ခရမ်းရောင် စွမ်းရည်၊ ရုတ်တရက် ဉာဏ်အလင်း ရရှိခြင်း_၂

စုရှင်းသည် ခဏလောက် စိတ်လှုပ်ရှားသွားသည်။ ဟိုးအရင်ကလည်း ယခုလို နားလည်နိုင်စွမ်းကို တိုးမြှင့်ပေးသည့် အလားတူ စွမ်းရည်တစ်ခုကို သူ ရခဲ့ဖူးသည်။ အပြာရောင် စွမ်းရည် “ထက်မြက်သော ဉာဏ်ရည်”!

အသက်ဝင်လာသည့်အခါ အမှန်တကယ်ပင် ဆေးဖော်စပ်မှု၏ ထိရောက်မှုကို တိုးတက်စေပြီး အချိုးကိစ္စရပ်များအား နက်နက်ရှိုင်းရှိုင်း စဉ်းစားနိုင်စွမ်းကိုပင် မြှင့်တင်ပေးခဲ့သည်။

သို့သေည် ဤ “ထက်မြက်သော ဉာဏ်ရည်” စွမ်းရည်သည် ဉာဏ်အလင်းရခြင်း၏ အကျိုးသက်ရောက်မှုကို ရရှိရန် ဝေးသေးတာတော့ သေချာသည်။

“ဒီဉာဏ်အလင်းရမယ့် ဖြစ်နိုင်ခြေက ဘယ်လောက် များမလဲဆိုတာ ငါမသိဘူး... ဉာဏ်အလင်းရခြင်းရဲ့ အကျိုးသက်ရောက်မှု အတိအကျက ဘာလဲ?”

စုရှင်းသည် သူ့လက်များကို ပွတ်သပ်လိုက်ပြီး ပထမဆုံး ခရမ်းရောင် စွမ်းရည်ကို မျှော်လင့်တကြီး စောင့်စားရင်း သရုပ်ပြခြင်းကို စတင်ရန် အဆင်သင့် ဖြစ်နေခဲ့သည်။

[ဝိညာဉ်စိုက်ခင်း ကောင်းချီးမြေ အတွင်း၌ သင်သည် သရုပ်ပြခြင်း တစ်ခု အတွင်း၌ ရှိနေကြောင်း သိလိုက်သည်။]

[သင်သည် သင့်ကိုယ်သင် ပြောင်းလဲမှုများ ရှိမရှိ စစ်ဆေးသော်လည်း အရင်ကနှင့် မတူဘဲ ခြားနားသည်ကို မတွေ့ရှိပါ။]

[ထို့ကြောင့် သင်သည် သင်၏နေ့စဉ် ကျင့်ကြံမှုနှင့် ဆေးဖော်စပ်မှုကို စတင်လိုက်ပြီး တစ်ပတ် အကြာတွင် သင်ဖော်စပ်ထားသော ဆေးငါးထောင်ကို ယူကာ ကျင်းချုံးရွှယ်နှင့် တွေ့ဆုံခဲ့သည်။]

[ကျင်းချုံးရွှယ်သည် လင်ယွင် ကုန်သွယ်ရေး အသင်း၏ ပိုင်ဆိုင်မှုများ ရရှိမှုနှင့် ပတ်သက်၍ သင့်အား အစီရင်ခံ တင်ပြပြီး ‘အမှိုက်ပုံ’ ဝယ်ယူရေး ဌာနကို တည်ထောင်ရန် အသေးစိတ် အချက်အလက်များကို သင်နှင့် ဆွေးနွေးခဲ့သည်။]

[ကျင်းချုံးရွှယ်၏ ခန့်မှန်းချက်များအရ တစ်ပတ်လျှင် အမှိုက်ပစ္စည်း သုံးသိန်းမှ ငါးသိန်းအထိ ဝယ်ယူနိုင်ပြီး ဌာန ဆက်လက် တိုးချဲ့လာသည်နှင့်အမျှ ဤအရေအတွက်သည် တိုးလာမည်ဟု မျှော်လင့်ရသည်။]

[တစ်ချိန်တည်းမှာပင် ကျင်းချုံးရွှယ်သည် ထူးခြားသော သတ္တုများ ထုတ်လုပ်နိုင်သော ဥမင်တွင်း အချို့ကို ဝယ်ယူရန် ပြင်ဆင်နေလေသည်။ ဝယ်ယူစရိတ်သည် ဘီလီယံ နှစ်ရာခန့် ရှိမည်ဟု ခန့်မှန်းထားသော်လည်း အောင်မြင်ပါက သတ္တုတူးဖော်ရေး အတွက် လုပ်အားစရိတ်သာ ကုန်ကျမည့် ထူးခြားသော သတ္တုများ၏ တည်ငြိမ်သော အရင်းအမြစ်ကို သင် ရရှိမည် ဖြစ်သည်။]

[သင်သည် ကျင်းချုံးရွှယ်၏ အစီအစဉ်ကို သဘောတူပြီး သူမအား စိတ်အားထက်သန်စွာ ဆုချီးမြှင့်သည်။]

[နောက်လတွင် ထူးခြားသော သတ္တုများ ထုတ်လုပ်သည့် ဥမင်တွင်း အချို့ကို ငှားရမ်းဖို့ လုံလောက်သော ငွေကို စုဆောင်းနိုင်ရန် သင်သည် ဆေးဖော်စပ်ခြင်း၌ ပို၍ပင် ကြိုးစားလုပ်ဆောင်သည်။]

စုရှင်း၏ မျက်လုံးများ တောက်ပသွားသည်။

“ဟုတ်သားဘဲ! ထူးခြားတဲ့ သတ္တုတွင်းတွေ ဝယ်ယူတာ၊ ငါ ဒါကို ဘယ်လိုလုပ် မစဉ်းစားမိတာလဲ?”

ထူးခြားသော သတ္တုများကို ဥမင်တွင်းများ အတွင်း၌ တွေ့ရှိရပြီး ထူးခြားသောသတ္တု အနည်းငယ်ကို ရရှိရန် ကျွမ်းကျင်သူများက တူးဖော်ရသည်။

ထူးခြားသော သတ္တုများ ပါဝင်သည့် ဤအရာများသည် အလွန်တန်ဖိုးရှိပြီး တွင်းထွက် ပစ္စည်းများအဖြစ် လူသိများသည်။

တွင်းထွက်ပစ္စည်း အများစုကို ပြည်နယ် သို့မဟုတ် အစိုးရအာဏာပိုင်များက ထိန်းချုပ်ထားသော်လည်း အင်အားကြီးသော ကုန်သွယ်ရေး အသင်း အချို့ကလည်း စရိတ်ကြီးကြီးပေး၍ ပုဂ္ဂလိကပိုင် ငှားရမ်းနိုင်သည်။

ကျင်း ကုန်သွယ်ရေး အသင်း အပါအဝင် ထိပ်တန်း ကုန်သွယ်ရေး အသင်းများတွင် တွင်းထွက်ပစ္စည်းများကို ငှားရမ်းသည့် လုပ်ငန်းများ ရှိသည်။ ၎င်းတို့သည် တူးဖော်ရရှိသော ထူးခြားသတ္တုများကို ဈေးကွက်ပေါက်ဈေးဖြင့် ရောင်းချပြီး လုပ်အားစရိတ်ကိုသာ ပေးဆောင်ရန် လိုအပ်သည်။

သို့သော် စုရှင်းအတွက်မူ တွင်းထွက်ပစ္စည်း အချို့ကို သူငှားရမ်းနိုင်ပါက ထူးခြားသော သတ္တုများ၏ တည်ငြိမ်ပြီး ဈေးသက်သာသော အရင်းအမြစ်ကို သူ ရရှိမည်ဟု ဆိုလိုသည်။ အခြားနည်းအားဖြင့် ဆိုသော် သရုပ်ပြ စွမ်းအင်၏ တည်ငြိမ်သော အရင်းအမြစ် တစ်ခုပင် ဖြစ်သည်။

တွင်းထွက်ပစ္စည်း တစ်ခုကို ငှားရမ်းဖို့ ဆိုသည်မှာ တင်းကြပ်သော တရားဝင် စိစစ်မှုတွေ၊ များပြားလှတဲ့ လုပ်ထုံးလုပ်နည်းတွေ လိုအပ်သလို ပြီးပြည့်စုံတဲ့ သတ္တုတူးဖော်ရေး ကွင်းဆက်တစ်ခုကို တည်ဆောက်ဖို့လည်း အချိန်အတော် ကြာမြင့်တာကြောင့် ရေတိုမှာ သိသာထင်ရှားတဲ့ ရလဒ်တွေကို မျှော်လင့်လို့ မရပါဘူး။

“ဟီးဟီး ကျင်းချုံးရွှယ်က ငါ့ရဲ့ ကျေးဇူးရှင် အစစ်ပဲ!”

ကျင်းချုံးရွှယ်ရဲ့ စီးပွားရေး ကျွမ်းကျင်မှုကို ထောက်ခံရင်း စုရှင်းသည် သရုပ်ပြခြင်းကို ဆက်လက် လုပ်ဆောင်ခဲ့သည်။

[တစ်နေ့တွင် အသွင်ပြောင်းဆေးနှင့် အသက်ရှုသံ ဖုံးကွယ်ဆေးကို သောက်ပြီးနောက် သင်သည် လောထျန်း အစည်းအဝေး နယ်မြေသို့ ဝင်ရန် ပြင်ဆင်ခဲ့သည်။]

[ကံကောင်းထောက်မစွာပင် နေရာတစ်ခုကို ကြိုတင် မှာယူထားသော ကျွမ်းကျင်သူ တစ်ဦးသည် အရေးပေါ် အခြေအနေ ပေါ်ပေါက်ခဲ့သောကြောင့် မလာနိုင်တော့သဖြင့် သင်သည် လောထျန်း အစည်းအဝေး နယ်မြေသို့ ဝင်ရောက်ရန် အခွင့်အရေး ရရှိခဲ့သည်။]

စုရှင်း၏ မျက်လုံးများသည် တောက်ပသွားပြီး သူသည် တုံ့ဆိုင်းခြင်းမရှိဘဲ ပြောလိုက်သည်:

“မြှုပ်နှံ သရုပ်ပြခြင်းကို သုံး! ကြာချိန်: ၂၄ နာရီ!”

ယခုအခါ စုရှင်းတွင် သရုပ်ပြ စွမ်းအင် အများအပြား ရှိသည်။ တစ်ရက်တာ မြှုပ်နှံ သရုပ်ပြခြင်းသည် စွမ်းအင် ၂.၄ သန်းသာ ကုန်ကျမည်ဖြစ်သည့် အတွက် သူ တတ်နိုင်သည်။

အခြား အခွင့်အရေးများ အပြင် လောထျန်း အစည်းအဝေးရှိ ကျမ်းစာဆောင် တစ်ခုတည်းကပင် စုရှင်းအတွက် အလွန် တန်ဖိုးရှိသည်။

[ဒင်၊ မြှုပ်နှံ သရုပ်ပြခြင်းကို အောင်မြင်စွာ ရယူပြီးပါပြီ။ စွမ်းအင် ၂.၄ သန်း ကုန်ဆုံးပါမည်။ သရုပ်ပြချိန် ၂၄ နာရီ၊ ကျန်ရှိသော စွမ်းအင် ၃၉,၇၀၁,၆၆၆ မှတ်!]

သူ့နားထဲတွင် အသိပေးချက်သံ မြည်လာသည်နှင့် စုရှင်း၏ အမြင်အာရုံများ ပြောင်းလဲသွားပြီး သူသည် လောထျန်း အစည်းအဝေး နယ်မြေအတွင်းသို့ ရောက်ရှိသွားသည်။

“ရှောင်ချွမ်၊ လောထျန်း အစည်းအဝေး စတော့မယ်။ နောက်တောင်ကိုသွားပြီး အကြီးအကဲ ရှန်းနန်ကို ပါဝင်ဖို့ ဖိတ်ကြားလိုက်!”

စုရှင်းရှေ့တွင် အကြီးအကဲတစ်ဦးက ပြုံးရွှင်စွာ ပြောလိုက်သည်။ သူသည် ယခင် သရုပ်ပြခြင်းတွင် စုရှင်း၏ ဆရာဖြစ်သော အကြီးအကဲချယ် ဖြစ်သည်။

“ဟုတ်ကဲ့ ဆရာ!”

စုရှင်းသည် ဦးညွှတ်ပြီး နောက်တောင်ဘက်သို့ လျှောက်သွားသည်။

လမ်းတစ်လျှောက်တွင် စုရှင်းသည် သူ့စိတ်ထဲရှိ မှတ်ဉာဏ် အပိုင်းအစများကို စဉ်းစားနေသည်။

စုရှင်း၏ အမည်မှာ လောထျန်းဂိုဏ်းမှ တပည့် လော့ရှောင်ချွမ်အဖြစ် ဆက်လက် တည်ရှိပြီး အကြီးအကဲချယ်သည် သူ့ဆရာ ဖြစ်သော်လည်း သူ၏ ကျင့်ကြံမှု အဆင့်သည် မူလ မသေမျိုး အဆင့် သတ္တမ အလွှာသို့ တိုးမြင့်လာခဲ့ပြီး အကြီးအကဲချယ်သည် သူ့ကို တရားဝင် ကိုယ်ပိုင် တပည့်အဖြစ် လက်ခံခဲ့သည်!

“ဟုတ်တယ်၊ နောက်ဆုံး သရုပ်ပြခြင်းမှာ ငါက သာမန် အတွင်း ဂိုဏ်းသား တစ်ယောက်ပဲ ရှိသေးတယ်၊ ဒါပေမဲ့ အခုတော့ ငါက အကြီးအကဲ တစ်ယောက်ရဲ့ ကိုယ်ပိုင်တပည့်အဖြစ် တိုးမြှင့်ခံလိုက်ရပြီ! ငါ့ရဲ့ ကျင့်ကြံမှုအဆင့် ဆက်လက် တိုးမြင့်လာတာနဲ့အမျှ နယ်မြေထဲက ငါ့ရဲ့ အဆင့်အတန်းလည်း ပြောင်းလဲသွားလိမ့်မယ်!”

စုရှင်းသည် အနည်းငယ် ဉာဏ်အလင်း ရသွားသလို ရေရွတ်လိုက်သည်။

မကြာမီ စုရှင်းသည် လောထျန်းဂိုဏ်း၏ နောက်တောင်သို့ ရောက်လာသည်။

လမ်းတစ်လျှောက်တွင် သူသည် ဝိညာဉ် စုစည်းပန်း များစွာနှင့် ရှားပါးပြီး ထူးခြားဆန်းပြားသည့် အမျိုးမျိုးသော ဆေးဖက်ဝင် အပင်များကို တွေ့မြင်ခဲ့ရသော်လည်း ၎င်းသည် သူ၏ ဒုတိယ အတွေ့အကြုံ ဖြစ်သောကြောင့် စုရှင်းသည် ပထမအကြိမ်ကဲ့သို့ အံ့အားသင့်ခြင်း မရှိတော့ပေ။

“ရှန်းနန်ဦးလေး! ဆရာက လောထျန်း အစည်းအဝေးကို ဖိတ်ကြားဖို့ မှာလိုက်ပါတယ်!”

စုရှင်းသည် လယ်ကွင်း၌ စိုက်ပျိုးနေသော လူငယ်တစ်ဦးအား ရိုရိုသေသေ ပြောလိုက်သည်။

မကြာမီ ရှန်းနန်ယိုထျန်းသည် လယ်ယာသုံး ကိရိယာများကို ချထားပြီး စုရှင်းအား ခေါင်းညိတ်ပြသည်။

“ဒါ ရှောင်ချွမ်လေး မဟုတ်လား! နှစ်တွေတောင် အတော် ကြာသွားပြီပဲ၊ မင်းရဲ့ လေ့ကျင့်မှုက တော်တော် တိုးတက်လာတာပဲကိုကွ!”

ဤသရုပ်ပြခြင်းတွင် ရှန်းနန်ယိုထျန်းသည် လောရှောင်ချွမ်နှင့် ရင်းနှီးပုံရသည်။ လောထျန်း အစည်းအဝေးသို့ သွားရာလမ်းတွင် နှစ်ဦးသား တလှည့်စီ စကားပြောဆိုကြသည်။

ရှန်းနန်ယိုထျန်းသည် တစ်နှစ်ပတ်လုံး လယ်ယာလုပ်ကိုင်နေပြီး လူများနှင့် တွေ့ဆုံခဲသော်လည်း စကားပြောကောင်းသူ ဖြစ်ကြောင်း စုရှင်း သိလိုက်သည်။ စုရှင်းနှင့် တွေ့ဆုံသောအခါ သူသည် မရပ်မနား စကားပြောဆို ရသည်ကို အလွန် ပျော်ရွှင်နေပြီး စုရှင်းကလည်း ခေါင်းညိတ်ကာ တုံ့ပြန်သည်။

ရှန်းနန်ယိုထျန်းနှင့် စကားပြောဆိုရာတွင် စုရှင်းသည် အလွန် အကျိုးအမြတ် ရရှိခဲ့သည်။

“ဦးလေး၊ ရှောင်ချွမ်မှာ ဦးလေးကို မေးချင်တဲ့ မေးခွန်း တစ်ခုရှိလို့…”

သူတို့သည် အစည်းအဝေး ကျင်းပရာ နေရာသို့ ရောက်တော့မည်ကို မြင်သောအခါ စုရှင်းသည် နောက်ထပ် အကျိုးအမြတ် ရရှိမည့် အခွင့်အရေးကို ဆုပ်ကိုင်ရန် ပြင်ဆင်ခဲ့သည်။

ရှန်းနန်ဦးလေးက ခေါင်းညိတ်ပြီး မေးသည်။ “တူလေး ဘာမေးချင်လို့လဲ? လွတ်လွတ်လပ်လပ် ပြောပါ!”

စုရှင်းသည် အလျင်အမြန် မေးမြန်းသည်။ “မကြာသေးခင်က တူလေး ခန္ဓာကိုယ် ကြံ့ခိုင်ရေး ကျင့်ကြံရာမှာ အခက်အခဲ တစ်ချို့ ကြုံနေရပါတယ်၊ မူလစွမ်းအားကို ကျွမ်းကျင်ပိုင်နိုင်စွာ အသုံးပြုနိုင်ခြင်းနဲ့ ပတ်သက်ပြီးတော့…”

စုရှင်းသည် သူ၏ သံသယများကို ဖော်ပြခဲ့သည်။ သူ၏ မူလစွမ်းအားကို ကျွမ်းကျင်ပိုင်နိုင်မှုသည် အလွန် အပေါ်ယံသာ ရှိသေးပြီး ဤဂဏ္ဍတွင် သူသည် ဖွံ့ဖြိုးတိုးတက်ရန် အလားအလာ အလွန် ကြီးမားသည်။

နားထောင်ပြီးနောက် ရှန်းနန်ယိုထျန်းသည် အနည်းငယ် ခေါင်းညိတ်ကာ ပြန်ဖြေသည်:

“မူလ မသေမျိုး အဆင့်ကို ရောက်ရှိတဲ့ ခန္ဓာကိုယ်ကြံ့ခိုင်ရေး ကျင့်ကြံသူတွေကို ခန္ဓာကိုယ် ကျင့်ကြံရေး လမ်းကြောင်းကို တရားဝင် ဝင်ရောက်ပြီလို့ မှတ်ယူနိုင်တယ်။ မူလ မသေမျိုးအဆင့် ကျင့်ကြံသူတွေက မူလစွမ်းအားကို ကျွမ်းကျွမ်းကျင်ကျင် အသုံးပြုနိုင်ဖို့ အဓိကထားကြတယ်။ နောက်ဆက်တွဲအဆင့်ဖြစ်တဲ့ နတ်ဘုရားအဆင့်ကကျ ခွန်အားနဲ့ ရုပ်ပိုင်းဆိုင်ရာ စွမ်းရည်တွေရဲ့ ပေါက်ကွဲအား ကောင်းတဲ့ အဆင့် ဖြစ်တယ်”

ရှန်းနန်ယိုထျန်းသည် အသေးစိတ် ပြောဆိုခဲ့သော်လည်း အဓိကအချက်ကို မည်သည့်အခါမျှ တိတိကျကျ မပြောခဲ့ပေ။ နောက်ဆုံးတွင် သူက ဤသို့သာ ပြောခဲ့သည်:

“အဟမ်း၊ ဦးလေးက ခန္ဓာကိုယ် ကျင့်ကြံရေး လမ်းကြောင်း အကြောင်း သိပ်နားမလည်ဘူး။ တူလေး စိတ်ဝင်စားတယ်ဆိုရင် ကျမ်းစာဆောင်မှာ ‘မူလစွမ်းအား အသုံးပြုခြင်းဆိုင်ရာ အသေးစိတ် ရှင်းလင်းချက်’ နဲ့ ‘မူလစွမ်းအား အဆင့်မြင့် အသုံးပြုခြင်း’ ဆိုတဲ့ စာအုပ် နှစ်အုပ်ကို ရှာဖွေကြည့်လို့ရတယ်။ ဒီစာအုပ် နှစ်အုပ်ကို အပြည့်အဝ နားလည်သဘောပေါက်ရင် မူလစွမ်းအားကို ကျွမ်းကျင်ပိုင်နိုင်တဲ့ ကျွမ်းကျင်သူ တစ်ယောက်လို့ သတ်မှတ်နိုင်တယ်!”

စုရှင်းသည် နားထောင်ပြီးနောက် မျက်နှာပူသွားသည်။ ကံဆိုးစွာဖြင့် ဤဦးလေးကလည်း နားမလည်ဘဲ သိဟန်ဆောင်နေသည်လား??

သို့သော် ဤကိစ္စမှတစ်ဆင့် စုရှင်းသည် အရာရာတိုင်းတွင် ကျွမ်းကျင်သူများ ရှိကြောင်းလည်း နားလည်သွားသည်။ ဤရှန်းနန်ဦးလေးသည် ဝိညာဉ် ကျင့်ကြံခြင်း၌ ကျွမ်းကျင်ပြီး ဤနယ်ပယ်ရှိ သံသယများကို သူ့အား မေးမြန်းနိုင်သည်။

အခြားကဏ္ဍများကို သူနားမလည်ပါက ကျမ်းစာဆောင်သည် အကောင်းဆုံး နေရာ ဖြစ်နိုင်သည်။

သူ၏ အသိပညာ၌ ချို့ယွင်းချက် တစ်ခုကို မေးမြန်းခံရပြီးနောက် ရှန်းနန်ယိုထျန်းသည်လည်း အနည်းငယ် ရှက်ရွံ့သွားပြီး စုရှင်း၏ မေးခွန်းများကို ဆက်လက် ဖြေဆိုရန် စိတ်မပါတော့ပုံ ရသည်။

ထို့ကြောင့် စုရှင်းသည်လည်း နောက်ထပ် အနှောင့်အယှက် မပေးတော့ပေ။ ရှန်းနန်ယိုထျန်းကို သူ၏ဆရာ့ထံ ပို့ဆောင်ပြီးနောက် သူသည် ချက်ချင်းပင် ကျမ်းစာဆောင်သို့ သွားကာ ‘မူလစွမ်းအား အသုံးပြုခြင်းဆိုင်ရာ အသေးစိတ် ရှင်းလင်းချက်’ စာအုပ်ကို အာရုံစိုက်ပြီး ဖတ်ရှုသည်။

စာဖတ်ခြင်း၌ နစ်မြောနေစဉ် တစ်နေ့တာသည် လျင်မြန်စွာ ကုန်လွန်သွားသည်။

စုရှင်းသည် သရုပ်ပြစက်၏ အသိပေးသံကို ကြားမှသာ သူသည် မြှုပ်နှံသရုပ်ပြခြင်းမှ နှမျောတသစွာဖြင့် ထွက်လာကာ အပြင်လောကသို့ ပြန်ရောက်လာသည်။

“ဒါဆို မူလစွမ်းအားကို အသုံးပြုရာမှာ အဆင့်သုံးဆင့် ရှိတယ်ဆိုတာ သိရတာပေါ့။ အခု ငါက ခွန်အားနဲ့ ခုခံအားကို မြှင့်တင်နိုင်တဲ့ အပေါ်ယံအဆင့်မှာပဲ ရှိသေးတယ်... ဒါပေမဲ့ ငါသာ နက်နဲတဲ့အဆင့်ကို ရောက်ခဲ့ရင် မူလစွမ်းအားကို အပြင်ကို ထုတ်လွှတ်ပြီး သူတစ်ပါးကို ထိခိုက်အောင် လုပ်နိုင်သလို မူလစွမ်းအားနဲ့ လိုက်ဖက်တဲ့ တိုက်ခိုက်ရေး နည်းတွေကိုလည်း သင်ယူနိုင်မှာ!”

စုရှင်း၏ မျက်နှာတွင် စိတ်လှုပ်ရှားမှုများဖြင့် ပြည့်နှက်သွားသည်။ သူသည် မူလစွမ်းအားကို အဆင့်မြင့်အထိ လေ့ကျင့်နိုင်ပါက မူလ မသေမျိုး အဆင့်၏ အလွန်ပြည့်စုံသော အဆင့်သို့ ရောက်ရှိသောအခါ နတ်ဘုရား အသွင် ပြောင်းလဲခြင်း ကျင့်ကြံသူ တစ်ဦးကိုပင် တိုက်ခိုက်နိုင်ပေလိမ့်မည်!

“ဒီမြှုပ်နှံ သရုပ်ပြခြင်းက အရမ်း ဈေးကြီးနေတာ နှမျောစရာဘဲ။ တစ်ရက်ကို ၂.၄ သန်း စွမ်းအင်ကုန်ကျပြီး လောထျန်း အစည်းအဝေး နယ်မြေကို အများဆုံး သုံးကြိမ်ပဲ ဝင်လို့ရတယ်။ သင်ယူဖို့ သုံးရင် စွမ်းအင် ၇ သန်း ကုန်သွားမှာ!”

စုရှင်းသည် စိတ်မကောင်းဖြစ်ကာ သက်ပြင်းချပြီးနောက် သရုပ်ပြခြင်းကို ဆက်လက် လုပ်ဆောင်သည်။

[မူလစွမ်းအား အကြောင်း ပိုမို နားလည် သဘောပေါက်ကာ သင်သည် လောထျန်း အစည်းအဝေး နယ်မြေမှ ထွက်လာခဲ့သည်။]

[နောက်လများအတွင်း သင်သည် နေ့စဉ် ငြိမ်းချမ်းစွာပင် ဆေးဖော်စပ်ခြင်းနှင့် ကျင့်ကြံခြင်းတို့ကို ဆက်လက် လုပ်ဆောင်ခဲ့ပြီး တစ်နေ့တွင် ဝမ့်ချင်းရွှမ်သည် သင့်ကို လာတွေ့ခဲ့သည်...]

[မုန်တိုင်းထန်သော ညတစ်ညပြီးနောက် သင်သည် ဝမ့်ချင်းရွှမ်နှင့်အတူ ဆင်းသက်ဂိုဏ်းသို့ ဝင်ရောက်ခဲ့သည်။]

[သင်၏ ခွန်အားသည် တိုးမြင့်လာပြီး ယုံကြည်မှု တိုးပွားလာသည်နှင့်အမျှ သင်သည် သင်၏ ဆေးဖော်စပ်မှု စွမ်းရည်ကို ဖုံးကွယ်မထားတော့ဘဲ ဆင်းသက်ဂိုဏ်းတွင် အကြီးအကဲတစ်ဦး ဖြစ်လာရန် တိုက်ရိုက် တင်ပြခဲ့သည်။]

အခြားသူများ အဆင့်တက်သွား‌သော်လည်း ငါသည် ကျင့်ကြံမှုနောက် လိုက်နေဆဲပင်။