ခရမ်းရောင် စွမ်းရည်၊ ဓားစွဲလမ်းမှု။

မျက်စိရှေ့တွင် ပေါ်လာသည့် စွမ်းရည် အသစ်ကို မြင်လိုက်ရသောအခါ စုရှင်းသည် မျက်ခုံးပင့်လိုက်သည်။

“ဒါက ငါ ဓားနဲ့ပတ်သက်တဲ့ အရည်အချင်းကို ဆွဲထုတ်မိတာ သုံးကြိမ်မြောက်ပဲ။ ဒါဟာ... ငါက ဓားနဲ့ပတ်သက်ပြီးတော့ ပင်ကို ပါရမီထူးခြားသူ ဖြစ်ပြီး အမြင့်မြတ်ဆုံး ဓားနတ်ဘုရား ဖြစ်လာဖို့ ကံကြမ္မာက ဖန်တီးထားတာများလား?”

အစပိုင်း ဓားကျင့်စဉ် စွမ်းရည်မှ ဓားကျင့်စဉ် ထူးချွန်သူအထိ။ ယခုပင်လျှင် စုရှင်းသည် ခရမ်းရောင်အဆင့် ဓားစွဲလမ်းသူ စွမ်းရည်ကို ထုတ်ယူနိုင်ခဲ့သည်။

စကားပုံ ရှိသည့်အတိုင်း “အရာရာ သုံးကြိမ်မြောက်မှ အထမြောက်သည်” ဟူသောကြောင့် စုရှင်းသည် ဤတစ်ကြိမ်တွင် စိတ်လှုပ်ရှားသွားသည်။

သို့သော် စုရှင်းသည် ဓားသိုင်း လေ့ကျင့်နည်းများ သို့မဟုတ် လျှို့ဝှက်ကျမ်းစာများ မရှိသောကြောင့် အနည်းငယ် စိတ်ရှုပ်ထွေးနေသည်။ သူသည် ဓားသိုင်းကို မည်သို့ လေ့ကျင့်နိုင်မည်နည်း?

ထိုအချိန်တွင် စုရှင်းသည် စွမ်းရည်၏ ဖော်ပြချက်မှ စာကြောင်း တစ်ကြောင်းကို သတိပြုမိလိုက်သည်။ “ဓားလေ့ကျင့်သည့် ကိုးနှစ်မြောက်တွင် သင်သည် သေစေနိုင်သော ဓားဆယ့်သုံးချက်ကို နားလည်လိမ့်မည်!”

“ဒါဆို ဒါက ငါကိုယ်တိုင် ဓားသိုင်းတွေကို နားလည်နိုင်တယ်ဆိုတဲ့ အဓိပ္ပာယ်လား။ အဲဒီလိုဆိုရင် ဒီစွမ်းရည်က မရှိမဖြစ် လိုအပ်တာပဲ!”

စုရှင်း၏ နှလုံးသားသည် ထိုအတွေးကြောင့် တဒုတ်ဒုတ် ခုန်နေခဲ့သည်။

“ငါက ကျင့်ကြံခြင်း နည်းလမ်းကို နားလည်နိုင်မလား ဆိုတာကို စမ်းကြည့်ရင် မကောင်းဘူးလား?”

စုရှင်းသည် သူ၏အာရုံကို သရုပ်ပြခြင်းဘက်သို့ လှည့်လိုက်သည်။

[ဝိညာဉ်စိုက်ခင်း ကောင်းချီးမြေတွင် သင်သည် သရုပ်ပြခြင်း တစ်ခုတွင် ရှိနေကြောင်း သိလိုက်သည်။]

[ရုတ်တရက် သင်သည် ဓားကို အလွန်အမင်း စိတ်ဝင်စားလာပြီး သင်၏ သို‌လှောင် လက်စွပ်မှ အပြာရောင်အဆင့် ဓားအမျိုးအစား လက်နက် တစ်ခုကို ထုတ်ယူလိုက်သည်။]

[ဓားကို ကိုင်ထားလိုက်သောအခါ သင်သည် ဓားအတွက် မွေးဖွားလာသူဟု ယုံကြည်ကာ နှလုံးသားထဲတွင် ဂုဏ်ယူဝင့်ကြွားမှုများ ပြည့်လျှံလာသည်။]

[ထို့ကြောင့် သင်သည် ဓားသိုင်းကို ကြိုးစားအားထုတ်၍ လေ့ကျင့်တော့သည်။]

[ဤလေ့ကျင့်မှုသည် သုံးလကြာခဲ့သည်။]

[ထိုသုံးလအတွင်း သင်သည် သင်၏ နေ့စဉ် အဂ္ဂိရတ် လေ့ကျင့်မှုများအပြင် သင်၏ စွမ်းအင်နှင့် အာရုံ အားလုံးကို ဓားကျင့်စဉ်တွင် မြှုပ်နှံထားခဲ့သည်။]

[သင်သည် ယခင်က ဓားနှင့် ထိတွေ့မှု များများစားစား မရှိခဲ့သော်လည်း ယခု စတင်သည့်အခါ အလွန် လွယ်ကူကြောင်း တွေ့ရှိခဲ့သည်။ သုံးလအတွင်း သင်သည် ဓားကို အကြိမ်ပေါင်း သောင်းနှင့်ချီ၍ ဝှေ့ယမ်းခဲ့ပြီး အွန်လိုင်းတွင် တွေ့ရှိရသော အခြေခံ ဓားသိုင်းနည်း အချို့ကို ကျွမ်းကျင်ခဲ့သည်။]

[ရက်အနည်းငယ် အတွင်း သင်သည် ဓားသိုင်း၏ အခြေခံများကို ကျွမ်းကျင်ခဲ့သည်- ထိုးခြင်း၊ ခုတ်ခြင်း၊ ကာကွယ်ခြင်းနှင့် ရိုက်ခတ်ခြင်းတို့ဖြစ်သည်။ သင်သည် ပိုမိုအဆင့်မြင့်သော ဓားသိုင်းများကို လေ့ကျင့်လိုသော ဆန္ဒကြောင့် မကျေမနပ် ဖြစ်လာခဲ့သည်။]

[ထို့ကြောင့် သင်သည် သာလွန် ကောင်းမွန်သော ဓားသိုင်းကို သင်ယူရန် မျှော်လင့်လျက် လောထျန်း အစည်းအဝေးသို့ သွားရန် ဆုံးဖြတ်ခဲ့သည်။]

သူ မြင်တွေ့ခဲ့ရသည့် အရာများကြောင့် စိတ်လှုပ်ရှားသွားသော စုရှင်းသည် သူ့ကိုယ်သူ ပြောလိုက်သည်။

“နှစ်နာရီကြာ မြှုပ်နှံ သရုပ်ပြခြင်း လုပ်ဆောင်ချက်ကို စတင်ပါ။”

[ဒင်၊ သင်သည် မြှုပ်နှံ သရုပ်ပြခြင်းကို အောင်မြင်စွာ အသုံးပြုပြီးပါပြီ။ စွမ်းအင်အမှတ် ၂၀၀,၀၀၀ ကုန်ကျခဲ့ပြီး သရုပ်ပြချိန် ၂ နာရီ၊ ကျန်ရှိသော စွမ်းအင်အမှတ် ၁၅,၅၀၃,၈၈၈]

သရုပ်ပြစက်မှ အချက်ပြသံသည် စုရှင်း၏ နားထဲတွင် မြည်လာသည်။

နောက်တစ်စက္ကန့်တွင် စုရှင်း၏ ပုံရိပ်သည် သူ၏နေရာမှ ပျောက်ကွယ်သွားပြီး လောထျန်း အစည်းအဝေးသို့ ရောက်ရှိသွားသည်။

၎င်းသည် ရင်းနှီးပြီးသား လုပ်ငန်းစဉ်ပင် ဖြစ်သည်။ စုရှင်းသည် သူ၏ ဦးလေး ရှန်းနန်ကို ဆရာနှင့် တွေ့ဆုံရန် ခေါ်ဆောင်သွားသည်။

ထိုအချိန်တွင် စုရှင်းသည် ဦးလေး ရှန်းနန်ကို ဓားသိုင်း အကြောင်း မေးမြန်းခဲ့သော်လည်း ရှန်းနန် ယိုထျန်းသည် လယ်သမား ဖြစ်သောကြောင့် ပင်ကိုယ်အားဖြင့် ၎င်းအကြောင်းကို ဘာမှမသိပေ။

ထို့ကြောင့် စုရှင်းသည် မိမိနှင့် ကိုက်ညီသော ဓားကျင့်စဉ်ကို ရှာဖွေရန် အတွက် စာကြည့်တိုက်သို့ သွားရွေးရန်မှ တစ်ပါး အခြား မရှိတော့ပေ။

မကြာမီ စုရှင်းသည် စာကြည့်တိုက်တွင် သူ၏ ပစ်မှတ်စာရင်းတွင် ပါသည့် ရှေးဟောင်းကျမ်းစာ တစ်စောင်ကို တွေ့ရှိခဲ့သည်—”ဓားကျင့်စဉ် အကျဉ်းချုပ်” ဖြစ်သည်။

ထိုစာအုပ်၏ အမည်မှာ သာမန် ဖြစ်သော်လည်း ဓားသမားများ အတွက် မရှိမဖြစ် လိုအပ်သည့် အခြေခံ စာအုပ်တစ်အုပ် ဖြစ်သည်။ အကြောင်းရင်းမှာ လွန်ခဲ့သော နှစ်ပေါင်းသောင်းချီက ကမ္ဘာကျော် ဓားနတ်ဘုရား လူတုံ ရေးသားခဲ့ခြင်းကြောင့် ဖြစ်သည်။

ဤ ဓားကျင့်စဉ် အကျဉ်းချုပ်တွင် ဓားလေ့ကျင့်မှု၏ အခြေခံအားလုံး ပါဝင်သည်။ ဤအကျဉ်းချုပ်ကို အပြည့်အဝ နားလည်ထားသရွေ့ အနာဂတ်တွင် မည်သည့် အဆင့်မြင့် ဓားသိုင်းကိုမဆို လေ့လာရန် လွယ်ကူလိမ့်မည်ဟု ဆိုနိုင်သည်။

မကြာမီ စုရှင်းသည် ဤအကျဉ်းချုပ်ပါ ကျင့်ကြံခြင်းတွင် နစ်မြောသွားသည်။

နှစ်နာရီ ကြာမြင့်သွားပြီး နမြှုပ်နှံ သရုပ်ပြချိန် ကုန်ဆုံးလု နီးသောအခါ စုရှင်းသည် ထပ်မံ သက်တမ်းတိုးရန် မဆိုင်းမတွ ဆုံးဖြတ်လိုက်သည်။

[ဒင်၊ သင်သည် မြှုပ်နှံ သရုပ်ပြခြင်းကို အောင်မြင်စွာ အသုံးပြုပြီးပါပြီ။ စွမ်းအင်အမှတ် ၂.၂ သန်း ကုန်ကျပါသည်။ သရုပ်ပြချိန် ၂၂ နာရီ၊ ကျန်ရှိသော စွမ်းအင်အမှတ် ၁၃,၃၀၃,၈၈၈]

ယခုအခါ လုံလောက်သော အချိန်ရှိသောကြောင့် စုရှင်းသည် ဓားကျင့်စဉ် အကျဉ်းချုပ်တွင် လုံးဝ နစ်မြောသွားသည်။

အစပိုင်းတွင် နားမလည်နိုင်ခြင်းမှသည် တဖြည်းဖြည်း နားလည်လာခြင်း ထို့နောက် အတိုင်းအတာ တစ်ခုအထိ ထိုးထွင်း သိမြင်လာခြင်းအထိ စုရှင်းသည် အကျဉ်းချုပ်ပါ ဓားသိုင်းပညာကို အလွန်အမင်း စုပ်ယူခဲ့သည်။

ဆက်တိုက် လေ့လာခြင်းဖြင့် စုရှင်း၏ ဓားသိုင်းအပေါ် နားလည်နိုင်စွမ်းသည် လျင်မြန်စွာ တိုးတက်လာသည်။

အချိန် အတိုင်းအတာ တစ်ခု ကြာပြီးနောက် စုရှင်းသည် မျက်လုံး ပြန်ဖွင့်လိုက်သောအခါ သူသည် တကယ့်ကမ္ဘာသို့ ပြန်ရောက်နေပြီ ဖြစ်သည်။ သို့သော်လည်း သူသည် ထိုအချက်ကို ဂရုမစိုက်ခဲ့ပေ။

“ဟမ်... ငါ ဘယ်အချိန်က တကယ့်ကမ္ဘာကို ပြန်ရောက်လာတာလဲ... မြှုပ်နှံသရုပ်ပြခြင်း ပြီးသွားတာကို ငါ ဘာလို့ မသိလိုက်တာလဲ?”

စုရှင်း၏ မျက်လုံးများ ပြူးကျယ်သွားပြီး သူသည် အံ့ဩတကြီး ရေရွတ်လိုက်သည်။

“ဒါက.... ငါ ဉာဏ်အလင်းရတဲ့ အခြေအနေကို ရောက်သွားတာများလား?”

စုရှင်းသည် သူ၏စိတ်ထဲရှိ မှတ်ဉာဏ်များကို ပြန်လည် အောက်မေ့နေစဉ် သူသည် ဓားသိုင်း နိယာမ၏ ကျွမ်းကျင်သူတစ်ဦး ဖြစ်လာသကဲ့သို့ ခံစားလိုက်ရသည်။

“ဒါဆို ငါက ဓားရူး စွမ်းရည်ကို ပိုင်ဆိုင်ထားပြီး ဓားကျင့်စဉ် အကျဉ်းချုပ်ကို လေ့လာတဲ့အခါ မတော်တဆ ဉာဏ်အလင်းရတဲ့ အခြေအနေကို လှုံ့ဆော်လိုက်မိတာကြောင့်... ဒီလို တိုးတက်မှုမျိုး ရခဲ့တာလား?”

စုရှင်းသည် ယုံကြည်ရန် ခက်ခဲနေသည်။ ထိုကဲ့သို့သော တိုက်ဆိုင်မှုမျိုးသည် သူ့အတွက် အမှန်တကယ် ဖြစ်ပျက်ခဲ့ပြီး မြှုပ်နှံ သရုပ်ပြနေစဉ် ဉာဏ်အလင်းရသော စွမ်းရည်ကို လှုံ့ဆော်နိုင်ခဲ့သည်။

တစ်နေ့တာ ဉာဏ်အလင်းရခြင်းသည် ဆယ်နှစ်တာ ကျင့်ကြံခြင်းနှင့် ညီမျှသည်ဟု ယူဆပါက စုရှင်းသည် အနည်းဆုံး ဓားသိုင်း နိယာမကို ဆယ်စုနှစ်ကြာ လေ့လာခဲ့သော ကျွမ်းကျင်သူတစ်ဦးနှင့် ညီမျှပေလိမ့်မည်။

“ဟားဟား ငါ တကယ် ကံကောင်းတာပဲ... ငါ့စိတ်ထဲမှာ ဓားသိုင်းပညာက ငါ့အတွက် အချိန်အတော်ကြာတဲ့ထိ အစာကြေနိုင်လောက်တယ် မဟုတ်လား?”

မျက်လုံးမှိတ်ပြီး ပြန်လည် စဉ်းစားလိုက်သောအခါ ဓားကျင့်စဉ် အကျဉ်းချုပ်သည် သာမန်ဓားကို လူ၊ မြေ၊ ကောင်းကင်—ဓားသုံးမျိုးဖြင့် ပိုင်းခြားထားသည်။

လူဓားကို ကျွမ်းကျင်ပါက ကမ္ဘာပေါ်ရှိ မည်သည့် ရန်သူကိုမဆို သတ်ဖြတ်နိုင်သည်; မသတ်နိုင်သူ တစ်ဦးတစ်ယောက်မျှ ရှိမည် မဟုတ်ပေ။

မြေဓားသည် ကောင်းကင်နှင့် မြေကြီး၏ အရှိန်အဟုန်ကို အသုံးပြု၍ ဖန်ဆင်းခြင်းဓားကို ဖန်တီးသည်။ တစ်ချက် ခုတ်ရုံဖြင့် နက္ခတ္တ ဖြစ်စဉ်များကို ပြောင်းလဲစေနိုင်သည်။ တောင်များကို ပြိုလဲစေနိုင်သည် သို့မဟုတ် ဆူနာမီများကို ဖြစ်ပေါ်စေနိုင်သည်။

နောက်ဆုံးအဆင့်ဖြစ်သော ကောင်းကင်ဓားကို ကျွမ်းကျင်ပါက ဓားနတ်ဘုရား၏ တာအိုသို့ တိုက်ရိုက် ဝင်ရောက်ခွင့် ရရှိမည် ဖြစ်သည်။

မြှုပ်နှံ သရုပ်ပြနေစဉ် စုရှင်းသည် ဓားကျမ်းကို တစ်ရက်ကြာ လေ့လာခဲ့ပြီး ဆယ်နှစ်ကြာ ဓားကျင့်စဉ် အကျဉ်းချုပ်ကို လေ့လာခြင်းနှင့် ညီမျှသော ဉာဏ်အလင်းကို ရရှိခဲ့သည်။ သူသည် ကျယ်ပြောလှသော ပထမပိုင်းကိုသာ အနည်းငယ် ဖတ်ရှုပြီးခဲ့သည်။

ထို့နောက် စုရှင်းသည် မြှုပ်နှံ သရုပ်ပြခြင်းမှ ထွက်လာခဲ့သည်။

သို့သော် ပထမပိုင်း ဖြစ်သော လူဓားကို လေ့ကျင့်ရုံဖြင့် စုရှင်းသည် အချိန်အတော်ကြာ အစာကြေနိုင်လောက်သည်။

“ငါ့ရဲ့ လူဓားကျင့်စဉ်ကို အပြည့်အဝ ကျွမ်းကျင်နိုင်ရင် သန္ဓေတည် ဝိညာဉ်နဲ့ နတ်ဘုရား အသွင်ပြောင်းခြင်းကို ငါ တကယ် ယှဉ်ပြိုင်နိုင်လောက်တယ် မဟုတ်လား?”

အံ့အားသင့်မှုသည် စုရှင်း၏ မျက်နှာပေါ်တွင် အရောင်ခြယ်သကဲ့သို့ ထင်ရှားလာပြီး မျှော်လင့်ချက်၏ အရိပ်အယောင်လည်း သန်းနေခဲ့သည်။

ဘယ်လူငယ်က ကမ္ဘာအထက်တွင် တစ်ကိုယ်တည်း ရပ်တည်ကာ အဖြူရောင်ဝတ်ဆင်ပြီး နတ်ဓားကို ကိုင်ဆောင်ထားသော ဓားနတ်ဘုရားတစ်ပါး ဖြစ်လာရန် အိပ်မက် မမက်ဖူးလို့လဲ?

စုရှင်းပင်လျှင် ထိုအထဲတွင် ပါဝင်သည်။

ဤသို့ တွေးတောပြီး စုရှင်း၏ မျက်နှာသည် တက်ကြွမှုကြောင့် ရဲရဲနီလာကာ သရုပ်ပြခြင်းများကို စတင်ရန် စိတ်အားထက်သန်နေသည်။

[သင်သည် ဓားသိုင်းကို လေ့ကျင့်ရန် စိတ်အားထက်သန်စွာဖြင့် လောထျန်း အစည်းအဝေးမှ ထွက်လာခဲ့သည်။]

[ထို့ကြောင့် သင်သည် နေ့စဉ် ခြောက်နာရီကြာ အခြေခံအကျဆုံး ဓားသိုင်းများကို လေ့ကျင့်ကာ သင်၏ နားလည်မှုထဲသို့ ပေါင်းစပ် ထည့်သွင်းခဲ့သည်။]

[သုံးလအကြာတွင် ဝမ့်ချင်းရွှမ်သည် သင့်ကို တွေ့ရှိခဲ့သည်။]

[သင်၏ ဓားလေ့ကျင့်မှုကို မလိုလားဘဲ ရပ်ဆိုင်းပြီးနောက် တစ်ညအကြာတွင် ဝမ့်ချင်းရွှမ်နှင့်အတူ ဆင်းသက်ဂိုဏ်းသို့ ဝင်ရောက်ခဲ့သည်။]

[ဂိုဏ်းအတွင်း၌ သင်သည် ထူးခြားသော ခွန်အားနှင့် အံ့မခန်း အဂ္ဂိရတ် စွမ်းရည်များကို ပြသခဲ့ပြီး သင်ဆန္ဒရှိသည့်အတိုင်း လောရွှေရင်၏ အဖွဲ့သို့ အောင်မြင်စွာ ဝင်ရောက်ခဲ့သည်။]

[နောက်တစ်နေ့တွင် သင်သည် လောရွှေရင်အား လျှို့ဝှက်စကားကို ပြောကြားပြီး သူမ၏ ယုံကြည်မှုကို ရရှိခဲ့သည်။]

[လောရွှေရင်သည် သင့်အား ဆေးဖက်ဝင် ပစ္စည်းများစွာ ရရှိရန် ကူညီခဲ့ပြီး သင်သည် တစ်နေ့လျှင် နှစ်နာရီကြာ ၎င်းတို့ကို ဖော်စပ်ရန် အသုံးပြုခဲ့သည်။ သင်၏ ကျန်ရှိသော အချိန်များတွင် သင်သည် ကျင့်ကြံခြင်းကို လုပ်ဆောင်ခဲ့သည်။]

[ဒုတိယနှစ်တွင် သင်သည် 'ဆေးဝါးအကြီးအကဲ' ဟူသော လျှို့ဝှက်အမည်ဖြင့် ဆင်းသက်ဂိုဏ်း၏ ၁၈ ယောက်မြောက် အကြီးအကဲ ဖြစ်လာခဲ့သည်။]

[သင်သည် ဓားသိုင်းလေ့ကျင့်မှုကို ပိုမိုအလေးထားခဲ့ပြီး သင်၏ တိုက်ခိုက်နိုင်စွမ်းကို လျင်မြန်စွာ မြှင့်တင်ခဲ့သည်။]

[သင်၏စိတ်ထဲရှိ ဓားကျင့်စဉ် အသိပညာသည် ရေရှည်လေ့ကျင့်ရန် လုံလောက်သောကြောင့် သင်သည် လောထျန်း အစည်းအဝေးသို့ ပြန်လည် ဝင်ရောက်ရန် မရွေးချယ်ခဲ့ပါ။]

[တတိယနှစ်တွင် သင်နှင့် လောရွှေရင်တို့သည် ဆင်းသက်ဂိုဏ်းမှ ခွဲထွက်ခဲ့ပြီး ဂိုဏ်း၏ အဖိုးတန်ပစ္စည်း အများစုကို ယူဆောင်သွားခဲ့သည်။]

[ဆင်းသက်ဂိုဏ်း၏ အုပ်ထိန်းသူများနှင့် အကြီးအကဲ အချို့သည် သင်တို့ကို လိုက်လံ ဖမ်းဆီးခဲ့ကြသော်လည်း အချည်းနှီးသာ။ အဘယ်ကြောင့်ဆိုသော် သင်တို့သည် ရှားစစ်တပ်နှင့် မဟာမိတ်ဖွဲ့ပြီး ဖြစ်သောကြောင့် နောက်ဆုံးတွင် အခြေအနေကို ပြောင်းပြန်လှန်ကာ သင်တို့သည် သင်တို့ကို လိုက်လံဖမ်းဆီးသော အကြီးအကဲများနှင့် စောင့်ရှောက်သူများကို သတ်ဖြတ်ခဲ့ကြသည်။]

[စတုတ္ထနှစ်တွင် လုံလောက်သော ဝိညာဉ်စွမ်းအင်နှင့် နေ့စဉ် နဂါးဝိညာဉ်ဆေးများ သောက်သုံးခြင်းကြောင့် သင်၏ ကျင့်ကြံခြင်း အဆင့်သည် လျင်မြန်စွာ မြင့်တက်လာပြီး ဒုတိယအဆင့် သန္ဓေတည် ဝိညာဉ် ကျင့်ကြံသူ ဖြစ်လာခဲ့သည်။]

[ထိုနှစ်တွင်ပင် နေ့စဉ် ကိုယ်ကာယ လေ့ကျင့်မှုနှင့် ဓားသိုင်းလေ့ကျင့်မှု၊ ကြွယ်ဝသော အသားဓာတ်နှင့် မူလစစ်သည်တော် ဆေးများဖြင့် ဖြည့်စွက်ထားသောကြောင့် သင်၏ ကိုယ်ခန္ဓာ ကြံ့ခိုင်မှု ကျင့်ကြံခြင်း အဆင့်သည် မူလစစ်သည်တော် နယ်မြေ၏ အဋ္ဌမအဆင့်သို့ တက်ရောက်ခဲ့သည်။]

[ပဉ္စမနှစ်တွင် သင်သည် ဝိညာဉ်စုစည်း ဆေးများကို ဖော်စပ်ပြီး အချောသတ်ဆေးများကို လောရွှေရင်အား လက်ဆောင်ပေးခဲ့ပြီး ဝိညာဉ်မျိုးနွယ်စု၏ ခွန်အားကို သိသိသာသာ တိုးမြှင့်ပေးခဲ့သည်။]

[ထိုနှစ်တွင်ပင် လောရွှေရင်သည် ဒဏ္ဍာရီအဆင့် ကျွမ်းကျင်သူတစ်ဦး ဖြစ်လာခဲ့သည်။]

[ဆဋ္ဌမနှစ်တွင် သင်သည် ဓားလေ့ကျင့်မှုကို နေ့စဉ် နှစ်နာရီ ဆက်လက် ထိန်းသိမ်းခဲ့သော်လည်း သင်သည် ကျင့်ကြံခြင်းနှင့် အဂ္ဂိရတ် ပညာကို ပိုမိုအာရုံစိုက်ခဲ့သည်။]

[ဤနှစ်တွင် သင်သည် စုဆောင်းထားသော ဆေးဖက်ဝင် ပစ္စည်းများ အသုံးပြုကာ ရှားနိုင်ငံအား မဟာ မာစတာအဆင့် ထောင်ပေါင်းများစွာနှင့် ကောင်းကင်ဘုံ ဘုရင်အဆင့် ရာပေါင်းများစွာ ထပ်တိုးပေးခဲ့သည်။]

ဤအရာကို မြင်သောအခါ စုရှင်းသည် သဘောတူညီစွာ ခေါင်းညိတ်လိုက်သော်လည်း နက်နက်ရှိုင်းရှိုင်း ဆက်လက် စဉ်းစားနေခဲ့သည်။

“ခြောက်နှစ် ကြာသွားပြီ၊ ဆေးလုံးတွေ ချက်ဖို့ ဖိအားမရှိတော့ဘူး ဆိုတော့ နောက် ဘာလုပ်သင့်လဲ? ဓားလေ့ကျင့်တာ ဆက်လုပ်သင့်လား၊ ဒါမှမဟုတ် ငါ့ရဲ့ ကျင့်ကြံခြင်း အဆင့်ကို မြှင့်တင်သင့်လား?”

စုရှင်းသည် ဤကျယ်ပြန့်သော ဓားကျင့်စဉ်ကို ကျွမ်းကျင်ရန် မည်မျှ ခက်ခဲသည်ကို သေချာ မသိပါ။ သို့သော် ၎င်းကို ကျွမ်းကျင်ပါက နတ်ဘုရားတစ်ပါး ဖြစ်လာနိုင်သည် ဟူသော အချက်ကို ကြည့်ခြင်းအားဖြင့် အခက်အခဲမှာ အမှန်ပင် ကြီးမားမည် ဖြစ်သည်။

ဤဓားကျင့်စဉ်၏ ပထမပိုင်း ဖြစ်သော လူဓားကို ကျွမ်းကျင်ရန် မည်မျှ အချိန် လိုအပ်သည်ကို သူ မသိပေ။

အချိန် ရင်းနှီးမြှုပ်နှံမှု၏ မသေချာ မရေရာမှုက စုရှင်းကို တုံ့ဆိုင်းစေသော်လည်း လူဓားကို ကျွမ်းကျင်ပြီးနောက် တန်ခိုးအင်အား သိသိသာသာ တိုးလာမည် ဟူသော အတွေးက သူ၏ ဆုံးဖြတ်ချက်ကို ပြန်လည် ခိုင်မာစေခဲ့သည်။

"ငါ ဓားသိုင်းကို ဆက် လေ့ကျင့်ရမယ်! ဒါပေမယ့် အချိန်ကို ခွဲဝေရမယ်။ တစ်နေ့ကို လေးနာရီလောက်ဆို လုံလောက်ပြီ။ ကျန်တဲ့အချိန်နဲ့ ငါ့ရဲ့ ကျင့်ကြံခြင်း အဆင့်ကို မြှင့်တင်ဖို့ ကြိုးစားနိုင်တယ်။ အဲဒီလိုဆိုရင် ငါ ဓားသိုင်းမှာ ကျွမ်းကျင်မှု မရခဲ့ရင်တောင် ဆုံးရှုံးမှုမရှိဘဲ လုံလောက်တဲ့ ကျင့်ကြံခြင်း အဆင့်ကို ရနိုင်သေးတယ်။”

တစ်ချိန်တည်းတွင် စုရှင်းသည် သူ၏ ဓားလေ့ကျင့်မှု အတွင်း နောက်ထပ် ဉာဏ်အလင်း ရနိုင်သည် ဟူသော မျှော်လင့်ချက် အနည်းငယ်ကိုလည်း မြှုပ်နှံထားခဲ့ပြီး ၎င်းသည် ကြီးမားသော အောင်မြင်မှု တစ်ခု ဖြစ်လာလိမ့်မည်။

ဤစိတ်ထားဖြင့် စုရှင်းသည် သူ၏ သရုပ်ပြခြင်းများကို ဆက်လက် လုပ်ဆောင်ခဲ့သည်။

[သတ္တမနှစ်တွင် သင်သည် ဓားသိုင်း လေ့ကျင့်မှုကို တစ်နေ့လျှင် လေးနာရီ ဆက်လက် ပြုလုပ်ခဲ့သည်။ ထို့အပြင် သင်သည် နတ်ဘုရား အင်အားဆေးလုံးများ ဖော်စပ်ရန်လည်း ကြိုးစားခဲ့သည်။]

[သင်သည် ဝိညာဉ်စိုက်ခင်း ကောင်းချီးမြေတွင် စိုက်ပျိုးထားသော နတ်ဘုရား အင်အားနွယ်ပင်၏ အပိုင်းအစ တစ်ခုကို ဖြတ်တောက်ကာ ဆေးအတွက် အမှုန့် သေချာ ပြုလုပ်ပြီးနောက် နတ်ဘုရား အင်အားဆေးလုံး အတွက် ကျန် ပါဝင်ပစ္စည်းများကို ထုတ်ယူခဲ့သည်။ ပြင်ဆင်မှုများ ပြီးစီးသောအခါ သင်သည် ဖော်စပ်ခြင်း လုပ်ငန်းစဉ်ကို စတင်ခဲ့သည်။]

[သင်၌ နတ်ဘုရား အင်အားနွယ်ပင် အကန့်အသတ်သာ ရှိသောကြောင့် နတ်ဘုရား အင်အားဆေးလုံး အသုတ်ငါးရာခန့်သာ ဖော်စပ်နိုင်သည်ဟု ခန့်မှန်းထားသည်။ ထို့ကြောင့် သင်သည် အဂ္ဂိရတ် ထိုးရာတွင် အခွင့်အရေးတိုင်းကို တန်ဖိုးထားခဲ့သည်။]

[ပထမလတွင် သင်သည် တစ်နေ့လျှင် နတ်ဘုရား အင်အားဆေးလုံး တစ်သုတ် ဖော်စပ်ရန် ကြိုးစားခဲ့သည်။ ထိုလအတွင်း ကြိုးစားမှု သုံးဆယ်စလုံး ကျရှုံးခဲ့ပြီး နတ်ဘုရား အင်အားဆေးလုံး ဖော်စပ်ခြင်း၏ အခက်အခဲသည် သင်ထင်ထားသည်ထက် ပိုမိုကြီးမားကြောင်း ညွှန်ပြနေသည်။]

[ဒုတိယလတွင် သင်သည် နတ်ဘုရား အင်အားဆေးလုံး အသုတ်သုံးဆယ်ကို ဆက်လက် ကြိုးစားခဲ့ပြီး တစ်ကြိမ်မျှ မအောင်မြင်ခဲ့ပါ—ရာနှုန်းပြည့် ကျရှုံးမှုနှုန်း ဖြစ်သည်။]

[တတိယလ...]

[စတုတ္ထလ...]

[အဋ္ဌမနှစ်တွင် နတ်ဘုရား အင်အားဆေးလုံး ဖော်စပ်ရန် တစ်နှစ်တာ ကြိုးစားပြီးနောက် သင်သည် နတ်ဘုရား အင်အားနွယ်ပင် ငါးပင်နီးပါး ကုန်သွားခဲ့သော်လည်း တစ်ကြိမ်မျှ အောင်မြင်သော အသုတ်ကို မဖော်စပ်နိုင်ခဲ့ပေ။ သင်၏ ကျွမ်းကျင်မှုဘောင်တွင် သင်၏ နတ်ဘုရား အင်အားဆေးလုံး ဖော်စပ်ခြင်း စွမ်းရည်၏ အခြေအနေသည် အစပြုသူ အဆင့်တွင်သာ ရှိနေဆဲ ဖြစ်သည်။]

[နတ်ဘုရား အင်အားဆေးလုံးများ ဖော်စပ်ခြင်း၏ အခက်အခဲသည် သင်၏ လက်ရှိစွမ်းရည်ထက် များစွာ သာလွန်သောကြောင့် ဤသို့ ဖြစ်ရခြင်း ဖြစ်ကြောင်း သင်သိခဲ့သည်; ပုံမှန် အခြေအနေများတွင် ဉာဏ်အလင်းရသည့် အခြေအနေသို့ မရောက်ရှိပါက သင်သည် လုံးဝ အောင်မြင်နိုင်မည် မဟုတ်ပေ!]

[သင်၏လက်ထဲတွင် ကျန်ရှိသော နတ်ဘုရား အင်အားနွယ်ပင် တစ်ဝက်ကို ကြည့်ရင်း သင်သည် ဉာဏ်အလင်းကို လှုံ့ဆော်ကာ ဖော်စပ်ရာတွင် အောင်မြင်ရန် မျှော်လင့်ခဲ့သည်။]

[တစ်လကျော် ကြာပြီးနောက် ခန့်မှန်းထားသည့်အတိုင်း သင်သည် ထပ်မံ ကျရှုံးခဲ့သည်။ သင်သည် ဉာဏ်အလင်းမရခဲ့ဘဲ နတ်ဘုရား အင်အားနွယ်ပင်လည်း ကုန်သွားခဲ့သည်။]

ဤအချက်ကို မြင်သောအခါ စုရှင်း၏ မျက်လုံးများ ပြူးကျယ်သွားပြီးနောက် သူသည် သက်ပြင်းချကာ ပြောလိုက်သည်။

“မျှော်လင့်ထားတဲ့ အတိုင်းပဲ၊ နတ်ဘုရား အင်အားဆေးလုံးတွေ ချက်တာက ငါ ထင်ထားတာထက် ပိုခက်တယ်။ သာမန် နည်းလမ်းနဲ့တော့ ငါ အောင်မြင်နိုင်ပုံ မရဘူး…”

“အဲဒီလိုဆိုရင်တော့ ကံကိုပဲ အားကိုးရတော့မှာပေါ့…”

စုရှင်း၏ အစီအစဉ်မှာ သရုပ်ပြခြင်းတိုင်းတွင် နတ်ဘုရား အင်အးဆေးလုံးများ ဖော်စပ်ရန် အတွက် ဆက်လက် ကြိုးစားရန်နှင့် လုပ်ငန်းစဉ်ကို နှေးကွေးစေရန် ဖြစ်သည်။ ဥပမာအားဖြင့် တစ်သုတ်လျှင် လေးနာရီ ကြာအောင် လုပ်ဆောင်ရန် ဖြစ်သည်။

ဤနည်းဖြင့် စုရှင်းသည် နတ်ဘုရား အင်အားဆေးလုံးများ ဖော်စပ်ရန် အချိန်ပို ရရှိမည်ဖြစ်ပြီး ဉာဏ်အလင်းရရန် အခွင့်အလမ်းများ တိုးလာမည် ဖြစ်သည်။

သရုပ်ပြခြင်း အနည်းငယ် သို့မဟုတ် အများအပြားတွင် စုရှင်းသည် တစ်ကြိမ်တွင် အောင်မြင်နိုင်မည်မှာ သေချာသည်။ ထိုအချိန်တွင် သူသည် နတ်ဘုရား အင်အား ဆေးလုံးများကို သောက်သုံးနိုင်သည်။

ဟုတ်ပါသည်။ ယင်းမှာ စုရှင်း၏ စိတ်ကူး သပ်သပ်သာ ဖြစ်ပါသည်။ ၎င်းကို အောင်မြင်စွာ အကောင်အထည် ဖော်နိုင်မလား ဆိုတာကတော့ ကံပေါ်မှာသာ မူတည်ပါသည်။

“ဒါပေမယ့် အဲဒီမတိုင်ခင် မူလစစ်သည်တော် နယ်မြေရဲ့ အကြီးမြတ်ဆုံး အဆင့်ကို ရောက်ဖို့က မဖြစ်မနေ လိုအပ်တယ်!”

စုရှင်းသည် သူ့ကိုယ်သူ ရေရွတ်လိုက်သည်။