နတ်ဆိုးနှိမ်နင်းရေး စခန်း၏ လျှို့ဝှက်ချက်များ၊ သတ်ဖြတ်ခြင်း စစ်မြေပြင်။

လရောင်နီက လောရွှေရင်၏ မျက်နှာဖုံးမပါသည့် နူးညံ့ သိမ်မွေ့သော မျက်နှာပေါ်သို့ ဖြာကျနေရာ သူမ၏ ရုပ်သွင်သည် အထူးလှပပြီး သားနားသော အသွင်အပြင်ကို ဆောင်‌နေသည်။ ပြီးပြည့်စုံသော အနုပညာ လက်ရာတစ်ခုနှင့် တူသဖြင့် စုရှင်းမှာ ခဏတာမျှ အသက်ရှု မှားသွားခဲ့သည်။

လောရွှေရင်ကို သေချာကြည့်ပြီးနောက် စုရှင်းက–

“ကျွန်တော့် နောက်လိုက်ရင် ခင်ဗျား သေနိုင်တယ်…”

လောရွှေရင်က ရှေ့သို့ တစ်လှမ်းတိုးကာ စိတ်ရင်းမှန်ဖြင့် ပြောလိုက်သည်–

“သေခြင်းဆိုတာ စောတာနဲ့၊ နောက်ကျတာပဲ ကွာတာ… လက်ရှိ အခြေအနေအရဆိုရင် နတ်ဆိုးနှိမ်နင်းရေး စခန်းက မကြာခင် ကျဆုံးတော့မယ်။”

စုရှင်းသည် ထိုစကားကို ကြားသောအခါ အနည်းငယ် ခေါင်းညိတ်ပြပြီး လောရွှေရင်ကို လက်အမူအရာ ပြလိုက်သည်။ ထို့နောက် နှစ်ယောက်သား တောနက်ထဲသို့ ဦးတည် ထွက်ခွာသွားကြသည်။

လမ်းတစ်လျှောက်လုံးတွင် စုရှင်း၏ နတ်မျက်စိဖြင့် နတ်ဆိုးသားရဲ အချို့ကို တွေ့ရှိခဲ့သည်။

သို့သော် ထိုနတ်ဆိုး သားရဲများသည် စိတ်မမှန်ဘဲ တောထဲတွင် ရည်ရွယ်ချက်မဲ့ လှည့်လည် သွားလာနေကြသည်။ ၎င်းတို့၏ မျက်လုံးများမှာ သွေးဆန်နေကာ သတ်ဖြတ်လိုစိတ်များဖြင့် ပြည့်နှက်နေသည်။

နောက်မှလိုက်ပါလာသော လောရွှေရင်က ရုတ်တရက် မေးလိုက်သည်–

“စုရှင်း၊ ရှင် သတ်ဖြတ်ခြင်းလရဲ့ သက်ရောက်မှုကို မခံရဘူးလား။”

မေးခွန်းကြောင့် အံ့အားသင့်သွားသော စုရှင်းက “သတ်ဖြတ်ခြင်းလ ဟုတ်လား” ဟု တွေးလိုက်သည်။

ကောင်းကင်ယံမှ လကို လက်ညှိုးထိုးပြကာ လောရွှေရင်က “အဲဒီလကို သတ်ဖြတ်ခြင်းလလို့ ခေါ်တယ်လေ” ဟု ပြန်ဖြေသည်။

စုရှင်း အနည်းငယ် စိတ်ရှုပ်ထွေးနေသည်ကို မြင်သောအခါ လောရွှေရင်က သူမ၏ ရှင်းပြချက်ကို ဆက်လက် ပြောပြသည်–

“ငါတို့ အခုရောက်နေတဲ့ ကမ္ဘာကို သတ်ဖြတ်ခြင်း စစ်မြေပြင်လို့ ခေါ်တယ်… နတ်ဆိုး နှိမ်နင်းရေး စခန်းဆိုတာ ရှင်တို့ ကြယ်ပြာက လူသားမျိုးနွယ်တွေ ခေါ်တဲ့ နာမည်ပဲ၊ မြို့ပတ်ဝန်းကျင်က နေရာကိုပဲ ရည်ညွှန်းတာ…”

ထိုစကားကို ကြားသောအခါ စုရှင်း ပို၍ပင် စိတ်ရှုပ်ထွေးသွားသည်။ သတ်ဖြတ်ခြင်း စစ်မြေပြင် ဆိုသည့် အမည်ကို သူပထမဆုံး အကြိမ် ကြားဖူးခြင်း ဖြစ်သည်။

လော‌ရွှေရင်က စုရှင်းထက် ပို၍ များစွာသိသည်မှာ ထင်ရှားသည်။

သူမက ဆက်၍ ရှင်းပြသည်–

“သတ်ဖြတ်ခြင်း စစ်မြေပြင်ဟာ ရှေးယခင်က တန်ခိုးကြီးမားတဲ့ သတ္တဝါတစ်ပါးနဲ့ မျိုးနွယ်ခြားတို့ ပြင်းထန်တဲ့ တိုက်ပွဲ ဖြစ်ပွားခဲ့တဲ့ နေရာလို့ ဆိုကြပြီး အဲဒီတိုက်ပွဲရဲ့ ရလဒ်ကိုတော့ မသိရသေးဘူး…”

“သိရှိရသမျှကတော့ မူလက ကျယ်ပြောလှတဲ့ ကမ္ဘာကြီးဟာ ပျက်စီးသွားခဲ့ပြီး မရေမတွက်နိုင်တဲ့ သေးငယ်တဲ့ ကမ္ဘာတွေနဲ့ ကွဲကြေနေတဲ့ ကမ္ဘာတွေဟာ အာကာသဆိုင်ရာ မတည်ငြိမ်မှုတွေကြားမှာ ပြန့်ကျဲသွားခဲ့တယ်။ နေရာအနှံ့အပြားမှာ ပြန့်ကျဲနေတဲ့ ဒီလိုကွဲကြေနေတဲ့ ကမ္ဘာတွေကို သတ်ဖြတ်ခြင်းစစ်မြေပြင်လို့ ခေါ်ဆိုခဲ့ကြတာပါပဲ။”

“ကြယ်ပြာမှာတသ် သတ်ဖြတ်ခြင်း စစ်မြေပြင် ရှိတာ မဟုတ်ဘဲ ကျွန်မတို့ နေထိုင်ရာ ဝိညာဉ်မျိုးနွယ် ကမ္ဘာ အပြင်ဘက်မှာလည်း သတ်ဖြတ်ခြင်း စစ်မြေပြင် ရှိပါတယ်။ မျိုးနွယ်ခြားနဲ့ ကျွန်မတို့ရဲ့ တိုက်ပွဲဟာ အဲဒီသတ်ဖြတ်ခြင်း စစ်မြေပြင် ထဲမှာပဲ ဖြစ်ပွားတာပဲ။”

“သတ်ဖြတ်ခြင်း စစ်မြေပြင်ဟာ ကြီးမားတဲ့ လျှို့ဝှက်ချက်တွေကို ဖုံးကွယ်ထားပြီး မျိုးနွယ်ခြားတွေ အမျိုးမျိုးသော ကမ္ဘာတွေကို ကျူးကျော်ဝင်ရောက်တဲ့ လမ်းကြောင်းလည်း ဖြစ်တယ်လို့ ဆိုကြပါတယ်။”

ခဏတာ ရပ်နားပြီးနောက် လောရွှေရင်၏ အကြည့်သည် စုရှင်းထံသို့ ရောက်ရှိသွားသည်။

“ဒါဆို ရှင်က တကယ်တော့ တခြားကမ္ဘာတွေကို သွားဖို့ နည်းလမ်းရှာနေတာပေါ့၊ ဟုတ်လား။ အဲဒီအာကာသဆိုင်ရာ မတည်ငြိမ်မှုတွေကို သတ်ဖြတ်ခြင်း စစ်မြေပြင် ထဲကနေ ရှာချင်တာပေါ့… အရိုးသားဆုံး ပြောရရင် အခွင့်အလမ်းက နည်းတယ်နော်။”

လောရွှေရင်၏ စကားများကို ကြားပြီးနောက် စုရှင်းသည် အတွေးနယ်ချဲ့ သွားခဲ့သည်။

နောက်ဆုံး သရုပ်ပြခြင်း ကာလအတွင်း ခွေးကောင်ကျုံးထံမှ ရရှိသော အချက်အလက်များကို ပေါင်းစပ်လိုက်သောအခါ စုရှင်းသည် အကြမ်းဖျင်း သဘောပေါက်သွားခဲ့သည်။

သတ်ဖြတ်ခြင်း စစ်မြေပြင်သည် နတ်ဆိုးမျိုးနွယ်တို့၏ ကမ္ဘာ ကျူးကျော်မှု အတွက် လမ်းကြောင်း ဖြစ်သော်လည်း လူသားမျိုးနွယ် အတွက် ကျူးကျော်မှုမှ လွတ်မြောက်ရန် တစ်ခုတည်းသော ထွက်ပေါက်လည်း ဖြစ်သည်။

ခဏတာ တိတ်ဆိတ်ပြီးနောက် စုရှင်းက ထပ်မေးလိုက်သည်–

“ဒါဆို ကောင်းကင်ပေါ်က လကို ဘာလို့ သတ်ဖြတ်ခြင်းလလို့ ခေါ်တာလဲ။”

လောရွှေရင်က ရှင်းပြသည်–

“တိကျတဲ့ အချက်အလက်ကိုတော့ ကျွန်မ မသိဘူး။ ဒါပေမဲ့ သတ်ဖြတ်ခြင်း စစ်မြေပြင်မှာ ဆိုးညစ်တဲ့ နတ်ဘုရား တစ်ပါး သေဆုံးခဲ့ဖူးတယ်ဆိုတဲ့ ဒဏ္ဍာရီတစ်ခု ရှိတယ်။ သူသေဆုံးပြီးနောက် ကောင်းကင်ယံက လနီအဖြစ် ပြောင်းလဲသွားပြီး သတ်ဖြတ်ခြင်း စစ်မြေပြင် ပေါ်မှာရှိတဲ့ အသက်ရှိသမျှ အရာအားလုံးကို လွှမ်းမိုးနေတယ်လို့ ဆိုကြတယ်။”

“သူက သတ္တဝါ အလုံအလောက်ကို လွှမ်းမိုးနိုင်ပြီဆိုတာနဲ့ ပြန်လည် ရှင်သန်နိုင်တယ်လို့ ကောလာဟလတွေလည်း ထွက်တယ်။”

စုရှင်း ခေါင်းညိတ်ပြပြီး “ဒါဆို ကျွန်တော်က စိတ်ဓာတ်ကြံ့ခိုင်မှု ကောင်းလို့ သက်ရောက်မှု မရှိတာပေါ့၊ ဟုတ်လား။ ဒါပေမဲ့ ခင်ဗျားလည်း သိပ်ပြီး သက်ရောက်မှုရှိပုံ မရဘူးနော်” ဟု ပြောလိုက်သည်။

လောရွှေရင်က ခေါင်းခါပြပြီး ရှင်းပြသည်–

“ကျွန်မက ဝိညာဉ်မျိုးနွယ် ဖြစ်တဲ့အတွက် ပုံမှန်အားဖြင့် စိတ်ပိုင်းဆိုင်ရာ ခွန်အား ပိုပြီး သန်မာပေမဲ့၊ သတ်ဖြတ်ခြင်းလက ကျွန်မကို သက်ရောက်မှု ရှိနေတုန်းပါပဲ။ အခု ကျွန်မက ဒဏ္ဍာရီအဆင့် ရောက်နေပြီမို့လို့ ဒီလို စိတ်ခံစားမှု ဆိုးကျိုးတွေကို တစ်ချို့တစ်ဝက် ခုခံနိုင်တာပါ။”

“ဒါပေမဲ့ ပိုပြီး နက်ရှိုင်းတဲ့ နေရာကို သွားမယ်ဆိုရင်တော့ ကျွန်မ သိပ်ကြာကြာ ခံနိုင်တော့မှာ မဟုတ်ဘူး…”

ထို့နောက် စုရှင်းက “ဒါဆို ဒီစစ်မြေပြင်ရဲ့ အဆုံးမှာ ဘာရှိတာလဲ” ဟု မေးလိုက်သည်။

ခေါင်းခါရင်း လော ရွှေရင်က “ကျွန်မ မသိဘူး။ ဒါပေမဲ့ ရှင်က ဒီစစ်မြေပြင်ကနေ လွတ်မြောက်ဖို့ နည်းလမ်း ရှာနေတာဆိုရင်တော့ လနီ ရဲ့ အနက်ရှိုင်းဆုံး အပိုင်းမှာ တွေ့ရနိုင်ခြေ အများဆုံးလို့ ကျွန်မ ထင်တယ်” ဟု ပြောလိုက်သည်။

စုရှင်းသည် လောရွှေရင် ပြောသမျှ စကားလုံးတိုင်းကို အလွတ်ကျက် မှတ်ထားလိုက်သည်။

ထို့နောက် နှစ်ဦးသား ခဏမျှ ဆက်လက် လျှောက်လှမ်းသွားခဲ့ကြသည်။

လမ်းတစ်လျှောက်တွင် လောရွှေရင်၏ မျက်နှာသွင်ပြင်မှာ တဖြည်းဖြည်း ဖြူဖျော့လာသည်။ သူမသည် လနီ၏ လွှမ်းမိုးမှုကို အစွမ်းကုန် ရုန်းကန်နေရပုံရသည်။

ခဏတာ စဉ်းစားပြီးနောက် စုရှင်းသည် မှန်ကဲ့သို့ စိတ်ကြည်ဆေး နှစ်လုံးထုတ်ကာ လောရွှေရင်ကို ပေးလိုက်သည်။

“ဒါတွေ သောက်လိုက်၊ အခု ခဏတော့ ခင်ဗျားကို အထောက်အကူ ဖြစ်စေမှာပါ။”

လောရွှေရင်သည် တုံ့ဆိုင်းခြင်း မရှိဘဲ မျိုချလိုက်သည်။ ခဏအကြာတွင် သူမ၏ မျက်နှာသွင်ပြင်မှာ သိသိသာသာ ပြန်လည် ကောင်းမွန်လာခဲ့သည်။

မှန်ကဲ့သို့ စိတ်ကြည်ဆေးများသည် စိတ်ခံစားမှုများကို တည်ငြိမ်စေပြီး စိတ်ကို ကြည်လင်စေသောကြောင့် လနီ၏ သက်ရောက်မှုကို ခံနိုင်ရည် ရှိစေပါသည်။

သို့သော် စုရှင်းသည် စိတ်ငြိမ်ဆေး ဟုခေါ်သော အလယ်အလတ်တန်းစား ဆေးတစ်မျိုးကို သိထားသည်။ ၎င်းဆေးသည် စိတ်ခံစားမှုများကို ငြိမ်သက်စေရန် အတွက် အထူးအသုံးပြုပြီး ပိုမိုထိရောက်မှု ရှိသည်။

စုရှင်းနှင့် လောရွှေရင် တို့သည် အချိန်အတန်ကြာ လျှောက်လှမ်းခဲ့ကြသည်။

ထိုအချိန်တွင် သူ့စိတ်ထဲ၌ မြှုပ်နှံသရုပ်ပြခြင်း ပြီးဆုံးတော့မည် ဟူသော အချက်ပြတစ်ခု ပေါ်လာသည်။

စုရှင်းသည် စဉ်းစားလိုက်သည်။ ဆက်လက် သွားလျှင်လည်း သိပ်ပြီး ရလဒ် ထွက်ပေါ်လာမည် မဟုတ်ဟု ဆုံးဖြတ်ကာ မြှုပ်နှံ သရုပ်ပြခြင်းမှ ခေတ္တ ထွက်ခွာလိုက်သည်။

လက်တွေ့ကမ္ဘာသို့ ပြန်ရောက်လာသောအခါ စုရှင်းသည် သူ့ရှေ့မှ သရုပ်ပြခြင်း စာသားကို ကြည့်ကာ ရေရွတ်လိုက်သည်–

“သတ်ဖြတ်ခြင်းလ ၊ သတ်ဖြတ်ခြင်း စစ်မြေပြင်… လွတ်မြောက်ဖို့ တစ်ခုတည်းသော နည်းလမ်း?”

စုရှင်းသည် သက်ပြင်းချလိုက်ပြီး သရုပ်ပြခြင်း ဖန်သားပြင်ကို စိုက်ကြည့်လိုက်သည်။

[လောရွှေရင်သည် သင့်ကို တွေ့ရှိခဲ့ပြီး သင်တို့နှစ်ဦးသည် ဤတိတ်ဆိတ်နေသော စစ်မြေပြင်တွင် အတူတကွ လျှောက်လှမ်းနေကြသည်။]

[သတ်ဖြတ်ခြင်း စစ်မြေပြင်တွင် ဦးတည်ရာဟူ၍ မရှိ၊ သင့်ခေါင်းပေါ်ရှိ လနီသာ ရှိသည်။]

[သင် ရှေ့သို့ ဆက်လက် သွားသည်နှင့်အမျှ ခေါင်းပေါ်ရှိ လနီသည် ပို၍ ကြီးမားလာပြီး သက်ရှိ သတ္တဝါများ အပေါ် ၎င်း၏ဆိုးကျိုး သက်ရောက်မှုသည် ပို၍ပင် ပြင်းထန်လာသည်။]

[လမ်းတစ်လျှောက်တွင် သင်သည် မျိုးနွယ်ခြား၏ အစွမ်းထက်သော အဖွဲ့ဝင်များကို တိုး၍ တွေ့လာရသည်။ ၎င်းတို့အနက် အချို့သည် သင့်အား စတင် တိုက်ခိုက်လာကြသည်။]

[ဤ မျိုးနွယ်ခြား အဖွဲ့ဝင်များသည် ပုံစံအမျိုးမျိုး ကွဲပြားသော်လည်း ၎င်းတို့အားလုံးသည် သွေးနီရောင် မျက်လုံးများရှိကြပြီး သတ်ဖြတ်လိုစိတ်ဖြင့် ရူးသွပ်နေပုံရသည်။]

[ကံကောင်းစွာဖြင့် လောရွှေရင်က သင့်ဘေးမှ ကူညီပေးသောကြောင့် ၎င်းတို့ကို ရင်ဆိုင်ရာတွင် သင် သိပ်ပြီး အခက်အခဲ မရှိလှပါ။]

[ရက်အနည်းငယ် ကြာပြီးနောက် သင် ပိုမိုနက်ရှိုင်းသော နေရာသို့ ဝင်ရောက်လာသည်နှင့်အမျှ လောရွှေရင်သည် သူမ၏ စိတ်ခံစားမှုများကို ထိန်းချုပ်ရန် စွမ်းအင်ပို၍ စုစည်းရသည်။ ထို့ကြောင့် တိုက်ခိုက်မှုတွင် အပြည့်အဝ ပါဝင်နိုင်ခြင်း မရှိတော့ပါ။]

[ထို့ကြောင့် သင်သည် ဖိအားများကို ခံနိုင်ရည်ရှိပြီး သတ်ဖြတ်ခြင်း စစ်မြေပြင်တွင် လှည့်လည် သွားလာနေသော မျက်လုံးနီ မျိုးနွယ်ခြား အဖွဲ့ဝင်များကို သင်ကိုယ်တိုင် ရင်ဆိုင် ဖြေရှင်းရပါတော့သည်။]

…