ခရေမာအား သွေးဆောင်ဖြားယောင်းခြင်း

ရှားလော့ခ်သည် အစပိုင်းတွင် ဂိမ်းမာများအား အခြေခံကျပြီး အကျိုးဖြစ်ထွန်းစေမည့် အဆောက်အအုံများကို တည်ဆောက်စေလိုခဲ့သည်။ သူတို့သာ မှော်ကျောက်တုံးကဲ့သို့ တန်ဖိုးကြီးသတ္တုရိုင်းများကို ရှာဖွေတွေ့ရှိနိုင်လျှင် သူသည် ထိုမှော်ကျောက်တုံးများကို အသုံးပြု၍ အခြားဒန်ဂျင်အမြုတေများကို ဝယ်ယူကာ သူ၏ဒန်ဂျင်ကို အဆင့်မြှင့်တင်နိုင်မည် ဖြစ်၏။

ဒန်ဂျင်အမြုတေကို အဆင့်မြှင့်တင်ခြင်းဖြင့် သူသည် ပိုမိုမြင့်မားသောအဆင့်ရှိ အစေခံများကို ခေါ်ယူနိုင်ပေမည်။ အကြောင်းမှာ ဂိုဘလင်များမှာ သာမန်အလုပ်သမားများသာဖြစ်ပြီး စစ်သည်တော်များ ဖြစ်မလာနိုင်သောကြောင့်တည်း။ ဂိုဘလင်များသည် အားနည်းပြီး ဉာဏ်ရည်လည်း နိမ့်ကျ၏။

သို့သော် တခြားလောကမှ ဂိမ်းမာများ၏ ဉာဏ်ရည်မှာ သာမန်ဂိုဘလင်များထက် များစွာမြင့်မားလှသည်။ ထို့အပြင် သူတို့သည် အဆုံးမရှိ ပြန်လည်ရှင်သန်နိုင်ကြသည်။ ရှားလော့ခ်ထံတွင် ရဲတင်းသောစိတ်ကူးတစ်ခု ရှိလာခဲ့သည်။

"ဘရု၊ ငါ့မှာ ရဲတင်းတဲ့စိတ်ကူးတစ်ခု ရှိတယ်။" ရှားလော့ခ်က ဆို၏။

"အရှင်ရှားလော့ခ်၊ အရှင် နောက်ဆုံးတော့ သဘောပေါက်သွားပြီလား။" ဘရုက စိတ်လှုပ်ရှားစွာ ဆိုလိုက်သည်။ "အရှင်က ဂိမ်းမာတွေနဲ့ စစ်တပ်ဖွဲ့ပြီး တခြားဒန်ဂျင်တွေကို တိုက်ခိုက်တော့မလို့လား။ ကျွန်တော်မျိုး ပြည့်စုံတဲ့စစ်ဆင်ရေးအစီအစဉ်တစ်ခုတောင် ပြင်ဆင်ထားပြီးသား။ ကျွန်တော်တို့ရဲ့ ဒန်ဂျင်အမြုတေက ဂိုဘလင်တွေကိုပဲ ခေါ်နိုင်ပေမယ့်၊ မစ်ရှင်အမျိုးမျိုးသုံးပြီး ဂိမ်းမာတွေကို အားကောင်းလာအောင် လုပ်လို့ရတယ်။ ပြီးရင် ဒန်ဂျင်တစ်ခုကို ပစ်မှတ်ထားပြီး သူ့အပြင်ဘက်မှာ နေရာရွှေ့ပြောင်းဝင်ပေါက်တစ်ခု တပ်ဆင်လိုက်မယ်။ ဂိမ်းမာတွေရဲ့ အဆုံးအစမရှိ ပြန်လည်ရှင်သန်နိုင်စွမ်းကို အသုံးချပြီး ဒန်ဂျင်ကို မမောမပန်း တိုက်ခိုက်ခိုင်းမယ်။ အရှင်ရှားလော့ခ်ဆီမှာ မာနာစွမ်းအင် လုံလုံလောက်လောက်သာရှိရင် အဲ့ဒီဒန်ဂျင်ကို ကျွန်တော်တို့ သိမ်းပိုက်နိုင်မှာပဲ။"

"ဒီနည်းနဲ့ တခြားဒန်ဂျင်အမြုတေတွေရလာတဲ့အခါ ကျွန်တော်မျိုး အဆင့်မြှင့်ပြီး ပိုများ၊ ပိုအားကောင်းတဲ့ မြေအောက်လောကသတ္တဝါတွေကို ခေါ်နိုင်လိမ့်မယ်။ ကျွန်တော်တို့ရဲ့အင်အားက တဖြည်းဖြည်းကြီးထွားလာပြီး မြေအောက်လောကတစ်ခုလုံးကို သိမ်းပိုက်နိုင်မှာ။ ဝိညာဉ်လောကကိုတောင် ဖြစ်နိုင်ရင်ဖြစ်နိုင်မှာ။ ပြီးရင် မြေပေါ်လောကကို သိမ်းပိုက်မယ်။ အဲ့ဒီအချိန်ကျရင် ကျွန်တော်မျိုးက တစ်ဦးတည်းသော ဒန်ဂျင်အမြုတေဖြစ်လာပြီး၊ အရှင်ရှားလော့ခ်ကတော့ အင်အားအကြီးဆုံး နတ်ဆိုးဘုရင် ဖြစ်လာမှာပါပဲ။"

ဘရုသည် စိတ်လှုပ်ရှားစွာ ပြောဆိုလိုက်သည်။ သူ၏ဖော်ပြချက်ထဲတွင် တောက်ပသောအနာဂတ်သည် ပန်းချီကားလိပ်တစ်ခုပမာ ပွင့်လင်းထွက်ပေါ်လာခဲ့သည်။ ရှားလော့ခ်က ဘရု၏ စိတ်ကူးယဉ်အိပ်မက်ကို တုံ့ပြန်ခြင်းမပြုဘဲ၊ အေးဆေးတည်ငြိမ်စွာ မေးလိုက်သည်။ "မင်းကို ဘယ်လောက်ကြာအောင် စွန့်ပစ်ထားခံခဲ့ရတာလဲ။"

"ကျွန်တော်မျိုးကို နှစ်ပေါင်းတစ်သောင်းကြာအောင် စွန့်ပစ်ထားခဲ့တာပါ အရှင်ရှားလော့ခ်။ လွန်ခဲ့တဲ့လဝက်လောက်ကမှ အရှင်က ကျွန်တော်မျိုးကို ပြန်နိုးထစေခဲ့တာပါ။" ဘရုက ရိုသေစွာ ပြန်ဖြေ၏။

"ဒါကြောင့်ကိုး။ လွန်ခဲ့တဲ့နှစ်တစ်သောင်းက ငါသာ နတ်ဆိုးတစ်ယောက်ဖြစ်ခဲ့မယ်ဆိုရင်တော့ မင်းအစီအစဉ်ကိုကြားပြီး စိတ်လှုပ်ရှားမိမှာပဲ၊ ဒါပေမဲ့ ခေတ်ကြီးက ပြောင်းလဲသွားပြီ ဘရုရေ့။" ရှားလော့ခ်က ဆိုသည်။

"အကြောင်းပြချက်မရှိဘဲ ဒန်ဂျင်တွေ သိမ်းပိုက်တဲ့ခေတ်က ကုန်သွားပြီ။ အခုက စနစ်ကျတဲ့ မြေအောက်လောကလူ့အဖွဲ့အစည်း ဖြစ်နေပြီ။ ဒန်ဂျင်တစ်ခုကို သိမ်းပိုက်ရတဲ့အခက်အခဲကို ထားဦး၊ နတ်ဆိုးတွေက နှစ် ၉၀ ကြာ မသင်မနေရ အခမဲ့ပညာရေးကို သင်ယူရတော့၊ ဒန်ဂျင်အရှင်သခင်တိုင်းက ငါ့အတန်းဖော်၊ စီနီယာ၊ ဒါမှမဟုတ် ဂျူနီယာ ဖြစ်နိုင်တယ်။ ကမ္ဘာကြီးတစ်ခုလုံးကို သိမ်းပိုက်ဖို့၊ ဖျက်ဆီးဖို့ဆိုတာကတော့ ရှေးခေတ်နတ်ဆိုးတွေပဲ အဲ့လိုရည်မှန်းချက်တွေ ထားကြတာ။ မျိုးဆက်သစ်နတ်ဆိုးတွေက စိတ်မဝင်စားကြတော့ဘူး။"

ရှားလော့ခ်သည် တစ်စုံတစ်ခုသော ရယ်စရာအကြောင်းအရာကို ပြန်လည်သတိရသွားဟန်ဖြင့် ပြုံးလိုက်ပြီးမှ ဆက်ပြောသည်။

"ကျောင်းကဆရာတွေ ပြောဖူးတယ်၊ သတ္တဝါတစ်ကောင်က မွေးကတည်းက ဒုက္ခပင်လယ်ဝေနေရရင် နတ်ဆိုးတစ်ပါးကပေးတဲ့ ဒုက္ခက ထူးပြီးသိသာမှာမဟုတ်ဘူးတဲ့။ အဲ့ဒီသတ္တဝါက သေသွားမယ်၊ ဝိညာဉ်က ဝိညာဉ်လောကကို ပြန်သွားရင် နတ်ဆိုးနဲ့ ဘာမှမဆိုင်တော့ဘူး။ ဒါပေမဲ့ သတ္တဝါတွေက သုခချမ်းသာကို စွဲလမ်းခံစားနေရပြီးမှ ကံဆိုးမိုးမှောင်ကျမှုနဲ့ ဒဏ်ခတ်ခံရရင်တော့၊ သူတို့ရဲ့အရင်က သုခချမ်းသာတွေကို ပြန်တမ်းတရင်း နာကျင်ခံစားနေရတဲ့ သူတို့ဝိညာဉ်တွေက အချိုမြိန်ဆုံးပဲတဲ့။ အဲ့ဒီဝိညာဉ်တွေကနေ ဖြစ်လာတဲ့ မှော်ကျောက်တုံးတွေက ဈေးအကြီးဆုံးပဲ။"

ရှင်းပြပြီးနောက် ရှားလော့ခ်က ပြုံးလိုက်သည်။

"နတ်ဆိုးဆိုတာ ခန္ဓာကိုယ်ကိုဖျက်ဆီးသူတွေ မဟုတ်ဘူး၊ နှလုံးသားကို ခြယ်လှယ်သူတွေပဲ။"

"အရှင့်ရည်မှန်းချက်ရဲ့ အခက်အခဲက ပိုပြီးကြီးမားတာပေါ့။" ဘရုက ပြုံးလျက်ဆို၏။ ထို့နောက် သူက "ကျွန်တော်မျိုးက အရှင့်ရဲ့ရဲတင်းတဲ့စိတ်ကူးကို မခန့်မှန်းနိုင်ခဲ့တော့ ပြောပြပေးလို့ရမလား။"ဟုဆိုသည်။

"ငါက ပါရမီရှင်ပဲလို့ ကိုယ့်ကိုယ်ကိုယ် ထင်နေမိတယ်။" ရှားလော့ခ်သည် အလွန်စိတ်လှုပ်ရှားစွာဖြင့် လက်ဖဝါးနှစ်ဖက်ကို ပွတ်သပ်ရင်း ဆိုလိုက်သည်။ "ဂိုဘလင်တွေက ထပ်ခါတလဲလဲတိုက်ပွဲတွေ၊ အတွေ့အကြုံတွေ၊ ပြန်လည်ရှင်သန်မှုတွေကနေတစ်ဆင့် သူတို့ထက်သာလွန်တဲ့ ပြိုင်ဘက်တွေကို အနိုင်ယူနိုင်တယ်လို့ မင်းမပြောခဲ့ဘူးလား။"

ရှားလော့ခ်က လက်ခုပ်တီးလိုက်ပြီး ဆိုလိုက်သည်။ "ငါက ဂိမ်းမာတွေကို စစ်သည်တော်တွေအဖြစ် မှတ်ပုံတင်ပြီး တိုက်ခိုက်ခိုင်းခြင်းအားဖြင့် ပိုက်ဆံရှာလို့ရတယ်။ စဉ်းစားကြည့်လေ။ သူတို့ပြိုင်ဘက်တွေက အော့ခ်တွေ၊ ဝံပုလွေလူသားတွေ၊ ပြီးတော့ ချုပ်ရိုးကောင်တွေ၊ အဲ့ဒါတွေက သိပ်အားကောင်းတဲ့ မြေအောက်လောကသတ္တဝါတွေ၊ ငါ့မှာတော့ အားနည်းတဲ့ဂိုဘလင်လေးတွေပဲရှိတာ။ စစ်သည်တော်ပြိုင်ကွင်းမှာ သူတို့ထက်သာတဲ့သတ္တဝါတွေနဲ့ တိုက်ခိုက်ခိုင်းမယ်၊ လောင်းကြေးတွေက ဂိုဘလင်တွေရှုံးမယ်ဆိုတဲ့ဘက်မှာ ရှိနေမှာပဲ။ အကြိမ်ဆယ်ခါလောက် အသတ်ခံရပြီး အတွေ့အကြုံ အလုံအလောက်ရသွားရင်၊ သူတို့က သာလွန်တဲ့သတ္တဝါတွေကို အနိုင်ယူနိုင်ပြီဆိုတာနဲ့ ဂိုဘလင်တွေနိုင်မယ့်ဘက်ကနေ ငါလောင်းမယ်။ သူတို့နိုင်တာနဲ့ ငါကတော့ မမျှော်လင့်ဘဲ ငွေတွေအများကြီး ဝင်ပြီဟေ့။"

"အရှင်ရှားလော့ခ်၊ အရှင့်ရဲ့ နှစ် ၉၀ ကြာ မသင်မနေရ အခမဲ့ပညာရေးက လောင်းကစားမလုပ်ဖို့ရော မသင်ပေးခဲ့ဘူးလား။ အရှင်က အဲ့ဒီဂိမ်းမာတွေကို ဒီလိုအသုံးချနေတာ... အရှင်က နတ်ဆိုးမှ ဟုတ်ရဲ့လား။" ဘရုက ခေတ္တစဉ်းစားပြီးမှ မေးလိုက်သည်။

"မှန်တယ်လေ၊ ငါက အထက်တန်းစား နတ်ဆိုးပဲ။"

ရှားလော့ခ်၏စိတ်ကူးမှာ ရဲတင်းလှ၏။ သူ့တွင် ငွေကြေးများများစားစား မရှိခဲ့။ ထိုဂိမ်းမာများကို စစ်သည်တော်များအဖြစ် မှတ်ပုံတင်ပြီး သူတို့နိုင်သည့်ဘက်က လောင်းလျှင်ပင်၊ ငွေပြန်ရနိုင်သည့်အခြေအနေမတိုင်မီ ရှုံးပွဲဘယ်လောက်များများ သူခံနိုင်မှာလဲ။ အကြိမ်များစွာရှုံးခဲ့လျှင်မူ တစ်ကြိမ်နိုင်ရုံမျှဖြင့် သူ၏ဆုံးရှုံးမှုများကို ပြန်လည်ဖာထေးနိုင်မည် မဟုတ်ပေ။

ဟုတ်သည်၊ ဂိမ်းမာများမှာ ဘရုပြောသကဲ့သို့ ထူးချွန်ပြောင်မြောက်ရန်တော့ လိုအပ်ပေသည်။

ရှားလော့ခ်နှင့် ဘရုတို့ စကားစမြည်ပြောနေကြစဉ်၊ အပြင်ဘက်ရှိဂိမ်းမာများသည် သူတို့၏ချပ်ဝတ်များကို ဝတ်ဆင်ပြီး ဆွေးနွေးတိုင်ပင်ရန် စုရုံးနေကြ၏။

"ဘယ်လိုလဲ။ ဘယ်လိုလဲ။ ဘာတွေသိခဲ့ရလဲ။ ဘော့စ်ရဲ့စွမ်းရည်က ဘယ်လိုလဲ။ လက်ပါးစေတွေရဲ့စွမ်းရည်တွေကရော။"

"ဘာထူးမှာလဲကွာ။ တစ်ခါပဲ တိုက်ကြည့်ရသေးတာ။ လက်ပါးစေတွေရဲ့ ပစ်မှတ်ထားခံရမှုက ခေါင်းဆောင် ခရေမာနဲ့ ချိတ်ဆက်မနေဘူးဆိုတာတော့ သိခဲ့ရတယ်။ ခေါင်းဆောင်မသိအောင် ခွေးခေါင်းစစ်သည်တွေကို အဝေးကြီးဆီ ဆွဲခေါ်သွားလို့ရတယ်။"

"ဒါက ပင့်ကူတွေနဲ့တိုက်တုန်းကလိုပဲ မဟုတ်ဘူးလား။"

"ဟုတ်တယ်၊ ငါတို့ ပင့်ကူတွေနဲ့တိုက်တုန်းက နည်းဗျူဟာအတိုင်း ခွေးခေါင်းလူသားတွေကို တိုက်လို့ရနိုင်မလား။ နည်းနည်းစီဆွဲထုတ်ပြီး တစ်ကောင်ချင်း သတ်ပစ်ကြမလား။"

"စမ်းကြည့်သင့်တယ်။ ငါတော့ ဖြစ်နိုင်မယ်ထင်တယ်။"

"ငါတို့ထဲက တချို့က ခရေမာရဲ့ပစ်မှတ်ကို ဆွဲထားမယ်၊ လေးတိုကိုင်တဲ့ နောက်အုပ်စုက လက်ပါးစေတွေကို ရှင်းမယ်။ အဝေးမှာရပ်၊ လက်ပါးစေတချို့ကို သတ်ပြီးရင် နောက်နည်းနည်းဆုတ်။ သူတို့မှာ အကောင်နှစ်ဆယ်သုံးဆယ်လောက်ရှိတော့ အဲ့ဒါတွေကို အကုန်ရှင်းဖို့ အသုတ်အနည်းငယ်လောက်တော့ ကြာလိမ့်မယ်။ ခရေမာတစ်ကောင်တည်းကျန်မှ ခေါင်းဆောင်ကို ဝိုင်းအုံပြီး သတ်ပစ်ကြမယ်။"

"ဒီနည်းလမ်းက ဖြစ်နိုင်ပါတယ်။ အခက်ဆုံးက ခရေမာပဲ။ ဂိုဘလင်တစ်ကောင်ကို တူတစ်ချက်ပဲ။ ဒါက လုံးဝကို မတရားဘူး။"

"နေဦး၊ ဒီဂိမ်းမှာ ပစ်မှတ်ထားစနစ် တကယ်ရှိလို့လား။"

"ရှိမှာပေါ့။ မရှိရင် ခွေးခေါင်းလူသားတွေက ငါတို့ကို ဘာလို့ဒီလောက်အထိ လိုက်နေမှာလဲ။ ပင့်ကူတွေနဲ့တိုက်တုန်းကလည်း အနီးဆုံးဂိုဘလင်ကိုပဲ တိုက်တယ်မဟုတ်လား။"

"ငါတော့ ဒီနည်းလမ်းကို စမ်းကြည့်သင့်တယ်လို့ထင်တယ်။ အဲ့ဒီခွေးခေါင်းလူသားတွေက ငါတို့လမ်းကြောင်းကို ပိတ်ထားတော့ ပင့်ကူတွေနဲ့တိုက်ပြီး ပစ္စည်းတွေရှာလို့မရဘူး။"

"ဟုတ်တယ်၊ ဟုတ်တယ်၊ ခွေးခေါင်းလူသားတွေကို အရင်ရှင်းပစ်ကြစို့။ အဓိကဇာတ်လမ်းမစ်ရှင်ပြီးရင် ဆုတွေရမှာ။ ငါက ပစ္စည်းတွေရဖို့ စောင့်နေတာ။ ငါ့ပစ္စည်းကိရိယာတွေ အဆင့်မမြှင့်ရသေးဘူး။"

သူတို့၏ဆွေးနွေးတိုင်ပင်မှု ပြီးဆုံး၍ နည်းဗျူဟာကို အပြီးသတ်ဆုံးဖြတ်ပြီးနောက် ဂိမ်းမာ ၅၀ ဖြင့် အဖွဲ့အမျိုးမျိုး ဖွဲ့စည်းခဲ့ကြသည်။ ဂိမ်းမာအယောက်နှစ်ဆယ်မှာ ဒိုင်းများကို ယူဆောင်လာကြသည်၊ အကြောင်းမှာ သူတို့သည် ခရေမာ၏ပစ်မှတ်ကို ဆွဲဆောင်ရမည်ဖြစ်ပြီး အမြောက်စာအဖြစ် ဆောင်ရွက်ရမည်ဖြစ်သောကြောင့်တည်း။ ဒိုင်းများမှလွဲ၍ သူတို့၏အခြားပစ္စည်းများကို အခြားဂိမ်းမာများက ထိန်းသိမ်းပေးရန် ဒန်ဂျင်ထဲတွင် ထားခဲ့ကြသည်။ ဘီတာဂိမ်းမာအရေအတွက်မှာ နည်းပါးပြီး ပစ္စည်းသိုလှောင်စနစ်လည်း မရှိသောကြောင့် ဂိမ်းမာများသည် တစ်ဦး၏ပစ္စည်းများကို တစ်ဦးက ကူညီထိန်းသိမ်းပေးကြ၏။

ဂိမ်းမာငါးဦးမှာ လေးတိုများဖြင့် လက်နက်တပ်ဆင်ထားပြီး၊ ခွေးခေါင်းလူသားများ၏ အဓိကအင်အားစုကို ချေမှုန်းရန် တာဝန်ယူကြသည်။ ကျန်ဂိမ်းမာများမှာ အပြည့်အစုံလက်နက်တပ်ဆင်ထားပြီး လေးသမားများကို ကာကွယ်ရန် တာဝန်ကျသည်။ လေးသမားများ မြှားကုန်သွားသည့်အခါ အပြည့်အစုံလက်နက်တပ်ဆင်ထားသော ဂိမ်းမာများက အဓိကတိုက်ခိုက်ရေးအင်အားစု ဖြစ်လာမည်။

စူးစမ်းရှာဖွေရေးအဖွဲ့တွင် မပါဝင်သူများမှာ လက်နက်အပြည့်အစုံမရှိသူများ သို့မဟုတ် နည်းဗျူဟာအပေါ် ယုံကြည်မှုမရှိသူများ ဖြစ်ကြသည်။ သူတို့သည် အုတ်ခဲသယ်ပြီး ငြိမ်းချမ်းစွာ ငွေရှာလိုကြရုံသာ။

သူတို့၏တာဝန်များကို ခွဲဝေပြီးနောက် ဂိမ်းမာငါးဆယ်ဦးတို့သည် ပျော်ရွှင်စွာ ထွက်ခွာသွားကြ၏။

ရှားလော့ခ်သည် သူတို့၏နည်းဗျူဟာအသစ်များ ထိရောက်မှုရှိ၊မရှိကို သိချင်စိတ်ပြင်းပြနေသောကြောင့် သူ၏မာနာစွမ်းအင်ကိုသုံး၍ စူးစမ်းရှာဖွေရေးအဖွဲ့ကို စောင့်ကြည့်ခဲ့သည်။

ဂိမ်းမာငါးဆယ်ဦးတို့သည် ခွေးခေါင်းလူသားများ၏ စခန်းချရာနေရာသို့ ရောက်ရှိလာကြပြီး သူတို့၏တာဝန်များနှင့် တိုက်ခိုက်ရေးနည်းဗျူဟာများကို ထပ်မံအတည်ပြုပြောဆိုကြသည်။ ထို့နောက် ဒိုင်းကိုင်စစ်သည်များ ရှေ့သို့ထွက်လာကြ၏။

လေးသမားငါးဦးတို့သည် စိုးရိမ်စိတ်ဖြင့် ပြင်ဆင်ရင်း သူတို့၏မြှားများကို လေးညှို့ပေါ်တွင် အသင့်တင်ထားကြသည်။ သူတို့သည် ဒိုင်းကိုင်စစ်သည်များက ခရေမာကို သွေးဆောင်ပြီးမှ ခွေးခေါင်းစစ်သည်များထံသို့ သူတို့၏မြှားများကို တပြိုင်နက်ပစ်လွှတ်ရန် စောင့်ဆိုင်းနေကြ၏။

အချိန်ကျပြီ၊ သို့သော် သူတို့ ခရေမာ၏ပစ်မှတ်ကို ဘယ်လိုဆွဲဆောင်ကြမည်နည်း။

ဒိုင်းကိုင်စစ်သည် ဂနိုင်သားက "ငါ ခရေမာကို ဆွဲဆောင်မယ်။"ဟု အော်ပြောလိုက်သည်။ ထို့နောက် သူက တုံ့ဆိုင်းခြင်းမရှိဘဲ ရှေ့သို့ထွက်သွား၏။ ဂနိုင်သား ရုတ်တရက် "ငါ့ မြေးတို့ရေ။"ဟု အော်လိုက်ရာ အဝေးမှခွေးခေါင်းလူသားများသည် သူ့ကို သတိပြုမိသွားကြသည်။