အမြစ်ပြတ်ချေမှုန်းခြင်း

ချီမင်ရဲ့ခန္ဓာကိုယ်က တိုက်ပွဲမြင့်မြတ်ခန္ဓာဖြစ်တယ်။ သူ့ခန္ဓာကိုယ်က ပြိုင်ဘက်ကင်းပြီး မကောင်းမှုအားလုံးကို ခုခံနိုင်စွမ်းရှိတယ်။

ဒါက သူ အခြေတည်ဝိညာဉ်အဆင့်မှာ ရှိနေတုန်းက ဖြစ်တယ်။

ချီမင်က တိုက်ပွဲမြင့်မြတ်ခန္ဓာကိုယ်ကို သွေးလွှဲပြောင်းခြင်း နှောင်းပိုင်းအဆင့်အထိ တိုးတက်ထားတယ်။

ဗလာနယ်စွန့်ခွာခြင်းအဆင့်ကို ချိုးဖျက်ပြီး‌တော့ ချီမင်က တိုက်ပွဲမြင့်မြတ်ခန္ဓာကို ပြောင်းလဲခြင်းနှောင်းပိုင်းအဆင့်အထိ ထပ်တိုးတက်သွားပြီး ပိုပြီးစွမ်းအားကြီးတဲ့ ခွန်အားတွေကို ထုတ်ဖော်နိုင်သွားတယ်။

လွန်ခဲ့တဲ့ခြောက်လက ချီမင်ရဲ့ကျင့်ကြံခြင်းအဆင့်က ဝိညာဉ်ဖွဲ့တည်ခြင်းအစောပိုင်းအဆင့်ကို ချိုးဖျက်သွားတာကြောင့် သူက တိုက်ပွဲမြင့်မြတ်ခန္ဓာရဲ့စွမ်းအားကို သဘာဝအတိုင်း ထပ်တိုးတက်သွားတယ်။ သူက အဆသန်းတစ်ရာ မြှင့်တင်မှုအောက်မှာ နှစ်ဝက်ကြာ ကျင့်ကြံခဲ့တယ်။

တိုက်ပွဲမြင့်မြတ်ခန္ဓာက ပြောင်းလဲခြင်းနှောင်းပိုင်းအဆင့်ကနေ အထွတ်အထိပ်နှောင်းပိုင်းအဆင့်ထိ တက်လှမ်းသွားတယ်။

ဒီအဆင့်မှာတော့ တိုက်ပွဲမြင့်မြတ်ခန္ဓာရဲ့စွမ်းအားက အရမ်းကို သန်မာနေပြီဖြစ်တယ်။

ဒါ့အပြင် ချီမင်က အံ့ဖွယ်စွမ်းအားနည်းစနစ်အမျိုးမျိုးကိုလည်း ကျင့်ကြံထားပြီး သန့်စင်ခြင်းသုံးပါးတာအိုကျမ်းနဲ့ မဟာရွှေအမြူတေတာအိုတို့ရဲ့ မြှင့်တင်မှုကြောင့် ကောင်းကင်နဲ့မြေကြီး မဟာတာအိုရဲ့စစ်မှန်ရည်ရွယ်ချက်က သူ့အနားမှာ ဖြစ်ပေါ်နေတယ်။

ဒါကြောင့် ချီမင်က အကြီးအကဲနတ်ဆိုးနေရာလွတ်ရဲ့ ကိုယ်ပိုင်ရတနာကို လွယ်လွယ်ကူကူပဲ ဖြေရှင်းလိုက်နိုင်တယ်။

“အရမ်းကြမ်းတယ်ဟ”

စွန်းရှန်းဇီက ထိတ်လန့်သွားတယ် “တကယ်ကြောက်ဖို့ကောင်းတဲ့ ခန္ဓာကိုယ်ပဲ။ ဒီအင်အားက ရတနာတစ်ခုနဲ့တောင် နှိုင်းယှဉ်နိုင်တယ်။ ရတနာတစ်ခုထက်တောင် ပိုပြင်းထန်တယ်။ ချီမင်မှာ အထူးခန္ဓာကိုယ်တစ်ခု သေချာပေါက်ရှိရမယ်။”

“ဟုတ်တယ်” ဝေ့ဟွာတုန်းက ခေါင်းညိတ်လိုက်တယ် “ဒီခန္ဓာကိုယ်ရဲ့ခွန်အားက တကယ်ကို တုန်လှုပ်စရာပဲ။”

“ချီမင်က သုံးယောက်တစ်ယောက် တကယ်တိုက်နိုင်လောက်တယ်။” ဝမ်ရှန်းယွင်က အံ့ဩတကြီး ပြောလိုက်တယ်။

“နတ်ဆိုးတာအို နေရာလွတ်ခွဲခြမ်းခြင်းနည်းစနစ်”

အကြီးအကဲနတ်ဆိုးနေရာလွတ်ရဲ့ တစ်ကိုယ်လုံး တုန်ခါသွားပြီး ဓမ္မစွမ်းအားတွေ မြင့်တက်လာတယ်။ သူက အံ့ဖွယ်စွမ်းအားနည်းစနစ်တစ်ခုကို သုံးလိုက်တယ်။ နေရာလွတ်စွမ်းအားက သိပ်သည်းသွားပြီး မည်းနက်နေတဲ့ ဆေဘာအလင်းတန်းတစ်ခုလို နေရာလွတ်အက်ကြောင်းအဖြစ် ပြောင်းလဲကာ ချီမင်ဆီကို ခုတ်ပိုင်းချလိုက်တယ်။

ချွင်!

ဓားတောင်က ပျံဝဲလာပြီး အကြီးအကဲနတ်ဆိုးနေရာလွတ်ရဲ့ တိုက်ခိုက်မှုကို လွယ်လွယ်ကူကူပဲ တားဆီးလိုက်တယ်။

“ဘယ်လိုဖြစ်နိုင်မှာလဲ”

အကြီးအကဲနတ်ဆိုးနေရာလွတ်က အရမ်းကို ထိတ်လန့်သွားတယ်။

“သမာဓိမီးလျှံ”

အတွေးတစ်ချက်နဲ့ နီရဲနေတဲ့ သမာဓိမီးလျှံက သူ့လက်ဝါးကနေ ပျံ့နှံ့ထွက်သွားပြီး အကြီးအကဲနတ်ဆိုးနေရာလွတ်ရဲ့ ကိုယ်ပိုင်ရတနာကို ဖုံးလွှမ်းသွားကာ သူ့ဆီကို ဆက်လက်တိုးဝင်သွားတယ်။

“အားးး!!!”

အကြီးအကဲနတ်ဆိုးနေရာလွတ်က သူ့ရဲ့ဓမ္မစွမ်းအားတွေက သမာဓိမီးလျှံကြောင့် လောင်ကျွမ်းနေတာကို ခံစားလိုက်ရတယ်။

“မဖြစ်နိုင်ဘူး”

ဆံဖြူနတ်ဆိုးက တုန်လှုပ်သွားတယ်။ သူက လက်နှစ်ဖက်ကို ဝေ့ယမ်းလိုက်တော့ နတ်ဆိုးချီတွေ တိုးထွက်လာတယ်။ သူ့ရဲ့ကိုယ်ပိုင်ရတနာက နတ်ဆိုးမြွေ ပေါက်အလံပေါင်း (၁၂၉,၆၀၀) နဲ့ ဖွဲ့စည်းထားတဲ့ ကောင်းကင်စက်ဝန်းနတ်ဆိုးမြွေအလံ ဖြစ်တယ်။

အသုံးပြုလိုက်တဲ့အခါ နေရာတစ်ခုလုံးကို တိုက်ရိုက်ဖုံးလွှမ်းသွားပြီး ကောင်းကင်စက်ဝန်းနတ်ဆိုးမြွေအစီအရင်ကို ဖန်တီးနိုင်တယ်။ အထဲမှာ နေရာလွတ်တစ်ခုပါဝင်ပြီး အစီအရင်ထဲ ကျသွားရင် ကြောက်မက်ဖွယ် ကောင်းတဲ့တိုက်ခိုက်မှုကို ခံစားရမှာဖြစ်တယ်။

“ကောင်းကင်စက်ဝန်းနတ်ဆိုးမြွေအလံအစီအရင်”

ဆံဖြူနတ်ဆိုးက သူ့အင်အားကုန်သုံးပြီး တိုက်ခိုက်လိုက်တယ်။ ကြောက်ဖို့ကောင်းတဲ့ အစီအရင်ဖွဲ့စည်းပုံတစ်ခု ပေါ်လာပြီး ကောင်းကင်ကို ဖုံးလွှမ်းသွားတယ်။ အဲ့တာက ကြီးမားတဲ့ အစီအရင်ဖွဲ့စည်းပုံနေရာလွတ်တစ်ခုအဖြစ် ပြောင်းလဲသွားပြီး ချီမင်ကို ဝါးမြိုသွားတယ်။

ဝေါင်း! ဝေါင်း! ဝေါင်း!

တစ်ခဏချင်းမှာပဲ ချီမင်က အစီအရင်ထဲမှာ မရေမတွက်နိုင်တဲ့ ကြောက်မက်ဖွယ် ကောင်းတဲ့စပါးကြီးမြွေတွေကို မြင်လိုက်ရတယ်။

“ကျိုးပျက်စမ်း”

ချွင်!

ချီမင်က ညွှန်ပြလိုက်တော့ ကမ္ဘာဖျက်ဓားက ပျံထွက်သွားတယ်။ အဲ့တာက ကောင်းကင်နဲ့မြေကြီးမဟာတာအိုရဲ့ စွမ်းအားတွေပါဝင်နေတဲ့ ပြင်းထန်တဲ့ဓားအလင်းတန်းတစ်ခုလိုမျိုး အတားအဆီးအားလုံးကို ဖျက်ဆီးလိုက်တယ်။

ခရက်!

ချီမင်ရဲ့ဓားက ဆံဖြူနတ်ဆိုးရဲ့ ကောင်းကင်စက်ဝန်းနတ်ဆိုးမြွေအလံအစီအရင်ကို တိုက်ရိုက်ပဲ ချိုးဖျက်လိုက်တယ်။ အားပြင်းတဲ့ ဓားချီတွေက အရပ်မျက်နှာတိုင်းကို ထွက်လာပြီး အစီအရင်တစ်ခုလုံးကို ဖျက်ဆီးပစ်လိုက်တယ်။

“အားးး!!!”

ဆံဖြူနတ်ဆိုးက အော်ဟစ်ပြီး သွေးအန်လိုက်တယ်။ ဒဏ်ရာတွေက မသေးဘူး။ သူ့ရဲ့ကိုယ်ပိုင်ရတနာ ကောင်းကင်စက်ဝန်းနတ်ဆိုးမြွေအလံက လုံးဝနီးပါး ပျက်စီးသွားတယ်။ သူ့ခန္ဓာကိုယ်ထဲက ဓမ္မစွမ်းအားတွေက တလိပ်လိပ်ထိုးတက်လာပြီး ပြင်းထန်တဲ့ တန်ပြန်အကျိုးဆက်ကို ခံစားလိုက်ရတယ်။

“လျှပ်စီးငါးဖြာထိန်းချုပ်ခြင်း”

ဒုန်း!!!

ချီမင်က သူ့ဘယ်ဘက်လက်ကို မြှောက်လိုက်တယ်။ လျှပ်စီးငါးဖြာက စုစည်းလာပြီး တဖျစ်ဖျစ်မြည်နေတယ်။ လျှပ်စီးတွေ တောက်ပသွားပြီး သွေးနတ်ဆိုးခေါင်းကို ရိုက်ချလိုက်တယ်။

“သွေးပင်လယ် ဒေါသ”

သွေးနတ်ဆိုးခေါင်းက တုန်လှုပ်သွားတယ်။ သူက သူ့ရဲ့အစွမ်းထက်တဲ့ အံ့ဖွယ်စွမ်းအားနည်းစနစ်ကို အားကုန်သုံးပြီး သူ့ရှေ့မှာတားဆီးဖို့အတွက် မယုံနိုင်လောက်အောင်ကြီးမားတဲ့ သွေးပင်လယ်တစ်ခုအဖြစ် ပြောင်းလဲလိုက်တယ်။

ခရက်!

ဘုန်း ဘုန်း ဘုန်း!!!

မိုးကြိုးငါးချက်ပစ်ခြင်းက ရိုက်ခတ်သွားပြီး လျှပ်စီးကြောင်းတွေ ဖြာထွက်သွားတယ်။ သူတို့က နတ်ဆိုးတွေကို သတ်ဖြတ်ပြီး အရာအားလုံးကို ချေမှုန်းပစ်လိုက်တယ်။

ဒုန်း!!!

သွေးနတ်ဆိုးခေါင်းရဲ့ သွေးပင်လယ်က မိုးကြိုးငါးချက်ကြောင့် တိုက်ရိုက်ပဲ ကြေမွသွားပြီး ထိတ်လန့်ဖွယ်ပေါက်ကွဲသံကြီး ထွက်ပေါ်လာတယ်။ သူက သနားစရာ ကောင်းစွာအော်ဟစ်လိုက်ပြီး လူပုလေးလိုမျိုးသူ့ခန္ဓာကိုယ်က လွင့်စင်သွားတယ်။ မိုးကြိုးငါးချက်ကြောင့် တူးခြစ်လုနီးပါး ဖြစ်သွားတယ်။

“အားးး!!!”

အကြီးအကဲနတ်ဆိုးနေရာလွတ်ကလည်း သမာဓိမီးလျှံကြောင့် ပြင်းထန်စွာ နာကျင်သွားပြီး လောင်ကျွမ်းခံလိုက်ရတယ်။ သူက နည်းလမ်းအမျိုးမျိုး သုံးပေမယ့် သူ့ကိုယ်ပေါ်က သမာဓိမီးလျှံကို မငြှိမ်းသတ်နိုင်ဘူး။

သမာဓိမီးလျှံက အရမ်းကို စွမ်းအားကြီးတဲ့ အံ့ဖွယ်စွမ်းအားနည်းစနစ်တစ်ခု ဖြစ်တယ်။

ငြှိမ်းသတ်ဖို့ ခက်ခဲတယ်။

“ကောင်းကင်ဂူ”

ဒီအရေးကြီးတဲ့အချိန်မှာ အကြီးအကဲနတ်ဆိုးနေရာလွတ်က သူတည်ဆောက်ထားတဲ့ ကောင်းကင်ဂူကောင်းချီးနယ်မြေကို ဖွင့်ပြီး သူ့ခန္ဓာကိုယ်ကို အားဖြည့်ဖို့ ကောင်းကင်ဂူရဲ့စွမ်းအားကို လက်ခံရယူလိုက်တယ်။

ဒီကောင်းကင်ဂူရဲ့စွမ်းအားမှာ နေရာလွတ်တာအိုရဲ့ စွမ်းအားတွေ ပါဝင်နေတယ်။

အကြီးအကဲနတ်ဆိုးနေရာလွတ်ရဲ့နောက်မှာ ကောင်းကင်ဂူပုံရိပ်ယောင်တစ်ခု ပေါ်လာတယ်။ အထဲမှာ မြင်ကွင်းအမျိုးမျိုးနဲ့ ကမ္ဘာငယ်လေးတစ်ခုလို ဖြစ်နေတယ်။

…

သမာဓိမီးလျှံကို ယာယီ ဖိနှိပ်ထားနိုင်သွားတယ်။

ဒါပေမဲ့ ဖိနှိပ်ထားတာပဲ ရှိတယ်။ အကြီးအကဲနတ်ဆိုးနေရာလွတ်က သူ့ကိုယ်ပေါ်က သမာဓိမီးလျှံကို အမှန်တကယ် မငြှိမ်းသတ်နိုင်ဘူး။ ကောင်းကင်ဂူရဲ့ ဖိနှိပ်မှုနဲ့တောင်မှ သမာဓိမီးလျှံက ကောင်းကင်ဂူရဲ့စွမ်းအားကို လောင်ကျွမ်းစေနိုင်တယ်။

အရမ်းကို ကြောက်ဖို့ကောင်းလွန်းတယ်။

“ချီမင်၊ ဒါက သူတို့ရဲ့ ကောင်းကင်ဂူစွမ်းအားပဲ။”

“မင်း သတိထားရမယ်။”

ဝေ့ဟွာတုန်းနဲ့ တခြားလူတွေက အော်ပြောလိုက်ကြတယ်။

“အသင်္ချေမြွေ ကောင်းကင်ဂူ” ဆံဖြူနတ်ဆိုးက အော်လိုက်တယ်။

သူက ဆေးတစ်လုံးကို မျိုချပြီး သူ့ဒဏ်ရာတွေကို တည်ငြိမ်အောင်လုပ်လိုက်တယ်။ သူ့ကိုယ်ထဲက‌ သောင်းကြမ်းနေတဲ့ ဓမ္မစွမ်းအားတွေကို ဖိနှိပ်လိုက်တယ်။ ရက်စက်တဲ့အမူအရာနဲ့ သူက သူ့လက်တွေကို ဝေ့ယမ်းပြီး သူ့ရဲ့ကောင်းကင်ဂူကို ဖွင့်ကာ ကြီးမားတဲ့ ကောင်းကင်ဂူစွမ်းအားကို ဆွဲယူလိုက်တယ်။

ချက်ချင်းပဲ ဆံဖြူနတ်ဆိုးရဲ့အရှိန်အဝါက မြင့်တက်လာတယ်။ သူ့နောက်မှာ ကောင်းကင်ဂူပုံရိပ်ယောင်တစ်ခုလည်း ပေါ်လာတယ်။ ဒီကောင်းကင်ဂူထဲမှာ မြင်ကွင်းအမျိုးမျိုး ပေါ်လာပြီး အများစုက မြွေအမျိုးအစား နတ်ဆိုးသက်ရှိတွေ ဖြစ်တယ်။

“သွေးပင်လယ် ကောင်းကင်ဂူ”

သွေးနတ်ဆိုးခေါင်းကလည်း ကောင်းကင်ဂူရဲ့စွမ်းအားကို အလားတူ လက်ခံရယူလိုက်တယ်။ သူ့နောက်မှာ ကောင်းကင်ဂူပုံရိပ်ယောင်တစ်ခု သဘာဝအတိုင်းပေါ်လာတယ်။ ကြည့်လိုက်တော့ ကောင်းကင်ဂူထဲမှာ အဆုံးမဲ့သွေးပင်လယ်ကြီး ရှိနေတယ်။

“မင်းတို့က ငါနဲ့ ကောင်းကင်ဂူစွမ်းအားကို လာပြိုင်ချင်နေတာလား။” ချီမင်ရဲ့မျက်နှာပေါ်မှာ အေးစက်တဲ့အပြုံးနဲ့ မထီမဲ့မြင်အမူအရာတစ်ခု ပေါ်လာတယ် “ရယ်စရာကောင်းလိုက်တာ။ ကိုယ့်နေရာကိုယ် မသိကြဘူး။”

ချီမင်က သူ့ညာဘက်လက်ကို ဝေ့ယမ်းလိုက်တော့ ကောင်းကင်လျှို့ဝှက်ချက်စာအုပ်က ပေါ်လာတယ်။ အဲ့တာက လေထဲမှာ ပျံဝဲနေပြီး ချီမင်ရဲ့ရှေ့မှာ ရပ်သွားတယ်။ သူက ဓမ္မစွမ်းအားကို ထည့်သွင်းလိုက်တော့ စာအုပ်က အလိုအလျောက် လှန်သွားတယ်။

စာမျက်နှာခုနစ်မျက်နှာ ပွင့်သွားတယ်။

တစ်ခဏချင်းမှာပဲ အလင်းတန်းခုနစ်ခု ပျံထွက်လာတယ်။

မတူညီတဲ့ ပုံရိပ်ခုနစ်ခု ပေါ်လာတယ်။

“လျှို့ဝှက်နက်နဲတံခါး ကောင်းကင်ဂူဝိညာဉ်”

“ ဖုန်းကွယ်ချပ်ဝတ်တန်ဆာကောင်းကင်ဂူဝိညာဉ်”

“ပါ့ကွားရှစ်ခု ကောင်းကင်ဂူစိတ်ဝိညာဉ်”

“ယင်ယန် ကောင်းကင်ဂူစိတ်ဝိညာဉ်”

“လေဧကရီ ကောင်းကင်ဂူစိတ်ဝိညာဉ်”

“ထိုက်ချီ ကောင်းကင်ဂူစိတ်ဝိညာဉ်”

“အစွန်းနှစ်ဖက် ကောင်းကင်ဂူစိတ်ဝိညာဉ်”

“သခင်ကို ဂါရဝပြုပါတယ်” ကောင်းကင်ဂူစိတ်ဝိညာဉ်ခုနစ်ယောက်က တစ်ချိန်တည်းမှာ ပေါ်လာကြတယ်။

ချီမင်ရဲ့နောက်မှာ ကောင်းကင်ဂူကမ္ဘာခုနစ်ခုလုံး ပေါ်လာတယ်။ တစ်ခုချင်းစီက သက်ဝင်လှုပ်ရှားနေပြီး တကယ့်ကို ပြီးပြည့်စုံတဲ့ ကမ္ဘာငယ်လေးတွေ ဖြစ်ကြတယ်။ အဲ့တာက သွေးနီနတ်ဆိုးဂိုဏ်းရဲ့ မဟာအကြီးအကဲသုံးယောက် တည်ဆောက်ထားတဲ့ ကောင်းကင်ဂူတွေထက် အများကြီး သာလွန်တယ်။

“ခုနစ်... ခုနစ်ခုတောင်”

“ဒါ့အပြင် အကုန်လုံးကအမြင့်ဆုံးအဆင့်ကောင်းကင်ဂူကမ္ဘာတွေ”

“ဘယ်လိုဖြစ်နိုင်မှာလဲ။ ချီမင်က ဝိညာဉ်ဖွဲ့တည်ခြင်းအစောပိုင်းအဆင့်ပဲ ရှိသေးတာ။ သူက ကောင်းကင်ဂူခုနစ်ခုကို ဘယ်လို ထိန်းချုပ်နိုင်မှာလဲ။ ပြီးတော့ တစ်ခုချင်းစီက အမြင့်ဆုံးအဆင့် ကောင်းကင်ဂူကမ္ဘာတွေ။”

“ဒါ အမှန်မဟုတ်ဘူး”

ဆံဖြူနတ်ဆိုး၊ သွေးနတ်ဆိုးခေါင်းနဲ့ အကြီးအကဲနတ်ဆိုးနေရာလွတ်တို့က ဒီအချိန်မှာတော့ တကယ်ကို ကြောက်လန့်သွားကြတယ်။ သူတို့က မဟာကောင်းကင်ဂူကမ္ဘာခုနစ်ခုရဲ့ ကြောက်မက်ဖွယ် ဖိအားကို ခံစားလိုက်ရတယ်။

သူတို့ရဲ့ခန္ဓာကိုယ်တွေက တုန်ယင်သွားတယ်။

“ပြေး”

ဘာမှ ချီတုံချတုံ မဖြစ်ဘဲ သူတို့သုံးယောက်က လှည့်ပြီး အဝေးကို ထွက်ပြေးသွားလိုက်ကြတယ်။

ဒီအချိန်မှာတော့ သူတို့ အမှန်တရားကို နားလည်သွားကြပြီ။ သူတို့သုံးယောက်မပြောနဲ့၊ သူတို့နဲ့ အဆင့်တူတဲ့ နောက်ထပ် အယောက် (၃၀) လာရင်တောင် ချီမင်ရဲ့ပြိုင်ဘက် ဖြစ်နိုင်မှာမဟုတ်ဘူး။

သူတို့ နိုင်ဖို့ဆိုတာ မဖြစ်နိုင်ဘူး။

သေခြင်းတရားပဲ ရှိတယ်။

ကြောက်ရွံ့ခြင်း!

သူတို့ရဲ့နှလုံးသားတွေက ကြောက်ရွံ့မှုတွေ ပြည့်နှက်သွားတယ်။

“ကောင်းကင်လျှို့ဝှက်ချက်စုတ်တံ”

ချီမင်က သူ့လက်ကို မြှောက်လိုက်တော့ ကောင်းကင်လျှို့ဝှက်ချက်စုတ်တံက ပေါ်လာပြီး သူ့လက်ထဲကို ကျလာတယ်။ သူက စုတ်တံကို ညာလက်နဲ့ ကိုင်ထားပြီး ကောင်းကင်ဂူစိတ်ဝိညာဉ်ခုနစ်ယောက်က အလင်းတန်းခုနစ်ခုအဖြစ် ပြောင်းလဲကာ ကောင်းကင်လျှို့ဝှက်ချက်စုတ်တံထဲကို ပေါင်းစပ်ဝင်ရောက်သွားတယ်။

သူ့အကြည့်က ခံစားချက်ကင်းမဲ့နေတယ်။ သူက သူ့ညာလက်က စုတ်တံကို ဝှေ့ယမ်းလိုက်ပြီး ကောင်းကင်ဂူခုနစ်ခုရဲ့ စွမ်းအားကို မှင်အဖြစ်သုံးကာ ကောင်းကင်လျှို့ဝှက်ချက်စုတ်တံနဲ့ လေဟာနယ်ထဲမှာ ဖြည်းဖြည်းချင်း ရေးချလိုက်တယ်။

ရေးလိုက်တဲ့ စကားလုံးက တစ်လုံးတည်းဖြစ်တယ်။

သေခြင်း။

တစ်ခဏချင်းမှာပဲ ကောင်းကင်ဂူခုနစ်ခုရဲ့စွမ်းအားကို မှင်အဖြစ်နဲ့ ကောင်းကင်လျှို့ဝှက်ချက်စုတ်တံသုံးပြီး ရေးလိုက်တဲ့ ‘သေ’ ဆိုတဲ့စကားလုံးက အသက်ဝင်လာသလိုဖြစ်သွားပြီး အရမ်းကိုထူးခြားနက်နဲတဲ့ စွမ်းအားတစ်ခုကို ထည့်သွင်းလိုက်တယ်။

ပြီးတော့ ဒီ ‘သေ’ ဆိုတဲ့စကားလုံးက အသက်ဝင်လာပြီး ခုနစ်ရောင်ရှိတဲ့အလင်းစီးကြောင်းတစ်ခုအဖြစ် ပြောင်းလဲသွားတယ်။ အဲ့တာက ကောင်းကင်ပေါ်က ကောင်းကင်ဂူခုနစ်ခုရဲ့ စွမ်းအားကို သယ်ဆောင်သွားပြီး မဟာအကြီးအကဲသုံးယောက်နောက်ကို တိုက်ရိုက် လိုက်သွားတယ်။

“မဖြစ်ဘူး”

“တားကြ”

“အားကုန်သုံး”

သွေးနီနတ်ဆိုးဂိုဏ်းရဲ့ မဟာအကြီးအကဲသုံးယောက်က တစ်ပြိုင်နက် ဟိန်းဟောက်လိုက်ကြတယ်။ သူတို့က သူတို့ရဲ့ ကောင်းကင်ဂူစွမ်းအားတွေအကုန်လုံး၊ ဓမ္မစွမ်းအားတွေနဲ့ အံ့ဖွယ်စွမ်းအားတွေကိုပါ ပေါင်းထည့်ပြီး ကြီးမားတဲ့အလင်းတိုင်ကြီးတစ်ခုအဖြစ် ပစ်လွှတ်လိုက်တယ်။

ဘုန်း! ဘုန်း! ဘုန်း!

‘သေ’ ဆိုတဲ့စာလုံးကနေ ပြောင်းလဲလာတဲ့ ခုနစ်ရောင်အလင်းက လေထဲမှာ သုံးပိုင်းခွဲထွက်သွားပြီး ခုနစ်ရောင်စွမ်းအင်တန်းသုံးခုလို ဖြစ်သွားပြီးထိုးဖောက်လိုက်တယ်။

ပေါက်ကွဲသံတစ်ခု ထွက်ပေါ်လာတယ်။

သွေးနီနတ်ဆိုးဂိုဏ်း မဟာအကြီးအကဲသုံးယောက်ရဲ့ တိုက်ခိုက်မှုတွေ အကုန်လုံး ရှုံးနိမ့်သွားတယ်။ လေထဲမှာ ပေါက်ကွဲသွားပြီး ကောင်းကင်ကိုပြည့်သွားတဲ့အထိအလင်းတန်း တွေအဖြစ် ပြောင်းလဲသွားတယ်။ခုနစ်‌ရောင်စွမ်းအင်အလင်းတန်းက သူတို့ရဲ့ခန္ဓာကိုယ်တွေကို ထပ်မံထိုးဖောက်သွားတယ်။

“အားးး!!!”

သူတို့တွေ သနားစဖွယ် အော်ဟစ်လိုက်ကြတယ်။

သွေးတွေ ပန်းထွက်လာတယ်။

“အံ့ဖွယ်ဓား လျှပ်စီးထိန်းချုပ်ရေးနည်းစနစ်”

ချွင်!

ချီမင်က နောက်တစ်ကြိမ်ခုတ်ပိုင်းလိုက်တယ်။ ခရမ်းရောင်လျှပ်စီးကိုးခုက ဒီဓားချက်ထဲကို ပေါင်းစပ်သွားပြီး လျှပ်စီးဓားချီကို ထုတ်လွှတ်ကာ မဟာအကြီးအကဲသုံးယောက်ပေါ်ကို ချက်ချင်းပဲ ပိုင်းချလိုက်တယ်။

ဘုန်း!

ကျယ်လောင်တဲ့အသံကြီးတစ်ခု ထွက်ပေါ်လာတယ်။

သွေးနီနတ်ဆိုးဂိုဏ်းရဲ့ မဟာအကြီးအကဲသုံးယောက်က နောက်ဆုံးအော်သံတစ်ချက်တောင် မအော်နိုင်လိုက်ဘူး။ သူတို့ရဲ့ အနှစ်သာရဝိညာဉ်တွေ ပျက်စီးသွားပြီး ဝိညာဉ်တွေ ကွဲကြေသွားတယ်။ သူတို့ရဲ့အလောင်းတွေတောင် ဓားချီနဲ့ လျှပ်စီးကြောင့် ပြာအဖြစ် ကြေမွသွားတယ်။

အရိုးပြာတောင် မကျန်ဘူးလို့ ပြောလို့ရတယ်။

ရှပ်!

ချီမင်က သူ့ညာဘက်လက်ကို ဝေ့ယမ်းလိုက်တယ်။

မဟာအကြီးအကဲသုံးယောက်ရဲ့ သိုလှောင်လက်စွပ်တွေနဲ့ သူတို့ရဲ့ရတနာတွေကို ချီမင်က အကုန်သိမ်းယူသွားလိုက်တယ်။ သူက သေချာမကြည့်ဘဲ သူ့ရဲ့ပစ္စည်းစာရင်းထဲကို ပေါ့ပေါ့ပါးပါး ပစ်ထည့်လိုက်တယ်။

“တောင်ထွတ်သခင်တို့”

ချီမင်က ထိတ်လန့်တုန်လှုပ်နေကြတဲ့ ဝေ့ဟွာတုန်းနဲ့ တခြားလူတွေရှေ့ကို ရောက်လာပြီး ပြောလိုက်တယ် “သွေးနီနတ်ဆိုးဂိုဏ်းရဲ့ မဟာအကြီးအကဲသုံးယောက်လုံး သေသွားပါပြီ။”

“ကောင်းတယ်! ကောင်းတယ်!”

ဝေ့ဟွာတုန်းက သတိပြန်ဝင်လာပြီး အသက်ကိုပြင်းပြင်းရှူလိုက်တယ်။ သူ့ရဲ့တုန်လှုပ်နေတဲ့စိတ်က အချိန်အတော်ကြာတဲ့အထိ မတည်ငြိမ်နိုင်ဘူး။ သူက ခံစားချက်ကင်းမဲ့နေတဲ့ ချီမင်ကို ကြည့်ပြီး မနေနိုင်ဘဲ ကြောက်ရွံ့စိတ်နည်းနည်း ဝင်လာတယ်။

မျက်စိတစ်မှိတ်အတွင်းမှာ နှစ်ပေါင်းရာချီ ကုန်သွားခဲ့တယ်။

ချီမင်က တကယ်ပဲ ဒီအခြေအနေအထိ ကြီးထွားလာတယ်။

ဝေ့ဟွာတုန်းကတော့...

သူ့ရဲ့ကျင့်ကြံခြင်းအဆင့်က အရင်အဆင့်မှာပဲ ရှိနေတုန်းပဲ။

“ကိုယ်ပိုင်... ကိုယ်ပိုင်တပည့်ချီ”

ဝမ်ရှန်းယွင်ရဲ့လေသံက ရိုသေလေးစားမှုအဖြစ် ပြောင်းသွားတယ်။ အရင်တုန်းက သူက အမွေခံတပည့်ချီလို့ သုံးခဲ့ပေမယ့် အခုတော့ သူက ကိုယ်ပိုင်တပည့်ချီလို့ သုံးလိုက်တယ် “သွေး... သွေးနီနတ်ဆိုးဂိုဏ်းရဲ့ မဟာအကြီးအကဲသုံးယောက်လုံး အသတ်ခံလိုက်ရပြီ။ အခု သွေးနီနတ်ဆိုးဂိုဏ်းရဲ့ ဂိုဏ်းချုပ် ရှောင်ဝူဂျီပဲ ကျန်တော့တယ်... သူ့ကိုရှာပြီး သတ်နိုင်ရင် ဒီဂိုဏ်းတိုက်ပွဲက ပြီးသွားပြီ။”