သတင်းပေါက်ကြားခြင်း
Vol. 7 Ch. 105
“ကောင်းကင်ဘုံဉာဏ်အလင်းဂိုဏ်းရဲ့ တာအိုရောင်းရင်းလား?”
တာအိုရှာဖွေရေးဂိုဏ်းရဲ့ အမွေခံတပည့်က ချီမင် ရောက်လာတာကို သိလိုက်ပြီး ခေါင်းမော့ကြည့်လိုက်တယ်။ သူက လက်ကို အနည်းငယ် ဆုပ်ကိုင်ပြီး ချီမင်ကို ဦးညွှတ်လိုက်တယ်၊ “ဘာလို့ အောက်ကို ဆင်းပြီး စကားမပြောကြလဲ?”
“တာအိုရှာဖွေရေးဂိုဏ်းရဲ့ အမွေခံတပည့်လား?”
ချီမင်က ဖိတ်ကြားချက်ကို လက်ခံပြီး တိမ်စီးခြင်းကို ရပ်လိုက်တယ်။ သူ ကောင်းကင်ကနေ ဆင်းလာပြီး တာအိုရှာဖွေရေးဂိုဏ်းရဲ့ အမွေခံတပည့်ရှေ့မှာ ရပ်လိုက်တယ်၊ “မင်း မြန်မြန် ရောက်လာတာပဲ”
“ငါကံကောင်းလို့ပါ”
တာအိုရှာဖွေရေးဂိုဏ်းရဲ့ အမွေခံတပည့်က ပြုံးပြီး ရှင်းပြတယ်၊ “ငါက တာအိုကျန်းချန်ပါ။တာအိုရှာဖွေရေးဂိုဏ်းရဲ့ အမွေခံတပည့်ပါ။ မင်းရဲ့ နာမည်ကို သိခွင့်ရမလား?”
“တာအိုကျန်းချန်”
ချီမင်က တိုးတိုးလေး ရွတ်ဆိုပြီး တစ်ဖက်လူကို အကဲခတ်လိုက်တယ်။ သူ့မှာ ချောမောတဲ့ မျက်နှာ၊ ထင်ရှားတဲ့ မျက်နှာအသွင်အပြင်နဲ့ထက်မြက်တဲ့ မျက်နှာရှိတယ်။ သူက တော်တော်လေး ချောမောပြီး ရှားပါးတဲ့ ချောမောတဲ့ ယောက်ျားတစ်ယောက်လို့ ပြောလို့ရတယ်။ ချီမင်လည်း ပြုံးပြီး “မင်းကံကောင်းလို့လား?”
ချီမင်လည်း သူ မဖြေချင်တဲ့ မေးခွန်းတွေကို ‘ကံကောင်းလို့ပါ’ လို့ ဖြေလေ့ရှိတယ်။ ဒီတာအိုရှာဖွေရေးဂိုဏ်းရဲ့ အမွေခံတပည့် တာအိုကျန်းချန်က အဲဒီလို ဝါသနာတစ်ခု ရှိပုံရတယ်။
ဝါသနာတစ်ခု မဟုတ်ဘူး။
ပြဿနာတွေကို ကိုင်တွယ်ဖြေရှင်းဖို့ နည်းလမ်းတစ်ခုနဲ့ အလေ့အကျင့်တစ်ခုပဲ။
“ဟုတ်တယ်”
တာအိုကျန်းချန်က ခေါင်းညိတ်တယ်။ “ငါတကယ် ကံကောင်းခဲ့တာ။ ငါ ဂိုဏ်းထဲက ဟင်းလင်းပြင်လမ်းကြောင်းကို ဖြတ်သွားတုန်း ရှေးခေတ်ကောင်းကင်ဂူရဲ့ အပေါက်အနီးကို ရောက်သွားတာ”
“တာအိုရောင်းရင်း၊ မင်း ကိုယ့်ကိုယ်ကို မမိတ်ဆက်သေးဘူး”
“ငါကချီမင်ပါ” ချီမင်က ပြောတယ်၊ “ကောင်းကင်ဘုံဉာဏ်အလင်းဂိုဏ်းရဲ့ အမွေခံတပည့်ပါ”
“တာအိုရောင်းရင်း ချီမင်” တာအိုကျန်းချန်က လက်ကို ဆုပ်ကိုင်ပြီး ထပ်ပြီး ဦးညွှတ်လိုက်တယ်။
ချီမင်က ပြန်လည် နှုတ်ဆက်လိုက်တယ်”ကျန်းချန်”
“ငါတို့ တွေ့ဆုံတာက ကံကြမ္မာပဲ။ ဘာလို့ ဒီရှေးခေတ်ကောင်းကင်ဂူကို အတူတကွ မစူးစမ်းကြတာလဲ?” တာအိုကျန်းချန်က ရုတ်တရက် အကြံပြုတယ်၊ “ဂိုဏ်းထဲက အကြီးအကဲတွေတောင် ဒီရှေးခေတ်ကောင်းကင်ဂူထဲက တိကျတဲ့ အခြေအနေကို မသိကြဘူး၊ ဒါပေမဲ့ အဲဒါက တစ်ညတည်းနဲ့ ချန်မြစ်တစ်ခုလုံးကို စုပ်ယူသွားတယ်”
“ချန်မြစ်ထဲမှာ အခြေတည်ဝိညာဉ်အဆင့်ကို ရောက်ပြီးသား အင်အားကြီးတဲ့ နတ်ဆိုးတွေ အများကြီး အပါအဝင် မွန်းစတားတွေ အများကြီး နေထိုင်ကြတယ်၊ ဒါပေမဲ့ သူတို့ ခုခံနိုင်စွမ်း မရှိဘဲနဲ့တောင် စုပ်ယူခံလိုက်ရတယ်”
“ဒါကနေ ဒီရှေးခေတ်ကောင်းကင်ဂူက လုံခြုံတဲ့ နေရာတစ်ခု မဟုတ်ဘူးဆိုတာကို မြင်နိုင်တယ်။ ရှေးခေတ်ကောင်းကင်ဂူထဲမှာ အန္တရာယ်တွေ သိပ်မများရင်တောင် ချန်မြစ်ထဲကို ပါသွားတဲ့ မဟာနတ်ဆိုးတွေကို ကိုင်တွယ်ရတာ မလွယ်ဘူး”
“ငါတို့ အတူတကွ သွားနိုင်ရင် အချင်းချင်း ကူညီနိုင်မှာ သေချာတယ်”
အစကနေ အဆုံးအထိ တာအိုရှာဖွေရေးဂိုဏ်းက အမွေခံတပည့် တာအိုကျန်းချန်က ရန်လိုတဲ့ အမူအရာ မပြခဘူး။ အဲဒီအစား သူက ချီမင်ကို ရှေးခေတ်ကောင်းကင်ဂူကို စူးစမ်းဖို့ ဆွဲဆောင်ချင်နေတယ်။
သူက အရမ်း ဖော်ရွေတယ်။
သူက ပြိုင်ဘက်တစ်ယောက်နဲ့ မတူဘူး။
“မလိုပါဘူး”
ချီမင်က ပြောတယ်၊ “ငါတို့က အစကတည်းက ဂိုဏ်းတူ တပည့်တွေ မဟုတ်ဘူး။ အတူတကွ သွားချင်ရင် ငါ့ရဲ့ ဂိုဏ်တူတပည့်တွေကို ရှာရတာကိုပိုကြိုက်တယ်။ ဒါ့အပြင် ငါ မင်းနဲ့ သွားပြီး ငါ့ရဲ့ဂိုဏ်းတူတပည့်တွေ မြင်သွားရင် ရှင်းပြရတာ ခက်လိမ့်မယ်”
“မင်းနဲ့ ငါလည်း အတူတူပဲ”
“တာအိုရောင်းရင်း၊ ဒါက သေးသေးမွှားမွှား ကိစ္စပါ။ ငါဂရုမစိုက်ပါဘူး” တာအိုကျန်းချန်က ခေါင်းခါလိုက်တယ်။
“ငါ ဂရုစိုက်တယ်” ချီမင်က ပြောတယ်။
“တာအိုရောင်းရင်း” တာအိုကျန်းချန်က ချက်ချင်း ပြောတယ်၊ “ငါတို့ ပထမဆုံး တွေ့တွေ့ချင်းမှာရင်းနှီးကြတယ်။ အဲဒီလို သေးသေးမွှားမွှား ကိစ္စလေးက ဘယ်လိုလုပ် ငါတို့ကို ထိခိုက်နိုင်မှာလဲ?”
“ငါ အရင်သွားမယ်”
ချီမင်က တာအိုကျန်းချန်ကို လျစ်လျူရှုပြီး သူ့ရှေ့က အက်ကွဲကြောင်းဆီ လျှောက်သွားတယ်။ သူ ခုန်ဆင်းပြီး အလျင်အမြန် ပြုတ်ကျသွားတယ်။ မကြာခင်မှာ သူ အောက်ခြေက ‘အပေါက်’ ကို တွေ့လိုက်တယ်။
အပေါက်က မကြီးဘူး။
ပုံမှန်မဟုတ်တဲ့ ဘဲဥပုံရှိတယ်။
အချင်းကသုံးမီတာလောက် ရှိတယ်။
အနားမှာ ကြည်လင်တဲ့ သလင်းကျောက်လို အရာတွေ တွေ့နိုင်တယ်။
အချိန်တိုင်း ဝိညာဉ်ချီစွမ်းအင်တွေ တက်လာတယ်။
ဒါ့အပြင်...
မမြင်နိုင်တဲ့ တားမြစ်ချက်တစ်ခုက အပေါက်ကို ဝန်းရံထားပြီး အခြေတည်ဝိညာဉ်အဆင့်အထက် တည်ရှိသူတွေ ဝင်ရောက်တာကို ကန့်သတ်ထားတယ်။ ချီမင်က အဲဒါကို ခဏခဏ အကဲခတ်ပြီးမှ ဒီအပေါက်ထဲကို ဝင်သွားတယ်။
“တာအိုရောင်းရင်း”
တာအိုကျန်းချန်က သူ့နောက်ကို လိုက်လာပြီး ချီမင် ဝင်သွားတာကို တွေ့လိုက်တယ်။ သူ အော်ဟစ်လိုက်တယ်၊ “ငါ့ကို စောင့်ဦး”
ဝှစ်!
တာအိုကျန်းချန်က အနီးကပ် လိုက်လာတယ်။
အချိန်တွေ ကုန်လွန်သွားတယ်။
မကြာခင်မှာ ကောင်းကင်ဘုံဉာဏ်အလင်းဂိုဏ်းရဲ့ တောင်ထွတ် ၁၂ ခုက အမွေခံတပည့်တွေနဲ့ တာအိုရှာဖွေရေးဂိုဏ်းရဲ့ နန်းတော် ၁၂ ခုက အမွေခံတပည့်တွေ တဖြည်းဖြည်း ရောက်လာပြီး ရှေးခေတ်ကောင်းကင်ဂူထဲကို ဝင်သွားကြတယ်။
ဒီကာလအတွင်းမှာ ကောင်းကင်ဘုံဉာဏ်အလင်းဂိုဏ်းရဲ့ တောင်ထွတ် ၁၂ ခုက အမွေခံတပည့်တွေနဲ့ တာအိုရှာဖွေရေးဂိုဏ်းရဲ့ နန်းတော် ၁၂ ခုက အမွေခံတပည့်တွေ အချင်းများပြီး တိုက်ခိုက်ကြတယ်။
ဘယ်ဘက်ကမှ သိပ်ပြီး အသာမရခဲ့ဘူး။
တစ်ဝက်လောက် ကြာပြီးတဲ့နောက် တာအိုရှာဖွေရေးဂိုဏ်းရဲ့ နန်းတော် ၁၂ ခုက အမွေခံတပည့်တွေနဲ့ ကောင်းကင်ဘုံဉာဏ်အလင်းဂိုဏ်းရဲ့ တောင်ထွတ် ၁၂ ခုက အမွေခံတပည့်တွေက ရှေးခေတ်ကောင်းကင်ဂူရဲ့ အပေါက်ကို တွေ့ပြီး ဝင်သွားကြတယ်။
ဒါပေမဲ့ ပိုကြီးတဲ့ ကိစ္စတစ်ခု ဖြစ်လာတယ်။
သတင်းတွေ ပေါက်ကြားသွားတယ်။
မြင်ကွင်း ပြောင်းသွားတယ်။
တောင်ပိုင်းဒေသမှာ။
ဗုဒ္ဓတစ်သောင်းကျောင်း။
“အမိတဘ”
ဗုဒ္ဓတစ်သောင်းရဲ့ အကြီးအကဲတွေ စုဝေးကြတယ်။ သူတို့ အခုမှ တောင်ပိုင်းဒေသနဲ့ အရှေ့ပိုင်းဒေသရဲ့ နယ်စပ်မှာ ရှေးခေတ်ကောင်းကင်ဂူတစ်ခု ပေါ်လာတဲ့ သတင်းကို ရရှိခဲ့ကြတယ်။
ဒါက ကြီးမားတဲ့ ကိစ္စတစ်ခုပဲ။
ဗုဒ္စတစ်သောင်းကျောင်းရဲ့ ရဟန်းတွေနဲ့ သံတွေ အားလုံးရဲ့ အာရုံစိုက်မှုကို ဆွဲဆောင်နိုင်ခဲ့တယ်။
“ချန်မြစ်အဖြစ်အပျက်က လွန်ခဲ့တဲ့ ၃၈ နှစ်က ဖြစ်ခဲ့တာ။ ချန်မြစ်အဖြစ်အပျက်က ကောင်းကင်ဘုံဉာဏ်အလင်းဂိုဏ်းရဲ့ အုပ်ချုပ်မှုအောက်က လူ့ကမ္ဘာမှာ ဖြစ်ခဲ့တဲ့အတွက် အဲဒီအချိန်တုန်းက တိကျတဲ့ အခြေအနေကို ငါတို့ မသိနိုင်ခဲ့ဘူး”
“ဒါပေမဲ့ ရှေးခေတ်ကောင်းကင်ဂူနဲ့ ပတ်သက်တဲ့ ကိစ္စက လုံးဝ မှန်တယ်ဆိုတာကို ငါ အတည်ပြုနိုင်တယ်”
“ရှေးခေတ်ကောင်းကင်ဂူမှာ အခြေတည်ဝိညာဉ်အဆင့်အထက် ကျင့်ကြံသူတွေ ဝင်ခွင့်မပြုတဲ့ တားမြစ်ချက်တစ်ခု ရှိတယ်။ ငါတို့ လုံးဝ မသွားနိုင်ဘူး။ ဒါ့အပြင် ငါတို့ သွားခဲ့ရင် ကောင်းကင်ဘုံဉာဏ်အလင်းဂိုဏ်းရဲ့မဟာအကြီးအကဲတွေက ချက်ချင်း တွေ့လိမ့်မယ်”
“အမိန့်ချပါ။ ဗုဒ္ဓသားတော်တွေကို သွားခိုင်းလိုက်ပါ”
“ငါတို့ ဒီရှေးခေတ်ကောင်းကင်ဂူရဲ့ အခွင့်အရေးကို လုယူရမယ်။ အနည်းဆုံးတော့ အမြတ်ဝေစု ရရမယ်”
“ကောင်းပြီ”
“ဆုံးဖြတ်ပြီးပြီ”
“…”
ဗုဒ္ဓတစ်သောင်းကျောင်းရဲ့ ခေါင်းဆောင်တွေက ကိစ္စကို ဖြေရှင်းလိုက်ကြတယ်။
ပြီးတော့ သူတို့ စတင် လှုပ်ရှားကြတယ်။
ဗုဒ္ဓတစ်သောင်းကျောင်းတင် မဟုတ်ဘူး။
နွေဦးဆောင်းဦးဂိုဏ်း၊အသင်္ချေ နတ်ဆိုးဂူနဲ့ နတ်ဆိုးနန်းတော်။
သူတို့အားလုံး ရှေးခေတ်ကောင်းကင်ဂူအကြောင်း သတင်းရရှိခဲ့ကြတယ်။ ဒါ့အပြင် သူတို့ တိကျတဲ့ သတင်းအချက်အလက်တွေကို ရရှိပြီးတဲ့နောက် သူတို့ရဲ့ ဂိုဏ်းရဲ့ အမွေခံတပည့်တွေကို ချန်မြစ်ကို စေလွှတ်ခဲ့ကြတယ်။
ခဏအတွင်းမှာ တောင်ပိုင်းဒေသတစ်ခုလုံး လှုပ်ခတ်သွားတယ်။
အရေးကြီးဆုံးက...
အရှေ့ပိုင်းဒေသမှာ လေးပင်လယ်နဂါးနန်းတော်၊နတ်ဘုရားစိတ်ဝိညာဥ်ခံတပ်နဲ့ နတ်ဆိုးအင်မော်တယ်ဂိုဏ်းရှိတယ်။
တာအိုရှာဖွေရေးဂိုဏ်းနဲ့ အဆင့်တူ ဂိုဏ်းသုံးခုကလည်း ရှေးခေတ်ကောင်းကင်ဂူရဲ့ သတင်းကို ရရှိခဲ့ကြတယ်။ သူတို့ ချက်ချင်း လှုပ်ရှားပြီး အမွေခံတပည့်တွေကို စေလွှတ်လိုက်ကြတယ်။
ရှေးခေတ်ကောင်းကင်ဂူက ဒီမုန်တိုင်းရဲ့ ဗဟိုချက် ဖြစ်သွားခဲ့ပြီ။
သတင်းတွေ ဘယ်လို ပေါက်ကြားသွားလဲဆိုတာကတော့။
ပထမဦးဆုံး ကောင်းကင်ဘုံဉာဏ်အလင်းဂိုဏ်းမှာ နွေဦးဆောင်းဦးဂိုဏ်း၊ ဗုဒ္ဓတစ်သောင်းကျောင်းနဲ့အသင်္ချေ နတ်ဆိုးဂူက သူလျှိုတွေ ရှိတယ်။ သူတို့က အရမ်း နက်နက်ရှိုင်းရှိုင်း ပုန်းအောင်းနေကြတယ်။ ဟုတ်တယ်၊ ကောင်းကင်ဘုံဉာဏ်အလင်းဂိုဏ်းမှာလည်း နွေဦးဆောင်းဦးဂိုဏ်း၊ ဗုဒ္ဓတစ်သောင်းကျောင်းနဲ့ အသင်္ချေနတ်ဆိုးဂူထဲမှာ ပုန်းအောင်းနေတဲ့ တပည့်တွေ ရှိတယ်။
နှစ်ဖက်စလုံးက ထိုးဖောက်ခံထားရတယ်။
သူတို့ အချင်းချင်း ထိန်းချုပ်ထားတယ်။
အရှေ့ပိုင်းဒေသအနေနဲ့ကတော့...
တာအိုရှာဖွေရေးဂိုဏ်းရဲ့ အခြေအနေကလည်း ကောင်းကင်ဘုံဉာဏ်အလင်းဂိုဏ်းနဲ့ အရမ်း ကွာခြားတယ်။
ရှေးခေတ်ကောင်းကင်ဂူက အရေးကြီးတယ်။
ကောင်းကင်ဘုံဉာဏ်အလင်းဂိုဏ်းနဲ့ တာအိုရှာဖွေရေးဂိုဏ်းတို့က အဲဒါကို ထုတ်ဖော်ဖို့ ဆုံးဖြတ်ပြီးပြီဆိုတော့ ဆက်ပြီး ဖုံးကွယ်ထားဖို့ မဖြစ်နိုင်တော့ဘူး။
သတင်းက သေချာပေါက် ပေါက်ကြားလိမ့်မယ်။
အချိန်တစ်ခုပဲ လိုတော့တယ်။
ဒါပေမဲ့ အဲဒီလောက် မြန်မြန် ပေါက်ကြားတာက နည်းနည်း မထင်မှတ်ထားဘူး။
ဒါ့အပြင်...
တာအိုရှာဖွေရေးဂိုဏ်းနဲ့ ကောင်းကင်ဘုံဉာဏ်အလင်းဂိုဏ်းတို့က ပြင်ဆင်ထားပြီးသား။
မြောက်ပိုင်းနဲ့ အနောက်ပိုင်းဒေသတွေကလည်း မသေချာတဲ့ သတင်းအချို့ကို ရရှိခဲ့ကြပြီး အဲဒါက မသေချာသေးဘူး။ ဒါ့အပြင် အကွာအဝေးက အရမ်းဝေးတဲ့အတွက် သူတို့ရဲ့ လွှမ်းမိုးမှုက အဲဒီနေရာကို မရောက်နိုင်ဘူး။
ဗဟိုဒေသအနေနဲ့ကတော့...
သူတို့ ဂရုစိုက်မှာ မဟုတ်ဘူး။
အခု ချီမင်က ရှေးခေတ်ကောင်းကင်ဂူထဲကိုဝင်ရောက်နေတာကြာပြီ။
ချီမင် ရောက်ရှိနေတဲ့ လက်ရှိ ပတ်ဝန်းကျင်က အရမ်းထူထပ်တဲ့ မူလတောအုပ်တစ်ခုထဲမှာ ရှိတယ်။ ဒါ့အပြင် ဝိညာဉ်ချီစွမ်းအင်က အရမ်းကြွယ်ဝပြီး ကောင်းကင်ဘုံဉာဏ်အလင်းဂိုဏ်းထဲက ဝိညာဉ်စွမ်းအင်ထက် မနိမ့်ကျတဲ့အပြင် ပိုတောင် များနိုင်တယ်။
ပတ်ဝန်းကျင်မှာ မိုးထိအောင် မြင့်မားတဲ့ နှိုင်းယှဉ်လို့မရလောက်အောင် ကြီးမားတဲ့ သစ်ပင်တွေ ရှိတယ်။ သူတို့ရဲ့ အရွက်အကိုင်းတွေက နေရောင်ကို ကာဆီးထားတယ်။ ဒါ့အပြင် ဒီရှေးခေတ်ကောင်းကင်ဂူထဲမှာ ကောင်းကင်မှာ တောက်ပတဲ့ နေမင်းကြီး တစ်လုံးကအမြင့်မှာ တောက်ပနေတယ်။
တိတိကျကျ ပြောရရင် ချီမင် အခုထိ မြင်တွေ့ခဲ့တာတွေအရ ဒီရှေးခေတ်ကောင်းကင်ဂူက တကယ့် ကမ္ဘာတစ်ခုနဲ့ တူတယ်။
ဟုတ်တယ်၊ တိကျတဲ့ အခြေအနေအနေနဲ့ကတော့ ချီမင်က အဲဒါကို အပြည့်အဝ နားလည်ဖို့ သူ့ဘာသာ ဆက်ပြီး စူးစမ်းဖို့ လိုသေးတယ်။
ဒီရှေးခေတ်ကောင်းကင်ဂူရဲ့ အမွေအနှစ်က ဘယ်မှာလဲဆိုတာကတော့။
ချီမင်က လောလောဆယ်ဘာအကြံမှမရှိဘူး။
“တာအိုရောင်းရင်း”
တာအိုကျန်းချန်က ချီမင်နဲ့ရှိလာပြီး ပြုံးတယ်၊ “ဒီရှေးခေတ်ကောင်းကင်ဂူထဲမှာ ငါတို့ ထပ်ပြီး တွေ့ဆုံဖို့ တကယ် ကံပါလာတာပဲ။ ဒါကြောင့် ငါ တကယ် ထင်တာက ငါတို့ ဒီရှေးခေတ်ကောင်းကင်ဂူကို စူးစမ်းဖို့ပူး ပေါင်းသင့်တယ်”
“ငါ စိတ်မဝင်စားဘူးလို့ အရင်က ပြောပြီးပြီ”
ချီမင်က တာအိုကျန်းချန်ကို ဂရုမစိုက်သလို ကြည့်လိုက်တယ်။
“တာအိုရောင်းရင်း၊ မင်း အဲဒီလို မပြောသင့်ဘူး”
တာအိုကျန်းချန်က လိုက်လာတယ်။ “စကားပုံရှိတယ်လေ၊ လူများရင် အင်အားများတယ်။ ဘာဖြစ်ဖြစ် ကူညီမယ့်သူ ရှိတာ အမြဲ ကောင်းတယ်”
ချီမင်က ဘာမှ ပြန်မပြောဘူး။
မူလက သူက ဒီရှေးခေတ်ကောင်းကင်ဂူရဲ့ တကယ့် မူလအစနဲ့ အမွေအနှစ်ရဲ့တည်နေရာကို ခန့်မှန်းဖို့အတွက် အကြားအမြင်အာရုံနဲ့ ကောင်းကင်စူးစမ်းခြင်းကို သုံးဖို့ စီစဉ်ထားတယ်။
ဒါပေမဲ့ တာအိုကျန်းချန်က သူ့နောက်ကိုမရှက်မရွံလိုက်လာတာကချီမင်ကိုအရမ်းစိတ်အနှောင့်အယှက် ဖြစ်စေတယ်။ ဒါ့အပြင် တာအိုကျန်းချန်က သူ့ကို ပြုံးပြီး နှုတ်ဆက်သွားတယ်။ ချီမင်က ဘယ်လောက်အေးစက်စွာပြောနေပါစေသူဘာမှမခံစားရဘူး။
သူက ကော်လိုပဲ။
ချီမင်က သူ့ကို ခါထုတ်လို့ မရဘူး။
သူက ချီမင်နောက်ကို လိုက်ဖို့ ဆုံးဖြတ်ထားပုံရတယ်။
တခြားသူတစ်ယောက်ဆိုရင်...
သူတို့က တာအိုကျန်းချန်ကို သိပ်ပြီး ခုခံမှာ မဟုတ်ဘူး။
ဒါပေမဲ့ ချီမင်က မတူဘူး။
“ထွက်သွားစမ်း!”
ချွင်!
ချီမင်က သူ့ရဲ့ ညာဘက်လက်ကို ဝှေ့ယမ်းလိုက်ပြီး ဓားတစ်လက် ပေါ်လာတယ်။ အဲဒါက ကမ္ဘာဖျက်ဆီးဓားပဲ။ သူက တာအိုကျန်းချန်ကို အေးစက်စွာ ကြည့်ပြီး “မင်းအခုထိမထွက်သွားသေးဘူးဆိုရင်ငါ့ကိုသနားညှာတာမှု မပြလို့အပြစ်မတင်နဲ့”
“အဟွတ် အဟွတ်...”
တာအိုကျန်းချန် အံ့သြသွားပြီး ခြေတစ်လှမ်း နောက်ဆုတ်လိုက်တယ်။ သူက ပြောတယ်၊ “တာအိုရောင်းရင်း ချီမင်၊ မင်းဘာလို့ ဒီလို လုပ်နေတာလဲ? ငါတို့နှစ်ယောက် ပူးပေါင်းလို့ မရရင်တောင် ရန်သူတွေ ဖြစ်လာမှာ မဟုတ်ဘူး!”
“မဟုတ်ဘူး၊ မဟုတ်ဘူး။ တာအိုရောင်းရင်း၊ ဓားကို သိမ်းလိုက်ပါဦး။ ဓားက ထက်မြက်တဲ့ လက်နက်တစ်ခုဖြစ်သလို ရက်စက်တဲ့ လက်နက်တစ်ခုလည်း ဖြစ်တယ်။ မတော်တဆ တခြားသူတွေကို ထိခိုက်မိပြီး ကိုယ့်ကိုယ်ကိုလည်း ထိခိုက်မိရင် မကောင်းဘူး”
“ဆူညံလွန်းတယ်!”
ချွင်!
ချီမင်က ဘာမှ မတွန့်ဆုတ်ဘဲ တိုက်ခိုက်လိုက်တယ်။ သူ ဓားတစ်ချက်ကို ခုတ်လိုက်တယ်။ ရွှေအမြူတေ ဓမ္မစွမ်းအားတွေ အဲဒီထဲကို စီးဝင်သွားပြီး ကောင်းကင်နဲ့ မြေကြီး တာအိုစာလုံးတွေရဲ့ အားဖြည့်မှုနဲ့အတူ တာအိုကျန်းချန်ကို ခုတ်ထစ်ဖို့ ထက်မြက်တဲ့ ဓားစွမ်းအင်အဖြစ် ပြောင်းလဲသွားတယ်။
“တာအိုရောင်းရင်း!”
တာအိုကျန်းချန် အံ့သြတကြီး အော်ဟစ်လိုက်တယ်။ သူက သူ့ရဲ့ ညာဘက်လက်ကို ဝှေ့ယမ်းလိုက်ပြီး ခြေသုံးချောင်းပါတဲ့ အိုးတစ်လုံး ပေါ်လာတယ်။ အိုးရဲ့ ကိုယ်ထည်က အနက်ရောင်နဲ့ အဝါရောင်ဖြစ်ပြီး တောင်တွေနဲ့ မြစ်တွေ ထွင်းထုထားတယ်။ အဲဒါက အသက်ဝင်လွန်းတယ်။
ဒါက တောင်တန်းမြစ်နက်ဝါအိုးပဲ။
ဘုန်း!
အသံကျယ်လောင်စွာ ထွက်ပေါ်လာတယ်။
ချီမင်ရဲ့ ဓားစွမ်းအင်နဲ့တိုက်မိပြီး အင်အားကြီးမားစွာ ပေါက်ကွဲထွက်လာတယ်။ အဲဒါကရှင်းရှင်းလင်းလင်းပဲ ရွှေအမြူတေ ဓမ္မစွမ်းအားတွေပဲဖြစ်ပေမဲ့ အမြင့်ဆုံးအထိ စုစည်းထားပြီးအရမ်းအင်အားကြီးမားတယ်။ အဲဒါက တာအိုကျန်းချန်ရဲ့ တောင်တန်းမြစ်နက်ဝါအိုးကို လွင့်လိုက်တယ်။
“အိုး မဟုတ်ဘူး”
တာအိုကျန်းချန် အံ့သြသွားပြီး တောင်တန်းမြစ်နက်ဝါအိုးကို အလျင်အမြန် သိမ်းလိုက်တယ်။ ဒါပေမဲ့ အိုးရဲ့ ကိုယ်ထည်မှာ အက်ကွဲကြောင်းတစ်ခု ပေါ်လာတာကို သူ တွေ့လိုက်တယ်။ သူ ဒေါသထွက်ပြီး စိတ်မကောင်းဖြစ်သွားတယ်။
တစ်ချိန်တည်းမှာ သူနည်းနည်းလည်းအံ့သြသွားတယ်။
“တာအိုရောင်းရင်း ချီမင်...” တာအိုကျန်းချန်က အလျင်အမြန် ပြောတယ်၊ “ငါတို့ ကံပါရင် ပြန်တွေ့ကြတာပေါ့”
ဝှစ်!
သူ စကားဆုံးတာနဲ့ တာအိုကျန်းချန်က အလျင်အမြန် ဓာတ်ငါးပါး လွတ်မြောက်ခြင်းနည်းကို သုံးပြီး ထွက်သွားတယ်။
“သူ ငါ့ရဲ့ ဓားကို ပိတ်ဆို့နိုင်ခဲ့တယ်”
ချီမင် ခဏ စဉ်းစားလိုက်တယ်၊ “တာအိုကျန်းချန်ရဲ့ အင်အားက မနည်းဘူး”
တစ်ဖက်မှာ တာအိုကျန်းချန်က ငါးကီလိုမီတာလောက် ပြေးပြီးမှ ရပ်လိုက်တယ်။
“ဒီချီမင်က အရမ်း ရက်စက်တယ်”
တာအိုကျန်းချန်က သူ့ရဲ့ နဖူးပေါ်က မရှိတဲ့ ချွေးတွေကို သုတ်ရင်း ရင်ထဲမှာ ကြောက်ရွံ့မှုတွေ ကျန်နေပြီး ပြောလိုက်တယ်၊ “အခုနက ပိုင်းလိုက်တာက ငါ့ရဲ့ တောင်တန်းမြစ်နက်ဝါအိုးကို တကယ်ပဲ ခွဲပစ်လိုက်တာ”
“သူ အခုနက ပြခဲ့တဲ့ ဓမ္မစွမ်းအားတွေအရ သူကအမြူတေဖွဲ့စည်းခြင်း နှောင်းပိုင်းအဆင့်မှာ ရှိသင့်တယ်၊ ဒါပေမဲ့ အမြူတေဖွဲ့စည်းခြင်း နှောင်းပိုင်းအဆင့် ကျင့်ကြံသူတစ်ယောက်ကဘယ်လိုလုပ် အဲဒီလောက် အင်အားကြီးနိုင်မှာလဲ?”
“ဒါ့အပြင်...”
ဘုန်း!
တာအိုကျန်းချန်က အဋ္ဌဂံတံဆိပ်တစ်ခုကို ထုတ်လိုက်တယ်။ အလယ်မှာ ကြေးမုံတစ်ခု ရှိတယ်။ ကြေးမုံပေါ်မှာ သက်တံရောင် စာကြောင်းတစ်ခု ပေါ်လာတယ်—ချီမင်နောက်ကို လိုက်! ကြီးမားတဲ့ ကောင်းချီးရမယ်!
“ငါ တကယ် နောက်ထပ် မလိုက်ရဲတော့ဘူး။ ငါ သတ်ခံရမှာ ကြောက်တယ်” တာအိုကျန်းချန်က ပြောတယ်။