ကောင်းကင်လျှို့ဝှက်ချက်ဓား

ချီမင်ရဲ့အကြည့်က ဖန်ကျန်မသေမျိုးတောင်ရဲ့ ထိပ်ပေါ်ကို ရောက်သွားတယ်။ စိတ်ထဲကနေ ပြောလိုက်တာက၊ “ဆရာ ဒီနေ့တော့ ကျွန်တော်ဆရာ့ရဲ့ အံ့ဖွယ်စွမ်းအားကို သုံးပြီး ကောင်းကင်လျှို့ဝှက်ချက်မျိုးနွယ်ရဲ့ စစ်မှန်တဲ့စွမ်းအားကို ပြရတော့မှာပဲ။”

“ဒီလိုနည်းနဲ့ဆိုရင်... တဖြည်းဖြည်းနဲ့ ကျဆင်းလာတဲ့ ကောင်းကင်လျှို့ဝှက်ချက်မျိုးနွယ်ရဲ့ ဂုဏ်သတင်းကို ပြန်ဆယ်တာလို့လည်းယူဆလို့ရတယ်။”

“အ‌သေးစား အံ့ဖွယ်စွမ်းအား။”

စိတ်ကူးလိုက်တာနဲ့ ချီမင်က သူ့ရဲ့ဓမ္မစွမ်းအားတွေကို လှည့်ပတ်လိုက်တယ်။ ဘယ်လက်နဲ့ လက်ချိတ်စည်းတစ်ခုဖွဲ့ပြီး အပေါ်ကို ဝှေ့ယမ်းလိုက်တယ်။ တစ်ခဏအတွင်းမှာပဲ သူက ရွတ်ဆိုလိုက်တယ်၊ “ပါ့ကွားယင်ယန် အံ့ဖွယ်စွမ်းအား၊ လျှို့ဝှက်နက်နဲတံခါး နိမိတ်ဖတ် အံ့ဖွယ်စွမ်းအား၊ ဓာတ်ငါးပါးစက်ဝန်း အံ့ဖွယ်စွမ်းအား!”

အသေးစား အံ့ဖွယ်စွမ်းအား သုံးမျိုးလုံးကို သူ ထုတ်သုံးလိုက်တယ်။

ပထမဆုံးက ပါ့ကွားယင်ယန် အံ့ဖွယ်စွမ်းအား။

ဒီအံ့ဖွယ်စွမ်းအားကို သုံးလိုက်တာနဲ့ ဓမ္မစွမ်းအားတွေက မြင့်တက်လာပြီး ချိတ်စည်းက အလင်းတန်းတစ်ခုဖြစ်သွားတယ်။ သူ့ရှေ့က လေထုထဲမှာ ပါ့ကွားနဲ့ ထိုက်ချီပုံစံတွေနဲ့ ဖွဲ့စည်းထားတဲ့ ကြီးမားတဲ့ အစီအရင်ကြီးတစ်ခု ဖြစ်ပေါ်လာတယ်။

အလယ်ဗဟိုမှာ ယင်ယန်ငါးနှစ်ကောင်ပုံ ရှိပြီး သူ့ပတ်လည်မှာ ပါ့ကွားက ဝန်းရံထားတယ်။

ဒါက အစီအရင်တစ်ခုအဖြစ် ဖွဲ့စည်းသွားတယ်။

ဒီလိုနည်းနဲ့ ကမ္ဘာထဲက ပါ့ကွားယင်ယန်ရဲ့ စွမ်းအင်တွေကို စုစည်းနိုင်တယ်။

ပြီးတော့ လျှို့ဝှက်တံခါး နိမိတ်ဖတ် အံ့ဖွယ်စွမ်းအား။

အတူတူပဲ၊ ဒီအံ့ဖွယ်စွမ်းအားကို သုံးလိုက်တော့လည်း ဓမ္မစွမ်းအားတွေက မြင့်တက်လာပြီးချိတ်စည်းက အလင်းတန်းလို ဖြစ်သွားတယ်။ ပါ့ကွားယင်ယန်အစီအရင်ရဲ့ အပေါ်ဘက်မှာ လျှို့ဝှက်ဆန်းကြယ်တဲ့ အစီအရင်တစ်ခု ထပ်ပေါ်လာတယ်။

ပါ့ကွားယင်ယန်က တောင်တန်းတွေ၊ မြစ်ချောင်းတွေကို ကိုယ်စားပြုတယ်ဆိုရင်၊ လျှို့ဝှက်တံခါး နိမိတ်ဖတ်အစီအရင်ကတော့ နေ၊ လ နဲ့ ကြယ်တာရာတွေကို ကိုယ်စားပြုတယ်။

တစ်နည်းနည်းနဲ့ဆို ကောင်းကင်နဲ့မြေကြီးရဲ့ စွမ်းအင်တွေကို စုစည်းလိုက်တယ်။

နောက်ဆုံးတစ်ခုကတော့ ဓာတ်ငါးပါးစက်ဝန်း အံ့ဖွယ်စွမ်းအားဖြစ်တယ်။

ဒီအံ့ဖွယ်စွမ်းအားကို သုံးလိုက်တော့ ကောင်းကင်နဲ့မြေကြီးကြားက ဓာတ်ငါးပါးဖြစ်တဲ့ သတ္တု၊ သစ်သား၊ ရေ၊ မီး၊ မြေဓာတ်တွေနဲ့ ဆက်စပ်သွားတယ်။ အဲ့ဒါက ဓာတ်ငါးပါးစက်ဝန်းပုံအဖြစ် ပြောင်းလဲသွားပြီး လျှို့ဝှက်နက်နဲတံခါး နိမိတ်ဖတ်အစီအရင်ရဲ့အပေါ်မှာ ထပ်ပေါ်လာတယ်။

အစီအရင်သုံးခုလုံး ပေါ်လာပြီ။

ကြည့်ရတာ မျက်စိကျိန်းလောက်တယ်။

စွမ်းအင်အမျိုးမျိုးနဲ့ စွမ်းအားက မြင့်တက်လာတယ်။

“အပြောင်းအလဲနိမိတ်ဖတ်ကျမ်းရဲ့ တာအိုက လောကကြီးကို အောင်နိုင်နိုင်တယ်။”

ချီမင်က အပြောင်းအလဲနိမိတ်ဖတ်ကျမ်းရဲ့ စွမ်းအားကို လှည့်ပတ်ရင်း ကျမ်းကို တိုးတိုးလေး ရွတ်ဆိုနေတယ်၊ “ကောင်းကင်ရဲ့ လှုပ်ရှားမှုက စွမ်းအားနဲ့ ပြည့်နေတယ်။ ကောင်းကင် အထက်၊ ကောင်းကင် အောက်။ ကောင်းကင်က ကြီးမြတ်ပြီး၊ စတင်မှု၊ထိုးထွင်းသိမြင်မှု၊အကျိုးရှိမှုကို ကိုယ်စားပြုတယ်။ နဂါးက နက်ရှိုင်းတဲ့ နေရာမှာ ဖုန်းကွယ်နေတယ်။ တက်ကြွစွာ လုပ်ဆောင်ရမယ့် အချိန် မဟုတ်ဘူး။ မြေကြီးရဲ့ အခြေအနေကအလေးထားမှုကိုလက်ခံနိုင်တယ်။ မြေကြီး အထက်၊ မြေကြီး အောက်။ မြေကြီးက ကြီးမြတ်ပြီးစတင်မှု၊ထိုးထွင်းသိမြင်မှု၊အကျိုးရှိမှုကိုကိုယ်စားပြုတယ်။မြည်းတစ်ကောင်ရဲ့ ခိုင်မာမှု ရှိတာကို ကိုယ်စားပြုတယ်...”

“အပြောင်းအလဲနိမိတ်ဖတ်ကျမ်းက ကောင်းကင်လျှို့ဝှက်ချက်ကို ဖော်ထုတ်တယ်။”

“အစီအရင်သုံးခုပေါင်းပြီး ကောင်းကင်လျှို့ဝှက်ချက်အစီအရင်ကို အသက်သွင်း!”

“စတင်!”

ဘုန်း!

ချီမင်က ကျယ်လောင်စွာ အော်ဟစ်လိုက်တယ်။ ညာလက်က ဓားကိုကိုင်ပြီး အပေါ်ကို ညွှန်လိုက်တယ်။ ကောင်းကင်ပေါ်က အသေးစားအံ့ဖွယ်စွမ်းအားသုံးမျိုးကနေ ဖြစ်ပေါ်လာတဲ့ အစီအရင်ပုံစံသုံးခုက အလျင်အမြန် ပေါင်းစပ်သွားတယ်။

ဝှီ!!!!

မျက်လုံးကျိန်းလောက်အောင် တောက်ပတဲ့ အလင်းတန်းတစ်ခု ထွက်ပေါ်လာတယ်။

ဒါဟာ ကောင်းကင်လျှို့ဝှက်ချက်အစီအရင် ဖြစ်သွားတယ်။

“ဒါက ကောင်းကင်လျှို့ဝှက်ချက်ဘိုးဘေးရဲ့ ကောင်းကင်လျှို့ဝှက်ချက်အစီအရင်ပဲ!”

တာအိုဆရာခရမ်းရောင်ကောင်းကင်ရဲ့ မျက်လုံးတွေ ပြူးကျယ်သွားတယ်။ သူတော်တော်လေးကို အံ့ဩသွားပြီး သူ့လေသံက ပိုလို့တောင် တုန်လှုပ်နေတယ်၊ “ဒါ... ဒါ... ဘယ်လိုလုပ် ဖြစ်နိုင်မှာလဲ?! ဘယ်လိုလုပ် ဖြစ်နိုင်မှာလဲကွာ?!”

“သူ တကယ်ကြီး သုံးလိုက်တယ်!”

“ဟူး...”

“ကောင်းကင်လျှို့ဝှက်ချက်အစီအရင်ဆိုတာ ကောင်းကင်လျှို့ဝှက်ချက်ဘိုးဘေးရဲ့ ဂုဏ်ယူရတဲ့ အံ့ဖွယ်စွမ်းအားပဲလေ။ ချီမင်က ကောင်းကင်လျှို့ဝှက်ချက်ဘိုးဘေးရဲ့ ကိုယ်ပ်ိုင်တပည့်ဖြစ်တာ နှစ် ၃၀ တောင်မပြည့်သေးဘူး၊ အခု သူက ကောင်းကင်လျှို့ဝှက်ချက်အစီအရင်ကို တကယ်ကြီး ဖန်တီးနိုင်ခဲ့ပြီ။”

“မယုံနိုင်စရာပဲ!”

ဘိုးဘေးဝေဟီနဲ့ ဘိုးဘေးဝူယန်တို့လည်း အံ့ဩတကြီး ရေရွတ်လိုက်ကြတယ်။

“ကောင်းကင်နဲ့မြေကြီးရဲ့ မဟာတာအို၊ ကောင်းကင်လျှို့ဝှက်ချက်ရဲ့ ဆင့်ကဲပြောင်းလဲမှု။”

ချီမင်က သန့်စင်ခြင်းသုံးပါးအခြေတည်ဝိညာဉ်ရဲ့ စွမ်းအားကို ထပ်ပြီး လှုံ့ဆော်လိုက်တယ်။ အသေးစားအံ့ဖွယ်စွမ်းအားသုံးမျိုးက တကယ်တော့ အစွမ်းထက်ပေမဲ့ ချီမင်အတွက် ဝိညာဉ်ဖွဲ့တည်ခြင်းအဆင့်ကို အဆင့်ကျော်ပြီး ခုခံတိုက်ခိုက်နိုင်လောက်တဲ့ တိုက်ခိုက်ရေးအင်အားရဖို့တော့ မလုံလောက်သေးဘူး။

ချီမင်က သန့်စင်ခြင်းသုံးပါးတာအိုကျမ်းရဲ့ စွမ်းအားကိုပါ ပေါင်းစပ်ဖို့ လိုသေးတယ်။

“မဟာတာအိုရဲ့ လွတ်မြောက်သွားတဲ့ တစ်ခုတည်းသောအရာက အောင်မြင်မှုအတွက် နေရာချန်ထားပေးတယ်။”

ချီမင်က ဆက်ပြောတယ်၊ “ကောင်းကင်လျှို့ဝှက်ချက်ဓားက အသက်ဓာတ်ကို ခုတ်ပိုင်းတယ်။”

ချီမင်က ဟိန်းဟောက်သံရှည်ကြီးတစ်ခုပေးလိုက်တော့ မဟာတာအိုရဲ့ ကောင်းကင်နဲ့မြေကြီးက လည်ပတ်သွားတယ်။ သူက ကောင်းကင်နဲ့မြေကြီးနဲ့ တစ်သားတည်း ပေါင်းစပ်သွားတယ်။ မသိလိုက်မသိဘာသာနဲ့ သူက ကောင်းကင်နဲ့မြေကြီးရဲ့ စွမ်းအားတွေကို သူ့အတွက် အသုံးချနိုင်အောင် လှုံ့ဆော်လိုက်နိုင်တယ်။

ဒီအချိန်မှာ ကောင်းကင်လျှို့ဝှက်ချက်အစီအရင်ရဲ့ ပုံစံက အဆက်မပြတ်လည်ပတ်နေပြီး နောက်ဆုံးမှာတော့ မျက်စိကျိန်းလောက်တဲ့ အလင်းတန်းတစ်ခုအဖြစ် ပြောင်းသွားတယ်။ အဲ့ဒါက ချီမင်ရဲ့လက်ထဲက ကမ္ဘာဖျက်‌ဆီးဓားထဲကို အလင်းစီးကြောင်းတစ်ခုလို ပေါင်းစပ်ဝင်ရောက်သွားတယ်။

ပတ်ဝန်းကျင်က ကောင်းကင်နဲ့မြေကြီး မဟာတာအိုရဲ့ တာအိုစာလုံးတွေနဲ့ ကောင်းကင်နဲ့မြေကြီးရဲ့ စွမ်းအားတွေက ဒီဓားထဲကို လုံးလုံးလျားလျား ပေါင်းစပ်ဝင်ရောက်သွားတယ်။

“ခုတ်!”

ချီမင်က ခေါင်းမော့ပြီး ဟန်ယွမ်ကို တည့်တည့်ကြည့်လိုက်တယ်။ သူ့ညာလက်က အောက်ကိုကျသွားပြီး လက်ထဲက ကမ္ဘာဖျက်ဆီးဓားက ဟန်ယွမ်ဆီကို ခုတ်ပိုင်းလိုက်လိုက်တယ်။ ကောင်းကင်လျှို့ဝှက်ချက်ရဲ့ ဓားအလင်းက ပွင့်လန်းလာပြီး မြူခိုးတွေ ပျံ့နှံ့နေကာ၊ ရှုပ်ထွေးနေသလို ဖြစ်သွားတယ်။

တစ်ခဏချင်းမှာပဲ မီတာတစ်ထောင်လောက်ရှည်တဲ့ ဧရာမဓားအလင်းတန်းကြီးတစ်ခုအဖြစ် တိုက်ရိုက်ပြောင်းလဲသွားတယ်။

အရမ်းကို ခန့်ညားထည်ဝါတယ်။

“နဂါးကျား သတ်ဖြတ်ခြင်း!”

ဘုန်း!

ဟန်ယွမ်က ဟိန်းဟောက်ပြီး သူ့ရဲ့အစွမ်းအကုန်ကို ပေါက်ကွဲထုတ်လိုက်တယ်။ ခရမ်းရွှေနဂါးကျား ပုံစံရဲ့ စွမ်းအားတွေ ထုတ်လွှတ်လိုက်တယ်။ ကျားဟိန်းသံတွေ၊ နဂါးဟိန်းဟောက်သံတွေ ထွက်ပေါ်လာပြီး နဂါးနဲ့ကျားရဲ့ စွမ်းအားတွေက ပေါက်ကွဲထွက်ကာ တိုးဝင်လာတယ်။

နှစ်ဖက်လုံးက တည့်တည့်တိုးပြီး ရင်ဆိုင်တိုက်ခိုက်ကြတော့ သူတို့ရဲ့စွမ်းအားတွေက ထိပ်တိုက်တွေ့ဆုံ ပြီးပေါက်ကွဲသွားတယ်။ ကောင်းကင်လျှို့ဝှက်ချက်ဓားက ခရမ်းရွှေနဂါးကျား ဓမ္မရုပ်တုကို ခုတ်ပိုင်းလိုက်တော့ ကျားနဲ့နဂါးရဲ့ စွမ်းအားတွေက ဟိန်းဟောက်ပြီး မရေမတွက်နိုင်တဲ့ ပေါက်ကွဲမှုတွေ ဖြစ်ပေါ်စေတယ်။

ဒိန်းဒိန်းဒိန်း!!!

ပြင်းထန်စွာ တုန်ခါသွားတယ်။

ကွဲ! ကွဲ!

နောက်တစ်ခဏမှာတော့ ချီမင်ရဲ့ ကောင်းကင်လျှို့ဝှက်ချက်ဓားမှာ ကောင်းကင်နဲ့မြေကြီးရဲ့ စွမ်းအားတွေပါဝင်နေပြီး ကောင်းကင်လျှို့ဝှက်ချက်ရဲ့ ဆင့်ကဲပြောင်းလဲမှုကိုတောင် ဆောင်ကျဉ်းထားတယ်။ ဓားက ခုတ်ပိုင်းချလိုက်တဲ့အချိန်မှာ ခရမ်းရွှေနဂါးကျား ပုံစံရဲ့ အားနည်းချက်ကို ပစ်မှတ်ထားပြီးသား ဖြစ်နေပြီ။

နှစ်ဖက် ထိတိုက်မိပြီးနောက်မှာ ကောင်းကင်လျှို့ဝှက်ချက်ဓားရဲ့ စွမ်းအားအများစုက ခရမ်းရွှေနဂါးကျား ပုံစံရဲ့ အားနည်းချက်ကို ထိမှန်သွားပြီး အရမ်းကြီးမားတဲ့ အသာစီးကို ရယူလိုက်တယ်။

ခရမ်းရွှေနဂါးကျား ပုံစံက ပြိုကွဲစပြုလာတယ်။ အလယ်ဗဟိုမှာ ကြီးမားတဲ့အက်ကြောင်းတစ်ခုပေါ်လာပြီး ပျံ့နှံ့သွားတယ်။ အက်ကြောင်းတွေက တစ်ခုပြီးတစ်ခု ပိုပိုများလာတယ်။

“သေစမ်း!”

ဟန်ယွမ် တုန်လှုပ်သွားတယ်။

နောက်ဆုံးမှာတော့ ကျယ်လောင်တဲ့အသံကြီးတစ်ခု ထွက်ပေါ်လာတယ်။

ခရမ်းရွှေနဂါးကျား ပုံစံက ပေါက်ကွဲသွားပြီး ကြီးမားလှတဲ့ ဓမ္မရုပ်တုက အရည်ပျော်ကျသွားကာ ကောင်းကင်တစ်ခုလုံးကို ပြည့်နှက်သွားတဲ့ အလင်းစက်လေးတွေအဖြစ် ပြောင်းလဲသွားတယ်။ ပေါက်ကွဲမှုရဲ့ အရှိန်က ဟန်ယွမ်ရဲ့ကိုယ်ပေါ်ကို ထိမှန်သွားတယ်။

“အားးး!!!”

ဝေါ့!!!

ဟန်ယွမ်က အော်ဟစ်ရင်း သွေးတွေအန်ထုတ်လိုက်တယ်။ သူ့ခန္ဓာကိုယ်က လေးထောင့်ကွင်းပြင်ပေါ်ကနေ လွင့်ထွက်သွားပြီး မြေပြင်ပေါ်မှာ ကျသွားတယ်။ သူ့မျက်နှာက ဖြူဖျော့နေပြီး ဒဏ်ရာတွေကလည်း မနည်းဘူး။

ချီမင်က ဓားကို ဖြည်းဖြည်းချင်း ဓားအိမ်ထဲပြန်ထည့်လိုက်တယ်။ အစီအရင်က ပျောက်ကွယ်သွားပြီး ကောင်းကင်ဘုံရဲ့ စွမ်းအားတွေလည်း ကွယ်ပျောက်သွားတယ်။ ပတ်ဝန်းကျင်က ထူးခြားဆန်းကြယ်မှုတွေနဲ့ လှုပ်ခတ်မှုတွေက တဖြည်းဖြည်း ငြိမ်သက်သွားတယ်။ ကမ္ဘာဖျက်ဆီးဓားကိုလည်း သူ့ရဲ့ ဒန်တျန်းထဲကို ပြန်သိမ်းလိုက်တယ်။

“ခင်ဗျား ရှုံးပြီ။”

ချီမင်ရဲ့အကြည့်က တည်ငြိမ်နေပြီး ကွင်းပြင်အောက်ကို ရောက်သွားတဲ့ ဟန်ယွမ်ကို အေးစက်စက်ကြည့်လိုက်တယ်။

ချီမင်ရဲ့ ခုနက တိုက်ကွက်က အေးအေးဆေးဆေးနဲ့ သုံးသွားတာဖြစ်တယ်။

“မင်း...”

ဟန်ယွမ်က ချီမင်ကို တင်းမာတဲ့အမူအရာနဲ့ ကြည့်လိုက်တယ်။ သူက ပါးစပ်ဟပြီး တစ်ခုခုပြောချင်ပေမဲ့ စကားလုံးတွေ ထွက်မလာဘူး။ နောက်ဆုံးမှာတော့ ပါးစပ်ထောင့်က သွေးတွေကို သုတ်ပြီး ခေါင်းငုံ့ကာ ပြောလိုက်တယ်၊ “ငါ... ငါရှုံးသွားပြီ...”

အဲ့ဒီအချိန်မှာ လူတိုင်းက တိတ်ဆိတ်သွားကြတယ်။

အပ်ကျသံတောင် ကြားရလောက်အောင်တယ်။

ရှိနေတဲ့လူအားလုံးရဲ့အကြည့်တွေက ချီမင်ဆီကို ရောက်နေပြီး သူတို့အားလုံးက အကြီးအကျယ်ကို တုန်လှုပ်နေကြတယ်။ ဒီရလဒ်က လူအများစုရဲ့မျှော်လင့်ချက်တွေကို လုံးလုံးလျားလျား ကျော်လွန်သွားတယ်။

ဟန်ယွမ်က တကယ်ကို အပြတ်အသတ် ရှုံးသွားတယ်။

“ဒါ... ဒါ...”

“စီနီယာအစ်ကိုဟန်ယွမ် တကယ်ရှုံးသွားပြီ။ အမွေခံတပည့်ချီ... နောက်တစ်ခါနိုင်ပြန်ပြီ...”

“အရင်တစ်ခေါက်က စီနီယာအစ်ကို ကုန်းယန်။ ဒီတစ်ခေါက်က စီနီယာအစ်ကိုဟန်ယွမ်။ ဒါပေမဲ့ စီနီယာအစ်ကိုဟန်ယွမ်ရဲ့အင်အားက စီနီယာအစ်ကိုကုန်းယန်ထက် အများကြီးသာတယ်၊ ဒါပေမဲ့ သူလည်း ချီမင်ကို ရှုံးသွားတာပဲ။”

“စီနီယာအစ်ကိုဟန်ယွမ်က နှစ်တစ်ရာလောက် တံခါးပိတ်ကျင့်ကြံပြီး ပြန်ထွက်လာတာ၊ တိုက်ပွဲ ဆယ့်နှစ်ပွဲဆက်တိုက် တိုက်ခဲ့တယ်။ ပွဲတိုင်းနိုင်ပြီး လူတိုင်းကို အနိုင်ယူခဲ့တာ။ သူ့ရဲ့အရှိန်အဝါက အထွတ်အထိပ်ကို ရောက်နေပြီ၊ ဒါပေမဲ့ ဒီလိုအခြေအနေမှာတောင် စီနီယာအစ်ကိုဟန်ယွမ် ရှုံးသွားတယ်။ အပြတ်အသတ်ကို ရှုံးသွားတာ...”

“အမွေခံတပည့်ချီက အရမ်းသန်မာတယ်၊ သူက အရမ်းကို သန်မာလွန်းတယ်!”

“ကောင်းကင်လျှို့ဝှက်ချက်ဘိုးဘေးရဲ့ ကိုယ်ပိုင်တပည့်ဆိုတဲ့အတိုင်းပဲ!”

“တုန်လှုပ်စရာပဲ!”

“အရမ်းကို တုန်လှုပ်စရာကောင်းတယ်!”

“…”

ပတ်ဝန်းကျင်မှာ ရှိနေတဲ့ ကောင်းကင်ဘုံဉာဏ်အလင်းအင်မော်တယ်တောင်က အမွေခံတပည့်အားလုံးက အကြိမ်ကြိမ် အံ့သြသွားတဲ့သံတွေ ပြုကြတယ်။ သူတို့ မအံ့ဩဘဲ မနေနိုင်ကြဘူး၊ သူတို့ရဲ့အကြည့်တွေက ချီမင်ကို ကြည့်ရင်းလေးစားမှုတွေနဲ့ ပြည့်နှက်နေတယ်။

အပေါ်ဘက်မှာတော့ မဟာအကြီးအကဲသုံးယောက်က တိုက်ပွဲရဲ့ရလဒ်ကို ကြည့်ပြီး တိတ်ဆိတ်နေကြတယ်။ သူတို့လည်း ဝိညာဉ်ဖွဲ့တည်ခြင်းနှောင်းပိုင်း အဆင့်ဟန်ယွမ်က အခြေတည်ဝိညာဉ်နှောင်းပိုင်းအဆင့် ချီမင်ကို ရှုံးသွားလိမ့်မယ်လို့ ထင်မထားခဲ့ကြဘူး။

ဒီရလဒ်က တကယ်ကို လူတော်တော်များများရဲ့ မျှော်လင့်ချက်တွေကို ကျော်လွန်သွားတယ်။

နှစ်ယောက်ကြားက ကျင့်ကြံခြင်းအဆင့် ကွာခြားချက်က တကယ်ကို ကြီးမားတယ်။

ကောင်းကင်ဘုံဉာဏ်အလင်းဂိုဏ်းရဲ့ နှစ်တစ်ရာသမိုင်းမှာ...

ပါရမီရှင်တွေ အများကြီးပေါ်ထွက်ခဲ့ပေမဲ့ ဒီလိုမျိုး တစ်ခါမှ မဖြစ်ဖူးဘူး။ ဒီလောက်ကြီးမားတဲ့ ကျင့်ကြံခြင်းအဆင့်ကွာခြားချက်ကို ကျော်လွန်ပြီး ပြိုင်ဘက်ကို အနိုင်ယူနိုင်တာမျိုးပင်။

ဒါက အံ့ဖွယ်တစ်ပါးလိုပဲ။

ဒါပေမဲ့...

ဒါက အမှန်တရားပဲ။

သူတို့မျက်စိရှေ့မှာ တကယ်ဖြစ်ပျက်သွားခဲ့တယ်။

ဒါက လူတိုင်းကို တုန်လှုပ်သွားစေတယ်။

အရင်တုန်းက ချီမင်က ကုန်းယန်ကျစ်ကောကို အနိုင်ရခဲ့တာက တော်တော်လေး တုန်လှုပ်စရာကောင်းနေပြီ။ အခု သူက မြင့်မြတ်ပန်းပဲမျိုးနွယ်က ဟန်ယွမ်ကို အနိုင်ယူလိုက်တာက ပိုလို့တောင် တုန်လှုပ်စရာကောင်းတယ်။

ချီမင်ရဲ့နာမည်ဂုဏ်သတင်းက ကောင်းကင်ဘုံဉာဏ်အလင်းဂိုဏ်းမှာ အထွတ်အထိပ်ကို ရောက်သွားတယ်။

ဒါက လူတော်တော်များများကို လေးစားစိတ်တွေ ဖြစ်ပေါ်စေတယ်။

“ဒါ... ဒါ...”

တာအိုဆရာခရမ်းရောင်ကောင်းကင်က အသက်ပြင်းပြင်းတစ်ချက်ရှူလိုက်ပြီး သူ့ရဲ့တုန်လှုပ်မှုထဲကနေ ပြန်လည်နိုးထလာတယ်။ သူ့ရဲ့ အရမ်းကိုတုန်လှုပ်နေတဲ့စိတ်က တဖြည်းဖြည်း ငြိမ်သက်လာတယ်၊ “ဟန်ယွမ်က နှစ်တစ်ရာတိတိ တံခါးပိတ်ကျင့်ကြံခဲ့တာ။ သူက အတားအဆီးတစ်ခုနဲ့ကြုံနေလို့ တာအိုပေါင်းစည်းခြင်းအဆင့်ကို မတက်နိုင်ခဲ့ဘူး။ ဒါပေမဲ့ နှစ်တစ်ရာလောက် တံခါးပိတ်ကျင့်ကြံပြီးနောက်မှာ သူ့ရဲ့အင်အားကလည်း ဝိညာဉ်ဖွဲ့တည်ခြင်းအဆင့်ရဲ့ အကန့်အသတ်အထိ ရောက်တယ်။ ဒါကြောင့် သူက မျိုးနွယ်အသီးသီးက အမွေခံတပည့်တွေကို စိန်ခေါ်ပြီး ဒီနည်းနဲ့ အဆင့်ချိုးဖြတ်ချင်ခဲ့တာ။”

“သူ... သူက ချီမင်ကို ရှုံးသွားတယ်!”

“ငါလည်း အရမ်းအံ့ဩတယ်။”

ဘိုးဘေးဝေဟီက ဖြည်းဖြည်းချင်းပြောတယ်၊ “ချီမင်က အရမ်းသန်မာတယ်။ သူ့ရဲ့တိုက်ခိုက်ရေးစွမ်းအားက ကောင်းကင်ကို အန်တုနိုင်လောက်အောင်ပဲ။ ဒါက အခြေတည်ဝိညာဉ်အဆင့်ကျင့်ကြံသူတစ်ယောက်မှာ ရှိနိုင်တဲ့ တိုက်ခိုက်ရေးအစွမ်းမျိုး လုံးဝမဟုတ်ဘူး။”

“ဒါ့အပြင်...”

“ငါတို့က ကောင်းကင်လျှို့ဝှက်ချက်ဘိုးဘေးရဲ့ ကောင်းကင်လျှို့ဝှက်ချက်အစီအရင်ကိုပဲ အားကိုးတယ်ဆိုရင် ဝိညာဉ်ဖွဲ့တည်ခြင်းနှောင်းပိုင်းအဆင့် ဟန်ယွမ်ကို အနိုင်ယူဖို့ မလုံလောက်ဘူး။ ချီမင်က တခြားစွမ်းအားတွေကို သေချာပေါက် သုံးခဲ့တယ်။”

“ဟုတ်တယ်။”

ဘိုးဘေးဝူယန်က ခေါင်းညိတ်တယ်။ သူလည်း သိနိုင်တယ်၊ “ဒီစွမ်းအားက အရမ်းပြင်းထန်တယ်။ ချီမင်က အဲ့ဒီဓားချက်ကို ခုတ်လိုက်တုန်းက ကောင်းကင်နဲ့မြေကြီးရဲ့ စွမ်းအားတွေကိုတောင် လှုံ့ဆော်နိုင်ခဲ့တယ်၊ သူ့ခန္ဓာကိုယ်က ကောင်းကင်နဲ့မြေကြီးနဲ့ ပေါင်းစပ်သွားသလိုပဲ။ ဒါက တာအိုပေါင်းစည်းခြင်းအဆင့်ရောက်နေတဲ့သူတွေမှ ပိုင်ဆိုင်တဲ့ နည်းလမ်းမျိုး၊ ဒါပေမဲ့ ချီမင်က အခြေတည်ဝိညာဉ်အဆင့်နဲ့ လုပ်နိုင်ခဲ့တယ်။”

“ရိုးရိုးသားသားပြောရရင်...”

နောက်ဆုံးမှာတော့ ဘိုးဘေးဝူယန်က အကျဉ်းချုပ်လိုက်တယ်၊ “ဟန်ယွမ်က အကြောင်းမဲ့ ရှုံးသွားတာမဟုတ်ဘူး။ သူက မသန်မာလို့ ဒါမှမဟုတ် သူ့ရဲ့အရည်အချင်းက မထူးချွန်လို့ မဟုတ်ဘူး။”

“ချီမင်ရဲ့ အစွမ်းက အရမ်းကိုကြီးမားလွန်းတယ်။ သူ့ရဲ့အရည်အချင်းနဲ့ ပါရမီက အရမ်းကို မွန်းစတားဆန်လွန်းတယ်။ ဒါကို သာမန်အသိတရားနဲ့ မှန်းဆလို့မရတော့ဘူး။”

ချီမင်နဲ့ ဟန်ယွမ်တို့ရဲ့ တိုက်ပွဲမှာ သူက သူ့စွမ်းအားကိုအကုန်ကို မသုံးခဲ့ဘူး။ အများဆုံးမှ သူ့စွမ်းအားရဲ့ ဆယ်ပုံတစ်ပုံလောက်ပဲ သုံးခဲ့တယ်၊ ဒါပေမဲ့ သူက ဟန်ယွမ်ကို အနိုင်ယူပြီးသားပဲ။

ဟုတ်တယ်။

ဆယ်ပုံတစ်ပုံပဲ။

ဒါ့ထက်မပိုဘူး။

ချီမင်မှာ သူအသုံးမပြုရသေးတဲ့ အံ့ဖွယ်စွမ်းအားနည်းစနစ်တွေ အများကြီးရှိသေးတယ်။ သူသာ အကုန်သုံးလိုက်ရင် ချီမင်က တာအိုပေါင်းစည်းခြင်းအဆင့်ကိုတောင် ခုခံနိုင်လောက်တယ်။

ဟန်ယွမ်နဲ့ ဒီတိုက်ပွဲကနေတစ်ဆင့် ချီမင်က သူ့ရဲ့အင်အားကို ပိုပြီးရှင်းရှင်းလင်းလင်း နားလည်သွားတယ်။ တစ်နည်းပြောရရင် ချီမင်က အစပိုင်းက သူ့ရည်မှန်းချက်ကို အောင်မြင်သွားပြီ။

ဒီလောက်ဆို လုံလောက်ပြီ။

ချီမင်က ညာလက်ကို ဝှေ့ယမ်းပြီး လေးထောင့်ကွင်းပြင်ကို သိမ်းလိုက်တယ်။

“စီနီယာအစ်ကိုဟန်ယွမ်၊ ဂရုစိုက်ပါဦး။”

ပြီးတော့ ချီမင်က လက်နောက်ပစ်ပြီး အေးအေးဆေးဆေးပြောကာ လှည့်ထွက်ပြီး ကောင်းကင်လျှို့ဝှက်ချက်အိမ်တော်ဆီကို ပြန်လျှောက်သွားတယ်။ တံခါးက ပိတ်သွားပြီး ဖြူဖျော့နေတဲ့ ဟန်ယွမ်ကို ချန်ထားခဲ့တယ်။

ဟန်ယွမ်က မတ်တပ်ရပ်ပြီး ကောင်းကင်လျှို့ဝှက်ချက်စံအိမ်တော်ဘက်ကို အော်ပြောလိုက်တယ်၊ “ဒီတိုက်ပွဲမှာ ငါရှုံးခဲ့ပေမဲ့ တာအိုပေါင်းစည်းခြင်းအဆင့်ကို တက်လှမ်းဖို့ အခွင့်အရေးတစ်ခုကို ငါမြင်လိုက်တယ်။”

“နောက်တစ်ခါ...”

“ငါ့ကျင့်ကြံမှုအဆင့်က တာအိုပေါင်းစည်းခြင်းအဆင့်ကို သေချာပေါက်ရောက်နေပြီ။ အဲ့ဒီအခါကျ မင်းနဲ့ထပ်ချမယ်!”

ဒီတစ်ခါတော့ ချီမင်က ဟန်ယွမ်ကို ပြန်မဖြေဘူး။

ချီမင်ရဲ့ ဝိညာဉ်သားရဲ အမှောင်မီးလျှံက တာအိုပေါင်းစည်းခြင်းနှောင်းပိုင်းအဆင့်ကို ရောက်နေပြီ။ အရမ်းကို အစွမ်းထက်တယ်။ ဟန်ယွမ်လို စီနီယာအစ်ကိုမျိုး နောက်တစ်ယောက်ထပ်လာရင် ချီမင်က စိန်ခေါ်မှုကို လက်ခံမှာမဟုတ်တော့ဘူး။

မလိုအပ်တော့ဘူး။

အဲ့ဒီအချိန်ကျရင် ချီမင်က အမှောင်မီးလျှံကိုပဲ စိန်ခေါ်မှုလက်ခံခိုင်းပြီး သူကို လောကကြီးရဲ့ အန္တရာယ်ကို သိစေလိမ့်မယ်။