ဝါးခွဲခြင်းအဟုန်! နတ်ဘုရားရဲစွမ်းသတ္တိအဆင့်ခုတ်ချက်။ (၃)

အနက်ရောင် မြင်းတပ်ဂိုဏ်းမှ ကျန်သည့် သိုင်းပညာရှင်များသည် ယွီကျောင်းကို ဝိုင်းရံထားကြသည်။ သူမ၏လက်ထဲတွင်ရှိသော ဓားကောက်သည် အဆိပ်ပြင်းမြွေတစ်ကောင်က ၎င်း၏လျှာကို ထုတ်လိုက်သကဲ့သို့ လူနှစ်ယောက်ကို မြေပြင်ပေါ်သို့ အမှောက်သိပ်လိုက်ပြီဖြစ်သော်လည်း သူမလည်း ဆိုးရွားသောအခြေအနေသို့ တွန်းပို့ခံနေရသည်။ သို့သော် ချောင်ဟုန်၏ သေခါနီးတွင် ထွက်ပေါ်လာသော ဟိန်းဟောက်သံက သူတို့အား တပြိုင်တည်း ရပ်တန့်သွားစေခဲ့သည်။

"ဒုခေါင်းဆောင်... သေပြီ!"

အနက်ရောင် မြင်းတပ်ဂိုဏ်း၏ သိုင်းပညာရှင် တစ်ဒါဇင်ခန့်သည် မြေပြင်ပေါ်မှ နှစ်ခြမ်းကွဲနေသော အလောင်းကို မယုံနိုင်လောက်အောင် စိုက်ကြည့်နေကြပြီး ၎င်း၏ ကြောက်မက်ဖွယ်ရာ သွေးများနှင့် အစွန်းအထင်း အညစ်အကြေးများကို ပုံရိပ်ယောင်များလားဟု သံသယဝင်နေကြသည်။

ချင်းရွှေမြို့ ဧရိယာတွင် ထိပ်တန်းအဆင့်ရှိ နတ်ဘုရားရဲစွမ်းသတ္တိနယ်ပယ်၏ သိုင်းပညာရှင် ချောင်ဟုန်သည် အကွက်အနည်းငယ်မျှသာဖြင့် စူးချန်ခုန်းကို ရင်ဆိုင်လိုက်ရပြီး ဖျက်ဆီးခံလိုက်ရသော ခန္ဓာကိုယ်ကြီးသာ ကျန်ရစ်ခဲ့သည်။

အနက်ရောင်ဝတ်ရုံနှင့် ဓားကိုင်ကာ ထိုနေရာတွင် ရပ်နေသော စူးချန်ခုန်းသည် သေမင်းတမန်က တံစဉ်းရှည်ကြီး ကိုင်ထားသည့်အသွင်ရှိပြီး သူ့ထံမှ တစ်ချက်ကြည့်ခံလိုက်ရရုံနှင့် လုံးဝ ကြောက်လန့်သွားစေရန် လုံလောက်သည်။

"သူ... သူ ချောင်ဟုန်ကို သတ်လိုက်တယ်"

ယွီကျောင်းသည် သူမရှေ့မှ မြင်ကွင်းကြောင့် ထိတ်လန့်သွားလေ၏။ သူမရဲ့ဖခင်တောင် ချောင်ဟုန်ကို ရင်ဆိုင်ရလျှင်ပင် အောင်ပွဲအတွက် ကြာရှည်စွာ တိုက်ပွဲဝင်ရန် လိုအပ်သည်။ စူးချန်ခုန်းတို့ တိုက်ပွဲက ပြီးဆုံးသွားသောအခါ သူမဘက်မှ တိုက်ပွဲက စတင်ရုံသာရှိသေးသည်။

စူးချန်ခုန်း လေ့ကျင့်ထားသော သံဖြတ်ဓါးနည်းပညာသည် ဤအချက်ကြောင့်သာ နာမည်ကြီးလေသည်။ သူ့ကို ဖိနှိပ်လိုက်ပါက သူနှင့် အကြာကြီး လုံးထွေးရန် မဖြစ်နိုင်တော့ပေ။ အနိုင်ရသူကို လျင်မြန်စွာ ဆုံးဖြတ်နိုင်လိမ့်မည်။

“သတ်!”

ယွီကျောင်းသည် ထိတ်လန့်တုန်လှုပ်သွားသော်လည်း သူမသည် တည်ငြိမ်မှုကို လျင်မြန်စွာ ပြန်လည်ရယူပြီး သူမ၏ ဓားကောက်သည် အနက်ရောင် မြင်းတပ်ဂိုဏ်း သိုင်းပညာရှင်နှစ်ဦးကို ခေါင်းဖြတ်သတ်ပစ်ရန် လျင်မြန်သော ခုတ်ချက်များဖြင့် လုပ်ဆောင်ခဲ့သည်။

"ဒုခေါင်းဆောင် သေပြီ!"

“ပြေးတော့!”

ချောင်ဟုန် သေဆုံးသွားပြီးနောက် ကျန်ရှိသော အနက်ရောင် မြင်းတပ်ဂိုဏ်း သိုင်းပညာရှင်များသည် လွတ်မြောက်ရန် ရုန်းကန်လှုပ်ရှားကာ ခုခံလိုစိတ် မရှိကြတော့။

စူးချန်ခုန်းက လှုပ်ရှားလိုက်ပြီဆိုမှတော့ သူတို့ထဲက တစ်ယောက်ကိုမှ အလွှတ်ပေးမှာ မဟုတ်ပါ။ သူ၏ပုံသဏ္ဍာန်သည် လျှပ်စီးလက်သကဲ့သို့ ရွေ့လျားကာ ထွက်ပြေးသွားသော အနက်ရောင် မြင်းတပ်ဂိုဏ်း ကိုယ်ခံပညာရှင်တို့ကို လျင်မြန်စွာ လိုက်မှီသွားပြီး သူ၏ သံဖြတ်ဓား၏ ပေါ့ပေါ့ပါးပါး လွှဲလိုက်ရာ ဓားသည် ခေါင်းများကို အလွယ်တကူ ဖြတ်သွားလေ၏။

ရက်စက်လှသော ယွီကျောင်းပါ ၀င်ခုတ်သဖြင့် မည်သူမျှ တောတွင်းမှ မလွတ်မြောက်နိုင်ခဲ့ပေ။ သူတို့အားလုံးကို အခင်းဖြစ်နေရာမှာပဲ ခေါင်းဖြတ်သတ်ပစ်လိုက်သည်။

များမကြာမီပင် တောအုပ်သည် အလောင်းများဖြင့် ပြည့်နှက်နေသော မြေပြင်၊ သွေးနံ့များ မွှန်ထူနေသော လေထုများဖြင့် တစ်ဖန် တိတ်ဆိတ်သွားပြီး ယွီကျောင်းနှင့် စူးချန်ခုန်းတို့သာ ကျန်ရစ်ခဲ့သည်။

ယွီကျောင်းသည် ချောင်ဟုန်၏ နှစ်ခြမ်းကွဲနေသော အလောင်းကို တစ်ချက်ကြည့်လိုက်ရုံဖြင့် ဦးရေပြား ယားယံလာ၏။ သူမသည် ခက်ခက်ခဲခဲ တံတွေးမျိုချလိုက်ပြီး အပြုံးတောင့်တောင့်ကြီးကို ညှစ်ထုတ်လိုက်ကာ "ကျေးဇူးတင်ပါတယ် သူရဲကောင်းလေး။ ဒီမိန်းကလေးကို လူဆိုးတွေ ဖယ်ရှားဖို့ ကူညီပေးခဲ့တဲ့အတွက် ကျေးဇူးတင်ပါတယ်" ဟုဆိုလိုက်သည်။

ယွီကျောင်းသည် ယဉ်ကျေးသိမ်မွေ့ပြီး နူးညံ့သိမ်မွေ့သော အမူအရာကြောင့် သူမသည် အလွန် အားနည်းနေပုံသော်လည်း စူးချန်ခုန်းသည် သူမ သတ်ဖြတ်သောအခါတွင် သိပ်မတုန်လှုပ်ကြောင်း ရှင်းရှင်းလင်းလင်း တွေ့ခဲ့ရသည်။ သူမက အားနည်းသည့်ပုံပေါက်ဖို့ဆိုတာ ဝေးသေးသည်။

စူးချန်ခုန်းက အပြုံးမမည်တဲ့ အပြုံးနှင့် “ကျွန်တော့်ကို ဒီထဲ ဆွဲသွင်းခဲ့တဲ့အတွက် ကျွန်တော်လည်း ခင်ဗျားကို ကျေးဇူးတင်ပါတယ်နော်" ဟု ပြောလိုက်သည်။

စူးချန်ခုန်းသည် ဝင်စွက်ဖက်ရန် ရည်ရွယ်ချက်မရှိသော်လည်း ယွီကျောင်းက သူ ပုန်းအောင်းရာနေရာကို တမင်တကာ ဖော်ထုတ်ကာ သတ်ဖြတ်ခြင်းများကို ပြန်လည်စတင်စေခဲ့သည်။

ယွီကျောင်း၏ အပြုံးသည် အနည်းငယ် တောင့်တင်းသွားသည်။ သူမသည် အနက်ရောင် မြင်းတပ်ဂိုဏ်း၏ အာရုံကိုဆွဲဆောင်ရန် ပုန်းနေသော ဖြတ်သွားဖြတ်လာကို အသုံးချပြီး အသက်ရှင်ဖို့ အခွင့်အလမ်းအနည်းငယ်ကို ရှာဖွေရန်မျှော်လင့်ချက် ပရမ်းပတာများကို ဖန်တီးခဲ့ခြင်းဖြစ်သည်။ ဤသူစိမ်းက ဤမျှကြောက်ဖွယ်ကောင်းမယ်မှန်း သူမ ဘယ်လိုလုပ် သိခဲ့မှာလဲ။ ခုတ်ချက် အနည်းငယ်မျှဖြင့် သူသည် အစွမ်းထက်သော တိုက်ခိုက်ရေးသမား ချောင်ဟုန်ကို အညှာအတာမဲ့စွာ နှစ်ခြမ်းခြမ်းလိုက်ပြီး ရက်စက်ကြမ်းကြုတ်မှု၏ ပြယုပ်ဖြစ်လာခဲ့သည်။

ယွီကျောင်းက ဦးညွှတ်ကာ ပြောလိုက်သည်။ "အဲ့တာက ကျွန်မရဲတင်းလွန်းခဲ့တာပါ။ ကျွန်မရဲ့ အဖေက ကျောက်စိမ်းဖြူဂိုဏ်းရဲ့ လက်ထောက်ဂိုဏ်းခေါင်းဆောင် ယွီရှားလေ။ ကျွန်မတို့ကို အထင်မသေးဘူးဆိုရင် ကျွန်မတို့ရဲ့ ဂိုဏ်းကို လာလည်ဖို့ ဖိတ်ခေါ်ပါတယ်နော်။ ကျွန်မအဖေက ဧည့်ဝတ်ကျေပွန်အောင် ဧည့်ခံမှာပါ။ ကျွန်မရဲ့အသက်ကို ကယ်တင်ပေးတဲ့ သူရဲကောင်းအတွက် နတ်ဘုရားလက်နက်ပဲဖြစ်ဖြစ် ရတနာတွေ စည်းစိမ်ဥစ္စာတွေပဲဖြစ်ဖြစ် ကျွန်မရဲ့အဖေက လက်မတွန့်ဘဲ ပေးမှာပါ"

ယွီကျောင်းသည် မကြာသေးမီက အဖြစ်အပျက်၏ အကြောင်းအရာကို ကျွမ်းကျွမ်းကျင်ကျင်နှင့် စကားလမ်းကြောင်း လွဲကာ သူမ၏ သရုပ်မှန်ကို ထုတ်ဖော်ပြသခဲ့ပြီး သူမအဖေက စူးချန်ခုန်းကို ဆုကြေးအပြည့်အဝ ပေးမည်ဟု ကတိပြုကာ သူ့စိတ်ထဲမှာ ရှိနိုင်သည့် မည်သည့် သတ်ဖြတ်လိုစိတ်ကိုမဆို ရှင်းရှင်းလင်းလင်း ဖယ်ရှားပစ်ရန် ရည်ရွယ်ထားသည်။

စူးချန်ခုန်းသည် အနည်းငယ် သွေးဆောင်ခံလိုက်ရသည့်ပုံပင်။ သူက ခဏလောက်စဉ်းစားပြီး ဖြည်းညှင်းစွာ ခေါင်းညိတ်ပြလိုက်သည် "ကောင်းပြီ။ ခင်ဗျား ဒီနေရာက အရင်ထွက်သွားလိုက်ပါ။ ကျွန်တော် ဒီနေရာကို ဂရုစိုက်ဖို့လိုတယ်။ တစ်နေ့ကျရင် ကျောက်စိမ်းဖြူဂိုဏ်းကို လာလည်ပါ့မယ်။"

သူ့စကားကြားတော့ ယွီကျောင်း ဝမ်းသာသွား၏။ သိုင်းပညာရှင်ငယ်လေးက သူမကို သတ်ဖြတ်ရန် ရည်ရွယ်ချက်မရှိပါ။ သူမ၏ ဆွဲဆောင်မှုက အလုပ်ဖြစ်ပုံရသည်။ သူမကို သတ်လိုက်တာက အကျိုးမရှိသလို သူ့အကျိုးစီးပွားကို မြှင့်တင်ဖို့ အခွင့်အရေးရလာတဲ့အခါ မဟာမိတ်ဖွဲ့ထားတာက ပိုကောင်းပါသည်။

"ကျေးဇူးအများကြီးတင်ပါတယ် သူရဲကောင်းလေး။ မင်း ကျောက်စိမ်းဖြူဂိုဏ်းကို ရောက်လာမယ့် အချိန်ကို စောင့်နေပြီး ကိုင်တိုင်လာကြိုဆိုမှာပါ!"

ယွီကျောင်းသည် ထပ်ခါတလဲလဲ ဦးညွှတ်ပြီး ကျေးဇူးတင်စကားဆိုကာ တွန့်ဆုတ်မနေဘဲ လှည့်ကာ အမြန်ထွက်သွားတော့သည်။

"ဒီသိုင်းပညာရှင်လေးက ကြောက်စရာကောင်းလွန်းတယ်... အချိန်တန်ရင် သူက ချင်းရွှေမြို့မှာ ထိပ်တန်းကျွမ်းကျင်ပညာရှင်တစ်ယောက် မလွဲမသွေ ဖြစ်လာမှာပဲ။ သူက ချောင်ဟုန်ကို သတ်နိုင်မှတော့ ကုန်ကျစရိတ် ဘယ်လောက်ပဲရှိရှိ ကျောက်စိမ်းဖြူဂိုဏ်းမှာ သူ့ကို ထားဖို့ ဒီအခွင့်အရေးကို အသုံးပြုနိုင်တာပဲ။"

လမ်းလျှောက်ထွက်သွားတော့ ယွီကျောင်းက သူမစိတ်ထဲတွင် အလျင်အမြန် ကြံစည်လိုက်သည်။

ကျောက်စိမ်းဖြူဂိုဏ်းသည် အနက်ရောင် မြင်းတပ်ဂိုဏ်းကို တိုက်ခိုက်ရာတွင် အားနည်းချက် ရှိနေတာဖြစ်ပြီး ထိုသို့သော အင်အားကြီးမားသည့် မဟာမိတ်ရှိခြင်းကြောင့် အလုံးစုံ အင်အားကို သိသိသာသာ တိုးမြင့်လာစေနိုင်သည်။

"နတ်ဘုရားလက်နက်တွေ၊ သိုင်းပညာလျှို့ဝှက်လက်စွဲစာအုပ်တွေ၊ ပြိုင်ဘက်ကင်း အလှလေးတွေ သူ့လို သူရဲကောင်းငယ်လေးကို ဆွဲဆောင်နိုင်တဲ့အရာအားလုံး..."

ယွီကျောင်းက စူးချန်ခုန်းကို ဘယ်လို ဆွဲဆောင်ရမလဲဆိုတာ စိတ်ကူးနေရင်းနဲ့ ရုတ်တရက် လည်ပင်းနောက်ဘက်မှ အေးစက်မှုကို ခံစားလိုက်ရပြီး သူမရဲ့ ခေါင်းက လည်ပင်းကနေ ကွာကျလာကာ မြေပြင်ပေါ်ကို ပြုတ်ကျသွားသောကြောင့် ခေါင်းမရှိတော့တဲ့ ပေါ့ပါးမှုတစ်ခု ခံစားလိုက်ရလေ၏။

ဦးခေါင်းမဲ့နေသော သူမ၏ ကိုယ်ခန္ဓာသည် မြေပြင်ပေါ်သို့ ဖြည်းညှင်းစွာ ပြုတ်ကျသွားသည်ကို မြင်လိုက်ရပြီး သူမ၏နောက်တွင် အမူအယာမဲ့သော မျက်နှာ၊ အရိုးခိုက်အောင် အေးစက်သော မျက်လုံးများဖြင့် သံဖြတ်ဓားကို ဓားအိမ်ထဲသို့ ထည့်လိုက်သော စူးချန်ခုန်းကိုလည်း မြင်လိုက်ရသည်။

"ငါ...သေသွားပြီလား"

ခုနလေးတင်က သေခြင်းတရားမှ သီသီလေး လွတ်မြောက်လာခဲ့သော ယွီကျောင်းသည် ဤနေရာ၌ အသက်ဆုံးရှုံးခဲ့ရသည်ကို မယုံကြည်နိုင်သေးပေ။ သူမ၏ အသိစိတ်များ ဝေဝါးလာပြီး မျက်လုံးထဲမှ အလင်းရောင်များ ပျောက်ကွယ်သွားတော့သည်။

"ငါ့ကို တကယ်ပဲ ငတုံးလို့ ထင်နေတာလား"

ယွီကျောင်း၏ ခန္ဓာကိုယ်ကို ကြည့်ရင်း စူးချန်ခုန်းက အေးစက်စွာ ထေ့ငေါ့လိုက်သည်။

ချောင်ဟုန်နှင့် အခြား အနက်ရောင် မြင်းတပ်ဂိုဏ်းသိုင်းပညာရှင်တို့နှင့် နှိုင်းယှဉ်ပါက စူးချန်ခုန်းသည် ယွီကျောင်းအား သတ်ဖြတ်လိုစိတ် ပိုပြင်းထန်သည်။ သူမက သူ့အား အရှုပ်အထွေးထဲ ဆွဲသွင်းခဲ့သောကြောင့် ဖြစ်သည်။

စူးချန်ခုန်းသည် ယွီကျောင်းနှင့် အလားတူ အခြေအနေမျိုးတွင် ရှိနေပါက သူမကဲ့သို့ အပြစ်မဲ့သောလူကို ဆွဲသွင်းမိလောက်မလား သူ မသိသော်လည်း ယွီကျောင်းကတော့ သူ့အား သေချာပေါက် ဆွဲသွင်းခဲ့သည်။ သူ့မှာသာ လုံလောက်သော ကြံ့ခိုင်မှုမရှိခဲ့ပါက ထိုနေရာတွင်ပင် သေချာပေါက် သေဆုံးသွားရလိမ့်မည်။

ချောင်ဟုန်နှင့် အခြားလူများကို သတ်ပြီးနောက် စူးချန်ခုန်းသည် သူ့အား ဒုက္ခရောက်အောင် ဆွဲသွင်းခဲ့သော ယွီကျောင်းကို ဘာကြောင့်များ သက်ညှာပေးရန် စဉ်းစားပေးရမည်နည်း။

ထို့အပြင် စူးချန်ခုန်းသည် ကျောင်းစိမ်းဖြူဂိုဏ်းနှင့် အနက်ရောင် မြင်းတပ်ဂိုဏ်းအကြား ပဋိပက္ခထဲတွင် ပါဝင်ရန် စိတ်မ၀င်စားပေ။

အနက်ရောင် မြင်းတပ်ဂိုဏ်းသည် အမှန်တကယ် စက်ဆုပ်ဖွယ်ကောင်းသော်လည်း ကျောင်းစိမ်းဖြူဂိုဏ်းကလည်း သူတော်စင် ဟုတ်မနေပေ။ သူတို့က အနက်ရောင် မြင်းတပ်ဂိုဏ်းထက် ပို၍ ချုပ်တည်းထားသော်လည်း အပြစ်မဲ့သူများနှင့် အခြားသူများကို ညှဉ်းပန်းနှိပ်စက်ခြင်း ကိစ္စရပ်များစွာနှင့် ချိတ်ဆက်နေလေသည်။

ဘယ်​ဘက်​က​ပဲ ပျက်ဆီး​သွားပါ​စေ သူတို့က ခံထိုက်ပါပေသည်..