ထာဝရ ရှင်သန်ခြင်း မျိုးစေ့၊ ထာဝရ ရှင်သန်ခြင်း လမ်းကြောင်းသို့ အစပြုခြင်း!

စုရှင်း၏ နဖူးတွင် အမည်းရောင် အရေးအကြောင်းများ ပေါ်လာသည်။

“ဘာလဲဟ?”

လူအများ၏ အာရုံစိုက်မှုကို လွန်စွာ ခံရသောကြောင့် လမ်းလျှောက်ရုံမျှဖြင့် စက်ဘီးစီးနေသော အဘိုးအိုတစ်ဦး၏ သတိပြုမိခြင်းကို ခံရကာ လျော်ကြေး ခြောက်သောင်း ခြောက်ထောင် ပေးလိုက်ရသည်တဲ့လား။

ဒါက အတော်လေးကို အံ့ဩဖို့ကောင်းနေပြီ မဟုတ်လား?

“တကယ်ပဲ၊ ဒီလောက် အာရုံစိုက်ခံရတာက အမြဲ ကောင်းတဲ့ အရာတော့ မဟုတ်ဘူးပဲ!”

သက်ပြင်းတစ်ချက် ချလိုက်ရင်း စုရှင်းက သူ၏အကြည့်ကို သရုပ်ပြခြင်း ဖန်သားပြင်စီသို့ ပြန်ရွှေ့လိုက်သည်။

[သင်သည် သင့်အတွက် ဖြစ်စေသည့် ဤစွမ်းရည်၏ ဒုက္ခများကို သဘောပေါက်သွားသည်။ သို့သော် ကံကောင်းသည်မှာ သင်သည် အပြင်ကို မကြာခဏ ထွက်လေ့မရှိပါ။ တစ်နေ့လုံး ဝိဉာဉ်စိုက်ခင်း ကောင်းချီးမြေထဲမှာပဲ ဆေးဖော်ခြင်းနှင့် ကျင့်ကြံအားထုတ်ခြင်းများကို လုပ်နေခြင်းကလည်း ကောင်းတဲ့အကြံတစ်ခုပဲ ဖြစ်သည်။]

[တစ်နေ့မှာ သင်သည် စတုတ္ထအဆင့် သန္ဓေတည် ဝိညာဉ်ကိစ္စများကို စုံစမ်းရန် လောထျန်း အစည်းအဝေးကို ထွက်သွားခဲ့သည်။]

[လောထျန်း အစည်းအဝေးတွင် သင့်အတွက် ဝင်ပေါက် ဖွင့်ပေးတဲ့သူက သင့်အား စွဲလမ်းသွားပြီး တစ်ချက် ပိုကြည့်ခဲ့သည်။]

[သင်သည် လောထျန်း အစည်းအဝေး ညီလာခံထဲသို့ ဝင်ရောက်သွားသည်!]

ဤသည်ကို မြင်သောအခါ စုရှင်းသည် သူ့ဘာသာသူ အလျင်အမြန် ရွတ်ဆိုလိုက်သည်:

“မြှုပ်နှံ သရုပ်ပြခြင်းကို အသက်သွင်းပါ၊ ကြာချိန် နှစ်နာရီ!”

[ဒင်၊ သင်သည် မြှုပ်နှံ သရုပ်ပြခြင်းကို အောင်မြင်စွာ အသက်သွင်းပြီး ဖြစ်ပါသည်။ စွမ်းအင်အမှတ် ၂၀၀,၀၀၀ သုံးစွဲလိုက်ပါသည်။ သရုပ်ဖော်ချိန်: ၂ နာရီ၊ လက်ကျန်စွမ်းအင်: ၂၄,၄၆၃,၀၀၃ မှတ်။]

အချက်ပေးသံ ထွက်ပေါ်လာသည်နှင့် စုရှင်း၏ အမြင်အာရုံသည် ပြောင်းလဲစ ပြုလာပြီး မကြာမီတွင် သူသည် နန်းတော်တစ်ခု အတွင်းသို့ ရောက်ရှိနေသည်ကို တွေ့လိုက်ရသည်။

စုရှင်း မော့ကြည့်လိုက်သောအခါ သူ၏ နောက်ဆုံး သရုပ်ပြခြင်းတွင် တွေ့ဆုံခဲ့ဖူးသော အကြီးအကဲ နျိုလောလေ့သည် သူ၏ရှေ့တွင် ရပ်နေသည်ကို မြင်လိုက်ရသည်။

နျိုလောလေ့က လျှောက်လာပြီး စုရှင်း၏ ပခုံးကို ပုတ်ကာ ပြောလိုက်သည်:

“တပည့် မင်း နောက်ဆုံးတော့ တစ်ကိုယ်တည်း ကျင့်ကြံခြင်းကနေ ထွက်လာပြီပဲ! တောင်နောက်ဘက်ကို အမြန်သွားပြီး မင်းရဲ့ ရှန်းနန်ဦး‌လေးကို လောထျန်း အစည်းအဝေး တက်ရောက်ဖို့ ဖိတ်ခေါ်လိုက်ပါဦး!”

ဤသည်ကိုကြားသောအခါ စုရှင်းက ခေါင်းညိတ်လိုက်ပြီး သူ၏စိတ်ထဲတွင်မူ မှတ်ဉာဏ်အသစ် တစ်စကို တိတ်တဆိတ် ချေဖျက်နေလိုက်သည်။

“ငါ့ရဲ့ သရုပ်က လောရှောင်ချွမ်း၊ နျိုလောလေ့ရဲ့ တရားဝင်တပည့်… ပြီးတော့ လောထျန်းဂိုဏ်းရဲ့ အင်အားအကြီးဆုံး သန္ဓေတည် ဝိညာဉ်ကျင့်ကြံသူ ဆယ့်နှစ်ယောက်ထဲက တစ်ယောက်လား?”

“ပြီးတော့ ထောင်ပေါင်းများစွာသော မိန်းကလေးငယ်တွေကို စွဲဆောင်နိုင်ခဲ့တဲ့ ကြယ်ပွင့်တပည့်၊ အဟမ်း… ဂိုဏ်းတွင်းဂိုဏ်းပြင်က ညီငယ်ညီမငယ်ပေါင်း သန်းနဲ့ချီပြီး စွဲဆောင်နိုင်ခဲ့တဲ့သူလား?”

“ဟူး… ငါ့ရဲ့ သရုပ်က ပြောင်းသွားပြန်ပြီပဲ! အင်အားအကြီးဆုံး သန္ဓေတည် ဝိညာဉ်ကျင့်ကြံသူ ဆယ့်နှစ်ယောက် ဟုတ်လား? ကိုယ်ခန္ဓာ သန့်စင်ခြင်းနဲ့ ချီစွမ်းအင် သန့်စင်ခြင်း သန္ဓေတည် ဝိညာဉ် နှစ်ခုလုံးကို ကျင့်ကြံလို့လား?”

စုရှင်းက သူ၏အတွေးများကို လျင်မြန်စွာ စီစစ်လိုက်ပြီး သူ၏ဆရာ နျိုလောလေ့ကို အရိုအသေပြုကာ ပြောလိုက်သည်:

“ဆရာ့ အမိန့် အတိုင်းပါ!”

စုရှင်းသည် စတုတ္ထအဆင့် သန္ဓေတည် ဝိညာဉ် အကြောင်းကို နျိုလောလေ့အား မမေးမြန်းဘဲ တောင်နောက်ဘက်သို့ တန်းတန်းမတ်မတ် ထွက်လာခဲ့သည်။

မည်သို့ပင်ဖြစ်စေ သူ၏အမြင်အရ နျိုလောလေ့သည် ကိုယ်ခန္ဓာ သန့်စင်ခြင်း ကျင့်ကြံသူတစ်ဦး ဖြစ်သောကြောင့် ချီစွမ်းအင် သန့်စင်ခြင်း အကြောင်းကို များများစားစား သိမည် မဟုတ်ပေ။

မကြာမီပင် စုရှင်းသည် ရှန်းနန်ယိုထျန်းကို တွေ့လိုက်ရသည်။

ရှန်းနန်ယိုထျန်းသည် လယ်ယာ စိုက်ပျိုးရေးဆိုင်ရာ မန္တန်ကို ပြုလုပ်နေခဲ့သည်။ စုရှင်းကို မြင်သောအခါ သူသည် မန္တန်ကို ရပ်တန့်လိုက်ပြီး စုရှင်းအား ပြောလိုက်သည်:

“ငါ့တူ! မင်းကို အဝေးကတည်းက သတိထားမိနေတာ! လောထျန်း အစည်းအဝေးကို ငါ့ ဖိတ်မလို့ လာတာလား?”

စုရှင်းသည် သူ၏စကားကို ကြားသော် ခေါင်းညိတ်လိုက်သော်လည်း စိတ်ထဲတွင်မူ စကားမပြောနိုင်အောင် ဖြစ်နေခဲ့သည်။ သူသည် အမှန်တကယ်ပင် လူအုပ်ထဲတွင် အတောက်ပဆုံး ဖြစ်နေခဲ့သည်။

ရှန်းနန်ဦးလေး နှင့်အတူ စုရှင်းသည် လောထျန်း အစည်းအဝေး ကျင်းပရာ နေရာသို့ ထွက်လာခဲ့သည်။ သူသည် လမ်းတစ်လျှောက်တွင် သူ၏ ဦးလေးနှင့် စကားစမြည် ပြောဆိုလာခဲ့သည်။

အချိန်အခါ သင့်ပြီဟု မြင်သောအခါ စုရှငက သူ၏သံသယများကို နောက်ဆုံးတွင် ထုတ်ဖော် ပြောကြားလိုက်သည်။

“ဦးလေး၊ စတုတ္ထအဆင့် သန္ဓေတည် ဝိညာဉ်ဆိုတာ ဘာလဲ။ ပြီးတော့ ကျင့်ကြံသူ တစ်ယောက် အနေနဲ့ နတ်ဘုရား အသွင်ပြောင်းခြင်း အဆင့်ကို ဘယ်လို ပြည့်စုံအောင်မြင်အောင် လုပ်နိုင်မလဲဆိုတာ သိပါသလား?”

ဤသည်ကို ကြားသောအခါ ရှန်းနန်ယိုထျန်းက ရယ်မောလိုက်ကာ ပြန်ဖြေသည်:

“ငါ့တူ၊ မင်းကို မတွေ့ရတာ ဆယ်စုနှစ်တစ်ခု ကျော်ပြီ၊ မင်းက သန္ဓေတည် ဝိညာဉ်ရဲ့ မဟာပြီးပြည့်စုံခြင်း အဆင့်ကို ရောက်နေလိမ့်မယ်လို့ ငါမမျှော်လင့်ထားမိဘူး… လူငယ်မျိုးဆက်က တကယ်ကို ကြောက်စရာကောင်းတာပဲ!”

“ဒါပေမယ့် စတုတ္ထအဆင့် သန္ဓေတည် ဝိညာဉ်အကြောင်း မေးတယ်ဆိုတော့၊ မင်းက မသေမျိုးဖြစ်ခြင်း လမ်းစဉ်ကို ရှာဖွေနေတာလား?”

ဤသည်ကို ကြားသောအခါ စုရှင်းက အနည်းငယ် မျက်မှောင်ကြုတ်ကာ ထပ်မေးလိုက်သည်:

“ဦးလေး၊ စတုတ္ထအဆင့် သန္ဓေတည် ဝိညာဉ်က မသေမျိုးဖြစ်ခြင်း လမ်းစဉ်နဲ့ ဘယ်လို ပတ်သက်နေတာလဲ?”

ထိုအခါ ရှန်းနန်ယိုထျန်းက ပြောလိုက်သည်:

“မသေမျိုးဖြစ်ခြင်း ဆိုတာ မသေမျိုး မျိုးစေ့တစ်ခုက အမြစ်တွယ်ပြီး အပင်ပေါက်တဲ့ လုပ်ငန်းစဉ် တစ်ခုနဲ့ တူတယ်… ပြီးတော့ မသေမျိုး ဖြစ်ဖို့ဆိုရင် မသေမျိုး မျိုးစေ့တစ်ခုကို စိုက်ပျိုးရမယ်!”

“သမိုင်းတစ်လျှောက်မှာ မသေမျိုး ဖြစ်သွားကြတဲ့ ဘိုးဘေးအားလုံးဟာ ခြွင်းချက်မရှိဘဲ ကိုးပတ်လည် ရွှေအမြုတေကို ပိုင်ဆိုင်ကြတယ်။ ဘာဖြစ်လို့လဲဆိုတော့ ဒါက အရာအားလုံးရဲ့ အခြေခံအုတ်မြစ် ဖြစ်လို့ပဲ…”

"ကိုးပတ်လည် ရွှေအမြုတေ ပြီးတဲ့နောက်မှာ၊ စတုတ္ထအဆင့် သန္ဓေတည် ဝိညာဉ်ရဲ့ အမျိုးအစား ခွဲခြားမှု ရှိတယ်။ အဲဒီထဲမှာ တတိယအဆင့် သန္ဓေတည် ဝိညာဉ်၊ ဒုတိယအဆင့် သန္ဓေတည် ဝိညာဉ်၊ ပထမအဆင့် သန္ဓေတည် ဝိညာဉ်နဲ့ အမြတ်ဆုံးအဆင့် သန္ဓေတည် ဝိညာဉ်တို့ ပါဝင်တယ်!”

“တတိယအဆင့် သန္ဓေတည် ဝိညာဉ်နဲ့ဆိုရင် နတ်ဘုရား အသွင်ပြောင်းခြင်း အဆင့်ကို ရောက်နိုင်ပေမယ့် ကံကောင်းမှု ကြီးကြီးမားမား မရှိရင် တစ်သက်လုံး တိုးတက်မှုမရှိဘဲ ပိတ်မိနေနိုင်တယ်။”

“ဒုတိယအဆင့် သန္ဓေတည် ဝိညာဉ်ကတော့ လွတ်မြောက်ခြင်း နယ်ပယ်ရဲ့ နက်နဲမှုတွေကို မြင်တွေ့နိုင်ပြီး နှစ်သုံးထောင် သက်တမ်းကို ခံစားနိုင်တယ်!”

“ပထမတန်းစား သန္ဓေတည် ဝိညာဉ်က သက်တမ်း အကန့်အသတ် မရှိတဲ့ ပေါင်းစည်းခြင်း အဆင့် သို့မဟုတ် မဟာယာန ကျင့်ကြံသူ ဖြစ်လာနိုင်ပြီး နှစ်ပေါင်းတစ်သောင်း နေထိုင်နိုင်တယ်! ဒါပေမယ့် အခွင့်အလမ်းမရှိရင် မသေမျိုး ဖြစ်မလာနိုင်ဘူး…”

“အဆင့်အမြင့်ဆုံး သန္ဓေတည် ဝိညာဉ်ဖြင့်သာ မသေမျိုး မျိုးစေ့ကို စိုက်ပျိုးဖို့ မြေကြီးကို ပြင်ဆင်ထားနိုင်တယ်။ နတ်ဘုရားအသွင် ပြောင်းလဲခြင်းရဲ့ မဟာ ပြီးပြည့်စုံခြင်းကို ရောက်တာနဲ့ မသေမျိုး မျိုးစေ့ကို စိုက်ပျိုးနိုင်တယ်။ အာ့တာက အမြစ်စွဲပြီး အညှောင့် ပေါက်လာတဲ့အခါကျ၊ ကောင်းကင်ဘုံကဲ့သို့သော တည်တံ့တဲ့ ဘဝဖြင့် မသေမျိုး ဖြစ်လာခြင်း၏ လျှို့ဝှက်ချက်ကို မြင်နိုင်လိမ့်မယ်…”

စုရှင်းက စိတ်အားထက်သန်စွာ စကားပြောနေသော ရှန်းနန်ယိုထျန်းကို စိုက်ကြည့်နေပြီး တစ်ခဏမျှ သူ အနည်းငယ် မှင်သက်သွားသည်။

မသေမျိုး ဖြစ်လာခြင်း... ထိုကဲ့သို့ ဝေးကွာသော အယူအဆတစ်ခု။

သမိုင်းတစ်လျှောက် ကျင့်ကြံခြင်း လောကရှိ မရေမတွက်နိုင်သော မြင့်မြတ်သည့် ပုဂ္ဂိုလ်များသည် မသေမျိုးများ ဖြစ်လာရန် တက်ကြွစွာ ဆန္ဒရှိခဲ့ကြသော်လည်း ကမ္ဘာပေါ်တွင် စစ်မှန်သော မသေမျိုး အရေအတွက်မှာ မည်မျှရှိသနည်း?

ကောင်းကင်ဘုံကို ဆန့်ကျင်သော စက်ပစ္စည်းတစ်ခု ရှိနေသော စုရှင်းသည်ပင် လက်ရှိတွင် မသေမျိုး ဖြစ်လာရန် မစဉ်းစားဝံ့ပေ။

ဒဏ္ဍာရီများနှင့် ပုံပြင်များတွင် မသေမျိုး များသည် မည်သည့် အရာမဆို လုပ်ဆောင်နိုင်သော ပုဂ္ဂိုလ်များ ဖြစ်ကြသည်။

သတိပြန်ဝင်လာပြီးနောက် စုရှင်းသည် ရှေ့မှ ရှန်းနန်ကို မေးလိုက်သည်-

“ဒါဆို၊ အဆင့်အမြင့်ဆုံး သန္ဓေတည် ဝိညာဉ်ကို စုစည်းခြင်းအားဖြင့် မသေမျိုး ဖြစ်လာနိုင်လား?”

ရှန်းနန်ယိုထျန်းက ခေါင်းကို အနည်းငယ် ခါယမ်းကာ ပြောသည်-

“တိတိကျကျ ပြောရမယ်ဆိုရင် ချီကျင့်ကြံခြင်း လမ်းစဉ်မှာ မသေမျိုး ဖြစ်လာမယ့် အခွင့်အရေးကို ရရှိဖို့က အဆင့်မြင့်ဆုံး သန္ဓေတည်ဝိဉာဉ်ကို အရင်စုစည်းရမယ်…”

စုရှင်းသည် ဤစကားများကို ကြားပြီးနောက် ခေါင်းညိတ်လိုက်သည်။ ၎င်းသည် လိုအပ်သော်လည်း မလုံလောက်သော အခြေအနေတစ်ခု ဖြစ်ကြောင်း သူ နားလည်လိုက်သည်။

ထို့ကြောင့် စုရှင်းက ထပ်မံ မေးမြန်းခဲ့သည်။

“ဒါဆို ဒီ သန္ဓေတည် ဝိညာဉ် လေးမျိုးကို ဘယ်လို ခွဲခြားထားတာလဲ။ ပြီးတော့ ပိုမိုမြင့်မားတဲ့ သန္ဓေတည် ဝိညာဉ်ကို ဘယ်လို ရရှိနိုင်မလဲ။”

ရှန်းနန််ယိုထျန်းက ပြန်ပြောသည်။

“ကလေးငယ် သန့်စင်ဆေးလုံးကို စားသုံးပြီး ကာမ၊ ကြောက်ရွံ့မှု၊ လောဘ၊ မာန၊ နှင့် ဒေါသတည်းဟူသော စမ်းသပ်မှု ငါးခုကို ကျော်ဖြတ်ခြင်းဖြင့် ပိုမိုမြင့်မားတဲ့ သန္ဓေတည် ဝိညာဉ်ကို ရရှိနိုင်တယ်!”

“ကလေးငယ် သန့်စင်ဆေးလုံးကို သောက်ဖို့က မခက်ခဲဘူး။ ဘာလို့ဆို ဂိုဏ်းက ပေးထားတာမို့။ မင်းရဲ့ ကိုးပတ်လည် ရွှေအူတိုင် နည်းစနစ်နဲ့ ကလေးငယ် သန့်စင်ဆေးလုံး သုံးလုံးအထိ သောက်ပြီးရင် မင်းက ပထမတန်းစား သန္ဓေတည် ဝိဉာဉ်ကို တစ်ခါတည်း ရရှိလိမ့်မယ်”

“ပထမတန်းစား သန္ဓေတည် ဝိညာဉ်ကို ရရှိဖို့ကလည်း မခက်ခဲဘူး။ ခက်ခဲတဲ့ အပိုင်းက စမ်းသပ်မှု ငါးခုကို ကျော်ဖြတ်ဖို့ဘဲ။ ကာမ၊ ကြောက်ရွံ့မှု၊ လောဘ၊ မာန၊ နှင့် ဒေါသတည်းဟူသော စမ်းသပ်မှုများကို ကျော်ဖြတ်နိုင်မှသာ မင်းစိတ်က ပိုမိုမြင့်မားတဲ့ သန္ဓေတည် ဝိညာဉ်ကို ရရှိဖို့ လုံလုံလောက်လောက် ခိုင်မာမှာ…”

ဤစကားကို ကြားသောအခါ စုရှင်းသည် ချက်ချင်းပင် ခေါင်းကိုက်လာသည်။ ယခုအချိန်တွင် သူသည် နှလုံးသား၏ စမ်းသပ်မှုများ ပြဿနာကို ဘေးဖယ်ထားလိုက်သော်လည်း ကလေးငယ် သန့်စင်ဆေးလုံးကို ရရှိရန်ပင်လျှင် စုရှင်းအတွက် ပြဿနာတစ်ခု ဖြစ်နေသည်။

အကယ်၍ စုရှင်းတွင် ကလေးငယ် သန့်စင်ဆေးလုံး ဖော်စပ်ရန် လိုအပ်သော ဆေးဖက်ဝင် ပပင်များ မရှိခဲ့ပါက ပြဿနာသည် ကြီးမားလိမ့်မည်။

ထို့ကြောင့် စုရှင်းက အလျင်အမြန် မေးလိုက်သည်။

“ဦးလေး၊ ကလေးငယ် သန့်စင်ဆေးလုံး အတွက် ဆေး ဖော်စပ်နည်းက ဘာလဲ။ တူလေး အရမ်း စိတ်ဝင်စားတယ်…”

ဤစကားကို ကြားသောအခါ ရှန်းနန်ယိုထျန်းက သိချင်စိတ်ဖြင့် ပြောသည်။

“အဲဒါက မင်းအတွက် ဘာအသုံးဝင်မှာလဲ။ မင်းရဲ့ အဆင့်အတန်းနဲ့ ရာထူးအရဆို မင်း ဆေးဖော်ဆောင်ကို သွားပြီး ရယူလိုက်ရုံပဲလေ…”

စုရှင်း: “...”

တောက် သူသာ လောထျန်း အစည်းအဝေးတွင်းက ပစ္စည်းတွေကို ထုတ်ယူလို့ရရင် ဒီမှာ လေပေါနေပါဦးမလား?

စုရှင်းသည် ရှန်းနန်ယိုထျန်းကို မော့ကြည့်လိုက်သည်။

စုရှင်း၏ မျက်လုံးထဲမှ ရိုးသားသော အကြည့်ကို မြင်သောအခါ ရှန်းနန်ယိုထျန်းက သက်ပြင်းချပြီး ပြောသည်။

“ကောင်းပြီလေ၊ ငါ့တူက ဆေးဖော် အတတ်ပညာကို စိတ်ဝင်စား နေပုံရတော့ မင်းရဲ့ ဦးလေးက ကူညီပေးရမှာပေါ့”

ထိုသို့ပြောပြီး ရှန်းနန်ယိုထျန်းက စုရှင်း နဖူးကို လက်ညှိုးဖြင့် ထိုးလိုက်ရာ စုရှင်း၏ စိတ်ထဲတွင် မှတ်ဉာဏ် အစုအဝေးတစ်ခု ပေါ်လာသည်ကို ရုတ်တရက် ခံစားလိုက်ရသည်။

ကလေးငယ် သန့်စင်ဆေးလုံး၏ ဖော်မြူလာ!

အဓိက ပါဝင်ပစ္စည်းမှာ အမြီးသုံးချောင်း ဖီးနစ်မြက်ဖြစ်ပြီး နှင်းကျောက်စိမ်းအရိုး ဂျင်ဆင်းဖြင့် ဖြည့်စွက်ထားသည်…

ဤပါဝင်ပစ္စည်း နှစ်ခုအပြင် ကျန်အရာများမှာ သာမန် ဆေးဖက်ဝင် အပင်များဖြစ်သည်။ ယင်းတို့ကို ရယူရန် စုရှင်း နည်းလမ်း ရှာနိုင်သည်။

သို့သော် အဓိက ကျသည်မှာ ဤပါဝင်ပစ္စည်းနှစ်ခု ဖြစ်သည်။ စုရှင်း တစ်ခါမှပင် မကြားဖူးခဲ့ပေ!

“အခုတော့ ငါ တကယ်ဒုက္ခရောက်ပြီ! နတ်ဘုရား အင်အားဆေးလုံးက ဖော်စပ်ရခက်ပါတယ်ဆိုမှ။ ဒီကလေးငယ် သန့်စင်ဆေးလုံးက လက်လှမ်းကို မမီတော့ဘူး!”

စုရှင်းက သက်ပြင်းချလိုက်သည်။ သူ၏ တစ်ခုတည်းသော မျှော်လင့်ချက်မှာ ဆင်းသက်ဂိုဏ်း၏ ဘဏ္ဍာတိုက် သို့မဟုတ် ချင်းယွင်ကျီ ထားခဲ့သော မျိုးစေ့များတွင် ဤဆေးဖက်ဝင် အပင် နှစ်မျိုး ပါဝင်ရန် ဖြစ်သည်။

စုရှင်းနှင့် ရှန်းနန်ယိုထျန်းတို့သည် လောထျန်း အစည်းအဝေးသို့ အလျင်အမြန် သွားကြသည်။

လမ်းတစ်လျှောက်တွင် ရှန်းနန်ယိုထျန်းက ပြုံးရွှင် ရယ်မောနေသော်လည်း စုရှင်းမှာမူ စိုးရိမ်ပူပန်မှုနှင့် စိတ်ပျက်မှုတို့ကြောင့် မျက်နှာ မအီမသာ ဖြစ်နေသည်။

ရှန်းနန်ယိုထျန်းအား လောထျန်း အစည်းအဝေးသို့ ပို့ဆောင်ပြီးနောက် စုရှင်းသည် ကျမ်းစာဆောင်သို့ မရပ်မနား အလျင်အမြန်သွားကာ ဆေးဖက်ဝင်အပင်များ စာရင်းကို ရှာဖွေခဲ့သည်။ သူသည် အမြီးသုံးချောင်း ဖီးနစ်မြက်နှင့် နှင်းကျောက်စိမ်းအရိုး ဂျင်ဆင်းတို့၏ ပုံပန်းသဏ္ဌာန်နှင့် ၎င်းတို့၏ မျိုးစေ့များကို ခွဲခြားသိရှိနိုင်ပုံတို့ကို မှတ်သားထားခဲ့သည်။

မကြာမီ၊ နှစ်နာရီ ကုန်လွန်သွားပြီး စုရှင်းသည် လက်တွေ့ကမ္ဘာသို့ ပြန်ရောက်လာသည်။

လက်တွေ့ကမ္ဘာသို့ ပြန်ရောက်ပြီးနောက် စုရှင်းက မျက်မှောင်ကြုတ်ကာ သက်ပြင်းချလိုက်သည်။

“ဟူး ဆေးဖက်ဝင် အပင်တွေကို အောင်မြင်စွာ ရှာတွေ့နိုင်ပါစေလို့ မျှော်လင့်ပါတယ်…”

စုရှင်းက သရုပ်ပြ ဖန်သားပြင်ကို ကြည့်လိုက်သည်။

[သင်သည် လောထျန်း အစည်းအဝေးတွင်းမှ ထွက်ခွာပြီး ဝိညာဉ်စိုက်ခင်း ကောင်းချီးမြေသို့ ပြန်ရောက်သွားပြီ ဖြစ်သည်။]

[သင်သည် ချင်းယွင်ကျီ ထားခဲ့သော မျိုးစေ့အိတ် တစ်အိတ်ကို ဖွင့်ပြီး သင်၏ နတ်ဘုရား အာရုံဖြင့် တစ်စေ့ချင်းစီ စစ်ဆေးရာ နောက်ဆုံးတွင် အမြီးသုံးချောင်း ဖီးနစ်မြက် ဖြစ်နိုင်သည့် မျိုးစေ့အချို့ကို တွေ့ရှိခဲ့သည်!]

[သင်သည် ဤမျိုးစေ့များကို စိုက်ပျိုးခဲ့သော်လည်း နှင်းကျောက်စိမ်းအရိုး ဂျင်ဆင်းကို မတွေ့ရှိခဲ့သောကြောင့် အနည်းငယ် စိတ်ညစ်နေခဲ့သည်။ ဆင်းသက်ဂိုဏ်း၏ ဘဏ္ဍာတိုက်တွင် ရှာဖွေတွေ့ရှိရန်သာ မျှော်လင့်နိုင်ခဲ့သည်။]

[နောက်လများတွင် ဆေးလုံးများကို နေ့ရောညပါ ဖော်စပ်ခြင်းအပြင် သင်သည် အမြီးသုံးချောင်း ဖီးနစ်မြက်ကိုလည်း ဂရုတစိုက် စောင့်ရှောက်ခဲ့သည်။ ကံမကောင်းစွာဖြင့် အပင်သည် အလွန် နှေးကွေးစွာ ကြီးထွားခဲ့သည်။ ဖော်မြူလာ၏ မှတ်တမ်းအရ အမြီးသုံးချောင်း ဖီးနစ်မြက်သည် ဖီးနစ်ငှက် ကြိုက်နှစ်သက်သည်ဟု ကောလာဟလ ထွက်သော မြက်တစ်မျိုး ဖြစ်သည်။ ၎င်းသည် နှစ်တစ်ရာလျှင် အမြီးတစ်ချောင်း ပေါက်ပြီး နှစ်သုံးရာကြာမှသာ ရင့်သည်!]

[သို့သော် သင်သည် စောင့်ဆိုင်းရန် မှတစ်ပါး အခြား ရွေးချယ်စရာ မရှိခဲ့ပေ။ သင်သည် ၎င်းကို သစ်သားဓာတ် ဝိညာဉ်စွမ်းအင်ဖြင့် နေ့စဉ် ကျွေးမွေးပြုစုကာ ၎င်းအား အမြစ်စွဲပြီး ပိုမိုစောစီးစွာ အညှောင့်ပေါက်ရန် မျှော်လင့်ခဲ့သည်။]

[တစ်နေ့တွင် ဝမ့်ချင်းရွှမ်က သင့်ကို ရှာဖွေခဲ့ပြီး တစ်ညတည်းဖြင့် သင်တို့ နှစ်ဦးစလုံး ဆင်းသက်ဂိုဏ်းသို့ ဝင်ရောက်ခဲ့သည်။]

[ဆင်းသက်ဂိုဏ်းသို့ ဝင်ရောက်ပြီးနောက် သင်သည် သင်၏ ကျင့်ကြံမှု အဆင့်နှင့် ဆေးဖော်စွမ်းရည်များကို ထုတ်ဖော်ပြသပြီး အကြီးအကဲတစ်ဦး ဖြစ်လာရန် တောင်းဆိုခဲ့သည်။ ဆေးဖော်ခြင်းဆိုင်ရာ ရိုးရှင်းသော လုပ်ငန်းတာဝန် အချို့ကို သင် ပြီးမြောက်သရွေ့ ဆင်းသက်ဂိုဏ်းက သင့်တောင်းဆိုမှုကို သဘောတူကာ သင့်အား အကြီးအကဲရာထူး ပေးအပ်မည် ဖြစ်သည်။]

စုရှင်းသည် ဤအရာကို ကြည့်ပြီး မျက်မှောင် ကြုတ်လိုက်သည်။ အမြီးသုံးချောင်း ဖီးနစ်မြက် စိုက်ပျိုးခြင်းသည် သူထင်ထားသည်ထက် ပိုမိုခက်ခဲသည်။ နှစ်သုံးရာ... သူသာ အပင်များနှင့် ရင်းနှီးမှုရှိပြီး ဝိညာဉ်စွမ်းအားဖြင့် နေ့စဉ် ကျွေးမွေးပြုစုလျှင်ပင်၊ ၎င်းသည် နှစ်ခြောက်ဆယ်မှ ခုနစ်ဆယ်ခန့် ကြာမြင့်ဦးမည် ဖြစ်သည်…

အများဆုံး ပမာဏဖြင့် တွက်ကြည့်လျှင် သရုပ်ပြမှုတစ်ခု အတွက် နှစ်ဆယ့်ငါးနှစ်ကြာလျှင် စုရှင်းသည် သရုပ်ပြမှုကို သုံးကြိမ် အသုံးပြုရမည် ဖြစ်ပြီး ဆုလာဘ်များ ရွေးချယ်ခွင့် သုံးကြိမ်ကို အလဟဿ ဖြုန်းတီးကာ အမြီးသုံးချောင်း ဖီးနစ်မြက်ကို ထုတ်ယူရမည် ဖြစ်သည်။

ဤသည်မှာ စုရှင်း လက်မခံနိုင်သော အရာတစ်ခု ဖြစ်သည်။

“အမြီးသုံးချောင်း ဖီးနစ်မြက် ရင့်ဖို့အတွက် အရှိန်မြှင့်တင်လို့ရမယ့် အခြားနည်းလမ်း မရှိတော့ဘူးလား…”

စုရှင်းသည် ရှန်းနန်ဝိညာဉ် ပျိုးထောင်နည်းကို စဉ်းစားမိသည်။ ၎င်းသည် စကားလုံး သန်းပေါင်းများစွာ ရှိပြီး ဝတ္ထုတစ်ပုဒ်ကဲ့သို့ ကျယ်ပြောလှကာ အဆုံးမရှိ နက်ရှိုင်းသော အတတ်ပညာတစ်ခု ဖြစ်သည်။ စုရှင်းသည် ၎င်းကို အလွတ်ကျက်မှတ်ရန် မဆိုထားနှင့် ဖတ်ရှုရန်ပင် အချိန် မရှိခဲ့ပါ။

ယခုအချိန်အထိ သူ၏ ရှန်းနန် ဝိညာဉ် ပျိုးထောင်နည်းကို ကြက်မွေးမြူခြင်းနှင့် ဝိညာဉ်စုစည်းခြင်း အစီအရင် အကြောင်း လေ့လာခြင်း အတွက်သာ သုံးရသေးသည်။

သို့သော် ယခု စုရှင်းသည် ရှန်းနန် ဝိညာဉ်ပျိုးထောင်နည်းကိုသာ အားကိုးနိုင်တော့မည် ဖြစ်သည်။

ဤအတွေးဖြင့် စုရှင်းသည် သရုပ်ပြခြင်း ဖန်သားပြင်ကို ပြန်ကြည့်လိုက်သည်။

[အမြီးသုံးချောင်း ဖီးနစ်မြက် ရင့်ရန် အချိန် အလွန် ကြာမြင့်မည်ဖြစ်သည်။ သင်သည် ထိုမျှလောက် မစောင့်နိုင်ကြောင်းကို သိရှိ နားလည်ခဲ့သောကြောင့် ချင်းယွင်ကျီ ထားခဲ့သော ရှန်းနန် ဝိညာဉ် ပျိုးထောင်နည်းကို လေ့လာဖတ်ရှုခဲ့သည်။]

[ဤ ရှန်းနန်ဝိညာဉ် ပျိုးထောင်နည်း၏ အကြောင်းအရာများသည် ပင်လယ်ကဲ့သို့ ကျယ်ပြောလှသည်။ ဝိညာဉ်အပင်များ ရင့်မှည့်မှုကို အရှိန် မြှင့်တင်နိုင်သည့် နည်းလမ်းအချို့ကို စာအုပ်အတွင်း ရှာဖွေရန် သင့်အတွက် တစ်လ ကြာမြင့်ခဲ့သည်။]

[မြေနဂါး နည်းပညာသည် မြေဆီလွှာကို အဆက်မပြတ် ထွန်ယက်ရန် အတွက် လယ်ကွင်းများတွင် မြေနဂါးများကို မွေးမြူခြင်း ဖြစ်သည်။ ၎င်းသည် မြေဆီလွှာ၏ ဩဇာဓာတ်ကို ကြွယ်ဝစေသည်...]

[လုံလောက်သော အသက်အရွယ်ရှိသည့် မြေနဂါးများသည် မြေဆီလွှာ၏ ဩဇာဓာတ်ကို အဆပေါင်းများစွာ တိုးမြှင့်ပေးနိုင်သည်။ ထို့ကြောင့် ယင်းမှာ ဝိညာဉ်အပင်များ၏ ရင့်မှည့်မှုကို အရှိန်မြှင့်ပေးနိုင်သည်!]

[ဝိညာဉ်နှင်းရည် နည်းပညာနှင့် ပတ်သက်၍...]

[ဤနည်းပညာသည် ဝိညာဉ်အပင်များပေါ်တွင် နှင်းရည်အဖြစ် စုစည်းနေသော ဝိညာဉ်အနှစ်သာရကို စုဆောင်းကာ သန့်စင်ခြင်းအပေါ် အဓိက ထားသည်။ သန့်စင်ပြီးသော ဝိညာဉ်နှင်းရည်အား အပင်များကို တိုက်ရိုက် ကျွေးမွေးရန် အတွက် အသုံးပြုနိုင်သည်။ ယင်းမှာ ၎င်းတို့၏ ကြီးထွားမှုကို ပိုမိုအရှိန်မြှင့်ကာ ၎င်းတို့၏ အစွမ်းထက်မှုကိုလည်း မြှင့်တင်ပေးနိုင်သည်။]

[ဤနည်းပညာ နှစ်ခုအနက် သင်သည် မည်သည့် နည်းပညာကို ဦးစွာ လေ့လာရန် အာရုံစိုက်မည်နည်း?]

…