ။ ဘာလို့ ရုတ်တရက်ကြီး ပေါ်လာရတာလဲ။ ပြီးတော့ ဘာလက္ခဏာမှလည်း မပြဘူး!”

“လမင်းယုံကြည်မှု နတ်ဆိုးဂိုဏ်းက ကောင်းကင်မူလမြို့ကို ဘာလို့ ယူထားတာလဲ။”

တခြားတပည့်က နည်းနည်း စိုးရိမ်နေပုံရပြီး ပြောလိုက်တယ်၊ “ကျွန်တော်တို့ နောက်တွန့်နေလို့မဖြစ်တော့ဘူး။ ကောင်းကင်မူလမြို့ကနေ ကျွန်တော်တို့ အတော်လေးခက်ခက်ခဲခဲ လွတ်မြောက်လာတာ။ ကောင်းကင်ဘုံဉာဏ်အလင်းဂိုဏ်းကို အမြန်ဆုံး ဆက်သွယ်ရမယ်။ လမင်းယုံကြည်မှု နတ်ဆိုးဂိုဏ်းရဲ့ ဂိုဏ်းချုပ်က အရမ်းသန်မာတယ်။ သူက အခြေဝိညာဉ်အ‌စောပိုင်းအဆင့်ကျင့်ကြံမှုရှိတယ်။ ကောင်းကင်မူလမြို့ရဲ့ မြို့ကာကွယ်ရေးအစီအရင်ကို သူက အတင်းအကျပ် ချိုးဖျက်ခဲ့တာ။”

“အကြီးအကဲ!” နောက်တပည့်ကလည်း ပြောလိုက်တယ်။

“ထားလိုက်တော့။” လဲ့ချီဟိုင်က အရမ်းကို ကူကယ်ရာမဲ့နေပေမယ့် သူ့မှာ ရွေးချယ်စရာမရှိဘူး။ သူက အသက်ပြင်းပြင်းရှူလိုက်ပြီး ပြောလိုက်တယ်၊ “မင်းတို့ပြောတာမှန်တယ်။ ငါတို့ တကယ်ပဲ နှောင့်နှေးလို့မဖြစ်ဘူး။ ငါစိုးရိမ်တာကလမင်းယုံကြည်မှု နတ်ဆိုးဂိုဏ်းကလူတွေ လိုက်မီလာရင် ငါတို့ လွတ်နိုင်မှာမဟုတ်ဘူးပဲ။”

စိတ်ထဲမှာ စဉ်းစားလိုက်ပြီး သူက ကောင်းကင်ဘုံဉာဏ်အလင်းဂိုဏ်းနဲ့ ဆက်သွယ်နိုင်တဲ့ အဆောင်ရတနာကို ထုတ်ယူလိုက်တယ်။

အဲ့ဒါကို မိုင်သောင်းချီ အသံပို့ဆောင်ရေး အဆောင်ရတနာလို့ ခေါ်တယ်။

ဘုန်း!

လဲ့ချီဟိုင်က သူ့ရဲ့ ဓမ္မစွမ်းအားတွေကို လည်ပတ်ပြီး အဲ့ဒီထဲကို ထည့်သွင်းလိုက်တယ်၊ ကောင်းကင်ဘုံဉာဏ်အလင်းဂိုဏ်းကနေ အကူအညီတောင်းဖို့ မိုင်သောင်းချီ အသံပို့ဆောင်ရေး အဆောင်လက်ဖွဲ့ကို အသက်သွင်းဖို့ ပြင်ဆင်လိုက်တယ်။

ရုတ်တရက် မတော်တဆမှုတစ်ခု ဖြစ်သွားတယ်။

တပည့်သုံးယောက်ထဲက လဲ့ချီဟိုင်နဲ့ အနီးဆုံးမှာရှိတဲ့ တပည့်ရဲ့ မျက်လုံးထဲမှာ အစွန်းရောက်တဲ့ အသွင်အပြင်တစ်ခု ပေါ်လာတယ်။

ကလန်!

သူက သူ့လက်ထဲက ဓားကို ကိုင်ထားပြီး သူ့ရဲ့ ဝိညာဉ်စွမ်းအင်အားလုံးကို လည်ပတ်ပြီး လဲ့ချီဟိုင်ရဲ့ နှလုံးကို ထိုးစိုက်လိုက်တယ်။

“မင်းသေချင်နေပြီ!”

လဲ့ချီဟိုင်က ဒေါသတကြီးဖြစ်သွားတယ်။

ဒါပေမဲ့ ဒီအကွာအဝေးက အရမ်းနီးကပ်လွန်းတယ်။ ပြီးတော့ လဲ့ချီဟိုင်က ဒဏ်ရာရနေပြီး အသင့်အနေအထားမှာလည်း မရှိဘူး။ ဒီအရေးကြီးတဲ့အချိန်မှာ သူက သူ့ရဲ့ ကာကွယ်ရေးကို အသည်းအသန်အသက်သွင်းလိုက်နိုင်တယ်။

ဘုန်း!

ကာကွယ်ရေးအတားအဆီးက ဓားကြောင့် ထိုးဖောက်ခံလိုက်ရပေမယ့် ဓားကလည်း သူ့ရဲ့ စွမ်းအားအများစုကို ဆုံးရှုံးသွားတယ်။ အဲ့ဒါက လဲ့ချီဟိုင်ရဲ့ အရေပြားနဲ့ အသားကိုပဲ ထိုးဖောက်နိုင်ပြီး သူ့ရဲ့ နှလုံးကို မထိုးဖောက်နိုင်လိုက်ဘူး။

အဲ့ဒီတပည့်ရဲ့ ပစ်မှတ်က လဲ့ချီဟိုင်မဟုတ်ဘဲ သူ့ရဲ့ မိုင်သောင်းချီ အသံပို့ဆောင်ရေး အဆောင်ရတနာပဲ ဖြစ်နေမှန်း ထင်ရှားတယ်။ သူက သူ့လျှာကို ကိုက်ပြီး သွေးမြှားတစ်စင်းကို စုစည်းပြီး ထွေးထုတ်လိုက်တယ်။ လဲ့ချီဟိုင်ရဲ့ ထိတ်လန့်တကြားဖြစ်နေတုန်းမှာ သွေးမြှားက မိုင်သောင်းချီ အသံပို့ဆောင်ရေး အဆောင်ရတနာကို ချိုးဖျက်လိုက်တယ်။

“သစ္စာဖောက်! မင်း သစ္စာဖောက်!” လဲ့ချီဟိုင်က ဟိန်းဟောက်လိုက်တယ်။

“ဟားဟားဟား...” တပည့်က အရူးအမူး ရယ်မောလိုက်တယ်၊ “လမင်းယုံကြည်မှု နတ်ဘုရားဂိုဏ်းက ပြိုင်ဘင်ကင်းပဲ။ လမင်းကို ကိုးကွယ်ရင် ထာဝရအသက်ကိုရနိုင်လိမ့်မယ်။”

ကလန်!!!

တစ်ခဏချင်းမှာပဲ ချွန်ထက်တဲ့ ဓားအလင်းတန်းတစ်ခု လင်းလက်သွားတယ်။

ဖောက်!!!

သွေးတွေ ပက်ဖြန်းထွက်သွားတယ်။

အဲ့ဒီတပည့်ရဲ့ ခေါင်းကို ယွမ်ဖုန်းရဲ့ ဓားနဲ့ ခုတ်ဖြတ်လိုက်တယ်။ ခေါင်းပြတ်နေတဲ့ အလောင်းကနေ သွေးတွေ ပန်းထွက်လာပြီး အလောင်းရဲ့ ပြတ်နေတဲ့ လည်ပင်းနားမှာ သွေးအိုင်တစ်ခု ဖြစ်ပေါ်လာတယ်။

“ယွမ်ဖုန်း။”

လဲ့ချီဟိုင်က အံ့ဩသွားတယ်။

“ဒီလို သစ္စာဖောက်မျိုးက သေသင့်တယ်။” ယွမ်ဖုန်းက အေးစက်စွာ ပြောလိုက်တယ်။

ဂလု!

တခြားတပည့်နှစ်ယောက်က သူတို့ရဲ့ တံတွေးကို မျိုချလိုက်ကြတယ်။

ကောင်းကင်မူလမြို့ တိုက်ပွဲမှာ ယွမ်ဖုန်းရဲ့ခွန်အားက တကယ်ပဲ လူတိုင်းရဲ့ အသိအမှတ်ပြုမှုကို ရရှိခဲ့တယ်။ သူက အခြေတည်ဆောက်ခြင်းအစောပိုင်းအဆင့်မှာပဲ ရှိပေမယ့် သွေးမျောက် ဝိညာဉ်သားရဲနဲ့ ပေါင်းစပ်လိုက်ရင် လမင်းယုံကြည်မှု နတ်ဆိုးဂိုဏ်းဝင်များစွာကို သတ်ဖြတ်နိုင်ခဲ့တယ်။

ယွမ်ဖုန်းက မေးလိုက်တယ်၊ “ရှင်တို့ဆီမှာ နောက်ထပ် မိုင်သောင်းချီ အသံပို့ဆောင်ရေး အဆောင်ရတနာရှိသေးလား။”

လဲ့ချီဟိုင်ရဲ့ မျက်နှာအမူအရာက နည်းနည်းမည်းသွားတယ်၊ “ဒီအဆောင်ရတနာက အရမ်းတန်ဖိုးကြီးတယ်။ ငါ့မှာ တစ်ခုပဲ ရှိတာ။ ငါ့နောက်မှာ သစ္စာဖောက်တစ်ယောက် လိုက်နေလိမ့်မယ်လို့ ငါမထင်ထားဘူး။ ဒါက တကယ်ပဲ...”

“ဟူး...”

“ငါ အရမ်းပေါ့ဆသွားတယ်။”

ဒါကိုကြားတော့ တခြားတပည့်နှစ်ယောက်ရဲ့ မျက်နှာအမူအရာတွေက မှောင်ကျသွားတယ်။

လက်ရှိအခြေအနေက သေလမ်းပဲ ဖြစ်နေပြီ။ သူတို့က ကောင်းကင်ဘုံဉာဏ်အလင်းဂိုဏ်းကနေ အကူအညီတောင်းလို့မရဘူး။ ပြီးတော့ သူတို့ဘေးမှာ သစ္စာဖောက်တစ်ယောက် လိုက်နေတယ်ဆိုတဲ့အချက်နဲ့ပေါင်းလိုက်ရင် သူတို့ရဲ့ နေရာက သေချာပေါက် ပေါက်ကြားသွားပြီ။ သူတို့က ထွက်ပြေးလို့လည်းမရဘူး၊ တိုက်ခိုက်လို့လည်းမရဘူး။

သေခြင်းတရားပဲ ရှိတော့တယ်။

“အကြီးအကဲ...” ယွမ်ဖုန်းက အသက်ပြင်းပြင်းရှူလိုက်တယ်။ သူက ဒီအချိန်မှာ အရမ်းကို တည်ငြိမ်ပြီး ပြတ်သားနေတယ်၊ “ကျွန်မတို့ ဒီနေရာကနေ ချက်ချင်းထွက်ခွာပြီး ပုန်းအောင်းဖို့ တခြားနေရာတစ်ခုကို ရှာရမယ်။”

“ပြီးတော့ လမင်းယုံကြည်မှု နတ်ဆိုးဂိုဏ်းရဲ့ ဂိုဏ်းချုပ်ကို ဖြေရှင်းဖို့ နည်းလမ်းတစ်ခု ကျွန်မမှာ ရှိတယ်!”

“မင်းမှာ နည်းလမ်းရှိတယ်?!”

လဲ့ချီဟိုင်က ခေါင်းမော့လိုက်ပြီး သူ့ရဲ့ မျက်လုံးတွေက နည်းနည်း လင်းလက်လာပေမယ့် မြန်မြန်ဆန်ဆန် မှိန်ကျသွားတယ်။ အခြေခံတည်ဆောက်ခြင်းအစောပိုင်းအဆင့် ယွမ်ဖုန်းက ဘယ်လိုအကြံဉာဏ်‌ကောင်းတစ်ခုမှရှိမယ်ဆိုတာကိုသူက မယုံကြည်မှန်း ထင်ရှားတယ်။

ယွမ်ဖုန်းက ဆက်ပြောတယ်၊ “ကျေးဇူးပြုပြီး ကျွန်မကို ယုံကြည်ပါ။ ပြီးတော့ရှင်တို့က ကျွန်မကိုပဲ ယုံကြည်နိုင်တယ်။ ဒါက တစ်ခုတည်းသော နည်းလမ်းပဲ။ ဘာပဲဖြစ်ဖြစ် ဒီနေရာကနေ အရင်ဆုံး ထွက်သွားကြရအောင်။”

“ကောင်းပြီ။” လဲ့ချီဟိုင်က ခေါင်းညိတ်လိုက်တယ်။