ချင်းလင်အမူးပြေမြက်ကိုပစ်မှတ်ထား!

"ဒီချင်းလင်အမူးပြေမြက်နဲ့ဆို သောက်ရတာမကြိုက်တဲ့သူတွေ ဒုက္ခရောက်မယ်... ငါအရင်က မူးချင်ယောင်ဆောင်ရသေးတယ်... ဒါပေမဲ့ အခု မူးချင်ယောင်ဆောင်လို့တောင်မရတော့ဘူး''

ပြည်သူတစ်ဦး၏စိတ်ပျက်လက်ပျက်ဗီဒီယိုက ရေပန်းစားသွားသည်။

အခု အမူးပြေမြက်ကအလွန်နာမည်ကြီးနေသောကြောင့် ဗီဒီယိုတင်လိုက်သည်နှင့် လူအတွေ့များသည်။

အရင် ပြည်သူတွေက အမူးပြေမြက်အာနိသင်ဘယ်လောက်ထက်​ကြောင်း၊ဘယ်လောက်စွမ်းကြောင်းပြောကြသည်။ အချက်အလက်တွေကလည်း အမူးပြေမြက်၏အစွမ်းနှင့်အံ့ဩစရာကောင်းပုံကိုသက်သေပြထားသည်။

အမူးပြေမြက်ကြောင့် အရက်ကုမ္ပဏီများ၏အွန်လိုင်းစတော့စျေးများတက်လာသည်။ ချင်းလင်စံအိမ်ကအမူးပြေမြက်မရောင်းတော့ရင် ထိုအရက်ထုတ်ကုန်များ အကြီးအကျယ်ကျဆင်းတော့မည်။

သို့ရာတွင် အမူး​ပြေမြက်ကအစွမ်းထက်လွန်းသောကြောင့် အရက်မကြိုက်သူများက မူးချင်ယောင်ဆောင်ရင်တောင် အမူး​ပြေမြက်ကရှိနေပြီ။

ဘယ်လောက်အဖြစ်ဆိုးလဲ တွေးသာကြည့်!

ဗီဒီယိုထဲကပြည်သူမှာ စိတ်ပျက်လက်ပျက်နှင့် သူ့သူငယ်ချင်းတွေက လူမဟုတ်​ကြောင်းပြောသည်။ တစ်ယောက်စီက ချင်းလင်အမူးပြေမြက်တစ်ထုပ်ကိုင်ထားပြီး သူတစ်သက်လုံးသောက်ခဲ့သမျှထက်ပိုပြီး တစ်ညလုံးသောက်ခိုင်းကြသည်။

ထိုဗီဒီယိုကြောင့် အတော်များများအကြံရသွားသည်။

"ငါတော့ ပျော်စရာတွေ့ပြီထင်တယ်!''

"ငါ့သူငယ်ချင်းထဲက မသောက်တတ်တဲ့သူကိုစဉ်းစားနေတာ!''

"သုံးခွက်နဲ့မှောက်တဲ့ကောင်ကို သတိရသွားပြီ... သူ့ကိုတစ်ညတည်း ၁၀ ခွက်တိုက်ရင်ရော?''



“……”

ထိုရေပန်းစားမှုအပြင် နောက်ထပ်ရေပန်းစားနေသောတစ်ခုကို အာရုံစိုက်မိကြပြန်သည်:

"ငါကိုယ်တိုင် အရက်သောက်ပြီး ချင်းလင်အမူးပြေမြက်တစ်ထုပ်စားကြည့်ပြီးပြီ... ခဏလေးနဲ့ပြေသွားမှာ... ပြီးတော့ မော်တော်ပီကယ်စစ်တာ လုံးဝမမိဘူး!''

ထိုဗီဒီယိုတင်သည်နှင့် ရုတ်ရုတ်သဲသဲဖြစ်ပြန်သည်။

အရင်တစ်ခါ အရက်သောက်၊ချင်းလင်အမူးပြေမြက်စားပြီး ကားမောင်းမယ့်အကြောင်းပြောဖူးသူတွေရှိသော်လည်း ထိုဗီဒီယိုကိုဖျက်ချခံရသည်။

အခုတော့ တကယ်စမ်းကြည့်သူရှိလာပြီ။

နောက်ပြီး ထိုဗီဒီယိုကိုတင်ထားသူက မာချင်ပင်။ ဗီဒီယိုတင်လိုက်သည်နှင့် လူတွေ့များပြီး like နှင့်မှတ်ချက်များတက်လာသည်။

"သော*က်ဘရို... ကိုယ့်လက်ဖက်ရည်ကိုယ်သာသောက်စမ်းပါ... အထဲကလက်ဖက်ရည်က အရသာမကောင်းဘူးနော်!''

"ဘရို... ခင်ဗျားက ဒုက္ခရှာတဲ့နေရာမှာဆရာကြီးပဲ!''

"ခင်ဗျား ကိုယ့်ကိုယ်ကိုယ်ပျက်စီးအောင်လုပ်နေတာလား ဒါမှမဟုတ် ထောင်ထဲတန်းတိုးနေတာလား?''

“……”

မှတ်ချက်များ ပလူပျံနေ၍ မာချင်လည်းစိတ်လှုပ်ရှားနေသည်။



သူ့ကိုယ်သူသေကြောင်းရှာမှန်းသိသော်လည်း တစ်ခါတလေ သေကြောင်းရှာတာ သဘာဝပင်။

မဟုတ်ရင် သေမင်းတံခါးဝသွားတယ်လို့ဘယ်ခေါ်မလဲ?

သူသေကြောင်းရှာတာ ဒီလိုစိတ်ဝင်စားခံရသောအခြေအနေမျိုးကိုသဘောကျသောကြောင့်ပင်။ သို့ရာတွင် တစ်ယောက်ပြီးတစ်ယောက် @ယာဉ်ထိန်းရဲဌာနဟုမှတ်ချက်ပေးနေ၍ သေ​ကြောင်းရှာပြီးမှ အန္တရာယ်ကင်းဖို့ဆုတောင်းမိပြန်သည်။

စိတ်အခြေအနေက ဆန့်ကျင်ဘက်အစွန်းနှစ်ဖက်ရောက်နေ၏။ သေကြောင်းရှာတယ်ဆိုပေမဲ့ တကယ်မသေချင်။

ထိုဗီဒီယိုထွက်ထွက်ချင်း ကားမောင်းမည့်သူများကျောထဲစိမ့်သွားကြသည်။ စိတ်ခံစားချက်တောင်မကောင်းတော့။

ဘာလို့ အလုပ်​ပြုတ်တော့မလိုခံစားနေရတာလဲ?

ထိုရေပန်းစားသတင်းကြောင့် တစ်ယောက်ပြီးတစ်ယောက်စမ်းသပ်လာကြသည်။ တချို့ကုမ္ပဏီများ၏စတော့စျေးအပေါ်လည်းသက်ရောက်မှုရှိလာသည်။

ယာဉ်မောင်းကုမ္ပဏီများပင်။

အရင်က အမူးပြေမြက်ကြောင့် အရက်ကုမ္ပဏီစတော့စျေးများ ထိုးတက်သွားသည်။

အခု DD ဝန်ဆောင်မှုရှိသောကုမ္ပဏီများ၏စတော့စျေးက ချင်းလင်အမူးပြေမြက်ကြောင့် စတင်ကျဆင်းလာသည်။ အထူးသဖြင့် ညီငယ်အသင်း DD ကုမ္ပဏီအတွက်ဆိုပိုမှန်သည်။

DD ကုမ္ပဏီရုံးချုပ်တွင် သူဌေးချန်မုရန်တစ်ယောက် နည်းနည်းဒုက္ခရောက်နေသည်။

လုံးဝထင်မထားသောကပ်ဘေးပင်။ DD ကားမောင်းလုပ်ငန်းက သူ့ကုမ္ပဏီမှာအလွန်အလုပ်ဖြစ်သော​ကြောင့် အချိန်တိုအတွင်း စတော့စျေးတောင်တက်ခဲ့သေးသည်။

ချင်းလင်အမူးပြေမြက်က သူ့ကုမ္ပဏီစတော့စျေးကို အရင်တက်ခဲ့တာထက်ပိုကျသွားအောင်လုပ်မယ်လို့ ဘယ်ထင်မလဲ?



ချန်မုရန် အတော်အောင့်သီးအောင့်သက်ဖြစ်နေသည်။ အရင်တစ်ခါ ဝက်ဝံကြီးကိုပိတ်ဆို့မှုတွင်ဝင်ပါခဲ့သောကြောင့် သူခြေလှမ်းမှားပြီး သပိတ်မှောက်ခံခဲ့ရသည်။ သူ့ကုမ္ပဏီစတော့စျေးက အကြီးအကျယ်ကျဆင်းခဲ့၏။

ဒီတစ်ခါ ကုမ္ပဏီစတော့စျေးကိုထပ်ကျခွင့်မပေးနိုင်။

ချန်မုရန်က ကြမ်းတော့မည့်ပုံနှင့် ချက်ချင်းတစ်ယောက်ယောက်ကိုဖုန်းဆက်ပြီးခေါ်လိုက်သည်။

ထိုသူက ကုမ္ပဏီ၏ပြည်သူ့ဆက်ဆံရေးမန်နေဂျာလူငယ်တစ်ယောက်ဖြစ်ပြီး DD အကြောင်း ပြည်သူ့အမြင်ကိုကြိုးကိုင်လေ့ရှိသူဖြစ်သည်။

ဘာပဲဖြစ်ဖြစ် သူကလျိုမိသားစုဘက်မှာရပ်တည်ခဲ့သည်။ အဆိုးမြင်တွေကိုရှောင်လွဲမရသောကြောင့် လျိုမိသားစုနှင့်ပြည်သူ့အမြင်ဆန့်ကျင်လာသောအခါ ပြည်သူ့ဆက်ဆံရေးဌာနက ပြည်သူနှင့်ဆက်ဆံရေးလုပ်ရန်လိုအပ်လာသည်။

ထို့ကြောင့် အရည်အချင်းရှိသောပြည်သူ့ဆက်ဆံရေးအဖွဲ့ကိုထူထောင်ရန် နှစ်တိုင်းအကုန်အကျခံရသည်။ ကုန်ကျစရိတ်က အလွန်မြင့်၏။

သို့သော် တခြားနည်းလမ်းမရှိ။ ရှင်းကျန့်တယ်ရဲ့ဗိုင်းရပ်ကို သူ့အဖေလိုအသိအမှတ်ပြုထားမှတော့ တချို့ပြဿနာတွေကိုရှောင်လွဲမရပေ။

"ဥက္ကဌချန်... ဘာညွှန်ကြားစရာရှိပါသလဲ?''

ပြည်သူ့ဆက်ဆံရေးမန်နေဂျာကဝင်ဝင်လာချင်း ချန်မုရန်ကိုမေးသည်။

ချန်မုရန်ကချက်ချင်းမှာသည်_

"ချင်းလင်အမူးပြေမြက်က ကုမ္ပဏီစတော့စျေးအပေါ်သက်ရောက်မှုရှိတာသိလား? ပြည်သူ့အမြင်ကိုချက်ချင်းထိန်းပါ... သောက်ပြီးမောင်းတဲ့အန္တရာယ်ဆိုတဲ့အချက်ကိုအသုံးချပြီး ချင်းလင်အမူးပြေမြက်ကိုဆန့်ကျင်လိုက်... အထက်လူတွေက ချင်းလင်အမူးပြေမြက်ကိုတားမြစ်လိုက်ရင် အကောင်းဆုံးပဲ... ငါတို့လက်ချက်မှန်း ဘယ်သူမှမသိစေနဲ့နော်!'

ဒါသူတို့ကုမ္ပဏီအကြပ်အတည်းကိုဖြေရှင်းနိုင်မည့်တစ်ခုတည်းသောနည်းလမ်းပင်။ ဒီချင်းလင်အမူးပြေမြက်ကိုဖြေရှင်းဖို့ ပြည်သူ့အမြင်ကိုအသုံးချနိုင်ရင်ကောင်းသည်။ ဒါဆိုရင် မမြင်နိုင်တဲ့အန္တရာယ်တွေကို လုံးဝဖယ်ရှားပြီးသားဖြစ်မည်။

"ကောင်းပါပြီ ဥက္ကဌချန်''

ပြည်သူ့ဆက်ဆံရေးမန်နေဂျာလည်း ညွှန်ကြားချက်ရပြီး ရုံးခန်းထဲမှထွက်လာသည်။ ထို့နောက် အင်တာနက်ရေတပ်နှင့်စတင်ဆက်သွယ်၏။

ပြည်သူ့အမြင်က သူတို့ကုမ္ပဏီအပေါ်မကောင်း၍ သူတို့ကိုပစ်မှတ်ထားသူအများကြီးရှိသော်လည်း ဒီလောကမှာ ငွေရရင်ဘာမဆိုလုပ်သူတွေကမရှား။

အာချောင်သူများက ဒီအတိုင်းပင်။ ပိုက်ဆံပေးပြီး DD ကုမ္ပဏီက မျိုးချစ်စိတ်အရှိဆုံးလို့ပြောခိုင်းရင် သူတို့ကလည်း အင်တာနက်ပေါ်မှာစကားလက်ဆင့်ကမ်းပြီး ပြည်သူ့အမြင်ကိုဖန်တီးပေးလိမ့်မည်။

မကြာမီ အင်တာနက်ပေါ်တွင် ချင်းလင်အမူးပြေမြက်မကောင်းကြောင်းပြောသူတွေရှိလာသည်။

"ချင်းလင်အမူးပြေမြက်ကို သက်ဆိုင်ရာက ကန့်သတ်ချက်တွေထားသင့်တယ်!''

"အရက်သောက်ပြီးကားမောင်းတာ ကားတိုက်တာတွေက ကြောက်စရာ... အမူးပြေမြက်က ဒါမျိုးတွေပိုဖြစ်လာလိမ့်မယ်''

"အမူးပြေမြက်ကြောင့် သောက်ပြီးမောင်းတာတွေပိုဆိုးမှာ... သက်ဆိုင်ရာဌာနတွေက တင်းတင်းကြပ်ကြပ်တားမြစ်သင့်တယ်!''

အချိန်တစ်ခုအထိ အင်တာနက်ပေါ်တွင် ချင်းလင်အမူးပြေမြက်ကြောင့် သောက်ပြီးမောင်းတာတွေဖြစ်လာမည့်အကြောင်း၊ဘေးဖြစ်နိုင်ကြောင်းမှတ်ချက်များပြည့်သွားလေသည်။