လနတ်ဆိုးဧကရာဇ်နှင့် တိုက်ပွဲ

"သာမန်ပြည်သူတွေက မိုက်မဲတဲ့ ဝက်တွေသက်သက်ပဲ။ ထင်ရှားတာကို မျက်ကွယ်ပြုပြီး၊ သူတို့က လျှို့ဝှက်ကြံစည်မှုအပေါ်မှာ ရှင်သန်ကြတယ်။ သူတို့ကို ထိခိုက်နိုင်တဲ့ လျှို့ဝှက်ဆန်းကြယ်မှုတစ်ခုလောက် အရိပ်အမြွက်ပြလိုက်ရုံနဲ့ သူတို့ ဒေါသထွက်လာပြီး ချောက်ထဲကို ခေါင်းစိုက်ခုန်ချကြတယ်။ ငါက အရုဏ်တက်နတ်ဧကရီရဲ့ နတ်ပြည်ထောင်ကို မွှေနှောက်ပစ်ဖို့ အကြံအစည်လေး တစ်ခုပဲ လိုအပ်တယ်။ စိတ်ပိုင်းဆိုင်ရာ တိုက်ပွဲတွေက ငါ့ရဲ့ အားသာချက်ပဲ"

ခရမ်းရောင်ဧကရာဇ်က မည်သည်မှ ဂရုမစိုက်ဟန်ဖြင့် ပခုံးတွန့်လိုက်သည်။

"မှန်ကန်တဲ့ ကျိုးကြောင်းဆင်ခြင်မှုပါပဲ အရှင်"

ဝေ့ဖုန်းက ကူရာမဲ့သော အပြုံးတစ်ခုဖြင့် ပြန်ဖြေသည်။

"ကျွန်တော် တုတင်ကို ချက်ချင်း အကြောင်းကြားလိုက်ပါမယ်"

"အလျင်စလို မလုပ်နဲ့၊ ဒီစစ်ပွဲထဲမှာ အသက်ရှင်ကျန်ရစ်ဖို့ ဉာဏ်ပညာ လိုအပ်တယ်။ ကောင်းကင်နယ်မြေရဲ့ ရှေးဦး အစီအရင် ပိတ်ထားတာက မသေချာမရေရာလို့ စုံစမ်းစစ်ဆေးရမယ်။ ငါတို့ ခရမ်းရောင်ကောင်းကင်က ဒီစစ်ပွဲမှာ အမြောက်စာ ဖြစ်လို့ မရဘူး။ တုတင်ကို အချိန်ယူခိုင်းလိုက်။ နတ်ဆိုးဧကရာဇ်တွေ မကြာခင်မှာ ကောင်းကင်နယ်မြေရဲ့ ဈေးတွေဆီကို အင်အားစုတစ်ခု စေလွှတ်ပြီး သတ်ဖြတ်ကြလိမ့်မယ်လို့ ငါ လောင်းရဲတယ်။ အဲ့ဒီအခါ ဘာဆက်ဖြစ်မလဲ ကြည့်ကြတာပေါ့"

ခရမ်းရောင်ဧကရာဇ်က လေးနက်စွာ ညွှန်ကြားလိုက်၏။

"အမိန့်အတိုင်းပါ"

ဝေ့ဖုန်းက တစ်ချက်တွေး၍ တီးတိုး မေးလိုက်ပြန်သည်။

"အရှင်မင်းကြီး၊ ရှေးဦး အစီအရင်က သူ့ဘာသာသူ ပျက်စီးသွားနိုင်ချေ ရှိပါသလား"

"မဖြစ်နိုင်ဘူး"

ခရမ်းရောင်ဧကရာဇ်သည် အရုဏ်တက်နတ်ဧကရီ နှင့် ယွမ်ရှောင်ဟူသော ကြောက်မက်ဖွယ် လူငယ် နှစ်ဦးအကြောင်း စဥ်းစားနေရင်း နောက်ဆုံးတွင် ခေါင်းခါလိုက်သည်။

"တစ်ယောက်က တည်ငြိမ်ပြီး ရက်စက်တယ်၊ နောက်တစ်ယောက်က လိမ္မာပါးနပ်ပြီး ကောက်ကျစ်တယ်။ သူတို့ကဟန်ဆောင် ကစားရာမှာ ထူးချွန်ကြတယ်။ ဒါက သူတို့ရဲ့ နောက်ထပ် လှည့်ကွက်တစ်ခု ဖြစ်ရမယ်။ တားမြစ်ကံကြမ္မာရဲ့ ဝန်းရံပိတ်ဆို့မှု နည်းဗျူဟာက မှန်တယ်။ ကောင်းကင်နယ်မြေက ကျင့်ကြံသူတွေ အများကြီး အမှန်တကယ် ထွက်ပြေးလယကြတယ်"

ခရမ်းရောင်ဧကရာဇ်သည် ဘိုးဘေးကျောင်းတော်၏ အတွင်းဘက်သို့ လှည့်ကြည့်ပြီး တီးတိုးရေရွတ်ခဲ့သည်။

"နတ်ဆိုးဧကရာဇ်တွေ ဒီအခြေအနေကို စုံစမ်းစစ်ဆေးဖို့ တိုက်ခိုက်ရေးအင်အား ဘယ်လောက် စေလွှတ်မလဲ စောင့်ကြည့်ကြရအောင်"

ဘန်း

အနက်ရောင်ဝတ် လူငယ်တစ်ဦးက ရွှေရောင် ဆံပင်နှင့် သန်မာသော အမျိုးသားတစ်ဦး၏ မျက်နှာကို ရုတ်တရက် ပြင်းထန်စွာ ရိုက်ချလိုက်သည်။ ရွှေရောင် ဆံပင်နှင့် နတ်ဆိုးက နံရံကို ထိမှန်သွား၍ နန်းတော်များစွာ လွင့်ထွက်သွားပြီးမှ နောက်ဆုံးတွင် ထရပ်နိုင်ခဲ့ကာ သူ၏ မျက်နှာတစ်ခြမ်း သွေးများ စွန်းထင်းနေသည်။ ၎င်းမှာ မျောက် သူတော်စင် ဖြစ်ပြီး အနက်ရောင်ဝတ် လူငယ်မှာ အသက်ငယ်ဆုံး လနတ်ဆိုး ဧကရာဇ် ဖြစ်သည်။ သူက သားရဲဘုရင်ဖြစ်၍ ကောင်းကင်ဘုံ ခွေးမျိုးနွယ်ဝင် တစ်​ယောက်ပင်။

"ဒါဆို မင်းလည်း နတ်ဆိုး မျိုးနွယ်ရဲ့ သစ္စာဖောက်တစ်ယောက် ဖြစ်လာပြီပေါ့။ အဲ့ဒီ သူပုန်ကို တားမြစ်ကံကြမ္မာဆီ ခေါ်သွားရဲသေးတယ်"

လနတ်ဆိုး ဧကရာဇ်၏ မျက်နှာက ဒေါသတကြီးဖြင့် ခွေးသွား အစွယ်များ အေးစက်စက် တောက်ပနေ၍ မျက်လုံးများ မီးတောက်နေသည်။ သူက လနတ်သားကို အပြစ်ရှိသည်ဟု ဆုံးဖြတ်ပြီးဖြစ်သော်လည်း ဤနတ်ဆိုးသူတော်စင်များမှာ ရှေ့တည့်တည့်တွင် ဆန့်ကျင်ရဲမည်ဟု ထင်မထားခဲ့ချေ။ အချိန်ကြာမြင့်စွာ လိုက်လံရှာဖွေခဲ့သော်လည်း လနတ်သားမှာ ဘိုးဘေးကျောင်းတော်တွင်တလျှောက်လုံး ပုန်းအောင်းနေခဲ့သဖြင့် သားရဲဘုရင်၏ အာဏာကို ပြောင်ပြောင်တင်းတင်း စိန်ခေါ်လိုက်ခြင်း ဖြစ်သည်။

"လနတ်ဆိုး ဧကရာဇ်"

မီးသူတော်စင်က မျောက်သူတော်စင်ကို ထူမပေး၍ သူ၏ လေသံမှာ လေးနက်နေသည်။

"တားမြစ်ကံကြမ္မာဧကရာဇ်က လနတ်သားရဲ့ အမှုကို စစ်ပွဲပြီးမှ စီရင်ဖို့ အမိန့်ပေးထားတယ်။ အရှင်က သူ့ကို အခု အပြစ်ပေးခွင့် မရှိဘူး"

"ဒီသစ္စာဖောက်ကို ငါတို့ မျက်စိအောက်မှာ ပရမ်းပတာ လုပ်ခွင့်ပေးထားပြီး စစ်ပွဲပြီးမှဆိုရင် အရမ်း နောက်ကျသွားလိမ့်မယ်"

လနတ်ဆိုးဧကရာဇ်က ဤမျှလောက် ထူးဆန်းနေသော အခြေအနေမျိုးကို မကြုံဖူးပေ။ ဤကိစ္စကြောင့်သာ မဟုတ်လျှင် နတ်ဆိုးအုပ်စု ထွက်ခွာသွားသည်မှာ ကြာမြင့်နေပြီဖြစ်၏။

"ကူဧကရာဇ် ကြာနီ"

လနတ်ဆိုးက အခြား နတ်ဆိုးဧကရာဇ် နှစ်ပါးဘက် လှည့်ကြည့်ကာ လေသံတင်းတင်းဖြင့် ပြောလိုက်သည်။

"ငါတို့ လနတ်သားကို အရင်ဆုံး သတ်ဖြတ်ရမယ်။ အဲ့ဒီသစ္စာဖောက် အသက်ရှင်နေသရွေ့၊ ငါတို့ရဲ့ အစီအစဉ်မှာ အန္တရာယ် ရှိနေတယ်။ ဒီကောင်က တားမြစ်ကံကြမ္မာကို ဆွဲဆောင်ပြီး မိုက်မဲတဲ့ အစီအစဉ်တစ်ခု ချမှတ်ခဲ့တယ်။ လူသားတွေနဲ့ ပူးပေါင်းပြီး အချိန်ဆွဲနေတယ်ဆိုတာ သက်သေပဲ"

"လနတ်ဆိုး၊ တားမြစ်ကံကြမ္မာ ဧကရာဇ်ရဲ့ အမိန့်တွေကို လေးစားပါ"

မီးသူတော်စင်က ဖြတ်ပြောလိုက်ပြီး မကျေနပ်မှု နတ်ဆိုးများ၏ ဒုတိယ အကြီးအကဲ ဖြစ်၍ တားမြစ်ကံကြမ္မာ နတ်ဆိုးဧကရာဇ်ဘက်မှ ထောက်ခံအားပေးထားသူ ဖြစ်သောကြောင့် သူ၏ အာဏာကို လျစ်လျူရှု၍ မရနိုင်ပေ။ သူ၏မိတ်ဆွေ မျောက်သူတော်စင်ရှေ့တွင် ချက်ချင်း ထွက်ရပ်၍ အေးစက်စွာ ဆက်ပြောသည်။

"ကျုပ် မင်းကို နောက်တစ်ကြိမ် သတိပေးပါရစေ။ လနတ်သားရဲ့ အရည်အချင်းတွေက အရုဏ်တက်နတ်ဧကရီနဲ့ ယွမ်ရှောင်တို့ထက် အများကြီး သာလွန်တယ်။ သူက ငါတို့ နတ်ဆိုးတိုက်ကြီးရဲ့ အနာဂတ် နတ်ဆိုးဧကရာဇ်တစ်ပါးပဲ။ မင်းက တိုက်ဆိုင်မှုတွေကို အသုံးပြုပြီး သူ့ကို အပြစ်ပုံချနေတာဟာ မနာလိုမှုနဲ့ စိတ်သဘောထား သေးသိမ်လို့ပဲ။ ငါက မကျေနပ်မှု နတ်ဆိုးတွေနဲ့ တားမြစ်ကံကြမ္မာဧကရာဇ်ကိုယ်စား ပြောနေတယ်။ နောက်ဆုတ်လိုက်ပါ"

"အရူး"

လနတ်ဆိုး ဧကရာဇ်က ဒေါသထွက်လွန်း၍ ပေါက်ကွဲထွက်လုနီးပါး ဖြစ်နေသည်။

"ဘယ်သူက အရူးလဲ။ မင်း ဘာလို့ ထိတ်လန့်နေလဲ ကျုပ် သိတယ်။ မင်းက ဟွာလျန် သခင်မကို မှားယွင်းစွာ သတ်ဖြတ်ခဲ့ပြီး လနတ်သားနဲ့ ရန်ငြိုးတစ်ခု ဖြစ်လာခဲ့တယ်။ အခု နောင်တရဖို့ အရမ်း နောက်ကျသွားပြီ။ ဒါကြောင့် မင်းက သူ့ကို အပုပ်ချချင်တယ်၊ သူ့ကို သတ်ပစ်ချင်တယ်မလား"

မီးသူတော်စင်က အေးစက်စက် ရယ်မော၍ ပြန်ပြောခဲ့သည်။ ထိပ်တန်းအဆင့် နတ်ဆိုးသူတော်စင်များက သူတို့၏ ငြင်းခုံမှုကြောင့် တုန်လှုပ်နေကြပြီး

မီးသူတော်စင်မှာ ယခင်က ဤမျှလောက် မရဲတင်းသော်လည်း တားမြစ်ကံကြမ္မာ၏ အဆင့်အတန်း မြင့်တက်လာသည်နှင့်အမျှ သူလည်း ထင်ရှားကျော်ကြားလာခဲ့သည်။ သို့မဟုတ်လျှင် လနတ်ဆိုးဧကရာဇ်၏ နောက်ထပ် ရိုက်ချက်သည် သူ၏ မျက်နှာပေါ်သို့ ကျရောက်လာနိုင်ဖွယ် ရှိသည်။

"ငါက လနတ်ဆိုးအကြောင်း ကောင်းကောင်း သိတယ်။ သူက မနာလိုတတ်တဲ့ နတ်ဆိုးမျိုး မဟုတ်ဘူး။ သားရဲတွေကြားမှာ ပါရမီရှင်တစ်ယောက် ပေါ်ထွက်လာရင်၊ သူ ဝမ်းသာမှာပါ"

အသက်အကြီးဆုံးဖြစ်သော ကူဧကရာဇ်က ဝင်ရောက်ဖြန်ဖြေပေးလာသောအခါ အနက်ရောင်ဝတ် လူငယ်၏ ဒေါသ အနည်းငယ် လျော့ကျသွားသည်။

"ဒါပေမယ့် တားမြစ်ကံကြမ္မာ နတ်ဆိုးဧကရာဇ်ရဲ့ အမိန့်အတိုင်း လနတ်သားကို စစ်ပဲဲပြီးမှ စီရင်မယ်"

ကူဧကရာဇ်က သက်ပြင်းချ၍ ဆုံးဖြတ်ပေးလိုက်သောအခါ လနတ်ဆိုးဧကရာဇ်၏ ဒေါသ ပို၍ တောက်လောင်လာခဲ့သည်။

"ထျန်းအာ၊ တားမြစ်ကံကြမ္မာက အမိန့် ပေးပြီးပြီ။ မင်းရဲ့ လုပ်ရပ်တွေက အခုအချိန်မှာ အဓိပ္ပာယ်မရှိဘူး။ လနတ်သားက သစ္စာဖောက်တစ်ယောက်ဆိုတာ သက်သေပြဖို့ တစ်ခုတည်းကိုပဲ အာရုံစိုက်ပါ။ တကယ်လို့ ငါတို့စစ်တပ်က ကောင်းကင်နယ်မြေရဲ့ ဈေးတွေမှာ ရမ်းကားတဲ့အထိ အစီအရင်ကို အသက်မသွင်းဘူးဆိုရင် လနတ်သားရဲ့ အကြံက အချိန်ဆွဲဖို့သက်သက်ပဲဆိုတာ အကုန်သိသွားပါလိမ့်မယ်"

ကြာနီက သူ့ကို ဆွဲကိုင်၍ နူးညံ့သိမ်မွေ့စွာ ဖြောင်းဖြနေသည်။

"ကြာနီ၊ ငါ့အနေနဲ့ မင်း ဘယ်လို ထင်လဲဆိုတာ သိချင်တယ်"

လနတ်ဆိုးက သူမကို စိုက်ကြည့်၍ ဖိအားပေးသည်။

"ငါ နင့်ကို ယုံကြည်တယ်"

"ကောင်းပြီ"

လနတ်ဆိုးက အံကြိတ်၍ မျောက်သူတော်စင်ကို စိုက်ကြည့်ကာ အမိန့်ပေးလိုက်သည်။

"တကယ်လို့ မင်းအနေနဲ့ အဲ့ဒီ မြေခွေးက ငါတို့ထဲက တစ်ယောက်ဆိုတာ သက်သေပြချင်ရင် ချက်ချင်း သားရဲ နတ်ဆိုး တစ်သန်းကို စုစည်းပြီး ဘိုးဘေးကျောင်းတော်ကနေ ငါနဲ့အတူ လိုက်လာခဲ့။ ကောင်းကင်နယ်မြေကို တိုက်ခိုက်ရမယ်"

"ဟုတ်ကဲ့"

မျောက်သူတော်စင်က ခေါင်းညိတ်၍ သဘောတူလိုက်သည်။

အချိန်အနည်းငယ်ကြာပြီးနောက် သားရဲ နတ်ဆိုး တစ်သန်းကျော်သည် ဘိုးဘေးကျောင်းတော်ရှေ့တွင် စုရုံးရောက်ရှိနေကြပြီး မျက်လုံးများ သွေးရောင်တောက်နေသော လနတ်ဆိုး ဧကရာဇ်က ရှေ့တန်းတွင် ရပ်နေသည်။

"ချီတက်ကြ"

သူက အမိန့်ပေး၍ နတ်ဆိုးအလုံးအရင်းကို ဦးဆောင်၍ စစ်ချီရန် အသင့်အနေအထား ပြင်လိုက်သည်။ သားရဲနတ်ဆိုးစစ်တပ်က စတင်ချီတက်လာပြီး ဘိုးဘေးကျောင်းတော် တံခါးဝ အနီးရောက်သောအခါ အဖြူရောင် မြူခိုးများဖြင့် လွှမ်းခြုံနေသော ငွေရောင် အမြီးသုံးချောင်း နတ်ဆိုး မြေခွေးတစ်ကောင် ရုတ်တရက် ခုန်ထွက်လာကာ သားရဲ စစ်တပ်၏ ရှေ့တွင် ဆင်းသက်လိုက်၏။

ဘုန်း

နတ်ဆိုး မြေခွေးက မြေကြီးပေါ် ရောက်ရောက်ချင်း အားယူခုန်ထွက်၍ လနတ်ဆိုးထံ တည့်တည့်မတ်မတ် ဝင်ရောက်လာကာ ကြီးမားသော အက်ကြောင်းတစ်ခု ဖြစ်ပေါ်လာသည်။

"လနတ်သား"

ဘိုးဘေးကျောင်းတော်မှ နတ်ဆိုးများအားလုံး လှုပ်ရှားသွားကြပြီး သန်းချီသော သားရဲနတ်ဆိုး စစ်တပ်မှာ တစ်ဖက်လူသည် သစ္စာဖောက်တစ်ယောက်လား သို့မဟုတ် မတရား ပစ်ပယ်ခံလိုက်ရသော ပါရမီရှင်တစ်ယောက်လား ရှုပ်ထွေးနေကြသည်။

"မင်း ထွက်လာရဲသေးတယ်ပေါ့"

လနတ်ဆိုးက ဒေါသထွက်နေသောကြောင့် မြေခွေးကို မြင်ရသည်နှင့်တပြိုင်နက် သူ၏ မျက်နှာ ထူးဆန်းစွာ ပြောင်းလဲ၍ သားရဲဆန်သော အနက်ရောင်ခွေးမျက်နှာဖြစ်လာခဲ့သည်။

"ငါ့ကို စွပ်စွဲဖို့အတွက် မင်းက ငါတို့ မျိုးနွယ်ဝင် တစ်သန်းကို ပျက်စီးခြင်းဆီ ဦးဆောင်နေတယ်။ ငါက ဘာလို့ ထွက်မလာရဲမှာလဲ"

အမြီးသုံးချောင်း နတ်ဆိုး မြေခွေးက အေးစက်စွာ ပြန်ပြောသည်။

"စိုးရိမ်နေပြီပေါ့၊ ဟုတ်လား။ ရှေးဦးအစီအရင်မှာ ပြဿနာတစ်ခုခု တကယ် ရှိပုံရတယ်"

လနတ်ဆိုးဧကရာဇ်က အောင်နိုင်သူအပြုံးမျိုး ပြုံးပြလိုက်၏။

"မင်းလို အသုံးမကျတဲ့ ခွေးကောင်။ အင်မော်တယ် စစ်ပွဲ စတင်ခဲ့တာ မင်း အရင် ရန်စခဲ့ပြီး စစ်မြေပြင်ကို တိုက်ခိုက်ခဲ့လို့ပဲ။ အခု မင်းက ငါ့ကို အပြစ်တင်နေတာလား။ အဲ့ဒီ တိုက်ပွဲကနေ ဒီလူသားတွေ ဘယ်လောက် ကောက်ကျစ်လဲဆိုတာ မင်း မမြင်နိုင်ဘူးလား။ ရှေးဦးအစီအရင်မှာ ပြဿနာရှိတယ်လို့ ထင်နေတုန်း။ အိပ်မက်မက်နေလိုက်။ မင်းက လူသား ထောင်ချောက် ဘယ်လောက်များများထဲအထိ ဝင်သွားဖို့ ကြံစည်နေတာလဲ"

"ရှေးဦး အစီအရင်အကြောင်း အမှန်တရားက စမ်းသပ်မှုတစ်ခုနဲ့ ရှင်းလင်းသွားလိမ့်မယ်"

ကူနတ်ဆိုးဧကရာဇ်က စစ်တပ်နောက်ကွယ်မှ ထွက်ပေါ်လာခဲ့သည်။

"ဒါဆိုရင် မင်းရဲ့ အင်းဆက် နတ်ဆိုး တစ်သန်း စေလွှတ်ပြီး ဘာကြောင့် မစမ်းသပ်တာလဲ။ ငါတို့ သားရဲနတ်ဆိုး မျိုးနွယ်က ဘာလို့ အမြောက်စာ ဖြစ်ပေးရမှာလဲ။ တကယ်လို့ မင်း စမ်းသပ်ချင်ရင် မကျေနပ်မှု၊ အင်းဆက်၊ အပင်၊ သားရဲ နဲ့ ငှက် နတ်ဆိုးတွေ နှစ်သိန်းစီ ဝင်ခိုင်းလိုက်။ တားမြစ်ကံကြမ္မာက မင်းကို သတ်ဖြတ်မှု လုပ်ဆောင်ဖို့ အမိန့်ပေးခဲ့တာ မဟုတ်ဘူးလား။ မင်းက ဒီမှာ ဘာမှမသိသလို ဟန်ဆောင်နေပြီး ငါတို့ သားရဲ နတ်ဆိုးတွေကို မင်းအစား အလုပ်ခိုင်းနေတာလား"

လနတ်သား၏ စကားများက သန်းနှင့်ချီသော သားရဲ နတ်ဆိုးများ၏ မီးလျှံကဲ့သို့ ဒေါသကို အေးစက်သွားစေကာ ချီတက်နေရာမှ ချက်ချင်း ရပ်တန့်သွားကြ၏။ နတ်ဆိုးတိုက်ကြီးတွင် အင်အားကောင်းသော နတ်ဆိုး မျိုးနွယ် ငါးခုက အမြဲတမ်း အချင်းချင်း ရန်စောင်နေကြပြီး နတ်ဘုရားတိုက်ကြီးကို သိမ်းပိုက်ရန်အတွက်သာ ယာယီပူးပေါင်းခဲ့ခြင်း ဖြစ်သည်။ အမှန်အတိုင်း ပြောရလျှင် နတ်ဆိုးများက လနတ်သားအပေါ် မုန်းတီးမနေဘဲ တိုက်ဆိုင်မှု နှစ်ခုကြောင့် သစ္စာဖောက်အဖြစ် စွပ်စွဲခြင်းမှာ အမှန်တကယ်၌ အခြေအမြစ်မရှိပေ။ အကယ်၍ ၎င်းသာ မှားယွင်းသော စွပ်စွဲချက်တစ်ခု ဖြစ်ခဲ့လျှင် သားရဲနတ်ဆိုး မျိုးနွယ်၏ အနာဂတ် အလဟဿ ဆုံးရှုံးသွားပေလိမ့်မည်။

"အဓိပ္ပာယ်မရှိတာတွေ မပြောနဲ့။ တကယ်လို့ မင်းတို့မှာ နားလည်မှုလွဲမှားမှုတွေ ရှိရင် ငါတို့ ဒါကို ရိုးရိုးရှင်းရှင်း ဖြေရှင်းကြရအောင်။ ငါတို့ တစ်ဖွဲ့ကို အင်အား နှစ်သိန်းစီ ထုတ်ပေးနိုင်တယ်"

ကူဧကရာဇ်၏ မျက်နှာက လနတ်သား၏ စကားကြောင့် ချက်ချင်း မည်းနက်သွား၏။

" အဓိပ္ပာယ်မရှိတဲ့စကားတွေ နားမထောင်စမ်းနဲ့။ ငါ သူ့ကို အဆုံးသတ်ပြီး အရာရာရှင်းလင်းသွားအောင် လုပ်လိုက်မယ်"

လနတ်ဆိုးက ဒေါသဖြင့် ခုန်ထွက်သွားသည်။

"ရပ်လိုက်စမ်း"

ကူ ဧကရာဇ်၊ ကြာနီ နှင့် မီးသူတော်စင် အော်ဟစ်တားမြစ်လိုက်ကြသော်လည်း မီးသူတော်စင်သာ အမှန်တကယ် ရှေ့တက်လာပြီး အခြား နှစ်ယောက်မှာ ဝင်ရောက်စွက်ဖက်ရန် ရည်ရွယ်ချက် မရှိခဲ့ပေ။

"တကယ် ဒီနှစ်ယောက်က ဝင်မတားဘူးဆိုရင် ရူးသွပ်နေတဲ့ လနတ်ဆိုး ဧကရာဇ်ကို ဘယ်သူ တားနိုင်မှာလဲ။ ဒီခွေးရူးကို ဘယ်လို တားရမလဲ"

မီးသူတော်စင်က ထိုအတွေးကြောင့် ခေါင်းကိုက်နေရ၏။

"ဟွာလျန် သခင်မရဲ့ သေဆုံးမှုကြောင့် လက်စားချေမှာ.ဖြစ်လို့ တစ်ယောက်ပဲ အသက်ရှင်လိမ့်မယ်။ အတော်ဆိုးတာပဲ"

မျောက်သူတော်စင်က သက်ပြင်းချသည်။

"အခုတော့ စောင့်ကြည့်ရအောင်။ အခြေအနေတွေ ဆိုးလာရင်၊ ငါတို့ အမြဲ ဝင်ရောက်ပြီး လနတ်သားကို ကူညီနိုင်တယ်မလား"

မီးသူတော်စင်က မေးခွန်းထုတ်လိုက်၏။

"မကူညီဘူး။ ငါ လက်ရှောင်တယ်"

မျောက်သူတော်စင်က လနတ်ဆိုးဧကရာဇ်၏ ရိုက်ချက်ကြောင့် ကြောက်လန့်စွာ ဘေးထွက်နေခဲ့သည်။ ထို့နောက် ဘိုးဘေးကျောင်းတော်၏ တံခါးဝတွင် နတ်ဆိုးတိုက်ကြီး၏ အနာဂတ် ပါရမီရှင် နှင့် နတ်ဆိုးဧကရာဇ်တစ်ပါးအကြား မကြုံစဖူး တိုက်ပွဲတစ်ခု ဖြစ်ပွားခဲ့သည်။ မည်သူမျှ ဝင်ရောက်စွက်ဖက်ရန် သတ္တိမရှိဘဲ တစ်ဖက်ဖက်ကို ပြစ်မှားစော်ကားမိလျှင် အကျိုးဆက်မှာ တွေးမရနိုင်လောက်အောင် ပြင်းထန်နိုင်လေသည်။