ချမ်းသာ ကြွယ်ဝခြင်းဆီသို့ နောက်ထပ် လမ်းကြောင်းတစ်ခု၊ အသက်ရှည်ဆေးလုံး။

စုရှင်းသည် ဖတ်ရင်းမှ ခေါင်းကို အနည်းငယ် ငြိမ့်ကာ “အားလုံးက ငါ မျှော်လင့်ထားတဲ့ အတိုင်းပဲ” ဟု ရေရွတ်လိုက်သည်။

သုံးမြီးဖီးနစ်မြက် ရင့်မှည့်လာသည်၊ နတ်ဘုရား အာရုံ စွမ်းအားသည်လည်း အဆမတန် မြင့်တက်လာသည်…

နောက်တစ်ဆင့်မှာ ဤဆုလာဘ်များကို သူနှင့်အတူ ယူသွားရန်သာ ဖြစ်သည်။ ထိုအခါ နတ်ဘုရား အသွင်ပြောင်းခြင်းသို့ ရောက်ရှိရန် လက်တစ်ကမ်းသာ လိုပါတော့မည်။

“နတ်ဘုရား အသွင် ပြောင်းလဲခြင်း ကျင့်ကြံမှု အဆင့်နဲ့ နတ်ဘုရား အင်အား နယ်ပယ်ရဲ့ မဟာပြည့်စုံခြင်းတို့ ပေါင်းစပ်လိုက်ရင် အဲဒီ ခွေးကောင်ကျုံးကို တိုက်ခိုက်နိုင်လောက်မလား မသိဘူး”

စုရှင်းသည် ခဏတာ စဉ်းစားပြီးနောက် ခေါင်းခါလိုက်သည်။

“မရေရာမှုက အရမ်း ကြီးလွန်းတယ်။

အဲဒီခွေးအိုကြီးက နှစ်ပေါင်း နှစ်ထောင်ကျော် အသက်ရှင်ခဲ့ပြီးတောဘ ခန္ဓာကိုယ်နဲ့ ချီနှစ်မျိုးလုံးကို ကျင့်ကြံတဲ့သူ၊ ထူးခြားတဲ့ အောင်မြင်မှုတွေလည်း အများကြီး ရှိတယ်… ငါ နတ်ဘုရား အသွင် ပြောင်းလဲခြင်း အဆင့်ကို ရောက်သွားရင်တောင် သူ့ကို ယှဉ်နိုင်မှာ မဟုတ်ဘူး ထင်တယ်။”

“ဒါပေမဲ့ နတ်ဘုရား အသွင် ပြောင်းလဲခြင်း ပြီးမှ သူ့ကို ထပ် ရင်ဆိုင်မယ် ဆိုရင်တော့ ဒီလောက် အဖြစ်ဆိုးမှာ မဟုတ်ဘူး…”

စုရှင်းသည် အနည်းငယ် မျှော်လင့်လျက် ဆက်ကြည့်နေသည်။

ကိုယ်ခန္ဓာ သန့်စင်ခြင်း စွမ်းအားရှင်များသည် အဆင့်တူချင်းတွင် အနည်းငယ် ပိုမို အားကောင်းသော်လည်း ချီသန့်စင်ခြင်း၏ နည်းစနစ်များစွာက သူ့ကို ပိုမို ဆွဲဆောင်ကြောင်း စုရှင်း သိသည်။

အထူးသဖြင့် ချီသန့်စင်ခြင်း၏ နည်းလမ်း အမျိုးမျိုးသည် စုရှင်း အတွက်မူ ပိုမို ကြီးမားသော တိုးတက်မှု အတွက် စွမ်းအင်များ ပိုမို ရရှိစေနိုင်သည်။

ဤအချက်ကို စိတ်ထဲတွင် မှတ်သားထားရင်း စုရှင်း၏ အကြည့်သည် သရုပ်ပြခြင်း ဖန်သားပြင်ဆီသို့ ရောက်သွားသည်။

[နှစ်ဆယ့်လေးနှစ်မြောက်တွင် သင်၏ နတ်ဘုရား အာရုံသည် နောက်ဆုံးတွင် အဆင့်တစ်ဆင့် ထပ်မံကျော်လွန်ကာ ပေတစ်ထောင် နယ်ပယ်သို့ ရောက်ရှိသွားခဲ့သည်။]

[သင် ခန့်မှန်းထားသည့် အတိုင်း ပေတစ်ထောင် နတ်ဘုရား အာရုံသည် သန္ဓေတည် ဝိညာဉ်အဆင့်၏ ကန့်သတ်ချက်ပင် ဖြစ်သည်။ ၎င်းကို ဆက်လက် မြှင့်တင်လိုပါက နတ်ဘုရား အသွင် ပြောင်းလဲခြင်း အဆင့်သို့ ထိုးဖောက် ဝင်ရောက်ရမည်။]

[နှစ်ဆယ့်ငါးနှစ်မြောက်တွင် နတ်ဆိုး နှိမ်နင်းရေးစခန်းမှ အခြေအနေသည် ရုတ်တရက် ဆိုးရွားလာခဲ့သည်။ နတ်ဆိုးသားရဲတို့၏ ဒဏ္ဍာရီလာ စစ်တပ်၏ မဆုတ်မနစ်သော တိုက်ခိုက်မှုများ အောက်တွင် ကြီးမားသော အန္တရာယ်နှင့် ရင်ဆိုင်နေရသည်။]

[အချိန်သည် အရေးကြီးကြောင်း သင်သိသောကြောင့် အရာအားလုံးကို ထားခဲ့ပြီး အာတိတ်ဒေသသို့ တစ်ဦးတည်း ခရီးနှင်ခဲ့သည်။]

[သေချာသည်မှာ အာတိတ်ဒေသ၏ အေးခဲသော ရာသီဥတုတွင် သင် ယခင်က စိုက်ပျိုးခဲ့သော နှင်းအရိုး ကျောက် ဂျင်ဆင်းသည် ရင့်မှည့်တော့မည် ဖြစ်သည်။]

[ထို့ကြောင့် ပြင်းထန်သော အအေးဒဏ်ကို ရင်ဆိုင်ကာ သင်သည် နေ့စဉ် ဝိညာဉ် စုဆောင်းရေး အစီအရင်တွင် ထိုင်လျက် သင်၏ ကိုယ်ပိုင် ဝိညာဉ်စွမ်းအားကို အသုံးပြု၍ နှင်းအရိုး ကျောက်ဂျင်ဆင်းကို အမြန် ရင့်မှည့်အောင် လုပ်ဆောင်ခဲ့သည်။]

[တစ်လကြာပြီးနောက် သင်သည် ရင့်မှည့်ပြီးသော နှင်းအရိုး ကျောက်ဂျင်ဆင်း အပင် သုံးဆယ်ကို နောက်ဆုံးတွင် ရရှိခဲ့သည်။]

ဤအချက်ကို မြင်သည်နှင့် စုရှင်း ဝမ်းမြောက်ဝမ်းသာ ဖြစ်သွားသည်။ ဤသရုပ်ပြခြင်း အတွက် သူ၏ ပန်းတိုင်ကို ပြီးမြောက်ခဲ့ပြီ ဖြစ်သည်။

နှင်းအရိုး ကျောက်ဂျင်ဆင်းနှင့် သုံးမြီး ဖီးနစ်မြက်တို့နှင့်အတူ စုရှင်းသည် ကလေး နတ်ဆေးများကို စမ်းသပ် ဖော်စပ်နိုင်ပြီဖြစ်ရာ နတ်ဘုရား အသွင် ပြောင်းလဲခြင်းသည်လည်း ဝေးတော့မည် မဟုတ်ပေ။

“အချိန်အရဆိုရင်တော့ ကမ္ဘာပျက်မယ့်နေ့က နီးနေလောက်ပြီ…”

ဤသို့ တွေးကာ စုရှင်းသည် သရုပ်ပြခြင်း ဖန်သားပြင်ကို ကြည့်လိုက်သည်။

[ကျိုတိုသို့ ပြန်ရောက်သောအခါ နတ်ဆိုး နှိမ်နင်းရေး စခန်းသည် တစ်လခန့် အလိုကပင် ကျဆုံးသွားခဲ့ပြီး လူသားမျိုးနွယ်၏ အထက်ပိုင်း အဆင့်များတွင်လည်း ထိတ်လန့်တုန်လှုပ်မှုများ ဖုံးလွှမ်းနေကြောင်း သင် ကြားသိခဲ့ရသည်။]

[သို့သော် သင်သည် ဤနေ့ကို ကြိုတင် မျှော်မှန်းထားသောကြောင့် မည်သည့် ခံစားချက်မှ မရှိခဲ့ပေ။ သင်၏ လုပ်ငန်းတာဝန် ပြီးဆုံးပြီဟု သိရှိသောကြောင့် သင်သည် နောက်ပိုင်း အချိန်များကို ငြိမ်းချမ်းစွာ ကုန်ဆုံးခဲ့သည်။]

[နောက်သုံးလအတွင်း သင်သည် သင်၏ တာဝန်များ အားလုံးမှ နုတ်ထွက်ခဲ့ပြီး မိသားစု၊ မိတ်ဆွေများနှင့် အတူ အချိန် ကုန်ဆုံးခဲ့သည်။]

[တစ်နေ့တွင် ကောင်းကင်ကို ဖုံးလွှမ်းသွားသော ဧရာမ သားရဲ တစ်ကောင်သည် ကြယ်ပြာသို့ ရောက်ရှိလာပြီး မဟာရှား နိုင်ငံ တစ်ခုလုံးကို တစ်ကိုက်တည်း မျိုချပစ်လိုက်သည်။]

[သင်၏ နောက်ဆုံးအချိန်တွင် သင်သည် ထိုသားရဲအား လက်ခလယ် ထောင်ပြခဲ့သည်။]

[ဒင်၊ သင် သေဆုံးသွားပါပြီ။]

[သင်၏ ခရမ်းရောင် စွမ်းရည် ‘နောင်တမရှိပဲ သေဆုံးခြင်း’ သည် အသက်ဝင်လာသည်။]

[သားရဲ၏ ဝမ်းဗိုက် အတွင်း၌ ပတ်ဝန်းကျင်ရှိ တောင်များနှင့် ပင်လယ်များသည် အစာကြေပြီး စားသုံးခံနေရသည်ကို သင် မြင်တွေ့ရသည်။ ထိုသတ္တဝါ၏ အစာအိမ်သည် ကြောက်မက်ဖွယ် ကောင်းသော တွင်းနက်ကြီးနှင့်တူသည်။ ၎င်းသည် အရာအားလုံးကို မျိုချနေသည်။]

[ဒင်၊ ဤသရုပ်ပြခြင်း ပြီးဆုံးပါပြီ။]

စုရှင်းသည် သရုပ်ပြခြင်းကို ကြည့်ရှု၍ ပြီးစီးသောအခါ ခေါင်းကို အနည်းငယ် ငြိမ့်လိုက်သည်။

သရုပ်ပြခြင်းတွင် သေဆုံးခဲ့ရသော်လည်း စုရှင်း၏ ရည်ရွယ်ချက်များမှာ ပြည့်ဝခဲ့ပြီ ဖြစ်သည်။

“ဒါပေမဲ့ ဒီ ‘နောင်တမရှိပဲ သေဆုံးခြင်း’ က အချက်အလက် တချို့ကို ပြန်ယူလာပေးပုံရတယ်… သားရဲရဲ့ အစာအိမ် တစ်ခုတည်းက ဒီလို ကြောက်မက်ဖွယ် စွမ်းအားမျိုး ပိုင်ဆိုင်နေတာလား။”

အတွင်းစိတ်မှ အံ့အားသင့်ရင်း စုရှင်းသည် တိုင်းတစ်ပါး မျိုးနွယ်၏ ကြောက်မက်ဖွယ်ရာများကို ပိုမို သိရှိလာခဲ့သည်။

“ကောင်းပါပြီ၊ ဒီကိစ္စတွေက ငါ့အတွက်တော့ ဝေးလွန်းသေးတယ်။ လက်ရှိ ပြဿနာတွေကိုပဲ အာရုံစိုက်တာ ပိုကောင်းမယ်… ဆုလာဘ်တွေ ရွေးချယ်ဖို့ အချိန်တန်ပြီ!”

စုရှင်းသည် သရုပ်ပြခြင်းမှ ဆုလာဘ်များဆီသို့ အာရုံ ပြောင်းလိုက်သည်။

[မျိုးဆက်များစွာ]: ခရမ်းရောင် စွမ်းရည်၊ စွမ်းအင်မှတ် ၁ သန်း။

[နှစ်ဆယ့်ငါးနှစ်တာ ဆေးဖော်စပ်မှု အတွေ့အကြုံ]: ဆေးဖော်စပ်ခြင်းဆိုင်ရာ ထိုးထွင်းဉာဏ်၊ ဆေးဖော်စပ်မှု အတွေ့အကြုံအချို့ ပါဝင်သည်၊ စွမ်းအင်မှတ် ၆ သိန်း။

[နတ်ဘုရား အင်အား နယ်ပယ် တတိယအလွှာ]: ကိုယ်ခန္ဓာသန့်စင်ခြင်း ကျင့်ကြံမှုအဆင့်၊ စွမ်းအင်မှတ် သန်း ၂၀။

[ရှန်းနန် ဝိညာဉ် ပျိုးထောင်ခြင်း နည်းစနစ် အတွေ့အကြုံ]: သီးနှံနှင့် ဝိညာဉ်များ ကျင့်ကြံမှု၊ စွမ်းအင်မှတ် ၁ သန်း။

[သုံးမြီးဖီးနစ်မြက် ဆယ်ပင်]: နှစ်သုံးရာသား၊ ရင့်မှည့်ပြီးသော သုံးမြီးဖီးနစ်မြက်၊ စွမ်းအင်မှတ် ၁၅သန်း။

[နှင်းအရိုး ကျောက်ဂျင်ဆင်း အပင် သုံးဆယ်]: ရင့်မှည့်ပြီးသော နှင်းအရိုး ကျောက်ဂျင်ဆင်း၊ ချိုးဖျက်ခြင်းနှင့် ပြန်လည်ဖွဲ့စည်းခြင်း ဆေးဖက်ဝင် ဂုဏ်သတ္တိများ ပါဝင်သည်၊ စွမ်းအင်မှတ် ၁၅သန်း။

[နတ်ဘုရား အာရုံ ပေတစ်ထောင် (အာရုံငါးပါး နယ်ပယ်)]: ပေတစ်ထောင် ကျယ်ဝန်းသော နတ်ဘုရား အာရုံ ပိုင်ဆိုင်သည်၊ ပေတစ်ထောင် အတွင်း လေတိုက်ခတ်မှုနှင့် မြက်ပင်များ၏ လှုပ်ရှားမှုများကိုပါ ခံစားသိရှိနိုင်သည်၊ စွမ်းအင်မှတ် ၉.၅ သန်း။

[အရိုးဓား (အလယ်အလတ်အဆင့် ရတနာပစ္စည်း)] - သန့်စင်ပြီးသား လူအရိုးများမှ ထုလုပ်ထားကာ ရန်လိုသော ဝိညာဉ်များစွာဖြင့် စုစည်းထားသည်။ တိုက်ခိုက်လျှင် ဝိညာဉ်စားသုံးသော ထိခိုက်မှု ဖြစ်စေသည်၊ စွမ်းအင်မှတ် သန်း ၃၀။

[ဝိညာဥ်ဆေးလုံး တစ်ခြမ်း] - ဝိညာဥ်ကို တစ်ကြိမ် တွေ့ကြုံခံစားရမည်၊ သောက်သုံးခြင်းဖြင့် အိပ်ပျော်ခြင်းကို ဖြစ်စေပြီး အသက်ကို ရှည်စေသည်။ သို့သော် တစ်ခြမ်းသာ ကျန်ရှိသည့် အတွက် ထာဝရ အိပ်ပျော်သွားနိုင်သည့် အခွင့်အရေးလည်း ရှိသည်။ စွမ်းအင်မှတ် ၅ သိန်း။

[ဝိညာဉ်ခေါ် နဖူးစည်း] - အမြင့်ဆုံး မှော်ပစ္စည်း၊ နစ်နာသော ဝိညာဉ်များကို ဖိတ်ခေါ်နိုင်သည်၊ စွမ်းအင်မှတ် ၈ သန်း။

[ရှစ်မြှောင့်ဗေဒင် နည်းစနစ် (မပြည့်စုံ)] - ကောင်းကင်အဆင့် လျှို့ဝှက်နည်းစနစ်၊ ကံကြမ္မာနှင့် ကံဆိုးခြင်းများကို ဟောကိန်းထုတ်နိုင်သည်၊ စွမ်းအင်မှတ် သန်း ၇၀။

ဆုလာဘ်များကို မြင်ပြီးနောက် စုရှင်းသည် ခဏတာ ကြောင်အမ်းသွားသည်။ ဤသရုပ်ပြခြင်းမှ ရွေးချယ်စရာများမှာ အမှန်ပင် များပြားလှသည်။

၎င်းတို့အနက် အများစုကို ခွေးကောင်ကျုံးထံမှ လုယက်၍ ရရှိခဲ့ခြင်းဖြစ်ပြီး ယင်းသည် သူ့၏ ဥစ္စာဓန များပြားမှုကို ပြသနေသည်။ သို့သော် ၎င်းတို့အနက် အများစုမှာ မပြည့်စုံသောကြောင့် စုရှင်းအတွက် အသုံးမဝင်သည်မှာ ဝမ်းနည်းစရာပင်။

စုရှင်းသည် ရွေးချယ်စရာ ဆုလာဘ်များကို ကြည့်ရှုရင်း စဉ်းစားလိုက်သည်။

“စွမ်းရည်တွေကတော့ ပြောစရာတောင် ‌မလိုပါဘူး၊ ရွေးချယ်ဖို့ မဖြစ်နိုင်ဘူး… ပြီးတော့ အဓိပ္ပာယ်မရှိတဲ့ ‘မျိုးဆက်များစွာ’ လိုမျိုးကလည်း ခရမ်းရောင် စွမ်းရည်အဖြစ် သတ်မှတ်ခံရနိုင်တယ်ဆိုတာ ဘယ်သူသိမှာလဲ။”

“ဆေးဖော်စပ်မှု အတွေ့အကြုံ အတွက်ကတော့ ကျင့်ကြံမှုအဆင့်က အရေးမကြီးသေးဘူး။”

“ခွေးကောင် ကျုံးရဲ့ မှော်ပစ္စည်းတွေနဲ့ လျှို့ဝှက် နည်းစနစ်တွေထဲမှာ အဲဒီဓားကလွဲရင် ကျန်တာတွေက မပြည့်စုံဘူး၊ ရွေးချယ်ရင်တောင် အသုံးဝင်မှာ မဟုတ်ဘူး… ပြီးတော့ စျေးတွေကလည်း အရမ်းကြီးတယ်။”

စုရှင်းသည် ခေတ္တ တွေဝေသွားပြီး အရိုးဓား၏ ဖော်ပြချက်ကို စူးစိုက်ကြည့်လိုက်သည်။

“တကယ်တော့ အလယ်အလတ်အဆင့် ရတနာပစ္စည်းတဲ့… စွမ်းအင်မှတ် သန်း ၃၀ တောင် ပေးရတာ၊ မင်ရေခဲဓားထက်တောင် စျေးပိုကြီးတယ်။ ဒါဆို မင်ရေခဲဓားက အဆင့်နိမ့် ရတနာပစ္စည်း အဆင့်ပဲ ရှိတာလား။”

စုရှင်း သိသလောက် စွမ်းအားရှင်များ၏ မှော်ပစ္စည်းများကို အဆင့်နိမ့်မှ အဆင့်မြင့်သို့ အဆင့် သတ်မှတ်ရာတွင်-

အဆောင်ပစ္စည်းများ၊ မှော်ပစ္စည်းများ၊ ရတနာပစ္စည်းများ၊ ဝိညာဉ်ပစ္စည်းများ…

ဝိညာဉ်ပစ္စည်းများ အထက်တွင်မူ ဒဏ္ဍာရီလာ နတ်ပစ္စည်းများ ဖြစ်ကြသည်။

…