နတ်ဆိုးတိုက်ကြီး၏ ထိပ်တန်း နတ်ဆိုးဧကရာဇ်

နတ်ဆိုးတိုက်ကြီး၏ အလယ်တည့်တည့်တွင် လမည်းတောအုပ် တည်ရှိပြီး သားရဲ နတ်ဆိုးများ၏ ခံတပ် နှင့် ကောင်းကင်ဘုံခွေး မျိုးနွယ်၏ မွေးရပ်မြေလည်း ဖြစ်သည်။ ဤနေရာတွင် လနတ်ဆိုး ဧကရာဇ်၏ ဘိုးဘေးများက မျိုးဆက် တစ်ဆက်ပြီးတစ်ဆက် သားရဲ နတ်ဆိုးများအပေါ် အုပ်စိုးခဲ့ကြသည်။ ရှေးကျပြီး ထူးဆန်းသော တောအုပ်အတွင်း ကောင်းကင်နယ်မြေမှ လောလောဆယ် ထွက်ပြေးလာရသော မရေမတွက်နိုင်သည့် နတ်ဆိုးများက ၎င်း၏ အနက်ရှိုင်းဆုံး အပိုင်းရှိ ဂူတစ်ခုရှေ့တွင် ဒူးထောက်နေကြသည်။ ဂူ၏ ဝင်ပေါက်က ချောက်နက်ကြီးတစ်ခုကဲ့သို့ ဟောင်းလောင်းပေါက်ဖြစ်နေပြီး နတ်ဆိုးမြူခိုးဖြင့် လွှမ်းခြုံနေကာ ထူးဆန်းသော ဟိန်းသံများ ပဲ့တင်ထပ်နေသည်။ နတ်ဆိုးများ၏ မျက်နှာများက ဒေါသကြောင့် နီရဲနေပြီး နက်ရှိုင်းသော အမုန်းတရားအောက်တွင် နိမ့်ကျစွာ ဒူးထောက်နေခဲ့ကြသည်။

သူတို့အကြားတွင် ပုံရိပ်နှစ်ခုက ရှေ့ဆုံးတန်းတွင် ထင်ရှားနေပြီး အဖြူရောင်ဝတ်စုံနှင့် မျောက်သူတော်စင်အပြင် မီးလျှံများဖြင့် လွှမ်းခြုံနေသည့် မီးသူတော်စင်လည်း ရှိနေသည်။ ဘိုးဘေးကျောင်းတော် တိုက်ပွဲအပြီးတွင် ယွမ်ရှောင်က ထိပ်တန်း နတ်ဆိုးသူတော်စင်များစွာကို သတ်ဖြတ်ခဲ့သော်လည်း ဤနှစ်ယောက်ကို လွတ်မြောက်ခွင့်ပေး၍ နတ်ဆိုးတိုက်ကြီးထံ ပြန်လည် ထွက်ပြေးခွင့်ပြုခဲ့သည်။

"အတားအဆီးက မူလ အခြေအနေအထိ ပျက်စီး ယိုယွင်းသွားပြီ။ ကပ်ဘေးမတိုင်ခင်က အဆင့်ကို ပြန်လည် ရောက်ရှိဖို့ အလောင်း သန်းပေါင်းများစွာ လိုအပ်တယ်"

မျောက်သူတော်စင်က စိုးရိမ်တကြီးဖြင့် တီးတိုးရေရွတ်သည်။

"ငါတို့ရဲ့ တစ်ခုတည်းသော မျှော်လင့်ချက်က လနတ်သားအပေါ် မူတည်တယ်"

မီးသူတော်စင်က တောက်ပနေသော မျက်လုံးများဖြင့် နတ်ဆိုးဂူသို့ စိုက်ကြည့်နေ၏။

"မင်းက အမုန်းတရား နတ်ဆိုးတစ်ကောင် မဟုတ်ဘူးလား။ ဘာကြောင့် သားရဲ နတ်ဆိုးတွေအတွက် စကားပြောပေးနေတာလဲ"

မျောက်သူတော်စင်က နားမလည်နိုင် ဖြစ်နေသည်။

"ငါက တားမြစ်ကံကြမ္မာကို မင်းထက် ပိုပြီး နားလည်တယ်။ လနတ်သား ပြောတာ မှန်တယ်။ တားမြစ်ကံကြမ္မာ ပိုပြီး အားကောင်းလာလေ၊ သူက တစ်ကိုယ်ကောင်းဆန်လေလေပဲ။ သူ့ကို ငါတို့ရဲ့ မျှော်လင့်ချက်အဖြစ် အားကိုးလိုက်ရင် နောက်ဆုံးမှာ သူက သစ္စာဖောက်ပြီး အရာအားလုံးကို ဝါးမျိုသွားလိမ့်မယ်"

မီးသူတော်စင်က လေးလံစွာ သက်ပြင်းတစ်ချက်ချ၍ ခါးသီးသော အမှန်တရားကို ထုတ်ပြောလိုက်သဖြင့် မျောက်သူတော်စင်၏ အကြည့်အား ပို၍ မှိန်ဖျော့သွားစေခဲ့သည်။

"ဘာပဲဖြစ်ဖြစ် စစ်အင်အား ကြီးကြီးမားမား ထိခိုက်ခဲ့ပေမယ့် ငါတို့ရဲ့ နတ်ဆိုး စစ်တပ်က နတ်ဘုရားတိုက်ကြီး တစ်ခုလုံးရဲ့ လူသား မျိုးနွယ် ပေါင်းစည်းထားတဲ့ အင်အားစုတွေထက် ပိုပြီး အားကောင်းတယ်။ လနတ်သားက ငါတို့နဲ့အတူ ရှိနေသရွေ့ ငါတို့ နောက်ဆုံးမှာ ရယ်မောနိုင်မယ့် အခွင့်အရေးမျိုး ရှိနေသေးတယ်။ ဒီ စစ်ပွဲက ပြီးဆုံးဖို့ အဝေးကြီး လိုသေးတယ်"

မီးသူတော်စင်က ကြုံးဝါးလိုက်ခြင်း ဖြစ်၏။

"ဒါက ပြီးဆုံးဖို့ အဝေးကြီး လိုသေးတယ် ဆိုတာထက် တကယ်တမ်း စကိုမစရသေးဘူး"

မျောက်သူတော်စင်က လေးနက်စွာ ပြောသည်။ ဘိုးဘေးကျောင်းတော်ရှိ နတ်ဆိုးအုပ်စုကို ဘေးဖယ်ထားလိုက်လျှင် နတ်ဆိုး စစ်တပ်သည် ခရမ်းရောင်ကောင်းကင် အင်မော်တယ်စစ်တပ်ကိုသာ ချေမှုန်းခဲ့ပြီး ကောင်းကင်နယ်မြေ၏ တံခါးကိုပင် မထိုးဖောက်နိုင်ခဲ့ပေ။

"အဲ့ဒီလူသားတွေက မိစ္ဆာတွေနဲ့ ပူးပေါင်းနေရင် မကောင်းတဲ့ အဆုံးသတ်နဲ့ သေချာပေါက် ကြုံရလိမ့်မယ်။ ဖြစ်နိုင်တာ ငါတို့တောင် လက်တစ်ဖက် မြှောက်စရာ မလိုဘဲ၊ သူတို့ကိုယ်သူတို့ ဖျက်ဆီးမိကြလိမ့်မယ်"

မီးသူတော်စင်က ပြောသည်။

"သူတို့တွေ နောက်ဆက်တွဲပြဿနာ အခု ကြုံနေရပြီ။ ယွမ်ရှောင်ရဲ့ လျှို့ဝှက်ဆန်းကြယ်တဲ့ ဆရာ သေသွားပြီ။ သူကိုယ်တိုင်လည်း သေသွားနိုင်တယ်"

မျောက်သူတော်စင်က တစ်ချက်တွေး၍ အေးစက်စက် ရေရွတ်ခဲ့သည်။

" မိစ္ဆာတွေက အစွမ်းထက်လွန်းတယ်… ငါ တွေးမိတယ်။ တကယ်လို့ ငါတို့သာ လက်နက်ချခဲ့ရင် မိစ္ဆာတွေဆီမှာ အမှုထမ်းပြီး လူသား မျိုးနွယ်ကို ထိန်းချုပ်နိုင်လောက်လား"

"မင်းရဲ့ ဘဝက အဲ့ဒါလောက်နဲ့ ကျေန​ပ်နေမှာလား"

လောင်ကျွမ်းသူတော်စင်က ခပ်တိုးတိုး မေးခွန်းထုတ်၏။

" မကျေနပ်ဘူး။ ဒါပေမယ့် ငါတို့မှာ အဲ့ဒီ လမ်းကြောင်းကို ပိတ်ဆို့ဖို့ နည်းလမ်း မရှိတော့ဘူး။ အဆုံးမဲ့ ငရဲပြည်ရဲ့ အင်အားက အရမ်း ကြောက်စရာကောင်းတယ်။ ငါတို့ ဒါကို မကိုင်တွယ်နိုင်ဘူး"

မျောက်သူတော်စင်က ကူကယ်ရာမဲ့နေဟန်ဖြင့် ဖြေသည်။

" အဆုံးမဲ့ ငရဲပြည်တစ်ခုတည်း မဟုတ်ဘူး။ အဲ့ဒီဓားကျင့်ကြံသူကလည်း တခြားကမ္ဘာတစ်ခုက ရောက်လာတာပဲ။ ရှေ့ဆက် ဘာတွေ ဖြစ်လာမလဲဆိုတော့ ပိုပြီး ပရမ်းပတာ ဖြစ်လာလိမ့်မယ်"

မီးသူတော်စင်က ကောက်ချက်ချသည်။ နတ်ဆိုးသူတော်စင် နှစ်ယောက်မှာ မျိုးနွယ်၏ အနာဂတ်ကြောင့် ဝန်ပိနေကာ နက်နက်ရှိုင်းရှိုင်း စိုးရိမ်ပူပန်နေကြ၏။

"ဓားကျင့်ကြံသူတွေရဲ့ လောက ပိုပြီး အားကောင်းလာလေလေ၊ ငါတို့ နတ်ဆိုးတွေအတွက် ပိုပြီး အန္တရာယ်များလေပဲ။ ငါတို့ရဲ့ တစ်ခုတည်းသော ထွက်ပေါက်က အဆုံးမဲ့ ငရဲပြည်နဲ့ မဟာမိတ်ဖွဲ့ဖို့ပဲ ကျန်ရစ်တယ်။ ငါ ကြားထားတာသလောက် အဲ့ဒီလမ်းကြောင်းကနေ အားကောင်းတဲ့ ကျင့်ကြံသူတွေ အများကြီး မလာနိုင်ဘူးတဲ့။ နတ်ဆိုး စစ်တပ်နဲ့ အဆင့်နိမ့် နတ်ဆိုးတွေကို စုစည်းလိုက်ရင် ငါတို့က မိစ္ဆာတွေအတွက် အသုံးဝင်နိုင်သေးတယ်"

မျောက်သူတော်စင်က ဂူ၏ အနက်ပိုင်းသို့ စိုက်ကြည့်ရင်း အခြေအနေကို သုံးသပ်ပြနေသည်။

"လနတ်သားကရော ဒီအပေါ်မှာ ဘယ်လို မြင်မလဲ မသိဘူး"

"သူ ထွက်လာတော့မယ်"

မီးသူတော်စင်က ရုတ်တရက် ကြေညာ၍ သူ၏ ခန္ဓာကိုယ်တစ်ခုလုံး မျှော်လင့်ချက်ဖြင့် ပြည့်နှက်နေသည်။ တခဏအတွင်း မရေမတွက်နိုင်သော နတ်ဆိုး စစ်သည်များက သူတို့၏ အကြည့်ကို ဂူဝင်ပေါက်ထံ စုဝေးလိုက်ကြသည်။ ဂူအတွင်းရှိ မည်းနက် တိတ်ဆိတ်သော ပတ်ဝန်းကျင်မှ ငွေရောင် နတ်ဆိုးမြေခွေးတစ်ကောင် ထွက်ပေါ်လာသည်။ ၎င်းက မြေခွေး ပုံစံရှိသော်လည်း ကြီးစိုးလွှမ်းမိုးဟန်ဖြင့် ရှေးဟောင်း အရှိန်အဝါကို ထုတ်လွှတ်နေသည်။ မျောက်သူတော်စင်ပင် ၎င်းကို မြင်ရသည်နှင့်တပြိုင်နက် မျိုးရိုဗီဇအလျောက် ကြောက်ရွံ့မှုတစ်ခု ခံစားခဲ့ရသည်။

"နတ်ဆိုးဧကရာဇ်"

"သူ ​ပိုပြီး အားကောင်းလာတယ်"

မီးသူတော်စင်က မျောက်သူတော်စင်နှင့် အကြည့်တစ်ချက် ဖလှယ်၍ အံ့ဩတကြီး အော်ဟစ်လိုက်သည်။

"သွေးကြာပန်းတောင်ကြား၊ နတ်ဆိုးပိုးမွှား ချောက်နက်၊ ဝိညာဉ်ကြေကွဲ ချောက်ကမ်းပါးကနေ လမည်းတောအုပ်အထိ သူက နေရာတိုင်းမှာ တည်ရှိနေသလိုပဲ။ ကြီးမြတ်တဲ့ နတ်ဆိုးဧကရာဇ် လေးပါးရဲ့ ပျက်စီးအဆီအနှစ်တွေက ဒီလောက် ထိရောက်လိမ့်မယ်လို့ ဘယ်သူ ထင်ထားမှာလဲ"

မျောက်သူတော်စင်က အတွေးနက်ရင်း တုန်လှုပ်နေပြီး ကြောက်လန့်နေသော စိတ်အခြေအနေမှ စိတ်လှုပ်ရှားပျော်ရွှင်မှုအဖြစ် ပြောင်းလဲသွားခဲ့သည်။

"ဘာပဲဖြစ်ဖြစ်၊ လနတ်သားက နတ်ဆိုးတိုက်ကြီးမှာ အထူးခြားဆုံး နတ်ဆိုးပါရမီရှင် ဖြစ်နေတုန်းပဲ။ အချိန်ပေးခဲ့ရင် သူက နတ်ဘုရားတိုက်ကြီးရဲ့ လူသား မျိုးနွယ်ကို သေချာပေါက် အုပ်ချုပ်ပြီး နယ်ခြား လူသားတွေနဲ့ မိစ္ဆာအားလုံးကို သတ်ဖြတ်နိုင်လိမ့်မယ်။ တားမြစ်ကံကြမ္မာက သူ့ရဲ့ တစ်ကိုယ်ကောင်းဆန်တဲ့ ဆန္ဒတွေအတွက် ဒီလို အစွမ်းထက် နတ်ဆိုးတစ်ကောင်ကို သစ္စာဖောက်မှုနဲ့ တမင်စွပ်စွဲခဲ့တာ ဖြစ်ရမယ်"

"နတ်ဆိုးဧကရာဇ်။ ကျွန်တော် မေးပါရစေ၊ နတ်ဆိုးတိုက်ကြီးအတွက် နောက်ထပ် အစီအစဉ်က ဘာများလဲ။ ငါတို့က မိစ္ဆာမျိုးနွယ်ကို အပြည့်အဝ လက်နက်ချပြီး သူတို့ရဲ့ စစ်သည်တွေ ဖြစ်လာရင် နတ်ဘုရားတိုက်ကြီးရဲ့ လူသားတွေနဲ့ နယ်ခြား ဓားကျင့်ကြံသူတွေကို အဆုံးအဖြတ် တိုက်ပွဲတစ်ခု တိုက်ခိုက်ကြမှာလား"

မျောက်သူတော်စင် သတိဖြင့် ချဉ်းကပ်သွား၍ လျှောက်တင်လိုက်သည်။

"အဆုံးမဲ့ ငရဲပြည်နဲ့ ထာဝရ ဓားအကျဉ်းထောင်က နတ်ဆိုးတိုက်ကြီးအတွက် အစွမ်းထက် အင်အားစုတွေပဲ။ ဓားကျင့်ကြံသူတွေက ငါတို့ နတ်ဆိုး မျိုးနွယ်ကို ဓားစက်ကွင်းတွေအဖြစ်သာ မြင်တယ်။ သဘာဝအတိုင်းဆိုရင် သူတို့နဲ့ အတူတကွ မရှင်သန်နိုင်ဘူး။ ဒါပေမယ့်…"

လနတ်သား၏ ငွေရောင် အမွေးများက လေထဲတွင် လှိုင်းထနေပြီး သားရဲ နတ်ဆိုးများ စစ်တပ်အပေါ် အေးစက်စက် ဝေ့ကြည့်လိုက်သည်။

"ဒါပေမယ့် ဘာများလဲ"

မီးသူတော်စင်က စုံစမ်းမေးမြန်းသည်။

"လက်ရှိ အခြေအနေက မရှင်းလင်းဘူး၊ ငါတို့က အကျဘက်ကို ရောက်နေတယ်။ ငါတို့ နှိမ့်နှိမ့်ချချ နေသင့်တယ်။ တကယ်လို့ မိစ္ဆာမျိုးနွယ်က ငါတို့ကို လိုအပ်ခဲ့ရင် သူတို့ကိုယ်တိုင် လာလိမ့်မယ်။ လောကရဲ့ ဝင်ပေါက် လမ်းကြောင်းတွေက ပြောင်းလဲနိုင်တယ်။ ငါတို့က တည်တည်ငြိမ်ငြိမ်နဲ့ စုစည်းနေဖို့ လိုအပ်တယ်။ နတ်ဆိုး စစ်တပ်ရဲ့ အရေအတွက် အားသာချက်ကို ကိုင်ထားပြီး အခွင့်အရေး ပေါ်ပေါက်လာဖို့ စောင့်ဆိုင်းရမယ်"

လနတ်သားက ခပ်တည်တည်ဖြင့် ညွှန်ကြားလိုက်၏။

"ကျိုးကြောင်းဆီလျော်ပါတယ်"

မျောက်သူတော်စင် နှင့် မီးသူတော်စင် နှစ်ဦးစလုံးက သဘောတူညီဟန်ဖြင့် ခေါင်းညိတ်ကြသည်။

"အဲ့ဒီမတိုင်ခင် ငါ့မှာ အရေးကြီးတဲ့ ကိစ္စတွေ လုပ်စရာ ရှိသေးတယ်"

လနတ်သားက လူအသွင်ပြောင်း၍ ဂူအတွင်းမှ ထွက်လာပြီး ပျက်စီးနတ်ဘုရား၏ စိတ်ဆန္ဒကို ကျင့်ကြံပြီးနောက် သူ၏ အမူအရာမှာ ပို၍ပင် လျှို့ဝှက်ဆန်းကြယ်လာသည်။

"ကျွန်တော်တို့က အရှင့်ရဲ့ အမှုတော်ကို ထမ်းဆောင်ဖို့ အသင့်ပါပဲ၊ နတ်ဆိုးဧကရာဇ်၊"

နတ်ဆိုးသူတော်စင်များတွင် နောက်ဆုံးကျန်ရစ်ခဲ့သော မျောက်သူတော်စင် နှင့် မီးသူတော်စင်က ပြိုင်တူ ဦးညွှတ်ကြသည်။

" မင်းတို့ကို လိုအပ်တယ်။ မင်းက တားမြစ်ကံကြမ္မာလက်အောက်မှာ နံပါတ်တစ် ဗိုလ်ချုပ် ဖြစ်ခဲ့တယ်။ သူ အခု ဘယ်မှာ ပုန်းအောင်းနေလဲဆိုတာ မင်း သိရမယ်"

လနတ်သားက မီးသူတော်စင်ရှေ့တည့်တည့်တွင် ရပ်၍ မျက်လုံးများအတွင်း စိုက်ကြည့်နေခဲ့၏။

"ကျွန်တော် မသိပါဘူး"

မီးသူတော်စင်က တစ်ချက်တုန်ရီသွားကာ အဆက်မပြတ် ခေါင်းယမ်းပြခဲ့သည်။

"ဘာကြောင့် ဒီလောက် စိတ်လှုပ်ရှားနေရတာလဲ။ နတ်ဆိုးတိုက်ကြီးအတွက် အတိတ်က ပဋိပက္ခတွေကို ဘေးဖယ်ထားပြီး ငါ သူနဲ့အတူ ပူးပေါင်းနိုင်တယ်။ ထိပ်တန်း နတ်ဆိုးဧကရာဇ်ဖြစ်တဲ့ တားမြစ်ကံကြမ္မာက ငါ့ကို တွေ့ဖို့တောင် သတ္တိ မရှိဘူးလား"

လနတ်သားက အေးစက်စက် ပြောနေစဥ်

မီးသူတော်စင်၏ မျက်လုံးများ ချာချာလည်နေသည်။

"ပြောလိုက်စမ်းပါ"

မျောက်သူတော်စင်က ဝင်ရောက် တိုက်တွန်းသည်။

"တားမြစ်ကံကြမ္မာ ကောင်းကင်နယ်မြေကနေ ပြန်လာကတည်းက ပျောက်ဆုံးနေခဲ့တယ်။ ဒါပေမယ့် သူ မွေးဖွားရာ ဇစ်မြစ်က တားမြစ်ကံကြမ္မာ မီးတောင်ပဲ။ အဲ့ဒီထဲကို ပစ်ချခဲ့တဲ့ မရေမတွက်နိုင်တဲ့ အလောင်းတွေရဲ့ အမုန်းတရားကနေ သူ မွေးဖွားလာတာပါ။ ဒီတစ်ကြိမ်မှာ ဒဏ်ရာ ပြင်းပြင်းထန်ထန် ရသွားလို့ ကုသဖို့ဆိုရင် အဲ့ဒီမီးတောင်ကို သွားနိုင်​ချေရှိပါတယ်"

မီးသူတော်စင်က သူသိထားသမျှကို ဖော်ကောင်လုပ်ခဲ့သည်။

"တားမြစ်ကံကြမ္မာ မီးတောင်ဟုတ်လား"

လနတ်သား မျက်ခုံးပင့်လိုက်မိသည်။

"ဟုတ်ပါတယ်။ ဒါက နတ်ဆိုးတိုက်ကြီးမှာ အန္တရာယ် အကြီးမားဆုံးပဲ။ ကျွန်တော်လည်း တစ်ချိန်က ဒီမီးတောင်အတွင်းထဲမှာ မီးလျှံတစ်ခု ဖြစ်ခဲ့ဖူးတယ်"

မီးသူတော်စင်က ရှင်းပြသည်။

"ကောင်းပြီ။ သူ့ကို ရှာဖို့ ငါ့ကို အဲ့ဒီမီးတောင်ဆီ ခေါ်သွားစမ်း"

လနတ်သားက မီးသူတော်စင်ကို စိုက်ကြည့်လိုက်သည်။

"ဒါ...ဒါက… ကျွန်တော် ကြောက်တယ်"

မီးသူတော်စင်က တွန့်ဆုတ်နေဟန်ဖြင့် တုံ့ဆိုင်းနေသည်။

"သူက မသေနိုင်ဘူးမလား။ ငါ သူ့ကို ဖျက်ဆီးပစ်မှာ မင်း ကြောက်နေတာလား"

လနတ်သားက ခြောက်ကပ်ကပ် ရယ်မော၍ ပြောသည်။

"အဲ့လို မဟုတ်ပေမယ့် တားမြစ်ကံကြမ္မာက မီးတောင်ကို သူ့ရဲ့ မြင့်မြတ်တဲ့ နယ်မြေအဖြစ် သတ်မှတ်ထားပြီး ဘယ်လိုနတ်ဆိုးမဆို ဝင်ရောက်ခွင့် တားမြစ်ထားတယ်။ ချိုးဖောက်သူတွေကို ကွပ်မျက်တယ်"

"မီးသူတော်စင်၊ သူက နတ်ဆိုးတိုက်ကြီးရဲ့ နံပါတ်တစ် နတ်ဆိုးဧကရာဇ် မဟုတ်တော့ဘူး"

လနတ်သား၏ စကားသံက တင်းမာလာသည်။ လက်ရှိ ထိပ်တန်း နတ်ဆိုးဧကရာဇ်က မည်သူဖြစ်ကြောင်း နတ်ဆိုးသူတော်စင် နှစ်ဦးစလုံး ကောင်းကောင်း သိကြသည်။

"ကျေးဇူးပြုပြီး ကျွန်တော့်နောက်ကို လိုက်ခဲ့ပါ"

မီးသူတော်စင်က နောက်ဆုံးတွင် သူ၏ စိတ်ကို ပိုင်းဖြတ်၍ လက်သီးဆုပ်အံကြိတ်ကာ လေးစားသမှုဖြင့် လျှောက်တင်လိုက်၏။

"ဒီမှာ အနားယူပြီး နတ်ဆိုးဧကရာဇ်ရဲ့ အမိန့်ကို စောင့်မျှော်နေကြ"

မျောက်သူတော်စင်က အခြားသားရဲ နတ်ဆိုးများကို အမိန့်ပေးထားခဲ့သည်။

"ဟုတ်ကဲ့"

သားရဲ နတ်ဆိုးများ၏ နာခံတတ်သော သဘောထားအရ နတ်ဆိုးတိုက်ကြီး၏ အုပ်ချုပ်သူက အပြောင်းအလဲဖြစ်သွားကြောင်း ရှင်းလင်းနေသည်။

နတ်ဆိုးတိုက်ကြီး၏ တစ်နေရာတွင် လူသူလေးပါးကင်းရှင်း၍ သစ်ပင်ဟူ၍ မြက်တစ်ပင်တောင် မရှိသော တားမြစ်ကံကြမ္မာ မီးတောင် တည်ရှိ၏။ မီးလောင်ကျွမ်းနေသော မြေပြင်၏ အပူချိန်မှာ အလွန် မြင့်မားသဖြင့် ကျောက်တုံးများမှ မီးခိုး တလူလူ ထွက်နေပြီး လနတ်သားသည် ပျက်စီးအဆီအနှစ်၏ အနံ့ကို ရရှိလိုက်သည်။

"ပျက်စီးအဆီအနှစ်တွေ အများကြီးပဲ။ အဆင့်နိမ့်တာတွေလည်း မဟုတ်ဘူး"

သူက ခြေဗလာဖြင့် လမ်းလျှောက်သွား၍ နူးညံ့သိမ်မွေ့ပုံရသော အသွေးအသား ခန္ဓာကိုယ်မှာ ချော်ရည်ပေါ်တွင် ဖြတ်နင်းနေသော်လည်း မထိခိုက်ပေ။ ထိုမြင်ကွင်းတစ်ခုတည်းကပင် မီးသူတော်စင် နှင့် မျောက်သူတော်စင်ကို အံ့ဩတကြီးဖြင့် ကြောက်လန့်တကြား ဖြစ်သွားစေခဲ့သည်။ ယွမ်ရှောင်က လနတ်သားကို နတ်ဆိုးတိုက်ကြီးတွင် လျင်မြန်စွာ အဆင့်တက်နိုင်ရန် ပို့လွှတ်လိုက်သော အကြောင်းရင်းတစ်ခု ရှိ၏။ နတ်ဆိုးဧကရာဇ် ငါးပါး နှင့် နတ်ဆိုး မျိုးနွယ်တစ်ခုလုံးသည် အသိုက်အမြုံများအတွင်း ပျက်စီးအဆီအနှစ် အများဆုံးကို သိုဝှက်ထားသည်။ လက်ရှိတွင် လနတ်သားက နတ်ဆိုးဧကရာဇ် လေးယောက် ချန်ထားရစ်ခဲ့သော ပျက်စီးအဆီအနှစ်ကို ရရှိထားပြီးဖြစ်သည်။ မရေမတွက်နိုင်သော နတ်ဆိုး မျိုးဆက်များ လက်ဆင့်ကမ်းလာသည့် အမွေအနှစ်ကို အပိုင်သိမ်းယူ၍ ဝါးမျိုရန် သူ တုံ့ဆိုင်းမနေခဲ့ချေ။ ပျက်စီးအဆီအနှစ် တည်ရှိနေသရွေ့ နတ်ဆိုးများက မျိုးဆက်တိုင်းတွင် ပို၍ အားကောင်းလာနိုင်ပြီး လူသားမျိုးနွယ်အတွက် ဘေးအန္တရာယ်တစ်ခု ဖြစ်လာနိုင်သည်။ ထို့ကြောင့် ယွမ်ရှောင်က နတ်ဆိုး ပြဿနာကို အမြစ်မှ ဆွဲနုတ်ကာ ထိထိရောက်ရောက် ကိုင်တွယ်ဖြေရှင်းလိုခြင်း ဖြစ်၏။

နတ်ဆိုးသူတော်စင် တစ်ရာကျော် နှင့် နတ်ဆိုးဧကရာဇ် လေးယောက် ပိုင်ဆိုင်သော ပျက်စီးအဆီအနှစ်ကို စုပ်ယူပြီးနောက် ပျက်စီးနတ်ခန္ဓာက အဆင့်နှစ်ဆင့် မြင့်တက်သွားကာ နတ်ဆိုးသူတော်စင် နယ်ပယ် တည်ထောင်ခြင်း အဆင့်မှ နတ်ဆိုးဧကရာဇ် နယ်ပယ်၏ အလယ်အလတ် အဆင့်အထိ တိုးတက်သွားသည်။ လက်ရှိအင်အားဖြင့် တိုက်ခိုက်ရလျှင် နတ်ဆိုးဧကရာဇ် လေးယောက်ကို သတ်ဖြတ်ခြင်းမှာ လနတ်သားအတွက် ကြက်များကို သတ်ဖြတ်သကဲ့သို့ လွယ်ကူပေလိမ့်မည်။ ဤအချက်မှာ မျောက်သူတော်စင် နှင့် မီးသူတော်စင်က သူ့ကို အလွန်အမင်း ကြောက်လန့်နေကြသော အကြောင်းရင်းအတိအကျ ဖြစ်သည်။ တစ်ဖက်လူက သူတို့ကို သတ်လိုလျှင် ကြက်ဥတစ်လုံးကို ဖိချေပစ်လိုက်သည်နှင့် ကွာခြားမည် မဟုတ်ချေ။

လနတ်သားသည် နတ်ဆိုးတိုက်ကြီးတွင် တားမြစ်ကံကြမ္မာ စုဆောင်းထားသော ပျက်စီးအဆီအနှစ်များထံ ရောက်ရှိလာသည်။ ကန့်သတ်ထားသော နယ်မြေသို့ ခြေချရန် မျောက်သူတော်စင် နှင့် မီးသူတော်စင်က ရှေ့ဆက်မတိုးရဲသည့်အပြင် စိုးရိမ်ပူပန်ဟန် အကြည့်များကြောင့် တားမြစ်ကံကြမ္မာကို ယခုအထိ ကြောက်လန့်နေကြောင်း သိသာသည်။

"ဒီမှာ နေခဲ့ကြ"

လနတ်သားက သူတို့၏ စွမ်းဆောင်ရည်အပေါ် တော်တော်လေး ကျေနပ်နေသဖြင့် ဂယ်ပေါက်တစ်ခု ဖွင့်ပေးခဲ့သည်။

" နတ်ဆိုးဧကရာဇ်နဲ့ တားမြစ်ကံကြမ္မာဧကရာဇ် လက်တွဲပြီး၊ နတ်ဆိုးတိုက်ကြီးကို ပြန်လည် ရှင်သန်စေဖို့၊ မိစ္ဆာတွေကို နှင်ထုတ်ပြီး ပုန်ကန်တတ်တဲ့ လူသားတွေကို ဖိနှိပ်နိုင်ဖို့ ကျွန်တော် ဆုတောင်းပေးပါတယ်"

မျောက်သူတော်စင်က သူ၏စိတ်ထဲမှ ကြီးကျယ်ခမ်းနားသော ဆန္ဒကို ထုတ်ဖော်ပြောကြားသည်။

"စိတ်မပူပါနဲ့။ ဒါက တကယ် ဖြစ်လာမှာပါ"

လနတ်သားက အနည်းငယ် ပြုံးပြ၍ မီးတောင်အဝကို ရှာဖွေရန် မီးခိုးများအကြား ခရီးဆက်သွားခဲ့၏။

"ပျက်စီးအဆီအနှစ်ရဲ့ အနံ့။ အရေအတွက် အများကြီးပဲ"

လနတ်သား၏ မျက်လုံးများ တောက်ပနေကာ မီးတောင်အတွင်း ခုန်ချလိုက်သောအခါ အောက်သို့ ကြည့်လိုက်လျှင် ပျက်စီးအဆီအနှစ်နှင့် မီးလျှံများ ပြည့်နှက်၍ အဆုံးမရှိသော မီးခိုးများ ဖုံးလွှမ်းထားသည့် လောကကြီးတစ်ခုကို မြင်တွေ့လိုက်ရသည်။ ၎င်းအတွင်း တိတ်ဆိတ်နေသော်လည်း ငိုညည်းသံများ ပျံ့နှံ့နေကာ ချော်ရည်ကျောက်များဖြင့် သဲကန္တာရဆန်ဆန် ဖွဲ့စည်းထား၏။ မျက်စိတဆုံး ကျယ်ဝန်းသော ပတ်ဝန်းကျင်၌ ပျက်စီးအဆီအနှစ်များစွာ ရှိနေသဖြင့် လနတ်သား၏ ပျက်စီးနတ်ခန္ဓာသည် စိတ်လှုပ်ရှားမှုကြောင့် ပွက်ပွက်ဆူလာခဲ့လေသည်။