ဆေးလုံးတစ်သိန်း၊ ရက်ရောသော လက်ဆောင်!

“ငါ သန္ဓေတည် ဝိညာဉ် အဆင့်ကို ရောက်သွားပြီလား?”

စုရှင်း၏ မျက်လုံးများတွင် အံ့အားသင့်မှု အရိပ်အယောင်များ ပေါ်လာသည်။ သူသည် ယခင် သရုပ်ပြခြင်းတွင် ကိုးပတ်လည် ရွှေအမြုတေကို ပေါင်းစည်းခဲ့သည်။ ပျော်ရွှင်မှုသည် ရုတ်တရက် မမျှော်လင့်ဘဲ ရောက်ရှိလာကာ သန္ဓေတည် ဝိညာဉ်အဆင့် ကျင့်ကြံသူ တစ်ဦး၏ အဆင့်အတန်းကို ရရှိစေခဲ့သည်။

ပထမအဆင့်ရှိ သန္ဓေတည် ဝညာဉ်အဆင့် ကျင့်ကြံသူတစ်ဦး အနေဖြင့်ပင် စုရှင်း၏ အင်အားကို အဆပေါင်းများစွာ တိုးမြှင့်ရန် လုံလောက်ပေလိမ့်မည်။

“ဒီ သရုပ်ပြခြင်း ပြီးသွားရင် ငါသာ သန္ဓေတည် ဝိညာဉ်အဆင့်ကို ရောက်နိုင်ရင် သာမန် ဂရန်းမာစတာ အဆင့် ကျွမ်းကျင်သူတွေကိုတောင် ဂရုစိုက်စရာ မလိုတော့ဘူး။ ဒါဆိုရင် အန္တရာယ်များတဲ့ ပုံတူ အနည်းငယ်ကို စူးစမ်းလေ့လာဖို့ ကြိုးစားနိုင်မလား?”

ထိုအကြံဖြင့် စုရှင်း၏ မျက်လုံးများတွင် ကြောက်မက်ဖွယ်ကောင်းသော အလင်းရောင် လင်းလက်သွားသည်။ သူက တိုးတိုးလေး ရေရွတ်လိုက်သည်။

“ပြီးတော့ ဟိုကောင် ကျုံး... ငါကိုယ်တိုင် သူ့ကို သတ်ရ

ပစ်မယ်!”

စုရှင်းသည် အသက်ကို ခပ်ပြင်းပြင်း ရှူသွင်းလိုက်ပြီး သူ၏စိတ်ကို ပြန်လည် တည်ငြိမ်စေခဲ့သည်။

“ဟိုကောင် ကျုံး နဲ့ ရင်ဆိုင်ရမှာ သေချာတယ်။ သရုပ်ပြခြင်းမှာ ငါ့ကို လူသားဆေးလုံးအဖြစ် ပြောင်းခဲ့တဲ့ သူ့ရဲ့လုပ်ရပ်အပြင် သူထားခဲ့နိုင်တဲ့ ကျင့်ကြံခြင်း ကမ္ဘာရဲ့ အမွေအနှစ်က ငါ့အတွက် ကြီးမားတဲ့ ကံကောင်းခြင်းပဲ!”

ယခု စုရှင်းအတွက် အလိုအပ်ဆုံးအရာကား အဘယ်နည်း။

ဝိဉာဉ်ကျောက်များလား? ဆေးလုံးများလား? ကျင့်ကြံခြင်း နည်းစနစ်များလား?

အထက်ပါ အရာများထဲမှ တစ်ခုမျှ မဟုတ်ပါ။ စုရှင်းတွင် ဝိဉာဉ်ကျောက်များ သို့မဟုတ် ဆေးလုံးများစွာ မရှိသော်လည်း သူသည် ၎င်းတို့ကို လက်တွေ့ကမ္ဘာတွင် တစ်ခါမျှ အသုံးမပြုခဲ့ဘဲ သရုပ်ပြခြင်း များတွင်သာ အသုံးပြုခဲ့ပြီး ယခုအချိန်အထိ သရုပ်ပြခြင်းတိုင်းတွင် လုံလောက်ခဲ့သည်။

တစ်နည်းဆိုရသော် သရုပ်ပြခြင်းများသည် အဆုံးမရှိသရွေ့ သူသည် ဆေးလုံးများနှင့် ဝိဉာဉ်ကျောက်များကို အဆုံးမရှိ ထောက်ပံ့နိုင်မည် ဖြစ်သည်။

ကျင့်ကြံခြင်း နည်းစနစ်များ အနေဖြင့် ချန်ချွန်း နည်းလမ်းသည် စုရှင်း၏ လက်ရှိ အဆင့်အတွက် လုံလောက်နေပြီ ဖြစ်သည်။ ၎င်းသည် သူစဉ်းစားရန် မလိုအပ်သောအရာ ဖြစ်သည်။

ယခု စုရှင်းအတွက် အလိုအပ်ဆုံး အရာမှာ အတွေ့အကြုံ၊ ကျင့်ကြံခြင်း ကမ္ဘာ၏ အချို့သော သာမန်အသိပညာနှင့် လျှို့ဝှက်ချက်များအပြင် အစွမ်းထက်သော တိုက်ခိုက်ရေး စွမ်းအင်များဖြစ်သည်။

ထိုကောင် ကျုံးကို သတ်နိုင်သရွေ့ စုရှင်းသည် ဤအရာအားလုံးကို ရရှိလိမ့်မည်ဟု ယုံကြည်ခဲ့သည်။ နောက်ဆုံးတွင် ၎င်းသည် နှစ်တစ်ထောင်ကျော် အသက်ရှင်ခဲ့သော သက်ကြီးရွယ်အို ဘီလူးတစ်ကောင်သာ ဖြစ်သည်။

“သို့သော် ငါ ဘယ်တော့မှ အန္တရာယ်ကို ဖိတ်ခေါ်လို့ မရဘူး။ ငါ လုံးဝသေချာဖို့ လိုတယ်... ဟိုကောင် ကျုံးက ဘုရား ပြောင်းလဲခြင်း အဆင့်ရဲ့ အထွတ်အထိပ် ကျင့်ကြံသူ ဖြစ်နိုင်တယ်။ သူ့ရဲ့ အသက်အရွယ် ကြီးရင့်မှုနဲ့ အားနည်းမှုတွေ ရှိပေမယ့် သာမန် သန္ဓေတည် ဝိဉာဉ်တစ်ယောက်က ယှဉ်လို့ မရနိုင်တဲ့သူပဲ။”

“ခဏလေး စောင့်ဦး... ငါလည်း ဘုရား အသွင်ပြောင်းခြင်း အဆင့်ကို ရောက်တဲ့အခါကျ ဟိုခွေးအိုကြီးရဲ့ အသက်ကို ယူဖို့ ကြိုးစားနိုင်မှာဘဲ!”

စုရှင်းသည် အသက်ကို ခပ်ပြင်းပြင်း ရှူသွင်းလိုက်ပြီး သူ၏ စိတ်ခံစားချက်များကို တည်ငြိမ်စေခဲ့သည်။

“အရေးကြီးတဲ့ အခိုက်အတန့်တွေမှာ တည်ငြိမ်စွာ လုပ်ဆောင်ရမယ်... ဘာပဲဖြစ်ဖြစ် ငါ့မှာ သရုပ်ပြခြင်း ရှိနေရုံနဲ့ အားသာချက်က ငါ့ဘက်မှာပဲ!”

စုရှင်းသည် သရုပ်ပြခြင်းကို ဆက်လက် လုပ်ဆောင်ခဲ့သည်။

[သင် သန္ဓေတည် ဝိညာဉ်အဆင့်သို့ တိုးတက်ပြီးနောက် သင်၏အင်အားသည် ယခင်ကထက် ပိုမိုပြင်းထန်လာခဲ့သည်။ သင့် တိုးတက်မှု၏ ဆူညံသံသည် အနီးအနားတွင် ရပ်နေသော အရိပ် စောင့်ရှောက်သူ၏ အာရုံကို ဖမ်းစားနိုင်ခဲ့ပြီး သူမသည် သင့်ကို ထူးဆန်းသော အကြည့်ဖြင့် ကြည့်နေခဲ့သည်။]

[လူတစ်ဦးစီ၏ ကိုယ်ခန္ဓာသည် မတူညီကြောင်း သင်ရှင်းပြရုံမှ တစ်ပါး အခြား ရွေးချယ်စရာ မရှိတော့ပေ။ ထို့နောက် အရိပ် စောင့်ရှောက်သူအား သူမ၏ နောက်အစီအစဉ်များကား အဘယ်နည်းဟု သင် မေးမြန်းခဲ့သည်။]

[အရိပ် စောင့်ရှောက်သူသည် ယခင်ကထက် အသက်ဝင်မှုနှင့် စွမ်းအင် နည်းပါးနေပုံ ရသည်။ သူမသည် သူမ၏ကမ္ဘာ ပျက်စီးသွားပြီ ဖြစ်ကြောင်း ညွှန်ပြသည်။ ယခုမှစ၍ ကောင်းစွာ နေထိုင်လိုကြောင်း ပြောကြားကာ ခေါင်းကို အနည်းငယ် ခါယမ်းခဲ့သည်။]

[အရိပ် စောင့်ရှောက်သူနှင့် ယခင်က မဟာမိတ် ဖွဲ့ခဲ့သည်မှာ အကျုံးဝင်သေးပါသလားဟု သင်မေးမြန်းသောအခါ သူမသည် ခေါင်းညိတ်ကာ သဘောတူခဲ့သည်။ မည်သို့ပင်ဖြစ်စေ သင်သည် သူမ၏ ဇာတိမြေကို ကယ်တင်ရာတွင် ပါဝင်ကူညီခဲ့ကြောင်း ပြောကြားခဲ့သည်။]

[သူမကို သူမကမ္ဘာ မရှိတော့ပေမယ့် ကြယ်ပြာကတော့ ရှိနေသေးကြောင်း၊ ဒီကမ္ဘာက လူသားမျိုးနွယ်တွေရဲ့ အသက်ပေါင်းများစွာကို သင်တတ်နိုင်သလောက် ကယ်တင်ချင်ကြောင်း သင် ပြောပြခဲ့သည်။]

[အရိပ် စောင့်ရှောက်သူက သင့်ခံစားချက်များကို နားလည်ပါသည်။ ထို့ကြောင့် သင်နှင့် မဟာမိတ်ဖွဲ့မှုကို ဆက်လက် လုပ်ဆောင်ရန် သူမ ပြင်ဆင်ထားသည်။ ဒီတစ်ခါမှာတော့ သင်တို့နှစ်ဦးတွင် ဘုံရည်မှန်းချက်တစ်ခု ရှိပါသည်။ ယင်းမှာ ထူးဆန်းတဲ့ သားရဲများကြောင့် ဒီကမ္ဘာပျက်စီးမှုကို တတ်နိုင်သမျှ ကြာအောင် ဆိုင်းငံ့ထားဖို့ပင်။]

[ဒသမနှစ်တွင် သင်သည် တစ်နှစ်လုံးလုံး အနှစ်သာရ အားဖြည့် ဆေးလုံးများနှင့် ကိုယ်တွင်းအင်္ဂါ သန့်စင်ဆေးလုံးများကို ဖော်စပ်ခဲ့သည်။ ခွန်အားတိုးတက်မှု မြန်ဆန်သောကြောင့် သင်၏ဆေးလုံး ဖော်စပ်နှုန်းသည် ယခင်ကထက် များစွာ မြင့်တက်လာခဲ့သည်။ တစ်နှစ်အတွင်း သင်သည် ကိုယ်တွင်းအင်္ဂါ သန့်စင်ဆေးလုံး ငါးသောင်းကို ဖော်စပ်ခဲ့သည်။]

[ဆယ့်တစ်နှစ်မြောက်တွင်မူ သင်သည် ထိုနေရာတွင်ပင် မရပ်တန့်ခဲ့ပါ။ နှစ်ပေါင်းများစွာ အရိပ် စောင့်ရှောက်သူ၏ ရာထူးကို အခွင့်ကောင်းယူကာ ဆင်းသက်ဂိုဏ်း၏ ဘဏ္ဍာတိုက်ကို လုံးဝနီးပါး အလွတ်ဖြစ်အောင် လုပ်ခဲ့သည်။ ယခုနှစ်တွင် သင်သည် အနှစ်သာရ အားဖြည့် ဆေးလုံး ငါးသောင်းကို ထပ်မံ ဖော်စပ်ရန် တစ်နှစ်လုံးလုံး အချိန်ကုန်ခဲ့သည်။]

[သင်၏ သရုပ်ပြခြင်းများနှင့် အတွေ့အကြုံများအရ နတ်ဆိုး နှိမ်နှင်းရေး အကျဉ်းခန်းသည် နောက်နှစ်တွင် အပြောင်းအလဲ ဖြစ်ပေါ်သင့်ကြောင်း သင်သိသည်။ နတ်ဆိုး နှိမ်နှင်းရေး အကျဉ်းခန်း ကျဆုံးသွားသည်နှင့် လူသားမျိုးနွယ်သည် ကယ်တင်နိုင်တော့မည် မဟုတ်ပေ။ နတ်ဆိုး နှိမ်နှင်းရေး အကျဥ်းခန်း မကျဆုံးမီ ဆေးလုံးများကို စစ်တပ်၏ အထက်ပိုင်း အရာရှိများထံ ပို့ဆောင်ရမည်။]

[သင်သည် စုစုပေါင်း အနှစ်သာရ အားဖြည့် ဆေးလုံးများနှင့် ကိုယ်တွင်းအင်္ဂါ သန့်စင်ဆေးလုံး တစ်သိန်းကို ပိုင်ဆိုင်ထားသည်။ ထိုပမာဏသည် ရှားနိုင်ငံရှိ ဂရန်းမာစတာအဆင့် ကျွမ်းကျင်သူ အရေအတွက်ကို ခြောက်လအတွင်း နှစ်ဆ တိုးစေနိုင်စွမ်း ရှိသည်။]

[သင်သည် သင်၏ ဆုံးဖြတ်ချက်ကို ချပြီးဖြစ်သည်။ ဤဆေးလုံးများကို ရှားနိုင်ငံ၏ စစ်တပ်သို့ ပို့ဆောင်ပြီးသည်နှင့် သင်သည် ဖမ်းဆီးခံရသည်ဖြစ်စေ၊ မခံရသည်ဖြစ်စေ ဆင်းသက်ဂိုဏ်းမှ ချက်ချင်း ထွက်ခွာပြီး သင်၏ကိုယ်ပိုင် ကျင့်ကြံမှုကို ပိုမိုမြှင့်တင်ရန်ကိုသာ အာရုံစိုက်ရန် စီစဉ်ထားသည်။]

[မထွက်ခွာမီ သင်သည် အရိပ် စောင့်ရှောက်သူကို တွေ့ဆုံခဲ့သည်။ သူမသည် သင့်ခရီးစဉ်၏ ရည်ရွယ်ချက်ကို နားလည်ပုံရပြီး သင့်အား ကံကောင်းပါစေဟု ဆုတောင်း ပေးခဲ့သည်။]

[ခွဲခွာခါနီးတွင် အရိပ် စောင့်ရှောက်သူသည် တုံ့ဆိုင်းသွားပြီးမှ သူမ၏အမည်မှာ လောရွှေရင် ဖြစ်ကြောင်း သင့်အား ပြောပြခဲ့သည်။]

ဆူရှင်းသည် ဤအရာကို ဖတ်ပြီးနောက် ခဏရပ်တန့်ကာ သူ့ဘာသာသူ တီးတိုးရေရွတ်လိုက်သည်။ “လောရွှေရင်…”

[သင်သည် သင်၏ ကိုယ်ပိုင် လမ်းကြောင်းများ မှတစ်ဆင့် လုယွမ်ဝူကို အလျင်အမြန် ရှာဖွေတွေ့ရှိခဲ့သည်။ လုယွမ်ဝူသည် အနည်းငယ် ပိန်ချုံးနေပုံရသော်လည်း သူ၏လက်မောင်းမှာမူ မပျက်စီးသေးပေ။ ဆိုလိုသည်မှာ နတ်ဆိုး နှိမ်နှင်းရေး အကျဉ်းခန်းသည် အခက်အခဲ တွေ့နေရသော်လည်း ပြိုလဲလုနီးပါး အခြေအနေသို့ မရောက်သေးဟု ဆိုလိုသည်။]

[လုယွမ်ဝူက သင်၏ရည်ရွယ်ချက်ကို မေးမြန်းခဲ့သည်။ အတိုချုပ် ရှင်းပြပြီးနောက် သင်သည် သိုလှောင်လက်စွပ်ကို လုယွမ်ဝူအား ပေးအပ်ကာ ဆေးနှစ်မျိုးကို မည်သို့ အသုံးပြုရမည် ဖြစ်ကြောင်း ညွှန်ကြားခဲ့သည်။]

[သင်၏ ရှင်းပြချက်ကို ကြားပြီးနောက် လုယွမ်ဝူ၏ မျက်လုံးများတွင် မယုံကြည်နိုင်ခြင်းများ ပြည့်နှက်နေသည်။ ဤသာမန် ဆေးလုံးများသည် ပညာရှင်တစ်ဦး၏ ရုပ်ပိုင်းဆိုင်ရာနှင့် စိတ်ပိုင်းဆိုင်ရာ အရည်အသွေးများကို တိုးတက်စေပြီး ဂရန်းမာစတာ အဆင့်သို့ တိုးတက်ရန် အခွင့်အလမ်းကို တိုးမြှင့်ပေးနိုင်မည်လော။ သို့သော် ထိုအချိန်တွင် သူ၌ အခြား ရွေးချယ်စရာ မရှိတော့ဘဲ သေနေသောမြင်းကိုသာ အသက်ရှင်နေသကဲ့သို့ ဆက်ဆံရတော့မည် ဖြစ်သည်။]

[ဆေးလုံးများကို ပေးအပ်ပြီးနောက် ဆင်းသက်ဂိုဏ်းက မသိသေးသည်ကို အခွင့်ကောင်းယူကာ သင်သည် သင်၏မိဘများကို လျှို့ဝှက်စွာ သွားရောက် တွေ့ဆုံခဲ့သည်။ ၎င်းတို့အား အန္တရာယ်ပြုမည်ကို စိုးရိမ်သောကြောင့် သင်သည် ဝိဉာဉ်စိုက်ခင်း ကောင်းချီးမြေသို့ တိတ်တဆိတ် ဝင်ရောက်ခဲ့သည်။]

[ဆယ့်နှစ်နှစ်မြောက်တွင် လောက၏ ပူပင်သောကများမှ လွတ်မြောက်သော သင်သည် ကျင့်ကြံမှု အတွက် အချိန် ပိုပေးနိုင်ခဲ့သည်။]

[ဝမ်းနည်းစရာမှာ သန္ဓေတည် ဝိညာဉ်အဆင့်သို့ တိုးတက်ပြီးနောက် ကျင့်ကြံမှု အရှိန်သည် သိသိသာသာ နှေးကွေးသွားကြောင်း သင်ထင်ရှားစွာ ခံစားခဲ့ရသည်။ ယခင်က ရွှေအမြု‌တေ အဆင့် ပထမအလွှာမှ ဒုတိယအလွှာသို့ တက်လှမ်းခြင်းသည် ရေဇလုံတစ်ခုကို ရေဖြည့်သကဲ့သို့ဖြစ်ခဲ့လျှင် ယခု သန္ဓေတည် ဝိညာဉ်အဆင့်တွင် ဤဇလုံသည် စည်ပိုင်းကြီးတစ်ခုအဖြစ် ပြောင်းလဲသွားခဲ့သည်။ အနည်းငယ် တိုးတက်မှုရရှိရန် အတွက် ဤစည်ပိုင်းကို အပြည့်ဖြည့်ရန် လိုအပ်သည်။]

[ဝိဉာဉ်စိုက်ခင်း ကောင်းချီးမြေသို့ မဝင်ရောက်မီ သင်သည် သင်၏အနာဂတ် ကျင့်ကြံမှုအတွက် လုံလောက်လိမ့်မည်ဟု ယုံကြည်ကာ အနှစ်သာရ အားဖြည့် ဆေးလုံးနှင့် စိတ်ဓာတ် ဖြည့်တင်းသော ဆေးလုံး ထောင်ချီကို ချန်ထားခဲ့သည်။]

[သို့သော် သန္ဓေတည် ဝိညာဉ်အဆင့်တွင် ကျင့်ကြံရန် လိုအပ်သော အရင်းအမြစ်များသည် သင်ထင်ထားသည်ထက် များစွာ သာလွန်ကြောင်း သင်တွေ့ရှိခဲ့သည်။ အကယ်၍ သင်သည် နေ့စဉ် အနှစ်သာရ အားဖြည့် ဆေးလုံးများကို သကြားလုံးကဲ့သို့ သောက်သုံးခဲ့လျှင်ပင် သင်၏ ဝိဉာဉ်စွမ်းအင်ကို သန့်စင်စေပြီး တိုးပွားစေသည့် အာနိသင်မှာ အတော်လေး အကန့်အသတ်ရှိသည်။]

[သင်အံ့အားသင့်သွားသည်မှာ စိတ်ဓာတ် ဖြည့်တင်းသော ဆေးလုံး၏ အာနိသင်သည် မမျှော်လင့်ဘဲ ကောင်းမွန်ခြင်း ဖြစ်သည်။ သင်သည် သင်၏ စိတ်ကူးဉာဏ်နှင့် ဝိဉာဉ်အာရုံကို မြှင့်တင်ရန်အတွက် ရွှေအမြုတေ အဆင့်တွင်လည်း စိတ်ဓာတ် ဖြည့်တင်းသော ဆေးလုံးများကို သောက်သုံးခဲ့သည်။]

[ရွှေအမြုတေ အဆင့်နှင့် နှိုင်းယှဉ်ပါက သန္ဓေတည် ဝိညာဉ်အဆင့်တွင် ဝိဉာဉ်အာရုံ တိုးတက်မှုသည် ပို၍ပင် အရေးကြီးသည်။ အကြောင်းမှာ ချန်ချွန်း နည်းလမ်း၏ မှတ်တမ်းများအရ သန္ဓေတည် ဝိညာဉ်အဆင့်ရှိ ကျင့်ကြံသူ အားလုံးသည် ၎င်းတို့၏ ဝိဉာဉ်အာရုံကို စေ့စေ့စပ်စပ် ပေါင်းစည်းရန် လိုအပ်သောကြောင့် ဖြစ်သည်။]

[ရွှေအမြုတေ ကျင့်ကြံသူများသည် ၎င်းတို့၏ ခန္ဓာကိုယ်မှ ဝိဉာဉ်အာရုံသည် အကွာအဝေး တစ်ကျန်း (မီတာ ၃.၃ ခန့်) သာရှိသော်လည်း သန္ဓေတည် ဝိညာဉ် ကျင့်ကြံသူများသည် ၎င်းတို့၏ ဝိဉာဉ်အာရုံကို ဆယ်ကျန်း သို့မဟုတ် ဆယ်ဂဏန်းကျန်း အထိပင် တိုးချဲ့နိုင်သည်။]

[ဆယ့်သုံးနှစ်မြောက်တွင် သင်သည် သင်၏ နေ့စဉ် ကျင့်ကြံမှုကို နှစ်ပိုင်း ခွဲခဲ့သည်- ပထမပိုင်းသည် သင်၏ ဝိဉာဉ်စွမ်းအင်နှင့် ကျင့်ကြံမှု အဆင့်ကို မြှင့်တင်ရန် ဖြစ်ပြီး ဒုတိယပိုင်းသည် သင်၏ ဝိဉာဉ်အာရုံ နယ်ပယ်ကို တိုးတက်စေရန် ဖြစ်သည်။]

[တစ်နေ့တွင် သင်သည် သန္ဓေတည် ဝိညာဉ်အဆင့်သို့ တိုးတက်ပြီးနောက် ခက်ခဲသော ပြဿနာတစ်ခုကို ကြုံတွေ့ရကြောင်း သဘောပေါက်လာသည်။ သင်၏ ကျင့်ကြံမှုအဆင့် ဆက်လက် မြင့်တက်လာသည်နှင့်အမျှ ဝိဉာဉ်စိုက်ခင်း ကောင်းချီးမြေရှိ နတ်စွမ်းအင်သည် တဖြည်းဖြည်း ပါးလွှာလာသည်ဟု သင် ခံစားခဲ့ရသည်…]

…