ရုတ်တရက် ဉာဏ်အလင်း ရရှိခြင်း၊ နတ်ဘုရား အင်အားဆေးလုံးများ နောက်ဆုံးတွင် ရရှိခြင်း_၂

[ဆယ့်ကိုးနှစ်မြောက်တွင် သင် ဆယ်စုနှစ် တစ်ခုကျော် ကြာအောင် ပြုစုပျိုးထောင်ခဲ့သည့် ဝိညာဉ်တီကောင် ဒါဇင်ပေါင်း များစွာသည် နေ့စဉ် ဝိညာဉ်စွမ်းအင်ဖြင့် ရေချိုးပေးခြင်းကြောင့် ပိုမို ထွားကျိုင်းလာပြီး အသိဉာဏ်များ တိုးပွားလာခဲ့သည်။]

[ဝိညာဉ်တီကောင် တစ်ကောင်သည် လက်မောင်းခန့် လုံးပက်ကြီးလာသည်။ ၎င်းတို့သည် ဝိညာဉ်စိုက်ခင်းကို နေ့စဉ် ပြုစု ပျိုးထောင်သောကြောင့် သင့် စိုက်ခင်း အတွင်းရှိ ဝိညာဉ်အပင်များ၏ ကြီးထွားမှုသည် ပို၍ပင် ကျေနပ်ဖွယ် ကောင်းလာခဲ့သည်။]

[ထိုနှစ်တွင်ပင် သင် စိုက်ပျိုးထားသော အမြီးသုံးချောင်း ဖီးနစ်မြက်သည် ဒုတိယမြောက် ဖီးနစ်အမြီး စတင် ပေါက်ဖွားလာပြီး ရင့်မှည့်ရန် ပိုမို နီးကပ်လာခဲ့သည်။]

[အနှစ် နှစ်ဆယ်မြောက်တွင် သင်သည် သင်၏ ခန္ဓာကိုယ်ကို ဆက်လက်၍ လေ့ကျင့်ခဲ့ရာ နောက်ဆုံးတွင် သင်၏ ရုပ်ပိုင်းဆိုင်ရာ ခွန်အားသည် ၆.၈ သန်းကျင်းသို့ ရောက်ရှိခဲ့သည်။]

[သို့သော် ယခုအခါ သင်သည် တစ်နှစ်လျှင် နှစ်သောင်း သို့မဟုတ် သုံးသောင်းကျင်းသာ တိုးလာနိုင်တော့သည်။ သင့် ခန္ဓာကိုယ်၏ ဖြစ်နိုင်ခြေရှိသော ကန့်သတ်ချက်သည် ၇ သန်းကျင်းခန့်သာ ရှိနိုင်သည်ဟု ခန့်မှန်းရသည်…]

စုရှင်းသည် ဤအရာကို မြင်သောအခါ အနည်းငယ် စိတ်ပျက်သွားသည်။

“ကန့်သတ်ချက်က ခွန်အား ၇ သန်းကျင်းပဲ ရှိတာလား… ဒဏ္ဍာရီလာ နတ်ဆိုးမျိုးနွယ်စုနဲ့ ယှဉ်ရင် အတော်လေး ကွာခြားသေးတာပဲ…”

စုရှင်းသည် ခေါင်းကို အနည်းငယ် ခါယမ်းလိုက်သည်။ အကြောင်းမှာ နတ်ဆိုးမျိုးနွယ်စု၏ ပါရမီရှင်များသည် ၈ သန်းကျင်းအထိ ရောက်ရှိနိုင်သည်ဟု ကောလာဟလများ ထွက်ပေါ်နေသောကြောင့် ဖြစ်သည်။

မွေးရာပါ နတ်ဘုရား အင်အား စွမ်းရည်ကို ပိုင်ဆိုင်ထားသော်လည်း သူ၏ ဖြစ်နိုင်ခြေသည် နတ်ဆိုး မျိုးနွယ်စု၏ ပါရမီရှင် တစ်ဦးထက် နိမ့်ကျနေပုံ ရသည်။ သူသည် နတ်ဆိုး မျိုးနွယ်စု၏ အနည်းငယ် ပိုမို အားကောင်းသော မျိုးဆက်တစ်ခုနှင့် ညီမျှသည့် ခန္ဓာကိုယ် ကျင့်ကြံမှု စွမ်းရည်သာ ရှိပုံရသည်။

[နှစ်ဆယ့်တစ်နှစ်မြောက်တွင် သင်သည် ရှန်းနန် ဝိညာဉ်ပျိုးထောင်ခြင်း နည်းလမ်းရှိ ဝိညာဉ်အပင်များ၏ အသိပညာကို ဆက်လက် လေ့လာခဲ့သည်။ သင်သည် ဝိညာဉ်ဆေး တစ်မျိုးစီ၏ ဆေးဖက်ဝင် ဂုဏ်သတ္တိများ၊ ပါဝင်ပစ္စည်းများ အကြားရှိ ပဋိပက္ခများ အပြင် ဝိညာဉ်ဆေးများအား မည်သို့ စိုက်ပျိုးရမည်ကိုပါ နားလည်လာခဲ့သည်။]

[နှစ်ဆယ့်နှစ်နှစ်မြောက်တွင် သင်သည် အဆုံး၌ သေးငယ်သော ဝိညာဉ် စုစည်းခြင်း အစီအရင်၏ အခြေခံများကို ကျွမ်းကျင်ခဲ့သည်။ သင်သည် အစီအရင်ကို တည်ဆောက်သောအခါ အောင်မြင်ဖို့ ငါးဆယ် ရာခိုင်နှုန်းကျော် သေချာစေနိုင်ခဲ့သည်။ သင်သည် ပတ်ဝန်းကျင်ရှိ ဝိညာဉ်စွမ်းအင်ကို ထိန်းချုပ်ကာ သေးငယ်သော ဝိညာဉ် စုစည်းခြင်း အစီအရင်၏ ခွန်အားကို ထိန်းချုပ်နိုင်ခဲ့သည်။]

[ထိုနှစ်တွင်ပင် နတ်ဆိုးနှိမ်နင်းရေး စခန်း၌ လူသားမျိုးနွယ်နှင့် အခြားသော မျိုးနွယ်များ အကြား တိုက်ခိုက်မှုများ ပြင်းထန်လာခဲ့သည်။ လတိုင်းနီးပါး ကောင်းကင်ဘုံ ဘုရင်နှင့် စစ်ဧကရာဇ် အဆင့် ကျွမ်းကျင်သူများသည် ပြင်းထန်စွာ ဒဏ်ရာရခဲ့ကြသည်။]

[သင်သည် အရိုးပျောက်ဆေး အသုတ်တစ်သုတ်ကို အလျင်အမြန် ပြုလုပ်ခဲ့ပြီး ရှေ့တန်း ကောင်းကင်ဘုံ ဘုရင်အဆင့် ကျွမ်းကျင်သူများ၏ သေဆုံးနှုန်းကို သိသိသာသာ လျှော့ချနိုင်ခဲ့သည်။]

[နှစ်ဆယ့်သုံးနှစ်မြောက်တွင် နတ်ဆိုးနှိမ်နင်းရေး စခန်းသည် ခိုင်မာစွာ တည်ရှိနေဆဲဖြစ်ပြီး လူသားမျိုးနွယ်သည်လည်း ဆက်လက်၍ ခံနိုင်ရည် ရှိခဲ့သည်။]

[နှစ်ဆယ့်လေးနှစ်မြောက်တွင် သင်သည် ဆင်းသက်ဂိုဏ်း၏ လုပ်ကြံ သတ်ဖြတ်ရန် ကြိုးပမ်းမှုကို ခံခဲ့ရသည်။ ၎င်းတို့သည် ဆေးများကို သင် ပြုလုပ်ခဲ့ကြောင်း သိရှိသွားပြီး သင်၏ ပုန်းခိုရာ နေရာကိုပင် ရှာဖွေတွေ့ရှိခဲ့သည်။ ထို့ကြောင့် သူတို့သည် ၎င်းတို့၏ နံရိုးကြားမှ ဆူးညှောင့်ခလုတ် ဖြစ်သော သင့်ကို ဖယ်ရှားရန် အတွက် ကျိုတို မြို့တွင်းသို့ပင် ခိုးဝင်ရန်ပင် ဆန္ဒရှိခဲ့သည်။]

[ကံကောင်းစွာဖြင့် လောရွှေရင်က သင့်ကို ကာကွယ်ပေးခဲ့သည်။ သင်၏ ကိုယ်ပိုင် လုံခြုံရေး အတွက် သင်သည် ဝိညာဉ်စိုက်ခင်း ကောင်းချီးမြေ အတွင်း၌သာ နေရန် ဆုံးဖြတ်ခဲ့ပြီး ထွက်ခွာသည့် အကြိမ် အရေအတွက်ကိုပါ လျှော့ချခဲ့သည်။]

[နှစ်ဆယ့်ငါးနှစ်မြောက်တွင် နတ်ဆိုးနှိမ်နင်းရေး စခန်း၌ လူသားမျိုးနွယ်၏ ထိခိုက်သေဆုံးမှုများ ဆက်လက် မြင့်တက်နေသော်လည်း နှစ်စဉ် လူသစ်များ ထည့်ပေါင်းနေသောကြောင့် ခိုင်မာစွာ တည်ရှိနေဆဲ ဖြစ်သည်။]

[နှစ်ဆယ့်ခြောက်နှစ်မြောက်တွင် နတ်ဆိုး သားရဲများ၏ အဆုံးမရှိသော အုပ်စုကြီးသည် နတ်ဆိုး နှိမ်နင်းရေး စခန်းကို ရူးသွပ်စွာ ဖောက်ထွက်လာခဲ့ပြီး စခန်းသည် ပြိုလဲသွားခဲ့သည်။]

[ထိုနှစ်တွင်ပင် ဧရာမ သားရဲကြီး တစ်ကောင်သည် တကယ့်ကမ္ဘာသို့ ဆင်းသက်လာပြီး ရှားနိုင်ငံ တစ်ခုလုံးကို တစ်ချက်တည်းဖြင့် မျိုချသွားခဲ့သည်။]

[သင် သေဆုံးခဲ့သည်!]

[သင်၏ ‘သေခြင်းကို အန်တုသော မျက်လုံးများ’ စွမ်းရည် အသက်ဝင်လာသည်…]

[ဒင်၊ ဤ သရုပ်ပြခြင်း ပြီးဆုံးပါပြီ!]

သရုပ်ပြခြင်း ပြီးဆုံးပြီးနောက် စုရှင်းသည် ထိုနေရာတွင် ရပ်တန့်သွားသည်။

“ဟာ နတ်ဆိုးနှိမ်နင်းရေး စခန်းက အခြေအနေ ကောင်းနေတဲ့ပုံပါ… ဒါပေမဲ့ နောက်တစ်နှစ်မှာတင် ဖောက်ထွက်သွားတယ်… ဘာတွေဖြစ်ခဲ့တာလဲ?”

စုရှင်းသည် အနည်းငယ် မျက်မှောင်ကြုတ်ကာ လုံးဝ နားမလည်နိုင် ဖြစ်နေသည်။

“စစ်ဧကရာဇ် အဆင့်ရဲ့ အင်အားက နတ်ဆိုး နှိမ်နင်းရေး စခန်းကို ကြာကြာ ထိန်းထားဖို့ မလုံလောက်သေးပုံ ရတယ်… တကယ်ပဲ တစ်နှစ်ပဲ ခံခဲ့တာလား? အရင်က အခြား မျိုးနွယ်တွေက သူတို့ရဲ့ အင်အား အပြည့် မသုံးခဲ့ဘူး ဆိုတာကို ဖော်ပြနေတာဘဲ… မဟုတ်ရင် နတ်ဆိုးနှိမ်နင်းရေး စခန်းက ပိုစောပြီး ဖောက်ထွက်သွားမှာ!”

စုရှင်းသည် သက်ပြင်းချလိုက်သည်။ မလွှဲမရှောင်သာ ဖြစ်မည့် အရာအား သူ မျှော်လင့်ထားသည့် အချိန်ထပ် နည်းသည့် တစ်နှစ် ကြာအောင်သာ ဆွဲဆန့်နိုင်ခဲ့သည်။

“ကောင်းပြီလေ။ သရုပ်ပြခြင်း ဆုလာဘ်တွေကိုပဲ ကြည့်လိုက်ရအောင်! ဒီတစ်ခေါက် ဆုလာဘ်တွေက အရမ်း များမှာပဲ!”

စုရှင်းသည် သရုပ်ပြခြင်း၏ ဆုလာဘ် ရွေးချယ်ရေး ဖန်သားပြင်စီသို့ အကြည့် ရောက်သွားသည်။

[လူအုပ်ကြားမှ အတောက်ပဆုံးကြယ်]: ခရမ်းရောင် စွမ်းရည်။ စွမ်းအင်အမှတ် ၁ သန်းဖြင့် တန်ဖိုးဖြတ်ထားသည်။

[နှစ်ဆယ့်ခြောက်နှစ်ကြာ ဆေးဝါးဗေဒ အတွေ့အကြုံ]: ဆေးဝါးဗေဒဆိုင်ရာ အသိဉာဏ်များ၊ ဆေးဝါး အတွေ့အကြုံတွင် အနည်းငယ် တိုးတက်မှု၊ မှန်ကဲ့သို့ ကြည်လင်သော ဆေးလုံးကို အငယ်တန်းအဆင့် အပြည့်အဝ ကျွမ်းကျင်စွာ သင်ယူထားပြီး၊ နတ်ဘုရား အင်အား ဆေးလုံးကို အဓိက အပြည့်အဝ ကျွမ်းကျင်စွာ သင်ယူထားသည်။ အရိုးပျောက်ဆေးလုံးကို အငယ်တမ်း အပြည့်အဝ ကျွမ်းကျင်စွာ သင်ယူထားခြင်းလည်း ပါဝင်သည်။ စွမ်းအင်အမှတ် ၃ သန်းဖြင့် တန်ဖိုးဖြတ်ထားသည်။

[ရှန်းနန် ဝိညာဉ်ပျိုးထောင်ခြင်း နည်းလမ်း (အစပြုသူ အဆင့်)]: သေးငယ်သော ဝိညာဉ် စုစည်းခြင်း အစီအရင်၊ မြေနဂါး နည်းလမ်းနှင့် နှင်းရည် နည်းလမ်းတွင် အငယ်တန်း အပြည့်အဝ ကျွမ်းကျင်မှု အစပြုသူအဆင့် အတွေ့အကြုံများ ပါဝင်ပြီး စွမ်းအင်အမှတ် ၃ သန်းဖြင့် တန်ဖိုးဖြတ်ထားသည်။

[အမြီး သုံးချောင်းဖီးနစ်မြက် (အပင် ဆယ်ပင်)]: အသက် ၂၈၀ နှစ်ရှိပြီ ဖြစ်သော အမြီးသုံးချောင်း ဖီးနစ်မြက်၊ ရင့်မှည့်ရန် နီးကပ်နေပြီ ဖြစ်သည်။ စွမ်းအင်အမှတ် ၁၀ သန်းဖြင့် တန်ဖိုးဖြတ်ထားသည်။

ဖန်သားပြင်ပေါ်ရှိ ဆုလာဘ်များကို ကြည့်ရင်း စုရှင်းသည် များစွာ မတွန့်ဆုတ်ခဲ့ပေ။

“အင်း၊ ငါလည်း လူအုပ်ကြားမှာ အတောက်ပဆုံးကြယ် ဖြစ်ချင်တာပဲ! ဒါပေမဲ့ ဒီဆေးဝါးဗေဒ အတွေ့အကြုံနဲ့ ရှန်းနန် ဝိညာဉ်ပျိုးထောင်ခြင်း နည်းလမ်းက အရမ်း ဆွဲဆောင်မှု ရှိနေတယ်!”

စုရှင်းသည် သက်ပြင်းချလိုက်သော်လည်း သူ၏ နှုတ်ခမ်းများသည် မထိန်းနိုင်ဘဲ ကော့တက်သွားသည်။

“ငါ ဆေးဝါးဗေဒ အတွေ့အကြုံနဲ့ ရှန်းနန် ဝိညာဉ်ပျိုးထောင်ခြင်း နည်းလမ်းကို ရွေးမယ်!”

[သင်သည် နှစ်ပေါင်း နှစ်ဆယ့်ခြောက်နှစ်ကြာ ဆေးဝါးဗေဒ အတွေ့အကြုံကို အောင်မြင်စွာ ထုတ်ယူခဲ့ပါသည်။ စွမ်းအင်အမှတ် ၃ သန်း သုံးစွဲခဲ့ရာ သင့်တွင် စွမ်းအင်အမှတ် ၁၈,၄၆၃,၀၀၃ ကျန်ရှိသည်။]

[သင်သည် ရှန်းနန် ဝိညာဉ်ပျိုးထောင်ခြင်း နည်းလမ်း (အစပြုသူ အဆင့်) ကို အောင်မြင်စွာ ထုတ်ယူခဲ့ပါသည်။ စွမ်းအင်အမှတ် ၃ သန်း သုံးစွဲခဲ့ရာ သင့်တွင် စွမ်းအင်အမှတ် ၁၅,၄၆၃,၀၀၃ ကျန်ရှိပါသည်။]

သရုပ်ပြခြင်း၏ အသိပေးချက်သံ ဆူရှင်း၏ နားထဲတွင် မြည်လာပြီးနောက် မကြာမီတွင် မှတ်ဉာဏ် များစွာသည် သူ၏ ဦးနှောက်ထဲသို့ ရုတ်တရက် စီးဝင်လာခဲ့သည်။

ဤမှတ်ဉာဏ် အားလုံးသည် သေးငယ်သော ဝိညာဉ် စုစည်းခြင်း အစီအရင်၊ မြေနဂါး နည်းလမ်း၊ နှင်းရည် ဝိညာဉ် နည်းလမ်းနှင့် ဝိညာဉ်အပင်များ စိုက်ပျိုးနည်းဆိုင်ရာ အသိပညာအချို့ အပါအဝင် ရှန်းနန် ဝိညာဉ် ပျိုးထောင်ခြင်း နည်းလမ်းအတွင်း ပါဝင်သော အသိပညာများနှင့် ပတ်သက်သည်။

ထို့နောက် ဆေးဝါးဗေဒ အတွေ့အကြုံများ စီးဝင်လာပြီး စုရှင်းသည် နတ်ဘုရား အင်အား ဆေးလုံးများ ထုတ်လုပ်ခြင်းကို ကျွမ်းကျင်စွာ တတ်မြောက်ခဲ့သည်။ သူသည် ၎င်းတို့ကို လွယ်ကူစွာ ကိုင်တွယ်နိုင်မည်ဟု ခံစားခဲ့ရသည်။ ထို့အပြင် စုရှင်းသည် ကြည်လင်သော မှန်ဆေးလုံးများနှင့် အရိုးကြီးထွား ဆေးလုံးများ ထုတ်လုပ်နည်းကိုလည်း သင်ယူခဲ့သည်။

ပါဝင်ပစ္စည်းများ ရှိသမျှ ကာလပတ်လုံး စုရှင်းသည် အရိုးကြီးထွား ဆေးလုံး အသုတ် တစ်သုတ်ကို အလွယ်တကူ ပြုလုပ်နိုင်သည်ဟု ဆိုနိုင်သည်။

ခဏကြာပြီးနောက် စုရှင်းသည် မျက်လုံးဖွင့်လိုက်သည်။ သူ၏ မျက်နှာသည် အနည်းငယ် အံ့အားသင့်သွားသည်။

“ဟက်~ ဒီ ရှန်းနန် ဝိညာဉ်ပျိုးထောင်ခြင်း နည်းလမ်းက တကယ်ကို အစွမ်းထက်လိုက်တာ…”

စုရှင်းသည် သူ၏ နှုတ်ခမ်းထောင့်ကို တွန့်ကွေးလိုက်သည်။ ရှန်းနန် ဝိညာဉ်ပျိုးထောင်ခြင်း နည်းလမ်းကို အစောကတည်းက မရွေးချယ်ခဲ့သည့် အတွက် သူသည် အနည်းငယ် နောင်တရနေပြီ ဖြစ်သည်။ အကြောင်းမှာ ၎င်းတွင် ပါဝင်သော မန္တန်သုံးခုသည် အလွန် အစွမ်းထက်ပြီး အဆုံးမရှိ နက်နဲသောကြောင့် ဖြစ်သည်။

“နှင်းရည် ဝိညာဉ် နည်းလမ်းကို သင်ယူဖို့ သစ်သားအမျိုးအစား ဒါမှမဟုတ် ရေအမျိုးအစား ဝိညာဉ်အမြစ်တွေ လိုအပ်တယ်… ကံကောင်းစွာနဲ့ ငါ့ရဲ့ သစ်သားအမျိုးအစား ဝိညာဉ်အမြစ်နဲ့ ငါ ရွတ်ဆိုနိုင်တယ်!”

“နှင်းရည် ဝိညာဉ်ကို သောက်သုံးတာက အဆင့်မြင့် ကုသဆေးနဲ့ ညီမျှတယ်။ အဆင့်မြင့် ကုသဆေးဝါး အများအပြား အတွက် အရေးကြီးတဲ့ ပါဝင်ပစ္စည်း ဖြစ်တာကိုတော့ ပြောမနေနဲ့တော့! ဒါကို သင်ယူတာက တကယ်ကို အမြတ်အစွန်းများတဲ့ ကိစ္စပဲ…”

ထို့နောက် စုရှင်းသည် သက်ပြင်း ထပ်ချလိုက်ပြီး ဤသို့ ပြောလိုက်သည်:

“မြေနဂါး နည်းလမ်းကို အခန်းနှစ်ခန်း ခွဲထားတာ နည်းနည်းတော့ နှမြောစရာပဲ။ မြေဆီလွှာရဲ့ ပုံသဏ္ဍာန်နဲ့ တည်ဆောက်ပုံကို ထိန်းချုပ်တဲ့ မန္တန်ကို ရွတ်ဆိုဖို့က မြေဝိညာဉ်အမြစ် လိုအပ်တယ်…”

“အင်း၊ ဒါပေမဲ့ မြေနဂါးကို အမိန့်ပေးတဲ့ နည်းလမ်းကို သင်ယူတာက အတော်လေး ကောင်းပါတယ်။”

စုရှင်းသည် သူ၏ ဂုဏ်သတ္တိ ဖန်သားပြင်ကို ဖွင့်လိုက်သည်။

[အမည်: စုရှင်း]

[အသက်: ၂၁ နှစ်]

[အလုပ်အကိုင်: ကျင့်ကြံသူ (ထူးခြားသော လျှို့ဝှက် အလုပ်အကိုင်)]

[ကျင့်ကြံမှုအဆင့်: သန္ဓေတည် ဝိညာဉ်အဆင့် မဟာပြည့်စုံခြင်း၊ မူလစစ်သည်တော် နယ်ပယ် မဟာပြည့်စုံခြင်း အလွှာ]

[ကျင့်ကြံနည်း: ချန်ချွန်းနည်း၊ ဆေးလုံး ဖော်စပ်ခြင်း လျှို့ဝှက်နည်း]

[စွမ်းရည်: ဓားရူး၊ ဉာဏ်အလင်းများ၊ ဆေးဝါးဗေဒ ပါရမီရှင်၊ အစားကြီးသူ၊ သစ်နှင့်မီး နှစ်မျိုးစပ် စစ်မှန်သော ဝိညာဉ်အမြစ်များ၊ မွေးရာပါ နတ်တန်ခိုး၊ ပန်အန်းကဲ့သို့ ချောမောခြင်း (ချန်လှပ်ထားသည်)…]

[ကျွမ်းကျင်မှုများ: လီမီး (အငယ်တန်း အောင်မြင်မှု)၊ ဆေးဝါးဗေဒ (အငယ်တန်း အောင်မြင်မှု)၊ ဝိညာဉ်ပေါက်ကွဲနည်း (အငယ်တန်း အောင်မြင်မှု)၊ ရှန်းနန် ဝိညာဉ် ပျိုးထောင်ခြင်း နည်းလမ်း (အစပြုသူ အဆင့်)၊ နတ်ဘုရား ဉာဏ်အာရုံ အတိုင်းအတာ (အာရုံငါးပါး နယ်ပယ်)၊ မူလစွမ်းအား ကျွမ်းကျင်မှု (လွှမ်းခြုံအဆင့်)၊ သုံးပါးသော အရည်အချင်း ဓားနည်း (လူ့ဓား အငယ်တန်း အောင်မြင်မှု)]

[ပစ္စည်း: ဝိညာဉ်ဓား မော့ပင်း]

ဤ သရုပ်ပြခြင်းများ မှတစ်ဆင့် စုရှင်းသည် သူ၏ ခွန်အားတွင် သိသာ ထင်ရှားသော တိုးတက်မှုများ ပြုလုပ်ခဲ့သည်။

သူသည် ကျွမ်းကျင်မှုအသစ် အတော်များများကို သင်ယူခဲ့ရုံ သာမက သူ၏ စွမ်းအားသည်လည်း သူ့ လက်ရှိနယ်ပယ်၏ အထွတ်အထိပ်သို့ ရောက်ရှိခဲ့သည်။

“ကောင်းပြီ၊ နောက်တစ်ဆင့်က နတ်ဘုရား အင်အား နယ်ပယ်ကို ဘယ်လို ဖောက်ထွက်ရမလဲ ဆိုတာ ရှာဖွေဖို့ပဲ…”

နယ်ပယ် တစ်ခုကို ဖောက်ထွက်ခြင်းဖြင့် ရရှိမည့် ခွန်အား၏ သိသာထင်ရှားသော တိုးတက်မှုကို စဉ်းစားရုံဖြင့် စုရှင်းသည် စိတ်အားထက်သန်မှု အပြည့် ရှိလာခဲ့သည်။

ထို့ကြောင့် စုရှင်းသည် ဆေးဝါးဗေဒနှင့် ပတ်သက်၍ အလုပ်များလာခဲ့သည်။

မကြာမီ တစ်ပတ် ကြာသွားသည်။

စုရှင်းသည် ဆေးလုံး ခြောက်ထောင်ကို ထုတ်ပိုးပြီးနောက် ကျင်းချုံးရွှယ်ကို သွားတွေ့ခဲ့သည်။

ရိုးရှင်းသော အစားအသောက်နှင့် အရေးကြီးသော ကိစ္စရပ်များကို ဆွေးနွေးပြီးနောက် (တစ်ဦးနှင့်တစ်ဦး စနောက်ခြင်း) စုရှင်းသည် ဝိညာဉ်စိုက်ခင်း ကောင်းချီးမြေသို့ ပြန်လာခဲ့သည်။

ထိုတစ်ပတ်၏ ကုန်ပစ္စည်းများကို သရုပ်ပြခြင်း စွမ်းအင်အဖြစ် ပြောင်းလဲလိုက်ရာ စွမ်းအင် ၁၀ သန်းကျော် တိုးလာခဲ့သည်။

၂၀၂၄ ခုနှစ် ဧပြီလ ၂၉ ရက်နေ့ စုရှင်း၏ မွေးနေ့တွင် သူသည် ပျင်းရိမနေဘဲ သရုပ်ပြခြင်း အသစ်တစ်ခုကို အချိန်မှန် စတင်ခဲ့သည်။

“အင်း၊ ကမ္ဘာ အဆုံးသတ်ဖို့ နှစ်နှစ်ဆယ်လောက်ပဲ ကျန်တော့တယ်။ အင်အားကြီးသူတွေကပဲ မွေးနေ့တွေ ကျင်းပဖို့ ထိုက်တန်ပါတယ်!”

“သရုပ်ပြခြင်းကို စတင်ပါ!”

စုရှင်းသည် သူ့ဘာသာသူ ရေရွတ်လိုက်သည်။

[ဒင်! ဤ သရုပ်ပြခြင်းသည် စွမ်းအင်အမှတ် ၃၄၀၀ ကို သုံးစွဲမည်ဖြစ်သည်။ သင့်တွင် စွမ်းအင်အမှတ် ၂၈,၅၃၄,၃၉၆ နှင့် အကန့်အသတ်မဲ့ သရုပ်ပြခြင်း အခွင့်အရေးများ ကျန်ရှိပါသည်။]

[သရုပ်ပြခြင်း စတင်ပါပြီ!]

[အစိမ်းရောင် စွမ်းရည်တစ်ခုကို ရယူရန် စွမ်းအင်အမှတ် ၁,၀၀၀, အပြာရောင် စွမ်းရည်တစ်ခုကို ရယူရန် စွမ်းအင်အမှတ် ၁၀,၀၀၀၊ ခရမ်းရောင် စွမ်းရည်တစ်ခုကို ရယူရန် စွမ်းအင်အမှတ် ၁၀၀,၀၀၀ ကုန်ကျမည် ဖြစ်သည်။ တစ်ခုကို ရယူလိုပါသလား?]

စုရှင်းသည် လက်များကို စိတ်လှုပ်ရှားစွာ ပွတ်သပ်လိုက်ပြီး စိတ်ထဲမှ ကံကောင်းပါစေဟု ဆုတောင်းလျက် ဤသို့ ရေရွတ်လိုက်သည်:

“ခရမ်းရောင် စွမ်းရည်တစ်ခု ရယူပါ!”

ချက်ချင်း ဆိုသလိုပင် သရုပ်ပြခြင်းမှ အသိပေးချက်သံသည် စုရှင်း၏ နားထဲတွင် မြည်လာသည်။

[ဂုဏ်ယူပါတယ်၊ သင်သည် ခရမ်းရောင် စွမ်းရည် တစ်ခုကို ရရှိခဲ့ပါသည်: ဟာကျူလီယန် ခွန်အား!]

…