ချန်ချွန်းနည်း အပြည့်အစုံ ရရှိခြင်း!

[ကံကောင်းစွာဖြင့် ဝိညာဉ်စိုက်ခင်း ကောင်းချီးခံ မြေအတွင်း၌ စားနက်ရိက္ခာနှင့် ရေပေါများသည့်အပြင် ရှုခင်းကပင်လျှင် လှပသော ဝိညာဉ်စွမ်းအင်များဖြင့် ပြည့်နှက်နေသည်။ကမ္ဘာဆုံးသည်အထိ သင်သည် ဤနေရာတွင် သက်တောင့်သက်သာစွာ ပုန်းအောင်းနေနိုင်သည်။]

[အကြီးအကဲ ကျုံး၏ ညှဉ်းပန်းနှိပ်စက်ခြင်းကို ခံရပြီးနောက် သင်၏ တန်းထျန်သည် ပျက်စီးသွားကြောင်း၊ သင်၏ ချီစုစည်းခြင်း ကျင့်ကြံမှုသည် အခြေခံအုတ်မြစ် တည်ဆောက်ခြင်း အဆင့်နီးပါး ကျဆင်းသွားကြောင်း တွေ့ရှိခဲ့သည်။သင်၏ ခြေလက်များသည်လည်း ဆေးဖိုဖြင့် အရည်ပျော်သွားသည့်အတွက် ကျင့်ကြံခြင်းကို ဆက်လက် မလုပ်ဆောင်နိုင်တော့သည့် မသန်စွမ်းသူတစ်ဦး ဖြစ်သွားခဲ့သည်။]

[သင်သည် ကျင့်ကြံခြင်းကို ဆက်လက် မလုပ်ဆောင် နိုင်တော့သော်လည်း ကျင့်ကြံသူ တစ်ဦးအနေဖြင့် သင်ပိုင်ဆိုင်ထားသော နည်းလမ်းများသည် သာမန်လူ တစ်ဦးကဲ့သို့ နေထိုင်ရန် လုံးဝမခက်ခဲပေ။]

[နောက်ရက်များတွင် သင်သည် ငြိမ်းချမ်းစွာ အနားယူခြင်း၏ သာယာသောဘဝကို ပျော်ရွှင်စွာ ဖြတ်သန်းခဲ့သည်။လယ်ယာစိုက်ပျိုးခြင်း၊ ကြက်မွေးမြူခြင်း၊ ခံတွင်း မြိန်စေသော ဝိညာဉ်ဆန်ကို စားသုံးခြင်း၊ တောဟင်းရွက်အချို့ကို စားခြင်းနှင့် တစ်ခါတစ်ရံ အာသာပြေစေရန် ဝိညာဉ်ကြက် တစ်ကောင်ကို သတ်ခြင်းဖြင့် အတော်လေး ပျော်ရွှင်ဖွယ်ကောင်းသော ဘဝကို ပိုင်ဆိုင်ခဲ့သည်။]

[ဆယ့်လေးနှစ်မြောက်တွင် တစ်နေ့၌ ဝိညာဉ်စိုက်ခင်း ကောင်းချီးခံမြေ၏ နေရာတစ်ခုလုံးသည် စတင် ကွဲအက်လာပြီး ထူးခြားဆန်းပြားသော သတ္တဝါကြီး ရောက်ရှိလာကြောင်းကို သင်၏ စိတ်ထဲတွင် အလိုလို သိလိုက်သည်။]

[သင်မသေဆုံးမီတွင် လက်တွေ့ကမ္ဘာသို့ ပြန်သွားကာ တစ်ချက်လောက် ကြည့်ရှုရန် ဆုံးဖြတ်လိုက်သောကြောင့် စိတ်ဖြင့် ဝိညာဉ်စိုက်ခင်း ကောင်းချီးခံမြေမှ ထွက်ခွာကာ သင် ဆေးဖော်ရန် အသုံးပြုခံခဲ့ရသော နေရာသို့ ပြန်ရောက်သွားသည်။]

[အမြင့် သုံးကျယ်ရှိသော ဧရာမ ဆေးဖိုကြီးသည် ကြာမြင့်စွာကပင် ပျောက်ကွယ်သွားခဲ့ပြီး မှောင်မိုက်မှုက သင့်ကို ဝန်းရံထားကာ အပျက်အစီးများနှင့် ရွှံ့ညွှန်များဖြင့် ပြည့်နှက်နေသည်။သင်သည် တည်ငြိမ်စွာ ရပ်တည်ရန်ပင် ခက်ခဲနေပြီး ဧရာမ သတ္တဝါကြီး၏ ဝါးမျိုခြင်းကို ခံခဲ့ရကြောင်း သိလိုက်သည်။]

[သင်သည် သေတော့မည်ဟု ထင်နေစဉ်တွင် နောက်ကျောမှ အသက်ကြီးသူတစ်ဦး၏ အသံထွက်ပေါ်လာသည်။]

[သင်သည် ဂရုတစိုက် ကြည့်လိုက်သောအခါ အရိုးပေါ် အရေတင် အိုမင်းမစွမ်း ဖြစ်နေသော အသက်ရှူသံ မျဉ်းမျဉ်းသာ ကျန်တော့သည့် အဘိုးအိုတစ်ဦးသည် ထောင့်တစ်နေရာမှ တုန်ယင်စွာ ထွက်ပေါ်လာသည်ကို တွေ့လိုက်ရသည်—သူကား စောင့်ရှောက်သူ ကျုံးပင် ဖြစ်သည်။]

[သင်အံ့အားသင့်သွားသည်။သင့်အား ဆေးအဖြစ် ပြောင်းလဲရန် စွဲလမ်းနေသော စောင့်ရှောက်သူ ကျုံးသည် နှစ် နှစ်တိုင်တိုင် စောင့်ဆိုင်းနေလိမ့်မည်ဟု သင်မထင်ထားခဲ့မိပေ။နောက်ဆုံးတွင် သူသည်လည်း သင့်ကဲ့သို့ပင် ဧရာမ သတ္တဝါကြီး၏ ဝါးမျိုခြင်းကို ခံခဲ့ရကာ ကံကြမ္မာဆိုးနှင့် ကြုံတွေ့ခဲ့ရသည်။]

[သင့်ကိုမြင်သောအခါ စောင့်ရှောက်သူ ကျုံး၏ မျက်နှာတွင် အံ့အားသင့်မှုနှင့် ရူးသွပ်မှု ရောပြွမ်းနေသော အသွင်အပြင် ပေါ်လာပြီး သူ၏ ခန္ဓာကိုယ်သည် တုန်ယင်လျက် သင်၏ ကောင်းကင်ဘုံ ပိုင်ဆိုင်မှုအကြောင်း ပြောဆိုခဲ့သည်။]

[စောင့်ရှောက်သူ ကျုံးသည် မျက်ရည်များ စိုရွှဲနေသော မျက်နှာဖြင့် သင့်ရှေ့တွင် ဒူးထောက်ကာ သူ၌ အချိန်များစွာ မကျန်တော့ကြောင်း၊သူ မသေဆုံးမီ သင်၏ ကောင်းကင်ဘုံကို တစ်ချက်မျှ မြင်လိုကြောင်း ပြောကြားခဲ့သည်။]

[စောင့်ရှောက်သူ ကျုံး ထိုကဲ့သို့ နာကျင် ခံစားနေရသည်ကို မြင်သောအခါ သင်သည် ခါးသက်သော အပြုံးကို ပြုံးကာ မိမိကိုယ်ကို သတ်သေရန် ရွေးချယ်ခဲ့သည်။]

[သင် သေဆုံးသွားပြီ!]

[သင်၏ မွေးရာပါ အရည်အချင်း 'သေရာတွင် မျက်လုံးမမှိတ်လိုခြင်း' စတင်အသက်ဝင်လာသည်…]

[သင် သေဆုံးသွားသည်ကို မြင်သောအခါ စောင့်ရှောက်သူ ကျုံးသည် ရူးသွပ်စွာ ဒေါသထွက်သွားသည်။သင်သည် သူ၏ ကျင့်ကြံခြင်းကို ဆက်လက် လုပ်ဆောင်ရန် တစ်ခုတည်းသော မျှော်လင့်ချက် ဖြစ်သည်။ယခု သင် သေဆုံးသွားသောကြောင့် သူသည် နောက်ထပ် ကျင့်ကြံရန် အခွင့်အရေး မရှိတော့ကြောင်း သိလိုက်သည်။သူ၏ ကျင့်ကြံခြင်းဆိုင်ရာ စိတ်ဓာတ်သည် ပြိုလဲသွားပြီး သင့်အလောင်းဘေးတွင်ပင် ဝမ်းနည်းဖွယ် သေဆုံးသွားသည်။]

[ဒင်၊ သရုပ်ပြခြင်း ပြီးဆုံးသွားပါပြီ!]

သရုပ်ပြခြင်း ပြီးဆုံးသွားပြီးနောက် စုရှင်းသည် နက်ရှိုင်းသော စဉ်းစားတွေးခေါ်မှုတွင် နစ်မြောသွားသည်။

ဤ သရုပ်ပြခြင်းသည် စုရှင်းအတွက် အတိုင်းအဆမရှိ တန်ဖိုးရှိသည်။

ပထမဦးစွာ စုရှင်းသည် ချန်ချွန်း နည်းပညာ၏ အပြည့်အစုံကို ရရှိခဲ့သည်။ဆိုလိုသည်မှာ သူ၏ ကျင့်ကြံခြင်း လမ်းကြောင်းသည် နောင်တွင် ရပ်တန့်တော့မည် မဟုတ်ပေ။စုရှင်းသည် ယခုဆိုလျှင် လွတ်မြောက်ခြင်း နယ်ပယ်အထိ ကျင့်ကြံရန် မျှော်လင့်ချက် ရှိလာခဲ့သည်။

လွတ်မြောက်ခြင်း နယ်ပယ်သို့ ရောက်ရှိသည်နှင့် စုရှင်းသည် ကျင့်ကြံသူများ ပိုင်ဆိုင်သော ကမ္ဘာတစ်ခု ဖြစ်နိုင်သည့် ချင်းယွမ်ဂိုဏ်းသို့ သွားရောက်နိုင်လိမ့်မည်။စုရှင်းသည် ထိုနေရာသို့ ရောက်ရှိနိုင်သည်နှင့် သူသည် ကျင့်ကြံခြင်းဆိုင်ရာ အရင်းအမြစ်များကို ပိုမို ရရှိနိုင်လိမ့်မည်။

ထိုအချိန်တွင် သရုပ်ပြစက်၏ အကူအညီဖြင့် စုရှင်း၏ ကျင့်ကြံခြင်း အရှိန်သည် အရည်အသွေးပိုင်းဆိုင်ရာ ပြောင်းလဲမှု တစ်ရပ်ကို ကြုံတွေ့ရလိမ့်မည်။

ဒုတိယအချက်အနေဖြင့် သရုပ်ပြခြင်းသည် စုရှင်းအပေါ် သိသာထင်ရှားသည့် သတင်းအချက်အလက်ဆိုင်ရာ သက်ရောက်မှု ရှိခဲ့သည်။

စုရှင်းသည် ဤကမ္ဘာတွင် သူ့တစ်ဦးတည်းသာ ကျင့်ကြံသူ မဟုတ်ကြောင်း အတည်ပြုနိုင်ခဲ့သည်။

သို့မဟုတ် အခြားနည်းဖြင့် ဆိုရလျှင် ကြယ်ပြာကမ္ဘာတွင် သူတစ်ဦးတည်းသာ ကျင့်ကြံသူ ဖြစ်နိုင်သော်လည်း ကျင့်ကြံခြင်းကို အဓိကထားသော ပုံတူကမ္ဘာများတွင် ကျင့်ကြံသူ အတော်များများ ပါဝင်နိုင်ပေသည်။

ပို၍ စိုးရိမ်စရာ ကောင်းသည်မှာ ထိုကျင့်ကြံသူများသည် လက်တွေ့ကမ္ဘာသို့ ဝင်ရောက်ရန် နည်းလမ်းတစ်ခု ရရှိထားပြီးဖြစ်ကာ ၎င်းကို လွှမ်းမိုးနေနိုင်သည် ဟူသော အချက် ဖြစ်သည်။

သူတို့၏ ရည်ရွယ်ချက်များ ကောင်းသည်ဖြစ်စေ ဆိုးသည်ဖြစ်စေ၊ ကြီးမားသော လျှို့ဝှက်ချက်ကို ထိန်းသိမ်းထားသည့် စုရှင်းအတွက်မူ အမြတ်ထုတ်ခံရနိုင်ခြေ အလွန်များသည်။

ကျင့်ကြံသူများထဲတွင် ထိုခွေးအို ကျုံးနှင့် ယခင်က စုရှင်းကို ချက်ချင်းသတ်ခဲ့သော နဂါး စောင့်ရှောက်သူတို့ ပါဝင်ကြောင်း ယခုအခါ သေချာသွားပြီ ဖြစ်သည်—သူလည်း ကျင့်ကြံသူ တစ်ဦး ဖြစ်နိုင်ခြေ အလွန်များသည်။

ထို့အပြင် စုရှင်းသည် စောင့်ရှောက်သူ ကျုံးကား တရားတော် ဆုတ်ယုတ်သောခေတ်၏ သရုပ်ပြခြင်းမှ လာကြောင်း ယခုအခါ အတည်ပြုနိုင်ပြီ ဖြစ်သည်။

“တရားတော် ဆုတ်ယုတ်သော ခေတ်ရဲ့ သရုပ်ပြခြင်းမှာ လျှို့ဝှက်ချက်များစွာ ပါဝင်နိုင်ပေမယ့် ငါ့ရဲ့ လက်ရှိခွန်အားနဲ့တော့ ကိုယ်တိုင်စူးစမ်းဖို့ အရမ်း အန္တရာယ် များတယ်”

“အကောင်းဆုံး ချဉ်းကပ်နည်းက တရားတော် ဆုတ်ယုတ်သော ခေတ်ရဲ့ သရုပ်ပြခြင်းကို စူးစမ်းလေ့လာပြီး အသုံးဝင်တဲ့ အချက်အလက်များစွာကို ရယူဖို့ဘဲ။ဒါပေမယ့် အဲ့ဒါမတိုင်ခင် ငါ့ခွန်အားကို နည်းနည်း မြှင့်တင်ဖို့ လိုသေးတယ်။အကောင်းဆုံးက မူလ ကိုယ်ခံပညာ နယ်ပယ် ဒါမှမဟုတ် အခြေတည်ဝိဉာဉ် နယ်ပယ်ကို ရောက်ရှိဖို့ဘဲ။ဒီလိုဆို သရုပ်ပြခြင်း ကြိုးစားမှုတွေကို ဖြုန်းတီးရာ မရောက်တော့ဘူး”

စုရှင်းသည် သူ့ဘာသာသူ စဉ်းစားနေသည်။

နောက်ထပ်အချက် အရေးအကြီးဆုံး အချက်ကတော့! လက်တွေ့ကမ္ဘာမှာ ငါ့ရဲ့အထောက်အထားကို မဖော်ထုတ်ရဘူး! အထူးသဖြင့် ငါ ကျင့်ကြံနိုင်တယ်ဆိုတဲ့ အချက်ကို! ဖော်ထုတ်လိုက်တာနဲ့ မသေမျိုး ဖြစ်ခြင်း လမ်းကြောင်းကနေ ဖယ်ရှားခံထားရတဲ့ အင်အားကြီးမားတဲ့ သတ္တဝါတွေ ငါ့ကို ဒုက္ခပေးဖို့ လာမှာ သေချာတယ်။ အကောင်းဆုံးအနေနဲ့ သူတို့ ငါ့ကို ဖမ်းဆီးချုပ်နှောင်လိမ့်မယ်; အဆိုးဆုံးအနေနဲ့ သူတို့ ငါ့ကို အရုပ်အဖြစ် ပြောင်းလဲပစ်နိုင်တယ်။ ဒီလူတွေရဲ့ ကျင့်ကြံခြင်းအပေါ် ငတ်မွတ်မှုကို ငါ လျှော့တွက်လို့ မဖြစ်ဘူး!

သရုပ်ပြခြင်းထဲတွင် သူကြုံတွေ့ခဲ့ရသော လူမဆန်သည့် ညှဉ်းပန်းနှိပ်စက်မှုများကို စဉ်းစားလိုက်ရုံဖြင့် စုရှင်းသာ် ကြက်သီးများထကာ တုန်ယင်လာသည်။

“အဲဒီ စောင့်ရှောက်သူ ကျုံးက ငါ့ကို ဖမ်းဆီးဖို့အတွက် နှစ်ပေါင်းများစွာ ပုန်းအောင်းနေဖို့တောင် မတွန့်ဆုတ်ခဲ့ဘူး၊ ငါ တည်ငြိမ်စွာ ကျင့်ကြံနိုင်သလား ဆိုတာကို စောင့်ကြည့်ဖို့ သက်သက်ပဲ။”

“ငါ တကယ် ကျင့်ကြံနိုင်ကြောင်း သိသွားတဲ့အခါ စောင့်ရှောက်သူ ကျုံးက ချက်ချင်း သူ့ရဲ့အစွယ်တွေကို ထုတ်ပြတာဘဲ။ငါ လွတ်မြောက်ပြီးနောက် နှစ်ပေါင်းများစွာတောင် စောင့်ဆိုင်းခဲ့သေး။ဒါက သူ့ရဲ့ စွဲလမ်းမှု ဘယ်လောက် နက်ရှိုင်းတယ် ဆိုတာကို ပြလိုက်တာဘဲ”

အကြောက်ဆုံး အရာမှာ စောင့်ရှောက်သူ ကျုံးလိုလူမျိုး တစ်ယောက်မက ရှိနေမှာကိုသာ ဖြစ်သည်။သရုပ်ပြခြင်းများမှ ပေါ်ထွက်လာပြီး ကျင့်ကြံခြင်း လမ်းကြောင်း ပျက်သုဥ်းခြင်းကို ကြုံတွေ့ခဲ့ရသည့် ကျင့်ကြံသူများသည် ကျင့်ကြံဖို့ရန် မျှော်လင့်ချက် အနည်းငယ် ရှိရုံနှင့် သူတို့၏ အစစ်အမှန် သဘောကို ထုတ်ဖော်ပြသမှာ သေချာသည်...ဒါ့အပြင် တရားတော် ဆုတ်ယုတ်တဲ့ ခေတ်မှ ယခုချိန်ထိ အသက်ရှင် ကျန်ရစ်ခဲ့တဲ့သူတွေသည် စုရှင်းထက် အများကြီး ပိုအင်အားကြီးမှာ သေချာသည်!

စုရှင်းသည် အသက်ပြင်းပြင်းရှူကာ စိတ်ထဲတွင် ထပ်ခါထပ်ခါ ပြောနေသည်။

“ပိုပြီး သတိထား! ပိုပြီး သတိထား! ငါ အကြွင်းမဲ့ အင်အား မရမချင်း ငါ့ကိုယ်ငါ မဖော်ထုတ်ရဘူး…”

ခဏရပ်ပြီးနောက် စုရှင်းသည် ပြန်စဉ်းစားသည်:

“ဒါပေမယ့် ငါ အင်အားရလာတဲ့အခါ ဂိုဏ်းအကြီးအကဲ ကျုံးကို ဖယ်ရှားဖို့ နည်းလမ်း ရှာနိုင်ကောင်း ရှာနိုင်မယ်။ဘာဖြစ်ဖြစ် အဲဒီလူက ဘုရား အသွင်ပြောင်းခြင်း နယ်ပယ်ရဲ့ ကျင့်ကြံခြင်းမှာ အလွန် အစွမ်းထက်တဲ့သူ ဖြစ်ပြီး ကျင့်ကြံခြင်း ကမ္ဘာအကြောင်း အများကြီး သိမှာ သေချာတယ်။ငါက ကျင့်ကြံခြင်း နည်းလမ်း အကြောင်း သိတာ အလွန်နည်းတော့ ကျင့်ကြံခြင်း ဘမ္ဘာကို ပိုကောင်းကောင်း နားလည်ဖို့ သူ့ကို ခြေလှမ်းတစ်ခုအနေနဲ့ အသုံးချလို့ ရနိုင်တယ်။”

“ဒါပေမဲ့ ဒါက အလျင်စလို လုပ်ရမယ့်ကိစ္စ မဟုတ်ဘူး; အခု လုပ်ရမှာက ငါ့ရဲ့ ခွန်အားကို တည်ငြိမ်စွာ တိုးမြှင့်ဖို့ပဲ!”

စုရှင်းသည် သက်ပြင်း ချလိုက်ပြီးနောက် ဤသရုပ်ပြခြင်းအတွက် ဆုလာဘ်များကို ကြည့်လိုက်သည်။

[တိရစ္ဆာန်စကား နားလည်ခြင်း အဆင့် ၁၀]: အပြာရောင်အဆင့် စွမ်းရည်၊ စွမ်းအင်မှတ် ၁၀၀,၀၀၀ တန်ဖိုးရှိသည်။

[ရွှေရောင်အမြုတေ အဆင့် ပဉ္စမလွှာ]: ကျင့်ကြံခြင်းအဆင့်၊ ရွှေရောင်အမြုတေ၏ အရည်အသွေး ပိုမိုကောင်းမွန်လာပြီး ယခု အလယ်အလတ် အဆင့်၏ အထက်ပိုင်း အရည်အသွေး ဖြစ်သည်။အဆင့်မြင့် ရွှေအမြုတေနှင့် မဝေးတော့ပါ။စွမ်းအင်မှတ် ၄၀၀,၀၀၀ တန်ဖိုးရှိသည်။

[အနှစ် ၁၀ နှစ်ကြာ ဆေးဖော်စပ်ခြင်း အတွေ့အကြုံ]: ဆေးဖော်စပ်ခြင်းဆိုင်ရာ အသိပညာ၊ စွမ်းအင်မှတ် ၁၀,၀၀၀ တန်ဖိုးရှိသည်။

[ချန်ချွန်းနည်း]: ချန်ချွန်းဂိုဏ်း၏ အခြေခံ ကျင့်ကြံခြင်းနည်း၊ ပိုမိုအစွမ်းထက်သော နည်းပညာ၏ အဓိက အစိတ်အပိုင်း တစ်ခုဖြစ်သည်။လွတ်မြောက်ခြင်း နယ်ပယ်၏ အလွန် ပြည့်စုံခြင်းအဆင့်အထိ ကျင့်ကြံနိုင်သည်။စွမ်းအင်မှတ် ၅၀၀,၀၀၀ တန်ဖိုးရှိသည်။

စုရှင်းသည် သူ့ရှေ့မှ သရုပ်ပြခြင်း၏ ဆုလာဘ် လေးခုကို ကြည့်ရင်း စဉ်းစားသွားသည်။

ပထမဦးစွာ သူသည် ချန်ချွန်း နည်းပညာကို ရယူရမည် ဖြစ်သည်။သူသည် သရုပ်ပြစက်ထဲတွင် အလွန်အမင်း ကြိုးစားအားထုတ်ကာ ညှဉ်းပန်းနှိပ်စက်ခံရပြီးမှ ရရှိခဲ့ခြင်း ဖြစ်သည်။

ယခုတစ်ကြိမ် မယူပါက နောက်ထပ် သရုပ်ပြခြင်း အခွင့်အရေးကို ဖြုန်းတီးမိနိုင်သည်။

ကျန်ရှိသော ရွေးချယ်စရာ သုံးခုအနက် စုရှင်းသည် ဆေးဖော်စပ်ခြင်း အတွေ့အကြုံကို ချက်ချင်း ဖယ်ထုတ်လိုက်သည်။အကြောင်းမှာ ဤသရုပ်ပြခြင်းတွင် သူသည် ဆေးနည်းအသစ်များ မသင်ယူခဲ့သဖြင့် သူ့အတွက် တန်ဖိုးမရှိသောကြောင့် ဖြစ်သည်။

ခဏမျှ တုံ့ဆိုင်းပြီးနောက် စုရှင်းက ပြောသည်:

“ကျွန်တော် ချန်ချွန်းနည်းပညာနဲ့ အဆင့် ၁၀ တိရစ္ဆာန်စကား နားလည်ခြင်း စွမ်းရည်ကို ရွေးချယ်ပါတယ်!”

…