စွမ်းအင် သန်း ၁၇၀၊ ရွှေခါးပတ်ပေါ်မှ လူသတ်မှုနှင့် မီးရှို့မှု!_၂

[ခွေးကောင်ကျုံးသည် သင့်အား အခြားသော နယ်ပယ်ကြီးများသို့ ထွက်ပြေးရန် ဖိတ်ခေါ်ခဲ့သည်။ အကယ်၍ အောင်မြင်ပါက သင်သည် ခန္ဓာကိုယ် တစ်ခုကိုပင် သိမ်းယူပြီး ပြန်လည် မွေးဖွားနိုင်မည် ဖြစ်သည်။]

[ခွေးကောင်ကျုံးတွင် မကောင်းသော ရည်ရွယ်ချက်များ ရှိလိမ့်မည်ဟု သင့်နှလုံးသားက သိနေသည်။ သို့သော်လည်း ဤအချိန်တွင် သင့်မှာ အခြား ရွေးချယ်စရာ မရှိတော့ပေ။]

[သင်သည် အာကာသ မုန်တိုင်းအတွင်း အချိန်အကြာကြီး ရှာဖွေခဲ့သော်လည်း နတ်ဆိုး နှိမ်နှင်းရေး စခန်း၏ တည်နေရာကို ရှာမတွေ့ခဲ့ပေ။]

[သင်၏ မူလဝိညာဉသည် ပို၍ပို၍ အားနည်းလာပြီး သင်သည် သတိလစ်တော့မလို ဖြစ်လာသည်။]

[ဤအချိန်တွင် ခွေးကောင်ကျုံးသည် နောက်ဆုံးတွင် သူ၏ အစွယ်များကို ထုတ်ဖော်လာခဲ့သည်။ သူသည် သင်၏ မူလဝိညာဉ် ကို တစ်ကိုက်တည်းဖြင့် မျိုချလိုက်သည်။]

[သင် သတိ မပျောက်ဆုံးမီ ခွေးကောင်ကျုံးက သင့်နတ်ဝိညာဉ်၏ အာဟာရဓာတ်ဖြင့် သူသည် နတ်ဆိုးနှိမ်နှင်းရေး စခန်း တည်ရှိရာ မုန်တိုင်း စီးကြောင်းကို ရှာဖွေတွေ့ရှိသည် အထိ ကြံ့ကြံ့ခံနိုင်လိမ့်မည်ဟု သင့်အား လှောင်ပြောင်ကာ ပြောဆိုခဲ့သည်။]

[သင်၏ သတိသည် တဖြည်းဖြည်း မှေးမှိန် ပျောက်ကွယ်သွားသည်…]

[ဒင်! ဤ သရုပ်ပြခြင်း ပြီးဆုံးသွားပါပြီ!]

သရုပ်ပြခြင်း ပြီးဆုံးသွားပြီးနောက် စုရှင်းသည် သက်ပြင်းချကာ နက်နက်နဲနဲ စဉ်းစားသည်။ ထို့နောက် သူသည် မျက်မှောင်ကြုတ်လိုက်သည်။

ခဏအကြာတွင် စုရှင်းက သူ့ဘာသာသူ တီးတိုးပြောလိုက်သည်။

“ဒီတစ်ခါတော့ ဒီလို ထူးခြားတဲ့ သတင်း အချက်အလက်တွေ ရလိမ့်မယ်လို့ မမျှော်လင့်ခဲ့မိဘူး!”

ယခင် သရုပ်ပြခြင်းများတွင် စုရှင်းသည် သားရဲ၏ မျိုချခြင်း ခံရပြီးနောက် သေဆုံးလေ့ရှိပြီး သူ့တွင် မျက်လုံးတစ်လုံးသာ ကျန်ခဲ့သည်။

သို့သော် ယခုအခါ စုရှင်းသည် နတ်ဘုရား အသွင်ပြောင်းခြင်း ကျင့်ကြံသူ ဖြစ်လာပြီးနောက် သူ၏ မူလဝိညာဉ်သည် ခန္ဓာကိုယ်နှင့် သီးခြား လွတ်လပ်စွာ လုပ်ဆောင်နိုင်ပြီ ဖြစ်သည်။

ဆိုလိုသည်မှာ သူ၏ ရုပ်ပိုင်းဆိုင်ရာ ခန္ဓာကိုယ် ဆုံးရှုံးပြီးနောက်တွင်ပင် စုရှင်းသည် သူ၏ နတ်မျက်စိကို အသုံးပြု၍ ခဏတာမျှ ဆက်လက် ရှင်သန်နိုင်သေးသည်။

စုရှင်း မြင်တွေ့ခဲ့ရသည်များမှာ ထိုသားရဲ၏ အစာအိမ် အတွင်း၌ ရှိနေသည်များ ဖြစ်သည်။

“စိတ်ကူးယဉ်ကြည့်လို့တောင် မရဘူး... ဒီသားရဲကြီးက ဘယ်လောက်တောင် ကြီးတာလဲ? သူ့ရဲ့ အစာအိမ် သပ်သပ်ကတောင် ရှားနိုင်ငံ တစ်ခုလုံးကို ဆံ့နေတာလား”

စုရှင်း သက်ပြင်းချလိုက်သည်။

သို့သော် သူ့ကို ပို၍ အံ့အားသင့်စေသည်မှာ ခွေးကောင်ကျုံးထံမှ သူရရှိခဲ့သော သတင်း အချက်အလက်များ ဖြစ်သည်။

“ခွေးကောင်ကျုံးက ငါ့ရဲ့ မူလဝိညာဉ် နဲ့ ပေါင်းစပ်သွားတယ်။ ဒါပေမဲ့၊ အဲဒီ ခွေးအိုကြီး လိမ်ညာတာတော့ မဖြစ်လောက်ဘူး။ နတ်ဆိုး နှိမ်နှင်းရေး စခန်းကို ရှာဖွေဖို့က သူ့ရဲ့ ရည်ရွယ်ချက်အမှန် ဖြစ်လိမ့်မယ်!”

“နတ်ဆိုး နှိမ်နင်းရေး စခန်းက နတ်ဆိုးဘုံသို့ ဝင်ရောက်ရာ လမ်းကြောင်းတဲ့။ ဒါပေမယ့် နတ်ဆိုးဘုံက အခြား ကြီးကျယ်တဲ့ နယ်ပယ်တွေကို သွားရောက်ဖို့ မဖြစ်မနေ ဖြတ်သန်းရမယ့် လမ်းကြောင်းဆိုတာ ဟုတ်လို့လား?”

စုရှင်းသည် မျက်ခုံးတို့ကို အနည်းငယ် တွန့်ချိုးလိုက်သည်။ သူရရှိသော အချက်အလက်များသည် ပြန့်ကျဲနေသော အစအနများသာ ဖြစ်သည်။

သို့သော် ခွေးကောင်ကျုံး ပြောကြားချက်များ အရ ကြယ်ပြာသည် နတ်ဆိုး မျိုးနွယ်စုများ၏ ပိတ်ဆို့ခြင်းကို ခံထားရပြီး သားသတ်ရုံကဲ့သို့ ဖြစ်နေမည်မှာ အလွယ်တကူပင် စိတ်ကူးကြည့်နိုင်ပေသည်။

လူသားမျိုးနွယ် တစ်ရပ်လုံးသည် ဤသားသတ်ရုံထဲတွင် သားကောင်များ ဖြစ်ကြသည်။

ဤသားသတ်ရုံမှ လွတ်မြောက်ရန် အတွက် ၎င်းတို့သည် နတ်ဆိုးနှိမ်နင်းရေး စခန်းမှတစ်ဆင့် ဖောက်ထွက်နိုင်မှသာ အသက်ရှင်သန်ရန် အခွင့်အရေးရှိမည် ဖြစ်သည်။

“ဒီလိုကိုး… ဒါကြောင့် လူသားမျိုးနွယ်က နတ်ဆိုးနှိမ်နင်းရေး စခန်းကို နှစ်ထောင်ပေါင်း များစွာ ကာကွယ်ခဲ့တာ‌ပေါ့ ဘာကြောင့်လဲဆိုတော့ အာ့စခန်းက တစ်ခုတည်းသော အခွင့်အရေး ဖြစ်နေလို့ပဲ!”

“နတ်ဆိုး နှိမ်နင်းရေး စခန်းကို နတ်ဆိုး မျိုးနွယ်စုတွေက အပြည့်အဝ သိမ်းပိုက်လိုက်တာနဲ့ လူသားမျိုးနွယ်ကလည်း ဒီသားသတ်ရုံကနေ လွတ်မြောက်နိုင်တော့မှာ မဟုတ်ဘဲ သေဆုံးခြင်းကသာ စောင့်ကြိုနေလိမ့်မယ်။”

စုရှင်းသည် သူ၏နားထင်တို့ကို ပွတ်သပ်လိုက်သည်။ မူလဝိညာဉ်မှ ရရှိသော အချက်အလက်များသည် အလွန်ပင် ပြန့်ကျဲနေခဲ့သည်။

စုရှင်းသည် ထပ်မံ၍ ကောက်ချက်ချနိုင်ခြင်း မရှိခဲ့သော်လည်း နတ်ဆိုးနှိမ်နင်းရေး စခန်းသည် သေချာပေါက် သော့ချက် ဖြစ်ရမည်။

“ဒီကမ္ဘာရဲ့ လျှို့ဝှက်ချက်တွေက ငါ ထင်ထားတာထက် ပိုကြီးမားတာပဲ။”

စုရှင်းသည် သူ၏နှုတ်ခမ်းတို့ကို ကွေးလိုက်သည်။ သို့သော် ဤစိုးရိမ်ပူပန်မှုများသည် နောက်တွင် ထားရှိရမည့် ကိစ္စများဖြစ်ပြီး ယခုလက်ရှိတွင် သူ၏ကိုယ်ပိုင် ဖွံ့ဖြိုးတိုးတက်မှုသည် ဦးစားပေး ဖြစ်သည်။

ထိုသို့ တွေးတောရင်း စုရှင်းသည် သရုပ်ပြခြင်း ဆုလာဘ်များ ဘက်သို့ ကြည့်လိုက်သည်။

[ရှန်းနန်၏မျိုးဆက်]: ခရမ်းရောင် စွမ်းရည်၊ စွမ်းအင်မှတ် ၁ သန်း တန်ဖိုးရှိသည်။

[နှစ်ဆယ့်ခြောက်နှစ်တာ ဆေးဖော်ခြင်း အတွေ့အကြုံ]: ဆေးဖော်ခြင်းဆိုင်ရာ ထိုးထွင်းဉာဏ်၊ ကလေးနတ်ဆေး (မဟာယာနအဆင့်) အစိတ်အပိုင်းများ ပါဝင်ပြီး စွမ်းအင်မှတ် ၁ သန်း တန်ဖိုးရှိသည်။

[နတ်ဘုရား အသွင် ပြောင်းလဲခြင်း အဆင့် သုံး ကျင့်ကြံမှု အဆင့်]: အတားအဆီး ငါးခုကို ဖြတ်ကျော်ကာ နတ်ဘုရားအသွင် ပြောင်းလဲခြင်းသို့ ရောက်ရှိခြင်း ဖြစ်ပြီး စွမ်းအင်မှတ် သန်း ၂၀ တန်ဖိုးရှိသည်။

[နတ်ဘုရား အင်အားအဆင့် ခြောက် ကျင့်ကြံမှု အဆင့်]: ကိုယ်ခန္ဓာ သန့်စင်ခြင်း ကျင့်ကြံမှု အဆင့်ဖြစ်ပြီး စွမ်းအင်မှတ် သန်း ၂၀ တန်ဖိုးရှိသည်။

[ရင့်မှည့်ပြီးသော ဝိညာဉ်စုစည်းပန်း တစ်ထောင်၊ ဝိညာဉ်စုစည်းပန်း မျိုးစေ့ ငါးရာ]: စွမ်းအင်မှတ် ၁ ဘီလီယံနှင့် သန်း ၅၀ တန်ဖိုးရှိသည်။

သရုပ်ပြခြင်းမှ ရရှိသော ဆုလာဘ်များနှင့် ပတ်သက်၍ စုရှင်းတွင် အစီအစဉ်တစ်ခု ရှိနေသည်။

“ကျင့်ကြံမှုအဆင့် တိုးတက်တာက အခု လောလောဆယ် အတွက် အရေးတကြီး မလိုသေးဘူး။ ရှန်းနန်၏မျိုးဆက် ဆိုတဲ့ ဒီစွမ်းရည်က နတ်ဘုရား အဆင့်နဲ့ ဆင်တူတဲ့ ထူးခြားတဲ့ စိုက်ပျိုးရေး စွမ်းရည်ဖြစ်ပြီး မဖြစ်မနေ ယူကိုယူရမယ့် အရာပဲ။”

“နောက်ပြီးတော့ ဝိညာဉ်စုစည်းပန်း တစ်ထောင်…ဒီသရုပ်ပြခြင်းက အာ့ပန်းတွေကို စိုက်ပျိုးရင်း အချိန်ကုန်ခဲ့တာဆိုတော့ သေချာပေါက် ရွေးကို ရွေးချယ်ရမယ့် အရာတစ်ခုပဲ။”

“ဒါပေမယ့် ဈေးနှုန်းက…”

ဝိညာဉ်စုစည်းပန်းများ အတွက် ကောင်းကင်ဘုံကဲ့သို့ ကြီးမားသည့် စွမ်းအင် ကုန်ကျစရိတ်ကို မြင်တွေ့ရသောအခါ စုရှင်းသည် အနည်းငယ် ခေါင်းကိုက်ခဲ့ရသည်။

ဘီလီယံနှင့်ချီသော စွမ်းအင်မှတ်များ အတွက် ကြီးမားသည့် ကုန်ကျစရိတ်ကို ရရှိရန် တစ်လ ကြာမြင့်မည် ဖြစ်ပြီး၊ သူသည် လက်ရှိတွင် သန်းဆယ်ဂဏန်းမျှသာ ရှိနေသေးသည်။

စုရှင်းသည် ထိုမျှကြာကြာ စောင့်ဆိုင်းလိုခြင်း မရှိပေ။

“ငါ နဂါးနက်အသင်းကို သွားမှ ရတော့မယ် ထင်ပါတယ်!”

စုရှင်းသည် မျက်လုံးတို့ကို မှေးကျဉ်းလိုက်သည်။

သရုပ်ပြခြင်းတွင် သူရရှိခဲ့သော အချက်အလက်များ အရ ထိုစစ်ဧကရာဇ် စွမ်းအားရှင်သည် ယခုရက်ပိုင်း အတွင်း အသင်းတွင် ရှိမည်မဟုတ်ပေ။

စုရှင်းသည် မြေအောက်ခန်းသို့ တိတ်တဆိတ် ဝင်ရောက်နိုင်ပါက ဘီလီယံနှင့်ချီသော စွမ်းအင်များကို ရရှိနိုင်မည် ဖြစ်သည်။

တစ်ခုတည်းသော အန္တရာယ်မှာ နောင်တွင် နဂါးစောင့်ရှောက်သူနှင့် ထိပ်တိုက် တွေ့ဆုံခြင်းကို ရှောင်ရှားရန်သာ ဖြစ်သည်။

ကျိုတိုမှ ခဲယဉ်းစွာ ထွက်ခွာလေ့ ရှိသော စုရှင်းအတွက်မူ ၎င်းသည် ပြဿနာ တစ်စုံတစ်ရာ မဟုတ်ပေ။

“ဘီလီယံနဲ့ချီတဲ့ စွမ်းအင်တွေကို ဘာမှ ကုန်ကျစရိတ်မရှိဘဲ အလကားရသလို ဖြစ်နေတာကို ဘယ်သူကများ စိတ်မလှုပ်ရှားဘဲ နေနိုင်မှာလဲ။”

စုရှင်းသည် သူ့ဘာသာ ရေရွတ်ပြီးနောက် ဆေးဘူးတစ်ဘူးကို ထုတ်ယူကာ လုံးဝန်းသော ဆေးလုံးများစွာကို ထုတ်ယူလိုက်သည်။

၎င်းတို့မှာ အကောင်းစား အဆင့်မြင့် အသက်ရှုခြင်း ဖုံးကွယ်ဆေးလုံးနှင့် အကောင်းစား အသွင် ပြောင်းလဲဆေးလုံးတို့ ဖြစ်သည်။

စုရှင်းသည် စစ်ဧကရာဇ် ကျွမ်းကျင်ပညာရှင်ပင်လျှင် ဤလှည့်ကွက်ကို ခွဲခြားသိမြင်နိုင်မည် မဟုတ်ဟု ယုံကြည်သည်။

ဝိညာဉ်စိုက်ခင်း ကောင်းချီးမြေမှ ထွက်ခွာလာသော စုရှင်းသည် ကောင်းကင်ကို ကြည့်လိုက်သည်။

အချိန်မှာ နေ့လယ်ပိုင်းဖြစ်ပြီး နေရောင်ခြည်က တောက်ပနေဆဲ ဖြစ်သည်။ စုရှင်းသည် ဤအချိန်တွင် နဂါးနက် ကုန်သွယ်ရေး အသင်းသို့ သွားရောက်ရန် မဖြစ်နိုင်သေးပေ။

သူသည် ဦးစွာ ကျင်းချုံးရွှယ်ထံသို့ စာတစ်စောင် ပေးပို့ကာ လာမည့် ရက်သတ္တပတ်တွင် အလုပ်များနေ၍ ကုန်သွယ်မှု မပြုလုပ်နိုင်ကြောင်းနှင့် တစ်ပတ် အကြာတွင် ပြန်လည် တွေ့ဆုံရန် အဆိုပြုခဲ့သည်။

ထို့နောက် စုရှင်းသည် သူ၏နေ့စဉ် ဆေးဖော်ခြင်း လုပ်ငန်းကို စတင်ခဲ့သည်။

ကောင်းကင် လုံးဝ မှောင်မိုက်သွားသောအခါ စုရှင်းသည် သက်ပြင်းတစ်ချက် ချကာ ဝိညာဉ်စိုက်ခင်း ကောင်းချီးမြေမှ ထွက်ခွာလာပြီး ဆေးလုံး နှစ်လုံးကို မျိုချကာ နဂါးနက် အဖွဲ့ဆီသို့ အလျင်အမြန် ထွက်ခွာသွားသည်။

နဂါးနက် အဖွဲ့သည် ကျိုတို တက္ကသိုလ်မှ ကီလိုမီတာ ဆယ်ချီ အကွာအဝေးတွင် တည်ရှိသည်။ စုရှင်းသည် ပျံသန်းခြင်း မပြုဘဲ သူ၏ ကိုယ်ကာယ ကြံ့ခိုင်မှုကို အားပြုကာ နဂါးနက် အဖွဲ့ အနီးသို့ ထူးခြားသည့် အမြန်နှုန်းဖြင့် အပြေးသွားခဲ့သည်။

သူ နဂါးနက် အဖွဲ့သို့ ရောက်ရှိသောအခါ ညဉ့်နက်နေပြီ ဖြစ်သည်။

စုရှင်းသည် အနက်ရောင် ဝတ်စုံကို ဝတ်ဆင်ထားပြီး ည၏ မှောင်မိုက်ခြင်းထဲတွင် သူ့ကိုယ်သူ ဖုံးကွယ်ထားသည်။

သူ၏ ထူးချွန်သော ကျွမ်းကျင်မှုများဖြင့် အဖွဲ့၏ အစောင့်များကို အလွယ်တကူ ကျော်ဖြတ်ကာ ခြံဝင်း၏ အတွင်းဆုံးထဲသို့ တိတ်တဆိတ် ခိုးဝင်ခဲ့သည်။

သူ၏ နတ်မျက်စိသည် ဒီရေလှိုင်းကဲ့သို့ ပျံ့နှံ့သွားပြီး ကင်းလှည့်နေသော အဖွဲ့၏ အရာရှိများကို အာရုံခံမိသည်။ စုရှင်းသည် အလျင်စလို မလုပ်ဆောင်ဘဲ စိတ်ရှည်စွာ စောင့်ဆိုင်းနေခဲ့သည်။

…