ပထမဆုံး တိုက်ခိုက်ရေးသင်တန်း

သူက ဆောင်းတောင်ကုန်းမြို့မှ ဂနိုမ်းဖြစ်ကြောင်း ကြားလိုက်ရသောအခါ ဂိမ်းမာတို့ နားစွင့်သွားကြ၏။ ဘောင်းဘီမဝတ်သူ၏ ဆောင်းတောင်ကုန်းမြို့အကြောင်း ပိုစ့်ကြောင့် ထိုနေရာသည် သူတို့၏ စိတ်ထဲ၌ အထူးဆန်းကြယ်ဆုံးနေရာ ဖြစ်လာခဲ့သည်။ ဆောင်းတောင်ကုန်းမြို့မှ အမ်ပီစီတစ်ဦး ရောက်ရှိလာခြင်းက ဆောင်းတောင်ကုန်းမြို့ ဖွင့်လှစ်တော့မည်ကို ဖော်ပြနေပါသလား။ ထိုဂနိုမ်းက ဆောင်းတောင်ကုန်းမြို့အတွက် ကြိုတင်မစ်ရှင် စတင်ရန် တာဝန်ကျနေသူ ဖြစ်နိုင်ပေမည်။

ဂိမ်းမာများက နေရာရွှေ့ပြောင်းလာသော ဂနိုမ်းကို ဝိုင်းအုံမေးမြန်းနေကြစဉ် ရှားလော့ခ် လျှောက်လာသည်။ ဂနိုမ်းက အံ့သြတကြီး အော်ဟစ်လိုက်၏။ သူ ရှားလော့ခ်ကို မြင်သောအခါ လေးစားစွာ တစ်ကိုယ်တည်း ဒူးထောက်၍ ဦးညွှတ်အရိုအသေပြုပြီး “ကြီးမြတ်သော ထာဝရတိုင်းပြည် ဒန်ဂျင်အရှင် ကျွန်တော်မျိုး မိုရိုးစ်သည် ဆောင်းတောင်ကုန်းမြို့၏ ဂနိုမ်းဗိုလ်ကြီး ဖြစ်ပါသည် အရှင့် အလုပ်ခေါ်ယူမှုကို ကျွန်တော်မျိုး လက်ခံခဲ့ပါပြီ၊ အရှင့် အစေခံများကို လေ့ကျင့်ပေးရန် ကျွန်တော်မျိုး ဆန္ဒရှိပါသည်။ ကျွန်တော်မျိုး၏ တပည့်များသည် ဒီ... ဒီ... ချပ်ဝတ်ဝတ်ထားသော၊ တစ်ဝက်တစ်ပျက် ကိုယ်ဗလာ ဖြစ်နေသော၊ စုတ်ပြဲနေသော အဝတ်များ ဝတ်ဆင်ထားသော... အားကောင်းပြီး ရဲရင့်ကာ အနာဂတ်ကောင်းများ ပိုင်ဆိုင်ထားသည့် ဂိုဘလင်များလော” ဟု ပြောဆိုလိုက်သည်။

“သူက ငါတို့ကို ပြောနေတာလား”

“သူက အများသိအောင် ကြေညာထားတဲ့ စွမ်းရည်လေ့ကျင့်ပေးသူလား”

“ဟုတ်ပြီ၊ ငါတို့ ကျွမ်းကျင်မှုစကေးတွေ သင်လို့ရပြီ”

“မြန်မြန်လုပ်၊ မြန်မြန်လုပ်”

ဂိမ်းမာတို့က ဆူညံစွာ ပြန်လည်ပြောဆိုကြတော့သည်။

ရှားလော့ခ်က ဂနိုမ်းရှေ့သို့ လျှောက်သွားပြီး သူ့ကို အကဲခတ်ကြည့်ကာ မေးလိုက်၏။ “ငါ ဂိုဘလင်တွေကို စစ်သည်တော်တွေ ဖြစ်အောင် လေ့ကျင့်ပေးမယ့် အထူးအရည်အချင်းရှိသူ တစ်ယောက်ကို ရှာနေတာ။ မင်းက နေရာရွှေ့ပြောင်းဝင်ပေါက် ဧည့်ကြိုခန်းမက လုံခြုံရေးဝန်ထမ်း မဟုတ်လား”

ရှားလော့ခ်က မိုရိုးစ်ကို မယုံသင်္ကာ ဖြစ်နေသည်။ သူက မိုရိုးစ်ကို တစ်လလျှင် မှော်ကျောက်တုံးနှစ်ဆယ် ပေးချေရမည် မဟုတ်ပါလော။ မိုရိုးစ်က အသုံးမကျသူ ဖြစ်နေပါက ရှားလော့ခ်အတွက် လက်ခံနိုင်ဖွယ်ရာ မရှိပေ။

“ဒန်ဂျင်အရှင်၊ အရှင်ရဲ့ စိုးရိမ်မှုကို ကျွန်တော်မျိုး သိပါတယ်ခင်ဗျ။ ကျေးဇူးပြု၍ ကျွန်တော်မျိုးကို ယုံကြည်ပေးပါ၊ ကျွန်တော်မျိုး သူတို့ကို လေ့ကျင့်ပေးနိုင်ပါတယ်” ဟု မိုရိုးစ်က ပြောဆိုပြီး တံဆိပ်တစ်ခု ထုတ်ပြကာ စိတ်လှုပ်ရှားစွာ ပြောလိုက်၏။ “ကျွန်တော် ငယ်ရွယ်စဉ်က စစ်သည်တော်ပြိုင်ပွဲမှာ ပါဝင်ခဲ့ပြီး ရွှေတံဆိပ်နဲ့ မှော်ကျောက်တုံးငါးဆယ် ရခဲ့ပါတယ်။ အရှင် အထင်မမှားပါနဲ့။ ကျွန်တော် နာမည်ကျော်ကြားစဉ်က မှတ်တမ်းဝင် ဒဏ္ဍာရီလာ စစ်သည်တော်ပြိုင်ပွဲဝင် တစ်ယောက်ပါပဲ။ တခြား အရှင်များဆီမှာလည်း အမှုထမ်းဖူးပါတယ်။ နဂါးတွေ၊ ဆိုင်ရန်တွေ၊ မန္တန်ဆရာကြီးတွေနဲ့တောင် တိုက်ခိုက်ခဲ့ဖူးပါတယ်၊ ကျွန်တော် လက်မထပ်ခင်အထိပေါ့...”

မိုရိုးစ်သည် စိတ်ဓာတ်ကျမှုကို မထိန်းနိုင် ဖြစ်သွားသည်။ “ဒါက ပြောပြရရင် ရှည်လျား... ရှည်လျားလွန်းတဲ့ ပုံပြင်တစ်ပုဒ်ပါ...”

“တော်ပြီ၊ မင်း လက်ထပ်ပြီးနောက် ဘာဖြစ်ခဲ့လဲဆိုတာကို ငါ တွေးကြည့်လို့ရတယ်” ဟု ရှားလော့ခ်က မိုရိုးစ်ကို လက်ကာပြပြီး သူ့စကားကို ဖြတ်လိုက်၏။ “မင်း အစမ်းခန့်ကာလ တစ်ပတ် စတင်နိုင်တယ်။ လစာက ဂနိုမ်းတစ်ယောက်အတွက် မှော်ကျောက်တုံးဆယ်တုံး ပေးမယ်။ မင်း ဂိုဘလင်တွေကို ပင့်ကူတွေနဲ့ တိုက်ခိုက်နိုင်အောင် လေ့ကျင့်ပေးနိုင်မယ်ဆိုရင် ငါ မင်းကို တရားဝင် အလုပ်ခန့်ပါမယ်” ဟု ပြောသည်။

မိုရိုးစ် စိတ်လှုပ်ရှားပြီး ဒူးတစ်ဖက်ထောက်ကာ “ကျွန်တော်မျိုး မိုရိုးစ်သည် အရှင်ရှားလော့ခ်ကို အမှုထမ်းရန် ဆန္ဒရှိပါသည်” ဟု ပြောဆို၏။

“ငါတို့ရဲ့ စာချုပ် ချုပ်ဆိုပြီးပြီ” ဟု ရှားလော့ခ်က သူ့လက်ညှိုးကို ဆန့်ထုတ်လိုက်ရာ သူ့လက်ထဲတွင် မှော်စာချုပ် တစ်ခု ပေါ်လာသည်။ သူ လက်မှတ်ထိုးပြီး မိုရိုးစ် လက်ဗွေနှိပ်ရန် ပေးလိုက်၏။

“ငါတို့ရဲ့ စာချုပ် ချုပ်ဆိုပြီးပြီ”

သူတို့၏ စာချုပ် ချုပ်ဆိုပြီးနောက် မှော်စာချုပ် ပျောက်ကွယ်သွားသည်။ ထို့နောက် မိုရိုးစ်က စိတ်လှုပ်ရှားစွာ မတ်တပ်ရပ်ကာ “ဒန်ဂျင်အရှင်၊ ကျွန်တော်မျိုးရဲ့ အနားယူခန်းက ဘယ်မှာလဲခင်ဗျ” ဟု မေးလိုက်သည်။

“မင်း အိပ်ရာနဲ့ စောင် ယူလာခဲ့လား” ဟု ရှားလော့ခ်က ပြန်မဖြေဘဲ ပြန်မေးလိုက်သည်။

“ကျွန်တော်မျိုး အိမ်ကနေ ကမန်းကတန်း ထွက်လာရလို့ပါ... အနားယူခန်းကို ဝေမျှပြီးလည်း နေနိုင်ပါတယ်” ဟု မိုရိုးစ်က စိတ်အားထက်သန်စွာ ပြောသည်။

“မိုရိုးစ်က မင်းတို့ရဲ့ တရားဝင် စွမ်းရည်လေ့ကျင့်ပေးသူ ဖြစ်သွားပြီ။ အခု မိုရိုးစ်အတွက် အိပ်ရာတစ်ခု ဆောက်ပေးလိုက်ကြ” ဟု ရှားလော့ခ်က ဂိမ်းမာများကို အမိန့်ပေးလိုက်၏။

ဂိမ်းမာများသည် သူတို့၏ စကားပြောဆိုမှုကို အန်နီမေးရှင်း ကြည့်နေသကဲ့သို့ ကြည့်ရှုနေကြ၏။ ရှားလော့ခ်က ရုတ်တရက် အမိန့်ပေးလိုက်သောအခါ ဂိမ်းမာများသည် ချက်ချင်း အလုပ်စတင်ကြသည်။

ဂိမ်းမာများက နွံနှင့် သစ်မြစ်များဖြင့် ပြုလုပ်ထားသော အိပ်ရာတစ်ခုကို ဖယ်ရီမလေး၏ အိပ်ရာနှင့် မလှမ်းမကမ်းတွင် ဆောက်လုပ်ကြသည်။

မိုရိုးစ်က အသစ်ဆောက်ထားသော အိပ်ရာကို အနေခက်စွာ ကြည့်လိုက်သည်။ ထို့နောက် ကိုယ်လုံးကျုံ့ကာ နေ,နေသော ဖယ်ရီမလေးကို ကြည့်လိုက်သည်။

“မိုရိုးစ်၊ မင်း မြင်တဲ့အတိုင်းပဲ၊ ဒန်ဂျင်က အသစ်တည်ထောင်ထားတာ၊ တခြား အဆောင်တွေက အနားယူခန်းတွေထက် ပိုအရေးကြီးတယ်။ ဂိုဘလင်တွေဆို မြေကြီးပေါ်မှာ အိပ်နေကြတာ။ မင်းက အထူးအရည်အချင်းရှိသူ ဖြစ်တဲ့အတွက် မြေကြီးပေါ်မှာ အိပ်ရမှာ မဟုတ်ဘူး။ ဒီအိပ်ရာက မင်းအတွက်ပဲ” ဟု ရှားလော့ခ်က အိပ်ရာအသစ်ကို လက်ညှိုးထိုးပြကာ ပြော၏။ “မင်းမှာ မေးစရာမရှိဘူးဆိုရင် အသစ်တူးဖော်ထားတဲ့ နေရာက မင်းရဲ့ လေ့ကျင့်ရေးကွင်း ဖြစ်လိမ့်မယ်။ ငါ ဂိုဘလင်တွေကို လေ့ကျင့်ရေးကွင်းကို ကျောက်ပြားတွေနဲ့ ခင်းဖို့ စီစဉ်ပေးမယ်။ ဂိုဘလင်တွေက အခု မင်းရဲ့ လက်ထဲမှာပဲ” ဟု ပြောဆိုလိုက်သည်။

မိုရိုးစ်သည် အနားယူခန်းမရှိ၍ အဆင်မပြေ ဖြစ်နေသည်။ အသစ်တည်ထောင်ထားသော ဒန်ဂျင်နှင့် ဂိုဘလင်တစ်ရာကို မြင်သောအခါ ရှားလော့ခ်သည် ရှားပါးပြီး ရက်ရောသော ဒန်ဂျင်အရှင် တစ်ပါးဟု ခံစားမိသွား၏ ရှားလော့ခ်က ချမ်းသာပုံ မပေါ်၊ ဂိုဘလင်များတွင်လည်း သင့်လျော်သော အနားယူခန်းများ မရှိသော်လည်း ဂိုဘလင်များ ထိုမျှ အလုပ်ကြိုးစားနေကြသည်မှာ အကျိုးခံစားခွင့်များ အလွန်ကောင်းသောကြောင့် ဖြစ်ရမည်ဟု မိုရိုးစ် ‌သေချာသိလိုက်သည်။

မိုရိုးစ်သည် အစမ်းခန့်ကာလ ကုန်ဆုံးပြီး‌နောက် ထိုအကျိုးခံစားခွင့်များကို ရရှိရန် မျှော်လင့်နေခဲ့၏။

“ဟုတ်ကဲ့၊ ဒန်ဂျင်အရှင်” ဟု မိုရိုးစ်က စိတ်အားထက်သန်သွားသည်။

“မေးစရာမရှိတော့ဘူးဆိုရင် ငါနဲ့လိုက်ခဲ့၊ အလုပ်လိုအပ်ချက်တွေကို ရှင်းပြပေးမယ်” ဟု ရှားလော့ခ်က ဆိုသည်။

သူ မိုရိုးစ်ကို ဒန်ဂျင်အမြုတေ အဓိကခန်းမသို့ ခေါ်သွား၏။ တံခါးပိတ်ပြီးနောက် သူတို့နှစ်ဦးသာ ခန်းမထဲတွင် ရှိနေကြသည်။

ရှားလော့ခ်က ဂိမ်းမာများအတွက် စွမ်းရည်လေ့ကျင့်ပေးသူ ခန့်ထားသော်လည်း ဒန်ဂျင်၏ ဖွံ့ဖြိုးတိုးတက်မှုမှာ ဂိမ်းမာများအပေါ် မူတည်နေ၏။ အခမဲ့ လေ့ကျင့်ရေးအစီအစဉ်မှာ ပထမဦးဆုံးအတွက် နှစ်နာရီကြာ တစ်ကြိမ်သာ ရှိပေသည်။ သူတို့ ပိုမိုလေ့ကျင့်လိုပါက အခကြေးငွေ ပေးချေရပေမည်။ သူတို့သာ နေ့စဉ် အချိန်တိုင်း လေ့ကျင့်နေကြပါက မည်သူက အလုပ်လုပ်မည်နည်း။

အခကြေးငွေများသည် မှော်ကျောက်တုံးများအစား သတ္တုဒင်္ဂါးများ ဖြစ်သည်။

နောက်ထပ်ကတော့ လေ့ကျင့်ရေးအချိန်ဇယား ဖြစ်ချေ၏။ အိပ်ချိန်မှလွဲ၍ မိုရိုးစ်က ဂိုဘလင်များကို နှစ်နာရီ လေ့ကျင့်ပေးပြီးနောက် နာရီဝက် အနားယူချိန် ပေးမည် ဖြစ်ချေသည်။ အချိန်ဇယားမှာ လူသားဆန်သည်ဟု ဆိုရပေမည်။

“လေ့ကျင့်ရေးအချိန်ဇယားနဲ့ ပတ်သက်လို့ ကျွန်တော် အဆင်ပြေပါတယ်ခင်ဗျ။ ဒါပေမယ့် အရှင်ရှားလော့ခ်၊ သူတို့က ကြေးဒင်္ဂါးနဲ့ ဘာလို့ ပေးချေရတာလဲ။ ကြေးဒင်္ဂါးက မြေပေါ်လောကရဲ့ ငွေကြေး မဟုတ်ဘူးလား။ ကျွန်တော်တို့အတွက် တန်ဖိုးမရှိပါဘူးဗျာ” ဟု မိုရိုးစ်က သူ့အမြင်ကို ထုတ်ဖော်ပြောဆိုသည်။ ဂိုဘလင်များကို လေ့ကျင့်ရေးအတွက် ငွေကောက်ခံခြင်းနှင့် ပတ်သက်၍ သူ စိတ်ရှုပ်ထွေးနေရ၏။ စစ်သည်တော်တစ်ယောက် ဖြစ်လာရန်သည် ခက်ခဲကြမ်းတမ်းသော လုပ်ငန်းဖြစ်ပြီး ဂိုဘလင်အများစုမှာ လေ့ကျင့်ရန် ဆန္ဒမရှိကြပေ။ တိုက်ခိုက်ကြသောအခါ ဂိုဘလင်များသည် မျက်လုံးမှိတ်ကာ “ဝါးးးးး” ဟု အော်ပြီး တိုက်ခိုက်ကြ၏။ အချို့မှာ တိုက်ခိုက်ခြင်းကို လုံးဝရှောင်ကြဉ်ကြသည်အထိပင်။

ဂိုဘလင်များ ခက်ခဲကြမ်းတမ်းသော လေ့ကျင့်ရေးကို ငွေပေးပြီး လုပ်ရမည်ဆိုပါက လေ့ကျင့်ခြင်းကို ရှောင်ကြဉ်ရန် အကြောင်းပြချက်အဖြစ် အသုံးချနိုင်မည် မဟုတ်လော။ မိုရိုးစ်က သူတို့ကို မဖြစ်မနေ လေ့ကျင့်ပေးရန် ရည်ရွယ်ထားသော်လည်း ဂိုဘလင်များက လေ့ကျင့်ရန် ပိုက်ဆံမရှိဟု အကြောင်းပြနိုင်သည်။ မိုရိုးစ်သည် ဂိုဘလင်များကို စစ်သည်တော်များ ဖြစ်လာလိမ့်မည်ဟု အာမခံနိုင်တော့မည် မဟုတ်ပေ။

“ဒီကိစ္စကို စိတ်မပူပါနဲ့။ ဒါက ထာဝရတိုင်းပြည်မှာ သူတို့ရဲ့ ကြိုးစားအားထုတ်မှုကို ဆုချဖို့ သုံးတဲ့ ငါတို့ရဲ့ ဆုကြေးစနစ်ရဲ့ တစ်စိတ်တစ်ပိုင်းပဲ။ သူတို့ လေ့ကျင့်ရေးကို အချောင်ခိုမလားဆိုတာ ကိစ္စမရှိဘူး။ မင်း လေ့ကျင့်ရေး စတင်လိုက်တာနဲ့ သိလိမ့်မယ်။ ပထမဆုံး လေ့ကျင့်ရေးအစီအစဉ်က အခမဲ့ပဲ” ဟု ရှင်းပြပြီးနောက် ရှားလော့ခ်က မိုရိုးစ်ကို သူ၏ အလုပ်စတင်ရန် ပြင်ဆင်ဖို့ လွှတ်လိုက်သည်။

မိုရိုးစ် တိတ်ဆိတ်စွာ နေပြီး လေ့ကျင့်ရေးကွင်းသို့ လျှောက်သွား၏။

လေ့ကျင့်ရေးကွင်းသည် ဂိုဘလင်များဖြင့် ပြည့်နေပြီး မိုရိုးစ် ဒန်ဂျင်အမြုတေ အဓိကခန်းမမှ ချဉ်းကပ်လာသည်နှင့်အမျှ မျက်လုံးများပြူး၍ မျှော်လင့်ချက်အပြည့်ဖြင့် ကြည့်နေကြသည်။

“သူ ရောက်လာပြီ ငါတို့ နောက်ဆုံးတော့ လေ့ကျင့်လို့ရပြီ”

“တိတ်တိတ်နေ၊ တိတ်တိတ်နေ။ မင်းတို့ လေ့ကျင့်ရေးကို အာရုံစိုက်ပါ။ အာရုံစူးစိုက်”

မိုရိုးစ် အနားရောက်လာသောအခါ စကားပြောဆိုနေကြသော ဂိုဘလင်များ တိတ်ဆိတ်သွားကြသည်။ မိုရိုးစ်က သူတို့ကို တိုက်ခိုက်ရေးစွမ်းရည်များ သင်ကြားပေးရန်အတွက် စိတ်အားထက်သန်စွာ စောင့်ဆိုင်းနေကြသည်။

မိုရိုးစ်က သူသည် များစွာ ကြိုးစားရမည် သို့မဟုတ် ကျန်လူများကို သတိပေးရန် ဂိုဘလင်တစ်ကောင်ကို နမူနာပြ ခြိမ်းခြောက်ရမည်ဟု ထင်ထားခဲ့၏။ သို့သော် သူ နီးကပ်လာသည်နှင့်အမျှ သူတို့ တိတ်ဆိတ်သွားကြသည်။ သူတို့ အာရုံစူးစိုက်စွာ သူ့ကို ကြည့်နေကြသည်မှာ တစ်ခုခု လွဲချော်သွားမည်ကို ကြောက်ရွံ့နေသယောင်ပင် ဖြစ်ချေသည်။

ဂိုဘလင်များသည် မမျှော်လင့်ဘဲ အလွန်နာခံကြပေ၏။

“ဒန်ဂျင်အရှင်ရဲ့ ညွှန်ကြားချက်အရ လူတိုင်း အခမဲ့ နှစ်နာရီ လေ့ကျင့်ရေး ရနိုင်ပါတယ်။ အဲဒီနောက်ပိုင်း လေ့ကျင့်ရေးအစီအစဉ် နှစ်နာရီစာအတွက် ကြေးဒင်္ဂါး တစ်ရာ ကုန်ကျပါမယ်။ လေ့ကျင့်ရေးအစီအစဉ်တွေ ကြားမှာ နာရီဝက် အနားယူချိန် ရှိပါမယ်။ လေ့ကျင့်ရေးကာလအတွင်းမှာ ငါ့ရဲ့ ညွှန်ကြားချက်တွေကို နာခံရပါမယ်။ နားလည်လား” ဟု မိုရိုးစ်က ဂိုဘလင်များကို အော်ပြောလိုက်သည်။

“နားလည်ပါတယ်” ဟု ဂိမ်းမာများက တစ်ပြိုင်နက် အော်ပြောလိုက်ကြသည်။

ထို့နောက် သူတို့သည် ဓားနှင့်မှော် ဂိမ်းလောက၏ ပထမဆုံး လေ့ကျင့်ရေးကို စတင်လိုက်ကြချေ၏...

ရှားလော့ခ်က ဂိမ်းမာများ သူတို့၏ ခန္ဓာကိုယ်ကြံ့ခိုင်မှုနှင့် တိုက်ခိုက်ရေးစွမ်းရည်များကို လေ့ကျင့်နေကြသည်ကို ကြည့်ရှုနေသည်။ သို့သော် သူသည် လေ့ကျင့်ရေးတွင် ပါဝင်ခြင်း မရှိသော ဂိမ်းမာတစ်ဦးကို သတိပြုမိလိုက်၏။ မိုးလက်ဖက်ရည် အမည်ရှိ ထိုဂိမ်းမာသည် ပန်းခင်းတွင် ပန်းများ စိုက်ပျိုးနေသည်။

“ဘရု၊ မင်း ဂိမ်းမာတွေက တိုက်ခိုက်ရတာနဲ့ စွန့်စားရတာကို နှစ်သက်တယ်လို့ မပြောခဲ့ဘူးလား။ ဘာလို့ အဲဒီဂိမ်းမာက လေ့ကျင့်ရေး မလုပ်တာလဲ” ဟု ရှားလော့ခ်က မေးလိုက်သည်။

“ကျွန်တော် ကြည့်လိုက်ပါဦးမယ်...”

ဘရုက ခဏမျှ စဉ်းစားပြီး “အဲဒီ ဂိုဘလင်က ဘဝအလှအပ ခံစားတတ်သူနဲ့ ရှုခင်းကြည့်သူ ဂိမ်းမာအမျိုးအစားပါခင်ဗျ” ဟု ပြန်လည်ဖြေဆိုလိုက်၏။