အသားဂိတ်ပေါက်ကို ဖွင့်လှစ်ခြင်း

ဝမ်ဝေ့က အဆီအနှစ်မျှော်စင်မှ ပထမအခန်းမှ လူကို စစ်ဆေးကြည့်လိုက်ပြီး မုန့်ခယ်ဖြစ်နေမည်ကို စိုးထိတ်သွားမိသည်။ သို့သော်လည်း တခြားတစ်ယောက် ဖြစ်နေလေ၏။

သူက အမဲလိုက်နေတုန်းလား။

ကြည့်ရတာ အမှတ်တွေအများကြီးစုပြီးတော့ မျှော်စင်ထဲမှာ အချိန်အကြာကြီးနေဖို့ စီစဉ်ထားတာထင်တယ်။

မုန့်ခယ်က တခြားမျှော်စင်များကို အသုံးပြုဖို့ စိုးရိမ်စရာမလိုအပ်ပေ။ အကြောင်းအရင်းကမူ သူသည် ဤမျှော်စင်တွင် တတ်နိုင်သမျှကြာကြာနေဖို့ စီစဉ်ထားပြီး သူ့ကျင့်ကြံဆင့်ကို တိုးမြင့်အောင် စီစဉ်ထားခြင်းက အဓိပ္ပာယ်ရှိပေသည်။

ပထမအခန်းမှ လူသည် အသိအကျွမ်းမဟုတ်သည့်အတွက် ဝမ်ဝေ့က သူ့ကို ကန်ထုတ်ကာ ပထမအခန်းအတွက် ကာကွယ်ရေးအခကြေးငွေကိုပါ ပေးအပ်လိုက်သည်။ ထျန်းရွှမ်က ထိုအခန်းကို မလိုအပ်သော်လည်း တစ်ဖက်သူက တစ်စုံတစ်ခု လုပ်လာနိုင်ခြေရှိလာသည့် အခြေအနေအတွက် သတိကြီးကြီး ထားထားရမည်။ ထို့အပြင် သူက တတိယမြောက်နေရာရှိ လူကိုလည်း သတိထားရဦးမည် ဖြစ်၏။

“ဒီအခန်းက တာအိုမျှော်စင်လိုမျိုးလိုပဲ ကိုယ်တိုင်စိတ်ကြိုက်ပြုပြင်လို့ရတယ်”

ထို့ကြောင့် သူက ပုံမှန်အခန်းတစ်ခန်းလိုမျိုး ရွေးချယ်လိုက်သည်။ ဝမ်ဝေ့က ထိုင်ချရင်းဖြင့် စတင်လိုက်သည်။ အသားဂိတ်ပေါက်ကို ဖွင့်လှစ်ခြင်း ဖြစ်စဉ်သည် သုံးဆင့် ရှိ၏။ စမ်းသပ်ချက်နှစ်ခုနှင့် ဖွင့်လှစ်ရေးဖြစ်စဉ်တို့ ဖြစ်သည်။

သူက ပထမစမ်းသပ်ချက်ကို မစတင်ဘဲ စတင်ကျင့်ကြံလိုက်၏။ ဝမ်ဝေ့၏ ရည်ရွယ်ချက်က သူ့စိတ်ဆန္ဒ - ခန္ဓာပေါင်းစည်းမှုအား ပြီးပြည့်စုံစေရန် ဖြစ်သည်။ သူ့ကြီးမားသည့် အသစ်တွေ့ရှိမှုဖြင့် သူသည် အခြေခံအဆင့်ပေါင်းစည်းမှုမျိုးကို ပြီးပြည့်စုံစေပြီး ထိုကဏ္ဍ၌ အစစ်အမှန်ပြီးပြည့်စုံမှုကို ရယူနိုင်သည်။

ဟမ် ငါ့ရဲ့ ခန္ဓာမှာ တခြားပြစ်ချက်တွေ ရှိနေတာလား

ဝမ်ဝေ့က တွေးလိုက်၏။ ထိုဖြစ်စဉ်အတွင်း သူသည် အသေးအဖွဲတချို့ကို သတိထားမိခဲ့ပြီး သူ့ခန္ဓာကိုယ်နှင့် ဝိညာဉ်၌ အာရုံမခံမိဖွယ် ပြစ်ချက်တချို့ရှိနေလေသည်။ ဤနှစ်များစွာတိုင် ဝမ်ဝေ့က သူ့စိတ်ဆန္ဒကို လေ့ကျင့်ဖို့ နည်းလမ်းအနေဖြင့် သူ့စိတ်နှင့် စိတ်ဝိညာဉ်ကို အဆုံးစွန်ထိ တွန်းပို့ခဲ့လေသည်။ သူက ထိုဒဏ်ရာများမှ ကုစားပြီးပြီဟု ထင်မှတ်မိခဲ့သော်လည်း စစ်ဆေးချက်အရ ဘယ်သောအခါမှ မကောင်းမွန်သေးသည့် ပြစ်ချက်တချို့ ကျန်ရှိနေလေ၏။

တခြားပြစ်ချက်တွေရှိလားဆိုတာ ကြည့်ကြည့်ရအောင်

ဝမ်ဝေ့က ဆက်လက်လုပ်ဆောင်ရင်း တွေးလိုက်သည်။ သူက မျှော်စင်မှ စစ်မှန်သည့် စွမ်းအားသည် သူ့တည်ရှိမှုကို ဆင့်ကဲပြောင်းလဲဖို့ သို့မဟုတ် လေ့ကျင့်ပေးဖို့ အကောင်းဆုံးအရင်းအမြစ် တစ်ခုဖြစ်ကြောင်း သဘောပေါက်သွားလေ၏။ ဝမ်ဝေ့က သူ့ခန္ဓာကိုယ်တွင်ရှိသည့် ပြစ်ချက်အားလုံးကို ပြုပြင်သော်လည်း သူ့တည်ရှိမှုတစ်ခုလုံးအပေါ် မလုပ်ခဲ့ပေ။ သူက မဟာတာအို၏ စောင့်ကြည့်ရေးအောက် မရောက်စေလိုပေ။

သူ ထူးကဲသာလွန်မှုတစ်ပိုင်းအဆင့်ဖြစ်လာသည်နှင့် ပြီးပြည့်စုံသည့် သဘောတရားကို စူးစမ်းရှာဖွေဖို့ အခွင့်အရေးများစွာ ရလိမ့်မည်။ ထို့ကြောင့် သူ့အနေဖြင့် မလိုလားအပ်သည့် ပြဿနာများကို မီးမွှေးရှာ၍ အကျိုးမရှိပေ။ နှစ်ဒါဇင်ချီ လေ့ကျင့်ပြီးသည့်နောက်တွင် ဝမ်ဝေ့က အစစ်အမှန်ပြစ်ချက်မဲ့ခန္ဓာကိုယ် ရရှိလိုက်သည့်အတွက် ပထမစမ်းသပ်ချက်ကို ဆင့်ခေါ်လိုက်သည်။

ဝမ်ဝေ့က သူ့ကိုယ်သူ ကိုယ်ပွားတစ်ယောက် မျက်နှာချင်းဆိုင် ရပ်နေသည့် မှောင်မဲမဲ နေရာတစ်ခုအတွင်းသို့ ရောက်ရှိသွားသည်ကို တွေ့လိုက်ရ၏။ စိတ်ဝိညာဉ်သဏ္ဍာန်က သူ့အား သေချာစိုက်ကြည့်နေပြီး စိတ်ရှုပ်ထွေးသည့် အမူအရာမျိုး ပေါ်ထွက်လာလေသည်။ ဝမ်ဝေ့က ထိုအရာကြောင့် အံ့အားသင့်ခြင်း မရှိပေ။ အသားဂိတ်ပေါက်ကို ဖွင့်လှစ်ဖို့ ပထမဦးဆုံးစမ်းသပ်ချက်က ပြစ်ချက်အာရုံခံရေး စမ်းသပ်ချက်ဟု ခေါ်ဆိုပေသည်။

သူ့ရှေ့တွင်ရှိနေသည့် စိတ်ဝိညာဉ်သဏ္ဍာန်က သူ့စိတ်ဆန္ဒ - ခန္ဓာပေါင်းစည်းမှု၏ အသေးအဖွဲပြစ်ချက်များကို ရှာဖွေပြီး စမ်းသပ်ချက်ခံယူသူအား ပြန်လည်ပြုပြင်ဖို့ ဖိအားပေးမည်ဖြစ်သည်။ ဝမ်ဝေ့က ပြစ်ချက်မဲ့ခန္ဓာကိုယ်ကို တည်ဆောက်ထားပြီးသားဖြစ်သည့်အတွက် သူ့ခန္ဓာကိုယ်က မငြှိမ်းသတ်နိုင်ဖွယ်စံပြတစ်ယောက်အဖြစ်ပင် တွေ့နိုင်သည့် ပြစ်ချက်မျိုး မရှိတော့ပေ။

သို့သော်လည်း သူ့တည်ရှိမှုပုံကြမ်းက သူ့အား သာမန်ပြစ်ချက်မဲ့ခန္ဓာထက် ကျော်လွန်အောင် ခွင့်ပြုပေးထား၏။

စိတ်ဝိညာဉ်သဏ္ဍာန်က သူသည် ဝမ်ဝေ့၏ ခန္ဓာကိုယ်မှ တစ်ခုမှ ရှာမတွေ့ရသည့်အကြောင်းအရင်းကို နားမလည်နိုင်ဖြစ်နေခြင်း ဖြစ်၏။ မိနစ်ပိုင်းခန့်ကြာမြင့်ပြီးသည့်နောက်တွင် စမ်းသပ်ချက် စိတ်ဝိညာဉ်သဏ္ဍာန်က သူ့အား ခေါင်းညိတ်ပြီးသည့်နောက်တွင် ပြန်လည်ပျောက်ကွယ်သွားလေ၏။

နောက်အဆင့်က ရပ်တန့်ခြင်းမရှိ စတင်လာသည်။ ရွှေရောင်မှော်စက်ဝန်းတစ်ခုက ဝမ်ဝေ့အထက် ပေါ်ထွက်လာပြီး သူ့ခေါင်းမှ ခြေဖျားအထိ ဖြည်းဖြည်းချင်း ဆင်းသက်လာသည်။ ထိုစက်ဝန်းက အာရုံခံသည့် ကိရိယာသဖွယ်ဖြစ်ကာ သူ့ခန္ဓာကိုယ်မှ ပြစ်ချက်များကို ရှာဖွေပြီး တိုက်ခိုက်ဖို့ ကြိုးစားနေလေသည်။ အကယ်၍ ဝမ်ဝေ့က အကန့်အသတ်မဖျက်ဆီးနိုင်စွမ်းကို မရရှိခဲ့ဘဲ ၁၂၆၇ စမ်းသပ်ချက်ဖြင့် ခွန်အားဂိတ်ပေါက်ကို ဖွင့်လှစ်ထားသည်ဆိုပါက ခန္ဓာကိုယ်တွင် အနည်းဆုံးပြစ်ချက် ၁၂ခု ရှိလာလိမ့်မည်။ ထိုစမ်းသပ်ချက်၌ သူသည် ထိုအရာများကို ကာကွယ်ပြီး သူ့ထိုက်တန်မှုကို ပြသရမည် ဖြစ်၏။

ဝမ်ဝေ့က ဂုဏ်ထူးဖြင့် စမ်းသပ်ချက်ကို အောင်မြင်သွားလေသည်။ ထို့ကြောင့် သူသည် နောက်ဆုံးအဆင့်ကို စတင်လိုက်၏။ အသားဂိတ်ပေါက်ကို ဖွင့်လှစ်သည့်ဖြစ်စဉ်က မရိုးရှင်းလှပေ။ ပထမဦးစွာ ဝမ်ဝေ့က အထောက်အကူအနေဖြင့် စုစည်းထားသည့် အဆီအနှစ်ရေစက်ကို ပါးစပ်ဖွင့်ပြီး သောက်သုံးလိုက်ရသည်။ ထို့နောက် သူသည် ခန္ဓာကိုယ်လေ့ကျင့်ရေးအောင်မြင်မှုများ၏ အနှစ်သာရများကို အမှတ်တစ်ခုအနေဖြင့် ဖွဲ့စည်းပြီး ဂိတ်ပေါက်ကို တိုက်ခိုက်ရသည်။

ထိုအဆီအနှစ် ရေစက်နှင့် အဆီအနှစ်မျှော်စင်တို့၏ စွမ်းအားများ ပေါင်းစည်းမှုက အတော်လေး အံ့အားသင့်ဖွယ်ဖြစ်ပြီး တံခါးတစ်လျှောက် အက်ကြောင်းများပေါ်ထွက်လာကာ အောင်မြင်သည့် အရိပ်အယောင်ကို ပြသလာလေ၏။ သို့သော်လည်း ကိစ္စများက မရိုးရှင်းလှပေ။ ဝမ်ဝေ့က ထိုတံခါးကို တိုက်ခိုက်ဖို့ နှစ်ချီကာ အချိန်ကုန်ဆုံးခဲ့ရ၏။ သို့သော်လည်း ထိုအရာက အပြည့်အဝပွင့်မလာသေးပေ။ ထို့ကြောင့် သူသည် စိတ်ဆန္ဒသဏ္ဍာန်ပြခြင်းကိုပါ ထည့်ပေါင်းလိုက်ရသည်။

ထို့နောက် တံခါးပေါ်ရှိ ဧရာမ အတုံးအတစ်များက ချက်ချင်းဆိုသလို ဖျက်ဆီးခံလိုက်ရ၏။ ဝမ်ဝေ့က မျှော်လင့်ချက်ကို မြင်လိုက်ရသည်။ သို့သော်လည်း ဤသည်က သိပ်မကြာမြင့်ဘဲ သူ့စိတ်ဝိညာဉ်သည် သိသိသာသာ အားနည်းလာကြောင်း သတိထားမိခဲ့၏။ ဆိုလိုသည်မှာ သူသည် ဤသို့နက်ရှိုင်းသည့်် အာရုံစူးစိုက်ဖွယ် အနေအထားဖြင့် ကြာကြာမနေနိုင်ကြောင်း ညွှန်ပြနေသည်။

ဒီတံခါးက ဖွင့်ဖို့ စိန်ခေါ်မှုတစ်ခု မဖြစ်သင့်ဘူး

ဝမ်ဝေ့က တွေးလိုက်ပြီး အစစ်အမှန်ပြစ်ချက်မဲ့ ခန္ဓာကို ရယူခြင်း၏ အကျိုးဆက်တချို့ကို သဘောပေါက်သွားလေ၏။ သို့သော်လည်း သူက  နောင်တမရပေ။ သူက စံပြစမ်းသပ်ချက်မတိုင်ခင် ဤတံခါးကို မဖွင့်သင့်ပေ။ သို့သော် သူက အစီအစဉ်များ ရှိနေခဲ့၏။ ထို့ကြောင့် သူ့ခန္ဓာကိုယ်လေ့ကျင့်ရေးစမ်းသပ်ချက်က ပိုမိုအားကောင်းလေလေ အောင်မြင်နိုင်သည့် အခွင့်အရေးက ပိုမိုမြင့်မားလေလေ ဖြစ်၏။

သူက တံခါးပေါ်မှ အတားအဆီးများကို ဖယ်ရှားပြီးသည့်နောက်တွင် ဝမ်ဝေ့က စတင်ချွေးထွက်လာလေ၏။ သို့သော်လည်း သူက မြန်မြန်ဆန်ဆန်ဖြင့် သူ့ပင်ပန်းမှုများနှင့် အိပ်ချင်မှုများအား လျစ်လျူရှုလိုက်သည်။ သူက နောက်ဆုံးအဆုံးသတ်သို့ ရောက်ဖို့ရာ နီးကပ်နေပြီဖြစ်သည့်အတွက် တာဝန်ကိုသာ အာရုံစိုက်ထားလိုက်သည်။

ဂိတ်၏ နောက်ဆုံးသော အတားအဆီးက ကြေမွသွားပြီး ကြောက်မက်ဖွယ် စွမ်းအားတစ်ခုက ဝမ်ဝေ့၏ ခန္ဓာကိုယ်ထဲ တိုးဝင်လာလေ၏။ သူက သေချာသည့် ကန့်သတ်ချက်တချို့ ချိုးဖောက်သွားသလိုမျိုး ခံစားလိုက်ရပြီး သူ့ဘဝ၏ အနှစ်သာရက သိသိသာသာ တိုးတက်သွားလေသည်။ တည်ရှိမှုအဆင့်တွင် စိတ်ဆန္ဒမသေနိုင်စွမ်း ဂုဏ်သတ္တိက ပြီးပြည့်စုံသွားပြီး ရုပ်ပိုင်းဆိုင်ရာခွန်းအားကလည်း ပိုမိုရှုပ်ထွေးလာလေသည်။

ထိုဖြစ်စဉ်နှစ်ခု အဆုံးသတ်သွားသည်နှင့် ဗလာနတ္ထိစွမ်းအား၏ ဂုဏ်သတ္တိက ပြောင်းလဲသွားကာ တည်ရှိမှုထဲ ပိုမိုနက်ရှိုင်းစွာ မြှုပ်ဝင်သွားလေသည်။ ဤသည်က ဝမ်ဝေ့အတွက် သတင်းကောင်း ဖြစ်၏။ ဆိုလိုသည်မှာ သူ့ခန္ဓာကိုယ်က ထိုစွမ်းအားကို ဆက်လက်ထမ်းဆောင်စရာမလိုတော့ပေ။ ထိုအရာက နောက်ပိုင်းအတွက် ဖြစ်လေ၏။ အက်တမ်အဆင့်အနေအထား သို့မဟုတ် ဆဲလ်အနေအထားအထိ သူ့ခန္ဓာကိုယ်က မြင့်မားသည့် အသွင်အဖြစ် ပြောင်းလဲသွားလေသည်။ ဆဲလ်၊ တစ်သျှူး၊ သွေးစက်၊ အတွင်းအင်္ဂါ၊ အရိုးနှင့် ကြက်သားများအပါအဝင် သူ့ခန္ဓာကိုယ်အစိတ်အပိုင်းတိုင်းက နည်းနည်းစီ စွမ်းအားအရင်းအမြစ် ဖြစ်လာလေ၏။ သူ့မွေးညင်းပေါက်များကပင် တည်ရှိမှု၏ ပိုမိုမြင့်မားသည့် အနေအထားသို့ တက်လှမ်းသွားလေသည်။

ဒါက ဘာလဲ…

ဝမ်ဝေ့က တက်လှမ်းဂိတ်ပေါက်၊ ခွန်အားဂိတ်ပေါက်နှင့် အသားဂိတ်ပေါက်တို့ကြားမှ သဟဇာတဖြစ်မှုကို သတိပြုမိကာ တွေးလိုက်မိသည်။ ထိုအရာက သိမ်မွေ့လွန်းသည့်အတွက် ဝမ်ဝေ့က ခေတ္တမျှသာ သတိထားမိလိုက်သည်။ သူက လေ့လာကြည့်သည့်အခါ သူ့တည်ရှိမှုကို မြင်လိုက်ရ၏။

စတုတ္ထဂိတ်ပေါက်က ကြုံရာကျပန်းပေါ်ထွက်လာတာ မဟုတ်ပဲနဲ့ အရင်ဂိတ်(၃)ခုရဲ့ သဟဇာတဖြစ်မှုကနေ ထွက်ပေါ်လာတာပဲ။ အဲဒါကြောင့် မဟာတာအိုက ဖယ်ရှားပစ်ခဲ့ပြီးတော့ ခန္ဓာကိုယ်လေ့ကျင့်သူတွေရဲ့ ထူးကဲသာလွန်မှုလမ်းစဉ်ကို ဖြတ်တောက်ခဲ့တာ…

ဝမ်ဝေ့က သဘောပေါက်သွားလေ၏။ ထိုဂိတ်ပေါက်က ခန္ဓာကိုယ်၏ အကြွင်းမဲ့အလားအလာကို ကိုယ်စားပြုနေပြီး သူတို့ကို ပေါင်းစည်းခြင်းကသာ လေးခုမြောက်ကို ဖန်တီးနိုင်လိမ့်မည်။ ထိုအခါ ခန္ဓာကိုယ်က စည်းမျဉ်း၊ စွမ်းအားနှင့် ကန့်သတ်ချက်အားလုံးကို ကျော်လွန်သွားမည် ဖြစ်၏။

ဒါက သတင်းကောင်းပဲ

ဝမ်ဝေ့က ပြုံးလိုက်၏။ ဤသတင်းအချက်အလက်ဖြင့် သူသည် ရှေ့ဆက်လျှောက်ရမည့် လမ်းစဉ်က ရှင်းလင်းသွားလေသည်။ အသွင်ပြောင်းမှုက အချိန်တစ်ခုကြာမြင့်ဦးမည်ဖြစ်သော်လည်း အဆီအနှစ်မျှော်စင်၏ အကူအညီဖြင့် ဖြစ်စဉ်က သိသိသာသာ လျော့ကျသွားလေသည်။ နှစ် ၂၀၀ခန့် ကြာမြင့်ပြီးသည့်နောက်တွင် အရာအားလုံးက အဆုံးသတ်သွားလေ၏။

ဝမ်ဝေ့က ထိုင်နေရာမှ ထပြီး လက်သီးဆုပ်လိုက်ကာ ရှေ့ကို ပစ်ခွင်းလိုက်၏။

“အကြီးအကဲ မကောင်းဆိုးဝါးနတ်ဘုရားနယ်ပယ်၊ ပထမကောင်းကင်ဘုံ။ အဲဒါက ၉၁ ရာခိုင်နှုန်းနဲ့ တူတယ်”

ဤသည်က ဝမ်ဝေ့၏ စံနှုန်းအတွက် အနည်းငယ် နိမ့်ကျနေသေး၏။ အကယ်၍ သူ့တွင်အချိန်ရှိပါက သူ့အုတ်မြစ်ကို တတိယကောင်းကင်ဘုံအဆင့်ထိ မြှင့်တင်လိမ့်မည်။

ကံကောင်းစွာဖြင့် သူသည် ပြစ်ချက်မဲ့ခန္ဓာရှိထားသည့်အတွက် အကြီးအကဲမကောင်းဆိုးဝါးနတ်ဘုရားနယ်ပယ်တွင် ကျင့်ကြံခြင်းက သူ့ပြစ်ချက်များကို ရှင်းထုတ်နေဖို့ရာ မလိုအပ်တော့ပေ။ သူ လုပ်ဖို့လိုအပ်သည့်အရာက သူ့စိတ်စွမ်းအားနှင့် အင်အားကို တိုးမြှင့်ဖို့သာ ဖြစ်သည်။

ငါက မငြှိမ်းသတ်ဖွယ် စံပြတစ်ယောက် မဟုတ်သေးဘူး။ ငါက ဖြည်းဖြည်းချင်း ခေတ်ဟောင်းရဲ့ ကျင့်ကြံရေးကန့်သတ်ချက်ကို ချဉ်းကပ်လာပြီ

ဝမ်ဝေ့က ပြုံးကာ တွေးလိုက်၏။ အဆင့်ချိုးဖောက်မှုက သိသာမှုများစွာရှိလေသည်။ ဤသည်က သူ့ဇနီးနှင့် ကွာဟချက်ကြား ခြေတစ်လှမ်း နီးကပ်သွားလေပြီ။ ထို့အပြင် စံပြတစ်ယောက်ဖြစ်လာဖို့ရာ သူ့ကျင့်ကြံရေးခရီးလမ်းထဲ သိသာသည့် ခြေလှမ်းတစ်ခု ဖြစ်၏။

ဒီနေရာကနေ ရောက်ဖို့ အလှမ်းဝေးနေသေးတယ်ဆိုပေမဲ့ ငါတို့ရဲ့ ရှေ့မှာ လမ်းအရှည်ကြီးရှိနေသေးတယ်။

ဝမ်ဝေ့က သူ့ကိုယ်သူ အားပေးပြီးသည့်နောက်တွင် သူ့အရှိန်အဝါကို ချုပ်ထိန်းပြီး မျှော်စင်မှ ထွက်လာလိုက်၏။

ပထမဦးဆုံးအပြုအမူက ပြင်ပမှ လက်ရှိအခြေအနေကို စစ်ဆေးကြည့်ဖို့ ဖြစ်သည်။

ယခု သူက တတိယနေရာသို့ ရောက်ရှိနေပြီ ဖြစ်၏။

ကျိချန်းမင်လား။ အဲဒီမောက်မာတဲ့ကောင်ကလေ။ သူက နှလုံးသားဆန္ဒနန်းဆောင်က ဖြစ်လောက်တယ်

ကျိမျိုးနွယ် သို့မဟုတ် နန်းဆောင်က အဆုံးမဲ့တက်လှမ်းခြင်းကမ္ဘာမှ အခြေအနေများကို စိတ်ဝင်စားနေသည်မှာ အဓိပ္ပာယ်ရှိပေသည်။

ဒါပေမဲ့ သူတို့က ဘာလို့ ဒီလိုအသုံးမဝင်တဲ့ လူမျိုးကို လွှတ်လိုက်ရတာလဲ။

ကျိချန်းမင်က ဖတ်ရှုဖို့ရာ အင်မတန် လွယ်ကူသည့်သူဖြစ်၏။

ဒါမှမဟုတ် ဟန်ဆောင်နေတာလား။ ဒါမှမဟုတ်ဘူးဆိုရင် ကျိမျိုးနွယ်က သူ့ကိုယ်သူ အရမ်းအထင်ကြီးလွန်းတာလား

ဝမ်ဝေ့က ခေါင်းအသာယမ်းပြီးသည့်နောက်တွင် ထိုသူကို ဂရုမစိုက်တော့ပေ။ သူက စမ်းသပ်ချက်မျှော်စင်ကို ကြည့်ပြီး ဘယ်သူအသုံးပြုနေလဲ စစ်ဆေးကြည့်လိုက်၏။

ထင်ထားတဲ့အတိုင်းပဲ

သူက ရေရွတ်လိုက်သည်။ အကယ်၍ ထင်မှတ်မထားသည့်အရာတစ်ခု ဖြစ်မလာခဲ့ပါက ထျန်းရွှမ်သည် ဤစစ်ဆေးမှု၏ ပထမဦးဆုံးစံပြ ဖြစ်လာလိမ့်မည်။ ဝမ်ဝေ့က အလျင်လိုနေခြင်း မရှိပေ။ သူ့တွင် အခွင့်အရေးများစွာရှိနေသည့်အတွက် သူ့နေထိုင်ရာသို့ ပျံသန်းသွားလိုက်၏။

“ခေါင်းဆောင်” အနီရောင်မျက်နှာဖုံးက အခန်းထောင့်မှ ဖြည်းဖြည်းချင်း ပေါ်ထွက်လာလေသည်။

“မင်း ဘာတွေတွေ့ခဲ့လဲ”

“ခေါင်းဆောင် ထင်ထားတဲ့အတိုင်း အများစုက သူလျှိုတွေပါ”

အနီရောင်မျက်နှာဖုံးက တုံ့ပြန်ပြီးသည့်နောက်တွင် သူ့အား သူလျှိုစာရင်းကို ပေးအပ်လိုက်သည်။

“ဘယ်သူကမှ ထျန်းရွှမ်ရဲ့ ကမ္ဘာကို မဆက်သွယ်ကြဘဲနဲ့ တခြားကတော့ ကျိမျိုးနွယ်ကို ဆက်သွယ်ထားကြတာပဲ” ဝမ်ဝေ့က အရေးကြီးဆုံးကဏ္ဍကို သဘောပေါက်သတိပြုမိသွားသည်။

“ဟမ် မင်း သတင်းအချက်အလက် ရယူဖို့ ကျရှုံးတဲ့ အဖွဲ့လည်းရှိနေသေးတာပဲ”

“ဟုတ်ပါ တယ်”

“မင်း သတိလက်လွတ်ဖြစ်သွားတာလား”

“မဟုတ်ပါဘူး။ ကျွန်မက ခေါင်းဆောင်ရဲ့ စွမ်းအားအပြည့်ကို သုံးပြီးတော့ ကြိုးစားခဲ့ပေမဲ့ ကျွန်မကို ရှာတွေ့ခဲ့ကြတယ်”

မျက်နှာဖုံးက အမှန်အတိုင်း တင်ပြလိုက်သည်။

“ကြည့်ရတာ ဒီစစ်ဆေးမှုထဲမှာ လျှို့ဝှက်ချက်တွေနဲ့ ယန္တရားတွေအများကြီး ရှိနေတဲ့ပုံပဲ” ဝမ်ဝေ့က မှတ်ချက်ပေးလိုက်သည်။

“ငါတို့ရဲ့ ကမ္ဘာက သူတို့ရဲ့ ပင်မပစ်မှတ် မဟုတ်တဲ့ပုံပဲ”

“အဲ့လိုဖြစ်တဲ့ပုံပါပဲ။ ခေါင်းဆောင် ဘာလုပ်ရမလဲ။ ဒါထပ်ပြီးတော့ လုပ်ရမလား” အနီရောင်မျက်နှာဖုံးက မေးလိုက်သည်။

“မလိုတော့ဘူး” ဝမ်ဝေ့က အဝေးတစ်နေရာကို ကြည့်ရင်း သူ့မျက်ဝန်းအထက် အံ့အားသင့်အရိပ်အယောင် ဖြတ်ပြေးသွားလေသည်။

“တကယ်ကို ထင်မှတ်မထားစရာပဲ”