သေလောက်အောင် ကြောက်လန့်သွားသည်

ဘရု၏ ပြောပြချက်အရ တခြားလောက မှ ဂိမ်းမာများသည် စွန့်စားခြင်းကို ဖျော်ဖြေမှုတစ်မျိုးအဖြစ် သဘောထားကြသည်။ အရှင်ရှားလော့ခ်က ပင့်ကူဂူရှင်းလင်းရေး မစ်ရှင်အသစ်ကို ကြေညာလိုက်သောအခါ ဂိမ်းမာများသည် အားတက်သရော အော်ဟစ်ကြသည်။ အချို့က “ထာဝရတိုင်းပြည်အတွက်” ဟု အော်ကြပြီး အချို့ကမူ “နတ်ဆိုးအရှင် ရှားလော့ခ်အတွက်” ဟု အော်ကြသည်။

ဂိမ်းမာများ၏ စိတ်အားထက်သန်မှုသည် လက်နက်များ ပြုလုပ်နေသော ဆင်းဘကို လန့်သွားစေသည်။

စိတ်အားထက်သန်မှုသည် ကောင်းသောအရာဖြစ်သည်။ အကြောင်းမှာ ၎င်းသည် စိတ်ဓာတ်တက်ကြွမှုကို ပြသသောကြောင့်ဖြစ်၏။ စိတ်အားထက်သန်နေသူများသည် ပို၍ ဝီရိယရှိစွာ လုပ်ဆောင်ကြသည်။

အရှင်ရှားလော့ခ်သည် မြေအောက်လောကသို့ ထွက်သွားသော ဥမင်လိုဏ်ခေါင်း၏ တံခါးကို ဖွင့်လိုက်သည်။ ပင့်ကူဂူသည် ဒန်ဂျင်နှင့် နီးကပ်စွာ တည်ရှိပြီး တစ်ခုတည်းသော ဥမင်လိုဏ်ခေါင်းဖြင့် တိုက်ရိုက်ဆက်သွယ်ထားသည်။ ထို့ကြောင့် ဂိမ်းမာများ အခြားနေရာများသို့ လျှောက်သွားမည်ကို အရှင်ရှားလော့ခ် စိုးရိမ်ရန် မလိုအပ်ပေ။ မြေအောက်လောက၏ အခြားနယ်မြေများသို့ ရောက်ရှိရန် ဂိမ်းမာများသည် ပင့်ကူဂူကို ဖြတ်သန်းရမည်ဖြစ်သည်။ ထို့ပြင် အရှင်ရှားလော့ခ်၏ အမိန့်မရှိဘဲ ဂိမ်းမာများသည် နယ်မြေအသစ်များသို့ သွားခွင့်မရှိသည့်အတွက် ကန့်သတ်ခံထားရသည်။ ဂိမ်းမာများ၏ စိတ်အားထက်သန်မှုကို အရှင်ရှားလော့ခ် အားပေးထောက်ခံသည်။ အကြောင်းမှာ သာမန်ဂိုဘလင်များသည် အထက်တန်းစားနတ်ဆိုးကို ပုန်ကန်ရန် မဖြစ်နိုင်သော်လည်း ဒန်ဂျင်မှ ထွက်ပြေးရန် ရွေးချယ်နိုင်သေး‌သောကြောင့်ပင်။

သို့သော် ဂိမ်းမာများသည် ပျော်ရွှင်နေပုံရသည့်အတွက် ပုန်ကန်မှုဖြစ်ပေါ်နိုင်ခြေ အနည်းငယ်သာရှိသည်။

အဓိကတံခါးဖွင့်လိုက်သောအခါ ဂိမ်းမာများသည် လက်နက်နှင့် ချပ်ဝတ်များ ဝယ်ယူရန် အုပ်စုဖွဲ့ကာ အပြေးအလွှားဝင်ရောက်လာကြသည်။ အရှင်ရှားလော့ခ် ကျေနပ်သွားသည်။ ၎င်းတို့၏ အပြုအမူများသည် ထူးဆန်းသော်လည်း ငတုံးများ မဟုတ်ကြပေ။ လက်ဗလာဖြင့် ပင့်ကူဂူသို့ စွန့်စားဝင်ရောက်ပြီး အသက်ဆုံးရှုံးမည်ကို ၎င်းတို့ မလုပ်ကြပေ။

ဆင်းဘ လုပ်ထားသော လက်နက်များသည် အကန့်အသတ်ရှိပြီး နာရီအနည်းငယ်အတွင်း ဓားတိုငါးချောင်းနှင့် ချပ်ဝတ် အနည်းငယ်သာ ပြီးစီးနိုင်သည်။ အကုန်ပြီးရန် အချိန်အနည်းငယ် ပိုလိုအပ်သည်။

ဂိမ်းမာတစ်ရာလုံးလုံး လက်နက်နှင့် ချပ်ဝတ်များကို ဝယ်ယူရန် မဖြစ်နိုင်သော်လည်း အရှင်ရှားလော့ခ်သည် ကောင်းသောအဖြေတစ်ခုကို စဉ်းစားမိသည်။ ဈေးနှုန်းမြှင့်တင်ထားရန်ဖြစ်သည်။

ဓားတိုတစ်ချောင်းလျှင် ကြေးဒင်္ဂါး ၃၀၀၊ ချပ်ဝတ်တစ်စုံလျှင် ကြေးဒင်္ဂါး ၃၀၀ သတ်မှတ်လိုက်သည်။

အရှင်ရှားလော့ခ်က ဂိုဘလင်များ ယမန်နေ့က ရရှိခဲ့သော ဆုလာဘ်များအရ တွက်ချက်ကြည့်လိုက်သည်။ ၎င်းတို့တစ်ဦးလျှင် ကြေးဒင်္ဂါး ၁၀၀ ဝန်းကျင် သာရှိသည်။ ထို့ကြောင့် လက်နက်နှင့် ချပ်ဝတ်ဝယ်ယူရန် ကြေးဒင်္ဂါး ၆၀၀ စုဆောင်းရန် သတ္တုရိုင်းများကို ဆက်လက်သယ်ယူရမည်ဖြစ်သည်။ ထိုအချိန် အတောအတွင်းတွင် ဆင်းဘသည် လက်နက်နှင့် ချပ်ဝတ်တစ်ရာကို ပြီးစီးနိုင်ပြီဖြစ်သည်။

အရှင်ရှားလော့ခ်က ၎င်း၏ အစီအစဉ်သည် ပြီးပြည့်စုံသည်ဟု ထင်မှတ်သော်လည်း မထင်မှတ်ထားသော အဖြစ်အပျက်တစ်ခု ဖြစ်ပေါ်လာသည်။ ဂိုဘလင်တစ်ဦးသည် ကြေးဒင်္ဂါးများကို စတင်ဝယ်ယူလာခြင်းပင်။

အာသာဟုခေါ်သော ဂိမ်းမာတစ်ဦးသည် လူအုပ်ကြားတွင် အော်ပြောသည်။

“ကြေးဒင်္ဂါးတစ်ပြားကို ယွမ် ၁၀ နဲ့ဝယ်မယ်။ ဒင်္ဂါး ၅၅၀ ပဲ စုမယ်။ အရေအတွက်ပြည့်တဲ့အထိ ဒီဈေးပဲ။ အယ်လီပေး ဒါမှမဟုတ် ဝီချက် နဲ့ ငွေလွှဲလို့ရတယ်။ ကျွန်တော့်နံပါတ် 185XXXXX ကို ရှာပြီး သူငယ်ချင်းအဖြစ် ထည့်လိုက်။ ငွေကို ကြိုလွှဲပေးလို့ ဖြစ်တယ်။”

အာသာ၏ စကားကိုကြားသောအခါ အခြားဂိမ်းမာများသည် ၎င်းတို့၏ ကြေးဒင်္ဂါးများကို ရောင်းချရန် ယူဆောင်လာကြသည်။

ဘောင်းဘီမဝတ်သူကဲ့သို့ အခြားဂိမ်းမာများလည်း ကြေးဒင်္ဂါးများ ဝယ်ယူရန် အော်ဟစ်ကြသည်။ အချို့သည် အာသာ၏ ဈေးနှုန်းဖြစ်သော ကြေးဒင်္ဂါးတစ်ပြားလျှင် ယွမ် ၁၀ ဖြင့် ဝယ်ယူကြပြီး အချို့ကမူ ဈေးနှုန်းကို ယွမ် ၁၀၀ အထိ မြှင့်‌ခေါ်ကြသည်။

အရှင်ရှားလော့ခ်သည် တခြားလောက၏ ဘာသာစကားကို ယခင်က သင်ယူထားဖူးပြီး ယွမ်သည် ရန်မင်ဘီ ဟုလည်း ခေါ်ကြောင်း သိထားသည်။ ၎င်းသည် တခြားလောက၏ ငွေကြေးဖြစ်ပြီး မြေအောက်လောက၏ မှော်ကျောက်တုံးများနှင့် တန်ဖိုးတူညီသည်။ ဂိမ်းမာများသည် တခြားလောက၏ ငွေကြေးကို အသုံးပြု၍ မြေအောက်လောကတွင် တန်ဖိုးနည်းသော ကြေးဒင်္ဂါးများကို လဲလှယ်မည်ဟု အရှင်ရှားလော့ခ် မမျှော်လင့်ထားပေ။ လက်နက်နှင့် ချပ်ဝတ်များကို ဦးစွာရရှိပြီး စွန့်စားရန် အခွင့်အရေးသည် ထိုမျှ အရေးကြီးနေပါသလား။

အရှင်ရှားလော့ခ်သာဆို ၎င်း၏ မှော်ကျောက်တုံးများကို တခြားလောက၏ ငွေကြေးနှင့် လဲလှယ်ရန် ဘယ်သောအခါမှ မလုပ်ပေ။

ဂိမ်းမာများ၏ အပြုအမူကို အရှင်ရှားလော့ခ် နားမလည်နိုင်သော်လည်း ဘရုကမူ ၎င်းတို့ကို နားလည်ပြီး ပြောလိုက်သည်။

“မြင်လား။ သူတို့က ငွေပေါတဲ့ ဝက်မျိုးတွေလို့ ပြောပြီးသားပဲ။ အိုင်းယား၊ ငွေကြေးလဲလှယ်ရေးနဲ့ ကူးသန်းရောင်းဝယ်ရေးစနစ်ကို အကောင်အထည်ဖော်လို့မရတာ နှမျောစရာပဲ။ ရန်မင်ဘီကို မှော်ကျောက်တုံးနဲ့ လဲလှယ်လို့ရရင် ကျွန်တော်တို့က ကမ္ဘာပေါ်မှာ အချမ်းသာဆုံး ဒန်ဂျင်ဖြစ်သွားမှာ။”

အရှင်ရှားလော့ခ်သည် ဘရု၏ စကားကို ချက်ချင်းနားလည်သွားသည်။ ဂိမ်းမာများသည် ဤမျှ ရက်ရောပြီး တခြားလောက၏ ငွေကြေးကို မှော်ကျောက်တုံးများနှင့် လဲလှယ်နိုင်ပါက သာမန်လက်နက်များရောင်းချရုံဖြင့်ပင် ကြီးမားသော အမြတ်အစွန်းရရှိနိုင်သည်။ အရှင်ရှားလော့ခ် စိတ်လှုပ်ရှားသွားသော်လည်း တခြားလောက၏ ငွေကြေးကို မှော်ကျောက်တုံးများနှင့် လဲလှယ်ရန် မဖြစ်နိုင်ပေ။

ကြေးဒင်္ဂါးများ၏ ရောင်းဝယ်ဖောက်ကားမှုပြီးစီးသွားပြီး ဂိမ်းမာငါးဦးသည် တစ်ဦးလျှင် ကြေးဒင်္ဂါး ၆၀၀ စီစုဆောင်းနိုင်ခဲ့သည်။ အခြားဂိမ်းမာအချို့သည် အနိမ့်ဈေးဖြင့် ကြေးဒင်္ဂါးများကို ဆက်လက်စုဆောင်းကြပြီး ကျန်သူများကမူ ကြေးဒင်္ဂါးရရှိရန် သတ္တုရိုင်းများကို သယ်ယူကြသည်။

ဂိမ်းမာငါးဦးသည် ဆင်းဘထံမှ လက်နက်နှင့် ချပ်ဝတ်များကို ချက်ချင်းဝယ်ယူလိုက်သည်။ အရှင်ရှားလော့ခ်သည် ၎င်းတို့၏ နာမည်များကို စစ်ဆေးကြည့်သည်။ ၎င်းတို့မှာ အာသာ ၊ ဘောင်းဘီမဝတ်သူ ၊ ရင်မွှေးမီးလောင် ၊ ဆယ်ဗားနပ်စ်နှင့် ဆာကူရာနိုမီယာ ကြောင်နတ်ဆိုးတို့ဖြစ်သည်။

၎င်းတို့သည် ချပ်ဝတ်များကို လျင်မြန်စွာ ဝတ်ဆင်ပြီး ဓားတိုများကို ကိုင်စွဲကာ အခြားဂိမ်းမာများ၏ စူးစိုက်ကြည့်ရှုမှုအောက်တွင် ခရီးထွက်သွားကြသည်။ ရဲရင့်သော ဂိမ်းမာအချို့က ၎င်းတို့နောက်လိုက်လာရန် ကြိုးစားသော်လည်း အပိုဝန်ထုပ်ဝန်ပိုးမဖြစ်စေလိုသည့် စွန့်စားသူငါးဦးက ပြတ်ပြတ်သားသား ငြင်းပယ်လိုက်သည်။ ထိုစွန့်စားသူများသည် အဖွဲ့လိုက် အပြင်သို့ ထွက်ခွာသွားသည်။

အရှင်ရှားလော့ခ်သည် ဤစွန့်စားသူငါးဦးက ပင့်ကူဂူတွင် မည်သည့်အရာများကို လုပ်ဆောင်မည်နည်း၊ ၎င်း၏ စီစဉ်မှုများကို ၎င်းတို့ ကျေနပ်မည်လားဟု သိချင်စိတ်ဖြစ်ပေါ်မိသည်။ အရှင်ရှားလော့ခ်သည် စွန့်စားသူများနောက်သို့ လိုက်သွားရန် ရည်ရွယ်ချက်မရှိပေ။ အကြောင်းမှာ ဉာဏ်ရည်နိမ့်သော ပင့်ကူများသည် နတ်ဆိုးများကို ဗီဇအရ ကြောက်ရွံ့ထိတ်လန့်ကြသည်။ အကယ်၍ ၎င်းတို့နောက်လိုက်သွားပါက သူတို့အုပ်စု မြေအောက်ပင့်ကူများနှင့် ရင်ဆိုင်ရတော့မည် မဟုတ်ပေ။

အရှင်ရှားလော့ခ်တွင် ဤစွန့်စားသူအဖွဲ့ကို စောင့်ကြည့်ရန် အခြားနည်းလမ်းတစ်ခုရှိသည်။

အရှင်ရှားလော့ခ်သည် ဒန်ဂျင်အမြုတေ ခန်းမဆောင်သို့ အလျင်အမြန်ပြန်လာပြီး ဒန်ဂျင်အမြုတေထဲသို့ မာနာစွမ်းရည်ထည့်သွင်းလိုက်သည်။ ထို့နောက် မှုန်ဝါးသော ပုံရိပ်တစ်ခု ပေါ်လာသည်။ ၎င်းသည် ရိုးရှင်းသော စောင့်ကြည့်မှော်အတတ်ဖြစ်ပြီး သတ်မှတ်ထားသော အကွာအ‌ဝေးအတွင်း လူများနှင့် အရာဝတ္ထုများကို စောင့်ကြည့်နိုင်သည်။ မျက်နှာပြင်ကမ္ဘာ၏ မှော်ဆရာများသည် ဤအလားတူအရာကို ပြုလုပ်ရန် ကြည်လင်သော ကျောက်တုံးကို အသုံးပြုရပြီး ကြာချိန်ပိုတိုသည်။

အရှင်ရှားလော့ခ်သည် သူက ဂိမ်းမာများ၏ အပြုအမူများကို စောင့်ကြည့်လေ့ရှိသည်ကို သတိပြုမိသည်။ အကြောင်းမှာ ၎င်းတို့သည် မထင်မှတ်ထားသော အရာများကို အမြဲလုပ်ဆောင်ကြပြီး ဤကမ္ဘာကို အလွန်စိတ်ဝင်စားကြသည်။ အနည်းငယ်သော ရှာဖွေတွေ့ရှိမှုများသည်ပင် ၎င်းတို့ကို အလွန်ပျော်ရွှင်စေပြီး စူးစမ်းလေ့လာရန် အလွန်စိတ်အားထက်သန်ကြသည်။

စွန့်စားသူငါးဦးသည် ဒန်ဂျင်မှ သတိထားစွာ ထွက်ခွာသွားပြီး အမှောင်ထဲတွင် မြင်နိုင်ရန် မီးတုတ်များကို ထွန်းညှိလိုက်ကြသည်။ တစ်ဖက်တွင် မီးတုတ်ကိုင်ထားပြီး တစ်ဖက်တွင် ဓားတိုများကို ကိုင်စွဲကာ ပတ်ဝန်းကျင်ကို ဂရုတစိုက် စူးစိုက်ကြည့်ရှုကြသည်။ မကြာမီပင် ၎င်းတို့သည် ပင့်ကူဂူထဲသို့ ဝင်ရောက်သွားသည်။

အချိန်ခဏ ဆွေးနွေးပြီးနောက် ရင်မွှေးမီးလောင်ကို ရှေ့ဆုံးတွင် ထားကြပြီး အာသာ ၊ ဆာကူရာနိုမီယာ ကြောင်နတ်ဆိုး ၊ ဘောင်းဘီမဝတ်သူနှင့် ဆယ်ဗားနပ်စ်တို့က နောက်မှ လိုက်ကြသည်။

၎င်းတို့သည် မြေအောက်ပင့်ကူများ၏ အာရုံကို ဖမ်းစားလိုက်မိပြီး ပင့်ကူတစ်ကောင်က ၎င်းတို့၏ ခရီးလမ်းကို ပိတ်ဆို့ကာ တိုက်ခိုက်လာသည်။

စောင့်ကြည့်ပုံရိပ်တွင် မြင်‌နေရသော စွန့်စားသူငါးဦးသည် ရုတ်တရက်ပေါ်လာသော ပင့်ကူကြောင့် ထိတ်လန့်တကြား ဖြစ်သွားပြီး နောက်ဆုတ်သွားကြသည်။ ဂိုဘလင်တစ်ကောင်ထက် အရွယ်အစား ပိုကြီးမားသော ပင့်ကူတစ်ကောင်က ၎င်းတို့ဆီသို့ ရန်လိုစွာ ပြေးဝင်လာသောအခါ ကြောက်ရွံ့ထိတ်လန့်ခြင်းသည် သဘာဝကျသည်။

ကြောက်ရွံ့မှုကို ပထမဆုံး ထိန်းချုပ်နိုင်ခဲ့သူမှာ အာသာဖြစ်သည်။ သူသည် ဓားတိုကို ပင့်ကူ၏ မျက်လုံးတစ်ဖက်ထဲသို့ ထိုးစိုက်လိုက်ရာ ပင့်ကူသည် နာကျင်စွာ နောက်ဆုတ်သွားသည်। ပင့်ကူသည် ၎င်း၏ ကြီးမားသော အစွယ်များကို ပြင်းထန်စွာ လှုပ်ရှားကာ မျက်လုံးထဲမှ ဓားတိုကို ဖယ်ထုတ်ရန် ကြိုးစားပြီး အာသာကို အားပြင်းစွာ ပင့်ထုတ်လိုက်သည်။ထို့နောက် ပင့်ကူသည် မျက်လုံးထဲတွင် ဓားတိုစိုက်လျှက် လျင်မြန်စွာ ထွက်ပြေးသွားသည်။

အခြားဂိုဘလင်လေးဦးသည် အာသာကို ထူမပြီး ရပ်နိုင်ရန် ကူညီပေးလိုက်ကြသည်။ ၎င်းတို့ငါးဦးသည် ပင့်ကူဂူ၏ အဝင်ဝတွင် ရှေ့ဆက်သွားရန် တုံ့ဆိုင်းနေကြ၏။ သို့သော် မြေအောက်ပင့်ကူများသည် ဂိုဘလင်များကို အချိန်ပေးမထားပေ။ အရှင်ရှားလော့ခ်၏ မွန်းစတားစာအုပ်တွင် ဖော်ပြထားသည့်အတိုင်း ၎င်းတို့သည် အုပ်စုဖွဲ့နေထိုင်ကြသည်။

မြေအောက်ပင့်ကူဆယ်ကောင်သည် သနားစရာဂိမ်းမာများကို လေးဘက်‌လေးတန်မှ ဝိုင်းပတ်တိုက်ခိုက်လာသည်။ ထိုတိုက်ပွဲသည် မြေအောက်ပင့်ကူများအတွက် ပြီးပြည့်စုံသော အောင်ပွဲဖြစ်သွားသည်။

ဂိမ်းမာများသည် ပင့်ကူပိုးမျှင်များဖြင့် တင်းကျပ်စွာ ချည်နှောင်ခံရပြီး ဂူ၏အလယ်သို့ ဆွဲယူခံရသည်။ မကြာမီပင် စွန့်စားသူငါးဦး၏ ဝိညာဉ်များသည် ဒန်ဂျင်အမြုတေထံသို့ ပေါ်ထွက်လာသည်။

ပင့်ကူဂူသို့ ပထမဆုံး စူးစမ်းမှုသည် လုံးဝပျက်စီးခြင်းဖြင့် အဆုံးသတ်သွားသည်။

အရှင်ရှားလော့ခ်သည် ၎င်းတို့၏ ရုပ်ကြွင်းများကို ပင့်ကူဂူမှ ပြန်လည်ယူဆောင်လာရန် ရည်ရွယ်ချက်မရှိပေ။ အကြောင်းမှာ ယခုအချိန်တွင် ၎င်းတို့၏ ရုပ်ကြွင်းများသည် ပင့်ကူများက အပြည့်အဝ စားသုံးခံရလိုက်ပြီးဖြစ်သည်။ ၎င်းသည် အရှင်ရှားလော့ခ် မျှော်လင့်ထားသည့်အတိုင်းပင် ဖြစ်သည်။

ဒန်ဂျင်အမြုတေ ခန်းမဆောင်တွင် နေရာရွှေ့ပြောင်းဝင်ပေါက်တစ်ခု ပေါ်ထွက်လာသည်။ မျက်စိမျက်နှာပျက်နေသော ဂိုဘလင်တစ်ဦးက ၎င်း၏ ခေါင်းထက်တွင် “ဘောင်းဘီမဝတ်သူ”ဟူသော စာသားနှင့်အတူ ထွက်ပေါ်လာသည်။

အခြားဂိမ်းမာများက ဘောင်းဘီမဝတ်သူသည် ဤပုံစံဖြင့် ဒန်ဂျင်သို့ ပြန်လည်ရောက်ရှိလာသည်ကို မြင်ပြီး ၎င်းသည် ရုပ်ကြွင်းမရှိဘဲ သေဆုံးခဲ့သည်ကို နားလည်သွားကြသည်။

“ဘယ်လိုလဲ။ မွန်းစတားတွေက သတ်ရခက်လား။”

“ဘယ်လိုသေသွားတာလဲ။”

“မွန်းစတားတွေ သတ်နိုင်ခဲ့လား။ လုယူပစ္စည်းတွေ ရခဲ့လား။”

“တစ်ခုခုပြောပြဦး။”

ဂိမ်းမာများသည် ဘောင်းဘီမဝတ်သူကို ဝိုင်းပတ်ကာ မေးခွန်းများဖြင့် ဝိုင်းပိတ်မေးကြသည်။ သို့သော် ဘောင်းဘီမဝတ်သူသည် ထိတ်လန့်တုန်လှုပ်နေပုံရပြီး အချိန်အတန်ကြာ တိတ်ဆိတ်နေသည်။ ထို့နောက် နေရာရွှေ့ပြောင်းဝင်ပေါက်လေးခု ထပ်မံပေါ်ထွက်လာပြီး ဂိုဘလင်လေးဦး ထွက်ပေါ်လာသည်။ ၎င်းတို့၏ ခေါင်းထက်တွင် အာသာ ၊ ဆာကူရာနိုမီယာ ကြောင်နတ်ဆိုး ၊ ရင်မွှေးမီးလောင်နှင့် ဆယ်ဗားနပ်စ်ဟူသော နာမည်များ ပေါ်နေသည်။

တခြားလောက၏ ဂိမ်းမာများသည် စိတ်လှုပ်ရှားစွာ အော်ဟစ်ကြသည်။

“ဒါက တစ်ဖွဲ့လုံး အပြတ်ရှင်းခံလိုက်ရတာပဲ။”

“ဘာလို့ ဒီလောက်ခက်ခဲနေရတာလဲ။ ဒါက ပထမဆုံး ဖွင့်ထားတဲ့ တိုက်ခိုက်ရေးနယ်မြေမဟုတ်ဘူးလား။”

“အိုး၊ လက်နက်တွေနဲ့ ချပ်ဝတ်တွေ ဘယ်လိုဖြစ်သွားမလဲ။ ပင့်ကူဂူထဲမှာ ဆုံးရှုံးသွားပြီလား။”

“လက်နက်တွေ ပျောက်မသွားရင် ကောင်းမယ်။ ပြန်သွားယူလို့ရမလား။”

“မကြိုးစားနဲ့ဦး။ လူအများကြီးနဲ့ မသွားနိုင်မချင်း စောင့်နေကြ”

“ဟာကွာ။ ဒီဂိမ်းထဲက မွန်းစတားက တကယ့် အစစ်အတိုင်းပဲ။ ဧရာမပင့်ကူက ငါ့ထက် နှစ်ဆကြီးတယ်။ သူ့အစွယ်တွေကိုတောင် အသေးစိတ်မြင်လိုက်ရတာ။ ငါဆို တကယ့်ဘဝမှာ ဘာမှမကြောက်တတ်ပေမယ့် အခုတော့ သေလောက်အောင် ကြောက်လန့်သွားတာပဲ။

အာသာက ရုတ်တရက် အော်ပြောလိုက်သည်။