ဂိမ်းမြေအောက်စခန်းအသစ် သေမင်းမျှော်စင်ရဲ့ ပထမဆုံး အထပ် ၃၃ ထပ်

တားမြစ်နယ်မြေသုံးခုကနေ အရမ်းထူးဆန်းတဲ့ မငြိမ်သက်မှုတွေ ထွက်ပေါ်လာတယ်။ ပြင်းထန်တဲ့ ဆွေးမြေ့ခြင်းအငွေ့အသက်တွေ လွှမ်းခြုံနေပြီး မြူခိုးခပ်ပါးပါးတွေက တားမြစ်နယ်မြေထဲကနေ ပျံ့နှံ့ထွက်လာတယ်။

ဒီမြူခိုးတွေ ဖြတ်သွားတဲ့နေရာတိုင်းမှာ အရာအားလုံးက ညှိုးနွမ်းသွားတယ်။ အသက်စွမ်းအင်နဲ့ စွမ်းအင်တွေအားလုံး အကုန်စုပ်ယူခံလိုက်ရတယ်။‌ နေရာတစ်ခုလုံးကသံချေးတက်သွားတာနဲ့တူပြီး၊ အညိုရင့်ရောင်အစက်အပျောက်တွေ ပေါ်လာတယ်။ ပတ်ဝန်းကျင်က ပျက်စီးယိုယွင်းနေတဲ့ နယ်မြေတစ်ခု ဖြစ်သွားပေမယ့် ပျံ့နှံ့လာတဲ့မြူခိုးတွေကို မမြင်ရတဲ့စွမ်းအားတစ်ခုက တားဆီးလိုက်ပြီး တားမြစ်နယ်မြေနဲ့ ဆယ်မီတာအကွာမှာ ရပ်တန့်သွားစေတယ်။

"ဒီထူးခြားဖြစ်စဉ်က အင်မော်တယ်တွေ တက်လှမ်းသလိုပဲ။ ကောင်းကင်နဲ့မြေကြီးရဲ့ မဟာတာအိုက သူ့နောက်ကို လိုက်နေတယ်။ ဒီချီမင်က… ကောင်းကင်နဲ့မြေကြီးမဟာတာအိုရဲ့ သားများ ဖြစ်နေမလား။ မဟုတ်ရင် ဘာလို့ ဒီလိုမြင်ကွင်းမျိုး ပေါ်လာတာလဲ။"

"ရှုပ်ထွေးမှု ကမြင့်တက်လာတော့မယ်၊ သေချာပေါက်ကြောက်မက်ဖွယ်ကောင်းတဲ့ ပါရမီရှင်တွေ ပေါ်ထွက်လာလိမ့်မယ်…"

"ဟားဟားဟား… ငါ့ရဲ့ကိုယ်ပိုင်တပည့်ဆိုတဲ့အတိုင်းပဲ…"

တားမြစ်နယ်မြေသုံးခုမှာ ကောင်းကင်ဘုံဉာဏ်အလင်းဂိုဏ်းရဲ့ ဘိုးဘေးသုံးပါးရဲ့အသံတွေက တစ်ယောက်ပြီးတစ်ယောက် ထွက်ပေါ်လာတယ်။

တားမြစ်နယ်မြေသုံးခုမှာ ကိုယ်တိုင်စည်းခတ်ပြီး နေနေကြတဲ့ ဘိုးဘေးသုံးပါးက ချီမင်ဖန်တီးလိုက်တဲ့ ထူးခြားဖြစ်စဉ်ကြောင့် တကယ်ပဲ သတိပေးခံလိုက်ရပြီး သူတို့ ခဏပြန်လည်နိုးထလာကြတယ်။

မကြာခင်မှာပဲ သူတို့က ပြန်လည်အိပ်စက်သွားကြပြီး အကြာကြီး မနိုးလာဘူး။

တဖြည်းဖြည်းနဲ့…

တားမြစ်နယ်မြေသုံးခုက တုန်ခါမှုတွေက ဖြည်းဖြည်းချင်း ငြိမ်သက်သွားတယ်။

ကောင်းကင်လျှို့ဝှက်ချက်အိမ်တော်ထဲမှာတော့။

ချီမင်ရဲ့အဆင့်တက်ခြင်းက နောက်ဆုံးအခိုက်အတန့်ကို ရောက်နေပြီ။ သူက သန့်စင်ခြင်းသုံးပါးတာအိုကျမ်းနဲ့ ကောင်းကင်နဲ့မြေကြီးရဲ့ မဟာတာအိုကို နားလည်သဘောပေါက်သွားတယ်။ ပြီးတော့ သူက တာအိုကျမ်းနဲ့ လျှို့ဝှက်နက်နဲနည်းစနစ်ကိုသုံးပြီး ကောင်းကင်နဲ့မြေကြီးရဲ့ မဟာတာအိုအနှစ်သာရဝိညာဉ်ကို ဖွဲ့တည်လိုက်တယ်။

ပြီးတော့ ကောင်းကင်နဲ့မြေကြီးရဲ့ မဟာတာအိုအနှစ်သာရဝိညာဉ်က သန့်စင်ခြင်းသုံးပါးအခြေတည်ဝိညာဉ်နဲ့ ပေါင်းစပ်သွားတယ်။

ချီမင်ရဲ့အသိစိတ်နဲ့ စစ်မှန်ဝိညာဉ်ကိုလည်း အခြေတည်ဝိညာဉ်ထဲမှာ ထားလို့ရပြီ။ ဒါ့အပြင် သူတို့က သူ့ရဲ့ရုပ်ခန္ဓာကနေ ထွက်ခွာပြီး ကမ္ဘာကြီးထဲမှာ လှည့်လည်သွားလာနိုင်ပြီ။ ဒါ့အပြင် သူက ကောင်းကင်နဲ့မြေကြီးရဲ့ စွမ်းအားကိုလည်း ထိန်းချုပ်နိုင်သွားတယ်။

သူ့ခန္ဓာကိုယ်ထဲမှာ ဓမ္မစွမ်းအင်တွေက မြင့်တက်လာတယ်။

အဆုံးမရှိသလိုပဲ။

ဘုန်း!

ချီမင်ရဲ့တစ်ကိုယ်လုံး တုန်ခါသွားတယ်။ သူ့ရဲ့ကျင့်ကြံမှုအဆင့်က ဗလာနယ်စွန့်ခွာခြင်းအဆင့်ကို အောင်အောင်မြင်မြင် ချိုးဖြတ်သွားတယ်။ သူက သူ့ရဲ့ဓမ္မစွမ်းအင်နဲ့ နယ်ပယ်ကို ခိုင်မာအောင်လုပ်နေပြီး ထုတ်လွှတ်နေတဲ့အရှိန်အဝါက ပိုပြီးမြင့်မားတဲ့အဆင့်ကို ရောက်လာတယ်။

ကောင်းကင်လျှို့ဝှက်ချက်အိမ်တော်အပြင်ဘက်မှာ ချီမင်ရဲ့ကျင့်ကြံမှုအဆင့်တက်ခြင်းကြောင့် ဖြစ်ပေါ်လာတဲ့ ထူးခြားဖြစ်စဉ်ကလည်း အထွတ်အထိပ်ကို ရောက်ရှိသွားတယ်။

ကောင်းကင်ဘုံဉာဏ်အလင်းအင်မော်တယ်တောင်ပေါ်က လူတိုင်း မော့ကြည့်နေကြတယ်။

ထိတ်လန့်နေတဲ့အသံတွေ ထွက်ပေါ်လာတယ်။

သူတို့ရဲ့အကြည့်တွေက ကောင်းကင်လျှို့ဝှက်ချက်အိမ်တော်ဘက်ကို မကြည့်ဘဲမနေနိုင်အောင် ဖြစ်နေကြတယ်။

"ကောင်းကင်လျှို့ဝှက်ချက်အိမ်တော်၊ ကောင်းကင်လျှို့ဝှက်ချက်အိမ်တော်ပဲ ထပ်ဖြစ်ပြန်ပြီ…"

"ထူးခြားဖြစ်စဉ်ရဲ့အရင်းအမြစ်က ကောင်းကင်လျှို့ဝှက်ချက်အိမ်တော်ပဲ။ တစ်နည်းပြောရရင် ဒီထူးခြားဖြစ်စဉ်ကို ချီမင်က ဖန်တီးတာပဲ။"

"ဒါ… ဒါက…"

"ဒီတစ်ခေါက် ကောင်းကင်နဲ့မြေကြီးရဲ့ ထူးခြားဖြစ်စဉ်က အရင်ကထက် အနည်းဆုံးဆယ်ဆလောက် ပိုကြီးတယ်။ ဒီလိုကမ္ဘာကိုတုန်လှုပ်စေတဲ့ ထူးခြားဖြစ်စဉ်က မိုင် ၃၀၀ ကျယ်ဝန်းတဲ့နေရာကို ဖုံးလွှမ်းသွားတယ်။ ကောင်းကင်နဲ့မြေကြီးရဲ့ တာအိုသံစဉ်က အရပ်မျက်နှာတိုင်းကို ပဲ့တင်ထပ်နေတယ်။ ဒါက အရမ်းကိုကျယ်ပြန့်ပြီး တကယ့်ကို တုန်လှုပ်စရာကောင်းလွန်းတယ်။"

"ဒါဆို ချီမင်ရဲ့ကျင့်ကြံမှုအဆင့်က ဗလာနယ်စွန့်ခွာခြင်းအဆင့်ကို ရောက်သွားပြီလား။ ဒါက ချီမင် ဗလာနယ်စွန့်ခွာခြင်းအဆင့်ကို ချိုးဖြတ်သွားလို့ ဖြစ်ပေါ်လာတဲ့ ထူးခြားဖြစ်စဉ်လား။ မသိတဲ့လူတွေသာဆိုရင် တစ်ယောက်ယောက်က အင်မော်တယ်ဖြစ်ပြီး အထက်ကမ္ဘာကို တက်လှမ်းတော့မယ်လို့ တကယ်ထင်မိကြမှာပဲ။"

"ဒါက အရမ်းကို တုန်လှုပ်စရာကောင်းလွန်းတယ်။"

"ချီမင်က အခြေတည်ဝိညာဉ်အဆင့်ကနေ ဗလာနယ်စွန့်ခွာခြင်းအဆင့်ကို ချိုးဖြတ်တာနဲ့ပဲ ဒီလောက်ကြီးမားတဲ့ လှုပ်ခတ်မှုတွေဖြစ်စေတာ။ ချီမင်က ဝိညာဉ်ဖွဲ့တည်ခြင်းအဆင့် ဒါမှမဟုတ် တာအိုပေါင်းစည်းခြင်းအဆင့်ကို ချိုးဖြတ်တဲ့အခါ ဘာတွေဖြစ်လာမလဲဆိုတာ ငါတော့တကယ့်ကို မတွေးတတ်တော့ဘူး။"

ပတ်ဝန်းကျင်မှာ ကောင်းကင်ဘုံဉာဏ်အလင်းအင်မော်တယ်တောင်ရဲ့ မျိုးနွယ်ဆယ့်နှစ်ခုက မဟာအကြီးအကဲတွေနဲ့ မျိုးနွယ်ဆယ့်နှစ်ခုက အမွေခံတပည့်တွေက အံ့ဩတဲ့အသံတွေ မထွက်ဘဲမနေနိုင်ကြတော့ဘူး။

မကြာခင်မှာပဲ ထူးခြားဖြစ်စဉ်က ငြိမ်သက်သွားတယ်။

တဖြည်းဖြည်းနဲ့ ပျောက်ကွယ်သွားတယ်။

ညနေပိုင်းမှာတော့ ကောင်းကင်ဘုံဉာဏ်အလင်းအင်မော်တယ်တောင်ရဲ့ မျိုးနွယ်ဆယ့်နှစ်ခုက အမွေခံတပည့်တော်တော်များများနဲ့ မျိုးနွယ်ဆယ့်နှစ်ခုက မဟာအကြီးအကဲတွေက ကောင်းကင်လျှို့ဝှက်ချက်အိမ်တော်ကို တစ်ယောက်ပြီးတစ်ယောက် ချီမင်ကို လာတွေ့ကြတယ်။

ဒီတစ်ခေါက်တော့ သူတို့က တကယ်ကို လာတွေ့တာဖြစ်ပြီး အရင်ကလိုမဟုတ်ဘူး။ အရင်ကဆို အပေါ်ယံကတော့ လာတွေ့တာပုံစံမျိုးပေမဲ့ တကယ်တမ်းတော့ ချီမင်နဲ့ ယှဉ်ပြိုင်တိုက်ခိုက်ဖို့ လာရှာကြတာဖြစ်တယ်။

ဒီလိုအခြေအနေမျိုးအောက်မှာ ချီမင်က တံခါးဖွင့်ပြီး ကောင်းကင်ဘုံဉာဏ်အလင်းအင်မော်တယ်တောင်ရဲ့ မျိုးနွယ်ဆယ့်နှစ်ခုက အမွေခံတပည့်တွေကို ကြိုဆိုတယ်။ သူက မဟာအကြီးအကဲတွေကိုလည်း အရမ်းကို နွေးနွေးထွေးထွေး ကြိုဆိုတယ်။

ပြီးတော့ ဂိုဏ်းချုပ်ရှစ်ယောက်က ဒီအခွင့်အရေးကိုအသုံးချပြီး ကောင်းကင်ဘုံဉာဏ်အလင်းအင်မော်တယ်တောင်ပေါ်မှာ ပေါ်ထွက်လာကြတယ်။ တာအိုပေါင်းစည်းခြင်း နှောင်းပိုင်းအဆင့် ကျွမ်းကျင်သူရှစ်ယောက်က ကောင်းကင်ဘုံဉာဏ်အလင်းအင်မော်တယ်တောင်ရဲ့ မျိုးနွယ်ဆယ့်နှစ်ခုလုံးရဲ့ အာရုံစိုက်မှုကို ခံလိုက်ရတယ်။ မဟာအကြီးအကဲတွေလည်း တော်တော်လေး တုန်လှုပ်သွားကြတယ်။

"ကောင်းကင်လျှို့ဝှက်ချက်မျိုးနွယ်မှာ တကယ်ပဲ တာအိုပေါင်းစည်းခြင်း နှောင်းပိုင်းအဆင့် ကျွမ်းကျင်သူရှစ်ယောက်တောင် ရှိနေတာလား။"

"အရင်တုန်းက ဘာလို့ငါတို့ ဒါကိုမသိကြတာလဲ။"

"ဒါက…"

"ကောင်းကင်လျှို့ဝှက်ချက်မျိုးနွယ်က ချီမင်ရဲ့လက်ထဲမှာ တကယ်ပဲ ပြန်ပြီးထွန်းတောက်လာတော့မှာလား။"

"ဒါက ကောင်းတဲ့ကိစ္စပဲ။"

"ကောင်းကင်လျှို့ဝှက်ချက်မျိုးနွယ်က အချိန်အကြာကြီး ကျဆင်းနေပြီး တကယ့်ကို မတိုးတက်လာဘူး။ ဒါ့အပြင် ကောင်းကင်လျှို့ဝှက်ချက်မျိုးနွယ် ကျဆင်းသွားတာက ကောင်းကင်ဘုံဉာဏ်အလင်းဂိုဏ်းရဲ့အင်အားကိုလည်း အကြီးအကျယ် ကျဆင်းစေတယ်။ ကောင်းကင်လျှို့ဝှက်ချက်မျိုးနွယ်သာ ပြန်ပြီးထွန်းတောက်လာနိုင်ရင် ဒါက ကောင်းကင်ဘုံဉာဏ်အလင်းဂိုဏ်းအတွက် အရမ်းကောင်းတဲ့ကိစ္စပဲ။"

"ဟုတ်တယ်၊ ဟုတ်တယ်။"

"အဲ့ဒီအခါကျရင် ကောင်းကင်ဘုံဉာဏ်အလင်းဂိုဏ်းရဲ့အစွမ်းက ပိုပြီးတော့တောင် အားကောင်းလာလိမ့်မယ်။"

မဟာအကြီးအကဲတွေက တိတ်တဆိတ် ဆွေးနွေးနေကြတယ်။

မျက်စိတစ်မှိတ်အတွင်းမှာပဲ ညဉ့်နက်သွားပြီး မဟာအကြီးအကဲတွေလည်း ပြန်သွားကြတယ်။

ချီမင် အဆင့်တက်သွားတာနဲ့အမျှ အလိုအ‌လျောက်ကျင့်ကြံခြင်းစနစ်ကလည်း သက်ဆိုင်ရာ ပြောင်းလဲမှုတွေ ဆက်တိုက်ဖြစ်ပေါ်တယ်။

အသိပေးချက်တစ်ခု ပေါ်လာတယ်။

တင်း!

"လက်ခံသူရဲ့ ကျင့်ကြံမှုအဆင့်က ဗလာနယ်စွန့်ခွာခြင်း အစောပိုင်းအဆင့်သို့ တိုးတက်သွားတာကိုစစ် ဆေးမိပါတယ်။ အလိုအလျောက်ကျင့်ကြံခြင်းအတွက် လိုအပ်တဲ့ဝိညာဉ်ကျောက်တုံးအရေအတွက်က ဆယ်ဆ တိုးမြင့်သွားပါတယ်။မြှင့်တင်မှုတစ်ခုစီအတွက် အဆင့်နိမ့်ဝိညာဉ်ကျောက်တုံး ၁၀၀ ကုန်ကျပါမည်။"

"ကုန်ကျတာက ဆယ်ဆတောင် ထပ်တိုးသွားပြန်ပြီ။"

ချီမင်က ခဏလောက်စဉ်းစားပြီး ပြောလိုက်တယ်၊ "ဒါပေါ့၊ ဆယ်ဆတိုးသွားရင်တောင် ငါက ဂရုစိုက်စရာမလိုဘူး၊ ဘာလို့လဲဆိုတော့ ငါနေ့တိုင်းရနေတဲ့ ဝိညာဉ်ကျောက်တုံးအရေအတွက်က လုံးဝကို လုံလောက်နေတယ်။"

ကံမကောင်းစွာနဲ့ပဲ ချီမင်ရဲ့အရည်အသွေးက ဒီတစ်ခေါက်အဆင့်တက်ပြီးနောက်ပိုင်းမှာ ပြောင်းလဲမသွားဘူး။ သန့်စင်ခြင်းသုံးပါးတာအိုကျမ်းက ဗလာနယ်စွန့်ခွာခြင်းအဆင့်ကို ချိုးဖြတ်သွားမှသာ ချီမင်ရဲ့အရည်အသွေးက တိုးတက်ပြီး သူ့ရဲ့ခန္ဓာကိုယ်နဲ့ဝိညာဉ်ကို ပြောင်းလဲစေနိုင်မှာဖြစ်တယ်။

တင်း!

"လက်ခံသူရဲ့ကျင့်ကြံမှုအဆင့်ကဗလာနယ်စွန့်ခွာခြင်းအဆင့်သို့ တိုးတက်သွားသောကြောင့် အလိုအလျောက်ကျင့်ကြံခြင်းစနစ်ရဲ့အမြင့်ဆုံးမြှင့်တင်မှုကအဆတစ်သန်းမှ အဆဆယ်သန်းသို့ တိုးမြင့်သွားပါတယ်။"

နောက်ထပ်အသိပေးချက်တစ်ခု ပေါ်လာတယ်။

"ကောင်းပြီ။"

ချီမင်ရဲ့နှုတ်ခမ်းထောင့်တွေက ကွေးတက်သွားတယ်၊ "တကယ်ပဲ ဆယ်ဆတိုးသွားတာပဲ။"

"ငါ အဆင့်မြင့်ဝိညာဉ်ကျောက်တုံး တစ်သိန်းဖြည့်ပြီး သန့်စင်ခြင်းသုံးပါးတာအိုကျမ်းကို ကျင့်ကြံမယ်။" ချီမင်က ပြောလိုက်တယ်။

တင်း!

"ဖြည့်သွင်းခြင်းအောင်မြင်ပါတယ်။"

"အဆဆယ်သန်းမြှင့်တင်မှုအောက်တွင် သန့်စင်ခြင်းသုံးပါးတာအိုကျမ်းကို ကျင့်ကြံနေပါတယ်…"

အသိပေးချက်တစ်ခု ပေါ်လာတယ်။

ချီမင်က ခေါင်းညိတ်လိုက်တယ်။

ပြီးတော့ သူက ဝိညာဉ်ကျောက်တုံးအများအပြားကို တစ်ခုပြီးတစ်ခု သုံးစွဲပြီး အပြောင်းအလဲနိမိတ်ဖတ်ကျမ်း၊ကောင်းကင်ဘုံကြယ်တာရာသုံးဆယ့်ခြောက်ပညာရပ်၊ အံ့ဖွယ်ဓားလျှပ်စီးထိန်းချုပ်ရေးနည်းစနစ်၊ ပါ့ကွားယင်ယန်အံ့ဖွယ်စွမ်းအား၊ဓာတ်ငါးပါးစက်ဝန်းအံ့ဖွယ်စွမ်းအားနဲ့လျှို့ဝှက်နက်နဲတံခါးအံ့ဖွယ်စွမ်းအား တို့ကို စတင်ကျင့်ကြံတော့တယ်။

တင်း!

"လက်ခံသူရဲ့ ကျင့်ကြံမှုအဆင့်က ဗလာနယ်စွန့်ခွာခြင်း အစောပိုင်းအဆင့်သို့ ချိုးဖြတ်သွားသည်ကို စစ်ဆေးရပါတယ်။ အခြေတည်ဝိညာဉ် နှောင်းပိုင်းအဆင့် ဂိမ်းမြေအောက်စခန်းဖြစ်သော ရှုတောင်ဓားအင်မော်တယ်နန်းတော်ကို ရှင်းလင်းခြင်းအတွက် ဆုလာဘ်ကအလွန်အမင်းလျော့ကျသွားပါပြီ။ ဂိမ်းမြေအောက်စခန်းအသစ်ကို ဖွင့်လှစ်ဖို့ ထိပ်တန်းအဆင့်ဝိညာဉ်ကျောက်တုံး တစ်သိန်း အသုံးပြုနိုင်ပါတယ်။"

"ကောင်းပြီ။"

ချီမင်က ပြောလိုက်တယ်၊ "ဒါဆို ချက်ချင်းပဲ ထိပ်တန်းအဆင့်ဝိညာဉ်ကျောက်တုံး တစ်သိန်းဖြည့်ပြီး ဂိမ်းမြေအောက်စခန်းအသစ်ကို ဖွင့်လိုက်တော့။"

တင်း!

"ဖြည့်သွင်းမှု အောင်မြင်ပါတယ်။"

"သင် ဗလာနယ်စွန့်ခွာခြင်း အစောပိုင်းအဆင့် ဂိမ်းမြေအောက်စခန်းဖြစ်သော သေမင်းမျှော်စင်ရဲ့ ပထမဆုံး အထပ် ၃၃ ထပ်သို့ ဝင်ရောက်နိုင်ပါပြီ။"

အသိပေးချက်တစ်ခု ပေါ်လာတယ်။

"ဝင်မယ်။" ချီမင်က ပြောလိုက်တယ်။

ချီမင်ရဲ့ရှေ့မှာ 'သေမင်းမျှော်စင်' ရဲ့ ဂိမ်းမြေအောက်စခန်းမြင်ကွင်းတွေ ပေါ်လာတယ်။ ဒါက တကယ့်အစစ်အမှန်နဲ့တူတယ်။ သူကိုယ်တိုင် အဲ့ဒီထဲရောက်နေသလိုမျိုး၊ အရမ်းကို လက်တွေ့ကျလွန်းတယ်။

မြင်ကွင်းထဲမှာ အမှောင်ထုက မြေပြင်ကို လွှမ်းခြုံထားတယ်။

အထီးကျန်ခြင်း၊ မှောင်မိုက်ခြင်း၊ ညှိုးနွမ်းခြင်း၊ ဆွေးမြေ့ခြင်း…

ကောင်းကင်မှာတော့ မပြည့်စုံတဲ့ သွေးလတစ်စင်း ထွန်းလင်းနေတယ်။

သွေးလအောက်မှာတော့ အလွန်အမင်းကြီးမားပြီး မည်းနက်နေတဲ့ မျှော်စင်ကြီးတစ်ခုရှိတယ်။ဒါပေမဲ့ သွေးလရဲ့လွှမ်းခြုံမှုအောက်မှာ အဲ့ဒါကို သွေးရောင်ရင့်ရင့် ဆိုးထားတာက သွေးအလွှာ ပါးပါးဖုံးအုပ်ထားတာနဲ့တူတယ်။

သေသေချာချာကြည့်လိုက်တော့ ဒီသေမင်းမျှော်စင်က အထပ် ၉၉ ထပ်မြင့်တယ်။

အခု ချီမင်ပြောင်းလဲထားတဲ့ ဂိမ်းဇာတ်ကောင် ကရောက်လာပြီ။ သူက ဓားကိုင်ထားတဲ့ လူငယ်စွန့်စားသူတစ်ယောက်ဖြစ်ပြီး ဒီသေမင်းမျှော်စင်ရဲ့ရှေ့ကို လျှောက်သွားလိုက်တယ်။

မျှော်စင်ရဲ့ဝင်ပေါက်မှာ အမှောင်ထုက လွှမ်းမိုးနေပြီး သွေးရောင်အလင်းက လက်ခနဲဖြစ်သွားတယ်။

ပြီးတော့ အနက်ရောင်အရိပ်တစ်ခု ပေါ်လာတယ်။

ဒီအနက်ရောင်အရိပ်က ဒဏ္ဍာရီထဲက သေမင်းရဲ့ပုံရိပ်ဖြစ်တယ်။ သူက စုတ်ပြဲနေတဲ့ အနက်ရောင်ဝတ်ရုံရှည်ကြီးကိုတစ်ကိုယ်လုံးခြုံထားတယ်။ ဝတ်ရုံအောက်မှာတော့ အရိုးစုပုံစံ အနက်ရောင်အရိပ်တစ်ခုရှိပြီး ထူထဲတဲ့အနက်ရောင်ချီတွေ ထုတ်လွှတ်နေကာ မည်းနက်နေတဲ့ သေမင်းတံစဉ်ကြီးကို ကိုင်ဆောင်ထားတယ်။

"စွန့်စားသူ။"

သေမင်းက ချီမင်ကို စိုက်ကြည့်ပြီး ပြောလိုက်တယ်၊ "မင်း သေမင်းမျှော်စင်ထဲကို ဝင်ချင်သလား။"

"ဟုတ်ကဲ့။" ချီမင်က ပြန်ဖြေလိုက်တယ်။

"ကောင်းပြီ။" သေမင်းက ပြောလိုက်တယ်၊ "မင်း သေပါစေလို့ ငါဆုတောင်းပေးတယ်။"

"မလိုပါဘူး။" ချီမင်က ပြန်ဖြေလိုက်တယ်။

ခြိမ်း!!!

တံခါးက ပွင့်သွားတယ်။

အတွင်းပိုင်းက မှောင်မည်း နေတယ်။ တကယ်လို့တစ်ယောက်ယောက်ဝင်သွားရင် အမှောင်ထုက ဝါးမြိုသွားလိမ့်မယ်။

ချီမင်က သေမင်းမျှော်စင်ထဲကို လျှောက်ဝင်သွားလိုက်တယ်။

ပထမအထပ်မှာ ချီမင်ရဲ့ရှေ့မှာ ပေါ်လာတာက ဆံပင်ဖြူနဲ့ဓားသမားတစ်ယောက်ဖြစ်တယ်။ သူက အနက်ရောင်ဓားပြားကြီးတစ်လက်ကို ကိုင်ထားပြီး အလယ်ဗဟိုမှာ မလှုပ်မယှက်ရပ်နေတယ်။

ဆံပင်ဖြူဓားသမားဆီက သေခြင်းအငွေ့အသက်တွေ ပြည့်နှက်နေတယ်။

"မင်းရောက်လာပြီကိုး။"

ဆံပင်ဖြူဓားသမားက မျက်လုံးဖွင့်လိုက်ပြီး ပြောတယ်၊ "ဒါပေမဲ့ မင်းဒီကိုမလာသင့်ဘူး။ ဒါက သေခြင်းတရားရဲ့အိမ်ပဲ။ မင်းရောက်လာတာက သေမင်းမျှော်စင်ထဲမှာ အိပ်စက်နေတဲ့ ဝိညာဉ်အားလုံးကိုသေချာပေါက် နှိုးထလာစေတယ်။"

"မင်း စကားအရမ်းများတယ်။ တိုက်ခိုက်တော့။"

ချီမင်က ညာလက်ထဲကဓားကိုကိုင်ပြီး ဆံပင်ဖြူဓားသမားကို ညွှန်လိုက်တယ်။

"မင်းသဘောအတိုင်းပဲ။"

ဆံပင်ဖြူဓားသမားရဲ့အကြည့်က တည်ငြိမ်နေပြီး ချီမင်ကို စိုက်ကြည့်ကာ ပြောတယ်၊ "ငါ့နာမည်က ပိုင်လျိုယိ။ ငါက သေမင်းမျှော်စင်ရဲ့ ပထမအထပ်မှာ မင်းတွေ့ရမယ့် ပထမဆုံးပြိုင်ဘက်ပဲ။"

"ကောင်းပြီ၊ ငါမှတ်ထားလိုက်မယ်။" ချီမင်က ပြန်ဖြေလိုက်တယ်။

ချွင်!

နောက်တစ်ခဏမှာ ချီမင်က ဓားဆွဲထုတ်လိုက်တယ်။ သူက ဓားနဲ့ဝှေ့ယမ်းပြီးခုတ်ချလိုက်တယ်။ ဓားအလင်းက မိုးကြိုးသွားလို တောက်ပနေတယ်။ ဒါက ဓားတာအိုရဲ့လမ်းကြောင်းအတိုင်း ပိုင်လျိုယိကို ခုတ်ပိုင်းချလိုက်တာကမိုးကုတ်စက်ဝိုင်းမျဉ်းကြောင်းတစ် ကြောင်းနဲ့တူတယ်။

ဖောက်!!!

ထက်ရှတဲ့ဓားအလင်းက ပိုင်လျိုယိရဲ့ခန္ဓာကိုယ်ကို ဖြတ်ပိုင်းသွားပြီး သူက အဲ့ဒီနေရာမှာတင် တောင့်ခဲသွားတယ်။ သူက လက်ထဲကဓားအကြီးကြီးကိုတောင် မဝှေ့ယမ်းနိုင်ခင်မှာပဲ မလှုပ်ရှားနိုင်တော့ဘူး။

ဂျွတ်! ဂျွတ်!

ချက်ချင်းပဲ ပိုင်လျိုယိရဲ့ခန္ဓာကိုယ်က အလယ်ကနေကွဲထွက်သွားပြီး ထူထဲတဲ့သေခြင်းအနက်ရောင်ချီ တွေက ဒဏ်ရာထဲကနေ တိုးထွက်လာတယ်။ သူက ခုနကတိုက်ကွက်ကြောင့် တုန်လှုပ်နေဆဲဖြစ်ကာ ချီမင်ကို ကြောင်ပြီးကြည့်နေတယ်။

"ငါ ပိုင်လျိုယိက ဓားကို နှစ်သုံးထောင်ကြာ နားလည်အောင်ကြိုးစားခဲ့တယ်။ အခုမှပဲ တကယ့်ဓားတာအိုဆိုတာ ဘာလဲဆိုတာကို အမှန်တကယ် မြင်တွေ့လိုက်ရတော့တယ်။ ဒီဘဝမှာ ငါနောင်တမရတော့ဘူး၊ ဒီဘဝမှာ ငါနောင်တမရတော့ဘူး…"

ပိုင်လျိုယိက တုန်လှုပ်စွာ သက်ပြင်းချရင်း သူ့ခန္ဓာကိုယ်က ပြာအဖြစ်ပြောင်းလဲသွားတယ်။

တစ်ချက်တည်း။

ဓားတစ်ချက်ပဲ။

ချီမင်က သူ့ပြိုင်ဘက်ကို သတ်ဖြတ်လိုက်တယ်။

သေမင်းမျှော်စင်ရဲ့ ပထမအထပ်ကို လွယ်လွယ်ကူကူ ဖြတ်ကျော်သွားတယ်။

ဆက်ပြီးတော့ ချီမင်က သေမင်းမျှော်စင်ရဲ့ ဒုတိယအထပ်ကို ဦးတည်သွားတယ်။

ဂိမ်းမြေအောက်စခန်းဖြစ်တဲ့ သေမင်းမျှော်စင်ရဲ့ ပထမဆုံး အထပ် ၃၃ ထပ်မှာ ချီမင်က အစွမ်းထက်တဲ့ပြိုင်ဘက်တွေနဲ့ သူရဲကောင်းဝိညာဉ်တွေကို အနိုင်ယူဖို့ တစ်ထပ်ပြီးတစ်ထပ် တက်သွားရမှာဖြစ်တယ်။ ပထမဆုံး အထပ် ၃၃ ထပ်ကို ဖြတ်ကျော်ပြီးမှသာ သေမင်းမျှော်စင်ရဲ့ ပထမဆုံး အထပ် ၃၃ ထပ်ကို ရှင်းလင်းအောင်မြင်တယ်လို့ မှတ်ယူနိုင်တယ်။

ချီမင်က လှေကားအတိုင်းလိုက်တက်ပြီး သေမင်းမျှော်စင်ရဲ့ ဒုတိယအထပ်ကို ရောက်သွားတယ်။ ဒီတစ်ခါ သူ့ပြိုင်ဘက်က ဆွဲဆောင်မှုရှိပြီး ထက်မြက်တဲ့သိုင်းသမားတစ်ယောက်ဖြစ်တယ်။ သူမက သိုင်းလမ်းစဉ်ကို ကျင့်ကြံပြီး ခိုင်မာတဲ့စိတ်ဓာတ်ရှိတယ်။

"တိုက်ပွဲမြင့်မြတ်ခန္ဓာ!"

ဘုန်း!

ချီမင်က ဟိန်းဟောက်လိုက်ပြီး ရွှေရောင်အလင်းတွေ လက်သွားတယ်။ သူပြောင်းလဲထားတဲ့ ဂိမ်းဇာတ်ကောင်က ချီမင်ပိုင်ဆိုင်တဲ့စွမ်းအားကိုသုံးပြီး ဒီပြိုင်ဘက်ကို တိုက်ခိုက်လိုက်တော့တယ်…