ကမ္ဘာပျက်နေ့၊ စီနီယာအစ်မ သေဆုံးသွားခြင်းလား။

တင်း!

“လက်ခံသူရဲ့ ကျင့်ကြံမှုအဆင့်က ဝိညာဉ်ဖွဲ့တည်ခြင်းအစောပိုင်းအဆင့်ထိ တိုးတက်သွားတာကို စစ်ဆေးမိပါတယ်။ အလိုအလျောက်ကျင့်ကြံခြင်းကျင့်ကြံမှုအတွက် လိုအပ်တဲ့ ဝိညာဉ်ကျောက်တုံးအရေအတွက်က (၁၀)ဆ တိုးလာပါတယ်။ (၂)ဆတိုးလာတိုင်း အဆင့်နိမ့် ဝိညာဉ်ကျောက်တုံး (၁၀၀၀) ကုန်ကျပါလိမ့်မယ်။”

…

တင်း!

“လက်ခံသူရဲ့ ကျင့်ကြံမှုအဆင့်က ဝိညာဉ်ဖွဲ့တည်ခြင်းအဆင့်ထိ တက်သွားတဲ့အတွက် အလိုအလျောက်ကျင့်ကြံခြင်း မြှင့်တင်မှုက ဆယ်သန်းကနေ သန်းတစ်ရာထိ တိုးလာပါပြီ။”

…

တင်း!

“လက်ခံသူရဲ့ ကျင့်ကြံမှုအဆင့်က ဝိညာဉ်ဖွဲ့တည်ခြင်းအစောပိုင်းအဆင့်ထိ ရောက်ရှိသွားပြီကို တွေ့ရှိရပါတယ်။ သေမင်းမျှော်စင်ရဲ့ ထိပ်ဆုံး (၃၃)ထပ် ဂိမ်းမြေအောက်စခန်းကို ရှင်းလင်းခြင်းအတွက် ဆုလာဘ်က များစွာလျော့ကျသွားပါလိမ့်မယ်။ ဂိမ်းမြေအောက်စခန်းအသစ်ကို ဖွင့်ဖို့ အဆင့်နိမ့် အင်မော်တယ်သလင်းကျောက် (၁၀၀၀၀) သုံးနိုင်ပါတယ်။”

…

တစ်ခုပြီးတစ်ခု ချီမင်က အလိုအလျောက်ကျင့်ကြံခြင်းစနစ်ကနေ အသိပေးချက်တွေ လက်ခံရလိုက်တယ်။

“အဆင့်မြင့် ဝိညာဉ်ကျောက်တုံး (၂၀၀၀၀၀) ထည့်လိုက်မယ်။” ချီမင်က ပြောလိုက်တယ်၊ “သန့်စင်ခြင်းသုံးပါးတာအိုကျမ်းနဲ့ ကောင်းကင်ဘုံကြယ်တာရာသုံးဆယ့်‌ခြောက်ပညာရပ်ကို ကျင့်ကြံမယ်။”

တင်း!

“ဖြည့်သွင်းခြင်း အောင်မြင်ပါတယ်။”

“အဆသန်းတစ်ရာမြှင့်တင်မှုအောက်မှာ သန့်စင်ခြင်းသုံးပါးတာအိုကျမ်းကို ကျင့်ကြံနေပါတယ်.”

…

တင်း!

“ဖြည့်သွင်းခြင်း အောင်မြင်ပါတယ်။”

“အဆသန်းတစ်ရာမြှင့်တင်မှုအောက်မှာ ကောင်းကင်ဘုံကြယ်တာရာသုံးဆယ့်ခြောက်ပညာရပ်ကို ကျင့်ကြံနေပါတယ်...”

…

အသိပေးချက်တစ်ခု ပေါ်လာတယ်။

နှစ်ပေါင်း(၁၀၀) ကြာသွားပေမယ့် ကောင်းကင်ဘုံကြယ်တာရာသုံးဆယ့်ခြောက်ပညာရပ်ရဲ့ အဆင့်ကတော့ အကြီးစားအောင်မြင်မှုအဆင့်ရဲ့ အကန့်အသတ်မှာပဲ ရှိနေသေးတယ်။ သူ့ရဲ့ ကျင့်ကြံမှုအဆင့်ရဲ့ ကန့်သတ်ချက်ကြောင့် မဟုတ်ဘဲ ကောင်းကင်ဘုံကြယ်တာရာသုံးဆယ့်ခြောက်ပညာရပ်ကို ပြီးပြည့်စုံခြင်းအဆင့်အထိ ကျင့်ကြံဖို့က အရမ်းခက်ခဲလို့ဖြစ်တယ်။

“အဆင့်နိမ့် အင်မော်တယ်သလင်းကျောက် (၁၀၀၀၀) ထည့်လိုက်မယ်။” ချီမင်က ပြောလိုက်တယ်။

တင်း!

“ဖြည့်သွင်းခြင်း အောင်မြင်ပါတယ်။”

“ဂိမ်းမြေအောက်စခန်းအသစ် ‘ကမ္ဘာပျက်နေ့’ ကို ဝင်ရောက်နိုင်ပါပြီ။”

အသိပေးချက်တစ်ခု ပေါ်လာတယ်။

“ဝင်မယ်။” ချီမင်က ပြောလိုက်တယ်။

ချီမင်ရဲ့ရှေ့မှာ အနက်ရောင်မျက်နှာပြင်တစ်ခု ပေါ်လာတယ်။ အဲ့ဒီအနက်ရောင်မျက်နှာပြင်ပေါ်မှာ သွေးရောင်စာသားတွေ တဖြည်းဖြည်း ပေါ်လာပြီး မြင်ကွင်းတွေနဲ့ တွဲဖက်ညီနေတယ်။

ဂိမ်းရဲ့ နောက်ခံဇာတ်ကြောင်းနဲ့ ရုပ်ရှင်အဖွင့်နဲ့တူတယ်။

ဒါက သက်ရှိတွေ နေထိုင်ကြသေးတဲ့ ကမ္ဘာပျက်ဂြိုဟ်ကြီးတစ်ခုဖြစ်တယ်။

အဲ့ဒါကို အပြာရောင်ဂြိုဟ်လို့ ခေါ်ကြတယ်။

နည်းပညာဖွံ့ဖြိုးတိုးတက်မှုက ကမ္ဘာထက် နှစ်ရာချီပြီး ပိုအဆင့်မြင့်တယ်။ လူသားတွေက နေရာလွတ်အပြင်ဘက်ကို စူးစမ်းလေ့လာနိုင်ပြီး သက်ရှိမျိုးရိုးဗီဇရဲ့ လျှို့ဝှက်ဆန်းကြယ်မှုတွေကို စတင်လေ့လာနေပြီ။

သူတို့က ထူးခြားတဲ့ စွမ်းအားကို သူတို့ရဲ့ ခန္ဓာကိုယ်နဲ့ ထိန်းချုပ်ချင်ကြတယ်။

ကပ်ဘေးတစ်ခု တိတ်တဆိတ် ဖြစ်ပျက်လာခဲ့တယ်။

တခြားကမ္ဘာဖြစ်တဲ့ချောက်နက်ကြီးက အပြာရောင်ဂြိုဟ်ကို သတိထားမိပြီး နေရာလွတ်နဲ့အချိန်ကြားက အတားအဆီးကို ဖျက်ဆီးတယ်။ သူတို့က အပြာရောင်ဂြိုဟ်ကို ကျူးကျော်ဖို့ စတင်လိုက်ပြီး နေရာလွတ်တံခါးကို အောင်မြင်စွာ တည်ဆောက်နိုင်သွားတယ်။

မရေမတွက်နိုင်တဲ့ ချောက်နက်နတ်ဆိုးတွေ ဆင်းသက်လာကြတယ်။

အခု အပြာရောင်ဂြိုဟ်က လုံးဝပျက်စီးသွားပြီ။ လူသားအနည်းငယ်သာ မြေအောက်အခြေစိုက်မြို့ကို တည်ဆောက်ပြီး အသက်ရှင်ဖို့ ရုန်းကန်နေကြရတယ်။

ဒီနေ့မှာ ချီမင် ဆင်းသက်လာခဲ့တယ်။

ဒီဂိမ်းမြေအောက်စခန်းအသစ်ကမ္ဘာပျက်နေ့ မှာ သူက အပြာရောင်ဂြိုဟ်ရဲ့ ကယ်တင်ရှင်အဖြစ် ပါဝင်ကစားပြီး ကျန်ရှိတဲ့ လူသားတွေကို ဦးဆောင်ကာ ချောက်နက်နတ်ဆိုးတွေကို တိုက်ခိုက်ပြီး သူတို့ရဲ့ ဆုံးရှုံးသွားတဲ့ ဇာတိမြေကို ပြန်လည်သိမ်းပိုက်ရမှာ ဖြစ်တယ်။

“ကယ်တင်ရှင်”

ချီမင်က မျက်ခုံးပင့်လိုက်ပြီး “ဒီတာဝန်က ရိုးရှင်းပုံမပေါ်ဘူး။ တကယ့်ကို ကမ္ဘာကြီးကို ကယ်တင်ရမယ့် မစ်ရှင်ပဲ။ ရှုတောင် နတ်ဆိုးဖိနှိပ်စေတီရဲ့ ကယ်တင်ရှင်ဆိုတာကတော့ အရမ်းချဲ့ကားလွန်းတယ်။”

ချီမင်က သူ့ရဲ့ ဂိမ်းဇာတ်ကောင်ရဲ့ အင်အားကို လျှော့တွက်ထား‌ သေးတယ်။ ဒါမှမဟုတ် သူ့ရဲ့ အင်အားကို လျှော့တွက်ထားတာ ဖြစ်နိုင်တယ်။

သူ ပြောင်းလဲထားတဲ့ ဂိမ်းဇာတ်ကောင်က ကမ္ဘာပျက်နေ့ကို ဆင်းသက်ပြီး သူ့ရဲ့ အင်အားက တကယ့် နတ်ဘုရားတစ်ပါးလို ဖြစ်နေတယ်။

ဖရိုဖရဲ‌တွေ၊ အပျက်အစီးတွေ ချော်ရည်ပူတွေ ဘေးအန္တရာယ်နဲ့ မီးခိုးငွေ့တွေက ကောင်းကင်မှာပြည့်နှက်နေတယ်။ မြင်မြင်သမျှ နေရာတိုင်းမှာ ချောက်နက်နတ်ဆိုးတွေနဲ့ ပျက်စီးနေတဲ့ အပြာရောင်ဂြိုဟ်ရဲ့ ကောင်းကင်ပဲ ရှိတယ်။

ချီမင် ပေါ်လာတယ်။

သူက ဒီကမ္ဘာပျက်နေ့ကို ရောက်ရှိလာတယ်။

“သောင်းပြောင်းကြာပန်းစိမ်း။”

ကလန်! ကလန်! ကလန်!

ချီမင်က တိုက်ခိုက်လိုက်တယ်။ သူက ဘယ်ဘက်လက်ကို ဝှေ့ယမ်းပြီး သူ့ရဲ့ အံ့ဖွယ်စွမ်းအားနည်းစနစ်ကိုသုံးလိုက်တယ်။ ကြီးမားတဲ့ ဓမ္မစွမ်းအားတွေ ကတမြင့်တက်လာပြီး ဆယ့်နှစ်လွှာ သောင်းပြောင်းကြာပန်းစိမ်း ပေါ်လာကာ နေရာလွတ်ထဲမှာ အမြစ်တွယ်သွားတယ်။

ခဏလေးအတွင်းမှာပဲ မရေမတွက်နိုင်တဲ့ စိမ်းရောင်ဓားချီတွေက သောင်းပြောင်းကြာပန်းစိမ်းကနေ ပေါက်ကွဲထွက်လာတယ်။ အဲ့ဒါက မိုးရွာသလိုမျိုး အောက်က အပြာရောင်ဂြိုဟ်ကို ဖုံးအုပ်သွားပြီး နတ်ဘုရားတစ်ပါးနဲ့တူတယ်။

ဒါက အစပဲ ရှိသေးတယ်။

“အသင်္ချေပုံစံမုန်တိုင်း။”

ချီမင်က လက်ကို ထပ်ဝှေ့ယမ်းလိုက်တော့ ဓမ္မစွမ်းအားတွေ တိုးပွားလာပြီး အဆုံးမရှိတဲ့ စွမ်းအားမုန်တိုင်းအဖြစ် ပြောင်းလဲသွားတယ်။ အဲ့ဒါက ဧရာမ မုန်တိုင်းကြီးတစ်ခုလိုမျိုး တိုက်ခတ်သွားတယ်။

“အပြောင်းအလဲ ပါ့ကွားပုံစံဖွဲ့စည်းပုံ!”

“မွေးရာပါ ယင်-ယန် ဖွဲ့စည်းပုံ!”

“အံ့ဖွယ်စွမ်းအား အဆောင်!”

“သန့်စင်ခြင်းသုံးပါး ကိုယ်ပွားများ!”

“…”

ဒီအချိန်မှာ ချီမင်က အပြာရောင်ဂြိုဟ်ပေါ်မှာ လျှောက်သွားနေတယ်။ သူက အံ့ဖွယ်စွမ်းအားနည်းစနစ်တွေကို တစ်ခုပြီးတစ်ခု သုံးပြီး ထူးခြားပြီးကြောက်မက်ဖွယ်ကောင်းတဲ့ စွမ်းအားကို ပြသကာ မရေမတွက်နိုင်တဲ့ ချောက်နက်နတ်ဆိုးတွေကို ချေမှုန်းနေတယ်။

ဒါက လုံးဝကိုတစ်ဖက်သတ် တိုက်ပွဲတစ်ခုဖြစ်တယ်။

ကမ္ဘာတွေကို ဖြတ်ကျော်တဲ့ နေရာလွတ်တံခါးတွေ ဖျက်ဆီးခံလိုက်ရတယ်။

အပြာရောင်ဂြိုဟ်ရဲ့ မြေအောက်အခြေစိုက်မြို့မှာ သူတို့က နတ်ဘုရားတစ်ပါးလို ဖြစ်နေတဲ့ ချီမင်ကို ကြည့်ပြီး ကြမ်းပြင်ပေါ်မှာ ဒူးထောက်အရိုအသေပြု နေကြတယ်။ ဒါက အရမ်းကို ထိတ်လန့်စရာကောင်းတယ်။

မျက်စိတစ်မှိတ်အတွင်းမှာပဲ တစ်ရက် ကုန်ဆုံးသွားတယ်။

တင်း!

“သင် ‘ကမ္ဘာပျက်နေ့’ ဂိမ်းမြေအောက်စခန်းမှာ တစ်ရက်တာ အလိုအလျောက်ကျင့်ကြံခဲ့ပါတယ်။သင်ဂိမ်းမြေအောက်စခန်းကိုတစ်ကြိမ် ရှင်းလင်းခဲ့ပါတယ်။ သင် ငရဲကမ္ဘာသွေးရေ တစ်ပုလင်းနဲ့ အဆင့်နိမ့် အင်မော်တယ်သလင်းကျောက် (၁,၀၀၀,၀၀၀) ရရှိပါတယ်။”

ပစ္စည်း: ငရဲကမ္ဘာသွေးရေ။

ဖော်ပြချက်: ငရဲကမ္ဘာသွေးပင်လယ်က သွေးတစ်စက်ဖြစ်တယ်။ အဲ့ဒါက ညစ်ညမ်းမှုနဲ့ ပျက်စီးယိုယွင်းခြင်းရဲ့ စွမ်းအား ပါရှိတယ်။ ဒဏ္ဍာရီတွေအရ အင်မော်တယ်အစစ်တွေတောင် အဲ့ဒါကြောင့် ပျက်စီးနိုင်တယ်လို့ ဆိုကြတယ်။

“ငရဲကမ္ဘာသွေးရေ။”

ချီမင်က ပြောလိုက်တယ်၊ “မဆိုးဘူး။ အဲ့ဒီထဲမှာ ပါတဲ့ ညစ်ညမ်းမှုနဲ့ ပျက်စီးယိုယွင်းခြင်း စွမ်းအားက တကယ့် အင်မော်တယ်တွေကိုတော့ သက်ရောက်မှု ရှိနိုင်မလား မသိဘူး။”

ချီမင်က ဝိညာဉ်ဖွဲ့တည်ခြင်းအစောပိုင်းအဆင့်ကို ချိုးဖြတ်ပြီး ဒီလောက်ကြီးမားတဲ့အုတ်အုတ်သောင်းနင်းနဲ့ ထူးခြားဖြစ်စဉ်ကို ဖြစ်စေခဲ့တယ်။ နောက်ရက်အနည်းငယ်မှာ ကောင်းကင်ဘုံဉာဏ်အလင်းအင်မော်တယ်တောင်ရဲ့ မျိုးနွယ်ဆယ့်နှစ်ခုက မဟာအကြီးအကဲတွေက သူ့ကို လာရောက်တွေ့ဆုံပြီး ဂုဏ်ပြုစကား ပြောကြတယ်။

ချီမင်က သူတို့အားလုံးကို လက်ခံတွေ့ဆုံခဲ့တယ်။

ဒါ့အပြင် ချီမင်ရဲ့ ကျင့်ကြံမှုအဆင့်က ချိုးဖြတ်လိုက်တာနဲ့ သူ့ရဲ့ အဆင့်က အများကြီး တိုးတက်လာတယ်။ ကောင်းကင်လျှို့ဝှက်ချက်စာအုပ်၊ ကောင်းကင်လျှို့ဝှက်ချက်စုတ်တံနဲ့ ကောင်းကင်လျှို့ဝှက်ချက်အိမ်တော်ကို ထိန်းချုပ်နိုင်စွမ်းကလည်း ပိုမြင့်မားပြီး ပိုတိကျလာတယ်။

ပါ့ကွားကောင်းကင်ဂူ၊ ယင်-ယန်ကောင်းကင်ဂူ၊ လေဧကရီကောင်းကင်ဂူ၊ ထိုက်ချီကောင်းကင်ဂူ၊ အစွန်းနှစ်ဖက်ကောင်းကင်ဂူ။

ဒီကောင်းကင်ဂူ(၅)ခုကို ဖွင့်လိုက်တယ်။

ချီမင်က စုချီမန်ကို ဒီကောင်းကင်ဂူတွေရဲ့ ဝင်ပေါက်တွေကို ဖွင့်ခိုင်းလိုက်တယ်။ ချီမင်က ထပ်ဝင်သွားတယ်။ အစကနေ အဆုံးထိ ပါ့ကွားကောင်းကင်ဂူ၊ ယင်-ယန်ကောင်းကင်ဂူ၊ လေဧကရီကောင်းကင်ဂူ၊ ထိုက်ချီကောင်းကင်ဂူနဲ့ အစွန်းနှစ်ဖက်ကောင်းကင်ဂူကို သိမ်းပိုက်ပြီး ကောင်းကင်လျှို့ဝှက်ချက်စာအုပ်ထဲ ထည့်ဖို့ တစ်လလောက်ပဲကြာလိုက်တယ်။

ဒီနည်းနဲ့ ချီမင်က ကောင်းကင်ဂူကမ္ဘာခုနစ်ခုရဲ့ စွမ်းအားကို ထိန်းချုပ်နိုင်သွားတယ်။

သူ့ရဲ့ စွမ်းအားက ပိုတိုးတက်လာတယ်။

မျက်စိတစ်မှိတ်အတွင်းမှာပဲ နောက်ထပ် ခြောက်လလောက် ကြာသွားတယ်။

ကောင်းကင်လျှို့ဝှက်ချက်အိမ်တော်မှာ ချီမင်က ရုတ်တရက် စိတ်မသက်မသာ ဖြစ်လာတယ်။

သူက မျက်လုံးဖွင့်ပြီး မော့ကြည့်လိုက်တယ်။ သူက လျှို့ဝှက်နက်နဲနည်းစနစ် အကြားအမြင်အာရုံကို သုံးလိုက်တော့ဂိုဏ်းတိုက်ပွဲတစ်ခုကို မြင်လိုက်ရတယ်။

“ဒါက...”

ချီမင်ရဲ့ မျက်နှာက မည်းသွားတယ်။

စစ်မြေပြင်မှာ သူက ကောင်းကင်ဘုံဉာဏ်အလင်းဂိုဏ်းရဲ့ တောင်ထွတ်သခင်တွေ၊ အမွေခံအကြီးအကဲတွေနဲ့ ကောင်းကင်ဘုံဉာဏ်အလင်းဂိုဏ်းရဲ့ အကြီးအကဲနဲ့ တပည့်အများကြီးကို တွေ့လိုက်တယ်။ ကောင်းကင်ဘုံဉာဏ်အလင်းဂိုဏ်းရဲ့ ရန်သူက သွေးနီနတ်ဆိုးဂိုဏ်း ဖြစ်တယ်။

သွေးနီနတ်ဆိုးဂိုဏ်း။

ဒီနတ်ဆိုးဂိုဏ်းရဲ့ တည်နေရာက အသင်္ချေနတ်ဆိုးဂူနဲ့ ကောင်းကင်ဘုံဉာဏ်အလင်းဂိုဏ်းကြားက နယ်စပ်မှာရှိတဲ့ အသင်္ချေတောင်ထွတ်တောင်တန်းမှာ ရှိတယ်။ သွေးနီနတ်ဆိုးဂိုဏ်းရဲ့ နောက်ကွယ်မှာ သဘာဝကျကျ အသင်္ချေနတ်ဆိုးဂူ ရှိတယ်။

သွေးနီနတ်ဆိုးဂိုဏ်းက အရမ်းအားကောင်းတယ်။ သူက အသင်္ချေနတ်ဆိုးဂူရဲ့ လက်အောက်ခံဂိုဏ်းတစ်ခုသာ ဖြစ်ပေမယ့် ပထမတန်းစား နတ်ဆိုးဂိုဏ်းလည်း ဖြစ်တယ်။ သွေးနီနတ်ဆိုးဂိုဏ်းရဲ့ ဂိုဏ်းချုပ် ရှောင်ဝူဂျီက အစွမ်းထက်တဲ့ တာအိုပေါင်းစည်းခြင်းအဆင့် နှောင်းပိုင်း နတ်ဆိုးခေါင်းဆောင်လည်း ဖြစ်တယ်။

အရေးကြီးဆုံးက...

ရှောင်ဝူဂျီက ကောင်းကင်ဂူကမ္ဘာ (၂)ခုကို တည်ဆောက်ထားတယ်။ သူက ကောင်းကင်ဂူကမ္ဘာစွမ်းအားရဲ့ မြှင့်တင်မှုကို ရရှိနိုင်တယ်။ သူ့ရဲ့ စွမ်းအားက သာမန် တာအိုပေါင်းစည်းခြင်းနှောင်းပိုင်းအဆင့် ကျင့်ကြံသူထက် အများကြီး သာလွန်တယ်။

“ဘာလို့ ကောင်းကင်ဘုံဉာဏ်အလင်းဂိုဏ်းက သွေးနီနတ်ဆိုးဂိုဏ်းနဲ့ တိုက်ခိုက်နေရတာလဲ?” ချီမင်က စဉ်းစားလိုက်တယ်။

ပြီးတော့ သူက သူ့ရဲ့ အံ့ဖွယ်စွမ်းအားကို သုံးလိုက်တယ်။

သူက လက်ချောင်းတွေကို ရေတွက်လိုက်တယ်။

ချီမင်ရဲ့ လက်ဖဝါးနဲ့ လက်ချောင်းတွေကြားမှာ ကောင်းကင်လျှို့ဝှက်ချက်တွေ လည်ပတ်နေပြီး အမြင်ရတဲ့သတ်ဖြတ်လိုစိတ်တွေက တဖြည်းဖြည်း ပြည့်နှက်လာလို့ ကောင်းကင်လျှို့ဝှက်ချက်တွေက ဝေဝါးပြီး ရှုပ်ထွေးသွားတယ်။

ဒါပေမဲ့ ချီမင်က သူ့ရဲ့ စွမ်းအားကြီးအံ့ဖွယ်စွမ်းအားနဲ့ ဓမ္မစွမ်းအားတွေကို အားကိုးပြီး ဒီအကြောင်းရင်းကို သိလိုက်တယ်။

ဒီဂိုဏ်းတိုက်ပွဲမှာ အများကြီး ပါဝင်ပတ်သက်နေတယ်။

“ဟာ မဟုတ်ဘူး!”

နောက်တစ်ခဏမှာ ချီမင်ရဲ့ မျက်နှာမှာ ထိတ်လန့်တဲ့ အမူအရာ ပေါ်လာတယ်။ ဘာမှတုန့်ဆိုင်း မနေတော့ဘဲ သူက ရွှေရောင်အလင်းစီးခြင်း လျှို့ဝှက်နက်နဲနည်းစနစ်ကို သုံးပြီး ကောင်းကင်လျှို့ဝှက်ချက်အိမ်တော်ကနေ ပျောက်ကွယ်သွားတယ်။

သူက စစ်မြေပြင်ကို ဦးတည်လိုက်တယ်။

ချီမင်က အရမ်းဆိုးတဲ့အရာတစ်ခုကို တွက်ချက်လိုက်မိတယ်။

သူက အဲ့ဒါကို တားဆီးရမယ်။

“သခင်လေး၊ ဘာဖြစ်တာလဲ?”

စုချီမန်က ရွှေရောင်အလင်းအဖြစ် ပြောင်းလဲပြီး ထွက်သွားတဲ့ ချီမင်ရဲ့ဘက်ကို ကြည့်လိုက်တယ် “တစ်ခုခု ဖြစ်သွားတာလား။ မဟုတ်ရင် သခင်လေးက ဘာလို့ ဒီလောက်အလျင်စလို ထွက်သွားမှာလဲ?”

“ငါ မသိဘူး။”

ရှန်ကွမ်းဝမ်ကောက ကြည့်ပြီး စဉ်းစားလိုက်တယ်၊ “နှစ်တွေအများကြီးကြာပြီ။ သခင်လေးက အမြဲလိုလို ကောင်းကင်လျှို့ဝှက်ချက်အိမ်တော်မှာပဲ နေပြီး ကျင့်ကြံနေတာ။ သူက အပြင်သိပ်မထွက်ဘူး။ ဒီတစ်ခေါက်မှာ ရုတ်တရက် ထွက်သွားတာဆိုတော့ အရေးကြီးတဲ့တစ်ခုခု ဖြစ်ရမယ်။”

“စိတ်မပူပါနဲ့။”

တံခါးရှစ်ချပ်ဂိုဏ်းချုပ်တွေနဲ့ တခြားသူတွေက ပြောတယ်၊ “သခင်လေးရဲ့ စွမ်းအားနဲ့ဆိုရင် လျှို့ဝှက်နက်နဲကမ္ဘာတစ်ခုလုံးမှာ သူ့ကို ဒဏ်ရာရအောင် လုပ်နိုင်တဲ့ လူက လက်ချိုးရေလို့ ရတယ်။”

“သခင်လေးက ဒီကိစ္စကို အမြန်ဖြေရှင်းနိုင်လိမ့်မယ်လို့ ကျွန်တော် ယုံကြည်တယ်။”

မြင်ကွင်း ပြောင်းလဲသွားတယ်။

ကောင်းကင်ဘုံဉာဏ်အလင်းဂိုဏ်းနဲ့ သွေးနီနတ်ဆိုးဂိုဏ်းရဲ့ စစ်မြေပြင်မှာ။

ဆွတ်စ်ရှ်!

ချီမင် ပေါ်လာတယ်။

ဒုန်း!!!

ချီမင်က ပေါက်ကွဲသံအမျိုးမျိုးကို ကြားလိုက်ရတယ်။ ကြည့်လိုက်တော့ ကောင်းကင်ဘုံဉာဏ်အလင်းဂိုဏ်းရဲ့ တပည့်တွေနဲ့ သွေးနီနတ်ဆိုးဂိုဏ်းရဲ့ တပည့်တွေက ပြင်းထန်တဲ့ တိုက်ပွဲတစ်ခုကိုစတင်နေကြပြီ။ ကောင်းကင်ဘုံဉာဏ်အလင်းဂိုဏ်းရဲ့ အကြီးအကဲတွေနဲ့ သွေးနီနတ်ဆိုးဂိုဏ်းရဲ့ အကြီးအကဲတွေက တိုက်ခိုက်နေကြတယ်။

ဒါ့အပြင် စစ်မြေပြင်အပေါ်မှာ ကောင်းကင်ဘုံဉာဏ်အလင်းဂိုဏ်းရဲ့ တောင်ထွတ်သခင်သုံးယောက်နဲ့ သွေးနီနတ်ဆိုးဂိုဏ်းရဲ့ မဟာအကြီးအကဲသုံးယောက်လည်း တိုက်ခိုက်နေကြတယ်။ သူတို့အားလုံးက တာအိုပေါင်းစည်းခြင်းအဆင့် ကျွမ်းကျင်သူတွေ ဖြစ်ကြပြီး တိုက်ပွဲရဲ့ လှိုင်းတွေက အရမ်းကြီးမားတယ်။

သူတို့က နက္ခတာရာအလွှာထဲကို ရောက်ရှိပြီး အတွင်းမှာ တိုက်ခိုက်နေကြတယ်။

အခုထိ သွေးနီနတ်ဆိုးဂိုဏ်းရဲ့ ဂိုဏ်းချုပ် ရှောင်ဝူဂျီ ပေါ်မလာသေးဘူး။

“ဆရာ!”

ချီမင်က ရောက်ရောက်ချင်း ယွမ်ဖုန်းရဲ့ သနားစရာ ကောင်းတဲ့ အော်သံကို ကြားလိုက်ရတယ်။

ဒုန်း!

အသံကျယ်ကြီးတစ်ခု ထွက်လာတယ်။

စစ်မြေပြင်ရဲ့ အရှေ့တောင်ဘက်မှာ ချီမင်ရဲ့ အကြည့်တွေကမည်းနက်သွားတယ်။ သူ့ကို ဝမ်းနည်းစေတဲ့ မြင်ကွင်းတစ်ခုကို မြင်လိုက်ရတယ်။

စီနီယာအစ်မ လုချင်းယန်က သွေးနီနတ်ဆိုးဂိုဏ်းရဲ့ အကြီးအကဲတွေဆီက ဝိုင်းရံခံထားပေမယ့် သူမက သူမရဲ့ ကြီးမားတဲ့စွမ်းအားကို အားကိုးပြီး အကြီးအကဲအများအပြားရဲ့ ဝိုင်းရံမှုကို အတင်းအကျပ် ဖောက်ထွက်လိုက်တယ်။

မမျှော်လင့်ဘဲ တစ်ခုခု ဖြစ်ပျက်သွားတယ်။

ယွမ်ဖုန်းက အန္တရာယ်ရှိထဲကျရောက်သွားတယ်။

အဝေးကနေသွေးနီနတ်ဆိုးဂိုဏ်းရဲ့ ဝိညာဉ်ဖွဲ့တည်ခြင်းအဆင့် အကြီးအကဲတစ်ယောက်ကလက်ဝါးတစ်ချက်ကိုရိုက်ချလိုက်ပြီးယွမ်ဖုန်းကိုပစ်မှတ်ထားလိုက်တယ်။ ဧရာမလက်ဝါးကြီးက မှင်လိုမျိုး နက်မှောင်နေပြီး နတ်ဆိုးချီတွေနဲ့ ပြည့်နှက်နေတယ်။ အဲ့ဒါက ဧရာမတောင်ကြီးတစ်ခုလိုမျိုး အောက်ကို ရိုက်ချလိုက်တယ်။

ဒီလောက်အန္တရာယ်များတဲ့ အချိန်မှာ ယွမ်ဖုန်းကို ကယ်တင်ဖို့ လုချင်းယန်က သွေးနီနတ်ဆိုးဂိုဏ်းရဲ့ ဝိညာဉ်ဖွဲ့တည်ခြင်းအဆင့် အကြီးအကဲရဲ့ လက်ဝါးကို ခံလိုက်တယ်။ ဒါပေမဲ့ သူမက ပြင်းပြင်းထန်ထန် ဒဏ်ရာရသွားတယ်။ သူမက သွေးအန်ပြီး လွင့်ထွက်သွားတယ်။

ဖူး! ဖူး! ဖူး!

နောက်တစ်ခဏမှာ ယွမ်ဖုန်းကို ဝိုင်းထားတဲ့ အကြီးအကဲအနည်းငယ်က တိုက်ခိုက်လိုက်တယ်။ သူတို့ရဲ့ ကိုယ်ပိုင်ရတနာတွေက လုချင်းယန်ရဲ့ ခန္ဓာကိုယ်ကို ဖောက်ထွက်သွားပြီး ကြီးမားတဲ့အင်အားက လုချင်းယန်ရဲ့ အသက်စွမ်းအားကို ဖျက်ဆီးပစ်လိုက်တယ်။

ဒါအားလုံးက ခဏလေးအတွင်းမှာ ဖြစ်ပျက်သွားတယ်။

အရမ်းမြန်လွန်းတယ်။

ချီမင်က စစ်မြေပြင်ကို အခုလေးတင် ရောက်ရှိလာပြီးမှ ဖြစ်ပျက်သွားတာဖြစ်တယ်။ သူ တိုက်ခိုက်ဖို့ အရမ်းနောက်ကျသွားပြီ။ သူ့ကို ဝမ်းနည်းစေတဲ့ ဒီလိုမြင်ကွင်းကို သူရောက်လာပြီးမှ မြင်လိုက်ရတယ်။

သူက တစ်လှမ်း နောက်ကျသွားတယ်။

“ခြေရာမဲ့ ပျံသန်းခြင်း။”

ချီမင်က သူ့ရဲ့နေရာကနေဖြတ်ခနဲလက်သွားပြီး သူ့ရဲ့ လျှို့ဝှက်နက်နဲနည်းစနစ် အံ့ဖွယ်စွမ်းအားကို သုံးလိုက်တယ်။ သူက ချက်ချင်း စစ်မြေပြင်ကို ရောက်သွားတယ်။ ညာဘက်လက်ကို ဝှေ့ယမ်းလိုက်တာနဲ့ သန်မာတဲ့ စွမ်းအားက ပတ်ဝန်းကျင်က ရန်သူတွေကို ပြန်တွန်းထုတ်ပြီး ပြုတ်ကျနေတဲ့ လုချင်းယန်ကို ဖမ်းလိုက်တယ်။