ပြန်လည်ကြိုဆိုပါ၏

ရှားလော့ခ်သည် အပ်ဒိတ်အကြောင်းအရာများ၊ ဆောက်လုပ်ရေးမစ်ရှင်များ၏ ပြင်ဆင်ချက်များနှင့် ကိုယ်ပိုင်မြေနေရာများ၏ အသေးစိတ်အချက်အလက်များကို သေချာစွာ စဉ်းစားရမည် ဖြစ်၏။

ရှားလော့ခ်သည် ဂိမ်းမာများ လမ်းကြောင်းရှာ၍ အခွင့်ကောင်းယူတတ်ပုံကို ကြုံတွေ့ခဲ့ရသည်။ သူ၏စီမံချက်များထဲမှ တစ်ခုခုကို သေချာမစဉ်းစားမိခဲ့ပါက ဂိမ်းမာများသည် အံ့ဩဖွယ်ရာ တစ်စုံတစ်ရာကို လုပ်ဆောင်ကြလိမ့်မည်။

သူ ခုလေးတင် တွေ့မြင်ခဲ့သော လူနေရပ်ကွက်များကဲ့သို့ပင်။ အကယ်၍ ဂိမ်းမာတစ်ယောက်က ဆွေးနွေးချက်ဖိုရမ်တွင် အိမ်တစ်လုံးဆောက်ရန် မြေနေရာများ ပေါင်းစပ်ခြင်းအကြောင်းကို မဖော်ပြခဲ့ဘဲ သူကိုယ်တိုင် သွားမကြည့်ဖြစ်ခဲ့လျှင် ဆယ်ရက်အတွင်း အိမ်ကြီးတစ်လုံး၏ ပုံကြမ်းတစ်ခုလုံး ပြီးစီးသွားနိုင်ချေရှိသည်။

ဂိမ်းမာများသည် ဒန်ဂျင်တိုးတက်ရေးအတွက်သုံးသော ကိရိယာများကို သူတို့၏အိမ်ဆောက်ရန် အသုံးပြုကြလိမ့်မည်သာ။

ရှားလော့ခ်သည် အချိန်အနည်းငယ်ယူ၍ စဉ်းစားပြီးနောက် အောက်ပါဖြည့်စွက်ချက်ကို ကြေညာလိုက်၏။

"တစ်။ ကိုယ်ပိုင်မြေနေရာ ဆောက်လုပ်ရေးဆိုင်ရာ ပြဿနာကို ပြင်ဆင်ထားသည်။ ဂိမ်းမာများကို မြေပေါ်မြေအောက် အဆင့် ၂ နှင့် ၃ အထိ ယာယီဆောက်လုပ်ခွင့်ပြုသည်။ တစ်ဆင့်လျှင် ဂိမ်းမာတစ်ဦးအတွက် နှစ်စတုရန်းမီတာကို ငွေဒင်္ဂါးတစ်ပြားဖြင့် ခွင့်ပြုသည်။ နောင်တွင် ဆောက်လုပ်ရန် မြေနေရာများကို ဈေးနှုန်းတိုးမြှင့်မှုများနှင့်အတူ ထပ်မံထုတ်ပေးသွားမည်။

နှစ်။ နေ့စဉ်ဆောက်လုပ်ရေးမစ်ရှင်၏ အခြေအနေများကို ပြင်ဆင်ထားသည်။ ဆင်းဘထံမှ ကိရိယာများကို အပတ်စဉ် ငှားရမ်းနိုင်သော ဝန်ဆောင်မှု ထပ်ထည့်ထားသည်။"

ဂိမ်းမာများ လမ်းကြောင်းရှာ၍ အခွင့်အရေးမယူနိုင်စေရန် ရှားလော့ခ်သည် ဖြည့်စွက်ချက်ကို မထုတ်ပြန်မီ သေချာစွာ စစ်ဆေးခဲ့သည်။

ဂိမ်းမာများသည် ဗားရှင်းအသစ်ဖြစ်သော ဝိညာဉ်စစ်တပ်အကြောင်း ဆွေးနွေးနေကြပြီး အော့ဖ်လိုင်းပြုပြင်ထိန်းသိမ်းမှု နှစ်ရက်ကြာမြင့်သည်ကို ညည်းညူနေကြ၏။ ရှားလော့ခ် အပ်ဒိတ်အသစ်များ ထုတ်ပြန်လိုက်သောအခါ ဂိမ်းမာများသည် စိတ်လှုပ်ရှားစွာ မှတ်ချက်ပေးကြတော့သည်။

[မြေပိုင်ရှင်မော့လီလီ - ဒါက ဘာလဲ။ ဂိမ်းမာတွေ ချို့ယွင်းချက်တစ်ခုကို ရှာတွေ့သွားတာလား။ မစ်ရှင်ကို တမင်ဆွဲထားပြီး အပိုပစ္စည်းတစ်ခု ရလိုက်တာလား။ အဲ့ဒီပစ္စည်းက တိုက်ခိုက်လို့ရလား။]

[တတိယမျိုးဆက် ဥရောပဘုရင်၏ အံ့ဖွယ် - ဒုက္ခပါပဲ၊ ဘီတာဂိမ်းမာတွေ အဆောက်အအုံတစ်ခုကို အတူတူဆောက်ခဲ့ကြတယ်လို့ ခုမှသိရတယ်။ အခုတော့ ဂိမ်းတာဝန်ရှိသူတွေက ကန့်သတ်လိုက်ပြီလား။]

[တိမ်လွှာခုန်ပျံ ဖယ်ရီ - ဖိုရမ်စီမံသူကြီးလား။]

[လူဝံဥယျာဉ် - စီမံသူကြီး၊ အားတင်းထားပါ။]

[တိမ်စူးစိုက်ကြည့်သူ နှင်းပုံ - စီမံသူကြီး၊ အားတင်းထားပါ။]

[ပင်လယ်စာရေခဲခြစ် - ထပ်ခါထပ်ခါတွေ မပြောကြနဲ့တော့လေ။ (‘v`)]

...

ဂိမ်းမာအများစု "စီမံသူကြီး၊ အားတင်းထားပါ"ဟု ပြောနေကြသည်ကို မြင်သောအခါ ရှားလော့ခ် စိတ်သက်သာရာရသွားသည်။ ထိုမှတ်ချက်အတွက် သူ ကျေနပ်မိ၏။

ရှားလော့ခ်သည် ဝင်ပေါက်ကို တည်ဆောက်နေသော အလုပ်သမားများကို တစ်ချက်ကြည့်ပြီးနောက် သူ၏ တရားဝင်အလုပ်များကို ပြန်လည်လုပ်ဆောင်လေသည်။

["လူ့အဖွဲ့အစည်း ၆" စတင်ပြီ။ နောက်တစ်လှည့်၊ စလိုက်တော့။]

...

"အရှင်ရှားလော့ခ်။ အရှင်ရှားလော့ခ်။"

ဘရု၏အသံ ရှားလော့ခ်၏စိတ်ထဲတွင် ပေါ်လာသောအခါ သူ ထိတ်လန့်သွားပြီး "လူ့အဖွဲ့အစည်း ၆" ၏ သတင်းအချက်အလက်ပြနေရာကို ကြည့်လိုက်ရာ သူတော်စင်သူရဲကောင်း ဂန္ဒီက သူ့အပေါ် နျူကလီးယားဗုံးတစ်လုံး ချလိုက်သည်ကို တွေ့လိုက်ရသည်။

"ဂန္ဒီက နျူကလီးယားဗုံးနဲ့ ထပ်ပစ်ပြန်ပြီလား။ သံတမန်ရေးရာဆွေးနွေးတိုင်း ငြိမ်းချမ်းရေးအကြောင်းပဲ ပြောနေတာလေ။ အဲ့ဟာကြီးက စာလုံးပေါင်းအမှားများ ဖြစ်နေသလားကွာ။"

ရှားလော့ခ် စိတ်အနှောင့်အယှက်ဖြစ်နေစဉ် ဘရုက ဆို၏။ "အရှင်ရှားလော့ခ်၊ အလုပ်သမားတွေ သူတို့အလုပ် ပြီးသွားကြပါပြီ။ အလုပ်သမားခေါင်းဆောင်က ဒန်ဂျင်အမြုတေခန်းမဆောင် အပြင်ဘက်မှာ အရှင့်ကို စောင့်နေပါတယ်။"

"မြန်လိုက်တာ။ နှစ်ရက်တောင် ကုန်သွားပြီလား။" ရှားလော့ခ် အံ့ဩသွားပြီး မျက်နှာပြင်၏ ညာဘက်အောက်ခြေရှိ နောက်တစ်လှည့်ခလုတ်ကို ကြည့်ရင်း ခေါင်းခါလိုက်သည်။

ရှားလော့ခ်သည် သူ၏ဂိမ်းကို သိမ်းဆည်းပြီး ပိတ်လိုက်၏။

ဒန်ဂျင်အမြုတေခန်းမဆောင်၏ အပြင်ဘက်တွင် စိတ်ခံစားချက်ကင်းမဲ့သော အရိုးစုမျက်နှာနှင့် ဝတ်ရုံခြုံထားသည့် လစ်ခ်ျတစ်ယောက် စောင့်ဆိုင်းနေသည်။ ရှားလော့ခ် ခန်းမဆောင်ထဲမှ ထွက်လာသောအခါ ထိုလစ်ခ်ျက အရိုအသေပေးလိုက်သည်။

"အရှင်ရှားလော့ခ်၊ စာချုပ်အရ ကျွန်တော်တို့ ဆောင်းတောင်ကုန်းမြို့ကို သွားမယ့် နေရာရွှေ့ပြောင်းဝင်ပေါက်ကို တည်ဆောက်ပြီးစီးပါပြီ။ အရှင့်ရဲ့တောင်းဆိုချက်အရ ပြင်ဆင်မှုတွေလည်း လုပ်ထားပါတယ်။ နေရာရွှေ့ပြောင်းပုံစံ နှစ်မျိုးရှိပါတယ်။ ပထမတစ်ခုကတော့ ဆောင်းတောင်ကုန်းမြို့ကို ကြားခံအနေနဲ့သုံးပြီး ဝိညာဉ်ကောလိပ်ကို ရောက်ရှိမှာဖြစ်ပါတယ်။ နောက်တစ်ခုကတော့ ဆောင်းတောင်ကုန်းမြို့ကို တိုက်ရိုက်နေရာရွှေ့ပြောင်းတာပါပဲ။ အရှင်ရှားလော့ခ်၊ ကျွန်တော် ပြပေးပါ့မယ်။"

ရှားလော့ခ်သည် လစ်ခ်ျကို ကျေးဇူးတင်စကားဆိုပြီး သူ၏နောက်သို့ လိုက်ပါသွားရာ ခုနစ်မီတာမြင့်သော ဝင်ပေါက်ဆီသို့ ရောက်ရှိသွားသည်။ ထိုဝင်ပေါက်သည် ဘီလူးကြီးတစ်ကောင်အတွက်ပင် လုံလောက်အောင် မြင့်မားလှ၏။ ရှားလော့ခ်လည်း သက်သောင့်သက်သာ ဝင်ရောက်နိုင်ပေသည်။ ဂိုဘလင်များအတွက်မူ အနည်းငယ်ကြီးလွန်းနေသည်။ သုံးမီတာအကျယ်ရှိသဖြင့် ဂိုဘလင်ဆယ်ယောက် တစ်ချိန်တည်း ဝင်ရောက်နိုင်၏။

နေရာရွှေ့ပြောင်းဝင်ပေါက်၏ အောက်ခံဖောင်ဒေးရှင်းကို အသစ်တူးဖော်ထားသော နေရာတွင် တည်ဆောက်ထားပြီး၊ ထိုနေရာသည် နေရာရွှေ့ပြောင်းဝင်ပေါက် ဧည့်ကြိုခန်းမ ဖြစ်လာမည်ဖြစ်သည်။

ရည်မှန်းချက်ကြီးသော ရှားလော့ခ်သည် နေရာရွှေ့ပြောင်းဝင်ပေါက် တစ်ခုတည်းနှင့် ကျေနပ်မည်မဟုတ်ပေ။ သို့သော် ဧည့်ကြိုခန်းမထဲတွင် တစ်ခုတည်းသာ ရှိသေးသည်။ ပတ်ပတ်လည်တွင် နံရံများ၊ အဆင်တန်ဆာများ မရှိသေးသော်လည်း ၎င်းမှာ ယာယီသာ ဖြစ်သည်။

လွန်ခဲ့သောတစ်လကမှ ရှားလော့ခ်သည် ဒန်ဂျင်ကို ဝယ်ယူခဲ့ခြင်းဖြစ်သည်။ ဒန်ဂျင်အမြုတေပင် စွန့်ပစ်ခံထားရသည်။ အမြုတေကို ပြန်လည်အသက်သွင်းရန် သူ အားထုတ်ကြိုးပမ်းခဲ့ရ၏။ တစ်လအတွင်း ဤမျှကျယ်ဝန်းသောနေရာကို တူးဖော်ပြီး ဤမျှများပြားသော အဆောက်အအုံများကို တည်ဆောက်နိုင်လိမ့်မည်ဟု မည်သူက မျှော်လင့်ထားမည်နည်း။

နတ်ဆိုးတစ်ယောက်အနေနှင့် အိပ်မက်များ ရှိရပေမည်။

ဝင်ပေါက်ပုံစံကို ရွေးချယ်ရန် မာနာစွမ်းအင်၏ လားရာကို ပြောင်းလဲရသည်။ ထို့ကြောင့် ဂိမ်းမာများ ဝင်ပေါက်ပုံစံကို ပြောင်းလဲပြီး ဆောင်းတောင်ကုန်းမြို့သို့ သွားရောက်ကာ ပြဿနာရှာမည်ကို သူ စိုးရိမ်စရာမလိုချေ။

ရှားလော့ခ်သည် ဝင်ပေါက်ပုံစံကို သတ်မှတ်ပြီး သူ၏မာနာစွမ်းအင်ကို လွှဲပြောင်းကာ နေရာရွှေ့ပြောင်းဝင်ပေါက်ကို အသက်သွင်းလိုက်သည်။ အဖြူရောင်မှော်အလင်းများ ဖုံးလွှမ်းနေသော ဝင်ပေါက်ကို ဖြတ်လျှောက်သွားသောအခါ ဆောင်းတောင်ကုန်းမြို့ နေရာရွှေ့ပြောင်းဝင်ပေါက် ဧည့်ကြိုခန်းမသို့ ရောက်ရှိသွားသည်။

ထိုနေရာတွင် ငြိမ်းချမ်းတိတ်ဆိတ်နေပြီး အော်ဟစ်ဟောက်ငမ်းပြောတတ်သည့် ဧည့်ကြိုအော့ခ်များလည်း မရှိပေ။

ရှားလော့ခ်သည် ကောင်းမွန်စွာ အလှဆင်ထားသော စတုရန်းမီတာတစ်ရာကျယ်သည့် အခန်းတစ်ခန်းထဲတွင် ရှိနေသည်။ ဝင်ပေါက်အပြင် သေးငယ်သောစားပွဲအနည်းငယ်၊ သက်သောင့်သက်သာရှိသော ထိုင်ခုံများနှင့် သတင်းစာ၊ မဂ္ဂဇင်းများထားသည့် စင်တစ်ခုလည်း ရှိ၏။ ရှားလော့ခ်သည် ဆိတ်ချိုများနှင့် ရှည်လျားသွယ်လျသော အမြီးပါသည့် ဆွဲဆောင်မှုရှိသော နတ်ဆိုးမတစ်ဦးကို မဂ္ဂဇင်းမျက်နှာဖုံးတွင် တွေ့လိုက်ရသည်။ အမြီးကို ရှေ့တွင်ထားပြီး ပေါင်ခြံနေရာကို ဖုံးကွယ်ထားသည်။ အပေါ်ပိုင်းမှ ဆွဲဆောင်မှုရှိသော နေရာနှစ်ခုကိုမူ စောင်းငဲ့ထားသော သတင်းစာတစ်စောင်ဖြင့် ဖုံးအုပ်ထားလေသည်။

ရှားလော့ခ် စိတ်အနှောင့်အယှက်ဖြစ်သွားပြီး သတင်းစာဆီသို့ သူ၏လက်ကို လှမ်းလိုက်စဉ်...

"အရှင်ရှားလော့ခ်၊ ဒီနေရာရွှေ့ပြောင်းဝင်ပေါက်က တိုက်ရိုက်ဆက်သွယ်ထားတာကတော့..." ယခင် လစ်ခ်ျသည် ဝင်ပေါက်မှ ထွက်လာပြီး သူ၏အရိုးစုခေါင်းသည် သတင်းစာမရှိတော့သော စင်ဘက်သို့ လှည့်ကာ ရှားလော့ခ်အား ဆို၏။ "ဆောင်းတောင်ကုန်းမြို့ရဲ့ ဗွီအိုင်ပီအခန်းကိုပါပဲ။ အရှင်ရှားလော့ခ်က ကျွန်တော်တို့ရဲ့ အဓိကပြဿနာကို ဖြေရှင်းပေးခဲ့တာကြောင့် ဒါက ကျွန်တော်တို့ကောလိပ်ကနေ လက်ဆောင်ပေးတာပါခင်ဗျာ။"

"ဒါက ဈေးနည်းတာမဟုတ်ဘူးပဲ။ ကျေးဇူးအများကြီးတင်ပါတယ်။" ရှားလော့ခ်သည် သူ၏ကျေးဇူးတင်ကြောင်း ဖော်ပြပြီး "နယ်စားကြီး၏သားတော် အလက်ဇန္ဒရီယားသည် ဆောင်းတောင်ကုန်းမြို့သို့ လာရောက်လည်ပတ်မည်" ဟူသော စာသားပါသည့် သတင်းစာကို ပြန်ထားလိုက်သည်။

ထိုသတင်းစာသည် ဆွဲဆောင်မှုရှိသော မဂ္ဂဇင်းမျက်နှာဖုံးကို ဖုံးကွယ်သွား၏။

"အရှင်ရှားလော့ခ်၊ ဝိညာဉ်ကောလိပ်ကို လည်ပတ်ချင်ပါသလား။" လစ်ခ်ျက သူ၏စိတ်ခံစားချက်ကင်းမဲ့သော အရိုးစုခေါင်းကို ပြန်လှည့်ရင်း မေးသည်။

"မလိုအပ်တော့ပါဘူး။ ငါ့ရဲ့ဒန်ဂျင်ကိစ္စတွေနဲ့ အလုပ်များနေလို့။ ပြီးတော့ လွန်ခဲ့တဲ့နှစ်အနည်းငယ်က ကောလိပ်ကို ရောက်ခဲ့ဖူးပါတယ်။" ရှားလော့ခ်က လက်ကာပြရင်း ပြန်ဖြေလိုက်သည်။

ရှားလော့ခ် မသွားသောကြောင့် လစ်ခ်ျသည် ဆက်မပြောတော့ပေ။

လစ်ခ်ျများနှင့် အလုပ်သမားများသည် သူတို့၏အလုပ်များ ပြီးစီးပြီဖြစ်သောကြောင့် ထာဝရတိုင်းပြည်တွင် ဆက်နေကြမည် မဟုတ်ချေ။ သူတို့သည် ပရော်ဖက်ဆာ ဘေကွန်အတွက်လည်း စိုးရိမ်ခြင်းမရှိကြ‌ပေ။ လစ်ခ်ျတစ်ဦးက ပရော်ဖက်ဆာ ဘေကွန်သည် သူ့အလိုလို ပြန်လာလိမ့်မည်ဟု ဆို၏။

ရှားလော့ခ်သည် အလုပ်သမားများကို နှုတ်ဆက်ပြီး လိုက်ပို့လိုက်သည်။ ထို့နောက် ဘရုကို ဝင်ပေါက်ပုံစံ ချိန်ညှိခိုင်းလိုက်သည်။

ထိုစဉ် ဘရုက ဆို၏။ "အရှင်ရှားလော့ခ်။ မုဖာဆာ၊ ဆင်းဘနဲ့ မိုရိုးစ်တို့ ပြန်ရောက်လာကြပါပြီ။"

ရှားလော့ခ် သူတို့ကို ဝင်ခွင့်ပြုလိုက်သည်။ နေရာရွှေ့ပြောင်းဝင်ပေါက်သည် မာနာစွမ်းအင်လှိုင်းများဖြင့် တောက်ပလာပြီး စကားပြောရင်း ပြုံးရယ်နေကြသော သံနက်လူပုနှစ်ယောက် အထုပ်အပိုးများစွာဖြင့် ထွက်လာကြသည်။

မိုရိုးစ်သည် သူတို့၏နောက်တွင်ရှိပြီး ပျော်ရွှင်စွာ ပြုံးနေသည်။ သူ၏မျက်နှာပေါ်မှ အမာရွတ်များသည် ထင်ရှားခြင်းမရှိတော့။

သူတို့သုံးဦးသည် ရှားလော့ခ်ကို အရိုအသေပေးပြီး အလုပ်မစတင်မီ ပစ္စည်းများသိမ်းဆည်းရန် သူတို့၏အခန်းများသို့ ပြန်သွားကြသည်။

မုဖာဆာသည် ထောင့်တစ်နေရာတွင် အလောင်းကောင်များကဲ့သို့ ပုံနေသော ဂိုဘလင်များကို သတိပြုမိသွားသည်။ သူ တစ်စုံတစ်ရာ ပြောတော့မည်အပြုတွင် ဆင်းဘက သူ့ကိုဆွဲခေါ်သွားရင်း ပြောလိုက်သည်။ "ကြည့်ရတာ နတ်ဆိုးအရှင်က ဂိုဘလင်တွေကို သည်းမခံနိုင်တော့တဲ့ပုံပဲ။ ဟူး… ငါ့ဘေးမှာ ဂိုဘလင်တွေ စကားဖောင်ဖွဲ့တာ မကြားရတော့ အိပ်တောင်မပျော်တော့ဘူးကွာ…"

ဆင်းဘ၏အသံသည် တဖြည်းဖြည်း ဝေးကွာပျောက်ကွယ်သွား၏။

"အရှင်ရှားလော့ခ်၊ ဝန်ဆောင်မှုပြန်မစခင် ဆယ်မိနစ်ပဲ လိုပါတော့တယ်။ အဲ့ဒီဂိမ်းမာတွေ ပြန်လာကြတော့မယ်။ ကန့်သတ်ဒန်ဂျင်နယ်မြေထဲကို ဝင်တဲ့အခါ သူတို့ရဲ့တုံ့ပြန်မှုကို တွေ့မြင်ချင်လှပါပြီ။" ဘရုက မျှော်လင့်တကြီးဖြင့် ဆိုသည်။

ရှားလော့ခ် ခေါင်းညိတ်လိုက်ပြီး ဗားရှင်းအသစ်၏ ကိစ္စရပ်များကို ဘရုနှင့် ဆွေးနွေးနေ၏။

ရှားလော့ခ်သည် ဂိမ်းမာများ ပြန်လာမည်ကို၎င်း၊ ကန့်သတ်ဒန်ဂျင်နယ်မြေကို အောင်နိုင်ရန် ကြိုးပမ်းကြမည်ကို၎င်း မျှော်လင့်နေသည်။

ဤသည်က သူ၏မှော်ကျောက်တုံးများ အဆက်မပြတ် တိုးပွားလာမည်ကို ဆိုလိုနေ၏။ ဂိမ်းမာတစ်ရာ သေဆုံးသွားသည်နှင့် သူ နောက်ထပ် မှော်ကျောက်တုံး တစ်သောင်း ရရှိပေမည်။

အကယ်၍ ဂိမ်းမာများသည် ရှင်သန်ကျန်ရစ်နိုင်လောက်အောင် အင်အားကြီးမားပါက ကောင်းမွန်သောပစ္စည်းကိရိယာများ ရရှိကြလိမ့်မည်။ ဤသည်က သူတို့၏ ပစ္စည်းကိရိယာများ တိုးတက်လိုသော ဆန္ဒနှင့် ဂိမ်းကစားနည်းအသစ်များ လိုလားသောဆန္ဒကို ဖြည့်ဆည်းပေးလိမ့်မည်။ ၎င်းအပြင် ပစ္စည်းကိရိယာများ တိုးတက်ရန်အတွက် ငွေအမြောက်အမြားကိုလည်း ချွေတာနိုင်စေမည်။ ထိုပစ္စည်းကိရိယာများကို ငွေဒင်္ဂါးအမြောက်အမြားနှင့် လဲလှယ်နိုင်သေးသည်။

မှော်ကျောက်တုံးများ အဆက်မပြတ် စီးဝင်လာသည်နှင့် သူ ဘီလီယံနာဖြစ်ရန် မကြာတော့ချေ။

စာချုပ်အရ ရှားလော့ခ်သည် တိုက်ခိုက်ရေးသမားများ အရည်အချင်းပြည့်မီကြောင်း သေချာစေရမည်။ အကယ်၍ တိုက်ခိုက်ရေးသမားများ အလွန်အမင်း အင်အားနည်းပြီး အစုလိုက်အပြုံလိုက် သေဆုံးမှုများ ဖြစ်ပွားပါက သူသည် သူတို့၏သေဆုံးမှုများမှ အမြတ်ထုတ်နေသည်ဟု သံသယဝင်ခံရပေလိမ့်မည်။

ရှားလော့ခ်သည် ယခုခေတ်တွင် ဂိုဘလင်အရောင်းအဝယ်သမားတစ်ဦး ဖြစ်ရသည်မှာ မလွယ်ကူဟု ခံစားမိသည်။ ဤသည်မှာ အမှန်တကယ်ပင် အများပြည်သူ ဆင်းရဲကျပ်တည်းနေသော ကာလတစ်ခု ဖြစ်ချေသည်။

ရှားလော့ခ်သည် ငွေရှာရသည်မှာ ပို၍ ပို၍ ခက်ခဲလာသည်ဟု ခံစားမိပြီး စကားဖောင်ဖွဲ့တတ်သော ဂိမ်းမာများကို လွမ်းဆွတ်နေမိသည်။

ထောင့်တစ်နေရာတွင် ချထားသော ဂိုဘလင်များထဲမှ တစ်ယောက်ဖြစ်သည့် အာသာ မျက်လုံးများ ပွင့်လာသောအခါ ရှားလော့ခ် ကြောက်မက်ဖွယ်အပြုံးတစ်ခုကို ပြုံးလိုက်၏။

ထာဝရတိုင်းပြည်၏ ပြည်သူများ၊ ပြန်လည်ကြိုဆိုပါ၏။