သရုပ်ပြခြင်း အကြိမ်သစ်၊ နတ်ဆိုးမျိုးနွယ်တို့၏ ဘုရင်

“အရမ်း ကောင်းတယ်။ ဒီဝိညာဉ်စုစည်းပန်းတွေ ရှိနေပြီဆိုရင် နတ်ဘုရားအသွင် ပြောင်းလဲခြင်းရဲ့ အထွတ်အထိပ်ကို ရောက်ရှိဖို့ ဝိညာဉ်စွမ်းအင် လုံလောက်ပြီ။ ငါ့ရဲ့လမ်းမှာ အတားအဆီးတစ်ခု ဖြစ်တော့မှာ မဟုတ်ဘူး!”

စုရှင်းသည် သူ၏ နှလုံးသားအတွင်း ဝမ်းမြောက်မှု လှိုင်းလုံးတစ်ခု မြင့်တက်လာသည်ကို ခံစားလိုက်ရသည်။

ဝိညာဉ်စွမ်းအင် မကုန်ခမ်းမီကပင် ဝိညာဉ်စုစည်းပန်း ထောင်ပေါင်း များစွာသည် အမြင့်မြတ်ဆုံးသော ရတနာများအဖြစ် မှတ်ယူခြင်း ခံရမည် ဖြစ်သည်။

ယခုအခါတွင်မူ ဝိညာဉ်စုစည်းပန်း တစ်ပင်တည်းကပင် ခွေးကောင်ကျုံး ကဲ့သို့သော ကျင့်ကြံသူများ အသက်စွန့်၍ ရယူလိုသည့် ပရာ ဖြစ်လာပြီ ဖြစ်သည်။

သို့သော် ထိုသို့သော အဖိုးတန် ဝိညာဉ်အပင်များသည် ယခုအချိန်တွင် စုရှင်း၏ ခြေထောက်အောက်ရှိ ဤတောင်ကုန်းလေးပေါ်တွင် နေရာအနှံ့အပြား၌ ရှိနေသည်။

ဤအတွေးဖြင့် စုရှင်း၏ မျက်လုံးများတွင် အောင်မြင်မှု ခံစားချက်များ ပြည့်လျှံလာသည်။

သူ၏အောင်ပွဲကို ခဏတာ ပျော်ရွှင်ပြီးနောက် စုရှင်းသည် အလျင်စလို ထွက်ခွာမသွားခဲ့ပေ။ သူသည် ဝိညာဉ်စိုက်ခင်း ကောင်းချီးမြေတွင် နှစ်ပတ်ကြာ ပုန်းအောင်းနေရန် စီစဉ်ခဲ့သည်။

လုယက်မှု မပြုမီကပင် စုရှင်းသည် ကျင်းချုံးရွှယ်အား ကုန်သွယ်မှုကို တစ်ပတ် ရွှေ့ဆိုင်းမည် ဖြစ်ကြောင်း အသိပေးပြီး ဖြစ်သည်။ တစ်နည်းအားဖြင့် နှစ်ပတ် ကြာပြီးနောက် သတ်မှတ်ထားသော အချိန်ရောက်မှ လှုပ်ရှားမည် ဆိုလျှင်လည်း စုရှင်းအတွက် နောက်ကျမည် မဟုတ်ပေ။

“ဒါဆို ဒီအချိန်အတွင်းမှာ ငါ ဆေးဖော်တာကိုဘဲ စိတ်အေးချမ်းသာစွာနဲ့ အာရုံစိုက်တော့မယ်!”

စုရှင်း၏ မျက်နှာပေါ်တွင် အပြုံးများ မရပ်မနား ပျံ့နှံ့သွားသည်။ သူသည် သူ၏ အဂ္ဂိရတ်ဖိုကို ထုတ်ယူပြီး ကျွမ်းကျင်သော လက်များဖြင့် ဆေးဖော်ခြင်း လုပ်ငန်းကို စတင်ခဲ့သည်။

ဤအတောအတွင်း စုရှင်းသည် ဆေးများကို အေးဆေးစွာ ချက်လုပ်နေစဉ်…

နဂါးနက် အသင်းမှာမူ ယခုအချိန်တွင် ငြိမ်သက်ခြင်း မရှိခဲ့ပေ။

စုရှင်း လျှို့ဝှက်ခန်းထဲသို့ ဖောက်ထွင်း ဝင်ရောက်သည့် အချိန်တွင် စစ်ဧကရာဇ် အဆင့်ရှိ စွမ်းအားရှင်က ၎င်းကို ခံစားမိပြီး အသင်းဆီသို့ အလျင်အမြန် ပြေးလာခဲ့သည်။

သို့သော် စုရှင်းသည် အလွန် လျင်မြန်စွာ လုပ်ဆောင်ခဲ့သည်။ သူ အခန်းသို့ ပြန်ရောက်သည့် အချိန်တွင် စုရှင်းသည် ပညာရှင်ဈေးသို့ တိမ်းရှောင်ပြီး ဝိညာဉ်စိုက်ခင်း ကောင်းချီးမြေထဲသို့ ဝင်ရောက်သွားခဲ့သည်မှာ ကြာပြီ ဖြစ်သည်။

ဤ စစ်ဧကရာဇ် စွမ်းအားရှင်သည် မတည်ငြိမ်သော မျက်နှာ အမူအရာဖြင့် ပတ်ဝန်းကျင်ရှိ အရာအားလုံးကို ကြည့်ရှုကာ “ဘယ်သူလဲ… ဘယ်သူလုပ်တာလဲ” ဟု ရေရွတ်လိုက်သည်။

ထို့နောက် သူ၏ ခြေထောက်များသည် မထိန်းချုပ်နိုင်ဘဲ တုန်ယင်လာသည်။ သူသည် တွေဝေစွာဖြင့် အသံလွှင့် ကျောက်စရစ် တစ်ခုကို အသက်သွင်းလိုက်သည်။

ကျောက်စရစ်၏ အခြားတစ်ဖက်မှ အသက်ကြီးသော အသံတစ်ခု ထွက်ပေါ်လာသည်။

“ဘာဖြစ်တာလဲ”

ထိုအသံကို ကြားလိုက်သည်နှင့် စစ်ဧကရာဇ် စွမ်းအားရှင်သည် ပို၍ပင် တုန်လှုပ်သွားပြီး ထစ်အအဖြင့် ပြောသည်။

“သခင် လုံ ဆိုးရွားတဲ့ ကိစ္စတစ်ခု ဖြစ်သွားပြီ… နဂါးနက် အသင်းရဲ့ လျှို့ဝှက်ခန်း လုယက်ခံလိုက်ရပြီ၊ ရုပ်သေး တစ်ရာကျော်လုံး သေဆုံးသွားပြီး ရတနာတွေအားလုံးလဲ ခြေရာလက်ရာမကျန် ပျောက်ကွယ်သွားတယ်…”

“ကျွန်တော် ဖောက်ထွင်းခံရတာကို ခံစားမိတာနဲ့ ချက်ချင်း ပြန်ရောက်လာတာပါ၊ ဒါပေမဲ့ နောက်ကျသွားခဲ့ပြီ! ကျူးလွန်သူရဲ့ ခွန်အားက… ကျွန်တော့်ထက် မနိမ့်ဘူးလို့ ထင်ပါတယ်!”

“သခင်…”

ထိတ်လန့်နေသော စစ်ဧကရာဇ် စွမ်းအားရှင်သည် ဆက်လက်၍ အလျင်အမြန် ရှင်းပြနေသည်။

အသံလွှင့် ကျောက်စလစ်၏ အခြားတစ်ဖက်မှ သခင် လုံသည် တိတ်ဆိတ်သွားပြီးနောက် နောက်ဆုံးတွင် မေးလိုက်သည်။ “စာရင်းစာအုပ်နဲ့ လျှို့ဝှက်စာတွေ ရှိနေတုန်းပဲလား”

ဤစကားကို ကြားလိုက်သည်နှင့် စစ်ဧကရာဇ်သည် ဗီဒိုတစ်ခုကို အလျင်အမြန် ဖွင့်လိုက်ပြီး ဘာမှ ပုံမပျက်သော စာရင်းစာအုပ်နှင့် လျှို့ဝှက်စာများကို တွေ့မြင်သွားသည်။ ထို့နောက် သူသည် သက်ပြင်းချလိုက်ပြီး အလျင်အမြန် ပြောလိုက်သည်။

“သခင်၊ သူတို့ ရှိနေပါသေးတယ်! စာရင်းစာအုပ်နဲ့ လျှို့ဝှက်စာတွေကို မထိထားပါဘူး!”

အသံလွှင့် ကျောက်စရစ် ၏ အခြားတစ်ဖက်မှ သခင် လုံသည် အချိန်အတော်ကြာ တိတ်ဆိတ်နေပြီးမှ ဖြည်းညှင်းစွာ ပြန်ဖြေလိုက်သည်။

“ငါသိပြီ၊ အခုလောလောဆယ် ဒီအတိုင်းပဲ ထားလိုက်ပါ၊ ဆူဆူပူပူ မလုပ်ပါနဲ့…”

မြင်ကွင်းသည် ဝိညာဉ်စိုက်ခင်း ကောင်းချီးမြေသို့ ပြန်လည် ရောက်ရှိသွားသည်။

စုရှင်းသည် ဝိညာဉ်စိုက်ခင်း ကောင်းချီးမြေတွင် တစ်ပတ်ကြာ ရှိနေခဲ့ပြီး ထိုတစ်ပတ် အတွင်း သူသည် ဝိညာဉ်နယ်မြေမှ အပြင်သို့ ခြေတစ်လှမ်းမျှပင် မလှမ်းဘဲ ဆေးများ ချက်လုပ်ခြင်းကိုသာ အာရုံစိုက်ခဲ့သည်။

တစ်ပတ်အတွင်း သူသည် ဆေးလုံးပေါင်း ခြောက်ထောင် ထုတ်လုပ်နိုင်ခဲ့သည်။

“ဟူး... တစ်ပတ်နီးပါးတောင် ရှိပြီပဲ၊ မဟုတ်လား”

စုရှင်းသည် နဖူးမှ ချွေးများကို သုတ်လိုက်ပြီး ရေရွတ်လိုက်သည်။

“အပြင်မှာ ဘယ်လို အခြေအနေမျိုး ရှိနေမလဲ မသိဘူး။ ထွက်ပြီး အခြေအနေကို စမ်းသပ်ကြည့်သင့်လား”

ထို့နောက် စုရှင်းသည် အနည်းငယ် ခေါင်းခါလိုက်သည်။

“မဟုတ်ဘူး၊ မကောင်းဘူး။ တစ်ပတ်ပဲ ရှိသေးတာ။ ကျားနက်အသင်းရဲ့ သူလျှိုတွေ ရှိနေနိုင်သေးတယ်။ နောက်တစ်ပတ်လောက် ပုန်းအောင်းနေတာက ပိုကောင်းမယ်!”

ထိုအတွေးဖြင့် စုရှင်း၏ အကြည့်သည် သရုပ်ပြခြင်း ဖန်သားပြင်ဘက်သို့ ရောက်ရှိသွားသည်။

တစ်ပတ်ကြာပြီးနောက် နောက် သရုပ်ပြခြင်း အတွက် အနားယူချိန် ကုန်ဆုံးသွားပြီ ဖြစ်သည်။

၂၀၂၄ ခုနှစ်၊ ဇွန်လ ၁၀ ရက်နေ့တွင် စုရှင်းသည် သရုပ်ပြခြင်း အသစ်တစ်ကြိမ်ကို ချက်ချင်းပင် စတင်ခဲ့သည်။

“သရုပ်ပြခြင်း စတင်ပါ!”

[ဒင်! ဤ သရုပ်ပြခြင်းသည် စွမ်းအင်မှတ် ၄၀၀၀ သုံးစွဲပါမည်။ ကျန်ရှိသော စွမ်းအင်မှတ် ၆၅,၅၀၅,၀၀၀ ရှိပြီး သရုပ်ပြခြင်း အခွင့်အရေး အကန့်အသတ်မရှိ ကျန်ရှိပါသည်။]

[သရုပ်ပြခြင်း စတင်ပါပြီ!]

[အစိမ်းရောင် စွမ်းရည် ထုတ်ယူခြင်းသည် စွမ်းအင်မှတ် ၁၀၀၀၊ အပြာရောင် စွမ်းရည်သည် စွမ်းအင်မှတ် ၁၀,၀၀၀၊ ခရမ်းရောင် စွမ်းရည်သည် စွမ်းအင်မှတ် ၁၀၀,၀၀၀ ကုန်ကျပါမည်။ ထုတ်ယူလိုပါသလား?]

“ခရမ်းရောင် စွမ်းရည်ကို ထုတ်ယူပါ!”

[ဂုဏ်ယူပါသည်၊ သင်သည် ခရမ်းရောင် စွမ်းရည်ဖြစ်သော မကျဆုံးသော ထောက်တိုင် ကို ရရှိခဲ့ပါသည်။]

[မကျဆုံးသော ထောက်တိုင်- တိုက်ပွဲများတွင် သင့်၏ ခံနိုင်ရည်အား များစွာ တိုးပွားလာသည်... (မသင့်လျော်သော အကြောင်းအရာများ မပါဝင်စေရန် ဆင်ဆာလုပ်ထားပါသည်)]

စုရှင်း: “...”

စုရှင်းသည် စိတ်လှုပ်ရှားစွာဖြင့် လက်များကို ပွတ်သပ်ရင်း ပြောလိုက်သည်။

တစ်ချက်ကြည့်လိုက်သည်နှင့် စုရှင်းသည် စွမ်းရည်အပေါ် စိတ်ဝင်စားမှု ကုန်ဆုံးသွားခဲ့သည်။ ၎င်းသည် အစွမ်းထက်သော်လည်း စုရှင်းအတွက် လောလောဆယ် မလိုအပ်သည့်အရာ ဖြစ်သည်။

သရုပ်ပြခြင်း ဖန်သားပြင်ကို ကြည့်ရင်း စုရှင်းသည် ဤသရုပ်ပြခြင်း အတွက် သူ၏ အစီအစဉ်များကို စတင် စဉ်းစားနေခဲ့သည်။

“နတ်ဆိုး နှိမ်နင်းရေးစခန်း... လက်တွေ့ကမ္ဘာနဲ့ နတ်ဆိုးမျိုးနွယ်စု နယ်‌မြေကို ဆက်သွယ်ထားတဲ့ လမ်းကြောင်း တစ်ခုလား”

စုရှင်း အနည်းငယ် စိတ်ဝင်စားသွားသည်။ နတ်ဆိုးနှိမ်နင်းရေး စခန်းမှတစ်ဆင့် တကယ်ပင် နတ်ဆိုးလောကကို ထွက်ပြေးနိုင်ခဲ့မည် ဆိုလျှင် သူသည် ဘေးအန္တရာယ်မှ အသက်ရှင် လွတ်မြောက်ပြီး နတ်ဆိုးကြီး၏ ဝါးမြိုခြင်းကို ရှောင်ရှားနိုင်မည် ဖြစ်သည်။

စုရှင်း တစ်ဦးတည်းသာ လွတ်မြောက်နိုင်ခဲ့မည် ဆိုလျှင်တောင် သရုပ်ပြခြင်း အချိန်ကို သိသိသာသာ ရှည်ကြာစေနိုင်မှာ ဖြစ်သည်။

“ကောင်းပြီလေ၊ စမ်းကြည့်ရအောင်!”

[ဝိညာဉ်စိုက်ခင်း ကောင်းချီးမြေထဲတွင် သင်သည် သရုပ်ပြခြင်း တစ်ခုအတွင်း ရောက်ရှိနေကြောင်း သိရှိသည်။]

[သင်သည် လက်တွေ့ကမ္ဘာသို့ ပြန်မသွားဘဲ ဝိညာဉ်စိုက်ခင်း ကောင်းချီးမြေမှ အလျင်စလို ထွက်ခွာခြင်း မပြုလုပ်ခဲ့ပေ။ သင်သည် ထပ်မံ၍ တစ်ပတ်ကြာ နေထိုင်ရန် ဆုံးဖြတ်ခဲ့သည်။]

[ထိုတစ်ပတ်အတွင်း သင်သည် ဆေးများကို ဆက်လက် ချက်လုပ်ပြီး ဝိညာဉ်နယ်မြေရှိ ဝိညာဉ်အပင်များကို ပြုစုစောင့်ရှောက်ခဲ့သည်။]

[တစ်ပတ်အကြာတွင် သင်သည် ဝိညာဉ်စိုက်ခင်း ကောင်းချီးမြေမှ ထွက်ခွာလာပြီး မည်သူမျှ သတိမပြုမိခင်တွင် လက်တွေ့ကမ္ဘာသို့ ပြန်လည် ရောက်ရှိလာသည်။ ထို့နောက် ကျင်းချုံးရွှယ်ကို ဆက်သွယ်ပြီး သူမနှင့် တွေ့ဆုံခဲ့သည်။]

[နဂါးနက် အသင်းမှ မူမမှန်သည့် လုပ်ဆောင်မှုများ ရှိမရှိ ကျင်းချုံးရွှယ်ကို မေးမြန်းခဲ့သော်လည်း သူမက မည်သည့် အမှားအယွင်းမျှ မရှိကြောင်း ဖော်ပြခဲ့သည်။]

[စိတ်ဖိစီးမှုများ ပြေလျော့သွားပြီးနောက် သင်သည် သင်၏ ပုံမှန် ကျင့်ကြံခြင်းနှင့် စိုက်ပျိုးခြင်းများကို ပြန်လည် စတင်ခဲ့သည်။]

[သင်၏ ကောင်းချီးမြေရှိ ဝိညာဉ်စွမ်းအင်သည် ပိုမို ပေါများသော်လည်း နတ်ဘုရား အသွင် ပြောင်းလဲခြင်း ကျင့်ကြံသူ တစ်ဦးအဖြစ် ထိုးဖောက်ရန် အလွန် ခက်ခဲကြောင်း သင် တွေ့ရှိခဲ့ရသည်။ သင်၏ ကျင့်ကြံမှုသည် အနည်းငယ်မျှသာ အကျိုး ဖြစ်ထွန်းခဲ့သည်။]

[ထို့ကြောင့် သင်သည် ဝမ့်ချင်းရွှမ်ကို ဆင်းသက်ဂိုဏ်းထဲသို့ လမ်းမှား ရောက်မသွားစေတာ သေချာစေရန် အချိန်ယူ စစ်ဆေးခဲ့သည်။ သူမ၏ ဘေးကင်းမှုကို အတည်ပြုပြီးနောက် သင်သည် ဆင်းသက်ဂိုဏ်း၏ ခြေရာများကို စတင် ရှာဖွေခဲ့သည်။]

[လပေါင်းများစွာ ရှာဖွေပြီးနောက် သင်သည် နောက်ဆုံးတွင် အနောက်တောင်ဘက် ပြည်နယ်ရှိ ရွှမ်းချင်မြို့ ၌ ဆင်းသက်ဂိုဏ်း၏ ဌာနချုပ်ကို တွေ့ရှိခဲ့သည်။]

[သင်သည် ရွှမ်းချင်မြို့သို့ သွားရောက်ကာ သင်၏ နတ်မျက်စိဖြင့် မြို့ကို ရည်ရွယ်ချက်ရှိရှိ ဖြတ်သန်း ရှာဖွေခဲ့သည်။]

[ထင်သည့်အတိုင်းပင်၊ တစ်လခွဲ ကြာပြီးနောက် ခွေးကောင်ကျုံးသည် သင့်ကို ရှာတွေ့ခဲ့သည်။]

[ခွေးကောင်ကျုံးသည် သင်၏ ငယ်ရွယ်သော ပုံပန်းသဏ္ဌာန်ကို ဦးစွာ အံ့ဩခဲ့သည်။ ထို့နောက် သင် လက်ရှိ ပိုင်ဆိုင်ထားသော ခန္ဓာကိုယ်မှာ သင် သိမ်းပိုက်ထားခြင်း ဖြစ်သည်ဟု နားလည်သွားခဲ့သည်။]