အနိုင်ယူ၍မရနိုင်သော နတ်ဘုရားရဲစွမ်းသတ္တိနယ်ပယ်။

“သတ်!”

သို့သော် မြှားပစ်လွှတ်လိုက်သည်နှင့် တပြိုင်နက် ကျောက်ချင်းသည် တစ္ဆေသရဲအသွင်အပြင်ကဲ့သို့ စူးချန်ခုန်းကို တိုက်ခိုက်နေပြီဖြစ်သည်။

ခုတ်ပစ်!

စူးချန်ခုန်းသည် လက်တစ်ဖက်တွင် ဓားတစ်လက်ဖြင့် အထက်မှ အားပြင်းပြင်း ခုတ်ချလိုက်ရာ ၎င်းက သံကျောက်တုံးတစ်တုံးကို နှစ်ခြမ်းခွဲနိုင်လောက်အောင် အားကောင်းပြီး ကြေးမုံပြင်ကဲ့သို့ ချောမွေ့သော မျက်နှာပြင် ကျန်ရစ်ခဲ့လေ၏။

“ခွမ်း”

ကျောက်ချင်းသည် သူဝတ်ထားသည့် ရွှေအိုရောင်လက်အိတ်၏ ခိုင်ခံ့မှုကို အားကိုးပြီး ဓါးကို လက်ဗလာဖြင့် ကြားဖြတ်လိုက်သည်။ သူသည် ဓားသွားကို ဘယ်လက်ဖြင့် ဆုပ်ကိုင်လိုက်ပြီး သူ့ခြေကို ထောက်ကာ စူးချန်ခုန်းဆီသို့ ညာလက်သီးဖြင့် ထိုးလိုက်သည်။

“ဒုတ်”

စူးချန်ခုန်းသည် ဘယ်လက်ကို လွှတ်လိုက်ပြီး လက်သီးဖြင့် တုံ့ပြန်လိုက်သည်။ နတ်ဘုရားခွန်အားနယ်ပယ်၏ စွမ်းအားများ ထွက်ပေါ်လာပြီး ပေါက်ကွဲသံများကြားတွင် ကျောက်ချင်းသည် နောက်တစ်ကြိမ် အလျင်အမြန် ပြန်ဆုတ်သွားခဲ့သည်။

"ဝှစ် ဝှစ် ဝှစ်!"

နောက်အခိုက်အတန့်တွင် ယန္တရားသံ အများအပြား ထွက်ပေါ်လာပြီး ပြင်းထန်သော အရွေ့စွမ်းအင်ဖြင့် တွန်းပို့လိုက်သော မြှားဆယ်ချောင်းကျော်သည် လေထဲသို့ ရောက်ရှိလာ၏။

စူးချန်ခုန်းသည် ထိုမြှားများကို ရှောင်တိမ်းကာ ပိတ်ဆို့ထားရုံသာ အာရုံစိုက်နိုင်ခဲ့သည်။

မြှားပစ်ပြီးနောက် ကျောက်ချင်းသည် ပီကေကဲ့သို့ နောက်တစ်ကြိမ် ကပ်လာပြန်၏။

ကျောက်ချင်း၏ အစီအစဉ်က ရိုးရှင်းပါသည်။

သူလုပ်ရမှာက စူးချန်ခုန်းကို အကျဉ်းအကျပ်ထဲ ရောက်စေဖို့ပင်။ စူးချန်ခုန်း ထွက်ပြေးတာကို တားဆီးပြီး သူ့ကို ခဏလေးတောင် အသက်ရှုခွင့်မရအောင် လက်အောက်ငယ်သားတစ်စုကို ဒူးလေးတွေနှင့် အဆက်မပြတ် တိုက်ခိုင်းထားသည်။

စူးချန်ခုန်းသည် တစ်ချိန်တည်းတွင် အဆင့်တူသောသူတစ်ဦးနှင့် ပုန်းအောင်းနေသော အယောက် နှစ်ဆယ်နီးပါးရှိသည့် ဒူးလေးသမားများကိုလည်း ကိုင်တွယ်ရမည်ဖြစ်သည်။ သူ၏ ရုပ်ပိုင်းဆိုင်ရာနှင့် စိတ်ပိုင်းဆိုင်ရာ ခံနိုင်ရည်ရှိမှုထက် နှစ်ဆသုံးဆတိုက်ရခြင်းသည် ဤနေရာတွင် မလွှဲမရှောင်သာ သေဆုံးခြင်းကို သေချာစေလောက်သည်။

"နတ်ဘုရားခွန်အားနယ်ပယ်က သိုင်းပညာရှင်တစ်ယောက်ရဲ့အလောင်းက...တကယ်ကို တန်ဖိုးရှိမှာပဲ။" ကျောက်ချင်းသည် သူ့မျက်နှာဖုံးအောက်တွင် ယုတ်မာစွာ ပြုံးလိုက်လေ၏။

ဤကျောက်ချင်းသည် အမှန်ပင် ရှစ်ဟန်ရှန်ထက် အားကြီးသော ပြိုင်ဘက်ဖြစ်ပြီး စူးချန်ခုန်း၏ သံဖြတ်ဓားနှင့် ပြတ်ပြတ်သားသား ရင်ဆိုင်ရန် အမည်မသိ ပစ္စည်းတစ်ခု၏ သတ္တုလက်အိတ်တစ်စုံလည်း ဝတ်ထားသေးသည်။ ဒူးလေးသမားနှစ်ဆယ်နီးပါး၏ ပစ်ချက်နှင့်အတူ စူးချန်ခုန်းသည် ကြီးမားသော ဖိအားကို ခံစားနေရသည်။

သို့သော် ဤဖိအားအောက်တွင် စူးချန်ခုန်းသည် ကြောက်ရွံ့ခြင်း သို့မဟုတ် ထိတ်လန့်ခြင်းမျိုး မဟုတ်ဘဲ စိတ်အားထက်သန်မှုတစ်မျိုးကို ခံစားနေရသည်မှာ ထူးဆန်းလှ၏။ သူ၏သွေးများသည် အလွန်လျင်မြန်စွာ စီးဆင်းနေပြီး စစ်မှန်သော ချီစွမ်းအင်သည် သူ့ခန္ဓာကိုယ်အတွင်း လျင်မြန်စွာ ပျံ့နှံ့သွားကာ သူ့ပတ်ဝန်းကျင်ရှိ အရာအားလုံး ငြိမ်သက်သွားသလိုမျိုး သူ့စိတ်ဝိညာဉ်က အပြည့်အဝ အာရုံစူးစိုက်ကာ သူ့ပတ်ဝန်းကျင်အပေါ် အာရုံစူးစိုက်မှု သိသိသာသာ ကြည်လင်လာသည်။

အပြေးအလွှား ဝင်လာနေသော ကျောက်ချင်းနှင့် မြှားများအားလုံး နက်နဲသိမ်မွေ့စွာ အသေးစိတ် ပေါ်လာသည်။

စူးချန်ခုန်း၏ စိတ်ဝိညာဉ်နှင့် ကိုယ်ခန္ဓာတို့ ပေါင်းစပ်ကာ နူးညံ့သိမ်မွေ့သွားပြီး ပိတ်ဆို့နေရာမှ ပွင့်ထွက်သွားသံကို ကြားလိုက်ရသည့်နှယ် သူ့အရေပြားအောက်မှ ခွန်အားများ တဟုန်ထိုးလာလေ၏။

"သူ့ဓားကို ချုပ်လိုက်ရင် သူ့ခြိမ်းခြောက်နိုင်စွမ်းက တော်တော်လျော့သွားလိမ့်မယ်!"

စူးချန်ခုန်း၏ အသွင်ကူးပြောင်းမှုကို သတိမထားမိဘဲ ကျောက်ချင်းသည် စူးချန်ခုန်း၏ သံဖြတ်ဓားကို ဖမ်းယူရန် သတ္တုလက်အိတ်များကို ၀တ်ထားသော သူ့လက်များကို ဆန့်ထုတ်လိုက်သည်။

စူးချန်ခုန်း၏ ပြင်းထန်သော ဓားသွားနည်းပညာသည် သိုင်းပညာရှင်များစွာအား သတ်ခဲ့ဖူးသည်ကို မြင်တွေ့ခဲ့ဖူးရာ စူးချန်ခုန်း၏ သံဖြတ်ဓားကို ခံနိုင်ရည်ရှိသရွေ့ သူသည် ခြေသည်းမရှိသော ကျားတစ်ကောင်ကဲ့သို့ ဖြစ်နေမည်ကို ကျောက်ချင်း နားလည်သည်။

ဒူးလေးသမား အယောက်နှစ်ဆယ်နီးပါးနှင့် လက်တွဲလုပ်ဆောင်ခြင်းဖြင့် စူးချန်ခုန်းကို သတ်ခြင်းသည် ကလေးထံမှ သကြားလုံးယူခြင်းကဲ့သို့ လွယ်ကူလိမ့်မည်။

"မင်းကိုယ်တိုင်ရောင်းတဲ့လက်နက်နဲ့ အသတ်ခံရမှာဆိုတော့ မင်း မကျေမနပ်နဲ့သေရမှာ မဟုတ်လား။ ငါ့ပိုက်ဆံက အဲ့လောက် လွယ်လွယ်နဲ့ မရဘူးလေ!"

ကျောက်ချင်းသည် သူ့ဘာသာသူ တိတ်တဆိတ် လှောင်ပြောင်ကာ ငါးကြီးတစ်ကောင်ဖမ်းရန် ရှည်လျားသော ဂိမ်းကို ကစားနေ၏။

သံဖြတ်ဓါးနည်းပညာ။ ပိုင်းဖြတ်ခြင်း။

သို့သော် ယခုအခိုက်တွင် စူးချန်ခုန်းသည် သူ့ဓားကို တစ်ဖန်ပြန်ကိုင်လိုက်ပြီး ကျောက်ချင်းဆီသို့ ခုတ်ချလိုက်ရာ ကောင်းကင်မှ လျှပ်စီးကြောင်းကဲ့သို့ ရိုးရှင်းပြီး သိသိသာသာပင် လျင်မြန်လှသည်။

“ခွမ်း!”

ကျောက်ချင်းသည် ဓားသွားကို လက်နှစ်ဖက်ဖြင့် ဖမ်းမိလိုက်သော်လည်း သူ့အမူအရာမှာ သိသိသာသာ ပြောင်းလဲသွားသည်။ စူးချန်ခုန်း၏ဓားသည် မျှော်လင့်ထားသည်ထက် ပိုမိုလေးလံနေပြီး ပေါင်တစ်ထောင်အလေးချိန်ရှိသကဲ့သို့ ထုထည်ကြီးမားသော တွန်းအားတစ်ခုက သူခံစားလိုက်ရသည်။ တုန်ယင်နေသော စွမ်းအားသည် သူ့လက်များမှတဆင့် ပျံ့နှံ့သွားကာ ပြင်းထန်စွာ တုန်လှုပ်သွားပြီး ကွဲထွက်တော့မည်နှယ် နာကျင်မှုကို ဖြစ်ပေါ်စေပြီး သူသည် ထိန်းမနိုင်သိမ်းမရ ခြေလှမ်းများစွာ နောက်ပြန်ဆုတ်သွားခဲ့သည်။

"ဘာတွေဖြစ်နေတာလဲ။ ငါတို့နှစ်ယောက်လုံးက နတ်ဘုရားခွန်အားနယ်ပယ်မှာ ရှိနေကြတာပဲကို... သူငါ့ကို ဘယ်လိုလုပ် ဖိနှိပ်နိုင်မှာလဲ။" ကျောက်ချင်းသည် ဒီကိစ္စကို ဘယ်လိုနည်းနှင့်မှ မယုံနိုင်ခဲ့။ နတ်ဘုရားခွန်အားနယ်ပယ်၌ နှစ်ယောက်စလုံး ကွာဟချက် ရှိနေလျှင်ပင် လုံးလုံးလျားလျား လွှမ်းမိုးခံရသည့် အတိုင်းအတာအထိ မဖြစ်သင့်ပေ။

"ဆိုတော့ ဒါက ဒီလိုပေါ့... နတ်ဘုရားရဲစွမ်းသတ္တိနယ်ပယ် သူရဲကောင်းတွေဟာ ရန်သူတစ်ရာကျော်ကို တစ်ယောက်တည်း ရင်ဆိုင်ရဲတဲ့ သတ္တိကို ပိုင်ဆိုင်ကြပြီး သူတို့ရဲ့ စိတ်ဓာတ်နဲ့ ကိုယ်ခန္ဓာကို နှိုးဆွဖို့အတွက် စစ်မှန်တဲ့ တိုက်ပွဲတွေ လိုအပ်တယ်။ ပြီးတော့ ငါက တိုက်ပွဲအစစ်ရဲ့ ဖိအားတွေ မရှိခဲ့သေးတော့ ပိတ်ဆို့ကြန့်ကြာနေခဲ့တာပဲ။"

ထိုအချိန်တွင် စူးချန်ခုန်းလည်း သဘောပေါက်သွားသည်။

နတ်ဘုရားခွန်အားနယ်ပယ်၏အထွတ်အထိပ်သို့ရောက်ရှိပြီးနောက် အသွေးအသားနှင့် စိတ်ဝိညာဉ်နှစ်ခုလုံးတွင် အသွင်ပြောင်းမှုကို နှိုးဆွရန် ရင်ဖိုစိတ်လှုပ်ရှားရသော တိုက်ပွဲတွင် တိုက်ခိုက်ရန် လိုအပ်သည်။ အမှန်တော့ ကျောက်ချင်းနှင့် ဒူးလေးသမားတို့ ပူးပေါင်းပြီး စူးချန်ခုန်းအား ပေးခဲ့သည့် ဖိအားက နည်းနည်းနှောနှော မဟုတ်ပေ။ ဒါက အဆင့်ပိတ်ဆို့နေတဲ့ စူးချန်ခုန်းအား သူ့ကန့်သတ်ချက်တွေကို သဘာဝအတိုင်း ဖြတ်ကျော်သွားစေခဲ့သည်။

"ဝှစ် ဝှစ် ဝှစ်"

မြှားများသည် စူးချန်ခုန်းဆီသို့ ပျံသန်းသွားခဲ့ပြီး ယခုတစ်ကြိမ်တွင် ရှောင်ရန်မရွေးချယ်ဘဲ သူ၏ ဦးခေါင်းနှင့် လည်ပင်းကို ကာကွယ်ရန်သာ လက်ကို မြှောက်လိုက်သည်။

"ခွမ်း ခွမ်း ခွမ်း!"

စူးချန်ခုန်း၏ ခန္ဓာကိုယ်အပေါ်ပိုင်းကို ထိမှန်သော မြှားများကြောင့် သတ္တုသံမြည်များ သူ့ထံမှ ခုန်ထွက်လာ၏။

စူးချန်ခုန်း၏ ရွှေပိုးချည်သံချပ်ကာသည် မြှားများနှင့် လျှို့ဝှက်လက်နက်များကို အကောင်းဆုံးကာကွယ်ပေးသည်။ သူ့ရဲ့ အရေးကြီးတဲ့ အစိတ်အပိုင်းတွေကို ထိန်းထားသရွေ့တော့ ဒီ ဒူးလေးမြှားတွေက သူ့ကို မထိခိုက်စေနိုင်ပါ။

"ဘာလဲဟ... ရွှေခေါင်းလောင်းကာလား။ သံအင်္ကျီလား။" စူးချန်ခုန်း၏ ခန္ဓာကိုယ်ပေါ်မှ မြှားတစ်သုတ် ပြန်ကန်ထွက်လာရာ ကျောက်ချင်း အံ့အားသင့်သွားလေ၏။ ဤသရဲမျက်နှာသည် ရေပြင်ညီမာကျောခြင်းနည်းကိုလည်း ကျွမ်းကျင်တာလားဟု သူ အရင်ဆုံးတွေးမိလေ၏။

"မင်း ငါ့ဓါးကို ဖမ်းရတာ ကြိုက်တယ်မလား။ ဒါဆို ငါ မင်း ကျေနပ်အောင် လုပ်ပေးမယ်!"

ဒူးလေးကို ခံနိုင်ရည်ရှိပြီးနောက် စူးချန်ခုန်း၏ မျက်လုံးများသည် ခိုင်မာလာသလို အေးစက်လာသည်။

ဝှစ်

စူးချန်ခုန်းသည် သူ၏ သံဖြတ်ဓားကို ကိုင်ဆောင်ထားသော်လည်း ယခုတစ်ကြိမ်တွင် ၎င်းအား ခုတ်ထစ်ရန်မဟုတ်ဘဲ “ရိုက်ခွဲရန်” အသုံးချခဲ့သည်။ သူသည် သူ၏လိပ်အသက်ရှူခြင်း ချီစွမ်းအင်အစစ်ကို ဖြန့်ကျက်စဉ်တွင် သူ၏လက်မောင်းကြွက်သားများ ဖောင်းကားလာပြီး သံဖြတ်ဓားပြားနှင့် ကျောက်ချင်းကို ပြင်းထန်သော ဖိအား၊ လေပြင်းအရှိန်နှင့်အတူ ရိုက်ချလိုက်လေ၏။

ကျောက်ချင်းသည် ကျလာသော သံဖြတ်ဓားကို ဆန့်ကျင်ရန် အနက်ရောင်သတ္တုလက်အိတ်ဖြင့် ဆုပ်ကိုင်လိုက်စဉ် အံကြိတ်နေရသည်။

“ကလောက် ကလောက်”

လေးလံသော သတ္တုရိုက်ခတ်မှုကြားတွင် သံဖြတ်ဓားသည် တန်တစ်ထောင်လောက်ရှိသည့် တူတစ်ချောင်းနှယ် ဆင်းသက်လာသည်။ ကျောက်ချင်းက နာကျင်စွာ အော်ဟစ်လိုက်ပြီး ထိုးနှက်တာကို တားဆီးနိုင်ပေမယ့် ကြီးမားလှတဲ့ စွမ်းအားက သူ့လက်ထဲက အရိုးတွေကို ကွဲကြေသွားစေတဲ့ တုန်လှုပ်ချောက်ချားတဲ့ လှိုင်းလုံးတွေကို ပစ်လွှတ်လိုက်သည်။

"နတ်ဘုရားရဲစွမ်းသတ္တိအဆင့်... မင်းက နတ်ဘုရားရဲစွမ်းသတ္တိအဆင့် ကိုယ်ခံပညာရှင်တစ်ယောက်လား။" ကျောက်ချင်းသည် မချိမဆံ့သော ဝေဒနာဖြင့် သူ့မျက်လုံးရှေ့တွင် အမည်းရောင်ကို မြင်ပြီး ထိတ်လန့်စွာ အော်ဟစ်လိုက်သည်။

ခန္ဓာကိုယ် သန့်စင်ခြင်း ကြီးမြတ်သော အောင်မြင်မှုအဆင့်ဖြစ်သော နတ်ဘုရားရဲစွမ်းသတ္တိအဆင့်သည် လက်တစ်ဖက်တည်းနှင့် နတ်ဘုရားခွန်အား အတောင်တစ်ထောင်ကို ပိုင်ဆိုင်ပြီး လူသားသဏ္ဍာန် ရက်စက်ကြမ်းကြုတ်သော သားရဲကဲ့သို့ ပေါင်တစ်ရာ အလေးချိန်ရှိသော လက်နက်များကို လွှဲကိုင်နိုင်သည်။

စူးချန်ခုန်းသည် နတ်ဘုရားရဲခွန်အားနယ်ပယ်တွင်သာရှိနေပါက ကျောက်ချင်းသည် ရုပ်ပိုင်းဆိုင်ရာအရ ဤအတိုင်းအတာအထိ လွှမ်းမိုးနိုင်မည်မဟုတ်ပေ။ နတ်ဘုရားရဲစွမ်းသတ္တိအဆင့် သိုင်းပညာရှင်တစ်ယောက်သာ ဤသို့လုပ်နိုင်သည်။

စူးချန်ခုန်းသည် ထုံးစံအတိုင်း ကျောက်ချင်းကို ရှင်းပြရန် စိတ်မဝင်စားပေ။

"တကယ်တော့... သစ္စာဖောက်ခံရတာကို ငါက အရမ်းမုန်းတာ!" အအေးဓာတ်သည် စူးချန်ခုန်း၏မျက်လုံးများကို ပြည့်လျှံစေပြီး အူတိုင်အထိ အေးစက်သွားစေသည်‌။ သူသည် ကျောက်ချင်းနှင့် သဘောတူညီမှုရရှိခဲ့ပြီး အရည်အသွေးမီသော ဒူးလေးများကို ပေးအပ်ခဲ့သော်လည်း အရောင်းအ၀ယ် စတင်ချိန်မှစ၍ ကျောက်ချင်းသည် သူ့အား ကြံစည်နေခဲ့သည်။ သူက ဒူးလေး အလုံအလောက်ဝယ်ပြီးသည်နှင့် စူးချန်ခုန်းဘက်ကို ဆန့်ကျင်ခဲ့သည်။ စူးချန်ခုန်းက ဒါကို ဘယ်လိုလုပ် ဒေါသမထွက်ဘဲ နေမည်နည်း။

"ခဏနေပါဦး။ ကျွန်တို့ ဒီအကြောင်းကို ပြောလို့ရတယ်လေ.. ကျွန်တော်က ကြာ..." ကျောက်ချင်း၏ လက်ဖဝါးများသည် ပြင်းထန်စွာ နာကျင်နေပြီး ချွေးများ စီးကျလာကာ စူးချန်ခုန်း ထိန်းထားနိုင်ရန်အတွက် သူ အလျင်စလိုပြောလာသည်။

သို့သော် စူးချန်ခုန်းသည် တခဏတောင် တုံ့ဆိုင်းမနေပါ။ သူသည် အကွာအဝေးကို ပိတ်ကာ တစ်ခါတည်းနှင့် သူ့နှလုံးသားထဲတွင် လူသတ်ချင်စိတ်အားလုံးကို ဖွင့်ထုတ်ပစ်လိုက်သည်။

ရွှီး! ရှိုက်!

အပိုင်းပိုင်းဖြတ်ခြင်း၊ အလျားလိုက်ခုတ်ခြင်း။

စူးချန်ခုန်းသည် လျင်မြန်သော တိုက်ခိုက်မှု နှစ်ခုကို အဆက်မပြတ် ဖြတ်တောက်ပြီး လေထဲတွင် ကြက်ခြေခတ်ပုံစံ ဖြတ်တောက်ပစ်လိုက်သည်။ ကျောက်ချင်းက သူတို့ကို တားချင်ပေမယ့် ကွဲကြေနေတဲ့ သူ့လက်တွေက အားနည်းနေ၏။

အသားစုတ်ပြဲနေသည့်အသံများကြားတွင် ကျောက်ချင်း၏ မျက်နှာဖုံးသည် နှစ်ခြမ်းကွဲသွားပြီး အသက်သုံးဆယ် သို့မဟုတ် လေးဆယ်ကျော်ခန့်ရှိပြီး ဖြူဖတ်ဖြူရော်နှင့် ရက်စက်ယုတ်မာသော မျက်နှာ ပေါ်လာသည်။ သူ့မျက်လုံးများသည် ကြောက်ရွံ့မှုနှင့် မလိုလားမှုတို့ဖြင့် ပြည့်နှက်နေ၏။ သူ့ခေါင်းနဲ့ ခါးနှစ်ဖက်မှာ သွေးရာတွေ ပေါ်လာပြီး ကျယ်ပြန့်လာကာ သူ့ခန္ဓာကိုယ်ကို နှစ်ပိုင်းကွဲသွားတော့လေသည်။

"ဒုတ်"

ကျောက်ချင်း၏ ခန္ဓာကိုယ်သည် ယခုအခါတွင် လေးပိုင်းကွဲ၍ ကွဲကြေနေသော လက်ဝါးကပ်တိုင်ပုံသဏ္ဍာန် ဒဏ်ရာပေါ်လာ၏။ မြေပြင်ပေါ်တွင် ပြန့်ကျဲနေသော သွေးများနှင့် ကလီစာများဖြင့် ရွှဲရွှဲစိုနေလျက်..