ဦးချိုမဲ့နဂါးနက်

ချီမင်က အမှောင်မီးလျှံရဲ့ အခြေအနေကို အမြဲတမ်း အာရုံစိုက်ထားတယ်။ သူ့အကြည့်က လုံးဝမရွေ့ဘူး။ ဒီအခြေအနေကို မြင်လိုက်ရတော့ သူ့နှလုံးသားက တင်းကြပ်သွားတယ်။

မကြာခင်မှာပဲ မျက်စိကျိန်းလောက်အောင် တောက်ပတဲ့ အဖြူရောင်အလင်းက တဖြည်းဖြည်း ပျောက်ကွယ်သွားတယ်။ တုန်ခါနေတဲ့ ဝိညာဉ်ချီတွေက ငြိမ်သက်သွားပြီး နောက်ဆက်တွဲတုန်ခါမှုတွေလည်း ငြိမ်ကျသွားတယ်။

လျှပ်စီးအတိဒုက္ခတိမ်တိုက်ကလည်း တဖြည်းဖြည်း ပျောက်ကွယ်သွားပြီး ကောင်းကင်နဲ့မြေကြီးရဲ့စွမ်းအားက ဖြည်းဖြည်းချင်း ငြိမ်သက်သွားတယ်။

အတိဒုက္ခတိမ်တိုက်တွေအောက်မှာ လျှပ်စီးတွေ လင်းလက်နေပြီး လျှပ်စစ်ဓာတ်တွေ တဖျပ်ဖျပ်ဖြစ်နေတယ်။

အမှောင်မီးလျှံရဲ့ အခြေအနေက လူတိုင်းရဲ့မျက်စိထဲမှာ ထင်ဟပ်နေတယ်။ သူ့ရဲ့တစ်ကိုယ်လုံးက မီးသွေးခဲဖြစ်သွားပုံရတယ်။ အမည်းရောင်မီးခိုးငွေ့တွေ ထွက်ပေါ်နေပြီး သူ့ကိုယ်ပေါ်မှာ လျှပ်စီးတွေ တဖျပ်ဖျပ်လင်းနေတယ်။

သူ့ကလုံးဝ အသက်ဓာတ် ကုန်ဆုံးသွားသလိုပဲ။

“အောင်... အောင်မြင်သွားပြီလား။”

“မသေချာဘူး။”

“အဲ့ဒါ…”

“အလောင်းလား။ ကျရှုံးသွားတာ ဖြစ်နိုင်မလား။”

“နှမြောစရာပဲ…”

ကောင်းကင်ဘုံဉာဏ်အလင်းအင်မော်တယ်တောင်ပေါ်က လူတိုင်း ဆွေးနွေးနေကြတယ်။

“ကျရှုံးသွားတာလား။” ချီမင်က မျက်မှောင်ကြုတ်လိုက်ပေမဲ့ ခေါင်းခါလိုက်တယ်။

အမှောင်မီးလျှံ မသေဘူး။

ဘာလို့လဲဆိုတော့ ဝိညာဉ်သားရဲတွေကြားက အားနည်းတဲ့ ဆက်သွယ်မှုကနေတစ်ဆင့် သူက အမှောင်မီးလျှံရဲ့ ခန္ဓာကိုယ်ထဲကအသက်ရှင်သန်မှုကို ခံစားမိနေတယ်။ ဒါက အရမ်းအားနည်းနေပေမဲ့ တည်ရှိနေပြီး အရမ်းခေါင်းမာတယ်။ ငြိမ်းသတ်လို့မရဘူး။

“သူ အောင်မြင်သွားပြီ။”

ချီမင်ရဲ့ စိတ်က ပေါ့ပါးသွားပြီး သူ့ရဲ့နှုတ်ခမ်းထောင့်တွေက အနည်းငယ် ကွေးတက်သွားတယ်။

ခရက်! ခရက်!

အမှောင်မီးလျှံရဲ့ ခန္ဓာကိုယ်ပေါ်မှာ အက်ကွဲကြောင်းတွေ တဖြည်းဖြည်း ပေါ်လာတယ်။ အက်ကွဲကြောင်းတွေ ပေါ်လာတဲ့အခါ အရမ်းကြောက်မက်ဖွယ် မျိုချစွမ်းအားတစ်ခု ပျံ့နှံ့ထွက်လာပြီး ပတ်ဝန်းကျင်ကို သက်ရောက်လာတယ်။

များပြားတဲ့ ဝိညာဉ်ချီတွေက လောင်းချလိုက်သလိုအမှောင်မီးလျှံရဲ့ ခန္ဓာကိုယ်ထဲကို ဝင်သွားတယ်။

အက်ကွဲကြောင်းတွေ များလာတာနဲ့အမျှသူရဲ့ဝါးမြိုစွမ်းအားက ပိုပြီး အားကောင်းလာတယ်။

များပြားတဲ့ ဝိညာဉ်ချီတွေက အမှောင်မီးလျှံရဲ့ ခန္ဓာကိုယ်ထဲကို တိုးဝင်သွားပြီး သူက တဖြည်းဖြည်း သန့်စင်လိုက်ကာ သူ့ရဲ့စွမ်းအားအဖြစ် ပြောင်းလဲလိုက်တယ်။ သူ့ရဲ့အသက်ဓာတ်ကလည်း ပိုပြီး အားကောင်းလာတယ်။

“ဒါ… ဒါ…”

“အောင်မြင်တယ်၊ ဒီရေလွှမ်းနဂါး အောင်မြင်သွားပြီ…”

“ဟူး…”

“သူ နဂါးပြောင်းလဲခြင်းအတိဒုက္ခကို ကျော်ဖြတ်သွားပြီ။ တကယ်ပဲ ကျော်ဖြတ်သွားတာ။”

“ဘုရားရေ။”

“အမွေခံတပည့် ချီ မွေးမြူထားတဲ့ ဝိညာဉ်သားရဲပီသပါပေတယ်။ တကယ်ပဲ အရမ်းသန်မာတာပဲ။ သူက နဂါးပြောင်းလဲခြင်းအတိဒုက္ခကို တကယ်ပဲ ကျော်ဖြတ်ပြီး အသက်ရှင်သွားတယ်။”

“ဒါက အရမ်းကို တုန်လှုပ်စရာကောင်းတယ်။”

“ရေလွှမ်းနဂါးတစ်ကောင် နဂါးပြောင်းလဲခြင်းအတိဒုက္ခကို ကျော်ဖြတ်တာကိုငါ ပထမဆုံးအကြိမ် မြင်ဖူးတာပဲ။ တကယ်ပဲ ကိုယ့်မျက်စိနဲ့ကိုယ် ပထမဆုံးအကြိမ် မြင်ဖူးတာ။ အမွေအနှစ်ခန်းမရဲ့ ကျောက်စိမ်းစလစ်ထဲမှာ မှတ်တမ်းတင်ထားတဲ့ နဂါးပြောင်းလဲခြင်းမှတ်တမ်းကိုပဲငါမြင်ခဲ့ဖူးတာ။”

“ဒီနေ့တော့ တကယ်ပဲ မြင်လိုက်ရပြီ။”

လူတိုင်း တုန်လှုပ်သွားကြတယ်။

ဝေါင်း!

နောက်တစ်ခဏမှာ အမှောင်မီးလျှံက ပြန်လည်အသက်ဝင်လာပြီး မီးလောင်ကျွမ်းနေတဲ့ အရေပြားတွေအားလုံး ကွာကျသွားတယ်။ သူ့ရဲ့အရေပြားတစ်ဝက်လောက် လန်ကျသွားတယ်။ သူ့ရဲ့စစ်မှန်တဲ့ ခန္ဓာကိုယ်က ကောင်းကင်ကို ပျံတက်သွားပြီး နဂါးအရှိန်အဝါကို ထုတ်လွှတ်လိုက်တယ်။

ကြီးမားတဲ့ အမည်းရောင်နဂါးမီးတောက်တွေက ပတ်ဝန်းကျင်ကို ဖုံးလွှမ်းသွားတယ်။

“အရမ်းကောင်းတယ်။”

ချီမင်ရဲ့ မျက်နှာမှာ ပျော်ရွှင်မှုတွေ ပြည့်နှက်နေတယ်။

ဒီအချိန်မှာ တောင်ပိုင်းဒေသ နတ်ဆိုးနန်းတော်၊ နတ်ဆိုးအရှင်ခန်းမထဲမှာ။

ဆယ်ကျော်သက်အရွယ် ကောင်လေးတစ်ယောက် ရှိနေတယ်။ သူက နတ်ဆိုးနန်းတော်ရဲ့ အစေခံတွေနဲ့ မူလက ဆော့ကစားနေခဲ့ပေမဲ့အဲ့ဒီအချိန်မှာတော့ ရုတ်တရက် ရပ်တန့်သွားတယ်။

ပြီးတော့ သူ့ရဲ့မျက်ခုံးနှစ်ခုကြား အလယ်ဗဟိုမှာ ရွှေရောင်နဂါးပုံသဏ္ဍာန် အမှတ်အသားတစ်ခု ရှိနေတယ်။

ဒီအချိန်မှာ အလင်းဖျော့ဖျော့တစ်ခု ထုတ်လွှတ်လိုက်တယ်။ နဂါးပုံသဏ္ဍာန် အမှတ်အသားက ရွှေရောင်ယင်းလုံဓမ္မရုပ်တုနဲ့တူတယ်။ ဒီကောင်လေးရဲ့ အကြည့်က ကောင်းကင်ဘုံဉာဏ်အလင်းအင်မော်တယ်တောင် ရှိရာဘက်ကို စူးစိုက်ကြည့်နေတယ်။

“တကယ်ပဲ နဂါးအဖြစ် ပြောင်းလဲသွားပြီ။”

ဒီကောင်လေးရဲ့ အသံက ကလေးဆန်နေပေမဲ့ ကြီးမြတ်မှု တွေနဲ့ ပြည့်နှက်နေတယ်၊ “ဒါကတကယ့်ကို မမျှော်လင့်ထားတာပဲ။”

ပတ်ဝန်းကျင်မှာ အစေခံတွေက မမြင်နိုင်တဲ့ ဖိအားတစ်ခုကြောင့် မြေပေါ်မှာ ပိနေကြတယ်။ သူတို့က လူသားပုံစံကိုတောင် မထိန်းသိမ်းနိုင်တော့ဘဲ သူတို့ရဲ့ မူလပုံစံအတိုင်း ပြန်ဖြစ်သွားကြတယ်။ သူတို့အားလုံးက နတ်ဆိုးတွေဖြစ်တယ်။

“ငါတို့ မြန်မြန်လုပ်ရတော့မယ်ထင်တယ်။” ကောင်လေးက ပြောလိုက်တယ်။

ရှု! ရှု!

ဒီအချိန်မှာ နတ်ဆိုးနန်းတော်ရဲ့ နတ်ဆိုးအရှင်နဲ့ နတ်ဆိုးဘုရားအားလုံး ရောက်ရှိလာကြတယ်။

ကောင်လေးက သတိလစ်သွားတယ်။ ထူးခြားတဲ့ဖြစ်စဉ် ပျောက်ကွယ်သွားပြီး သူ့မျက်ခုံးနှစ်ခုကြားက ရွှေရောင်နဂါးအမှတ်အသားက ဘာမှမဖြစ်ခဲ့သလိုပဲပုံမှန်အတိုင်း ပြန်ဖြစ်သွားတယ်။

“ဒါ…”

နတ်ဆိုးနန်းတော်ရဲ့ နတ်ဆိုးသခင်က ခမ်းနားတဲ့ဝတ်ရုံကို ဝတ်ဆင်ထားပြီး မြူခိုးတွေနဲ့ ဝန်းရံနေတယ်။ သူ့ကို ရှင်းရှင်းလင်းလင်း မမြင်ရဘူး။ သူက သတိလစ်သွားတဲ့ ကောင်လေးကို ကြည့်ပြီး လေးနက်တဲ့အသံနဲ့ ပြောလိုက်တယ်၊ “သူက ဒီအချိန်မှာ တကယ်ပဲ နိုးထလာတယ်။ ကောင်းချီးလား၊ကျိန်စာလားဆိုတာမသိနိုင်ဘူး။”

အသက်ဆယ်နှစ်မပြည့်သေးတဲ့ ဒီကောင်လေးက နဂါးမိကျောင်းအရှင်က သူ့အသက်ကို ပေးဆပ်ပြီး ကောင်းကင်ဘုံဉာဏ်အလင်းဂိုဏ်းကနေ ခေါ်ထုတ်လာခဲ့တဲ့ နတ်ဆိုးနန်းတော် နဂါးသားတော်ဖြစ်တယ်။

ဒါ့အပြင်…

ချီမင်သာ ဒီနေရာမှာ ရှိနေခဲ့ရင်၊ ကောင်လေးရဲ့ မျက်ခုံးနှစ်ခုကြားက ရွှေရောင်နဂါးအမှတ်အသားကို မြင်ပြီး ရှေးခေတ်နတ်ဆိုးဧကရာဇ် ယင်းလုံ ချန်ထားခဲ့တဲ့ ပုံရိပ်ကို ပြန်အမှတ်ရမိရင် သူတို့နှစ်ယောက်ကြားမှာ ကြီးမားတဲ့ ဆက်နွယ်မှုတစ်ခု ရှိနေတယ်လို့ သေချာပေါက် ခံစားမိလိမ့်မယ်။

ဟုတ်တယ်၊ ချီမင်က အခုချိန်မှာတော့ မသိသေးဘူး။

ကောင်းကင်ဘုံဉာဏ်အလင်းအင်မော်တယ်တောင်။

အမှောင်မီးလျှံက နဂါးပြောင်းလဲခြင်းအတိဒုက္ခကို အောင်မြင်စွာ ကျော်ဖြတ်ပြီး ရေလွှမ်းနဂါးကနေ နဂါးအဖြစ် အောင်မြင်စွာ ဆင့်ကဲပြောင်းလဲသွားပြီ။ သူက ကြီးမားတဲ့ ပြောင်းလဲမှုနဲ့ ဆင့်ကဲပြောင်းလဲမှုကို ကြုံတွေ့ခဲ့ပြီးမှ ချီမင်ရဲ့အနားကို ပြန်ရောက်လာတယ်။

“သခင်။”

ရှု!

အမှောင်မီးလျှံက တစ်မီတာအရှည်ထိ ကျုံ့သွားပြီး ချီမင်ရဲ့ရှေ့မှာ ရပ်လိုက်တယ်။ သူက ပျော်ရွှင်စွာ ပြောလိုက်တယ်၊ “ကျွန်တော် အောင်မြင်သွားပြီ၊ ကျွန်တော် အောင်မြင်သွားပြီ…”

ချီမင်က ပြုံးလိုက်တယ်။ “ဂုဏ်ယူပါတယ်။”

ဒါက ရိုးရှင်းတယ်။

အမှောင်မီးလျှံရဲ့ ပုံပန်းသဏ္ဍာန်က အကြီးအကျယ် ပြောင်းလဲသွားပြီ။ သူက နဂါးအစစ်တစ်ကောင်ရဲ့ ပုံပန်းသဏ္ဍာန်အဖြစ် လုံးဝ ပြောင်းလဲသွားခဲ့ပေမဲ့ သူ့ရဲ့တစ်ကိုယ်လုံးက နဂါးနက်တစ်ကောင်လို အမည်းရောင် ဖြစ်နေတယ်။

သူ့မှာ မြင်းမျက်နှာ၊ နဂါးမုတ်ဆိတ်၊ မြွေကိုယ်လုံး၊ လင်းယုန်လက်သည်း၊ နဂါးအကြေးခွံနဲ့ ခြင်္သေ့အမြီးတို့ ရှိနေတယ်။

ဒဏ္ဍာရီတွေထဲက နဂါးအစစ်တစ်ကောင်ရဲ့ ပုံရိပ်အတိုင်း တကယ်ပဲ ဖြစ်နေတယ်။

တစ်ခုပဲ ရှိတယ်။

ဦးချိုတွေ မရှိဘူး။

တင်း!

“ဂုဏ်ယူပါတယ် လက်ခံသူ။ ဝိညာဉ်သားရဲ: အမှောင်မီးလျှံရေလွှမ်းနဂါးသည် နဂါးပြောင်းလဲခြင်းအတိဒုက္ခကို အောင်မြင်စွာ ကျော်ဖြတ်ပြီးပါပြီ။ သူကရေလွှမ်းနဂါးမှ နဂါးအဖြစ် ပြောင်းလဲပြီး ဘက်ပေါင်းစုံပြောင်းလဲမှုနှင့် ဆင့်ကဲပြောင်းလဲမှုကို ကြုံတွေ့ကာ ရှားပါးဝိညာဉ်သားရဲ ဦးချိုမဲ့နဂါးနက် ဖြစ်လာခဲ့ပါပြီ။”

အသိပေးချက်တစ်ခု ပေါ်လာတယ်။

“ဦးချိုမဲ့နဂါးနက်။”

ချီမင်က ပြုံးလိုက်တယ်။ “ဒီနာမည်က တော်တော်လေး လိုက်ဖက်တယ်။”

ရှားပါးဝိညာဉ်သားရဲ: ဦးချိုမဲ့နဂါးနက်။

ဖော်ပြချက်: မူလက နဂါးကျွန်းမှ ထုတ်လုပ်သော လက်ရွေးစင်ဝိညာဉ်သားရဲတစ်ကောင်မျှသာ ဖြစ်သည်။ နဂါးနက်မျိုးနွယ်၏ သွေးမျိုးဆက်ကို ပိုင်ဆိုင်သော်လည်း မပြည့်စုံသော နီရဲရေလွှမ်းနဂါးပုလဲကို စုပ်ယူခဲ့ပြီး အမှောင်မီးလျှံရေလွှမ်းနဂါးအဖြစ် ဆင့်ကဲပြောင်းလဲခဲ့ပါသည်။ ပြီးပြည့်စုံတဲ့ပုံစံသို့ ရောက်ရှိပြီးနောက် နဂါးပြောင်းလဲခြင်းအတိဒုက္ခကို ထပ်မံကျော်ဖြတ်ခဲ့ပြီးထူးခြားသောပြောင်းလဲမှုကို ရရှိခဲ့သည်။ ရှားပါးဝိညာဉ်သားရဲ၊ ဦးချိုမဲ့နဂါးနက်အဖြစ် အဆင့်တက်ခဲ့ပါသည်။ အမှောင်မီးလျှံအံ့ဖွယ်စွမ်းအားကိုဆုပ်ကိုင်နိုင်ခဲ့ပါသည်။ လမ်းလျှောက်နိုင်၊ ပျံသန်းနိုင်၊ပြီး ရေကို ထိန်းချုပ်နိုင်ပါသည်။ သေးငယ်နိုင်သလို စွမ်းအားကြီးနိုင်သည်။ မြစ်နဲ့ပင်လယ်ကို ပြောင်းပြန်လှန်နိုင်ပြီး၊ လေနဲ့မြူကို မျိုချနိုင်စွမ်း ဒါမှမဟုတ် တိမ်နဲ့မိုးကို ဆင့်ခေါ်နိုင်ပါသည်။ ပြီးပြည့်စုံဆုံး ကြီးထွားလာသောအခါ သူ၏ကျင့်ကြံမှုအဆင့်သည် တာအိုပေါင်းစည်းခြင်းနှောင်းပိုင်းအဆင့်သို့ ရောက်ရှိနိုင်ပါသည်။

“တာအိုပေါင်းစည်းခြင်းနှောင်းပိုင်းအဆင့်။”

ချီမင်ရဲ့ မျက်နှာပေါ်မှာ အပြုံးတစ်ခု ပေါ်လာတယ်၊ “ဒီဆင့်ကဲပြောင်းလဲမှုရဲ့ ရလဒ်က နည်းနည်း မမျှော်လင့်ထားဘူး။ တကယ်ပဲ တာအိုပေါင်းစည်းခြင်းနှောင်းပိုင်းအဆင့်ထိ တိုက်ရိုက် ကြီးထွားနိုင်တယ်။”

“ယင်းလုံကိုးပါးပြောင်းလဲခြင်းရဲ့ လူသားအသွင်ပြောင်းလဲခြင်း။”

အမှောင်မီးလျှံရဲ့ ပုံရိပ်က လင်းလက်သွားပြီး အမည်းရောင်အလင်းတစ်ခု ထွက်ပေါ်လာတယ်။ သူက နဂါးနက်တစ်ကောင်ကနေ လူသားအဖြစ် ပြောင်းလဲပြီး မြေပြင်ပေါ်မှာ ရပ်လိုက်တယ်။

“အမှောင်မီးလျှံကသခင်ကို အရိုအသေပြုပါတယ်။”

အမှောင်မီးလျှံရဲ့ လူသားပုံစံက အသက် ၁၅ နှစ်အောက် ကောင်လေးတစ်ယောက် ဖြစ်တယ်။ သူ့မှာ အနက်ရောင်ဆံပင်ရှည်တွေ ရှိပြီး အနက်ရောင်နဂါးဝတ်ရုံကို ဝတ်ဆင်ထားတယ်။ သူ့မှာအနက်ရောင်ဆံပင်နဲ့ မျက်လုံးတွေ ရှိပြီး သူ့ရဲ့အသားအရေက ဖြူပြီးချောမွေ့နေတယ်။ သူက အရမ်းခန့်ညားပြီး ချစ်စရာကောင်းတယ်။

ချီမင်က လက်လှမ်းပြီး အမှောင်မီးလျှံရဲ့ ခေါင်းကို ညင်သာစွာ ပွတ်သပ်လိုက်တယ်၊ “မင်း လူသားအဖြစ် ပြောင်းလဲနိုင်ပြီပဲ။”

“ဟုတ်ကဲ့ပါ သခင်။” အမှောင်မီးလျှံက နာခံစွာ ပြန်ဖြေလိုက်တယ်။

“ဝိညာဉ်သားရဲနေရာထဲ သွားပြီး ကြီးထွားလိုက်တော့။” ချီမင်က ပြောလိုက်တယ်။

“ဟုတ်ကဲ့။” အမှောင်မီးလျှံက ခေါင်းညိတ်လိုက်တယ်။

နောက်ထပ် အဖြူရောင်အလင်းတစ်ခု လင်းလက်သွားတယ်။

အမှောင်မီးလျှံက လေထဲမှာ ပျောက်ကွယ်သွားတယ်။ ချီမင်က အမှောင်မီးလျှံကို စတုတ္ထမြောက် ဝိညာဉ်သားရဲ နေရာထဲကို ထည့်ပြီး ကြီးထွားစေလိုက်တယ်။

“အလယ်အလတ်အဆင့် ဝိညာဉ်ကျောက်တုံး ၁၀၀,၀၀၀ ထည့်သွင်းလိုက်မယ်။” ချီမင်က ပြောလိုက်တယ်။

တင်း!

“ထည့်သွင်းခြင်း အောင်မြင်ပါတယ်။”

“ရှားပါးဝိညာဉ်သားရဲ: အမှောင်မီးလျှံက အဆတစ်သန်း အရှိန်မြှင့်တင်မှုအောက်တွင် ကြီးထွားနေပါတယ်။ ရှားပါးဝိညာဉ်သားရဲ: အမှောင်မီးလျှံက စကြဝဠာအထွတ်အထိပ် နဂါးပြောင်းလဲခြင်းကျမ်းကို ကျင့်ကြံပြီး နဂါးပြောင်းလဲခြင်းလမ်းကို လျှောက်လှမ်းသောကြောင့် ကြီးထွားရန် အချိန်ပို လိုအပ်ပါတယ်။”

အသိပေးချက်တစ်ခု ပေါ်လာတယ်။

ချီမင်က အနည်းငယ် ခေါင်းညိတ်ပြီး သူ့ရှေ့က အသိပေးချက်ကို ပိတ်လိုက်တယ်၊ “အဆတစ်သန်း မြှင့်တင်မှုအောက်မှာ အချိန်ပို လိုအပ်ရင်တောင် ကိစ္စမရှိပါဘူး။”

သုံးရက်ကြာပြီးနောက်။

တင်း!

“ဝိညာဉ်သားရဲ: အမှောင်အရုဏ်ဦးနတ်ဆိုးလင်းနို့ကအဆတစ်သန်း မြှင့်တင်မှုအောက်တွင် သုံးရက်ကြာ ကြီးထွားခဲ့ပါတယ်။ သူက သွေးမျိုးဆက်သလင်းကျောက် အမှောင်နတ်ဆိုးလင်းနို့နှင့် လုံးဝ ပေါင်းစပ်ပြီးလက်ရွေးစင်ဝိညာဉ်သားရဲအမှောင်နတ်ဆိုးလင်းနို့အဖြစ်အဆင့်တက်သွားပါပြီ။ အများဆုံး ဗလာနယ်စွန့်ခွာခြင်းနှောင်းပိုင်းအဆင့်ထိ ကြီးထွားနိုင်ပါတယ်။”

…

တင်း!

“ဝိညာဉ်သားရဲ: နှင်းမြူပုံဆောင်ခဲအပျိုစင်ကအဆတစ်သန်းမြှင့်တင်မှုအောက်တွင် သုံးရက်ကြာ ကြီးထွားခဲ့ပါတယ်။ သူမက သွေးမျိုးဆက်သလင်းကျောက် ရေခဲနတ်ဆိုးမနှင့်အပြည့်အဝ ပေါင်းစပ်ပြီး လက်ရွေးစင်ဝိညာဉ်သားရဲ ရေခဲနတ်ဆိုးမအဖြစ် အဆင့်တက်သွားပါပြီ။ သူမကအများဆုံး ဗလာနယ်စွန့်ခွာခြင်းနှောင်းပိုင်းအဆင့်ထိ ရောက်ရှိနိုင်ပါတယ်။”

…

ဆက်တိုက် အသိပေးချက်နှစ်ခု ပေါ်လာတယ်။

“ကောင်းပြီ။” ချီမင်က ကျေနပ်စွာ ခေါင်းညိတ်လိုက်တယ်။

တစ်လကြာပြီးတော့ စုချင်းယင်က ချီမင်ကို လာတွေ့တယ်။ သူမက သူ့ကို အပြင်ထွက်ပြီး လေ့ကျင့်ဖို့ ဖိတ်ခေါ်ချင်နေတယ်။ သူမက ရှေးဟောင်းရတနာတွေ ရှာဖွေဖို့ စပ်ကြောင်းပျက်စီးနယ်မြေလို့ခေါ်တဲ့ နေရာတစ်ခုကို သွားချင်နေတယ်။

ချီမင်က ငြင်းပယ်လိုက်တယ်။

သူက အပြင်ထွက်ပြီး လေ့ကျင့်ချင်စိတ် မရှိဘူး။ ကောင်းကင်ဘုံဉာဏ်အလင်းဂိုဏ်းက သူ့ကို စောင့်ရှောက်နေတာကြောင့် သူက ကောင်းကင်လျှို့ဝှက်ချက်အိမ်တော်မှာပဲ အေးအေးချမ်းချမ်း ကျင့်ကြံနေလို့ရတယ်။

သုံးလကြာပြီးနောက်။

တင်း!

“တိုက်ပွဲမြင့်မြတ်ခန္ဓာက အဆတစ်သန်းမြှင့်တင်မှုအောက်တွင် သုံးလကြာ တိုးတက်ခဲ့ပါတယ်။ သူက အသေးစားအောင်မြင်မှုနှောင်းပိုင်းအဆင့်မှ သွေးလွှဲပြောင်းခြင်းနှောင်းပိုင်းအဆင့်သို့ တက်သွားပြီး လက်ရှိကျင့်ကြံခြင်းအဆင့်ရဲ့ ကန့်သတ်ချက်ဆီရောက်သွားပါပြီ။ တိုက်ပွဲမြင့်မြတ်ခန္ဓာကို ဆက်လက်အဆင့်မြှင့်တင်လိုပါက ကျေးဇူးပြုပြီးလက်ခံသူရဲ့ ကျင့်ကြံခြင်းအဆင့်ကို ဦးစွာ တိုးမြှင့်ပေးပါ။”

အသိပေးချက်တစ်ခု ပေါ်လာတယ်။

ချီမင်ရဲ့ တစ်ကိုယ်လုံး တုန်ခါသွားတယ်။ သူ့ခန္ဓာကိုယ်ထဲက သွေးတွေက ဆူပွက်လာတယ်။ သူ့တစ်ကိုယ်လုံးမှာ ရွှေရောင်အလင်းတွေ လင်းလက်နေတယ်။ သူ့ရဲ့တိုက်ခိုက်ရေးစိတ်ဆန္ဒက အစွန်းရောက် တိုက်ပွဲမြင့်မြတ်ခန္ဓာမှာသိပ်သည်းသွားပြီး နောက်ထပ်တိုးတက်လာပါတယ်။

ချီမင်ရဲ့ သွေးတွေက ပြောင်းလဲစပြုလာတယ်။ ဒါက တိုက်ခိုက်ရေးစိတ်ဆန္ဒနဲ့ တိုက်ခိုက်ရေးနတ်ဘုရားစွမ်းအားတို့ ပေါင်းစပ်သွားလို့ဖြစ်တယ်။ သူက ပြန်လည်မွေးဖွားလာပြီး မူလတောက်ပတဲ့အနီရောင်ကနေ ရွှေရောင်ဖျော့ဖျော့အဖြစ် တဖြည်းဖြည်း ပြောင်းလဲသွားတယ်။

နောက်ဆုံးမှာတော့ လုံးဝ စင်ကြယ်တဲ့ရွှေရောင်အဖြစ် ပြောင်းလဲသွားတယ်။

သွေးလွှဲပြောင်းခြင်း ပြီးမြောက်သွားပြီ။

တိုက်ပွဲမြင့်မြတ်ခန္ဓာက သွေးလွှဲပြောင်းခြင်းနှောင်းပိုင်းအ‌ဆင့်ထိ တိုးတက်သွားတယ်။

ဒီနည်းနဲ့ တိုက်ပွဲမြင့်မြတ်ခန္ဓာရဲ့ စွမ်းအားကို တကယ်ပဲ အသုံးပြုနိုင်တော့မယ်။

ဒီအဆင့်မှာ တိုက်ပွဲမြင့်မြတ်ခန္ဓာရဲ့ အားသာချက်ကိုလုံးဝ ထုတ်ဖော်ပြသနိုင်လိမ့်မယ်။

သူ့ရဲ့ရုပ်ခန္ဓာကပြိုင်ဘက်ကင်းကာ တိုက်ပွဲမှာအ‌ ကြောက်အရွံမရှိတိုက်ခိုက်နိုင်တယ်။မကောင်းမှုအားလုံးကို ခုခံနိုင်ပြီး အင်မော်တယ်တွေကို တိုက်ခိုက်နိုင်တယ်။

ခရက်! ခရက်!

ရုတ်တရက်၊ အကြောင်းရင်းတစ်ခုခုကြောင့် ကောင်းကင်က ပြောင်းလဲသွားတယ်။ လေနဲ့တိမ်တွေက လှိုင်းထန်နေပြီး ကောင်းကင်ဘုံက ဖရိုဖရဲဖြစ်သွားတယ်။ မရေမတွက်နိုင်တဲ့ လျှပ်စီးတွေက ကောင်းကင်ဘုံဉာဏ်အလင်းအင်မော်တယ်တောင်အပေါ်မှာ ပေါ်လာပေမဲ့ အချိန်အတော်ကြာအောင် တစ်ခုခုကို ပစ်မှတ်မထားနိုင်သလိုမကျရောက်နိုင်ဘူး။

ကမ္ဘာကြီးရဲ့ တာအိုကပြောင်းလဲသွားပြီး မြင့်မြတ်ခန္ဓာကို ပေါ်ထွက်ခွင့်မပြုဘူး။ ဒါပေမဲ့ ချီမင်က တိုက်ပွဲမြင့်မြတ်ခန္ဓာကို သွေးလွှဲပြောင်းနှောင်းပိုင်းအဆင့်ထိ အတင်းအကြပ် တိုးတက်စေခဲ့တယ်။

ဒါက ကမ္ဘာကြီးရဲ့ သတိပြုမိမှုကို ဆွဲဆောင်နိုင်သွားတယ်။

“ဒါပေမဲ့…”

ဒါပေမဲ့ သူက ချီမင်ကို ပစ်မှတ်မထားနိုင်ခဲ့ဘူး။

ဒီလိုနဲ့ လက်ရှိအခြေအနေထိ ဖြစ်သွားတယ်။

“ဒီကမ္ဘာမှာ တကယ်ပဲ တစ်ခုခု မှားနေပြီ။”

ချီမင်က ခေါင်းမော့ပြီး ကောင်းကင်ဘုံဉာဏ်အလင်းအင်မော်တယ်တောင်အပေါ်က မြင်ကွင်းကို ကြည့်လိုက်တယ်၊ “ငါက တိုက်ပွဲမြင့်မြတ်ခန္ဓာကို သွေးလွှဲပြောင်းနှောင်းပိုင်းအဆင့်ထိပဲ တိုးတက်လိုက်တာ၊ ဒါပေမဲ့ ဒီလောက်ကြီးမားတဲ့ အပြောင်းအလဲကို ဖြစ်ပေါ်စေတယ်။”

“ငါက တိုးတိုးတိတ်တိတ်ပဲ နေရဦးမယ်။” ချီမင်က သူ့ဘာသာသူ တွေးလိုက်တယ်။

ဘာပဲဖြစ်ဖြစ် ချီမင်ရဲ့ လက်ရှိခွန်အားက ကောင်းကင်နဲ့မြေကြီးကို မခုခံနိုင်သေးဘူး။

ကွာခြားချက်က အရမ်းကြီးမားလွန်းတယ်။