ဝူချင်းချီ။ လေးနက်သော ကျွမ်းကျင်မှု!

"ငါမတ်တပ်ရပ်နေရင်တောင် သာမန်လူတွေက ငါ့ကို ခွန်အားအပြည့်နဲ့ ထိုးကြိတ်ကန်ကျောက်ရင် တော်တော်ပင်ပန်းမှာပဲ။ အဓိက နေရာတွေကို ရှောင်လိုက်ရင် ကလေးတစ်ယောက် အယားပြေလာကုတ်တာလောက်ပဲ ရှိမှာ။"

စူးချန်ခုန်းက သူ့လက်သီးတွေကို ဆုပ်ထားရင်း အတွင်းထဲမှာ စွမ်းအားတွေ တဟုန်ထိုး တက်လာတာကို ခံစားလိုက်ရသည်။

နတ်ဘုရားရဲစွမ်းသတ္တိနယ်ပယ်တွင် သူသည် လက်ရွေးစင် စစ်သည်တစ်ရာ၏အဆင့်ကို ကျော်ဖြတ်နိုင်စွမ်းရှိသော လူတစ်ရာ၏ စွမ်းအားကို ပိုင်ဆိုင်ထားသည်ဟု ဆိုလိုသည်။

ထိုမျှသာမကဘဲ စူးချန်ခုန်း၏ ဝူချင်းချီသည် ယခင်က အဆင့် ၆ ၏ ၉၉% အထိရောက်ရှိခဲ့ပြီး ယခုအခါ အောင်မြင်မှုတစ်ခုသို့ ထုံးစံအတိုင်း တိုးတက်လာခဲ့သည်။

နောက်တစ်နေ့ အစောပိုင်းတွင် စူးချန်ခုန်းသည် ဝူချင်းချီကို လေ့ကျင့်ရန် စောစောထလာခဲ့သည်။

တောင်တိုက်ဝက်ဝံ။ အစာရှာကျား။ သံလက်မောင်း မျောက်ဝံ။

သံနက်အိမ်တော်၏အပြင်ဘက်ရှိ တောအုပ်တွင် စူးချန်ခုန်းသည် ဝူချင်းချီ၏ လုပ်ရိုးလုပ်စဉ်များကို လိုက်နာခဲ့ပြီး သူ၏လှုပ်ရှားမှုများက အသွင်မပြတ် စီးပျံ့နေသောကြောင့် ကိုယ်ခွဲများစွာ ခွဲထွက်တော့မည်နှယ်။ သူသည် တောအုပ်အတွင်းတွင် သက်ရှိထင်ရှား သွားလာလှုပ်ရှားနေသော ငှက်နှင့် တိရစ္ဆာန်မျိုးစုံများအသွင် အဆက်မပြတ် ပြောင်းလဲနေလေ၏။

“ရား”

စူးချန်ခုန်း ပြသနေသော ဝူချင်းရှီသည် အံ့ဩမှင်တက်စရာကောင်းပြီး ၎င်းတို့သည် ကျန်းမာရေးကို ထိန်းသိမ်းသည့် လက်သီးပညာတစ်ခုဟု မထင်ရလောက်အောင်ပင်။ တစ်ခါတစ်ရံ ကျားဟောက်သံက သစ်တောကို လှုပ်ခါသွားစေသလို တခြားငှက်တွေလည်း ထိတ်လန့်တကြား ပျံသန်းသွားတတ်သည်။ ကြွေဆင်းလာသော နှင်းပွင့်များသည် ကခုန်ကာ ကွဲကြေသွားကြသည်။

၎င်းက လေးနက်သော ကျွမ်းကျင်မှုပင်။

ပူနွေးသော ရေစီးကြောင်းသည် သူ့ခြေဖဝါးမှ တက်လာပြီး စူးချန်ခုန်းအား စူးရှသော အကြားအာရုံ၊ စိတ်အားထက်သန်မှုနှင့် အသစ်တဖန် ပြန်လည်မွေးဖွားခြင်းတို့ကို ပေးစွမ်းနေသည်။

“ဝူချင်းချီ အဆင့်တက်သွားပြီ…”

စူးချန်ခုန်းက သူ၏ ဝူချင်းချီသည် နယ်ပယ်သစ်တစ်ခုသို့ ထုံးစံအတိုင်း ဝင်ရောက်သွားသည်နှင့် အသက် ပြင်းပြင်းရှူသွင်းလိုက်သည်။

ဝူချင်းချီ (အဆင့် ၇၊ နက်နဲသော ကျွမ်းကျင်မှု၊ ၁%)

အမှန်တကယ်ပင် စူးချန်ခုန်းသည် တစ်ချက်ကြည့်လိုက်ပြီး သူ၏ ဝူချင်းချီသည် အထွတ်အထိပ်မှ လေးနက်သော ကျွမ်းကျင်မှုအဆင့်သို့ တိုးလာသည်ကို တွေ့လိုက်ရသည်။

စူးချန်ခုန်းသည် သူ၏ ဝူချင်းချီကို အသွင်ပြောင်းမှု အပြီးတိုင်ပြီဟု ခံစားခဲ့ရသည်။ အခုတော့ ကျန်းမာရေးထိန်းသိမ်းသည့်လက်သီး၏ မူလနယ်ပယ်အတွင်းရှိသော အရာဖြစ်သည့် ရုပ်နှင့် စိတ်ဝိညာဉ် နှစ်ခုလုံးကို ပိုင်ဆိုင်ထားသည်။ ဝူချင်းချီကို ကျင့်နေစဉ်တွင် သူသည် အမျိုးမျိုးသော သတ္တဝါများအဖြစ်သို့ ပြောင်းလဲသွားပုံရသည်။

စူးချန်ခုန်း၏ နားရွက်များသည် ငှက်တစ်ကောင်၏ အတောင်ပံခတ်သံကြောင့် လှုပ်ယမ်းသွား‌လေ၏။ ထိုအချိန်တွင် တောအုပ်အထက် ကောင်းကင်ယံ၌ နှင်းပွင့်များကြား စူးချန်ခုန်းအထက် ပေသုံးဆယ်ခန့်တွင် စာကလေးတစ်ကောင် ကခုန်နေလေ၏။

ဝှီးးးး

စူးချန်ခုန်းသည် ရုတ်တရက် ရွေ့လျားလာပြီး သစ်တောအတွင်း ပေလေးဆယ်နီးပါး မြင့်သော သစ်ပင်ကြီးတစ်ပင်၏ ပင်စည်ဆီသို့ ရုတ်တရက် တက်သွားကာ လက်နှစ်ဖက်နှင့် ခြေဖဝါးနှစ်ဖက်ကို အသုံးပြုလိုက်သည်။ သူ့တွင် မျောက်ဝံနှင့်တူသော သွက်လက်တက်ကြွမှုရှိသည်။

သူသည် သစ်ပင်ထိပ်သို့ ရောက်သည်နှင့် ဆယ်ပေနီးပါး လေထဲသို့ ခုန်တက်ကာ သူ၏ လက်ဖဝါးအတွင်း၌ စာကလေးကို ဖမ်းလိုက်သည်။

“ဖောင်း!”

ပေသုံးဆယ်နီးပါးမှ ဆင်းသက်လာသော စူးချန်ခုန်းသည် သူ့လက်များကို ဖြန့်ကာ သူ့ခန္ဓာကိုယ် ပေါ့ပါးလာသည်နှင့်အမျှ သူ့၏ ဆင်းသက်မှုသည် နှေးကွေးသွားပုံရသည်။ သူနင်းလိုက်တဲ့အခါ သူ့ခြေထောက်တွေက နှင်းတောထဲမှာ ခြေရာ တိမ်တိမ်လေးသာ ကျန်ရစ်ခဲ့သည်။

ထိုသို့သော အရှိန်အဟုန်နှင့် သွက်လက်မှုတို့သည် မျောက်ဝံကဲ့သို့ သွက်လက်ပြီး ငှက်တစ်ကောင်ကဲ့သို့ လျင်မြန်သော မြင်ကွင်းကို ကြည့်ရှုသူအပေါင်းအား အံ့အားသင့်စေခဲ့သည်။

"နက်နဲသော ကျွမ်းကျင်မှု အဆင့် ၇ ထိ ဝူချင်းရှီကို လေ့ကျင့်ခြင်းကြောင့် ငါက ကျားတစ်ကောင်ရဲ့ ရက်စက်မှု၊ သမင်တစ်ကောင်ရဲ့ငြိမ်သက်မှု၊ ဝက်ဝံတစ်ကောင်ရဲ့တည်ငြိမ်မှု၊ မျောက်ဝံတစ်ကောင်ရဲ့ သွက်လက်မှု၊ ငှက်တစ်ကောင်ရဲ့ပေါ့ပါးမှုတွေကို အသွင်သဏ္ဍာန်ရော စိတ်ဝိဥာဉ် သဟဇာတဖြစ်မှုကိုရော အမှန်တကယ် ရရှိခဲ့တယ်။”

စူးချန်ခုန်းသည် အသက်ပြင်းပြင်းရှူပြီး မပြုံးဘဲ မနေနိုင်တော့ပေ။

ယခင်က ကျောက်ချင်းနှင့် တိုက်ပွဲတွင် စူးချန်ခုန်းသည် အချိန်အတော်ကြာ အနိုင်ယူရန် ရုန်းကန်ခဲ့ရသော်လည်း ယခုအခါ တူညီသော ခွန်အားနှင့် အရှိန်ဖြင့် ရင်ဆိုင်ရသောကြောင့် စူးချန်ခုန်းသည် ဝူချင်းချီ အဆင့် ၇ ဖြင့် ကျောက်ချင်းကို အကွက်အနည်းငယ်နှင့် အနိုင်ယူနိုင်မည်ဟု ယုံကြည်သည်။

တူညီသော ကာယစွမ်းရည်များဖြင့် အောင်ပွဲအတွက် အဆုံးအဖြတ်ပေးသည့် အချက်သည် သိုင်းပညာစွမ်းရည်များ၏ ဆန်းပြားမှု ဖြစ်လိမ့်မည်။

"ကွိ ကွိ"

စူးချန်ခုန်း၏ လက်ဖဝါးထဲမှ စာကလေးသည် ပြင်းပြင်းထန်ထန် ရုန်းကန်နေ၏။

စူးချန်ခုန်းက ပြုံးပြီး သူ့လက်ချောင်းတွေကို ဖွင့်လိုက်သည်။ စာကလေးသည် ချက်ချင်းပင် အတောင်များကို ဖွင့်ကာ စူးချန်ခုန်း၏ ချုပ်ကိုင်မှုမှ ထွက်ပြေးလွတ်မြောက်ပြီး တောအုပ်အထက် ကောင်းကင်သို့ ပျောက်ကွယ်သွားလေ၏။

"နတ်ဘုရားရဲစွမ်းသတ္တိနယ်ပယ်ကို ရောက်ခဲ့ပြီ။ ဝူချင်းချီကလည်း အဆင့် ၇ အထိတက်သွားခဲ့ပြီ။ နောက်တစ်ဆင့်က လိပ်အသက်ရှူနည်းမှာ အဆင့်တက်ဖို့ပဲ။"

စူးချန်ခုန်းသည် သူ၏ အတွေးအမြင်များကို စုစည်းပြီး သံနက်အိမ်တော်သို့ ပြန်သွားကာ ပန်းပဲလုပ်ခြင်းနေ့သစ်ကို စတင်လိုက်သည်။ သူသည် လိပ်အသက်ရှူနည်း၏ လေ့ကျင့်မှုကို လျစ်လျူမရှုနိုင်ပေ။

ကျောက်ချင်းထံမှ ရရှိသော ပိုက်ဆံသည် လပေါင်းများစွာ အသုံးပြုရန် လုံလောက်သောကြောင့် လိပ်အသက်ရှူနည်း၏ အောင်မြင်မှုက အနှေးနှင့် အမြန်ဖြစ်လာမှာပင်။

မျက်စိတစ်မှိတ်အတွင်းမှာပဲ နှစ်လတာဟာ လျှပ်တစ်ပြက်အတွင်း ကုန်လွန်ခဲ့ပြီး ကြမ်းတမ်းလှတဲ့ ဆောင်းရာသီလည်း ကုန်ဆုံးတော့ပေမည်။ ဤနှစ်လတာကာလအတွင်း စူးချန်ခုန်းသည် ဒူးလေးမြှား သို့မဟုတ် မြှားများကို မပြုလုပ်ခဲ့ဘဲ သူ၏ သံဖြတ်ဓားကို ပြန်လည်ပြုပြင်ရန် အချိန်ယူကာ ကျောက်ချင်း၏ ရွှေအနက်ရောင်လက်အိတ်များကို အရည်ဖျော်ပြီး ဓားတွင် ပေါင်းစည်းရန် အချိန်ယူခဲ့သည်။

ရွှေနက်ပိဿာပေါင်းများစွာဖြင့် ရောစပ်ထားသော သံဖြတ်ဓားသည် ယခုအခါတွင် စိမ်းညိုရောင်ဖျော့ဖျော့ ဖြစ်လာပြီး ၎င်း၏အလေးချိန်မှာ များစွာ တိုးလာကာ စုစုပေါင်း *လျန်နှစ်ဆယ်နီးပါးရှိသည်။ ၎င်းက ပိုကြမ်းပြီး ပိုထက်လာသည်။ မူလက အရည်အသွေးကောင်းမွန်သော ဓားတစ်လက်ဖြစ်ခဲ့သည့်အရာကို ယခုအခါ အဖိုးတန်ဓားကောင်း ရတနာတစ်လက်အဖြစ် ခေါ်ဆိုနိုင်လေပြီ။

(T/N *လျန်= တရုတ်အတိုင်းအတာယူနစ်၊ တစ်လျန်=၃၇.၃ဂရမ်)

ထို့အပြင် လိပ်အသက်ရှူနည်းတွင် နောက်ဆုံးတော့ စူးချန်ခုန်းသည် နှစ်လအကြာတွင် ညအိပ်ရာ၌ အောင်မြင်မှုတစ်ခုကို ရရှိခဲ့သည်။

တိတ်ဆိတ်ငြိမ်သက်သော ညတစ်ညတွင် အရာအားလုံး တိတ်ဆိတ်နေခဲ့သည်။ စူးချန်ခုန်းသည် သူ့ကုတင်ပေါ်တွင် ပေါ့ပေါ့ပါးပါး အိပ်နေပြီး မျက်လုံးများကို တင်းတင်းစေ့ကာ အသက်ရှုသွင်း ရှူထုတ်လုပ်နေသည်။ သူအသက်ရှုလိုက်တိုင်း အလွန်ရှည်လျားပြီး ရှူရှိုက်လိုက်သောလေသည် ပြာဖျော့ဖျော့ အမျှင်တန်းလေးနှင့် တည်ငြိမ်သော အရောင်အဝါ ရှိလေ၏။

လိပ်အသက်ရှူနည်းသည် အထွတ်အထိပ်သို့ရောက်ရှိပြီး နောက်ထပ်စက်ဝန်းတစ်ခု ပြီးမြောက်သောအခါ စူးချန်ခုန်းသည် ပင်လယ်ကြမ်းပြင်တွင် ချောင်းမြောင်းနေသော ဧရာမလိပ်ကြီးက ရုတ်တရက် အသက်ရှူရန် ပင်လယ်မျက်နှာပြင်ပေါ်သို့ တက်လာရာမှ လှိုင်းလုံးကြီးများ လှိမ့်တက်လာကဲ့သို့ ပြင်းထန်စွာ ရှူသွင်းလိုက်ပြီး အသက်ရှူသွင်းလိုက်သည်။

"ဝူးးးးးးး ဝူးးးးးးး"

တိတ်ဆိတ်သောအခန်းတွင် စစ်မှန်သော ချီစွမ်းအင်သည် လှိုင်းလုံးကြီးများကဲ့သို့ လှိုင်းလုံးကြီးများ လှိမ့်တက်လာပြီး ကြည်လင်သော ရေများ တဟုန်ထိုး ထွက်ပေါ်သံက ပဲ့တင်ထပ်နေ၏။

စူးချန်ခုန်း၏ခန္ဓာကိုယ်အတွင်း၌ လိပ်အသက်ရှူနည်း စစ်မှန်သော ချီစွမ်းအင်သည် လျင်မြန်စွာ ပျံ့နှံ့သွားပြီး အသွင်ပြောင်းခြင်းကို လုပ်ဆောင်နေသည်။ အပြာရောင် တစ်စွန်းတစ်စပါသော အဖြူရောင် ချီစွမ်းအင်က ပြောင်းလဲလာသည်။ အပြာသည် ပို၍ထင်ရှားလာပြီး အဖြူက နည်းလာကာ ကြည်လင်သော ရေကန်အဖြစ်သို့ ပြောင်းလဲသွားသကဲ့သို့ပင်။

"လိပ်​အသက်​ရှူနည်းလည်း​... ​အဆင့်တက်​သွားပြီ!"

စူးချန်ခုန်းက လေးလေးနက်နက် ရှူထုတ်လိုက်ပြီး ကျေနပ်စွာ ခေါင်းညိတ်လိုက်သည်။

လိပ်​အသက်​ရှူနည်း ပညာ (အဆင့် ၆ အထွတ်အထိပ်အဆင့် ၁%)

တစ်နှစ်နီးပါးကြာခဲ့သော်လည်း လိပ်​အသက်​ရှူနည်းသည် နောက်ဆုံးတွင် အခြားအဆင့်သို့ တက်သွားခဲ့သည်။

"ဂျွတ်!"

စူးချန်ခုန်းသည် မည်သည့်အားမျှ အတင်းအကျပ်မှ မသုံးဘဲ သစ်သားခွက်ကို ညင်သာစွာ ကောက်ယူလိုက်သော်လည်း သူ့ချီစွမ်းအင်၏ လှုံ့ဆော်မှုနှင့် သက်ရောက်မှုကြောင့် ဤသစ်သားခွက်သည် ကြီးမားသော လှိုင်းလုံးကြီးဖြင့် ရိုက်ခတ်သွားသကဲ့သို့ အက်ကွဲသံများ ထွက်ပေါ်လာသည်။

"အံ့ဩစရာပဲ၊ ငါ့ရဲ့ အတွင်းအားကို အရင်က ညံ့ဖျင်းတယ်လို့ မယူဆထားပေမယ့် အဲ့တာက လေးနက်တဲ့ ကျွမ်းကျင်မှုနဲ့ ဘာမှ မသက်ဆိုင်ဘူးပဲ။ အခု ငါ ထူးထူးခြားခြား စွမ်းအားတစ်ခု ပိုင်ဆိုင်ထားတယ်လို့ ပြောလို့ရတယ်။"

စူးချန်ခုန်း ပြုံးလိုက်လေ၏။

လိပ်​အသက်​ရှူနည်းဖြင့် သာမာန်လူတစ်ဦးသည် ၎င်းကို လေ့ကျင့်ရန် ငယ်စဉ်ကလေးဘဝမှစ၍ ဤအခြေအနေကို ရောက်ရန် ဆယ်စုနှစ်များစွာ အားထုတ်ရပေလိမ့်မည်။

"အခုအချိန်တော့ နတ်ဘုရားရဲစွမ်းသတ္တိနယ်ပယ်ထဲကို ရောက်တာနဲ့ ဝူချင်းရှီနဲ့ လိပ်​အသက်​ရှူနည်းနှစ်ခုစလုံးကို အဆင့်တက်သွားပြီး ငါက လွန်ခဲ့တဲ့ နှစ်လလောက်ကနဲ့ ကမ္ဘာပေါင်းများစွာလောက် ခြားနေသလိုပဲ။ ချင်းရွှေမြို့မှာရှိတဲ့ ထိပ်တန်း ကိုယ်ခံပညာရှင်တွေထဲမှာတောင် အဆင့်သတ်မှတ်ခံရနိုင်သေးတယ်။"

စူးချန်ခုန်းသည် သူ့ကိုယ်သူ ပိုမိုအားကောင်းလာသည်ကို ခံစားလိုက်ရပြီး အပြောင်းအလဲကို တိတ်တဆိတ် အံ့သြသွားမိသည်။

ခန္ဓာကိုယ် သန့်စင်ခြင်းနှင့် နတ်ဘုရားရဲစွမ်းသတ္တိနယ်ပယ်အဆင့်တွင် ကြီးမြတ်သော အောင်မြင်မှုများ ရရှိပြီးနောက် သူသည် ချင်းရွှေမြို့တွင် အလွန်ရှားပါးပြီး အစွမ်းထက်သူများထဲမှ တစ်ဦးဖြစ်နေလေပြီ။ စူးချန်ခုန်းသည် အတွင်းရော အပြင်ပါ နည်းပညာများကိုပါ လေ့ကျင့်ထားသောကြောင့် နတ်ဘုရားရဲစွမ်းသတ္တိ အဆင့်တွင်ပင် သူသည် အလွန်ထူးခြားသည်ဟု ယူဆနိုင်သည်။ ကြိုတင်စာရင်းသွင်းခြင်းမရှိဘဲ ချင်းရွှေမြို့၏ သိုင်းလောကတွင် သူစိတ်တိုင်းကျ မလုပ်နိုင်သော်လည်း အနည်းဆုံးတော့ ထိပ်တန်းအဆင့်တွင် ပါဝင်နိုင်သည်။

စူးချန်ခုန်း ဂရုစိုက်ဆုံးအရာက သူ့သက်တမ်းနဲ့ စွမ်းရည်အပြောင်းအလဲပါပဲ။ သက်တမ်းနှင့် စွမ်းရည်ကို ရှည်ကြာ ချဲ့ထွင်စေရန် ရည်ရွယ်၍ လိပ်​အသက်​ရှူနည်းနှင့် ဝူချင်းရှီကို အဓိကထား လေ့ကျင့်ခြင်းဖြစ်သည်။

အမည်- စူးချန်ခုန်း (အသက် ၁၇ နှစ်)

သက်တမ်း- နှစ် ၁၀၀။

စွမ်းရည်တန်ဖိုး- ၁၅ မှတ်

ကျွမ်းကျင်သော သိုင်းပညာ- ဝူချင်းရှီ ( သတ္တမအဆင့် နက်နဲသော ကျွမ်းကျင်မှုအဆင့် ၁၅%)၊

သံဖြတ်ဓားနည်းပညာ (ဆဌမအဆင့် အထွတ်အထိပ်အဆင့် ၄၉%)၊

လိပ်​အသက်​ရှူနည်း (ဆဌမအဆင့် အထွတ်အထိပ်အဆင့် ၁%)

ကျွမ်းကျင်သော အတတ်ပညာ- ပန်းပဲပညာ (ဆဌမအဆင့် အထွတ်အထိပ်အဆင့် ၃၇%)

သူ၏ အရည်အချင်းပြဘောင်ကွက်ကို တစ်ချက်ကြည့်လိုက်သည်။

ဝူချင်းရှီနှင့် လိပ်​အသက်​ရှူနည်းနှစ်ခုစလုံး အဆင့်တက်ခြင်းဖြင့် စူးချန်ခုန်း၏ သက်တမ်းသည် အနှစ် ၂၀ တဟုန်ထိုး မြင့်တက်လာသည်။ ၎င်းသည် ကမ္ဘာပေါ်ရှိ လူဦးရေ ၉၉%လောက် မနေရသော နှစ်တစ်ရာ သက်တမ်း မှတ်တိုင်သို့ ရောက်ရှိသွားသည့် အမှတ်အသားဖြစ်သည်။ သူ တကယ်ပဲ အသက်ရှည်တယ်လို့ ယူဆနိုင်ပါသည်…