ကပ်ဘေးဒုက္ခ သားရဲကမ္ဘာ၊ ဝိညာဉ်ဖွဲ့တည်ခြင်း နှောင်းပိုင်းအဆင့်

ချီမင်က ကောင်းကင်ဘုံကြယ်တာရာသုံးဆယ့်ခြောက်ပညာရပ်ထဲက နက်နဲမှုတွေကို သေသေချာချာ လေ့လာနေတယ်။ ပြီးပြည့်စုံခြင်း အဆင့်ကို ရောက်သွားပြီးတဲ့နောက်မှာ အရင်ကနဲ့ တော်တော်လေး ကွာခြားသွားတာကို သူတွေ့လိုက်ရတယ်။ လျှို့ဝှက်နက်နဲနည်းစနစ်အမျိုးမျိုးနဲ့ အံ့ဖွယ်စွမ်းအားတွေကို သုံးတဲ့အခါ အရင်ကလို ခက်ခက်ခဲခဲနဲ့ ရှုပ်ရှုပ်ထွေးထွေး မဖြစ်တော့ဘူး။ ဒါ့အပြင် စွမ်းအားနဲ့ အကျိုးသက်ရောက်မှုကလည်း အရင်ကထက် အများကြီး ပိုပြင်းထန်လာတယ်။

အရေးကြီးဆုံးကတော့ ကောင်းကင်ဘုံကြယ်တာရာသုံးဆယ့်ခြောက်ပညာရပ်ထဲကထိပ်တန်းအဆင့်အံ့ဖွယ်စွမ်းအားနည်းစနစ်တချို့ကို ချီမင် စမ်းသုံးလို့ရသွားပြီ။ ဒါပေမဲ့ ချီမင့်ရဲ့ အနှစ်သာရ ဝိညာဉ် ဓမ္မစွမ်းအားက အဲ့ဒီအံ့ဖွယ်စွမ်းအားတွေကို အပြည့်အဝ ထောက်ပံ့ပေးဖို့ မလုံလောက်သေးတဲ့အတွက် တော်တော်လေးတော့ ခက်ခဲနေသေးတယ်။

တင်း!

“လက်ခံသူရဲ့ ကျင့်ကြံမှုအဆင့်ကဝိညာဉ်ဖွဲ့တည်ခြင်း အလယ်ပိုင်းအဆင့်ကို ရောက်ရှိနေတာကို တွေ့ရှိရပါတယ်။ အစောပိုင်းအဆင့် ဂိမ်းမြေအောက်စခန်းဖြစ်တဲ့ ကမ္ဘာပျက်နေ့ ကို ရှင်းလင်းလို့ရမယ့် ဆုလာဘ်တွေက အလွန်အမင်း နည်းပါးသွားပါပြီ။ အဆင့်နိမ့် အင်မော်တယ်သလင်းကျောက် (၁၀၀,၀၀၀) သုံးပြီး ဂိမ်းမြေအောက်စခန်းအသစ်ကို ဖွင့်နိုင်ပါတယ်။”

အသိပေးချက်တစ်ခု ပေါ်လာတယ်။

“အဆင့်နိမ့် အင်မော်တယ်သလင်းကျောက် (၁၀၀,၀၀၀) ဖြည့်လိုက်မယ်။”

ချီမင်က ပြောလိုက်တယ်။

တင်း!

“ဖြည့်သွင်းခြင်း အောင်မြင်ပါတယ်။”

“ဂိမ်းမြေအောက်စခန်းအသစ် ကပ်ဘေးဒုက္ခ သားရဲကမ္ဘာ ကို ဝင်ရောက်နိုင်ပါပြီ။”

နောက်ထပ် အသိပေးချက်တစ်ခု ပေါ်လာပြန်တယ်။

“ဝင်မယ်။” လို့ ချီမင် ပြောလိုက်တယ်။

ကပ်ဘေးဒုက္ခ သားရဲကမ္ဘာဆိုတဲ့ ဂိမ်းမြေအောက်စခန်းရဲ့ မြင်ကွင်းက ချီမင့်ရှေ့မှာ ပေါ်လာတယ်။အဲ့ဒီနေရာကိုတွေ့တော့၊ အဲ့ဒီဂိမ်းမြေအောက်စခန်းထဲကို တကယ်ဝင်သွားသလိုခံစားလိုက်ရတယ်။

ဂိမ်းမြင်ကွင်းထဲမှာ ချီမင်က အရာအားလုံးကို အပေါ်စီးကနေ မြင်နေရတဲ့ အခြေအနေနဲ့ ကပ်ဘေးဒုက္ခ သားရဲကမ္ဘာတစ်ခုလုံးကို ကြည့်နေတယ်။ အဲ့ဒီကမ္ဘာနဲ့ ပတ်သက်တဲ့ အချက်အလက်တွေအားလုံးက သူ့ရှေ့မှာ တစ်ခုပြီးတစ်ခု ပေါ်လာနေတယ်။

ဝေါင်း! ဝေါင်း! ဝေါင်း!

မြင်ကွင်းထဲမှာ ချီမင်က ဧရာမ သားရဲကြီးတွေရဲ့ ဟိန်းသံကို ကြားနေရပြီး ကောင်းကင်နဲ့ မြေကြီးကြားမှာ ပျံသန်းသွားလာနေတဲ့ ကပ်ဘေးဒုက္ခ သားရဲ ကြီးတွေရဲ့ ပုံရိပ်တွေကိုလည်း တွေ့နေရတယ်။ မြင်ကွင်းက တော်တော်လေးကိုထိတ်လန့်ဖို့ကောင်းတယ်။

ကပ်ဘေးဒုက္ခ သားရဲကမ္ဘာမှာ သက်ရှိအမျိုးအစား တစ်မျိုးပဲရှိတယ်။

သူတို့ကို ကပ်ဘေးဒုက္ခ သားရဲ လို့ ခေါ်တယ်။

ကပ်ဘေးဒုက္ခ သားရဲကမ္ဘာမှာ ကမ္ဘာ့စည်းမျဉ်းတွေရဲ့ အကျိုးသက်ရောက်မှုကြောင့် ကပ်ဘေးဒုက္ခအမျိုးမျိုး ပေါ်ပေါက်လာတယ်။ မီး၊ ရေ၊ လေ၊ မြေငလျင်၊ မိုးကြိုးမုန်တိုင်း တွေရှိတယ်။ ကပ်ဘေးဒုက္ခအမျိုးမျိုး ပေါက်ကွဲပြီးတဲ့နောက် ကပ်ဘေးဒုက္ခ သားရဲကမ္ဘာရဲ့ စည်းမျဉ်းတွေကြောင့် အဲ့ဒီကပ်ဘေးဒုက္ခတွေက မတူညီတဲ့ ကပ်ဘေးဒုက္ခ သားရဲတွေအဖြစ် ပြောင်းလဲသွားကြတယ်။ သူတို့က ကြီးမားပြီး ပြင်းထန်တဲ့ စွမ်းအားတွေ ပိုင်ဆိုင်ထားတယ်။

ဥပမာပြောရရင် မီးကပ်ဘေးဒုက္ခ ဖြစ်ပြီးနောက်မှာ မီးတောက်တွေကနေ မီးကပ်ဘေးဒုက္ခ သားရဲတွေ ဖြစ်လာပြီး ကမ္ဘာထဲမှာ သွားလာကြတယ်။ ရေကပ်ဘေးဒုက္ခ ဖြစ်ပြီးရင်လည်း ရေကပ်ဘေးဒုက္ခ သားရဲတွေ ပေါ်လာတယ်..

နောက်ထပ် သဘာဝဘေးအန္တာရာယ်အမျိုးမျိုးလည်း ရှိသေးတယ်။

မတူညီတဲ့ ကပ်ဘေးဒုက္ခ သားရဲတွေ မွေးဖွားလာကြတယ်။

မွေးဖွားလာတဲ့ ကပ်ဘေးဒုက္ခ သားရဲတွေက ပျောက်ကွယ်မသွားဘဲ အချင်းချင်း တိုက်ခိုက်ကြတယ်။ အားကြီးတဲ့ ကပ်ဘေးဒုက္ခ သားရဲက အားနည်းတဲ့ သားရဲကို ဝါးမျိုပြီး ပိုပြီး သန်မာလာနိုင်တယ်။ နောက်ဆုံးမှာတော့ ကပ်ဘေးဒုက္ခ သားရဲတွေရဲ့ အရှင်တောင် ဖြစ်လာနိုင်တယ်။

အခု ချီမင်ရဲ့ ဂိမ်းဇာတ်ကောင်က ဒီ ကပ်ဘေးဒုက္ခ သားရဲကမ္ဘာထဲကို ရောက်လာပြီ။ ဒီဂိမ်းမြေအောက်စခန်းကို အောင်မြင်ဖို့ဆိုရင် ကပ်ဘေးဒုက္ခ အရှင်ကို ရှာပြီး ဖျက်ဆီးပစ်ရမယ်။

“ကပ်ဘေးဒုက္ခ သားရဲ... ဒီဂိမ်းမြေအောက်စခန်းက တော်တော်စိတ်ဝင်စားဖို့ကောင်းတာပဲ။” ချီမင် တစ်ခဏလောက် စဉ်းစားလိုက်တယ်။

ချီမင် ပြောင်းလဲထားတဲ့ ဂိမ်းဇာတ်ကောင်က စွမ်းအားကြီးတဲ့ ကျင့်ကြံသူတစ်ယောက်ဖြစ်တယ်။ ဒီကမ္ဘာထဲကို ရောက်ပြီးတာနဲ့ သူက ကပ်ဘေးဒုက္ခ အရှင် ဘယ်မှာရှိလဲဆိုတာကို စပြီး ရှာတော့တယ်။

ကပ်ဘေးဒုက္ခ အရှင်က စွမ်းအားကြီးပြီး လျှို့ဝှက်ဆန်းကြယ်တယ်။ ဖမ်းရခက်တော့ချီမင်ရဲ့ ဂိမ်းဇာတ်ကောင်က အလွယ်တကူ ရှာမတွေ့နိုင်ဘူး။

ဒါပေမဲ့ ကပ်ဘေးဒုက္ခ အရှင်ကို ရှာနေတုန်းမှာပဲ သူက ကပ်ဘေးဒုက္ခ သားရဲအမျိုးမျိုးနဲ့ ကြုံတွေ့ခဲ့ရတယ်။ သူတို့ တစ်ခါမှမမြင်ဖူးတဲ့ သတ္တဝါဖြစ်တဲ့ ချီမင့်ကို ကပ်ဘေးဒုက္ခ သားရဲတွေက အရမ်း စူးစမ်းချင်ကြပြီး စမ်းသပ်ချင်နေကြတယ်။

“သေစမ်း!”

ချီမင်က သနားညှာတာမှုမရှိဘဲ တိုက်ခိုက်လိုက်တယ်။ ဓားချီတွေက သူ့ပတ်ပတ်လည်မှာ ဝန်းရံနေပြီး သူ့ရဲ့ဓမ္မစွမ်းအားနဲ့ ခန္ဓာကိုယ်ကို ကာကွယ်ထားတယ်။ သူ့ကို လာစမ်းသပ်ချင်တဲ့ သားရဲကြီးတွေကို ချီမင်က အကုန် သတ်ပစ်လိုက်တယ်။

အချိန်တွေ တဖြည်းဖြည်းကုန်လွန်လာတယ်။

ချီမင်က လမ်းတစ်လျှောက်မှာ ကပ်ဘေးဒုက္ခ သားရဲတွေကို အများကြီး သတ်ဖြတ်ခဲ့တဲ့အတွက် ရုတ်ရုတ်သဲသဲ အကြီးအကျယ်ဖြစ်ပြီး ကပ်ဘေးဒုက္ခ အရှင်ရဲ့ အာရုံစိုက်မှုကို ခံလိုက်ရတယ်။

နောက်ဆုံးမှာတော့ ကပ်ဘေးဒုက္ခ အရှင်ထွက်ပေါ်လာတယ်။

ဝေါင်း!

ဒုန်း!!!

မြေကြီးတွေ တုန်ခါပြီး ကောင်းကင်တစ်ခုလုံး ကွဲအက်သွားတယ်။

တစ်ခဏအတွင်းမှာပဲ ကပ်ဘေးဒုက္ခအငွေ့အသက်မျိုးစုံက ပေါက်ကွဲထွက်လာပြီး ကောင်းကင်ပေါ်မှာ မယုံနိုင်လောက်အောင် ကြီးမားတဲ့ သားရဲကြီးတစ်ကောင် ဆင်းသက်လာတယ်။ သူ့ရဲ့ ကြောက်မက်ဖွယ်ကောင်းတဲ့ ခန္ဓာကိုယ်ကြီးက ဖိအားအကြီးအကျယ်ကို ဖြစ်ပေါ်စေတယ်။

“ကပ်ဘေးဒုက္ခ အရှင်...”

ချီမင်က ခေါင်းမော့ပြီး ကပ်ဘေးဒုက္ခ အရှင်ကို တစ်ချက်ကြည့်လိုက်တယ်။ သူ့ရဲ့ ပုံသဏ္ဌာန်အပြည့်အစုံကို မမြင်ရပေမယ့်လည်း တော်တော်လေးကို တုန်လှုပ်စရာကောင်းနေပြီ။

“မဟာကပ်ဘေးဒုက္ခနည်းစနစ်။”

နောက်တစ်ခဏမှာပဲ ချီမင် တိုက်ခိုက်လိုက်တယ်။ သူက ညာဘက်လက်ကို မြှောက်ပြီး မဟာကပ်ဘေးဒုက္ခနည်းစနစ်ရဲ့ အံ့ဖွယ်စွမ်းအားကို ထုတ်သုံးလိုက်တယ်။ သူ့ရဲ့ ဓမ္မစွမ်းအားတွေ လည်ပတ်သွားပြီး ကမ္ဘာပေါ်က အသင်္ချေကပ်ဘေးဒုက္ခချီက ဝဲဂယက်တစ်ခုလို စုစည်းသွားတယ်။

ဘုန်း!

ပေါက်ကွဲသံကြီးတစ်ခု ထွက်ပေါ်လာတယ်။

မဟာကပ်ဘေးဒုက္ခနည်းစနစ်ကနေ ပြောင်းလဲဖြစ်ပေါ်လာတဲ့ ကပ်ဘေးဒုက္ခစွမ်းအင်တွေက ကပ်ဘေးဒုက္ခမြင်ကွင်းအမျိုးမျိုးနဲ့အတူ ထိုးထွက်သွားပြီး ကပ်ဘေးဒုက္ခ အရှင်ရဲ့ ခေါင်းပေါ်ကို တည့်တည့် ကျရောက်သွားတယ်။

ဝေါင်း! ဝေါင်း!

ကပ်ဘေးဒုက္ခ အရှင်ကထိတ်လန့်သွားတယ်။ သူ့အသက်အန္တရာယ်ကို သူခံစားမိလိုက်ပေမယ့် လွတ်မြောက်ဖို့ မဖြစ်နိုင်တော့ဘူး။ မဟာကပ်ဘေးဒုက္ခနည်းစနစ်ရဲ့ စွမ်းအားက ကပ်ဘေးဒုက္ခ အရှင် ရဲ့ကိုယ်ပေါ်မှာ ကပ်တွယ်သွားပြီ။

သိပ်မကြာခင်မှာပဲ ကြောက်မက်ဖွယ်ကောင်းပြီးကြီးမားတဲ့ကပ်ဘေးဒုက္ခ အရှင်၊ ကပ်ဘေးဒုက္ခ သားရဲကမ္ဘာရဲ့ အသန်ဆုံးဘုရင်ကမဟာကပ်ဘေးဒုက္ခနည်းစနစ် ရဲ့ စွမ်းအားကြောင့် ပြာမှုန်ဖြစ်ပြီး လုံးဝ သေဆုံးသွားတယ်။

ဒီလိုနဲ့ ချီမင်က ကပ်ဘေးဒုက္ခ သားရဲကမ္ဘာကို အောင်အောင်မြင်မြင် ရှင်းလင်းနိုင်လိုက်တယ်။

တစ်ရက်ကုန်သွားတယ်။

တင်း!

“ကပ်ဘေးဒုက္ခ သားရဲကမ္ဘာ ဂိမ်းမြေအောက်စခန်းထဲမှာ တစ်ရက်ကြာ အလိုအလျောက်ကျင့်ကြံခြင်းလုပ်ပြီး တစ်ကြိမ် အောင်မြင်စွာ ရှင်းလင်းနိုင်ခဲ့ပါတယ်။ သင်ကပ်ဘေးဒုက္ခ အရှင်ပေါက်တစ်ကောင် နှင့် အဆင့်နိမ့် အင်မော်တယ်သလင်းကျောက် ဆယ်သန်းရရှိပါတယ်။”

အသိပေးချက်တစ်ခု ပေါ်လာတယ်။

“ဒါက...”

ချီမင်ကပြောလိုက်တယ် “နောက်ထပ် ဝိညာဉ်သားရဲတစ်ကောင်လား”

ရှားပါး ဝိညာဉ်သားရဲ: ကပ်ဘေးဒုက္ခ အရှင်ပေါက်။

ဖော်ပြချက်: ကပ်ဘေးဒုက္ခ သားရဲကမ္ဘာ ဂိမ်းမြေအောက်စခန်းမှ ရရှိသော ရှားပါး ဝိညာဉ်သားရဲဖြစ်ပါတယ်။ ကပ်ဘေးဒုက္ခအမျိုးမျိုးရဲ့ စွမ်းအားတွေ ပါဝင်ပြီး ကပ်ဘေးဒုက္ခ အရှင်အဖြစ် မွေးမြူနိုင်ပါတယ်။ ကြီးထွားနိုင်စွမ်း အလွန်မြင့်မားပြီး အမြင့်ဆုံး အတိဒုက္ခကျော်လွှားခြင်းအဆင့်အထိ ရောက်ရှိနိုင်ပါတယ်။

“ရှားပါး ဝိညာဉ်သားရဲ...”

ချီမင့်ရဲ့ မျက်နှာမှာ ပျော်ရွှင်မှုတွေ ပြည့်နှက်သွားတယ်။ “ဒါ့အပြင် သူ့ရဲ့ ကြီးထွားနိုင်စွမ်းက သေမင်းထက်တောင် ပိုမြင့်တယ်။ အတိဒုက္ခကျော်လွှားခြင်း အဆင့်အထိ ရောက်နိုင်တာပဲ။”

“အဆင့်နိမ့် အင်မော်တယ်သလင်းကျောက် (၁,၀၀၀) ဖြည့်လိုက်မယ်။”

ချီမင်က “ဆဋ္ဌမမြောက် ဝိညာဉ်သားရဲနေရာကို ဖွင့်မယ်။” လို့ ပြောလိုက်တယ်။

တင်း!

“ဖြည့်သွင်းခြင်း အောင်မြင်ပါတယ်။”

“ဆဋ္ဌမမြောက် ဝိညာဉ်သားရဲနေရာကို အောင်မြင်စွာ ဖွင့်ပြီးပါပြီ။”

အသိ ပေးချက်တစ်ခု ပေါ်လာတယ်။

ချီမင်က သူ့ရဲ့ ပစ္စည်းစာရင်းကို ဖွင့်ပြီး ခုနကရထားတဲ့ ရှားပါး ဝိညာဉ်သားရဲ: ကပ်ဘေးဒုက္ခ အရှင်ပေါက်ကို ရှာလိုက်တယ်။ ပြီးတော့ အဲ့ကောင်ကို ဆင့်ခေါ်လိုက်တယ်။

ဝေါင်း! ဝေါင်း!

ကပ်ဘေးဒုက္ခ အရှင် သားပေါက်လေး ပေါ်လာတယ်။ အရွယ်အစားက သိပ်မကြီးဘဲ အရွယ်ရောက်ပြီးသား ခွေးတစ်ကောင်လောက်ပဲရှိတယ်။ ဒါပေမဲ့ ပုံစံနဲ့ အမူအရာကတော့ တော်တော်လေး ကွာခြားတယ်။

ကပ်ဘေးဒုက္ခ အရှင် သားပေါက်လေးရဲ့ ပုံစံက (၃၀)% က ခြင်္သေ့နဲ့တူတယ်၊ (၂၀)% က ကျားနဲ့တူပြီး (၅၀)% ကတော့ ဒဏ္ဍာရီလာ သားရဲ ချီလင် နဲ့ တူတယ်။

ဒီသားပေါက်လေးက အရင် သေမင်းပေါက်တုန်းကလို ထွက်မပြေးဘူး။ အပြင်ရောက်တာနဲ့ ချက်ချင်းပဲ ချီမင့်နားကို ချဉ်းကပ်လာပြီး ခွေးလေးတစ်ကောင်လို သူ့ပတ်လည်မှာ လှည့်ပတ်နေတယ်။ တော်တော်လေး ရင်းနှီးခင်မင်တဲ့ပုံပေါ်ပြီး မျက်နှာချိုသွေးနေတယ်။

ဒါက ချီမင်က မဟာကပ်ဘေးဒုက္ခနည်းစနစ်ကို ကျွမ်းကျင်ထားလို့ဖြစ်တယ်။ ဒါ့အပြင် ကပ်ဘေးဒုက္ခ အရှင် သားပေါက်လေးက ကပ်ဘေးဒုက္ခအမျိုးမျိုးကနေ မွေးဖွားလာတာဆိုတော့ မဟာကပ်ဘေးဒုက္ခနည်းစနစ်ကို ကျင့်ကြံတဲ့ ချီမင့်ကို သဘာဝအတိုင်း ရင်းနှီးတာဖြစ်တယ်။

ပြီးတော့ ချီမင်က ကပ်ဘေးဒုက္ခ အရှင် သားပေါက်ရဲ့ စွမ်းအားကို စမ်းသပ်ကြည့်လိုက်တယ်။ သားပေါက်လေးပဲ ရှိသေးပေမယ့် သူ့မှာသင့်တော်တဲ့ အင်အားတွေရှိပြီး သေမင်းပေါက်တုန်းကထက်တောင် ပိုပြင်းထန်တယ်။

“မဆိုးဘူးပဲ။”

ချီမင် ကျေနပ်စွာနဲ့ ခေါင်းညိတ်လိုက်တယ်။

ရှပ်!

ချီမင်က ညာဘက်လက်နဲ့ ဓားဆွဲထုတ်ပြီး ဘယ်ဘက်လက်ညှိုးကို ခြစ်လိုက်တယ်။ ဒဏ်ရာတစ်ခုဖြစ်သွားပြီး ရွှေရောင်သွေး တစ်စက် စိမ့်ထွက်လာတယ်။

သူက လက်ကို အသာလေး ဝှေ့ယမ်းလိုက်တော့ လက်ညှိုးပေါ်က သွေးစက်က ကပ်ဘေးဒုက္ခ အရှင်သားပေါက်ဆီကို ပျံသန်းသွားပြီး သားပေါက်လေးရဲ့ ခန္ဓာကိုယ်ထဲကို ပေါင်းစပ်ဝင်ရောက်ကာ ချီမင့်ရဲ့ ဝိညာဉ်သားရဲ ဖြစ်သွားတယ်။

အခုဆို ချီမင်က ကပ်ဘေးဒုက္ခ အရှင် သားပေါက်လေးရဲ့ ရှင်သန်ခြင်းနဲ့ သေခြင်းကို အပြည့်အဝ ထိန်းချုပ်နိုင်သွားပြီ။

တင်း!

“လက်ခံသူ ရှားပါး ဝိညာဉ်သားရဲ: ကပ်ဘေးဒုက္ခ အရှင်ပေါက် ကို ရရှိသည့်အတွက် ဂုဏ်ယူပါတယ်။”

အသိပေးချက်တစ်ခု ပေါ်လာတယ်။

“သ...သခင်... သခင်...”

ကပ်ဘေးဒုက္ခ အရှင်ပေါက်လေးရဲ့ အသံက ချီမင့်စိတ်ထဲမှာ ပေါ်လာတယ်။ အသံထဲမှာ ကြောက်ရွံ့မှုလေး ပါနေပေမယ့် ရင်းနှီးခင်မင်တဲ့ ခံစားချက်က သူ့ရဲ့ စိတ်အခြေအနေကို ဖော်ပြနေတယ်။

ချီမင်ကပြောလိုက်တယ် “ဒီနေ့ကစပြီး မင်းနာမည်က ကပ်ဘေးဒုက္ခလေး ပဲ။”

“ဟုတ်ကဲ့ပါ သခင်။”

ကပ်ဘေးဒုက္ခ အရှင်ပေါက်လေးက ပြန်ဖြေတယ်။ သူ နည်းနည်း ပျော်ရွှင်ပြီး ဝမ်းသာသွားပုံ‌ ပေါ်တယ်။ ကပ်ဘေးဒုက္ခလေး ဆိုတဲ့ နာမည်က ချီမင် လွယ်လွယ်ကူကူ ပေးလိုက်တာဖြစ်ပေမယ့် နာမည်တစ်ခု ရလိုက်တဲ့အတွက် သူ ပျော်နေတာ ထင်ရှားတယ်။

“ကဲ... ဝိညာဉ်သားရဲနေရာကို သွားပြီး ကြီးထွားလိုက်တော့။” ချီမင်က ပြောလိုက်တယ်။

“ဟုတ်ကဲ့ပါ သခင်။” ကပ်ဘေးဒုက္ခလေးက ပြန်ဖြေတယ်။

“ထိပ်တန်းအဆင့်ဝိညာဉ်ကျောက်တုံး (၁၀,၀၀၀)ဖြည့်မယ်။”ချီမင်ကပြောတယ် “ရှားပါး ဝိညာဉ်သားရဲ: ကပ်ဘေးဒုက္ခ အရှင်ပေါက်ကို အလိုအလျောက်ကျင့်ကြံခြင်းလုပ်မယ်။”

တင်း!

“ဖြည့်သွင်းခြင်း အောင်မြင်ပါတယ်။”

“ရှားပါး ဝိညာဉ်သားရဲ: ကပ်ဘေးဒုက္ခ အရှင် သားပေါက်က အဆသန်းတစ်ရာ မြှင့်တင်မှုအောက်တွင် ကြီးထွားနေပါတယ်...”

အသိပေးချက်တစ်ခု ပေါ်လာတယ်။

မျက်စိတစ်မှိတ်အတွင်းမှာပဲ နွေဦးကုန်လို့ ဆောင်းရောက်လာတယ်။

အချိန်တွေ တရွေ့ရွေ့ ကုန်ဆုံးသွားတယ်။

မသိလိုက်မသိဘာသာနဲ့ နှစ်ပေါင်း (၄၀၀) ကြာသွားတယ်။

ဒီနေ့... နေ့လည်ချိန်မှာ...

နေက တောက်ပစွာ ထွန်းလင်းနေတယ်။

ချီမင် တစ်စုံတစ်ခုကို ခံစားလိုက်ရတယ်။ သူ ကျင့်ကြံလာတာ နှစ်ပေါင်း (၄၀၀) ရှိပြီ။ အဆသန်းတစ်ရာ မြှင့်တင်မှုနဲ့ တွက်ရင် သူ သန့်စင်ခြင်းသုံးပါးတာအိုကျမ်းကို နှစ်ပေါင်း ဘီလီယံ (၄၀) လောက် ကျင့်ကြံခဲ့တာနဲ့တူတယ်။

ဒါကတော့ ချဲ့ကားပြောတာဖြစ်တယ်။

ဒါပေမဲ့ အဆသန်းတစ်ရာ မြှင့်တင်ထားတဲ့ အခြေအနေအောက်မှာ နှစ် (၄၀၀) ကြာ ကျင့်ကြံတာက တကယ်ပဲ နှစ်ပေါင်း ဘီလီယံ (၄၀) ကြာ ကျင့်ကြံခဲ့တာလို့ မဆိုလိုဘူး။ မြှင့်တင်မှုအခြေအနေဆိုတာ သူ့ရဲ့ အလိုအလျောက်ကျင့်ကြံခြင်း အရှိန်ကို မြှင့်တင်ပေးတဲ့ အခြေအနေတစ်ခုပဲဖြစ်တယ်။

ဒါတောင်မှ အရမ်းကို လွန်နေပြီ။

တင်း!

“သန့်စင်ခြင်းသုံးပါးတာအိုကျမ်းကို အဆသန်းတစ်ရာ မြှင့်တင်မှုအောက်တွင် နှစ်ပေါင်း (၄၀၀) ကြာ ကျင့်ကြံခဲ့ပြီးပါပြီ။ ဂုဏ်ယူပါတယ် လက်ခံသူ။ သင်ဟာ ပိုမိုနက်ရှိုင်းတဲ့ ကောင်းကင်နဲ့မြေကြီး မဟာတာအိုကို နားလည်သဘောပေါက်ခဲ့ပြီး ကောင်းကင်နဲ့မြေကြီး မဟာတာအို ပုံစံများကို ထွင်းထုနိုင်ခဲ့ပါပြီ။ ကောင်းကင်နဲ့မြေကြီး မဟာတာအို အပေါ် သင်၏ နားလည်နိုင်စွမ်း ပိုမိုတိုးတက်လာပြီး သန့်စင်ခြင်းသုံးပါးတာအိုကျမ်း ရဲ့ လျှို့ဝှက်နက်နဲမှုအားလုံးကို နားလည်သဘောပေါက်ကာ ပြီးပြည့်စုံခြင်းအဆင့်သို့ ရောက်ရှိသွားပါပြီ။ ကောင်းကင်နဲ့မြေကြီး မဟာတာအို အနှစ်သာရ ဝိညာဉ်ကလည်း အားကောင်းလာပြီးပြီးပြည့်စုံခြင်းအဆင့်သို့ရောက်သွားပါပြီ။ အခြေတည်ဝိညာဥ်နဲ့ ပေါင်းစပ်ပြီး အောင်မြင်စွာ အဆင့်တက်နိုင်ခဲ့ပါပြီ။ သင်၏ ကျင့်ကြံမှုအဆင့်က ဝိညာဉ်ဖွဲ့တည်ခြင်း နှောင်းပိုင်းအဆင့်သို့ ရောက်ရှိသွားပါပြီ။”

အသိပေးချက်တစ်ခု ပေါ်လာတယ်။

ချီမင့်ရဲ့ ကျင့်ကြံမှုအဆင့် နောက်တစ်ခါ တက်သွားပြန်ပြီ။

သူ မျက်လုံးတွေကို မှိတ်ပြီး နားလည်သဘောပေါက်မှုအမျိုးမျိုးထဲကို ဝင်ရောက်လိုက်တယ်။ သန့်စင်ခြင်းသုံးပါးတာအိုကျမ်းရဲ့ နက်နဲမှုအားလုံးကို သူ နားလည်သဘောပေါက်သွားပြီ။ ကျမ်းစာသံအမျိုးမျိုးက ချီမင့်ရဲ့ နားထဲမှာ ပဲ့တင်ထပ်နေတယ်။

သန့်စင်ခြင်းသုံးပါးတာအိုကျမ်း က ပြီးပြည့်စုံခြင်း အဆင့်ကို ရောက်သွားပြီ။

ဘုန်း!

ချီမင့်ရဲ့ တစ်ကိုယ်လုံး တုန်ခါသွားတယ်။

သူ့ရဲ့ ကျင့်ကြံမှုအဆင့် အောင်မြင်စွာ ချိုးဖြတ်သွားတယ်။ သူ့ရဲ့ အရှိန်အဝါနဲ့ အငွေ့အသက်တွေက ကန့်သတ်ချက်ကို ကျော်လွှားပြီး ဝိညာဉ်ဖွဲ့တည်ခြင်း နှောင်းပိုင်းအဆင့်ကို ရောက်သွားတယ်။ သူ့ရဲ့ အနှစ်သာရ ဝိညာဉ် ဓမ္မစွမ်းအားတွေကလည်း ကြီးကျယ်ခမ်းနားလာပြီး သူ့ရဲ့ အင်အားကလည်း သဘာဝအတိုင်း တိုးတက်လာတယ်။

ချက်ချင်းပဲ ချီမင်က သူ့ရဲ့ကျင့်ကြံမှုကို ခိုင်မာအောင် လုပ်လိုက်တယ်။

“သန့်စင်ခြင်းသုံးပါးတာအိုကျမ်းက ပြီးပြည့်စုံသွားပြီ။”

ချီမင် ကျင့်ကြံမှုအခြေအနေကနေ ပြန်ထွက်လာပြီးစဉ်းစားလိုက်တယ် “ငါ့ရဲ့ကျင့်ကြံမှုအဆင့်ကလည်း ဝိညာဉ်ဖွဲ့တည်ခြင်းနှောင်းပိုင်းအဆင့်ကို ရောက်သွားပြီ။ ဒီလိုဆိုရင်သန့်စင်ခြင်းသုံးပါးတာအိုကျမ်းကို ဆက်ပြီး ကျင့်ကြံလို့မရတော့ဘူး။ ဒါကြောင့် သန့်စင်ခြင်းသုံးပါး အခြေတည်ဝိညာဥ်ကို တာအိုပေါင်းစည်းခြင်းအဆင့်ထဲ ဝင်နိုင်အောင်လုပ်ပေးမယ့် မဟာတာအို နည်းစနစ်တစ်ခုကို ငါရှာရတော့မယ်”