သင်နှင့် သက်ဆိုင်သော ကမ္ဘာသည် တည်ရှိနေဆဲပင်

[သင်သည် ဤနေ့ရက် ရောက်ရှိလာမည်ကို ကြိုတင် မျှော်လင့်ထားပြီး ဖြစ်သည်။ နောက်ကွယ်မှ လူအုပ်ကြားတွင် အရိပ် စောင့်ရှောက်သူကို သတိပြုမိသော်လည်း သင်သည် ထိုကဲ့သို့ အလွယ်တကူ လက်လျှော့ရန် ရည်ရွယ်ထားခြင်း မရှိပေ။ သင်၏ သရုပ်ဆောင်မှုမှာ အပြစ်ဆိုဖွယ်ရာမရှိ၊ လုံးဝ မသိဟန် ဆောင်ခြင်းပင် ဖြစ်သည်။]

[စောင့်ရှောက်သူ ကျုံးသည် ထိုစကားများကို ရယ်မောရုံသာ ရယ်မောပြီး ထိုကဲ့သို့သော ဆေးများကို ကျင့်ကြံသူများသာ ပေါင်းခံနိုင်ကြောင်း၊ သင်သည် ဤကမ္ဘာရှိ ကျင့်ကြံသူ အနည်းငယ်ထဲမှ တစ်ဦးဖြစ်ကြောင်း ပြောဆိုခဲ့သည်။]

[စောင့်ရှောက်သူ ကျုံး၏ စကားများကို ကြားပြီးနောက် ပတ်ဝန်းကျင်ရှိ အကြီးအကဲများနှင့် စောင့်ရှောက်သူများသည် သူတို့၏ မနှစ်မြို့ဖွယ် အသွင်အပြင်များကို ဖော်ပြကြပြီး သင် ထွက်ပြေးမည်ကို စိုးရိမ်နေသကဲ့သို့ သင့်ကို တိတ်တဆိတ် ဝိုင်းရံထားကြသည်။]

[စောင့်ရှောက်သူ ကျုံး၏ မျက်လုံးများတွင် လောဘကြီးသော အကြည့်မှ တစ်ဆင့် သူသည် သင့် ကျင့်ကြံနိုင်စွမ်း၏ လျှို့ဝှက်ချက်ကို ဖော်ထုတ်ပြီး သင့်အား ဆေးများအဖြစ် ပြောင်းလဲလိုသည်ကို သင် ရိုးရိုးရှင်းရှင်း နားလည်လိုက်သည်။]

[သင်သည် သူ၏ ဆန္ဒကို လိုက်လျောမည် မဟုတ်ပါ။ သင့်အပြင် ကမ္ဘာပေါ်တွင် ကျင့်ကြံသူများ ပိုမိုများပြားကြောင်း၊ သင့်ရှေ့မှ စောင့်ရှောက်သူ ကျုံးကဲ့သို့ သို့မဟုတ် အခြား ပုံတူများတွင်လည်း အချို့ ရှိနိုင်‌သေးကြောင်း ပြောကာ သင် ငြင်းဆိုခဲ့သည်... ထို့အပြင် စောင့်ရှောက်သူ ကျုံး၏ သင့်အား စွပ်စွဲခြင်းသည် သူ၏ ကိုယ်ကျိုးအတွက် သင့်အား ဆေးများအဖြစ် ပြောင်းလဲရန် ရည်ရွယ်ချက် ရှိသည်မှာ သေချာကြောင်း ရှင်းပြသည်!]

[သင်၏ ရှင်းပြချက်ကို ကြားပြီးနောက် ပတ်ဝန်းကျင်ရှိ အကြီးအကဲများနှင့် စောင့်ရှောက်သူများသည် သံသယ ဖြစ်သွားကြကာ သင်၏ စကားများသည် ကျိုးကြောင်း ဆီလျော်ကြောင်း တွေ့ရှိခဲ့ကြသည်။ စောင့်ရှောက်သူ ကျုံး၏ နီးကပ်လာသော သေဆုံးခြင်း ကိစ္စသည် အထက်တန်း အရာရှိများကြားတွင် လျှို့ဝှက်ချက် မဟုတ်ပေ။ သင်သည် ဆင်းသက်ဂိုဏ်းသို့ အသစ် ရောက်ရှိလာသောအခါတွင်ပင် စောင့်ရှောက်သူ ကျုံးသည် သင့်အား ဆုလာဘ်အဖြစ် တစ်ကြိမ် တောင်းဆိုခဲ့ဖူးသည်။ သူ၏ ရည်ရွယ်ချက်မှာ နေ့ကဲ့သို့ပင် ရှင်းလင်း ပြတ်သားသည်။]

[သို့သော် နောက်ပိုင်းတွင် သင်သည် သင်၏ တန်ဖိုးကို သက်သေပြခဲ့သည်- အဆုံးမရှိ အလားအလာရှိသော အဂ္ဂိရတ်ဆရာ အကြီးအကဲတစ်ဦးနှင့် အသက် ကုန်ဆုံးတော့မည့် စောင့်ရှောက်သူ တစ်ဦး၊ ဆင်းသက်ဂိုဏ်းအတွက် နှစ်ဦး၏ တန်ဖိုးသည် သေချာပေါက် ရှင်းလင်း ပြတ်သားသည်ဟုတော့ မဆိုနိုင်ပေ။]

ပတ်ဝန်းကျင်ရှိ စောင့်ရှောက်သူများနှင့် အကြီးအကဲများ၏ သဘောထား အနည်းငယ် ပျော့ပြောင်းသွားသည်ကို မြင်သောအခါ သင်သည် အခွင့်ကောင်းယူ၍ ဤအရာအားလုံးသည် အမှန်တကယ် သက်သေ အထောက်အထား မရှိသော ရိုးရိုး ထင်ကြေးပေးမှုသာ ဖြစ်ကြောင်း အကြံပြုခဲ့သည်။]

[အကြီးအကဲ အုပ်စုသည် ဤအရာကို ခေါင်းညိတ် ထောက်ခံခဲ့ပြီး ဆင်းသက်ဂိုဏ်းအတွင်း နှစ်ပေါင်းများစွာကြာ သင်သည် အတော်‌လေး နှစ်သက်ဖွယ် ကောင်းသည့်သူ ဖြစ်ကြောင်း တွေ့ရှိခဲ့ကြသည်။ အချို့ အကြီးအကဲများ အတွက် သန်စွမ်းမှု ဆေးလုံးများကို မကြာခဏ ပေါင်းခံပေးသောကြောင့် ၎င်းတို့သည် သင့်ကို အလွယ်တကူ ယုံကြည်လိုကြသည်။]

[သို့သော် ကိစ္စသည် အလွန် အရေးကြီးသောကြောင့် စောင့်ရှောက်သူ တစ်ဦးသည် အရိပ် စောင့်ရှောက်သူထံသို့ အကြည့်လွှဲကာ ဤနှစ်များအတွင်း သင် အမှန်တကယ် ဘာလုပ်နေခဲ့သည်ကို သူမ သိပါသလားဟု မေးမြန်းခဲ့သည်။]

[သင်သည် အပေါ်ယံတွင် တည်ငြိမ်ဟန် ဆောင်ထားသော်လည်း သင်၏ နှလုံးသားသည် အနည်းငယ် တင်းမာနေကာ မည်သည့် အချိန်တွင်မဆို ဝိညာဉ်စိုက်ခင်း ကောင်းချီးခံမြေသို့ ထွက်ပြေးရန် အဆင်သင့် ဖြစ်နေခဲ့သည်။]

[အကြီးအကဲများနှင့် စောင့်ရှာက်သူများ အားလုံးသည် သူတို့၏ မျက်လုံးများကို အရိပ် စောင့်ရှောက်သူထံသို့ လွှဲပြောင်းလိုက်ကြသည်။ သင်၏ နှလုံးသားသည်လည်း စိုးရိမ်တကြီး စောင့်ဆိုင်းနေသည်။]

[သင် အံ့အားသင့်သွားသည်မှာ အရိပ် စောင့်ရှောက်သူသည် ရယ်မောကာ ခေါင်းခါယမ်းပြီး နှစ်ပေါင်းများစွာကြာ သင်သည် ဂိုဏ်းအတွက် ဆေးများကို အမြဲတစေ ပေးအပ်ခဲ့ကြောင်း ပြောကြားခဲ့သည်။ သင်ပြုလုပ်ခဲ့သော အနှစ်သာရ အားဖြည့် ဆေးလုံးများနှင့် ကိုယ်တွင်းအင်္ဂါ သန့်စင်ဆေးလုံးကို နှိုင်းယှဉ်ကာ အခြားသူများက သင့်အပေါ် အဘယ်ကြောင့် ထိုကဲ့သို့ မလိုလားသော သံသယများ ထားရှိရသနည်းဟု သူမက မေးခွန်းပင် ပြန်ထုတ်ခဲ့သည်။]

[ကိုယ်တွင်းအင်္ဂါ သန့်စင်ဆေးလုံးကို ပြုလုပ်သော အဂ္ဂိရတ်ဆရာသည် သင့်ထက် များစွာ ကျွမ်းကျင်မှု သာလွန်ကြောင်း သူမသည် တိုက်ရိုက် ပြောကြားခဲ့ပြီး အခြားအကြီးအကဲများနှင့် စောင့်ရှောက်သူများအား ကိုယ်တိုင် ကြည့်ရှုရန် တိုက်တွန်းခဲ့သည်။]

[စောင့်ရှောက်သူ တစ်ဦးစီသည် သေချာ စစ်ဆေးပြီးနောက် ၎င်းတို့ အားလုံးသည် သဘောတူညီစွာ ခေါင်းညိတ်ခဲ့ကြသည်။ နှစ်မျိုးလုံးသည် ဝိညာဉ်ဆေးလုံးများ ဖြစ်သော်လည်း ပြုလုပ်နည်း၏ ကွာခြားမှုမှာ နေ့နှင့်ညကဲ့သို့ ကွာခြားပြီး အသစ် ဆောက်လုပ်ထားသော အကြမ်းဖျင်း အိမ်နှင့် အပြည့်အဝ အလှဆင်ထားသော တိုက်ခန်းတို့၏ ကွာခြားမှုနှင့်ပင် ဆင်တူသည်။]

[သို့သော် အကြီးအကဲများသည် သင်၏ အနှစ်သာရ အားဖြည့် ဆေးလုံးများကို အရည်အသွေး နိမ့်သည်ဟု တိုက်ရိုက်ဝေဖန်ရန် အလွန် ယဉ်ကျေးလွန်းသည့် အတွက် အဂ္ဂိရတ် ပညာရပ်တွင် ကွာဟချက် ရှိကြောင်းကိုသာ သံတမန်နည်းဖြင့် ပြောကြားခဲ့သည်။]

[နောက်ဆုံးတွင် အကြီးအကဲများနှင့် စောင့်ရှောက်သူများ ဆွေးနွေးပြီးနောက် ဤကိစ္စသည် သင့်နှင့် မသက်ဆိုင်ကြောင်း သဘောတူခဲ့ကြသည်။]

[ထိုကျိန်စာသင့်နေသော အရူးအိုကြီး ကျုံး တစ်ဦးတည်းသာ သင့်ကို ကိုက်ဖြတ်ရန် ကြိုးစားနေဆဲဖြစ်သည်။ သူသည် သင်နှင့် အရိပ် စောင့်ရှောက်သူတို့ ပူးပေါင်း ကြံစည်နေသည်ဟု စွပ်စွဲကာ သင်တို့ နှစ်ဦးစလုံးကို သစ္စာဖောက်များအဖြစ် တံဆိပ်ခတ်ခဲ့သည်။]

[အခြား စောင့်‌ရှောက်သူများနှင့် အကြီးအကဲများသည် သူ့ကို လူမိုက် တစ်ဦးကဲ့သို့ ကြည့်ရှုကြသည်။ အဘယ်ကြောင့်ဆိုသော် အရိပ် စောင့်ရှောက်သူ၏ မယိမ်းယိုင်သော သစ္စာစောင့်သိမှုကို လူတိုင်း သိသောကြောင့် ဖြစ်သည်။ အရိပ် စောင့်‌ရှောက်သူသည် "အဓိကမျိုးနွယ်" ကိုပင် ကိုးကွယ်ပြီး သူမကိုယ်တိုင် ၎င်းတို့ထဲမှ တစ်ဦးအဖြစ် ပြောင်းလဲရန် ရည်မှန်းထားသည်။ ထို့ကြောင့် မည်သူမျှ စောင့်ရှောက်သူ ကျုံး၏ စွပ်စွဲချက်များကို မယုံကြည်ကြပေ။]

[ကျိန်စာသင့်နေသော ကျုံး၏ ဖော်ထုတ်ခြင်းမှ သီသီလေး လွတ်မြောက်ခဲ့သည့် အတွက် သင်သည် စိတ်ထဲမှ သက်ပြင်းချလိုက်သည်။]

[တစ်ချိန်တည်းမှာပင် သင်သည် အရိပ် စောင့်ရှောက်သူကို နက်နဲသော အကြည့်ဖြင့် ကြည့်လိုက်သည်။ ထို ဆေးများသည် သင်ပြုလုပ်ခဲ့ကြောင်း သူမ သိသည်မှာ သေချာသည်။ ဤအရေးကြီးသော အချိန်တွင် သင်၏ လျှို့ဝှက်ချက်ကို ထိန်းသိမ်းရန် သူမ ရွေးချယ်လိုက်ခြင်းသည် သူမကို သေချာပေါက် သစ္စာဖောက် တစ်ဦး ဖြစ်သည်ဟု မဆိုလိုနိုင်သော်လည်း အနည်းဆုံးတော့ အရိပ် စောင့်ရှောက်သူ၏ ဆင်းသက်ဂိုဏ်းအပေါ် သစ္စာစောင့်သိမှုသည် အလုံးစုံမဟုတ်ကြောင်း သက်သေပြနိုင်ခဲ့သည်။]

[အကြီးအကဲများနှင့် စောင့်ရှောက်သူများ အုပ်စုသည် သင်၏ နေထိုင်ရာမှ ထွက်ခွာသွားသည်။ အရိပ် စောင့်ရှောက်သူသည်လည်း ထွက်ခွာရန် လှည့်လိုက်သောအခါ သူမသည် အသံမထွက်ဘဲ သင့်အား တိတ်တဆိတ် မက်ဆေ့ခ်ျတစ်ခု ပြောကြားခဲ့သည်။]

[သင်သည် ယခင်က နှုတ်ခမ်းဖတ်သည့် ပညာကို ခဏတာ သင်ယူခဲ့သည့် အတွက် သူမ ပြောသည်ကို နားလည်ခဲ့သည်။

သူမ ပြောတာက ‘ငါတို့ အခု ကျေသွားပြီ!’]

စုရှင်းသည် ဤအရာကို မြင်သောအခါ အနည်းငယ် တုန်လှုပ်သွားသည်။

“အရိပ် စောင့်ရှောက်သူ သူလည်း သစ္စာဖောက်လား? ဒါပေမဲ့ သူမက ဘယ်သူ့အတွက် သူလျှိုလုပ်နေတာလဲ? ရှားနိုင်ငံ စစ်တပ်အတွက်လား?”

စုရှင်းသည် မျက်မှောင်ကြုတ်ကာ ခေါင်းကို ခါယမ်းလိုက်သည်။

“သူမကသာ ရှားစစ်တပ်က သစ္စာဖောက်ဆိုရင် သူမ ငါ့ကို လုပ်ခိုင်းတဲ့ အနှစ်သာရ အားဖြည့်ဆေးလုံး တစ်သောင်းခွဲကို ဘယ်လိုမှ ဖုံးကွယ်ထားလို့ မရဘူး၊ ငါ့ရဲ့ အထောက်အထားကလည်း သေချာပေါက် ပေါ်သွားမှာဘဲ”

“ဒါပေမဲ့ သူမက ရှားနိုင်ငံ စစ်တပ်အတွက် သူလျှို လုပ်တာ မဟုတ်ရင် ဘယ်သူ့အတွက် သူလျှိုလုပ်နေတာလဲ?”

စုရှင်းသည် စိတ်ရှုပ်သွားသည်။

“အရိပ် စောင့်ရှောက်သူရဲ့ သရုပ်မှန်ကို ငါ မသိသေးပေမဲ့ အနည်းဆုံးတော့ သူမက ဆင်းငက်ဂိုဏ်းကို လုံးဝ သစ္စာမရှိဘူးဆိုတာ သေချာနိုင်တယ်၊ ဒါက ငါ့ရဲ့ နောက်ပိုင်း သရုပ်ပြခြင်းတွေမှာ အကျိုးကျေးဇူးများစွာ ရရှိစေမှာ သေချာတယ်!”

“အရိပ် စောင့်ရှောက်သူနဲ့ ငါ ပူးပေါင်းဆောင်ရွက်နိုင်ရင် သရုပ်ပြခြင်းထဲက ကမ္ဘာပျက်သုဉ်းခြင်းကို သေချာပေါက် အများကြီး နောက်ဆုတ်သွားအောင် လုပ်နိုင်တယ်…”

စုရှင်း၏ အတွေးများသည် ယောက်ယက်ခတ်နေသည်။ သူသည် သရုပ်ပြခြင်းကို လုပ်ဆောင်နိုင်ပြီး အကြိမ်ပေါင်း မရေမတွက်နိုင်သော စမ်းသပ်မှုနှင့် အမှားပြင်ဆင်မှု အခွင့်အရေးများ ရှိသည်။ အရိပ် စောင့်ရှောက်သူ၏ သရုပ်မှန်ကို သိနိုင်ရန် အတွက် တစ်ကြိမ်လောက် စွန့်စားရလျှင် တန်သည်။

စုရှင်းသည် ဆုံးဖြတ်ချက်ချပြီး သက်ပြင်းရှည်တစ်ခု ရှိုက်သွင်းကာ ဆက်လက်၍ သရုပ်ပြခြင်းကို လုပ်ဆောင်ခဲ့သည်။

[နောက်ပိုင်းကာလတွင် သင်သည် တိတ်တဆိတ် နေထိုင်ဖို့ ရွေးချယ်ခဲ့ပြီး အဂ္ဂိရတ်ပညာအပြင် သင့်ရဲ့ စွမ်းအင်အများစုကို ကျင့်ကြံခြင်းမှာ မြှုပ်နှံခဲ့သည်။]

[ဆယ့်လေးနှစ်မြောက်တွင် သင်၏ မဆုတ်မနစ် ကြိုးပမ်းမှုများကြောင့် နောက်ဆုံးတွင် ပုံစံကိုးခု ထွင်းထုခြင်းကို ပြီးမြောက်ခဲ့သည်။]

[နဝရွှေအမြုတေ အောင်မြင်သည့် အချိန်တွင် သင်၏ တန်းထျန် အတွင်းမှ ရွှေအမြုတေ တောက်ပစွာ ထွန်းလင်းလာသည်ကို မြင်လိုက်ရပြီး သင့် တစ်ကိုယ်လုံးတွင် ပြည့်စုံခြင်းနဲ့ သဘာဝကျခြင်းကို ခံစားလိုက်ရသည်။ ယင်းသည် အမြဲတမ်း နဝရွှေအမြုတေဖြစ်ဖို့ ရည်ရွယ်ထားသလိုမျိုး ခံစားရပြီး ယင်းအောက်ရှိ တခြား ရွှေအမြုတေ အားလုံးသည် မပြည့်စုံဘူးဟု ထင်ရသည်!]

[နဝရွှေအမြုတေကို သန့်စင်ပြီးနောက် သင်၏ တာဝန် ပြီးဆုံးကြောင်း သင်သိလိုက်သည်။ ထိုအချိန်တွင် ကမ္ဘာပျက်သုဉ်းခြင်းသည် မဝေးတော့ပေ။ လအနည်းငယ် သို့မဟုတ် တစ်နှစ်ကျော်ခန့် အကြာတွင် တိုင်းတစ်ပါးမှ လူမျိုးများသည် တကယ့်ကမ္ဘာသို့ ကျူးကျော် ဝင်ရောက်လာလိမ့်မည်။]

[ထိုအချိန်တွင် သင်သည် နှစ်ပေါင်းများစွာ စုဆောင်းထားသော အနှစ်သာရ အားဖြည့် ဆေးလုံး ထောင်ပေါင်းများစွာ ရှိနေသေးသည်။ သင်သည် ဤ‌ဆေးများ အားလုံးကို ရှားနိုင်ငံ စစ်တပ်သို့ ပေးအပ်ပြီး မလွဲမသွေ ဖြစ်လာမည့် အရာအား မည်မျှကြာကြာ ဆွဲဆန့်နိုင်မည်ကို ကြည့်ရှုလိုခဲ့သည်။]

[သို့သော် ထိုမတိုင်မီ သင်သည် အရိပ် စောင့်ရှောက်သူကို နောက်တစ်ကြိမ် တွေ့ဆုံရန် ဆုံးဖြတ်ခဲ့သည်။]

[တစ်နေ့တွင် သင်သည် အရိပ် စောင့်ရှောက်သူ၏ နေထိုင်ရာသို့ ရောက်ရှိလာပြီး သူမ ကျင့်ကြံနေသည်ကို တွေ့လိုက်ရသည်။ အရိပ် စောင့်ရှောက်သူသည် သင်ရောက်ရှိလာမည်ကို ကြိုတင် သိရှိခဲ့သည်။ သူမသည် အဓိက မျိုးနွယ်နှင့် အပြည့်အဝ ပေါင်းစည်းရန် အဆင်သင့် ဖြစ်ပြီလားဟု မေးမြန်းခဲ့သည်။]

[သင်သည် ညင်သာစွာ ခေါင်းခါယမ်းပြီး သင်၏ စိတ်ထဲရှိ သံသယများကို ရဲရဲတင်းတင်း ပြောကြားခဲ့သည်။ သင်သည် အရိပ် စောင့်ရှောက်သူက ဆင်းသက်ဂိုဏ်းအား အလုံးစုံ သစ္စာရှိပါသလားဟု မေးမြန်းခဲ့သည်။]

[ဤအရာကို ကြားပြီးနောက် အရိပ် စောင့်ရှောက်သူသည် အချိန်အတော်ကြာ တိတ်ဆိတ်နေခဲ့သည်။ ထို့နောက် သူမသည် သူမ၏ မျက်နှာပေါ်ရှိ မျက်နှာဖုံးကို ချွတ်လိုက်သည်။ သူမ၏ မျက်နှာသည် အလွန် လှပနေဆဲ ဖြစ်သော်လည်း သူမ၏ လည်ပင်း အရေပြားတွင် ငါးကြေးခွံကဲ့သို့ အနက်ရောင် အကွက်များကိုလည်း သင် မြင်တွေ့ခဲ့ရသည်။ ၎င်းသည် အရိပ်သားရဲနှင့် နက်ရှိုင်းစွာ ပေါင်းစည်းခြင်း၏ လက္ခဏာဖြစ်သည်။]

[အရိပ် စောင့်ရှောက်သူသည် ညင်သာစွာ ရယ်မောခဲ့သည်။ သူမသည် သင်က ကိုယ်တွင်းအင်္ဂါ သန့်စင်ဆေးလုံးကို သူမအား စောစီးစွာ ပေးအပ်ခဲ့လျှင် ပိုကောင်းလိမ့်မည်ဟု ပြောကြားခဲ့သည်။ ထိုအချိန်တွင် ဆေးလုံးများ ပိုမိုများပြားခဲ့ပါက အရာအားလုံးသည် ကွဲပြားသွားနိုင်မည် ဖြစ်သည်။]

[သူမ သင့်အပေါ် ကြည့်သည့် အကြည့်တွင် မနာလိုဝန်တိုသည့် အရိပ်အယောင် တစ်ခု ပါဝင်သည်။ အနည်းဆုံးတော့ သင်သည် ပြန်ရန် အိမ်တစ်လုံး ရှိသေးကြောင်း၊ အနည်းဆုံးတော့ သင်၏ ကမ္ဘာသည် တည်ရှိနေသေးကြောင်း သူမက ပြောကြားခဲ့သည်။]