ဟင်းသီးဟင်းရွက်က ဆေးထက်စွမ်း!

ထို့အတူ ဆေးဝါးစစ်ဆေးရေးဌာနဝန်ထမ်းက ကျိုးဟုန်ကိုချင်းလင်စံအိမ်ကမှန်းသိသောကြောင့် ဒုက္ခလာပေးသည်မထင်တော့။

ချင်းလင်အစားအသောက်ကုမ္ပဏီကပို့တာ ဒါပထမဆုံးမဟုတ်။ ချင်းလင်အားဆေး၊ ချင်းလင်အားဖြည့်လက်ဖက်ရည်နှင့် ချင်းလင်ရေပူစမ်းဆေးမှုန့်ကို ဆေးဝါးစစ်ဆေးရေးဌာနပို့ပြီး စမ်းသပ်ဖူးသည်။

အထက်လူတွေကလည်း အသိပေးထားသည်။ ချင်းလင်ကုမ္ပဏီက လာစစ်ဆေးရင် တစ်ခါတည်းဖုန်းဆက်ပြီး အစီရင်ခံရန်၊ စီစဉ်ပေးရန်မှာထားသည်။

ချင်းလင်ကုမ္ပဏီက တစ်နေ့တခြားကြီးပွားလာသည်။ ရုံချန်းမှာဆိုသော်လည်း အနှေးနှင့်အမြန် ရုံချန်းက ချင်းလင်ကုမ္ပဏီနှင့်အလိုက်သင့်ဖြစ်တော့မည်မဟုတ်မှန်း အားလုံးသိကြသည်။

ချင်းလင်ဓာတ်ခွဲခန်းက မင်မြို့တော်စီရင်စုများတွင် မြေစာချုပ်လိုက်ချုပ်နေရသလိုပင်။

ကြီးလာသောကုမ္ပဏီအတွက် သူ့စီးပွားရေးကိုထိပ်ဆုံးဦးစားပေးရမည်။

အရေးအကြီးဆုံးလူက ပါမောက္ခလီခိုင်ပင်။

ပါမောက္ခလီခိုင်ရဲ့မိသားစုနောက်ခံကို မသိသူမရှိလောက်?

မင်မြို့တော်မှာ လီမိသားစုကဘာကိုကိုယ်စားပြုလဲ မသိတဲ့ဌာနမရှိ။ အထူးသဖြင့် လီမိသားစုရဲ့အကြီးဆုံးသားက နောက်ထပ်အလားအလာရှိနေသည်။

ဆေးဝါးစစ်ဆေးရေးတာဝန်ခံကဖုန်းရပြီး ကျိုးဟုန်ကိုဧည့်ခံရန်ချက်ချင်းထွက်လာသည်။ သူကိုယ်တိုင်ထွက်ကြိုပြီးလျှင်_

"ဧည့်ခန်းထဲနားပါဦး... ချင်းလင်စံအိမ်ရဲ့ဆေးစစ်ချက်ကိုအခုချက်ချင်းစီစဉ်ပေးပါမယ်''

"ဒါဆို အားနာစရာတွေဖြစ်ကုန်ပြီ''

ကျိုးဟုန်နည်းနည်းနေရခက်သွားသည်။ ဒီလိုအထူးတလည်ဆက်ဆံခံရတာ ဒါပထမဆုံးပင်။

တန်းစီနေသူများက ထိုမြင်ကွင်းကိုမြင်ပြီး အားကျနေသောအကြည့်များနှင့်။ သို့သော် မထူးဆန်းမိ။ ဒီဌာနတွေက ချင်းလင်စံအိမ်ကလူဆို ပျူပျူငှာငှာဆက်ဆံနေကျ။



ဘာပဲ​ဖြစ်ဖြစ် လုံးဝတရားမျှတရေးကိုအာရုံထားသောအရူးက နည်းနည်းသာရှိသည်။

ကြားမကောင်းပေမဲ့ သူဌေးကြီးမာကို တစ်လသုံးလေးထောင်ရတဲ့သူတွေနဲ့အတူတူတန်းစီခိုင်းရင် ဦးနှောက်မရှိရာမကျဘူးလား?

တာဝန်ခံက ကျိုးဟုန်ကိုဧည့်ခံနေစဉ် ဆေးဝါးစစ်ဆေးရေးဌာနမှစစ်ဆေးရေးဝန်ထမ်းအား ကျိုးဟုန်ယူလာသောဟင်းသီးဟင်းရွက်များကိုချက်ချင်းဆေးစစ်ခိုင်းသည်။

ကျိုးဟုန်လည်း ဆေးဝါးစစ်ဆေးရေးဌာနမှအမြန်ပြန်ထွက်လာသည်။ တာဝန်ခံကိုယ်တိုင်က ချက်ချင်းစမ်းသပ်ခိုင်းရင်တောင် ဟင်းသီးဟင်းရွက်များ၏အဖြေကို နောက်တစ်နေ့အထိစောင့်ရဦးမည်။

စစ်ဆေးရေးဝန်ထမ်းက ဟင်းသီးဟင်းရွက်များကိုမြင်ပြီး နည်းနည်း​ကြောင်သွားသည်။ ဒါပထမဆုံးပင်။ သို့သော် ခေါင်းဆောင်ကစီစဉ်ခိုင်း၍ စမ်းသပ်ချက်ကိုအတည်လုပ်ရတော့မည်။

စစ်ဆေးသူအမျိုးသားက အမှတ်တမဲ့ရုံးပတီသီးကိုယူစစ်လိုက်သည်။

(ရုံးပတီ: စမ်းသပ်ချက်အာနိသင်များ: ရင်သားသွေးလှည့်ပတ်မှုကောင်းစေခြင်း၊ စိုထိုင်းမှုကိုသန့်စင်ပေးခြင်း၊ ကျောက်ကပ်အားကောင်းစေခြင်း!)

နောက်ဆုံးအာနိသင်က မျက်စိကျစရာ။

ရုံးပတီက အင်အားတိုးစေသည်ဟုဆိုနိုင်သည်။ ဒီအာနိသင်များကိုစမ်းသပ်လိုသော်လည်း အမှန်ဟုတ်မဟုတ်မသိ။

စစ်ဆေးသူကချက်ချင်းကိရိယာများယူပြီး ရုံးပတီသီးကိုအရည်ညှစ်ကာ အထူးဖွဲ့စည်းမှုတစ်ခုကိုထုတ်ယူလိုက်သည်။

သူတို့စမ်းသပ်ချက်က တကယ်တော့ရိုးရှင်းသည်။ သူတို့ရည်ညွှန်းစာကြည့်တိုက်တွင် သက်ဆိုင်ရာအချက်အလက်များ၊ နိုင်ငံတွင်းရှိဆေးဝါးမျိုးစုံ၏အချက်အလက်များ အားလုံးပါသည်။

ထိုအချက်အလက်များထုတ်ကာနှိုင်းယှဉ်ကြည့်လျှင် သက်ဆိုင်ရာအာနိသင်အဆင့်ကိုရလိမ့်မည်။

တစ်ခုတည်းသောပြဿနာက ထုတ်ယူသောဖြစ်စဉ်မှာ အထဲတွင်ပိတ်ထားပြီးအချိန်ယူရသည်။

အချိန်လွန်သည်နှင့် စစ်ဆေးသူအမျိုးသား၏မျက်နှာက ပိုပိုပြီးထူးဆန်းလာသည်။



ရုံးပတီသီးမှထုတ်ယူထားသောဓာတ်များတွင် အမှန်ပင်ကျောက်ကပ်အားကောင်းစေသောအာနိသင်ရှိနေသောကြောင့်ပင်။

မြေခွေးလက်သည်း၊ ကန္တာရမြက်၊ ကောင်းကင်စစ်သည်ခြေရာ စသည့် ကျောက်ကပ်အားကောင်းစေသော ဆေးဖက်ဝင်အပင်များစွာရှိသည်။ ဝူကျီကျုံးအားဆေး၊ ကျောက်ကပ်အားဆေး၊ ဂျင်ဆင်းနှင့်သမင်ချိုစသော ထုတ်လုပ်ပြီးသားဆေးဝါးများလည်းရှိသည်။

ထိုဆေးပင်များ၊ ထုတ်လုပ်ထားသောဆေးများအားလုံးတွင် ဒီလိုအာနိသင်မျိုးရှိသည်။ နောက်ပြီး ဆေးပင်နှင့်ဆေးဝါးများဖော်မြူလာမတူသောကြောင့် အာနိသင်အဆင့်ချင်းလည်းမတူကြပေ။

ဆေးဝါးများက ဆေးပင်သက်သက်ထက်ပိုပြီး အာနိသင်ကောင်းသည်။

ထိုအချက်အလက်များကို အစားအသောက်နှင့်ဆေးဝါးကွပ်ကဲရေးဌာနတွင် အသေးစိတ်နှိုင်းယှဉ်ထားသည်။

သို့သော် အခုရုံးပတီသီးမှထုတ်ထားသောဓာတ်များနှင့်အချက်အလက်ကိုနှိုင်းယှဉ်ကြည့်ရာ လန့်လောက်စရာအဖြေထွက်လာသည်။

ချင်းလင်စံအိမ်ရုံးပတီသီး၏ကျောက်ကပ်အားကောင်းစေသောအာနိသင်က စျေးကွက်ထဲမှဆေးပင်များ၊ဆေးဝါးများထက်ပိုကောင်းနေသည်။

နောက်နေတာလား?

ဟင်းသီးဟင်းရွက်က!

အဲဒီနောက် တခြားတွေးမိပြန်သည်။

ပါမောက္ခလီခိုင်က အံ့ဩစရာပဲ!



ဒီလိုဟင်းသီးဟင်းရွက်မျိုးကို ပါမောက္ခလီခိုင်ပဲပျိုးထောင်နိုင်မှာမလား?

ထို့နောက် ရုံးပတီသီး၏တခြားအာနိသင်နှစ်ခုကိုစမ်းသပ်ကြည့်သည်။ ရင်သားသွေးလှည့်ပတ်မှုကောင်းစေခြင်း၊ စိုထိုင်းမှုကိုသန့်စင်ပေးခြင်းအာနိသင်များကလည်း စျေးကွက်ထဲမှဆေးပင်များ၊ဆေးဝါးများထက်ပိုကောင်းနေသောကြောင့် သူအံ့အားသင့်သွားသည်။

ဒါဘာအဓိပ္ပါယ်လဲ?

ချင်းလင်စံအိမ်ရဲ့ရုံးပတီသီးက ဆေးဖက်ဝင်အာနိသင်ရှိတဲ့ဆေးဝါးတွေနဲ့တူနေသည်။ ပြီးတော့ ဆေးဖက်ဝင်အာနိသင်ကအရမ်းကောင်းသည်။

ဒါ ဆေးဝါးကုမ္ပဏီအတော်များများကိုအရှက်ရစေလိမ့်မည်။

စစ်ဆေးသူအမျိုးသားကအံ့အားသင့်နေစဉ် သူ့ဘေးမှစစ်ဆေးသူအမျိုးသမီးကထပြီးရေရွတ်လိုက်သည်_

"အံ့ဩစရာပဲ... ဒီမုန်လာဥဖြူဘယ်လောက်ထူးဆန်းလဲ နင်တို့တွေးမိမှာမဟုတ်ဘူး''

သူမပြောရင်းဆိုရင်း မုန်လာဥဖြူကိုကောက်ကိုင်ပြသည်။

ထိုမုန်လာဥဖြူက စျေးကွက်ထဲမှဆေးဝါးများထက်ပိုပြီး အာနိသင်စုံနေသည်။

မုန်လာဥဖြူကလေ!

ရှေ့လျှောက် ဒီဝေဒနာတွေခံစားရရင် ဆေးသောက်ဖို့လိုပါဦးမလား? မုန်လာဥဖြူစားတာမကောင်းဘူးလား?

ဝက်နံရိုးနဲ့မုန်လာဥဖြူက မမွှေးဘူးလား?

အရမ်းမွှေးတာပေါ့!

ရုံးပတီနှင့်မုန်လာဥဖြူသာမက ချင်းလင်စံအိမ်မှပို့ထားသောဟင်းသီးဟင်းရွက်များအားလုံးစစ်ဆေးပြီးနောက်တွင် စျေးကွက်ထဲမှဆေးဝါးများထက်အာနိသင်ပိုထက်ကြောင်းသိလိုက်ရသည်။

နောက်နောင် ဒါတွေနဲ့ဆက်စပ်တဲ့ရောဂါတွေမှာ ချင်းလင်စံအိမ်က ဆေးရုံထက်ပိုပြီးနာမည်ကြီးတော့မည်ဟုတောင်တွေးမိသည်။

နောက်ဆုံး သူတို့ကသက်ပြင်းသာချပြီး...

ပါမောက္ခလီခိုင်ကတော့ တကယ်ပါပဲ။

နောက်တစ်နေ့_

ဆေးဝါးစစ်ဆေးရေးဌာနမှဆေးစစ်ချက်များထွက်ပြီဖြစ်ကြောင်း ကျိုးဟုန်ကိုအသိပေးလိုက်သည်။

သူမက ဆေးဝါးစစ်ဆေးရေးဌာနသို့အပြေးလာပြီး ဆေးစစ်ချက်များရသောအခါ သူမမျက်နှာမှာ အတော်စိတ်ဝင်စားဖွယ်ဖြစ်သွားလေသည်။